ບົດຄວາມສຶກສາທີ 44
ໃຫ້ສະໜິດກັນຫຼາຍຂຶ້ນກ່ອນທີ່ຈຸດຈົບຈະມາເຖິງ
“ສ່ຽວຮັກຢູ່ທຸກເວລາ.”—ສຸພາ. 17:17
ເພງ 101 ເຮັດວຽກຮ່ວມກັນຢ່າງເປັນນ້ຳໜຶ່ງໃຈດຽວ
ໃຈຄວາມສຳຄັນ *
ເຮົາຈຳເປັນຕ້ອງມີໝູ່ທີ່ດີໃນໄລຍະ “ຄວາມທຸກຍາກລຳບາກຄັ້ງໃຫຍ່” (ເບິ່ງຂໍ້ 2) *
1-2. ຕາມ 1 ເປໂຕ 4:7, 8 ສິ່ງໃດຈະຊ່ວຍເຮົາໃຫ້ຮັບມືກັບໄລຍະທີ່ຫຍຸ້ງຍາກລຳບາກໄດ້?
ເນື່ອງຈາກເຮົາຢູ່ໃນຕອນທ້າຍຂອງ “ສະໄໝສຸດທ້າຍ” ເຮົາອາດຕ້ອງປະສົບກັບຄວາມຍາກລຳບາກຢ່າງຮຸນແຮງ. (2 ຕີໂມ. 3:1, ລ.ມ.) ຕົວຢ່າງເຊັ່ນ: ຄວາມຂັດແຍ່ງແລະການສົນລະວົນວຸ່ນວາຍຫຼັງຈາກການເລືອກຕັ້ງໃນປະເທດໜຶ່ງຂອງອາຝຼິກກາຕາເວັນຕົກ ເຮັດໃຫ້ພີ່ນ້ອງທີ່ຢູ່ໃນພື້ນທີ່ອັນຕະລາຍນີ້ຕ້ອງຢູ່ແບບລະວັງຕົວຕະຫຼອດດົນກວ່າ 6 ເດືອນ. ສິ່ງໃດຊ່ວຍໃຫ້ພວກເຂົາຮັບມືກັບສະພາບການທີ່ຍາກລຳບາກນີ້ໄດ້? ພີ່ນ້ອງບາງຄົນທີ່ຢູ່ໃນເຂດທີ່ປອດໄພກວ່າໄດ້ຕ້ອນຮັບພວກເຂົາໂດຍໃຫ້ມາພັກຢູ່ເຮືອນນຳ. ພີ່ນ້ອງຊາຍຄົນໜຶ່ງບອກວ່າ: “ຕອນທີ່ຫຍຸ້ງຍາກລຳບາກແບບນີ້ ຂ້ອຍດີໃຈແທ້ໆທີ່ມີໝູ່ຫຼາຍຄົນຢູ່ອ້ອມຂ້າງ ເພາະເຮົາຈະສາມາດໃຫ້ກຳລັງໃຈກັນແລະກັນໄດ້.”
2 ເມື່ອ “ຄວາມທຸກຍາກລຳບາກຄັ້ງໃຫຍ່” ເລີ່ມຕົ້ນຂຶ້ນ ເຮົາຈະດີໃຈແທ້ໆທີ່ມີໝູ່ທີ່ດີທີ່ຮັກເຮົາ. (ຄຳປ. 7:14, ລ.ມ.) ດັ່ງນັ້ນ ເຮົາຕ້ອງຮີບສ້າງສາຍສຳພັນທີ່ແໜ້ນແຟ້ນກັບໝູ່ຕັ້ງແຕ່ຕອນນີ້. (ອ່ານ 1 ເປໂຕ 4:7, 8) ເຮົາຈະມາຮຽນຮູ້ຈາກຕົວຢ່າງຂອງເຢເຣມີທີ່ມີໝູ່ທີ່ດີຊ່ວຍລາວໃຫ້ລອດຊີວິດໃນໄລຍະກ່ອນການທຳລາຍເມືອງເຢຣຶຊາເລມ. * ແລະຈະເບິ່ງວ່າເຮົາສາມາດຮຽນແບບເຢເຣມີໄດ້ແນວໃດ?
ຮຽນຮູ້ຈາກຕົວຢ່າງຂອງເຢເຣມີ
3. (ກ) ເປັນຫຍັງເຢເຣມີອາດຢາກແຍກຕົວອອກຈາກຄົນອື່ນ? (ຂ) ເຢເຣມີບອກຫຍັງກັບບາຣຶກ ແລະຜົນເປັນແນວໃດ?
3 ຢ່າງໜ້ອຍ 40 ປີທີ່ເຢເຣມີຢູ່ໃນສະພາບແວດລ້ອມທີ່ມີແຕ່ຄົນບໍ່ສັດຊື່ ເຊິ່ງລວມທັງເພື່ອນບ້ານແລະອາດຈະມີຍາດພີ່ນ້ອງຈາກເມືອງອານາໂທດທີ່ເປັນບ້ານເກີດຂອງລາວ. (ຢເຣ. 11:21; 12:6) ແຕ່ລາວກໍບໍ່ໄດ້ແຍກຕົວອອກຈາກຄົນອື່ນ. ທີ່ຈິງ ລາວບອກຄວາມຮູ້ສຶກຂອງຕົນກັບບາຣຶກເລຂານຸການທີ່ພັກດີຂອງລາວ ແລະການທີ່ບັນທຶກເລື່ອງນີ້ໃນຄຳພີໄບເບິນກໍເປັນການບອກເຮົານຳ. (ຢເຣ. 8:21; 9:1; 20:14-18; 45:1) ເຮົາສາມາດນຶກພາບອອກວ່າຕອນທີ່ບາຣຶກຂຽນເລື່ອງທີ່ເກີດຂຶ້ນກັບເຢເຣມີ ພວກເຂົາທັງສອງຄົງໄດ້ຮຽນຮູ້ທີ່ຈະຮັກແລະນັບຖືກັນຫຼາຍຂຶ້ນແທ້ໆ.—ຢເຣ. 20:1, 2; 26:7-11
4. ພະເຢໂຫວາສັ່ງໃຫ້ເຢເຣມີເຮັດຫຍັງ ແລະວຽກນີ້ເຮັດໃຫ້ເຢເຣມີກັບບາຣຶກສະໜິດກັນຫຼາຍຂຶ້ນແນວໃດ?
4 ເປັນເວລາຫຼາຍປີທີ່ເຢເຣມີເຕືອນຊາວອິດສະລາແອນຢ່າງກ້າຫານກ່ຽວກັບສິ່ງທີ່ຈະເກີດຂຶ້ນກັບເມືອງເຢຣຶຊາເລມ. (ຢເຣ. 25:3) ເມື່ອພະເຢໂຫວາຕ້ອງການເຕືອນອີກເທື່ອໜຶ່ງເພື່ອໃຫ້ປະຊາຊົນກັບໃຈ ພະເຢໂຫວາສັ່ງໃຫ້ເຢເຣມີຂຽນຄຳເຕືອນຂອງພະອົງໄວ້ໃນມ້ວນໜັງສື. (ຢເຣ. 36:1-4) ເຢເຣມີແລະບາຣຶກອາດເຮັດວຽກນີ້ນຳກັນຢ່າງໃກ້ຊິດຫຼາຍເດືອນ ເຮົາໝັ້ນໃຈໄດ້ວ່າສິ່ງທີ່ພວກເຂົາລົມກັນໃນຕອນນັ້ນຕ້ອງເຮັດໃຫ້ຄວາມເຊື່ອຂອງພວກເຂົາເຂັ້ມແຂງຂຶ້ນ.
5. ບາຣຶກເປັນໝູ່ທີ່ດີຂອງເຢເຣມີແນວໃດ?
5 ຫຼັງຈາກທີ່ຂຽນຄຳສັ່ງຂອງພະເຢໂຫວາໃນມ້ວນໜັງສືແລ້ວໆ ເຢເຣມີຕ້ອງໄວ້ໃຈບາຣຶກໝູ່ຂອງລາວເພື່ອໃຫ້ໄປບອກຂ່າວສານນີ້ກັບປະຊາຊົນ. (ຢເຣ. 36:5, 6) ບາຣຶກກ້າທີ່ຈະເຮັດວຽກທີ່ອັນຕະລາຍນີ້. ລອງນຶກພາບເບິ່ງວ່າ ເຢເຣມີຄົງຕ້ອງພູມໃຈບາຣຶກຫຼາຍແທ້ໆຕອນທີ່ບາຣຶກໄປທີ່ວິຫານແລະເຮັດຕາມສິ່ງທີ່ລາວບອກໃຫ້ເຮັດ. (ຢເຣ. 36:8-10) ເມື່ອພວກເຈົ້ານາຍຂອງຢູດາຮູ້ສິ່ງທີ່ບາຣຶກເຮັດ ພວກເຂົາກໍສັ່ງໃຫ້ບາຣຶກອ່ານມ້ວນໜັງສືນີ້ໃຫ້ພວກເຂົາຟັງ. (ຢເຣ. 36:14, 15) ພວກເຈົ້ານາຍໄດ້ຕັດສິນໃຈເອົາສິ່ງທີ່ໄດ້ຍິນໄປບອກກະສັດເຢໂຫຢາກີມ. ແຕ່ຍ້ອນພວກເຂົາເປັນຫ່ວງເຢເຣມີກັບບາຣຶກ ຈຶ່ງບອກບາຣຶກວ່າ: “ຈົ່ງໄປລີ້ຕົວກັບທ່ານເຢເຣມີແລະຢ່າໃຫ້ຜູ້ໃດຮູ້ຈັກບ່ອນໃດເຈົ້າທັງສອງຢູ່ນັ້ນ.” (ຢເຣ. 36:16-19) ນັ້ນເປັນຄຳແນະນຳທີ່ດີແທ້ໆ!
6. ເຢເຣມີກັບບາຣຶກເຮັດແນວໃດເມື່ອຖືກຕໍ່ຕ້ານ?
6 ເມື່ອກະສັດເຢໂຫຢາກີມໄດ້ຍິນສິ່ງທີ່ເຢເຣມີບອກ ລາວກໍໃຈຮ້າຍແຮງຈຶ່ງຈູດມ້ວນໜັງສືຖິ້ມແລະສັ່ງໃຫ້ຈັບເຢເຣມີກັບບາຣຶກ. ແຕ່ເຢເຣມີບໍ່ຢ້ານ ລາວເອົາມ້ວນໜັງສືອີກມ້ວນໜຶ່ງໃຫ້ບາຣຶກ ແລະບອກຂ່າວສານຂອງພະເຢໂຫວາກັບບາຣຶກ ບາຣຶກຈຶ່ງຂຽນ “ຕາມປາກຂອງທ່ານເຢເຣມີຍັງຄຳທັງປວງທີ່ໄດ້ຢູ່ໃນໜັງສືທີ່ທ່ານເຢໂຫຢາກີມກະສັດຢູດາໄດ້ຈູດແລ້ວ.”—ຢເຣ. 36:26-28, 32
7. ການທີ່ເຢເຣມີກັບບາຣຶກເຮັດວຽກນຳກັນອາດຈະເຮັດໃຫ້ສາຍສຳພັນຂອງພວກເຂົາເປັນແນວໃດ?
7 ຄົນທີ່ຜ່ານຄວາມຍາກລຳບາກມານຳກັນມັກຈະສະໜິດກັນ. ດັ່ງນັ້ນ ເຮົາຈຶ່ງນຶກພາບອອກວ່າການທີ່ພວກເຂົາຊ່ວຍກັນເຮັດມ້ວນໜັງສືໃໝ່ແທນມ້ວນໜັງສືທີ່ຖືກກະສັດຊົ່ວຮ້າຍທຳລາຍ ເຮັດໃຫ້ເຢເຣມີກັບບາຣຶກຮູ້ຈັກກັນຫຼາຍຂຶ້ນແລະສະໜິດຫຼາຍຂຶ້ນກັນ. ເຮົາໄດ້ຮຽນຮູ້ຫຍັງຕົວຢ່າງຂອງຜູ້ຮັບໃຊ້ທີ່ສັດຊື່ສອງຄົນນີ້?
ເປີດໃຈລົມກັນ
8. ສິ່ງໃດອາດເຮັດໃຫ້ເຮົາບໍ່ຢາກມີໝູ່ສະໜິດ ແລະເປັນຫຍັງເຮົາບໍ່ຄວນປ່ອຍໃຫ້ເປັນແບບນັ້ນ?
8 ເຮົາອາດຮູ້ສຶກວ່າຍາກທີ່ຈະເປີດໃຈລົມກັບຄົນອື່ນ ເພາະບາງຄົນເຄີຍເຮັດໃຫ້ເຮົາເສຍໃຈ. (ສຸພາ. 18:19, 24) ຫຼືເຮົາອາດຮູ້ສຶກເມື່ອຍແລະບໍ່ມີເວລາທີ່ຈະໄປສະໜິດກັບຜູ້ໃດ. ແຕ່ເຮົາບໍ່ຄວນປ່ອຍໃຫ້ເປັນແບບນັ້ນ. ຖ້າເຮົາຢາກມີພີ່ນ້ອງຢູ່ຄຽງຂ້າງຕອນທີ່ເຮົາປະສົບຄວາມຍາກລຳບາກ ເຮົາຕ້ອງຮຽນຮູ້ທີ່ໄວ້ໃຈພວກເຂົາໂດຍສ້າງສາຍສຳພັນທີ່ແໜ້ນແຟ້ນກັບພວກເຂົາຕັ້ງແຕ່ຕອນນີ້. ວິທີໜຶ່ງກໍຄື ບອກພວກເຂົາວ່າເຮົາຄິດແລະຮູ້ສຶກແນວໃດ. ນີ້ເປັນຂັ້ນຕອນທີ່ສຳຄັນທີ່ຈະມີໝູ່ແທ້.—1 ເປ. 1:22
9. (ກ) ພະເຍຊູສະແດງໃຫ້ເຫັນແນວໃດວ່າເພິ່ນໄວ້ໃຈໝູ່ຂອງເພິ່ນ? (ຂ) ເປັນຫຍັງການເປີດໃຈລົມກັນຈຶ່ງເຮັດໃຫ້ສະໜິດກັນຫຼາຍຂຶ້ນ? ຂໍຍົກຕົວຢ່າງ.
9 ພະເຍຊູສະແດງໃຫ້ເຫັນວ່າເພິ່ນໄວ້ໃຈໝູ່ຂອງເພິ່ນໂດຍການເປີດໃຈລົມກັບພວກເຂົາ. (ໂຢ. 15:15) ເຮົາສາມາດຮຽນແບບເພິ່ນໂດຍບອກໝູ່ຂອງເຮົາກ່ຽວກັບຄວາມສຸກ ຄວາມກັງວົນ ແລະຄວາມເສຍໃຈທີ່ເຮົາມີ. ນອກຈາກນັ້ນ ໃຫ້ຕັ້ງໃຈຟັງເມື່ອຄົນອື່ນເວົ້າກັບເຮົາ ແລ້ວເຮົາອາດຈະຮູ້ວ່າພວກເຂົາມີຄວາມຄິດ ຄວາມຮູ້ສຶກແລະເປົ້າໝາຍຄ້າຍຄືກັນກັບເຮົາ. ຂໍໃຫ້ມາເບິ່ງຕົວຢ່າງຂອງພີ່ນ້ອງຊິນດີ້ອາຍຸ 29 ປີ. ລາວເປັນໝູ່ກັບມາລີ ຫຼຸຍເຊິ່ງເປັນໄພໂອເນຍອາຍຸ 67 ປີ. ຊິນດີ້ແລະມາລີ ຫຼຸຍເຮັດວຽກຮັບໃຊ້ນຳກັນທຸກໆວັນພະຫັດຕອນເຊົ້າ ແລະພວກເຂົາລົມກັນແບບເປີດໃຈຫຼາຍເລື່ອງ. ຊິນດີ້ບອກວ່າ: “ຂ້ອຍມັກເປີດໃຈລົມກັບໝູ່ ເພາະນີ້ຊ່ວຍຂ້ອຍໃຫ້ຮູ້ຈັກແລະເຂົ້າໃຈພວກເຂົາດີຂຶ້ນ.” ມິດຕະພາບເກີດຂຶ້ນໄດ້ໃນບັນຍາກາດທີ່ອົບອຸ່ນແລະລົມກັນແບບເປີດໃຈ. ຖ້າເຈົ້າເປັນຝ່າຍເລີ່ມເປີດໃຈບອກຄວາມຄິດແລະຄວາມຮູ້ສຶກກັບໝູ່ຂອງເຈົ້າກ່ອນ ເຈົ້າກໍຈະສະໜິດກັບໝູ່ຂອງເຈົ້າຫຼາຍຂຶ້ນຄືກັນກັບຊິນດີ້.—ສຸພາ. 27:9
ເຮັດວຽກປະກາດນຳກັນ
ໝູ່ທີ່ດີເຮັດວຽກປະກາດນຳກັນ (ເບິ່ງຂໍ້ 10)
10. ຕາມສຸພາສິດ 27:17 ເມື່ອເຮົາເຮັດວຽກປະກາດກັບພີ່ນ້ອງຮ່ວມຄວາມເຊື່ອຈະມີຜົນດີແນວໃດ?
10 ຄ້າຍຄືກັບເຢເຣມີແລະບາຣຶກ ເມື່ອເຮົາເຮັດວຽກປະກາດກັບພີ່ນ້ອງຮ່ວມຄວາມເຊື່ອ ແລະໄດ້ເຫັນຄຸນລັກສະນະທີ່ດີໃນໂຕພວກເຂົາ ເຮົາກໍໄດ້ຮຽນຮູ້ຈາກພວກເຂົາແລະສະໜິດກັບພວກເຂົາຫຼາຍຂຶ້ນ. (ອ່ານສຸພາສິດ 27:17) ຕົວຢ່າງ: ເຈົ້າຮູ້ສຶກແນວໃດເມື່ອໄປປະກາດແລະເຫັນວ່າໝູ່ຂອງເຈົ້າອະທິບາຍຄວາມເຊື່ອຢ່າງກ້າຫານ ຫຼືເວົ້າເລື່ອງພະເຢໂຫວາແລະຈຸດປະສົງຂອງພະອົງດ້ວຍຄວາມໝັ້ນໃຈ? ເຈົ້າຄົງຈະຮູ້ສຶກຮັກລາວຫຼາຍຂຶ້ນ.
11-12. ຂໍໃຫ້ຍົກຕົວຢ່າງວ່າ ການເຮັດວຽກຮັບໃຊ້ຊ່ວຍເຮົາໃຫ້ສະໜິດກັບພີ່ນ້ອງຫຼາຍຂຶ້ນແນວໃດ.
11 ໃຫ້ເຮົາມາເບິ່ງປະສົບການສອງເລື່ອງທີ່ສະແດງວ່າການເຮັດວຽກປະກາດເຮັດໃຫ້ເຮົາຮັກກັນຫຼາຍຂຶ້ນ. ແອດິລິນພີ່ນ້ອງຍິງອາຍຸ 23 ປີ ໄດ້ຊວນແຄນດີສ໌ໝູ່ຂອງລາວໄປປະກາດໃນເຂດທີ່ບໍ່ຄ່ອຍມີການປະກາດ. ແອດິລິນບອກວ່າ: “ເຮົາຢາກເພີ່ມຄວາມກະຕືລືລົ້ນແລະຢາກມີຄວາມສຸກໃນວຽກປະກາດຫຼາຍຂຶ້ນ ແລະຢາກໄດ້ກຳລັງໃຈທີ່ຈະໃຫ້ສິ່ງດີທີ່ສຸດກັບພະເຢໂຫວາ.” ການເຮັດວຽກປະກາດນຳກັນເຮັດໃຫ້ພວກເຂົາໄດ້ຮັບປະໂຫຍດແນວໃດ? ແອດິລິນບອກວ່າ: “ຫຼັງຈາກທີ່ປະກາດແລ້ວໃນແຕ່ລະມື້ ພວກເຮົາຈະຖາມກັນວ່າຮູ້ສຶກແນວໃດ ປະທັບໃຈຫຍັງແດ່ກ່ຽວກັບສິ່ງທີ່ເຮົາລົມກັບຜູ້ຄົນ ແລະພະເຢໂຫວາໄດ້ຊ່ວຍເຮົາແນວໃດໃນວຽກປະກາດ. ເຮົາທັງສອງມັກລົມກັນແບບເປີດໃຈເພາະນັ້ນເຮັດໃຫ້ເຮົາຮູ້ຈັກກັນຫຼາຍຂຶ້ນກວ່າເກົ່າ.”
12 ໄລລາແລະມາຣີອານ໌ເປັນພີ່ນ້ອງຍິງໂສດຈາກປະເທດຝຣັ່ງ ພວກເຂົາໄປປະກາດ 5 ອາທິດຢູ່ເມືອງບັງກີເຊິ່ງເປັນເມືອງຫຼວງຂອງສາທາລະນະລັດອາຝຼິກກາກາງ. ໄລລາບອກວ່າ: “ເຖິງວ່າບາງເທື່ອຂ້ອຍກັບມາຣີອານ໌ຈະມີບັນຫາ ແຕ່ການທີ່ເຮົາລົມກັນດີໆແລະຮັກກັນແທ້ໆເຮັດໃຫ້ເຮົາສະໜິດກັນຫຼາຍຂຶ້ນ. ເມື່ອຂ້ອຍເຫັນວ່າມາຣີອານ໌ປັບຕົວເຂົ້າກັບສະພາບການໃໝ່ໄດ້ງ່າຍ ຮັກຜູ້ຄົນ ແລະດຸໝັ່ນໃນວຽກປະກາດ ຂ້ອຍກໍແຮ່ງຮັກລາວຫຼາຍຂຶ້ນ.” ເຈົ້າບໍ່ຕ້ອງໄປປະກາດຢູ່ຕ່າງປະເທດເພື່ອຈະມີປະສົບການແບບນີ້ ເພາະທຸກເທື່ອທີ່ເຈົ້າເຮັດວຽກປະກາດກັບພີ່ນ້ອງໃນເຂດທີ່ເຈົ້າຢູ່ ເຈົ້າກໍມີໂອກາດຮູ້ຈັກລາວດີຂຶ້ນແລະສະໜິດກັບລາວຫຼາຍຂຶ້ນ.
ເບິ່ງຈຸດດີແລະໃຫ້ອະໄພກັນ
13. ເມື່ອເຮົາເຮັດວຽກປະກາດນຳກັນກັບໝູ່ ເຮົາອາດຈະເຫັນຫຍັງ?
13 ບາງເທື່ອການເຮັດວຽກປະກາດນຳກັນກັບໝູ່ເຮັດໃຫ້ເຮົາບໍ່ພຽງແຕ່ເຫັນຈຸດດີ ແຕ່ຍັງເຫັນຈຸດອ່ອນຂອງພວກເຂົານຳ. ສິ່ງໃດຈະຊ່ວຍເຮົາໃຫ້ຍັງສະໜິດກັນຄືເກົ່າໄດ້? ຂໍໃຫ້ມາເບິ່ງຕົວຢ່າງຂອງເຢເຣມີອີກເທື່ອໜຶ່ງວ່າອັນໃດທີ່ຊ່ວຍໃຫ້ລາວເບິ່ງຈຸດດີແລະເບິ່ງຂ້າມຈຸດອ່ອນຂອງໝູ່.
14. ເຢເຣມີໄດ້ຮຽນຮູ້ຫຍັງກ່ຽວກັບພະເຢໂຫວາ ແລະເລື່ອງນີ້ໄດ້ຊ່ວຍລາວແນວໃດ?
14 ເຢເຣມີຂຽນພະທຳເຢເຣມີແລະອາດຈະຂຽນພະທຳ 1 ແລະ 2 ກະສັດນຳ. ວຽກມອບໝາຍນີ້ຊ່ວຍໃຫ້ລາວຮູ້ວ່າພະເຢໂຫວາເມດຕາມະນຸດທີ່ບໍ່ສົມບູນແບບ. ຕົວຢ່າງ: ເມື່ອກະສັດອາກາບກັບໃຈຈາກການເຮັດຊົ່ວ ພະເຢໂຫວາໄດ້ຊ່ວຍລາວບໍ່ໃຫ້ເຫັນຄອບຄົວຖືກທຳລາຍຕອນທີ່ຍັງມີຊີວິດຢູ່. (1 ກະ. 21:27-29) ຄ້າຍຄືກັນ ເຢເຣມີຍັງຮູ້ວ່າກະສັດມານາເຊຊົ່ວແທ້ຊົ່ວວ່າແລະໄດ້ເຮັດໃຫ້ພະເຢໂຫວາໃຈຮ້າຍຫຼາຍກວ່າທີ່ອາກາບເຮັດ. ແຕ່ເມື່ອມານາເຊກັບໃຈ ພະອົງກໍໃຫ້ອະໄພລາວ. (2 ກະ. 21:16, 17; 2 ຂ່າວ. 33:10-13) ເລື່ອງເຫຼົ່ານີ້ຄົງຕ້ອງຊ່ວຍເຢເຣມີໃຫ້ຮຽນແບບຄວາມອົດທົນແລະຄວາມເມດຕາຂອງພະເຢໂຫວາເມື່ອເຫັນຈຸດອ່ອນຂອງໝູ່ສະໜິດຂອງລາວ.—ເພງ. 103:8, 9
15. ເຢເຣມີຮຽນແບບຄວາມອົດທົນຂອງພະເຢໂຫວາແນວໃດຕອນທີ່ບາຣຶກເຂໄປຈາກວຽກມອບໝາຍຂອງລາວ?
15 ໃຫ້ເຮົາມາເບິ່ງວ່າເຢເຣມີເຮັດແນວໃດເມື່ອບາຣຶກເຂໄປຈາກວຽກມອບໝາຍຂອງລາວ. ແທນທີ່ຈະໝົດຫວັງໃນຕົວໝູ່ທັນທີ ລາວພັດໄດ້ຊ່ວຍບາຣຶກໂດຍບອກຂ່າວສານເຊິ່ງສະແດງເຖິງຄວາມຮັກຂອງພະເຈົ້າແບບກົງໆກັບລາວ. (ຢເຣ. 45:1-5) ເຮົາໄດ້ຮຽນຮູ້ຫຍັງຈາກເລື່ອງນີ້?
ໝູ່ທີ່ດີໃຫ້ອະໄພກັນຈາກໃຈຈິງ (ເບິ່ງຂໍ້ 16)
16. ຕາມສຸພາສິດ 17:9 ເຮົາຕ້ອງເຮັດຫຍັງເພື່ອຈະຮັກສາມິດຕະພາບໄວ້?
16 ທີ່ຈິງ ເຮົາບໍ່ຄວນຄາດໝາຍວ່າພີ່ນ້ອງຈະດີເລີດທຸກຢ່າງ. ດັ່ງນັ້ນ ຖ້າເຮົາມີໝູ່ສະໜິດ ເຮົາຕ້ອງພະຍາຍາມຮັກສາມິດຕະພາບນັ້ນໄວ້. ຖ້າໝູ່ເຮັດຜິດ ເຮົາອາດຕ້ອງຊ່ວຍລາວໂດຍໃຫ້ຄຳແນະນຳຈາກຄຳພີໄບເບິນແບບກົງໆແຕ່ກໍເຮັດດ້ວຍຄວາມຮັກ. (ເພງ. 141:5) ແລະຖ້າໝູ່ເຮັດໃຫ້ເຮົາເສຍໃຈ ເຮົາຕ້ອງໃຫ້ອະໄພລາວຈາກໃຈ. ແລະເມື່ອໃຫ້ອະໄພແລ້ວ ເຮົາຕ້ອງບໍ່ເອົາມາເວົ້າອີກ ຫຼືບໍ່ເວົ້າຕໍ່ໃຫ້ຄົນອື່ນຟັງ. (ອ່ານສຸພາສິດ 17:9) ໃນໄລຍະທີ່ຫຍຸ້ງຍາກນີ້ ເປັນເລື່ອງສຳຄັນແທ້ໆທີ່ເຮົາຈະເບິ່ງຈຸດດີຂອງພີ່ນ້ອງແລະເບິ່ງຂ້າມຈຸດອ່ອນ. ຖ້າເຮົາເຮັດແບບນັ້ນ ເຮົາກໍຈະສະໜິດກັບພວກເຂົາຫຼາຍຂຶ້ນ. ເລື່ອງນີ້ສຳຄັນຫຼາຍທີ່ເຮົາຕ້ອງເຮັດໃນຕອນນີ້ ເພາະເຮົາຈຳເປັນຕ້ອງມີໝູ່ສະໜິດໃນໄລຍະຄວາມທຸກຍາກລຳບາກຄັ້ງໃຫຍ່.
ສະແດງຄວາມຮັກທີ່ໝັ້ນຄົງຕໍ່ກັນ
17. ເຢເຣມີພິສູດໃຫ້ເຫັນແນວໃດວ່າລາວເປັນໝູ່ແທ້ໃນເວລາທີ່ຍາກລຳບາກ?
17 ຜູ້ພະຍາກອນເຢເຣມີພິສູດວ່າລາວເປັນໝູ່ແທ້ໃນເວລາທີ່ຍາກລຳບາກ. ຕົວຢ່າງເຊັ່ນ: ຫຼັງຈາກເອເບດເມເລກເຊິ່ງເປັນຂ້າລາຊະການຊ່ວຍຊີວິດເຢເຣມີອອກຈາກຂຸມຂີ້ຕົມ ເອເບດເມເລກກໍຢ້ານພວກເຈົ້ານາຍຈະມາທຳຮ້າຍລາວ. ເມື່ອເຢເຣມີຮູ້ເລື່ອງນີ້ ລາວບໍ່ໄດ້ງຽບຢູ່ແລະຄິດວ່າເອເບດເມເລກຈະຫາທາງເອົາຕົວລອດໄດ້. ເຖິງວ່າເຢເຣມີຈະຢູ່ໃນຄຸກ ແຕ່ລາວກໍພະຍາຍາມຊ່ວຍເທົ່າທີ່ຊ່ວຍໄດ້ໂດຍອະທິບາຍຄຳສັນຍາຂອງພະເຢໂຫວາເພື່ອໃຫ້ກຳລັງໃຈເອເບດເມເລກ.—ຢເຣ. 38:7-13; 39:15-18.
ໝູ່ທີ່ດີພ້ອມທີ່ຈະຊ່ວຍເຫຼືອກັນເມື່ອໝູ່ຕ້ອງການ (ເບິ່ງຂໍ້ 18)
18. ຕາມສຸພາສິດ 17:17 ເຮົາຄວນເຮັດຫຍັງຕອນທີ່ໝູ່ປະສົບຄວາມຍາກລຳບາກ?
18 ທຸກມື້ນີ້ ພີ່ນ້ອງຂອງເຮົາປະສົບກັບບັນຫາຫຼາຍຢ່າງ ເຊັ່ນ: ຫຼາຍຄົນປະສົບກັບໄພພິບັດທາງທຳມະຊາດ ຫຼືບໍ່ກໍໄພທີ່ມະນຸດສ້າງຂຶ້ນ. ເມື່ອເກີດເຫດການແບບນີ້ ພີ່ນ້ອງບາງຄົນອາດໃຫ້ບ່ອນພັກອາໄສ ສ່ວນບາງຄົນກໍອາດຊ່ວຍທາງດ້ານການເງິນ. ແຕ່ວິທີທີ່ເຮົາທຸກຄົນຊ່ວຍໄດ້ກໍຄື ອະທິດຖານຂໍໃຫ້ພະເຢໂຫວາຊ່ວຍພີ່ນ້ອງເຫຼົ່ານັ້ນ. ເມື່ອເຮົາຮູ້ວ່າພີ່ນ້ອງຂອງເຮົາທໍ້ໃຈ ເຮົາພັດບໍ່ຮູ້ວ່າຈະເວົ້າຫຍັງຫຼືເຮັດອັນໃດ ແຕ່ກໍມີຫຼາຍສິ່ງທີ່ເຮົາສາມາດເຮັດໄດ້ ເຊັ່ນ: ໃຫ້ເວລາກັບພວກເຂົາ ຕັ້ງໃຈຟັງພວກເຂົາຢ່າງເຫັນອົກເຫັນໃຈ ແລະເວົ້າເຖິງຂໍ້ຄຳພີທີ່ເຮົາມັກເພື່ອໃຫ້ກຳລັງໃຈລາວ. (ເອຊາ. 50:4) ສິ່ງທີ່ສຳຄັນທີ່ສຸດຄື ເຈົ້າຕ້ອງພ້ອມທີ່ຈະຢູ່ຄຽງຂ້າງລາວ.—ອ່ານສຸພາສິດ 17:17
19. ການສະໜິດກັບພີ່ນ້ອງໃຫ້ຫຼາຍຂຶ້ນຕັ້ງແຕ່ຕອນນີ້ຈະຊ່ວຍເຮົາແນວໃດໃນອະນາຄົດ?
19 ເຮົາຕ້ອງຕັ້ງໃຈທີ່ຈະສະໜິດກັບພີ່ນ້ອງໃຫ້ຫຼາຍຂຶ້ນແລະຮັກສາມິດຕະພາບໄວ້ຕັ້ງແຕ່ຕອນນີ້. ຍ້ອນຫຍັງ? ຍ້ອນພວກສັດຕູຈະພະຍາຍາມໃຊ້ຄຳຕົວະເຮັດໃຫ້ເຮົາແຕກແຍກກັນ ບໍ່ໄວ້ໃຈກັນແລະເຊົາຊ່ວຍເຫຼືອກັນ. ແຕ່ພວກເຂົາຈະເຮັດບໍ່ສຳເລັດ. ພວກເຂົາບໍ່ສາມາດເຮັດໃຫ້ເຮົາເຊົາຮັກກັນໄດ້. ຈະບໍ່ມີຫຍັງມາທຳລາຍມິດຕະພາບຂອງເຮົາໄດ້ເລີຍ. ທີ່ຈິງ ມິດຕະພາບທີ່ເຮົາມີຕໍ່ກັນຈະບໍ່ພຽງແຕ່ຢູ່ຈົນເຖິງຈຸດຈົບຂອງໂລກຊົ່ວ ແຕ່ວ່າຈະຄົງຢູ່ຕະຫຼອດໄປ!
ເພງ 24 ໄປທີ່ພູເຂົາຂອງພະເຢໂຫວາ
^ ຂໍ້ 5 ຂະນະທີ່ຈຸດຈົບຈະມາເຖິງ ເຮົາທຸກຄົນຕ້ອງສະໜິດກັບພີ່ນ້ອງໃຫ້ຫຼາຍຂຶ້ນ. ໃນບົດຄວາມນີ້ ເຮົາຈະພິຈາລະນາວ່າເຮົາໄດ້ຮຽນຮູ້ຫຍັງຈາກຕົວຢ່າງຂອງເຢເຣມີ ແລະເຮົາຍັງຈະມາເບິ່ງວ່າການເສີມສ້າງສາຍສຳພັນທີ່ໃກ້ຊິດກັບພີ່ນ້ອງໃນຕອນນີ້ຈະຊ່ວຍເຮົາໃນໄລຍະທີ່ຫຍຸ້ງຍາກແນວໃດ.
^ ຂໍ້ 2 ເຫດການຕ່າງໆໃນພະທຳເຢເຣມີບໍ່ໄດ້ຮຽງຕາມລຳດັບເວລາ.
[ຂໍ້ຄວາມໄຂເງື່ອນ]
^ ຂໍ້ 57 ຄຳອະທິບາຍຮູບພາບ: ພາບເຫດການທີ່ຈະເກີດຂຶ້ນໃນໄລຍະ “ຄວາມທຸກຍາກລຳບາກຄັ້ງໃຫຍ່.” ພີ່ນ້ອງຫຼາຍຄົນໄປລີ້ຢູ່ຫ້ອງເພດານຢູ່ເຮືອນພີ່ນ້ອງຄົນໜຶ່ງ. ພວກເຂົາໃຫ້ກຳລັງໃຈກັນແລະກັນໃນເວລາທີ່ຫຍຸ້ງຍາກລຳບາກ. ສາມເຫດການຕໍ່ໄປນີ້ສະແດງໃຫ້ເຫັນວ່າ ພີ່ນ້ອງກຸ່ມດຽວກັນນີ້ພະຍາຍາມສະໜິດກັນໃຫ້ຫຼາຍຂຶ້ນຕັ້ງແຕ່ກ່ອນທີ່ຄວາມທຸກຍາກລຳບາກຄັ້ງໃຫຍ່ຈະເລີ່ມຕົ້ນຂຶ້ນ.
