1, 2. Raws li 1 Petus 4:7, 8, yuav ua li cas peb thiaj peem dhau kev txomnyem?

LUB sijhawm uas tiam kawg yuav xaus los ze zuj zus lawm, tej zaum peb yuav raug kev txomnyem ntau zuj zus tuaj. (2 Timautes 3:1) Xws li tom qab kev sib tw ua nom tswv hauv ib lub tebchaws nyob sab Afika, tau muaj kev sib ntaus sib tua hnyav heev. Peb cov kwvtij nkauj muam uas nyob rau thaj tsam muaj kev sib ntau sib tua tawm mus tsis tau ywj siab ntev li 6 lub hlis. Lawv tau ua li cas lawv thiaj peem dhau tej kev txomnyem no? Muaj ib txhia mus nrog lwm cov kwvtij nkauj muam nyob rau tej thaj tsam tsis muaj kev sib ntaus sib tua. Ib tug kwvtij hais tias: “Tej lub sijhawm zoo li no mas kuv zoo siab heev tias kuv muaj tej phoojywg zoo nrog kuv. Peb ib leeg txhawb tau ib leeg lub zog.”

² Thaum lub sijhawm uas txomnyem kawg nkaus los txog, peb yuav zoo siab heev yog tias muaj cov phoojywg zoo uas txawj sib hlub. (Tshwmsim 7:14) Yog li ntawd, thiaj tseem ceeb heev rau peb ntaus phoojywg zoo tamsim no nrog peb cov kwvtij nkauj muam. (Nyeem 1 Petus 4:7, 8.) Peb kawm tau ntau yam los ntawm Yelemis. Ua ntej Yeluxalees raug kev puas tsuaj, nws tej phoojywg yog cov uas pab nws. * Peb yuav xyaum Yelemis li cas?

3. (1) Muaj dabtsi ua kom Yelemis xav nyob ib leeg twm zeej? (2) Yelemis qhia dabtsi rau Npalus, thiab qhov ntawd pab tau nkawd li cas?

³ Yelemis nrog cov neeg uas tsis muab siab npuab Yehauvas nyob koom zej koom zos tau li 40 tawm xyoo. Cov neeg nyob  hauv lub nroog Anathaus ib txhia kuj yog nws cov txheeb ze. (Yelemis 11:21; 12:6) Txawm nws nyob nrog cov neeg uas tsis mloog Yehauvas lus los nws tsis twm zeej. Yelemis qhia siab hlo rau Npalus tus uas teev ntawv rau nws. Tej uas Yelemis raug tau muab sau cia rau hauv Vajtswv Txojlus. (Yelemis 8:21; 9:1; 20:14-18; 45:1) Lub caij uas Yelemis piav nws lub neej rau Npalus sau, ua rau nkawd sib raug zoo thiab ib leeg hwm ib leeg.​—Yelemis 20:1, 2; 26:7-11.

4. (1) Yehauvas txib kom Yelemis ua dabtsi? (2) Tes haujlwm no pab Yelemis thiab Npalus nkawd txojkev sib raug zoo li cas?

⁴ Yelemis ua siab tawv qhawv mus ceeb toom cov Yixalayees tau ntau xyoo tias Yeluxalees yuav raug kev puas tsuaj. (Yelemis 25:3) Tsis tas li ntawd xwb, Yehauvas tseem txib kom Yelemis muab tag nrho Nws tej lus ceeb toom sau rau ib thooj ntawv seb cov Yixalayees puas yuav tso lawv tej kev txhaum tseg. (Yelemis 36:1-4) Yelemis thiab Npalus nkawd ua Yehauvas tes haujlwm no tau ntau lub hlis. Thaum ntawd, nkawd ib leeg yeej txhawb tau ib leeg txojkev ntseeg kawg li.

5. Ua li cas Npalus thiaj li yog ib tug phoojywg zoo rau Yelemis?

⁵ Thaum sau tau thooj ntawv tiav lawm, Yelemis hais kom nws tus phoojywg Npalus coj mus nyeem rau sawvdaws mloog. (Yelemis 36:5, 6) Npalus ua raws li Yelemis hais. Xav seb Yelemis zoo siab npaum li cas thaum Npalus coj thooj ntawv mus nyeem rau sawvdaws mloog tom lub Tuamtsev raws li Yelemis tau txib nws. (Yelemis 36:8-10) Thaum Yudas tej nom tswv hnov txog qhov Npalus tau ua, lawv txawm hais kom nws cia li coj thooj ntawv mus nyeem rau lawv mloog thiab. (Yelemis 36:14, 15) Tom qab ntawd, cov nom tswv hais tias lawv yuav tsum mus qhia rau Vajntxwv Yehauyakees paub txog tej uas Yelemis tau hais. Tiamsis ua ntej lawv mus, lawv hais rau Npalus tias: “Koj thiab Yelemis cia li khiav mus nkaum;  tsis txhob pub leejtwg paub hais tias neb nyob qhov twg li.” (Yelemis 36:16-19) Zoo kawg li uas lawv tau qhia kom Yelemis thiab Npalus mus khiav nkaum.

6. Yelemis thiab Npalus ua li cas thaum nkawd raug kev tawm tsam?

⁶ Thaum Vajntxwv Yehauyakees hnov tej lus uas Yelemis muab sau rau thooj ntawv mas nws npau taws heev, nws thiaj muab kiag thooj ntawv hlawv kub hnyiab tas thiab kom lawv mus ntes Yelemis thiab Npalus nkawd. Tiamsis Yelemis tsis ntshai. Yelemis muab dua ib thooj ntawv rau Npalus thiab rov qab hais Vajtswv cov lus ceeb toom. Npalus thiaj “sau txhua yam lus raws li cov lus uas [Yelemis] piav rau nws sau rau thawj thooj ntawv lawm.”​—Yelemis 36:26-28, 32.

7. Thaum Yelemis thiab Npalus ua haujlwm ua ke pab tau nkawd li cas?

⁷ Cov neeg uas raug kev txomnyem ua ke yeej muaj kev sib raug zoo dua. Yog li ntawd, thaum Yelemis thiab Npalus nkawd rov sau dua thooj ntawv tshiab hajyam ua rau nkawd ib leeg paub ib leeg zoo dua qhov qub thiab sib raug zoo heev. Peb kawm tau li cas ntawm 2 tug phoojywg zoo no?

8. (1) Ua cas nyuaj rau tej tug nrog lwm tus sib raug zoo? (2) Ua cas peb yuav tsum ntaus phoojywg nrog cov kwvtij nkauj muam tamsim no?

⁸ Yav tas los yog muaj neeg ua rau peb tu siab lawm yuav tsis yoojyim rau peb qhia siab rau lwm tus. (Pajlug 18:19, 24) Lossis peb xav tias peb tsis muaj sijhawm thiab laj laj mus ntaus phoojywg. Txawm li ntawd los peb yuav tsum rau siab ntso ntau phoojywg nrog cov kwvtij nkauj muam. Thaum peb raug kev txomnyem, lawv thiaj txhawb tau peb zog. Tiamsis yog peb xav nrog lawv sib raug zoo, peb yuav tsum qhia siab rau lawv.​—1 Petus 1:22.

9. (1) Yexus ua li cas qhia tias nws tso siab rau nws cov phoojywg? (2) Vim li cas thaum koj qhia siab rau lwm tus koj thiaj ntaus tau phoojywg zoo? Piav ib tug qauv.

⁹ Yexus qhia txhua yam rau nws cov phoojywg, tsis zais ib qho li. (Yauhas 15:15) Peb xyaum ua li Yexus thaum peb qhia lwm tus txog peb tej kev zoo siab, kev chim siab, thiab kev txhawj xeeb. Ua tib zoo mloog thaum lwm tus nrog koj tham, tej zaud koj yuav pom tias neb muaj ib txojkev xav thiab nyiam ib yam. Zoo li ib tug muam hu ua Xee Dim (Cindy) uas muaj 29 xyoos. Nws ntaus phoojywg nrog ib tug muam uas muaj 67 xyoo hu ua Malis Luvis (Marie-Louise). Nkawd mus tshaj tawm ua ke txhua txhua Hnub 4 thaum sawv ntxov. Nkawd tham txog ntau tsav ntau yam. Xee Dim hais tias: “Thaum kuv nrog kuv cov phoojywg tham txog tej yam uas tseem ceeb ua rau peb ib leeg paub ib leeg zoo dua ntxiv.” Zoo ib yam li  Xee Dim, yog koj xub mus nrog lwm tus tham ces koj yuav ntau tau phoojywg nrog lawv. (Pajlug 27:9) Thaum koj qhia siab rau koj cov phoojywg thiab ua zoo mloog lawv tham ces nej yuav muaj kev sib raug zoo dua.

10. Raws li Pajlug 27:17, vim li cas thiaj zoo rau peb nrog peb cov kwvtij nkauj muam mus tshaj tawm ua ke?

¹⁰ Zoo ib yam li Yelemis thiab Npalus nkawd, thaum peb nrog cov kwvtij nkauj muam mus tshaj tawm ces peb yuav paub lawv zoo, kawm tau ntawm lawv, thiab ncawg lawv dua. (Nyeem Pajlug 27:17.) Thaum koj mus tshaj tawm nrog ib tug phoojywg es koj pom tias nws tsis ntshai piav nws txojkev ntseeg thiab muaj siab zim qhia txog Yehauvas thiab nws lub ntsiab, ua rau koj xav li cas xwb? Yeej ua rau koj hajyam nrog nws sib raug zoo thiab xav nrog nws ua ke.

11, 12. Ob tug qauv no qhia li cas tias thaum peb mus tshaj tawm nrog lwm tus pab tau peb sib ncawg?

¹¹ Peb yuav kawm txog 2 tug qauv seb thaum mus tshaj tawm nrog lwm tus pab tau peb sib ncawg li cas. Muaj 2 tug muam hu ua Adelais (Adeline) thiab Kheedi (Candice) uas sib raug zoo heev. Tus muam Adelais uas muaj 23 xyoos nug seb Kheedi puas kam nrog nws mus tshaj tawm rau thaj tsam uas tsis tshua muaj neeg mus. Adelais hais tias, “Wb xav mus tshaj tawm ntau thiab muaj siab mus qhia Vajlugkub dua qhov qub. Thiab wb xav sib txhawb zog kom thiaj ua tau Yehauvas tes haujlwm ntau ntxiv.” Qhov uas nkawd mus tshaj tawm ua ke pab tau nkawd li cas? Adelais hais tias, “Thaum wb mus tshaj tawm ib hnub rov los, wb nyiam tham seb hnub ntawd mus zoo li cas, tej wb tham nrog lwm tus txhawb tau wb li cas, thiab Yehauvas coj wb kev li cas. Qhov uas wb niaj hnub sib tham li no ua rau wb ib leeg paub ib leeg zoo dua tuaj.”

¹² Muaj 2 tug muam tsis tau muaj txiv hu ua Laij Lam (Laïla) thiab Malis-anam (Marianne) uas nyob Fab Kis teb. Nkawd mus qhia Vajlugkub tau 5 lub limtiam ua ke hauv lub nroog Npoob Nkim (Bangui) hauv plawv Afika teb (Central African Republic). Laij Lam hais tias, “Muaj ntau yam uas Malis-anam wb tsis zoo sib  xws. Tiamsis vim wb ib leeg yeej hlub ib leeg tiag tiag thiab ib leeg txawj hais lus rau ib leeg, wb thiaj sib raug zoo heev.” Nws hais ntxiv tias, “Thaum kuv pom Malis-anam paub yoog lwm tus, muaj kev hlub rau cov neeg hauv lub tebchaws ntawd, thiab rau siab ntso mus tshaj tawm, ua rau kuv hajyam saib taus nws.” Koj tsis tas yuav mus tshaj tawm txawv tebchaws kom thiaj muaj phoojywg zoo. Txhua zaus koj mus tshaj tawm nrog cov kwvtij nkauj muam hauv zej zog koj yuav paub lawv zoo dua qub thiab muaj kev sib raug zoo nrog lawv ntau zuj zus tuaj.

13. Yuav muaj li cas thaum peb niaj hnub nrog cov kwvtij nkauj muam ua Vajtswv tes haujlwm ua ke?

¹³ Thaum peb niaj hnub nrog cov kwvtij nkauj muam ua Vajtswv tes haujlwm, peb yuav paub tias lawv yog ib tug neeg zoo li cas. Dabtsi yuav pab peb nrog lawv ua phoojywg txawm tias lawv pheej ib sij ua yuam kev ib zaug? Cia peb rov mus saib Yelemis tus qauv seb ua li cas nws thiaj xam pom cov phoojywg qhov zoo xwb thiab zam txim rau lawv thaum lawv ua yuam kev.

14. (1) Yelemis kawm tau li cas txog Yehauvas? (2) Tej uas nws kawm tau ntawd pab tau nws li cas?

¹⁴ Yelemis yog tus sau phau Yelemis. Tej zaum nws kuj yog tus sau phau 1 thiab 2 Vajntxwv hauv phau Vajlugkub thiab. Yog li ntawd, nws yeej pom tias Yehauvas khuvleej noob neej npaum li cas. Yelemis paub tias thaum Vajntxwv Ahaj tso nws txojkev phem tseg lawm, Yehauvas tsis tso sub tawg sub ntsha los rau nws tiam neej tiamsis thaum txog nws tus tub tiam Yehauvas mam tso sub tawg sub ntsha los rau Ahaj tsevneeg. (1 Vajntxwv 21:27-29) Yelemis kuj paub txog Vajntxwv Manaxes lub neej thiab. Nws paub tias txawm Vajntxwv Manaxes ua txhaum Yehauvas ntau tshaj Vajntxwv Ahaj los Yehauvas tseem zam txim thaum nws rov ntxeev dua siab tshiab. (2 Vajntxwv 21:16, 17; 2 Xwmtxheej Vajntxwv 33:10-13) Yelemis thiaj xyaum ua siab ntev thiab khuvleej nws cov phoojywg rau qhov Yehauvas tau khuvleej Vajntxwv Ahaj thiab Vajntxwv Manaxes.​—Phau Ntawv Nkauj 103:8, 9.

15. Thaum Npalus tsis muaj siab ua Yehauvas tes haujlwm, Yelemis xyaum ua siab ntev li Yehauvas li cas?

¹⁵ Thaum Npalus tsis muaj siab ua Yehauvas tes haujlwm tau ib nyuag ntu, Yelemis ua li cas xwb? Yelemis tsis maj xav tias Npalus yuav tsis hloov, tiamsis nws ua zoo qhia tej lus uas Yehauvas hais rau Npalus. (Yelemis 45:1-5) Peb kawm tau li cas txog qhov no?

16. Raws li Pajlug 17:9, peb yuav tuav peb txojkev phoojywg kom ruaj khov li cas?

¹⁶ Qhov tseeb tiag peb cov kwvtij nkauj muam ua tsis tau txhua yam zoo. Yog li ntawd, thaum peb sib raug zoo lawd, peb yuav tsum tuav txojkev phoojywg kom ruaj khov. Yog lawv ua yuam kev li cas lawm, tej thaud peb yuav tau muab Vajtswv Txojlus coj los ntuas lawv. (Phau Ntawv Nkauj 141:5) Yog lawv ua rau peb chim siab los zam txim rau lawv. Thaum zam txim lawd, peb yuav tsum tsis txhob muab rov los hais ntxiv rau lawv lossis rau lwm tus lawm. (Nyeem Pajlug 17:9.) Lub caij peb nyob tamsim no, tseem ceeb heev rau peb xam pom tej yam zoo uas cov kwvtij nkauj muam ua tau es tsis txhob xam pom tej uas lawv ua tsis tau nkaus xwb. Yog peb xam pom qhov zoo xwb, peb txojkev phoojywg yuav ruaj khov. Yog peb coj li no, thaum lub sijhawm uas txomnyem kawg nkaus los txog peb thiaj li muaj phoojywg zoo.

17. Thaum muaj kev nyuaj siab, Yelemis ua li cas qhia tias nws yog ib tug phoojywg zoo?

¹⁷ Yelemis tus phoojywg Enpemelej tau pab cawm nws dim txojkev tuag hauv lub qhov  tshij tob tob thiab nkos heev. Tiamsis tom qab ntawd Enpemelej nyuaj siab kawg li vim nws ntshai tsam Yudas cov nom tswv tuaj ua phem. Yelemis ua li cas xwb thaum nws hnov xov tias Enpemelej ntshai? Yelemis yeej tsis nyob ntsiag to seb nws tus phoojywg puas yuav peem dhau. Txawm Yelemis raug kaw los nws tseem mus txhawb Enpemelej. Yelemis qhia nws tus phoojywg tias Yehauvas yuav tsis cia tej neeg phem ua li cas rau nws. (Yelemis 38:7-13; 39:15-18) Thaum muaj kev nyuaj siab, Yelemis qhia tias nws yeej yog ib tug phoojywg zoo.

18. Raws li Pajlug 17:17, peb yuav ua li cas thaum peb ib tug phoojywg raug kev txomnyem?

¹⁸ Niaj hnub no, peb cov kwvtij nkauj muam raug kev txomnyem nyuaj siab ntau yam. Tej zaum lawv raug kev txomnyem vim kev tsov kev rog lossis raug xwm txheej phem. Thaum peb cov kwvtij nkauj muam raug kev txomnyem li no, peb kuj coj tau lawv los nrog peb nyob lossis muab nyiaj txiag pab lawv. Tsis tas li ntawd xwb, peb txhua leej txhua tus yeej thov tau Yehauvas pab lawv. Yog muaj ib tug kwvtij lossis ib tug muam raug kev nyuaj siab lossis qaug zog, tej zaum peb yuav tsis paub xyov yuav txhawb lawv li cas. Txawm li ntawd los yeej muaj ntau yam peb tseem ua tau los txhawb lawv. Peb mus nrog lawv nyob ib chim, mloog lawv piav tej kev nyuaj siab, lossis nyeem ib nqis Vajlugkub rau lawv. (Yaxayas 50:4) Qhov tseem ceeb tshaj ces yog thaum peb cov phoojywg cheem tsum kev pab, peb yeej nyob ntawd pab.​—Nyeem Pajlug 17:17.

19. Vim li cas peb yuav tsum ntaus phoojywg nrog peb cov kwvtij nkauj muam tamsim no?

¹⁹ Peb yuav tsum ntaus phoojywg nrog peb cov kwvtij nkauj muam tamsim no thiab tsis txhob tu kev phoojywg nrog lawv. Vim li cas? Vim peb cov yeeb ncuab yuav dag ntxias kom peb tawg ua sab ua sua thiab tsis sib ntseeg siab. Txawm lawv yuav ua npaum li cas los lawv yuav nkim lawv lub zog xwb. Lawv yeej txwv tsis tau peb txojkev hlub rau peb cov kwvtij nkauj muam. Tsis muaj ib yam dabtsi yuav rhuav tau peb txojkev sib raug zoo nrog peb cov phoojywg. Tsis yog peb yuav ua phoojywg rau tiam kawg no xwb tiamsis peb yuav ua phoojywg mus tas ib txhiab ib txhis.