1-2. Petrusip al­lagai siul­liit 4:7, 8 naaper­torlugit atugarliuuteqar­nitsin­ni suna iluaqutigis­savar­put?

‘UL­LUT kingul­liit’ naggatis­saat qanil­liar­tor­til­lugu atugarliuuteqar­nerulis­saagut. (2 Tim 3:1) As­sersuutigalugu nunami Afrikap kitaaniit­tumi qineq­qusaar­nerup kingor­na akersuun­ner­talim­mik eq­qis­siviil­lior­titsisoqar­poq. Qatan­ngutivut akersuuf­fiusumiik­kamik ukiup af­faa sin­nerlugu ulorianar­torsiorsimap­put. Atuk­kamik erloqinar­tut naam­magalugit ator­nis­saan­nut suna iluaqutigaat? Ilaat qatan­ngutinut eq­qis­sisimaf­fiunerusuni najugalin­nut qimar­ngusariaqarsimap­put. Qatan­ngut angut oqalut­tuar­poq: “Taamatut pisoqar­nerani qujamasuutigeqaara ikin­ngutik­ka najorsin­naagak­kit. Tamat­tami im­mitsin­nut qiim­mas­saqatigiis­sin­naagat­ta.”

² ‘An­nikil­lior­titaangaar­nis­saq’ nal­liup­pat uagutsin­nik asan­nit­tunik ikin­nguteqar­ner­put qujamasuutigingaas­savar­put. (Saqq 7:14) Taamaat­tumik maan­nangaaq ikin­ngutigiin­nermik ineriar­tor­titsinis­saq pingaaruteqangaar­poq. (1 Petrusi 4:7, 8 atuakkit). Jeremiap misigisai ilin­niarfigil­luarsin­naavavut. Jerusalemip piuneerus­saangajaler­nerata nalaani ikin­ngutiminit ikior­neqar­tarsimavoq. * Jeremia qanoq ilaarsin­naavar­put?

3. (a) Jeremia suut pis­sutigalugit al­lanit im­mik­koor­niarsimasin­naagaluar­pa? (b) Jeremiap al­latsiminut Barukimut suut oqalut­tuarai qanorlu kinguneqar­tumik?

³ Jeremia min­ner­paamik ukiuni 40-ni inuit ilumoorfigin­nin­ngitsut,  ilaatigut peroriar­torfim­mini Anatotimi sanilerinikuusami ilimanar­tumil­lu ilaqut­tami, akor­nan­ni inuusimavoq. (Jer 11:21; 12:6) Taamaak­kaluar­toq al­lanit im­mik­koor­niarsarin­ngilaq. Al­laat al­latsini ilumoorfigin­nit­toq Baruki misigis­sutsiminik an­nis­sivigaa, tamak­kulu al­lan­neqarsimam­mata uagut­taaq qanoq misigisimanersoq paasisin­naavar­put. (Jer 8:21; 9:1; 20:14-18; 45:1) Barukip Jeremiap misigisar­pas­suisa al­lat­tor­tar­nerini im­min­nut asaqatigiin­nermik ataq­qeqatigiin­nermil­lu ineriar­tor­titsip­put. – Jer 20:1, 2; 26:7-11.

4. Jehovap Jeremia qanoq peq­quaa, taman­nalu Jeremiap Barukil­lu ikin­ngutigiin­neran­nut qanoq nakus­satsis­sutaava?

⁴ Ukior­pas­suar­ni Jeremia sapiil­luni Jerusalemip qanoq pineqar­nis­saa pil­lugu Israelik­kut mianersoq­quai. (Jer 25:3) Jehovap inuit al­lamik isumataar­tik­kusul­lugit mianersoq­qus­sutsini Jeremiamut aam­ma al­laq­quai. (Jer 36:1-4) Qaam­matini arlalin­ni suliamik tamatumin­nga qanimut suleqatigiin­nermin­ni Jeremiap Barukil­lu oqaloqatigiit­tar­ner­tik qular­nan­ngitsumik up­per­nik­kut nakus­satsis­sutigisimas­savaat.

5. Barukip Jeremiamut ikin­ngutaal­luar­nini qanoq ersersip­paa?

⁵ Al­lak­kat imusat naam­masigamik­kit Jeremiap tatigisariaqar­paa ikin­ngutimi Barukip oqariar­tuut inun­nut an­ngutis­sagaa. (Jer 36:5, 6) Suliaq taman­na ulorianar­torsior­titsisin­naagaluar­toq Barukip sapiil­luni naam­mas­sivaa. Takorloorsin­naaviuk Jeremia qanoq tul­luusimaar­tigisimas­sasoq Baruki naalaf­fiup silarlianukarmat peq­quneqar­nermisut ilioriar­torluni? (Jer 36:8-10) Judami naalagar­tat tamarmik Baruki qanoq iliorsimasoq tusaramik­ku al­lak­kanit imusanit atuf­fateq­qup­put. (Jer 36:14, 15) Naalagar­tat aalajanger­put Jeremiap oqariar­tuutaa kun­ngimut Jojakimimut ingerlateq­qin­niarlugu. Taamaat­tumik Baruki ima oqarfigaat: “Iser­torfis­sarsior­niaritsi  il­lit Jeremialu, sumiis­susersilu kimul­luun­niit ilisimatin­nagu.” (Jer 36:16-19) Taman­na siun­nersuutitsialaavoq!

6. Jeremia Barukilu akerlilersor­neqaramik qanoq ilior­pat?

⁶ Kun­ngip Jojakimip Jeremiap al­latai tusaramigit kamaam­mingaarami al­lak­kat imusat ikual­lap­pai peq­qusil­lunilu Jeremia Barukilu tigusarineqas­sasut. Jeremiali ersilin­ngilaq. Map­persak­kamik al­lamik tiguseriarluni Barukimut tun­niup­paa. Jeremiap Jehovap oqariar­tuutaa Barukimut uteq­qip­paa, taas­sumalu “map­persak­kami Jojakimip Judap kun­ngiata ikual­lagaani al­las­simasut tamaasa al­lat­tor­pai”. – Jer 36:26-28, 32.

7. Jeremiap Barukil­lu suleqatigiin­nerat qanoq kinguneqarunar­pa?

⁷ Inuit akerlilersor­neqar­nermin­ni piner­tusaaqatigiit­tut amerlaner­tigut im­mik­kut it­tumik ataqatigiiler­tar­put. Taamaat­tumik takorloorsin­naavar­put al­lak­kat imusat kun­ngimit Jojakimimit piujun­naarsin­neqar­tut al­laq­qik­kamik­kit Jeremia Barukilu im­min­nut qanin­nerulerlutil­lu ikin­ngutigiil­luar­nerulersimas­sasut. Angutit taak­ku aalajaatsut marluk maligas­siuinerat qanoq ilin­niarfigisin­naavar­put?

8. Qanimut ikin­nguteqaler­nis­samut suna akor­nutigisin­naavar­put, aam­ma sooq sulis­sutigiuaan­nas­savar­put?

⁸ Sior­natigut ajual­latsin­neqarsimaner­put pis­sutigalugu im­maqa al­lanut am­mar­nis­saq saper­nar­tip­par­put. (Uss 18:19, 24) Im­maqaluun­niit misigivugut qanimut ikin­nguteqaler­nis­samut nukis­saqar­natalu pif­fis­saqar­nata. Sulis­sutigiuaan­nas­savar­pul­li. Akerlilersor­neqar­nermi qatan­ngutitsin­nit tapersersor­neqarusuk­kut­ta eq­qarsaatitsin­nik misigis­sutsitsin­nil­lu oqalut­tuut­tar­nis­saat mas­sak­kut ilin­niar­tariaqar­par­put. Taamaalior­nis­saq ilumoor­tunik ikin­nguteqaler­nis­samut pingaaruteqangaar­poq. – 1 Petr 1:22.

9. (a) Jiisusip ikin­ngutiminik tatigin­nin­nini qanoq ersersip­paa? (b) Am­masumik oqaloqateqar­neq ikin­ngutigiin­nermik ineriar­tor­titsinis­san­nut qanoq iluaqutigisin­naaviuk? As­sersuuteqarit.

⁹ Jiisusip ikin­ngutiminik tatigin­nin­nini ersersip­paa am­masumik oqaluut­tar­nerisigut. (Joh 15:15) Nuan­narisatsin­nik, er­numas­sutigisatsin­nik pakatsis­sutigisatsin­nil­lu ikin­ngutivut oqalut­tuuk­kaangatsigit Jiisusi ilaar­tar­par­put. Al­lap oqaluuk­kaangatit tusar­naaq­qis­saar­taruit im­maqa paasis­savat as­sigiim­mik eq­qarsaateqarlusilu, misigis­suseqarlusilu anguniagaqar­tusi. Cindy 29-nik ukiulik eq­qarsaatigeriaruk. Taas­suma pioneri Marie-Louise 67-inik ukiulik ikin­ngutigiler­paa. Sisaman­ngor­nerit tamaasa ul­laak­kut oqaluus­seqatigiit­tar­put as­sigiin­ngitsor­pas­suil­lu pil­lugit am­masumik oqaloqatigiit­tarlutik.  Cindy ima oqalut­tuar­poq: “Ikin­ngutin­nik itisuunik oqaloqateqar­tar­nera nuan­naarutigisaqaara, taman­nami ilisarisimaneruler­nis­saan­nut paasil­luar­neruler­nis­saan­nul­lu iluaqutigisarak­ku.” Am­masumik oqaloqatigiit­tar­neq ikin­ngutigiin­nermik ineriar­tor­titsisar­poq. Cindytut am­masumik inus­siar­nersumil­lu al­lat oqaloqatigisaruk­kit qular­nan­ngitsumik ikin­ngutigiit­tut qanin­nerulis­saasi. – Uss 27:9.

10. Us­satit 27:17 naaper­torlugu up­peqatitsin­nik suleqateqar­neq qanoq kinguneqarsin­naava?

¹⁰ Jeremiap Barukil­lu iliorsimanerat­tut up­peqativut suleqatigisarutsigit pis­susiilu nuan­nersut maluginiar­tarutsigit ilin­niarfigisin­naavavut qanin­nerulerlugil­lu. (Ussatit 27:17 atuaruk). As­sersuutigalugu qanoq misigisar­pit oqaluus­sinermi ikin­ngutivit sapiil­luni up­perisani il­lersoraa tusaagaangak­ku imaluun­niit uum­mam­mit pisumik Jehova taas­sumalu siuner­taa pil­lugu oqaluk­kaangat? Qular­nan­ngitsumik asaneruler­tar­pat.

11-12. Oqaluus­sinermi suleqatigiin­nerup ikin­ngutigiit­tut qanin­nerulersitsisar­neranik as­sersuuteqarit.

¹¹ Oqaluus­sinermi suleqatigiin­nerup im­min­nut qanin­nerulersitsisar­neranik misigisimasat marluk eq­qarsaatigeriak­kit. Adelinep 23-nik ukiul­lip ikin­ngun­ni Candice aperaa oqaluus­sif­figineqar­piar­tan­ngitsumut oqaluus­siar­toqatigerusun­neraani. Ima oqar­poq: “Aal­lus­sil­luar­nerorusul­lutalu oqaluus­sinermik nuan­naarutigin­nin­nerorusup­pugut. Jehovamut kif­far­tor­nermi tamaviaar­niarluta kajumis­suseqar­neruler­nis­sar­put marluul­luta pisariaqar­tip­par­put.” Suleqatigiin­ner­tik qanoq iluaqutigaat? Ima nangip­poq: “Oqaluus­sinitsin­ni qanoq misigisimanerluta, oqaloqatigiin­nerit suut kil­litsis­sutigisimanerlugit qanorlu Jehovap siulersuinera malugisimanerlugu ul­lup naanerani eq­qar­tor­tar­pavut. Oqaloqatigiit­tar­nivut itisuut taak­ku marluul­luta nuan­nareqaavut im­mitsin­nul­lu ilisarisimaneruler­pugut.”

¹² Laïla Marian­nelu, qatan­ngutit ar­nat marluk aap­paqan­ngitsut Frankrigimeersut, Afrikami Qiterlermi Kun­ngiitsuuf­fim­miit­tumi  il­loqarfim­mut pingaar­nersamut ulapaarfiusumut Banguimut sapaatip-akun­nerini tal­limani oqaluus­siar­torsimap­put. Laïla ima oqalut­tuar­poq: “Unam­miniagaqar­taraluarluta oqaloqatigiil­luar­tar­neq asaqatigiin­ner­pul­lu pis­sutigalugit ikin­ngutigiin­ner­put nakus­satsip­poq. Marian­nep naleq­qus­sarsin­naanera, inun­nut asan­nin­nera aam­ma oqaluus­sinermi aal­lus­sil­luar­tuunera malugigak­kit ataq­qineruler­para.” Il­lit taamatut misigisaqar­niarlutit nunanut al­lanut nuut­tariaqan­ngilatit. Qatan­ngum­mik oqaluus­seqateqaraangavit taas­suma ilisarisimaneruler­nis­saanut ikin­ngutigil­lualer­nis­saanul­lu periarfis­saqar­tar­putit.

13. Ikin­ngutitsin­nik qanimut suleqateqar­tar­nitsin­ni suna unam­miniar­nar­tis­sin­naavar­put?

¹³ Ikin­ngutivut qanimut suleqatigigaangatsigit pik­korif­fii kisiisa pin­nagit aam­mali san­ngiif­fii maluginiar­tar­pavut. Taamaak­kaluar­torli ikin­ngutitsin­nut qanoq qanit­tuarsin­naavugut? Jeremiap maligas­siaa sam­meq­qeriar­tigu. Taas­suma al­lat ajun­ngitsor­taat isiginiarumal­lugit isumak­keerfigin­neriaan­najumal­lunilu suut iluaqutigai?

14. Jehova pil­lugu Jeremiap suna ilik­kar­paa, taman­nalu qanoq iluaqutigaa?

¹⁴ Jeremiap Biibilimi atuagaq aterminik taaguutilik al­lap­paa, ilimanar­porlu Kun­nginik al­lak­kat siul­liit aap­paal­lu aam­ma al­las­simas­sagai. Taamatut suliaqar­nermini Jeremiap pingaar­tumik Jehovap inun­nut naam­mal­luin­nan­ngitsunut nal­lit­tuinera qular­nan­ngitsumik paasil­luar­nerusimas­savaa. As­sersuutigalugu nalun­ngilaa kun­ngi Akabi ajor­tuliaminik peq­qis­simim­mat suli inuutil­lugu inoqutai tamak­kerlugit Jehovamit toqutin­neqar­navian­ngitsut. (1 Kng 21:27-29) Jeremiap aam­ma nalun­ngilaa Manas­se Akabimit ingasan­nerusumik Jehovamut ajor­tuliorsimasoq. Taamaak­kaluar­toq Manas­se peq­qis­simim­mat Jehovap isumak­keerfigaa. (2 Kng 21:16, 17; 2 Nal 33:10-13) Jeremiap nam­mineq ikin­ngutiminut qanimut at­taveqar­nermini Guutip naam­magit­tar­tuunera nal­liut­tuisuuneralu ilaar­niarlugit oqalut­tuat taak­ku iluaqutigisimas­savai. – Tuss 103:8, 9.

15. Baruki al­lamut saasar­neqalermat Jehovap nal­lit­tuisuunera Jeremiap qanoq ilaar­paa?

¹⁵ Baruki suliamini al­lamut saasar­neqalermat Jeremia qanoq ilior­toq sam­meriar­tigu. Jeremiap ikin­ngun­ni Baruki alaan­nar­nagu Guutip inus­siar­nersumik toq­qaan­nar­tumil­li oqariar­tuutaanik an­ngus­sinermigut ikior­paa. (Jer 45:1-5) Oqalut­tuaq qanoq ilin­niarfigaar­put?

16. Us­satit 17:9 naaper­torlugu ikin­ngutigiin­ner­put at­tatiin­narumal­lugu susariaqar­pugut?

¹⁶ Qatan­ngutit­ta naam­mal­luin­nar­tuunis­saat naatsorsuutigisin­naan­ngilar­put. Taamaat­tumik qanimut ikin­nguteqarut­ta ikin­ngutigiin­ner­put at­tatiin­narumal­lugu ilungersor­tariaqar­pugut. Ikin­nguter­put kuk­kusimap­pat Guutip oqaasia tun­ngavigalugu toq­qaan­nar­tumik asan­nit­tumil­li naq­qin­nis­saa pisariaqarsin­naavoq. (Tuss 141:5) Ajual­latsis­sap­patigul­lu isumak­keerfigisariaqar­par­put. Isumak­keerfigereerutsigu pisimasoq kingor­na eq­qaaq­qis­san­ngilar­put. (Ussatit 17:9 atuaruk). Pif­fis­sami ajor­nar­torsiuteqangaarfiusumi qatan­ngutit­ta sangiif­fii pin­nagit nukit­tuf­fiisa isiginiar­nis­saat pingaaruteqangaarami! Taamaaliorut­ta ataqatigiin­ner­put nakus­satsin­neqas­saaq. Mas­sak­kul­lu taamaalior­nis­saq pingaaruteqangaar­poq an­nikil­lior­nar­tus­sarsuarmi qanimut ikin­nguteqar­nis­sar­put pisariaqar­tis­sagatsigu.

17. Jeremiap pif­fis­sani imaan­naan­ngitsuni ilumoorluni ikin­ngutaanini qanoq ersersip­paa?

¹⁷ Pruf­fiitip Jeremiap pif­fis­sani imaan­naan­ngitsuni ilumoorluni ikin­ngutaanini ersersip­paa. As­sersuutigalugu Jeremia toqun­niar­neqarluni imiisiviliamut igin­neqarmat kun­ngik­kormiut  ilaata, Ebed-Melekip, an­naak­kamiuk naalagar­tanit ajor­tumeer­neqar­nis­sani er­numasutigaa. Jeremiap taman­na tusaramiuk ikin­ngutini im­miniigin­nan­ngilaa. Jeremia paar­naarusaaq­qagaluarluni sapin­ngisamik iliuuseqar­poq ikin­ngutini Ebed-Meleki Jehovap neriorsuutaanik tup­pal­ler­nar­tumik oqalut­tuuk­kamiuk. – Jer 38:7-13; 39:15-18.

18. Us­satit 17:17 naaper­torlugu ikin­nguter­put ajor­nar­torsiuteqar­pat qanoq iliorsin­naavugut?

¹⁸ Ul­lumik­kut qatan­ngutivut as­sigiingitsunik ajor­nar­torsiuteqar­tar­put. As­sersuutigalugu pin­ngor­titami ajunaar­nersuit ajunaar­neril­luun­niit inuit pilersitaat inup­pas­suit naner­tisimas­sutigingaar­tar­paat. Taamaat­toqar­til­lugu imaas­sin­naavoq taak­kua angerlarsimaf­fitsin­ni ineqar­tin­nis­saan­nut periarfis­saqar­tugut. Al­lat im­maqa aningaasatigut ikiuus­sin­naap­put. Tamat­tali qatan­ngutivut qin­nus­sin­naavavut. Qatan­nguter­put nikal­lungasoq tusarutsigu im­maqa nalus­savar­put qanoq oqas­sanerluta qanorlu ilius­sanerluta. Tamat­tali iliuuseqangaarsin­naavugut. As­sersuutigalugu ikin­nguter­put ilaginiarlugu pif­fis­saqar­niarsin­naavugut. Oqalutsil­lugu misigin­neqataal­luta tusar­naarsin­navar­put. Al­las­simaf­fil­lu nuan­narisar­put tup­pal­ler­nar­toq takutis­sin­naavar­put. (Es 50:4) Ikin­ngutit­tali pisariaqar­titsineran­ni najoriaan­naanis­saat pingaar­ner­paavoq. – Ussatit 17:17 atuaruk.

19. Ikin­ngutigiil­luar­nermik mas­sak­kut ineriar­tor­titsineq siunis­sami qanoq iluaqutigisin­naavar­put?

¹⁹ Qatan­ngutitsin­nut qanimut at­taveqar­nerup ineriar­tor­tin­nis­saa tamatumalu at­tat­tuar­nis­saa maan­namiit aalajangiusimasariaqar­par­put. Sooq? Akeq­qat­ta sal­luliuutit paasis­sutis­sal­lu eq­qun­ngitsut atorlugit avis­saar­tin­niarsaris­sam­matigut. Im­mitsin­nut akerleriilersin­niarsaris­savaatigut. Iluatsitsinavian­ngil­lal­li. Asaqatigiin­ner­put nukit­tooq kipitis­sin­naan­ngilaat. Qanorluun­niit iliuuseqaraluarunik ikin­ngutigiin­ner­put susin­naan­ngilaat. Ikin­ngutigiin­nerit taamaat­tut pis­sutsit aaq­qis­suus­saanerata naggatis­saanuin­naq atanatik naas­saan­ngitsumik atas­sap­put!