1-2. Kweelana a 1 Pita 4:7, 8, ino nciinshi ceshi cikatucaafwe kuliyumya mumapensho?

NDYETUTOOYA kumamanino ‘anshiku shakweelaako,’ inga tweenda mumapensho anene. (2 Timo. 3:1) Kucakubonenaako, pesule lyamakampeni mucishi cimwi ku western Africa, bantu bakatalika kulwana akupilingana. Kwa myeenshi iindilila 6 bamakwesu abenankashi tabakalinga kweenda ceebo ca kupilingana kwashintu ankoondo yakalinga mucishi ici. Ino nshiinshi shakabacafwa kuliyumya? Bamwi bakacicila mumaanda abamakwesu bakalinga kukala kumisena kwakalinga luumuno. Mukwesu womwi wakaamba ayi: “Paciindi cilya ndakakondwa abuumbi mukwiinga ndakalinga abeshicibusa bangu. Twakacikonsha kuyuminishanya.”

² Na “mapensho anene” akatalike, kuba pomwi abeshicibusa mbotusuni kulaakutupa kukondwa. (Ciyu. 7:14) Aboobo cino nceciindi ncotweelete kuyumya bushicibusa bwesu abashominyineesu. (Amubelenge 1 Pita 4:7, 8.) Inga tweeya shiinji kuswa kucakubonenaako cakwe Jelemiya, uyo wakacafwikwa abeshicibusa bakwe ciindi Jelusalemu ndyeyakalinga pafwiifwi kunyonyoolwa. * Ino cakubonenaako cakwe inga twacikonkela buyani?

3. (a) Ino nceebonshi Jelemiya naakwiinga wakalitalamusha kubamwi? (b)Ino nshiinshi Jelemiya nshaakalwiitako mulembi wakwe Baluki, alimwi ino nshiinshi shakaswaamo?

³ Kwa myaaka 40 na kwiindaawo, Jelemiya wakalinga kukala pakati kabantu batakalinga kushomeka, kwiilikaawo abaabo  mbwaakalinga kubambeneabo alimwi abeshikamukowa bakwe bakalinga kukala kumishaabo ku Anatoti. (Jele. 11:21; 12:6) Nacibi boobo, taakalinga kulitalamusha kubamwi. Nceceeco ncaakaambilaako mulembi wakwe Baluki mbwaakalinga kulinyumfwa, alimwi tulishi mbwaakalinyumfwa ceebo ca maswi alembetwe mu Baibo. (Jele. 8:21; 9:1; 20:14-18; 45:1) Mukwiinga Jelemiya a Baluki bakalinga kusebensela pomwi Baluki ndyaakalinga kulemba makani ashakalinga kucitika, bakalinga kusunene abuumbi akulemekana.​—Jele. 20:1, 2; 26:7-11.

4. Ino Yehova wakalwiita Jelemiya kucita nshi, alimwi ino incito iyi yakacafwa buyani bushicibusa bwakwe a Baluki?

⁴ Kwa myaaka iinji, cakutaloonda Jelemiya wakacenjesha bene Isilaeli sha kunyonyoolwa kwa Jelusalemu kwakalinga kusa. (Jele. 25:3) Mukucenjesha akumwi, Yehova wakalwiita Jelemiya ayi alembe kucenjesha uko mulibuku lyakupeta. (Jele. 36:1-4) Ndyebakalinga kusebensela pomwi muncito iyi mpashi kwa myeenshi iinji, ncakutatoonsha kwaamba ayi Jelemiya a Baluki bakayuminishanya.

5. Ino Baluki wakatondesha buyani ayi wakalinga shicibusa uli kabotu kuli Jelemiya?

⁵ Ndyebakamanisha kulemba libuku lyakupeta, Jelemiya wakacinka manungo muli shicibusa wakwe Baluki kwaambilisha nkombe kubantu. (Jele. 36:5, 6) Cakubula boowa Baluki wakacikonsha kukumanisha ncito iyi yakalinga iloondesha. Ano amuyeyebo Jelemiya mbwaakakondwa kubona Baluki mbwaakaya mulubaansa lwa tempele akutalika kubelengela bantu makani akalinga mulibuku lyakupeta! (Jele. 36:8-10) Bacinenenene bamu Juda bakanyumfwa shakacita Baluki, bakamulwiita ayi abalo ababelengele shakalinga mulibuku ilyo! (Jele. 36:14, 15) Bacinenenene aba bakaya mukulwiita Mwaami Jeoiyakimu nshakaamba Jelemiya. Bakamuyeyelaako Jelemiya a Baluki, aboobo bakalwiita Baluki ayi: “Webo a Jelemiya mulyeelete kuya mukuyuba, kutabi muntu nabi womwi eshi  eshibe nkomubete.” (Jele. 36:16-19) Uyu wakalinga muyeeyo ubotu abuumbi!

6. Ino Jelemiya a Baluki bakacita buyani ndyebakapikishikwa?

⁶ Mwaami Jeoiyakimu wakakalala abuumbi ndyaakanyumfwa makani akalemba Jelemiya, aboobo wakabwesa libuku lyakupeta akulitenta, lyalo akupa mulawo ayi Jelemiya a Baluki bacatwe. Nacibi boobo, Jelemiya taakwe kuloondaawo. Wakabwesa libuku alimwi akutalika kulwiita Baluki maswi akamulwiita Yehova, Baluki alakwe wakalemba “maswi oonse ayo akalinga pacakulembelaawo citaanshi ico cakatentwa a Mwaami Jeoiyakimu.”​—Jele. 36:26-28, 32.

7. Ino nciinshi cakacitika Jelemiya a Baluki ndyebakalinga kusebensela pomwi?

⁷ Liinji na bantu beenda mumapensho pomwi balaba abushicibusa buyumu. Aboobo cilyeelete kwaamba ayi Jelemiya a Baluki ndyebakalinga kusebensela pomwi kulembulula libuku lilya lyakatentwa a Mwaami mubiibi Jeoiyakimu, balyeelete bakashibana kabotu lyalo akuba beshicibusa banyumfwana abuumbi. Ino cakubonenaako ca basankwa bobilo bashomeka aba inga catucafwa buyani?

8. Ino nciinshi ceenga capa kwaamba ayi twaalilwe kuba abeshicibusa, alimwi ino nceebonshi tatweelete kunoyeeya ayi inga tatucikoonshi?

⁸ Inga caba ciyumu kulwiitako umwi mbotutolinyumfwa na bakatukalashaawo. (Tus. 18:19, 24) Na mpashi inga twalinyumfwa ayi tatuciteewo ciindi ankusu shakuba abeshicibusa. Nacibi boobo, tatweelete kunoyeeya ayi inga tatucikoonshi. Na tulisuni kwaamba ayi bamakwesu abenankashi bakatucaafwe muciindi camapensho, cino nceciindi ncotweelete kwaanguluka kubalwiitako mbotutoyeeya ambotutolinyumfwa. Kucita boobo kulaakutucafwa kuba abeshicibusa bancinencine.​—1 Pita 1:22.

9. (a) Ino Yesu wakatondesha buyani ayi wakalinga kubashoma beshicibusa bakwe? (b) Ino kubandika cakwaanguluka abeshicibusa kulacafwa buyani? Amwaambe cakubonenaako.

⁹ Yesu wakatondesha ayi wakalinga shicibusa ushomeka kubabye kwiinda mukubandikaabo cakutashisa. (Joni 15:15) Inga twakonkela cakubonenaako cakwe kwiinda mukulwiitako babyesu shitupa lusangalalo, shitusukamika alimwi ashitukalasha. Amukutike cakubikila maano shicibusa ndyaatobandika, lyalo inga mwesa mukushiba kwaamba ayi anu nshomuyeeya, mbomulinyumfwa, anshomusuni kusa mukucita kunembo shilikoshenye. Atubandike cakubonenaako cakwe nankashi Cindy, ucite myaaka yamuma 20. Wakalinga shicibusa a nankashi Marie-Louise uyo wakalinga painiya ucite myaaka yamuma 60. Nankashi Cindy a Marie-Louise bakalinga kusebensa pomwi muncito yakushimikila,  alimwi bakalinga kubandika makani apusenepusene kwakubula kushisana. Nankashi Cindy wakaamba ayi, “Ndanyumfwa kabotu kubandika makani ayandika abuumbi abeshicibusa, mukwiinga kucita boobo kulancafwa kubashiba kabotu.” Kubandika cakutashisa shili kumoyo kulayumya bushicibusa. Bweenka mbuli nankashi Cindy, na amwebo kamubandika cakwaanguluka abamwi, bushicibusa bwanu bulaakuya panembo.​—Tus. 27:9.

10. Kweelana a Tusimpi 27:17, ino nshiinshi shibotu shiswa mukusebensela pomwi abashominyineesu?

¹⁰ Bweenka mbocakalinga kuli Jelemiya a Baluki, kusebensela pomwi abamakwesu abenankashi akubona mibo yabo ibotu, kulatucafwa kwiiya kuli mbabo akuba beshicibusa banyumfwana. (Amubelenge Tusimpi 27:17.) Kucakubonenaako, ino mulalinyumfwa buyani na ndyemutooshimikila uyo ngomutoosebensaakwe washimikila cakutaloonda na kwaamba cakushinisha pali Yehova akuyanda kwakwe? Cakutatoonsha cilamupa kumusuna abuumbi.

11-12. Amwaambe cakubonenaako citondesha kushimikila mbokuyuminisha bushicibusa.

¹¹ Atubandike shakubonenaako shobilo shitotondesha kusebensela pomwi muncito yakushimikila mbokulengesha bantu kuba beshicibusa. Nankashi Adeline, ucite myaaka 23, wakasenga mubye, Candice, kwaamba ayi baye mukushimikila kumusena liinji nkobatashiiki. Wakaamba ayi; “Twakalinga kusuni kusebensa cankusu akunoosangalala ndyetutooshimikila. Soonse twakalinga kusuni kuyuminishikwa kwaamba ayi tutolelele kusebensela Yehova cankusu.” Ino kusebensela pomwi kwakabacafwa buyani? Nankashi Adeline wakaamba ayi; “Na twaswa mukushimikila twakalinga kubandika mbotwalinga kulinyumfwa, mibandi njetwalinga twasangalala ayo, alimwi ashalinga shacitika isho shatucafwa kubona ayi Yehova ngowalinga watutanjilila. Soonse twakalinga kusangalala amibandi iyi alimwi ici cakatupa kushibana kabotu.”

¹² Benankashi bobilo bateebetwe Laila a Marianne baku France, bakaya mukushimikila kwa nsondo shili 5 ku Bangui, tauni inene yamucishi ca Central African Republic. Nankashi  Laïla wakaamba ayi: “Ndyendakalinga kusebensa aba Marianne twakalinga kuba amapensho, sombi cakatucafwa nkubandikishanya kabotu akutondesha lusuno lwancinencine, bushicibusa bwesu bwakayuminaako. Ndakalinga kuyuminishikwa abuumbi na ndabona ba Marianne mbobakalinga kucikonsha kwaaluka bwangu na bukaalo bwacinja, mbobakalinga kutondesha lusuno kubantu, alimwi ambobakalinga kusebensa cankusu muncito yakushimikila.” Kwalo, teshi kwaamba ayi mulyeelete kulongela kucishi kumwi kwaamba ayi amwebo mucane shoolwe mbuli sheeshi. Soonse tulicite coolwe cakubashiba kabotu akuyumya bushicibusa bwesu abamakwesu abenankashi, lyoonse ndyetutokwaabanamo lubasu mukushimikila kumisena nkotukala.

13. Ino nciinshi cicitika na katusebensela pomwi abeshicibusa?

¹³ Cimwi ciindi kusebensa pomwi abeshicibusa kulatupa kushiba mibo yabo ibotu alimwi akushiba shilubo shabo. Ino nciinshi ceenga catucafwa kutolelela kuba abeshicibusa nabi balicite shilubo? Atuboolele kucakubonenaako cakwe Jelemiya alimwi. Ino nciinshi cakamucafwa kubikila maano kumibo ibotu yabeshicibusa bakwe akubalekelela pashilubo shabo?

14. Ino Jelemiya wakeeya nshi pali Yehova, alimwi ino ishi shakamucafwa buyani?

¹⁴ Jelemiya alyeelete ngowakalemba mabuku amu Baibo eetwa ayi 1 a 2 Baami alimwi alibuku licite liina lyakwe. Cakutatoonsha incito iyi yakamucafwa kushiba Yehova mbwatondesha nkumbu kubantu batasalalite. Kucakubonenaako, wakalinga kucishi kwaamba ayi Mwaami Aabu ndyaakaana kuswa kushibiibi shakwe, Yehova wakapa kwaamba ayi mukwashi wakwe woonse utanyonyoolwi kaacili muumi. (1 Baami 21:27-29) Alimwi Jelemiya wakalinga kucishi ayi shakacita Manase shakakalasha Yehova abuumbi kwiinda shakacita Aabu. Nacibi boobo, Yehova wakamulekelela Manase ndyaakaana. (2 Baami 21:16, 17; 2 Maka. 33:10-13) Cilyeelete kwaamba ayi makani oonse aya akacafwa Jelemiya kukonkela cakubonenaako cakwe Lesa, kwiinda mukukalikila moyo akunyumfwila nkumbu beshicibusa bakwe.​—Kulu. 103:8, 9.

15. Ino Jelemiya wakacikonkela buyani cakubonenaako cakwe Yehova cakukalika moyo, Baluki ndyaakatalika kupilinganishikwa?

¹⁵ Amuyeeye Jelemiya mbwaakacafwa Baluki ndyaakatalika kupilinganishikwa muncito yakwe. Muciindi cakufwambaana kuyeeya ayi Baluki inga taalukiiwo, Jelemiya wakamucafwa kwiinda mukumulwiita maswi akaswa kuli Lesa. (Jele. 45:1-5) Ino tutokwiiyawo nshi?

16. Kweelana a Tusimpi 17:9, ino inga twacita buyani kwaamba ayi tutolelele kuba abushicibusa abamwi?

¹⁶ Ncancine kwaamba ayi inga tatulangili bamakwesu abenankashi kucita shintu munshila isalalite. Aboobo, na twapanga bushicibusa abamakwesu, tulyeelete kucita shintu sheenga shapa kwaamba ayi bushicibusa bwesu butolelele. Na shicibusa wacita cilubo, inga twayandika kumululika cakuteenda mweela kwiinda mukusebensesha Maswi akwe Lesa. (Kulu. 141:5) Alimwi na batukalasha, tulyeelete kubalekelela. Na twabalekelela, tatweelete kunokwaamba pamakani ayo alimwi. (Amubelenge Tusimpi 17:9.) Cino ciindi ca nshiku shiyumu, nceciindi ncetutoyandika kubikila maano kumibo ibotu yabamakwesu kuteshi kushilubo shabo! Kucita boobo kulayumya bushicibusa bwesu, alimwi ici cilayandika abuumbi mukwiinga ciindi camapensho anene tulaakuyandika beshicibusa.

17. Ino Jelemiya wakatondesha buyani ayi wakalinga shicibusa wancinencine muciindi camapensho?

¹⁷ Mushinshimi Jelemiya wakatondesha ayi wakalinga shicibusa wancinencine muciindi camapensho. Kucakubonenaako, Ebedimeleki wacinenenene ndyaakamupulusha kuswa mumukalo  mwakalinga matipa umo mobakalinga bamuwaala ayi afwe, Ebedimeleki wakaloonda ayi bacinenenene ba mwaami batoomucaya. Jelemiya ndyaakashiba makani aya, taakwe kuumunabo, akuyeeya ayi shicibusa wakwe atooshiba bwakuliyumya mwiine. Nabi kwaamba ayi Jelemiya wakalinga mujeele, wakacita nsheenga wacikonsha kwaamba ayi ayuminishe shicibusa wakwe Ebedimeleki.​—Jele. 38:7-13; 39:15-18.

18. Kweelana a Tusimpi 17:17, ino nshiinshi nsheenga twaciita na shicibusa atokwiinda mumapensho?

¹⁸ Munshiku shino, bamakwesu abenankashi baleenda mumapensho apusenepusene. Kucakubonenaako, bamwi balapenga ceebo camapensho alicitikila na ayo aletwa abantu. Na caba boobo, inga cabota na twatambulaako bamwi mumaanda esu. Bamwi inga bacafwilisha kwiinda mukubapako maali. Ano cinene soonse nceenga twacikonsha kucita nkubapaililaako kwaamba ayi Yehova abacaafwe. Mpashi inga twabula bwakucita nabi shakwaamba na twanyumfwa ayi mukwesu na nankashi waboolela mwisule. Nacibi boobo, soonse kuli nceenga twaciita. Kucakubonenaako, inga twaya mukubafwakashila. Inga twakutika na kubandikaabo cakubanyumfwila nkumbu. Kwiilikaawo, inga twabandikaabo malembo ngotusuni ayuminisha. (Isa. 50:4) Cinene ciyandika ncakuba pafwiifwi ciindi shicibusa ndyaatoyandika lucafwo.​—Amubelenge Tusimpi 17:17.

19. Ino kuba abushicibusa buyumu pacecino ciindi kulaakutucafwa buyani kunembo?

¹⁹ Cino nceciindi ncotweelete kusebensa cankusu kwaamba ayi tube abushicibusa buyumu abamakwesu abenankashi. Ino nciinshi ncotwaambila boobo? Twaamba boobo mukwiinga balwani besu balisuni kutupansaanya kwiinda mukusebensesha makani akubeca. Balaakweelesha kutulengesha ayi tucileeke kunyumfwana akucafwana abamakwesu abenankashi. Ano teshi bakacikoonshe. Teshi bakacikoonshe kutupa kwaamba ayi tucileeke kutondesha lusuno kubamakwesu abenankashi. Taakuwo nceshi bakacite ceshi cikapilinganye bushicibusa mbotucite abamakwesu. Kwiilikaawo, bushicibusa bwesu bulaakutolelela kuteshibo kushikila kumamanino abweende buno sobwe, sombi kwamuyayaya!