1-2. Petera thawn khat 4:7, 8-a sawi angin, harsatnate hmachhawn thei tûrin engin nge min ṭanpui ang?

‘NI HNUHNUNG’ tâwpna kan hnaih telh telh rualin, harsatna khirh tak takte kan hmachhawn thei a. (2 Tim. 3:1) Entîr nân, inthlanna campaign neih hnu chuan Africa khaw thlang lama ram pakhat chu khawtlâng buaina leh mipui tharum thawhna avângin a kehchhia a. Kan unaute chu buaina chhuahna biala an awm avângin thla ruk aia tam pâwn chhuak thei lovin an awm a ni. Chûng harsatnate hmachhawn thei tûrin anni chu engin nge ṭanpui? Unau ṭhenkhat chu hmun him zâwka awm unaute inah an va awm a. Unaupa pakhat chuan: “Chutiang dinhmuna ṭhian ṭhate ka neih avângin ka lâwm hle. Kan intichak tawn thei a ni,” tiin a sawi.

² “Hrehawm nasa tak” a lo thlen hun chuan min hmangaihtu ṭhian ṭhate kan neih avângin kan lâwm ngei ang. (Thup. 7:14) Chuvângin, tûna inṭhianna nghet tak siam chu a hmanhmawhthlâk tak a ni. (1 Petera 4:7, 8 chhiar rawh.) Jerusalem tihchhiat a nih hma lawka a ṭhiante ṭanpuina avânga dam khawchhuak Jeremia thiltawn aṭangin thil tam tak kan zir thei a. * Engtin nge Jeremia chu kan entawn theih?

3. (a) Engin nge Jeremia chu inlâk hran duhna neihtîr mai thei? (b) Jeremia chuan a lehkha ziaktu Baruka chu eng nge a hrilh a, chu chuan eng nge a rah chhuah?

³ Jeremia chu mi rinawm lote zîngah a lo berah kum 40 vêl a awm a, chûng zîngah chuan a pianna Anathoth khuaa a ṭhenawmte  leh a chhûngte pawh an tel mai thei. (Jer. 11:21; 12:6) Mahse, ani chu a inla hrang lo. Dik tak chuan, a rilru vei zâwng chu a lehkha ziaktu rinawm Baruka hnênah a hrilh a, a thuziakte aṭangin keini pawhin kan hria a ni. (Jer. 8:21; 9:1; 20:14-18; 45:1) Baruka’n Jeremia thiltawn kimchang tak a ziah laia inngainat tawnna leh inzah tawnna thûk tak an neih dân tûr chu kan mitthla thei a ni.—Jer. 20:1, 2; 26:7-11.

4. Jehova’n Jeremia chu eng ti tûrin nge a tih a, chu mawhphurhna chuan Jeremia leh Baruka te inlaichînna chu engtin nge a tihngheh?

⁴ Jeremia chuan Jerusalem chunga thil lo thleng tûr chungchângah Israel mite chu huaisen takin kum tam tak chhûng a vaukhân a. (Jer. 25:3) A hnua mite inlam lêt tûra a fuihnaah, Jehova chuan lehkhabu zialah A vaukhânna thute ziak tûrin Jeremia chu a hrilh a ni. (Jer. 36:1-4) Jeremia leh Baruka chuan Pathian pêk an mawhphurhna chu thla engemaw zât an thawh dun laiin rinna tichak thei tîtîna an nei ngei ang.

5. Baruka chuan Jeremia tâna ṭhian ṭha a nihzia engtin nge a târ lan?

⁵ Lehkhabu ziala thute puan chhuah hun a lo thlen chuan, Jeremia chuan chu thuchah sawi chhuak tûrin a ṭhian Baruka chu a rinchhan a ngai a. (Jer. 36:5, 6) Baruka chuan a mawhphurhna hlauhawm tak chu huaisen takin a hlen a ni. Baruka’n biak ina kal a, a tih tûrte a va hlen avânga Jeremia’n a chhuan dân tûr chu i mitthla thei em? (Jer. 36:8-10) Juda hotute’n Baruka thiltih chu an hriatin, lehkhabu ziala thute chu an beng hriat ngeia chhiar chhuak tûrin thu an pe a! (Jer. 36:14, 15) Chûng hotute chuan Jeremia thusawite chu Lal Jehoiakima hrilh an tum a. Hriatthiamna nei takin, Baruka hnênah: “Kal la, Jeremia nên chuan biru rawh u; tu mân in awmna hre suh se,” tiin an hrilh a ni. (Jer. 36:16-19) Thurâwn ṭha tak a va ni êm!

6. Engtin nge Jeremia leh Baruka chuan dodâlna chu an chhân lêt?

 ⁶ Lal Jehoiakima chu Jeremia thuziakte a hriat chuan a thinrim hle a, lehkhabu zial chu a hâl a; tichuan, Jeremia leh Baruka man tûrin thu a pe a ni. Mahse, Jeremia chuan a hlau lo. Ani chuan lehkhabu zial dang chu lain Baruka a pe a, Jeremia’n a hnêna a hrilh Jehova thuchah, “lehkhabu zial hmasaa thu zawng zawng, Juda lal Jehoiakiman a hâl ral tâkte chu” Baruka chuan a ziak leh vek a ni.—Jer. 36:26-28, 32.

7. Jeremia leh Barukate’n hna an thawh dun laiin an inkârah eng thil nge thleng mai thei?

⁷ Fiahna tâwk dûnte chuan inṭhianna nghet an siam ṭhîn a. Chuvângin, Jeremia leh Baruka chuan Lal sual Jehoiakima tihchhiat tâk lehkhabu ziala thute ziak ṭha leh tûra an thawh dun laia an miziate an inhlutsak tawn dân tûr chu kan mitthla thei a ni. Hêng mi rinawm pahnihte entawn tûr siam hi engtin nge kan hlâwkpui theih?

8. Ṭhian ṭha siamna tûr engin nge min dâl mai thei a, engvângin nge kan beidawn mai loh vang?

⁸ Tûn hmaa tuemawin kan rilru a lo tihnat tawh mai theih avângin, tlang taka mi dang biak chu harsa kan ti mai thei a. (Thuf. 18:19, 24) A nih loh leh, inlaichînna ṭha siam tûrin hun leh tha kan nei lo niin kan ngai mai thei bawk. Mahse, kan beidawng tûr a ni lo. Kan unaute chu fiahna kan tawh huna min ṭanpui tûra kan duh chuan, kan ngaihtuahna leh rilru vei zâwngte chu tûn aṭanga kan hrilh ngam a ngai a. Chu chu ṭhian dik tak siamnaa rahbi pawimawh tak a ni.—1 Pet. 1:22.

9. (a) Isua’n a ṭhiante a rinzia engtin nge a târ lan? (b) Inhawng taka inbiak pawhna chuan mi dangte nêna kan inṭhianna nghet lehzual tûrin engtin nge min ṭanpui theih? Entîrna pe rawh.

⁹ Isua chuan a ṭhiante chu inhawng taka biain, a rinzia a târ lang a. (Joh. 15:15) Keini pawh kan hlimna te, rilru vei zâwng te, leh lungnih lohnate chu kan ṭhiante hrilhin Isua kan entawn thei a ni. Tuemawin a biak lai chea ngun taka i ngaihthlâksak chuan a thil ngaihtuah dân, rirul vei zâwng, leh thiltumahte inanna tam tak in nei tih i hmu chhuak mai thei. Kum 30 la tling lo deuh unaunu Cindy-i thiltawn hi han ngaihtuah teh. Ani chu kum 60 aia upa pioneer unaunu Marie-Louise-i nên an inṭhian a. Cindy-i leh Marie-Louise-i te chuan Nilaithawhṭan zîng apiangin rawngbâwlnaah an thawk dûn ṭhîn a, zalên takin thu chi hrang hrang an sawi dûn ṭhîn a ni. Cindy-i chuan, “Ṭhiante hre chiang lehzual tûra min ṭanpui avângin, an hnêna thu pawimawh sawi chu nuam ka ti thei lutuk,” tiin a sawi. Boruak nuam tak hnuaia inhawng taka inbiak pawhna chuan inṭhianna chu a tinghet lehzual a ni.  Cindy-i anga mi dangte nêna inhawng taka inbiak pawhna ṭha nei tûra hma i lâk chuan, in inṭhian ṭhatna chu a ngheh lehzual ngei a rinawm.—Thuf. 27:9.

10. Thufingte 27:17-a sawi angin, rawngbâwlnaa Kristian unaute nêna kan thawhhona chuan eng rah nge a chhuah theih?

¹⁰ Jeremia leh Baruka chunga a thlen ang khân, kan unaute nêna kan thawhho a, an mize duhawm takte kan hmuh hian an hnên aṭangin kan inzir a, kan inhnaih lehzual a ni. (Thufingte 27:17 chhiar rawh.) Entîr nân, rawngbâwlnaa i thawhpuiin a thurinte huaisen taka a sawi, a nih loh leh Jehova leh a thiltumte a rinzia thinlung taka a sawi i hriat hian engtin nge i awm ṭhin? Ani chu i ngainat lehzual ngei a rinawm.

11-12. Rawngbâwlnaa thawh dunnain kan inṭhianna tinghet tûra min ṭanpui theih dân entîrna pe rawh.

¹¹ Rawngbâwlnaa thawh dunnain mite a inhnaihtîr dân târ langtu thiltawn pahnih hi han ngaihtuah teh. Kum 23-a upa unaunu Adeline-i chuan a ṭhiannu Candice-i chu thu hrilh ngai vak lohna biala thu hril tûrin a sâwm a. Ani chuan: “Rawngbâwlnaa ṭhahnem ngai taka thawh a, chumi aṭanga hlimna neih lehzual chu kan duh a. Kan pahniha kan intihchak tawn a ngai a ni,” tiin a sawi. An thawh dunna chu engtin nge an hlâwkpui? Adeline-i chuan: “Tlai tin hian kan rilru vei zâwng te, in neitute nêna kan tîtîna aṭanga chakna kan hmuh dân te, leh kan rawngbâwlnaah Jehova’n min kaihruai tih kan hriat dânte chu kan sawi dûn ṭhîn a. Chutiang thu pawimawh tak takte sawi dun chu nuam kan ti hle a, chu chuan min inpawhtîr lehzual,” tiin a sawi belh a ni.

¹² France rama awm, pasal la nei lo unau pahnih Laïla-i leh Marianne-i te chu Central African Republic-a khawpui lûn tak Bangui-ah chawlhkâr nga chhûng thu hril tûrin an kal a. Laïla-i chuan: “Marianne-i nên harsatnate kan hmachhawn dûn a; mahse, inbiak pawhna ṭha tak leh hmangaihna dik tak chuan kan inṭhianna a tihngheh lehzual avângin kan lâwm hle. Marianne-i insiamrem theihzia te, tualchhûnga mite a hmangaihzia te, leh  rawngbâwlnaa a ṭhahnemngaihziate ka hmuh hian, ani chu ka ngaina lehzual a ni,” tiin a sawi. Chutiang malsâwmnate dawng tûrin ram danga i insawn kher a ngai lo. Tualchhûng thu hrilhna biala unaute nêna in thawhho apiangin, anmahni hre chiang lehzual tûr leh in inṭhianna tinghet lehzual tûrin hun remchâng i nei a ni.

13. Kan ṭhiante nêna rawngbâwlnaa kan thawh dun hian eng thilte nge thleng mai thei?

¹³ A châng chuan, kan ṭhiante nêna kan thawh dun hian an chakna laite chauh ni lovin, an chak lohna laite pawh kan hmu a. Chûng an chak lohna laite haider thei tûrin engin nge min ṭanpui thei? Jeremia entawn tûr siam hi han ngaihtuah leh teh. Engin nge ani chu mi dangte ṭhatna lai hmu tûr leh an tlin lohna laite haider thei tûra ṭanpui?

14. Jehova chungchângah Jeremia chuan eng nge a zir a, chu chuan engtin nge a ṭanpui?

¹⁴ Jeremia chuan Bible-a ama hming chawi lehkhabu a ziah bâkah, Lalte pakhatna leh pahnihna bu pawh a ziak niin a lang. Chu a chanvo chuan mihring ṭha famkim lote chunga Jehova zahngaihna chu a hriat chiantîr ngei ang. Entîr nân, Lal Ahaba chu a thil sual tihte avânga a inchhîr khân, Jehova’n a dam laia a chhûngkuate tiboral lo tûrin a tiam tih Jeremia’n a hria a. (1 Lal. 21:27-29) Chutiang bawkin, Jeremia chuan Manasea’n Ahaba aia nasain Jehova huat zâwng thilte a ti tih a hre bawk. Chuti chung pawhin, Jehova chuan Manasea chu a inchhîr avângin a ngaidam a ni. (2 Lal. 21:16, 17; 2 Chro. 33:10-13) Chûng thute chuan Jeremia chu a ṭhiante a cheibâwl dânah Pathian dawhtheihna leh zahngaihna entawn tûrin a ṭanpui ngei ang.—Sâm 103:8, 9.

15. Baruka rilru a kal pên khân engtin nge Jeremia’n Jehova dawhtheihna a entawn?

¹⁵ Baruka’n hun rei lo te chhûng a chanvo neiha rilru a pêk theih loh laia Jeremia ṭanpui dân chu han ngaihtuah teh. Jeremia chuan a ṭhianpa chungah beidawng nghâl mai lovin, Pathian ngilneihna leh a thuchah khauh tak chu hrilhin a ṭanpui a ni. (Jer. 45:1-5) He thu aṭang hian eng nge kan zir theih?

16. Thufingte 17:9-a sawi angin, kan inṭhian ṭhatna tinghet tlat tûrin eng nge kan tih ngai?

¹⁶ Dik tak chuan, kan unaute hnên aṭangin ṭhat famkimna kan beisei thei lo va. Chuvângin, ṭhian ṭhaa kan siam tawh chuan, chu kan inṭhian ṭhatna tinghet zêl tûrin theih tâwp kan chhuah a ngai a ni. Kan ṭhiante’n thil an tihsual chuan Pathian Thu ṭanchhanin ngilnei tak leh tlang takin fuihna kan pêk a ngai thei a. (Sâm 141:5) Kan rilru an tinâ a nih chuan, kan ngaidam tûr a ni. Kan ngaihdam tawh chuan, kan lungnih lohna chu a hnuah kan sawi chhuak tawh tûr a ni lo. (Thufingte 17:9 chhiar rawh.) He hun khirh takahte hian kan unaute tlin lohna ni lovin, an ṭhatna laite ngaihven tlat chu a va pawimawh tak êm! Chutianga tihna chuan kan inṭhianna a tinghet lehzual ang. Chu bâkah, hrehawm nasa tak chhûnga ṭhian ṭha takte kan mamawh dâwn avângin chutianga tih chu thil pawimawh tak a ni.

17. Jeremia chuan hun harsaah pawh ṭhian dik tak a nihzia engtin nge a lantîr?

¹⁷ Zâwlnei Jeremia chuan hun harsaah pawh ṭhian dik tak a nihzia a lantîr a. Entîr nân, lal ina hnathawk Ebedmeleka’n lei hnuai rip aṭanga Jeremia a chhanchhuah hnuah, hotute’n a chungah thil ṭha lo an tih chu a hlau va. Jeremia’n chu thu chu a hriat chuan, a ṭhianpain a harsatna chu amaha a chinfel mai ringin a ngawihsan mai lo. Jeremia chuan tân  ina a awm chung pawhin, a ṭhian Ebedmeleka hnênah Jehova thutiam thlamuanthlâk tak chu hrilhin, a tihtheih apiang a ti a ni.—Jer. 38:7-13; 39:15-18.

18. Thufingte 17:17-a sawi angin, kan ṭhiante’n harsatna an tawh hunah engtin nge kan chhân lêt ang?

¹⁸ Tûn laiah pawh, kan unaute chuan harsatna chi hrang hrang an hmachawn a. Entîr nân, tam tak chuan leilung chhiatna emaw, mihringte tihchhuah chhiatnate emaw chu an tuar a. Chutiang thilte a thlen hunah, kan zînga ṭhenkhat chuan chûng kan ṭhiante chu kan inah kan thleng thei a ni. Mi dangte chuan sum leh pai hmangin an ṭanpui thei bawk. Mahse, kan za hian kan unaute tân Jehova hnênah ṭanpuina kan dîlsak thei a ni. Kan unau tuemaw chu a lunghnual tih kan hriat chuan fuih dân emaw, thlamuan dân emaw kan hre lo pawh a ni thei. Mahse, kan za hian tih theih tam tak kan nei a. Entîr nân, chu kan ṭhian tân chuan hun kan pe thei a. Thu a sawi hunah khawngaihna nei takin kan ngaithla thei a ni. Kan Bible châng duh berte chu kan chhiarsak thei bawk. (Is. 50:4) A pawimawh ber chu i ṭhianin a mamawh hun chea a bula i awm hi a ni.—Thufingte 17:17 chhiar rawh.

19. Tûn aṭanga ṭhian nghet tak siamna chuan engtin nge nakin hunah min ṭanpui ang?

¹⁹ Tûn aṭangin kan unaute nêna inṭhianna nghet tak siam a, vawn ngheh tlat chu kan tum tûr a ni. Engvângin nge? Kan hmêlmate chuan dâwt thu leh thu dik lote hmanga min ṭhen hran an tum dâwn avângin. Unaute inkâra kan inrin tawnna chu tihchhiat an tum dâwn a. Mahse, an thiltumte chu a hlawhtling lo vang. Anni chuan kan inhmangaih tawnna chu an tichhe thei lo vang a. Eng thil pawh tih tum se, unaute nêna kan inṭhian ṭhatna chu an tichhe thei lo bawk ang. Dik tak chuan, chûng kan inṭhian ṭhatna chu he khawvêl tâwp thleng chauh ni lovin, chatuan daih a ni ang!