1-2. Toko cineeraaya 1 Peturu 4:7, 8, isiyani inhala unikavihera uvilela ukati woorikarikaca?

HIIVA ninkhala nitepaka waattamela ukati woomalela “mahuku ookhicera.” Phimaana, pooti unikhumelela masakha oorika cinene. (2 Tim. 3:1) Wootakihera, woone itthu yaakhumelenle nlaponi imoca yo mphantte unkela ncuwa wo África. Umala waya nlattulo noohala upankiya mwaathanle, apoovu yahancera waanihana ni ukhumelela mikupitti caanakhirini. Cahovira myeeri 6 ni mahukwaaya mayamunneehu ni asirokorihu yoopihiyaka nlattu wo nanrokottole aapankiya. Isiyani yaakavihenre uvilela ule ukati woorikoole? Mayamunna enci yaatthawenle mmawanuwaya mayamunna akhwaawe yaakhala mapuro oohitepa woopiha. Munna mmoca aakhanle ule ukatyuule neera: “Wahokitteela nrima cinene ukhala wamoca naapatthannyaaka ule uwakatyuule. Nahokhitiri ulipihana nrima.”

² Wanhalaaya wancera “masakha moolupale,” hiiva ciicammo unaahala unitteela nrima nlattu wookhala wamoca naapatthaniihu annifenta. (Apoka. 7:14) Phimaana, otheene cihu nihaana niikurumicaka nenna va ulipihaca upatthaniihu ni mayamunneehu. (Usome 1 Peturu 4:7, 8.) Khacimala citthu hiivano coohala wiitthuca ni porofeeta Jeremiya. Nlattu wookaviheriya naasipatthannyaawe, uyo ahokhitiri woopwa ukati woorika cinene ihinaaya ukwanyulaciya isittatti yo Yerusalemu. * Ninhala untakiha cani Jeremiya?

3. a) Isiyani yaahala umwiiriha Jeremiya wiicukuleliha ni ukhala veekha? b) Isiyani Jeremiya yanhimyeraawe Baruki, ni isiyani yaakhumelenle?

³ Jeremiya ahokhala myaaka 40 iriyari waatthu yahanvaresesa  Nluku. Iriyaryaaya ayo atthwaayo, yahaavo aattamanannyaawe ni atthunaka amucyaawe yaakhala wasittatti waayariyaawe, weehaniya Anatote. (Jer. 11:21; 12:6) Unookhalaru commo, Jeremiya kheecukulelihale ni khaakhanle veekha. Masi, uyo aananhimyera Baruki, nrumyaawe ookhuluvelya inanna ciicoonaawe. Hataa honihimyera hiiva ciicammo, mbiiblyani. (Jer. 8:21; 9:1; 20:14-18; 45:1) Atthunaka, ukati Baruki wantikhaawe citthu cotheene cankhumelela Jeremiya, ooyeeli caya yahiitthuca wooniherana nifento ni ihisima.—Jer. 20:1, 2; 26:7-11.

4. Ntekoni Yehova wanvahalyaawe Jeremiya, ni uyo ntekooyo waalipihacale cani upatthani wa Jeremiya ni Baruki?

⁴ Jeremiya ahokhala myaakha cinci ahaahimyera asarayeli woohoova itthu yaahala ukhumelela uYerusalemu. (Jer. 25:3) Vano, Yehova aholakela waavaha ukati apoovwaawe wiira attharuwe. Yehova ahonlepela Jeremiya wiira antikhe nrooluni citthu cotheene Yehova caahimyeraawe apoovu. (Jer. 36:1-4) Jeremiya ni Baruki atthunaka yahokhala myeeri cinci yavaraka nteko waavahiyaaya ni Nluku. Uyo ukatyuuyo, unawoonannya wiira ayo yaanawoopa myaha caakavihera ulipihaca waamini waya.

5. Baruki aathoonyenre cani ukhala mpatthani omaana a Jeremiya?

⁵ Ukati waamalihalyaawe wantikha iroolu, Jeremiya ahopheela wiira mpatthannyaawe, Baruki, asome iroolu uhoolo waapoovu. (Jer. 36:5, 6) Iyo yaari itthu yowoopiha, masi Baruki aholipa nrima ni ahopanka. Unaakhitiri wuupuwela mananna Jeremiya ciicoonalyaawe nlattu woomoona Baruki arwaaka utempulu ni usoma iroolu uhoolo waapoovu? (Jer. 36:8-10) Ahooleli o Yuuta yahocuwela itthu yaapankalyaawe Baruki. Phimaana, ayo yahomwiihana Baruki ni yahomwiirela wiira asome iroolu uhoolo waya. (Jer. 36:14, 15) Ahooleli yaholakela urwaa unhimyera mwene Jeoiakim moolumo a Jeremiya. Yathoonyeraka unwacera Baruki, ayo yahomwiirela: “Nrwee ni mwiipithe, weeva ni Jeremiya, ni nhinhiye nanka ntthu acuwelaka  nipuro niriinyu.” (Jer. 36:16-19) Itthu yaamwiirenlyaaya Baruki yaari itthu yomaana!

6. Isiyani Jeremiya ni Baruki yaapankalyaaya ukati waalupatthiyaaya ni mwene Jeoiakim?

⁶ Mwene Jeoiakim ahorusiya nlattu wo moolumo o nrooluni yantikhalyaawe Jeremiya. Phimaana, uyo ahopaha iroolwiile ni ahoruma wiira Jeremiya ni Baruki atthukiye. Masi Jeremiya kheehiyale oopopihiyaka. Uyo ahocisa iroolu ikiina ni ahonvaha Baruki. Ukati Jeremiya woolumaawe ihapari ca Yehova, Baruki aanawantikha “moolumo otheene yaari nrooluni yoopacera, Jeoiakim, mwene o Yuuta [yaapahalyaawe].”—Jer. 36:26-28, 32.

7. Isiyani atthunaka yaakhumelenle ukati Jeremiya ni Baruki waavaraaya nteko nkhayi?

⁷ Atthu yahuvaka nkhayi, anaapatthanaca cinene. Jeremiya ni Baruki yahaana tootho yavaraka nteko nkhayi, wiira yantikhe iroolu yaapahiye ni mwene oohinamaana Jeoiakim. Ukati waavaraaya uyo ntekooyo, atthunaka ayo yahotepa ucuwelana ratta ni yahopatthanaca cinene. Isiyani hiivano ineetthuceehu ni ayo alopwana ookhuluvelyaayo?

8. Kontha isiyani atthunaka unaanirikela waahimyera akhwiihu itthu inniira, ni nlattuni ninlamuliyeehu wiikurumica waapatthanana mayamunneehu?

⁸ Unawuurikela waahimyera akhwaa itthu inwiira wanrimani? Iyo atthunaka inookhumelela weeva nlattu ntthuuyo hopaca wuutthekela khalayi. (Miru. 18:19, 24) Awula atthunaka weeva unoopuwela wiira khurina ukati ni khunkhitiri waapanka apatthani. Masi uhoocyeele. Napheelaka wiira mayamunneehu akhale wamoca ni hiiva yanikhumelelaka masakha, nihaana nenna co naakhuluvelaka ni ukupali waahimyera inoopuweleehu ni itthu inniira wanrimani. Iyo phi itthu yuulupale inlamuliyeehu upanka wiira nikhalane apatthani eekhweeli.—1 Pet. 1:22.

9. a) Yesu aathoonyenre cani wiira aanawaakhuluvela apatthannyaawe? b) Uwoopana mwaha ratta akhwaa unhala wuukavihera cani ukhalana upatthani woolipa naayo? Uhimye ntakihero.

⁹ Yesu aanawaakhuluvela apatthannyaawe. Uyo aathoonyenre iyo ni mananna caawuulumanaawe. Uyo aanawaahimyera itthu yoopuwelaawe ni yaamwiira, woohaavithavitha. (Joau 15:15) Weeva unlamuliya untakiha cani Yesu? Wiitthuce waahimyera akhwaa citthu cinootteeliha nrima, citthu cinoocukuliha ni cinoohela isukhuli. Unviriyane ratta ntthu awuulumanaka. Weeva atthunaka unaahala woonelela wiira khacimala citthu ntthuuyo cinoopuwelaawe, cimmwiira wanrimani ni cimpheelaawe upanka, cihivirikanne ni citthu weeva cinoopuwelaa, cinwiira wanrimani waa ni cimpheelaa upanka. Woone ntakihero na Cindy, * nrokorihu rina myaakha 29. Uyo  ahompatthanana Maria Luísa, nrokorihu nkiina nvara nteko weepiyoneeru rina myaakha 67. Ooyeli caya anaarwaa wuulalyeerani nkhayi khula Neecese uwicisu, ni anawoopa myaha cinci. Cindy neera: “Unaakicivela uwuulumana asipatthannyaaka myaha cofayita, kontha upanka commo unaakikavihera waacuwela ratta.” Atthu wiira apatthanace cinene, ahaana yoopaka myaha comaana. Weeva wapankaka toko Cindy, upacera uwoopana mwaha akhwaa waahimyeraka woohaavithavitha inwiira, unaahala woona wiira upatthannyaa naayo unaahala utepa wuunuwa ni ukhala woolipa.—Miru. 27:9.

10. Toko cinthoonyeraaya Miruku 27:17, isiyani inkhumelela navaraka nteko nkhayi ni mayamunneehu?

¹⁰ Jeremiya ni Baruki yahotepa upatthanaca cinene ukati waavaraaya nteko nkhayi. Inanna imoca, navaraka nteko nkhayi ni mayamunneehu ni noonaka makhalelwaaya omaana, hiiva pooti wiitthuca cinene naayo ni ninawancera utepa waafenta cinene. (Usome Miruku 27:17.) Wuupuwele isiyani inkhumelela weeva waakhalaka wuulalyeerani nkhayi ni mpatthannya. Ukati woolalyeera, weeva unaamoona mpatthannya alipaka nrima wantaphulelaawe citthu cinkupaliihu awula oolumaka woohoova myaha ca Yehova ni inatiri cawe. Weeva uneecoona cani uyo ukatyuuyo? Atthunaka unaatepa unfenta cinene.

11-12. Uhimye ntakihero ninthoonyera mananna ulalyeera cinlipihacaaya upatthani.

¹¹ Woone matakihero meeli anthoonyera mananna ulalyeera cinlipihacaaya upatthani. Adeline, nrokorihu o myaakha 23, ahonlepela mpatthannyaawe Camila wiira arwaace nkhayi ulalyeera nipuro naalalyeeriye vakaani. Adeline neera: “Hiiva naapheela wiira unicivele ulalyeera. Ooyeeli cihu naapheela usovenrihiya wiira ninvarele nteko Yehova niikuru cihu cotheene.” Niireke uvara nteko nkhayi wahaakavihera? Adeline neera: “Wuumaleloni khula nihuku, naanaahimyerana mananna neecooneehu, mananna mwaha woopaleehu ni ntthu wuulalyeerani caanilipihalyaaya nrima, ni mananna caamooneehu Yehova eettiheraka nteko waavareehu. Myaha coolumeehu caanaaniphwanyiha ifayita ooyeeli cihu ni cihonikavihera ucuwelana ratta.”

¹² Layala ni Marianne, asirokorihu oohitheliya eeli o França, yahokhala isumana 5 yalalyeeraka  u Bangui, isittatti yuulupale yo República Centro-Africana. Layala neera: “Miiva ni Marianne nahokhalana marikariko. Masi woopa mwaha nkhayi, ni nifento neekristau phi citthu caalipihacale upatthaniihu. Mi kahoona wiira Marianne aari ntthu owaakuva wiilemaleliha makhalelo makiina. Uyo aanawaafenta atthu o ncoko waalalyeereehu ni anawiikurumica cinene wuulalyeerani. Nlattu wo iyo, miiva kahancera utepa unhisima cinene.” Khunakhala wiira weeva uhaana urwaaka ilapo ikiina wiira yuukhumelele iyo. Wiikurumice uvara nteko woolalyeera nkhayi ni mayamunna o wanlokoni waa. Upanka commo, unaahala wuukavihera waacuwela ratta ni upatthanaca cinene naayo.

13. Isiyani inkhumelela navaraka nteko nkhayi naapatthaniihu?

¹³ Ukati nkiina, navaraka nteko nkhayi naapatthaniihu, ninaakhitiri woona makhalelwaaya omaana, ni ciicammo ninawoona citthu cinvonyaaya. Isiyani inhala unikavihera waawehera ratta? Wuupuwele-tho ntakihero na Jeremiya. Isiyani yankavihenre Jeremiya uweheeha citthu comaana caapankaaya akhwaawe, ni uhiweheeha citthu caavonyaaya?

14. Isiyani Jeremiya yeetthucalyaawe nhina makhalelo a Yehova, ni iyo yankavihenre manannani?

¹⁴ Jeremiya hantikha ilivuru yo mbiiblyani irina ncina nawe, ni atthunaka uyo ciicammo phantikhale ilivuru Yoopacera ni Yonayeeli yo Mamwene. Khweeliini, uyo ntekooyo wahomwiiriha Jeremiya woona wiira Yehova nawaathoonyera ikiriri apinaatamu. Wootakihera, Jeremiya aanaacuwela ihantisi ya Akabi. Hataa ukhalaka wiira Akabi ahopanka citthu cinci coohinamaana, uyo ahottharuwa, ni Yehova aheera wiira uyo khaahala uwoona amucyaawe otheene yiiviyaka. (1 Mam. 21:27-29) Jeremiya ciicammo aanaacuwela ihantisi ya mwene Manasesi, anveehale cinene Yehova unvikana Akabi. Hataa ukhala commo, ukati Manasesi waattharuwalyaawe, Yehova ahonlevelela. (2 Mam. 21:16, 17; 2 Ikor. 33:10-13) Ucuwela ihantisi cotheenennyo, atthunaka wahonkavihera Jeremiya untakiha Yehova, aavilelaka ni awoonelaka ikiriri akhunanawe.—Isaa. 103:8, 9.

15. Jeremiya aatakihale cani uvilela wa Yehova ukati Baruki weetthanlyaawe?

¹⁵ Wuupuwele mananna Jeremiya cankavihenryaawe Baruki. Nkwaha mmoca, Baruki aheetthaala ukati woovara nteko waavahiyaawe. Masi Jeremiya khaamoocyaale mpatthannyaawe. Uhiya commo, uyo ahonkavihera Baruki anttonkelaka ratta-raatta, masi woohinvithavitha, moolumo yaapheelaawe uhimyeriya ni Nluku. (Jer. 45:1-5) Iyo inniitthuciha isiyani?

16. Toko cinthoonyeraaya ilivuru yo Miruku 17:9, isiyani ninlamuliyeehu upanka wiira upatthaaniihu naakhwiihu uhimale?

¹⁶ Khaninlamuliya uweherera wiira mayamunneehu ni asirokorihu akhale oohipahuwa. Phimaana, naapatthananaka, nihaana wiikurumica wiira upatthaniihu uhimale. Mpatthaniihu avonyaka, hiiva atthunaka nihaana ninvahaka ikano yo mbiiblyani ratta-raatta, masi woohinvithavitha. (Isaa. 141:5) Mpatthaniihu anitthekelaka, nihaana unlevelela. Ni nanlevelelaka, nihaana wiikurumica wiira wahoolo nihituruwele wuuluma itthu initthekenlyaawe. (Usome Miruku 17:9.) Mahuku oorika ankhaleehu ilelo, ikhanle itthu yofayita cinene wiikurumica uweheeha makhalelo omaana o mayamunneehu ni uhiweheeha coottheka caya. Napankaka iyo, upatthaniihu naayo unaahala ukhala woolipa. Unaareera cinene upanka iyo nenna co, kontha waphiyaka ukati wo masakha moolupale, ninaahala upheela cinene ukaviherana.

17. Jeremiya aathoonyenre cani ukhala mpatthani eekhweeli ukati wo masankiho?

¹⁷ Jeremiya ahothoonyera ukhala mpatthani eekhweeli ukati wo masankiho. Epeti-Meleki nanteko a mwene, ahopanka itthu wiira Jeremiya hikhwe nluusini yoocara marove. Phimaana,  Epeti-Meleki ahova wiiviya naakhulupale. Jeremiya ukati waacuwenlyaawe iyo, khaamaalale paahi, oopuwelaka wiira mpatthannyaawe aanaahala wiicoopola veekha cawe. Hataa ukhala wiira aanootthukiya, Jeremiya aheekurumica upanka yaakhitiryaawe wiira ankavihere mpatthannyaawe. Uyo ahonhimyera mpatthannyaawe, Epeti-Meleki, itthu yoopisiha nrima yaakhuluvelihiyaawe ni Yehova.—Jer. 38:7-13; 39:15-18.

18. Toko cinthoonyeraaya Miruku 17:17, isiyani ninlamuliyeehu upanka mpatthaniihu yankhumelelaka masakha?

¹⁸ Ilelo, mayamunneehu ni asirokorihu anawaakhumelela masakha menci. Enci cinawaakhumelela ihasara, toko uttettemela wotthaya ni ucara wo maaci. Akhwaawe, anaahuva nlattu wohasara cinkumihacaaya apinaatamu, toko ikhotto ni ikhirini. Yakhumelelaka iyo, enci iriyariihu atthunaka ninaakhitiri uwaakhelela mmapuwani wihu ayo apatthannyaayo. Akiina atthunaka anaakhitiri ukavihera ni nsurukhu urinaaya. Masi itthu imoca otheene cihu inkhitiriihu upanka ukhanle unlompa Yehova ni unlepela wiira aakavihere mayamunneehu. Neewaka wiira munneehu awula nrokorihu ri ni masukhuli, atthunaka unaanirika ucuwela itthu yoohala unhimyera awula yoohala upanka wiira ninkavihere. Masi khacimala citthu hiiva cinlamuliyeehu upanka wiira nikavihere. Wootakihera, hiiva pooti ukumiha ukati wiira nikhale wamoca ni mpatthaniihu ankhumelenle masakha. Hiiva pooti unviriyana ratta-raatta ukati unoolumaawe. Ni hiiva pooti unsomela iveerusu yo mbiiblyani yoomaaliha innicivela. (Isai. 50:4) Itthu yofayita cinene uri hiiva ukhala wamoca naapatthaniihu ukati ayo unnipheelaaya cinene.—Usome Miruku 17:17.

19. Kontha isiyani apatthani omaana ankhalaneehu nna va anaahala unikavihera wahoolo?

¹⁹ Nihaana nilakelaka nenna co ukhalana upatthani woolipa ni mayamunneehu. Kontha isiyani? Kontha alupatthiihu anaahala wuuluma citthu cowoothiya wiira anikawanihe. Ayo anaahala umananiha upanka wiira nirukunuwelane yaayoru. Masi ayo khanhala ukhitiri upanka iyo. Awananiihu khanhala ukhitiri umaliha ufentana wihu. Khiivo nanka itthu inhala ukhitiri umaliha upatthaniihu. Khaninhala ukhala apatthani ala mahuku ookhiceraala paahi, masi ninhala ukhala apatthani mpaka!