1-2. 1 Peˍtruˆ liꞈ 4:7, 8 hkʼaw kʼoˆ taˍ ve hkʼe, tuꞈ ve hkanˍ ve awˬ yanˇ htaˇ ngaˬ hui ponˬ gʼa tuˬ aˬ htoꞈ ma ga laˇ ve le?

 “Awˬ leh meuˇ ve awˬ nyi awˬ haˉ” gaˬ la paˇ neˇ htaˇ, ngaˬ hui shoꞈ shaꞈ ve laiˉ ceuˬ gʼa hpuˇ ve yoˬ. (2 Tiˆmoˉseˍ 3:1) Aˍfaˍriˆkaˆ miˬ guiˬ awˬ na hpawˇ lo mehˇ keu peuˬ hkʼawꞈ nawˉ maˇ cawˇ maˇ hawˍ daꞈ leh maꞈ te daꞈ ve pa taw, oˇ kaˬ lo chehˇ ve awˬ viˉ awˬ nyi 6 ha pa hpaˆ kawˆ tuˬ maˇ gʼa heuˆ la tuˬ gʼa fanˬ taˍ ve yoˬ. Awˬ viˉ awˬ nyi tuꞈ ve hkanˍ ve chi htaꞈ ponˬ gʼa tuˬ aˬ htoꞈ ma ga piˇ ve le? Awˬ viˉ awˬ nyi kawˆ ve maˇ gʼa heuˆ la kuiˬ lo chehˇ ve, yawˇ hui htaꞈ haꞈ yuˬ piˇ ve yoˬ. Awˬ viˉ awˬ nyi hawˉ hkʼaˆ teˇ gʼaˇ kʼoˆ ve, “tuꞈ ve hkanˍ ve awˬ yanˇ htaˇ, daꞈ ve awˬ chawˇ cawˬ leh awˬ gʼaˇ piˇ daꞈ gʼa ve pa taw ha lehˬ jaˇ.”

² “Uiˍ jaˇ ve tuꞈ ve hkanˍ ve” tanˬ htaˇ, ngaˬ hui htaꞈ haꞈ ve awˬ chawˇ cawˬ ve ha lehˬ jaˇ. (Hpeuꞈ maˍ ve 7:14) Chi teˇ hkui kaꞈ ngaˬ hui awˬ chawˇ geh gʼaˇ hteꞈ meuˆ daꞈ cawˇ ve yoˬ. (1 Peˍtruˆ 4:7, 8 gʼaw sheˍ.) Yeˍruˆsaˍlehnˍ venˇ maˇ te luˬ sheˍ htaˇ, Yeˍraˍmiˆ daꞈ ve awˬ chawˇ cawˬ ve pa taw, yawˇ a shaꞈ gʼa ponˬ tuˬ ga piˇ ve  * yawˇ ve awˬ lawn ngaˬ hui htaꞈ aˬ htoꞈ ma maˍ laˇ ve le?

3. (a) Yeˍraˍmiˆ shu htaꞈ maˇ caˉ daꞈ gaˇ tuˬ aˬ htoꞈ ma te piˇ ve le? (b) Yeˍraˍmiˆ Baˍruˆ htaꞈ hkʼaˬ hkʼe kʼoˆ piˇ ve le? Awˬ bon hkʼaˬ hkʼe gʼa ve le?

³ Aˬ laˬ hkʼe 40 hkʼawꞈ Yeˍraˍmiˆ yawˇ awˬ paˇ awˬ kui lo ve leh yawˇ chehˇ kuiˬ Aˍnaˍtoˆ venˇ lo ve awˬ viˉ awˬ nyi kaꞈ yawˇ htaꞈ maˇ hteˇ maˇ cawˇ te piˇ ve yoˬ. (Yeˍraˍmiˆ 11:21; 12:6) Chi hkʼe hpehꞈ ve htawˇ, yawˇ shu geh hpaˆ daꞈ leh maˇ caˉ daꞈ ve maˇ te. Yawˇ ve  dawˇ hkʼaˇ, ka tiꞈ yeˬ ve ceˇ leˇ Baˍruˆ htaꞈ kʼoˆ maˍ piˇ leh awˬ lawn chi Liꞈ hpu hkʼaw bvuhꞈ tcuh taˍ ve ngaˬ hui htaꞈ kaꞈ maˍ laˇ ve yoˬ. (Yeˍraˍmiˆ 8:21; 9:1; 20:14-18; 45:1) Yeˍraˍmiˆ a shaꞈ teꞈ kuiˬ hkʼaw hpehꞈ la ve awˬ ceuˬ Baˍruˆ bvuhꞈ ve lehˬ yawˇ hui haꞈ daꞈ ve leh yawˆ yan daꞈ ve tehꞈ ngaˬ hui shiˍ gʼa ve yoˬ.—Yeˍraˍmiˆ 20:1, 2; 26:7-11.

4. Yaˬhoˉvaˬ Yeˍraˍmiˆ htaꞈ aˬ htoꞈ ma te tcuh ve le? Kanˉ chi ve Yeˍraˍmiˆ leh Baˍruˆ hkʼaˬ hkʼe te meuˆ daꞈ maˇ la ve le?

⁴ Yeˍruˆsaˍlehnˍ venˇ htaꞈ hpehꞈ la tuˬ ve awˬ ceuˬ, Yeˍraˍmiˆ haꞈ hanˉ ve hkʼaw Iˉsaˍreˍlaˆ chaw htaꞈ laiˉ hkʼawꞈ shaˍ tiꞈ piˇ ve yoˬ. (Yeˍraˍmiˆ 25:3) Mvuhˇ miˬ yaˇ venˇ baˆ gʼa dawˇ hpfuhˆ cawˇ ve tehꞈ shaˍ tiꞈ teˇ pawˆ kʼawꞈ piˇ tuˬ Yaˬhoˉvaˬ Yeˍraˍmiˆ htaꞈ liꞈ daw hkʼaw bvuhꞈ keu tcuh ve yoˬ. (Yeˍraˍmiˆ 36:1-4) Gʼuiˬ sha geh laˬ ve kanˉ chi ve Yeˍraˍmiˆ leh Baˍruˆ laiˉ ha pa teˇ geh te ve yoˬ. Oˇ ve teˇ yanˇ yawˇ huiˉ maˬ yaw daꞈ ve lehˬ 2 gʼaˇ gʼaˇ co ha hpawˇ uiˍ la mvuh la ve tehꞈ ngaˬ hui yonˍ gʼa ve yoˬ.

5. Baˍruˆ lehˬ Yeˍraˍmiˆ ve daꞈ ve awˬ chawˇ hkʼaˬ hkʼe hpehꞈ ve le?

⁵ Bvuhꞈ peuˬ htaˇ, Yeˍraˍmiˆ yawˇ ve awˬ chawˇ Baˍruˆ htaꞈ yonˍ gʼa leh mvuhˇ miˬ yaˇ htaꞈ kʼoˆ piˇ tcuh ve yoˬ. (Yeˍraˍmiˆ 36:5, 6) Kawˆ tuˬ cawˬ ve kanˉ chi Baˍruˆ haꞈ hanˉ ve hkʼaw te ve yoˬ. Baˍruˆ bon yehˬ lonˉ gʼuˇ suhˍ lo kʼai leh Yeˍraˍmiˆ lawˬ ve hkʼe gʼaꞈ te ve htaꞈ, Yeˍraˍmiˆ hkʼaˬ hkʼe taw ha lehˬ ve dawˇ nyi sheˍ. (Yeˍraˍmiˆ 36:8-10) Yuˇdaꞈ ve a maꞈ lonˉ teˇ hpaˍ shiˍ htaˇ, liꞈ daw oˇ ve Baˍruˆ yawˇ hui htaꞈ kaꞈ gʼaw maˍ laˇ tcuh ve yoˬ! (Yeˍraˍmiˆ 36:14, 15) A maꞈ lonˉ teˇ hpaˍ gʼa kaˇ ve awˬ lawn dawˇ cheˆ leh jawˇ mawˇ Yawˇyaˍkenˍ htaꞈ ca kʼoˆ piˇ ve yoˬ. Yaꞈ hkʼaˇ, yawˇ hui Yeˍraˍmiˆ leh Baˍruˆ htaꞈ dawˇ haˍ ve yoˬ. Yawˇ hui Baˍruˆ htaꞈ kʼoˆ piˇ ve, “nawˬ huiˉ maˬ hkʼaˬ lo ca vaꞈ chehˇ ve chaw teˇ gʼaˇ kaꞈ taˇ shiˍ  tcuh.” (Yeˍraˍmiˆ 36:16-19) Chi beˆ maˍ piˇ ve daꞈ jaˇ!

6. Yeˍraˍmiˆ leh Baˍruˆ tawˍ ve tsuhˇ ve gʼa hpuˇ htaˇ hkʼaˬ hkʼe te ve le?

⁶ Jawˇmawˇ Yawˇyaˍkenˍ gʼa kaˇ htaˇ beuꞈ jaˇ. Jawˇmawˇ liꞈ daw tuˉ baˬ leh Yeˍraˍmiˆ leh Baˍruˆ htaꞈ kaꞈ hpeh yuˬ tcuh ve yoˬ. Yaꞈ hkʼaˇ, Yeˍraˍmiˆ maˇ kawˆ. Yawˇ liꞈ daw teˇ daw Baˍruˆ htaꞈ kʼawꞈ yuˬ piˇ leh Yaˬhoˉvaˬ ve tawˇ hkawˇ Baˍruˆ htaꞈ kʼawꞈ kʼoˆ maˍ piˇ ve yoˬ. “Liꞈ daw oˇ ve htaꞈ jawˇ mawˇ Yawˇyaˍkenˍ aˬ miˍ tuˉ baˬ peuˬ hkʼawꞈ nawˉ, liꞈ daw awˬ suhˉ teˇ maˬ kʼawꞈ yuˬ leh, awˬ lawn oˇ ve teˇ hpaˍ hkʼa peu˗eˬ” Yeˍraˍmiˆ Baˍruˆ htaꞈ kʼawꞈ bvuhꞈ tcuh ve yoˬ.—Yeˍraˍmiˆ 36:26-28, 32.

7. Yeˍraˍmiˆ leh Baˍruˆ kanˉ teˇ geh te ve pa taw, yawˇ huiˉ maˬ hkʼaˬ hkʼe meuˆ daꞈ maˇ la ve le?

⁷ Tuꞈ ve hkanˍ ve teˇ geh gʼa hpuˇ ve chaw lehˬ awˬ chawˇ hpehꞈ jaˇ. Haiˬ jaˇ ve jawˇ mawˇ Yawˇyaˍkenˍ liꞈ daw tuˉ baˬ ve hkʼe, awˬ suhˉ teˇ maˬ gʼa kʼawꞈ bvuhꞈ htaˇ, Yeˍraˍmiˆ leh Baˍruˆ hkʼa dehꞈ shiˍ daꞈ leh meuˆ daꞈ maˇ la ve tehꞈ ngaˬ hui shiˍ ve yoˬ. Ka tiꞈ yeˬ ve chi 2 gʼaˇ ve awˬ lawn ngaˬ hui htaꞈ aˬ htoꞈ ma maˍ laˇ ve le?

8. Ngaˬ hui shu geh maˇ meuˆ daꞈ gaˇ tuˬ aˬ htoꞈ ma te laˇ ve le? Aˬ htoꞈ ma te chi hkʼe maˇ te cawˇ ve le?

⁸ Chaw teˇ hpaˍ ngaˬ hui htaꞈ nyi ma naˬ tuˬ te laˇ jaw ve pa taw, ngaˬ hui ve dawˇ hkʼaˇ maˇ kʼoˆ maˍ piˇ gaˇ. (Tawˇ naˉ ve 18:19, 24) Ngaˬ hui heuˬ ve maˇ heˆ leh awˬ yanˇ maˇ cawˬ ve pa taw shu geh maˇ meuˆ daꞈ. Yaꞈ hkʼaˇ, ngaˬ hui chi hkʼe maˇ te cawˇ. Tuꞈ ve hkanˍ ve awˬ yanˇ htaˇ, awˬ viˉ awˬ nyi awˬ paˇ lo chehˇ gaˇ ve kʼo, yawˇ hui htaꞈ hkʼa dehꞈ gʼa shiˍ daꞈ cawˇ ve yoˬ. Yawˇ hui geh chi teˇ hkui kaꞈ meuˆ daꞈ cawˇ ve yoˬ. Awˉ lawˉ teˇ hkʼaˇ lehˬ ngaˬ hui hkʼaˬ hkʼe dawˇ ve yawˇ hui htaꞈ kʼoˆ maˍ piˇ cawˇ ve yoˬ. Chi awˬ tehˬ ve awˬ chawˇ hpehꞈ tuˬ a yeˇ uiˍ jaˇ.—1 Peˍtruˆ 1:22.

9. (a) Yeˍsuˆ awˬ chawˇ htaꞈ yonˍ gʼa ve tehꞈ hkʼaˬ hkʼe te maˍ laˇ ve le? (b) Aˬ htoꞈ ma te tawˇ yaw daꞈ ve meuˆ daꞈ maˇ la ve le? Tawˇ pa haˉ kʼoˆ maˍ laˇ sheˍ.

⁹ Yeˍsuˆ awˬ chawˇ geh tawˇ hkʼa dehꞈ yaw daꞈ leh yonˍ gʼa ve yoˬ. (Yoˇhanˬ 15:15) Ngaˬ hui pyawˍ ve, tuꞈ ve, maˇ heˆ leh dawˇ haˍ ve awˬ chawˇ htaꞈ kʼoˆ maˍ piˇ tuˬ Yeˍsuˆ htaꞈ henˇ yuˬ gʼa ve yoˬ. Chi hkʼoˆ kaꞈ shu tawˇ yaw laˇ htaˇ hkʼa dehꞈ na taˍ sheˍ. Nawˬ leh yawˇ dawˇ teh taˍ ve shuˍ daꞈ ve yoˬ. Awˬ viˉ awˬ nyi yaˇ miˇ Shehn˗deˇ 30 hkʼawꞈ ve htaꞈ dawˇ nyi sheˍ. Gʼuˇ suhˍ peuˍ ve Ma˗rin˗Lon˗iˆ 70 hkʼawꞈ ve geh yawˇ awˬ chawˇ te ve yoˬ. Yawˇ huiˉ maˬ shinˉ peuˬ 4 nyiˇ mvuhˇ shawˉ hpawˇ teˇ geh hto toˇ˗e leh tawˇ laiˉ ceuˬ yaw daꞈ ve yoˬ. Shehn˗deˇ kʼoˆ ve, “ngaˬ yawˇ hui htaꞈ shiˍ leh hkʼa dehꞈ na gʼa ve pa taw, awˬ chawˇ  geh tawˇ yaw daꞈ ve ngaˬ dawˇ cawˇ jaˇ.” Awˬ chawˇ meuˆ daꞈ ve lehˬ teˇ gʼaˇ leh teˇ gʼaˇ ve awˬ lawn kʼoˆ maˍ daꞈ ve yoˬ. Nawˬ ve te hkʼaˇ dawˇ hkʼaˇ awˬ chawˇ htaꞈ awˉ lawˉ kʼoˆ maˍ piˇ ve kʼo, Shehn˗deˇ hkʼa shuˍ nawˬ ve awˬ chawˇ geh meuˆ daꞈ gʼa ve yoˬ.—Tawˇ naˉ ve 27:9.

10. Tawˇ naˉ ve liꞈ 27:17 hkʼaw kʼoˆ taˍ ve hkʼe, awˬ viˉ awˬ nyi geh Gʼuiˬ sha ve kanˉ teˇ geh te htaˇ daꞈ ve awˬ bon aˬ htoꞈ ma gʼa ve le?

¹⁰ Yeˍraˍmiˆ leh Baˍruˆ hkʼe, ngaˬ hui awˬ viˉ awˬ nyi geh Gʼuiˬ sha ve kanˉ teˇ geh te htaˇ, yawˇ hui te ve awˬ ceuˬ htaꞈ mawˬ leh te hkʼaˇ dawˇ hkʼaˇ htaꞈ shiˍ la ve pa taw meuˆ daꞈ maˇ la ve yoˬ. (Tawˇ naˉ ve 27:17 gʼaw sheˍ.) Tawˇ pa haˉ te kʼo, awˬ chawˇ geh teˇ geh hto toˇ˗e leh yonˍ hkʼaˇ htaꞈ haꞈ hanˉ ve hkʼaw kʼoˆ ve htaꞈ nawˬ mawˬ htaˇ, maˇ heˆ leh awˬ chawˇ Yaˬhoˉvaˬ ve awˬ lawn leh yawˇ ve a loˍ yonˍ ve hkʼaw kʼoˆ ve htaꞈ nawˬ gʼa kaˇ htaˇ, hkʼaˬ hkʼe dawˇ ve le? Nawˬ awˬ chawˇ oˇ ve teˇ gʼaˇ htaꞈ haꞈ jaˇ tuˬ yoˬ.

11-12. Awˬ chawˇ geh Gʼuiˬ sha ve kanˉ teˇ geh te htaˇ hkʼaˬ hkʼe meuˆ daꞈ maˇ la ve tawˇ pa haˉ kʼoˆ maˍ laˇ sheˍ.

¹¹ Awˬ viˉ awˬ nyi geh Gʼuiˬ sha ve kanˉ teˇ geh te htaˇ, haꞈ daꞈ maˇ la ve 2 lawn htaꞈ teˇ geh nyi sheˍ. Awˬ viˉ awˬ nyi yaˇ miˇ Ehnˬdeuˬleˍ 23 hkʼawꞈ ve hkʼa dehꞈ maˇ hto toˇ ve awˬ ti lo yawˇ ve awˬ chawˇ Hkeh˗deˇ htaꞈ jehˬ leh hto toˇ˗e ve yoˬ. Ehnˬdeuˬleˍ kʼoˆ ve, “ngaˬ huiˉ maˬ nyi ma pfuhˇ ve hkʼaw hkʼa dehꞈ hto toˇ gaˇ ve, Gʼuiˬ sha ve kanˉ te ve hkʼaw ha lehˬ gaˇ ve, leh Yaˬhoˉvaˬ geh daꞈ jaˇ ve awˬ gʼaˇ gʼa gaˇ ve yoˬ.” Gʼuiˬ sha ve kanˉ teˇ geh te ve yawˇ hui loˍ ve awˬ ceuˬ htaꞈ gʼa˗aw laˇ? Ehnˬdeuˬleˍ kʼoˆ ve, “teˇ nyi le le mvuhˇ hpeuꞈ la htaˇ gaˬ kʼo nawˬ hkʼaˬ hkʼe dawˇ ve le, ngaˬ hui shu geh yaw daꞈ ve htaꞈ nawˬ hkʼaˬ ve dawˇ cawˇ ve le, leh Yaˬhoˉvaˬ hkʼaˬ hkʼe beˆ maˍ laˇ ve le, ngaˬ hui yaw daꞈ ve yoˬ. Ngaˬ hui chi hkʼe yaw daꞈ htaˇ gʼaˇ hteꞈ kʼawꞈ meuˆ daꞈ maˇ la ve yoˬ.”

¹² Hpaˉlanˍ mvuhˇ miˬ lo laˬ ve awˬ viˉ awˬ nyi yaˇ miˇ Lai˗lan leh Ma˗ri˗an, Aˍfaˍriˆkaˆ miˬ guiˬ awˬ kʼaw ji teˇ taw Banˍkuˇ venˇ lo 5 shinˉ teˇ geh hto  toˇ˗e ve yoˬ. Lai˗lan kʼoˆ ve, “ngaˬ leh Ma˗ri˗an awˬ lawn cawˬ daꞈ ve htawˇ tawˇ hkʼa dehꞈ yaw daꞈ leh haꞈ daꞈ ve lehˬ ngaˬ huiˉ maˬ meuˆ daꞈ tuˬ te laˇ ve yoˬ. Ma˗ri˗an shu geh awˬ chawˇ te daꞈ sha ve, shu htaꞈ haꞈ puiˉ ve, leh kaiˬ ve hkʼaw hto toˇ ve htaꞈ ngaˬ mawˬ htaˇ yawˇ htaꞈ gʼaˇ hteꞈ kʼawꞈ haꞈ ve yoˬ.” Nawˬ chehˇ kuiˬ awˬ ti lo awˬ viˉ awˬ nyi geh Gʼuiˬ sha ve kanˉ te ve teˇ pawˆ le le, nawˬ oˇ ve teˇ gʼaˇ htaꞈ hkʼa dehꞈ shiˍ daꞈ leh meuˆ daꞈ maˇ la tuˬ, daꞈ ve awˬ lawn chi hkʼe ve cawˬ tuˬ nawˬ shu mvuhˇ miˬ lo kʼai tuˬ maˇ loˍ.

13. Ngaˬ hui awˬ viˉ awˬ nyi geh Gʼuiˬ sha ve kanˉ teˇ geh te htaˇ aˬ htoꞈ ma mawˬ ve le?

¹³ Teˇ pawˆ pawˆ kʼo, awˬ viˉ awˬ nyi geh Gʼuiˬ sha ve kanˉ teˇ geh te ve pa taw, maˇ daꞈ ve teˇ hkʼaˇ kaꞈ mawˬ ve yoˬ. Chi hkʼe hpehꞈ ve kʼo hkʼaˬ hkʼe te yawˇ hui geh meuˆ daꞈ gʼa tuˬ le? Yeˍraˍmiˆ awˬ chawˇ htaꞈ daꞈ ve hpawˇ nyi leh maˇ daꞈ ve hpawˇ maˇ nyi tuˬ, yawˇ htaꞈ aˬ htoꞈ ma ga piˇ ve yawˇ ve awˬ lawn teˇ geh kʼawꞈ dawˇ nyi sheˍ.

14. Yeˍraˍmiˆ Yaˬhoˉvaˬ htaꞈ caˉ daꞈ ve aˬ htoꞈ ma gʼa henˇ ve le? Oˇ ve yawˇ htaꞈ hkʼaˬ hkʼe ga piˇ ve le?

¹⁴ Yeˍraˍmiˆ lehˬ Yeˍraˍmiˆ liꞈ leh 1 Jawˇmawˇ 2 Jawˇmawˇ kaꞈ bvuhꞈ ve yoˬ. Yawˇ liꞈ chi teˇ hpaˍ bvuhꞈ ve pa taw, maˇ biˇ ve chaw yaˇ htaꞈ Yaˬhoˉvaˬ haꞈ ve tehꞈ yawˇ shiˍ ve yoˬ. Tawˇ pa haˉ te kʼo, jawˇ mawˇ Aˍhaˆ venˇ baˆ uiˍ jaˇ ve htaꞈ dawˇ hpfuhˆ htaˇ, yawˇ a shaꞈ teꞈ chehˇ htaˇ hkʼa gaˬ Yaˬhoˉvaˬ yawˇ ve yehˬ kʼa htaꞈ maˇ te luˬ piˇ sheˍ. (1 Jawˇmawˇ 21:27-29) Chi ve hkʼa shuˍ jawˇ mawˇ Maˍnaˍseˍ lehˬ Aˍhaˆ aꞈ kehˉ haiˬ jaˇ ve htaꞈ te leh Yaˬhoˉvaˬ nyi ma zuhˆ jaˇ ve tehꞈ Yeˍraˍmiˆ shiˍ ve yoˬ. Yaꞈ hkʼaˇ, yawˇ venˇ baˆ dawˇ hpfuhˆ htaˇ Gʼuiˬ sha yawˇ htaꞈ venˇ baˆ hpehˇ piˇ ve yoˬ. (2 Jawˇmawˇ 21:16, 17; 2 Raˍsaˍvanˍ 33:10-13) Yawˇ ve awˬ chawˇ te yaꞈ ve htaꞈ mawˬ htaˇ, awˬ lawn chi Gʼuiˬ sha yeunˇ hkanˍ leh ha kʼaˉ puiˉ ve htaꞈ Yeˍraˍmiˆ henˇ yuˬ tuˬ ga piˇ ve yoˬ.—Chiˇ mvuh ve 103:8, 9.

15. Baˍruˆ Gʼuiˬ sha ve awˬ vuiˬ aꞈ kehˉ awˬ nu ve awˬ ceuˬ htaꞈ a yeˇ yuˬ htaˇ Yeˍraˍmiˆ Yaˬhoˉvaˬ yeunˇ hkanˍ ve htaꞈ hkʼaˬ hkʼe henˇ yuˬ ve le?

¹⁵ Awˬ yanˇ teˇ yanˇ htaˇ, Baˍruˆ Gʼuiˬ sha ve awˬ vuiˬ aꞈ kehˉ awˬ nu ve awˬ vuiˬ htaꞈ a yeˇ te htaˇ, Yeˍraˍmiˆ hkʼaˬ hkʼe te ve teˇ geh nyi sheˍ. Yeˍraˍmiˆ awˬ chawˇ htaꞈ dawˇ lawˬ leh Gʼuiˬ sha ve awˬ lawn Baˍruˆ htaꞈ hteˇ˗ehꞈ kʼoˆ piˇ ve yoˬ. Yaꞈ hkʼaˇ, haꞈ pehnˇ ve hkʼaw te ve yoˬ. (Yeˍraˍmiˆ 45:1-5) Awˬ lawn chi ngaˬ hui htaꞈ aˬ htoꞈ ma maˍ laˇ ve le?

16. Tawˇ naˉ ve liꞈ 17:9 hkʼaw kʼoˆ taˍ ve hkʼe, awˬ chawˇ te daꞈ ve yeˬ tuˬ ngaˬ hui aˬ htoꞈ ma gʼa te cawˇ ve le?

¹⁶ Awˬ viˉ awˬ nyi maˇ te yaꞈ leh daꞈ ve tiˉ te ve htaꞈ ngaˬ hui maˇ dawˇ law cawˇ. Chi htaꞈ pa taw, ngaˬ hui meuˆ daꞈ jaˇ ve awˬ chawˇ cawˬ ve kʼo, awˬ chawˇ te daꞈ ve gʼa yeˬ tcuh ve yoˬ. Awˬ chawˇ te yaꞈ ve kʼo yawˇ htaꞈ beˆ maˍ piˇ leh ga piˇ tuˬ, Liꞈ hpu hkʼaw ve awˬ liˇ awˬ hkʼaˇ hteˇ˗ehꞈ kʼoˆ maˍ piˇ cawˇ ve yoˬ. Yaꞈ hkʼaˇ, haꞈ pehnˇ ve hkʼaw te sheˍ. (Chiˇ mvuh ve 141:5) Awˬ chawˇ ngaˬ hui nyi ma naˬ tuˬ te laˇ ve kʼo, nyi ma awˬ tawˍ hkʼa gaˬ venˇ baˆ hpehˇ piˇ leh awˬ lawn oˇ ve htaꞈ maˇ kʼawꞈ dawˇ nyi˗o. (Tawˇ naˉ ve 17:9 gʼaw sheˍ.) Haˍ jaˇ ve awˬ yanˇ htaˇ awˬ viˉ awˬ nyi htaꞈ yaꞈ ve hpawˇ maˇ nyi leh daꞈ ve hpawˇ nyi tuˬ a yeˇ uiˍ jaˇ. Ngaˬ hui chi hkʼe te ve kʼo, yawˇ hui geh gʼaˇ hteꞈ meuˆ daꞈ tuˬ yoˬ. Uiˍ jaˇ ve tuꞈ ve hkanˍ ve awˬ yanˇ htaˇ, ngaˬ hui meuˆ daꞈ jaˇ ve awˬ chawˇ gʼa cawˬ cawˇ ve pa taw, awˬ lawn chi a yeˇ uiˍ jaˇ.

17. Yeˍraˍmiˆ tuꞈ ve hkanˍ ve awˬ yanˇ htaˇ, awˬ tehˬ ve awˬ chawˇ tehꞈ hkʼaˬ hkʼe hpeuꞈ maw laˇ ve le?

¹⁷ Tcuh kaˍ paˍ Yeˍraˍmiˆ tuꞈ ve hkanˍ ve awˬ yanˇ htaˇ, awˬ tehˬ ve awˬ chawˇ hpehꞈ ve tehꞈ hpeuꞈ maw laˇ ve yoˬ. Yeˍraˍmiˆ jeꞈ nehˆ tiˉ cawˬ ve  nanˬ bawˍ hkʼaw chehˇ taˍ ve htaꞈ Eˇbaˆdaˍmeˍlehˆ ga piˇ peuˬ hkʼawꞈ nawˉ, a maꞈ lonˉ teˇ hpaˍ te luˬ la ve htaꞈ Eˇbaˆdaˍmeˍlehˆ kawˆ ve yoˬ. Awˬ lawn chi Yeˍraˍmiˆ shiˍ htaˇ, yawˇ awˬ chawˇ gʼa ponˬ tuˬ tehꞈ maˇ dawˇ. Yaꞈ hkʼaˇ, Eˇbaˆdaˍmeˍlehˆ htawnˍ hkʼaw chehˇ htaˇ, Yeˍraˍmiˆ kaꞈ ga gʼa ve hkʼe ga piˇ ve yoˬ. Yaˬhoˉvaˬ ve ka tiꞈ Yeˍraˍmiˆ Eˇbaˆdaˍmeˍlehˆ htaꞈ awˬ gʼaˇ piˇ ve yoˬ.—Yeˍraˍmiˆ 38:7-13; 39:15-18.

18. Tawˇ naˉ ve liꞈ 17:17 hkʼaw kʼoˆ taˍ ve hkʼe, awˬ chawˇ tuꞈ ve htaꞈ gʼa hpuˇ htaˇ ngaˬ hui aˬ htoꞈ ma te cawˇ ve le?

¹⁸ Chi beuꞈ teˇco˗e awˬ viˉ awˬ nyi shoꞈ shaꞈ ve laiˉ ceuˬ gʼa hpuˇ ve yoˬ. Laiˉ gʼaˇ mvuhˇ yeˬ mvuhˇ haw lonˉ hpawˇ maˇ heˆ leh chaw yaˇ te luˬ piˇ ve htaꞈ gʼa hpuˇ ve yoˬ. Yawˇ hui chi hkʼe gʼa hpuˇ htaˇ, teˇ hpaˍ hpaˍ htaꞈ chehˇ kuiˬ piˇ ve, hpu hpawˇ kaꞈ ga piˇ ve yoˬ. Yaꞈ hkʼaˇ, ngaˬ hui ga piˇ gʼa ve lehˬ awˬ viˉ awˬ nyi chi teˇ hpaˍ htaꞈ Yaˬhoˉvaˬ ga piˇ tuˬ bon lawˬ piˇ gʼa ve yoˬ. Awˬ viˉ awˬ nyi awˬ gʼaˇ nuˇ htaˇ, aˬ htoꞈ ma kʼoˆ piˇ tuˬ, te piˇ tuˬ maˇ shiˍ. Yaꞈ hkʼaˇ, ngaˬ hui te gʼa ve laiˉ ceuˬ cawˬ ve yoˬ. Yawˇ hui htaꞈ awˬ yanˇ piˇ ve, ha kʼaˉ ve hkʼaw hkʼa dehꞈ na taˍ piˇ ve, leh Liꞈ hpu awˬ tawn ngaˬ hui dawˇ cawˇ ve htaꞈ cuˇ leh awˬ gʼaˇ piˇ gʼa ve yoˬ. (Iˉsaˍyaˆ 50:4) A yeˇ uiˍ jaˇ ve lehˬ yawˇ hui loˍ htaˇ, awˬ paˇ lo chehˇ taˍ piˇ ve yoˬ.—Tawˇ naˉ ve 17:17 gʼaw sheˍ.

19. Chi teˇ hkui kaꞈ awˬ viˉ awˬ nyi geh gʼaˇ hteꞈ meuˆ daꞈ ve lehˬ awˬ gʼuˇ suhˍ hpawˇ hkʼaˬ hkʼe ga laˇ gʼa tuˬ le?

¹⁹ Chi teˇ hkui kaꞈ awˬ viˉ awˬ nyi geh gʼaˇ hteꞈ meuˆ daꞈ leh awˬ chawˇ te daꞈ ve yeˬ tuˬ te sheˍ. Aˬ htoꞈ ma pa taw le? Canˇ paˍ heˍ leh hpaˆ daꞈ tuˬ te laˇ ve pa taw, ngaˬ hui maˇ cawˇ maˇ hawˍ daꞈ tuˬ te laˇ chehˇ ve yoˬ. Yaꞈ hkʼaˇ, ngaˬ hui haꞈ daꞈ ve yeˬ ve pa taw, te luˬ laˇ maˇ gʼa. Ngaˬ hui haꞈ daꞈ ve htaꞈ teˇ ceuˬ kaꞈ te luˬ laˇ maˇ gʼa. Awˬ tehˬ kʼo, ngaˬ hui teˇ gʼaˇ leh teˇ gʼaˇ awˬ chawˇ te daꞈ ve yeˬ ve lehˬ miˬ guiˬ chi haiˬ jaˇ ve peuˬ htaˇ ceh maˇ heˆ. Yaꞈ hkʼaˇ, co co taiˍ taiˍ yeˬ tuˬ yoˬ!