1-2. Ha gutadila 1 Phetelo 4:7, 8, itshi mbayitukuatesa ha gukolesela mu tangua dia lamba?

LUHOLO “masugu a gisugishilo” adi muheta gu gisugishilo, tuajiya gutagana nu malamba avula. (2 Tim. 3:1) Mu gifutshi gimoshi gia Afrika, muazogele ita yavula gungima dia kampanye ga élection. Mbeji samano jia mudidi, aphangi’etu akhalelego mu guhuima mu mafundo akhalele mujinga. Itshi yakuatesele aphangi’etu ha gulua nu malamba awa akola? Aphangi’etu ako ayile mukhala gu jinzo jia aphangi anyi akhalele mu mafundo akhalelego ita. Phangi mumoshi wazuelele egi: “Mu tangua diene, ngasuangulugile handaga ngakhalele nu mafuta abonga. Tuakhalele gudikolesa mu nyuma.”

² Tangua “lamba diakola” mbadisendesa, mbatusuanguluga gula tudi nu mafuta ana gutuzumba. (Yat. 7:14) Hene, tudi naye gukolesa ufuta wetu nu aphangi’etu sendese mangino. (Tanga 1 Phetelo 4:7, 8.) Lumene lua Yelemiya luajiya gutulongesa ndaga jiavula. Mafut’enji amukuatesele ha guhuluishiwa mu tangua dia lamba gutuama egi Yelusalema ishiyiwe. * Luholo lutshi tuajiya gulandula gifezegeselo gia Yelemiya?

3. (a) Itshi yakambele gutuma Yelemiya ha gudikhalela hakhenji? (b) Itshi Yelemiya gawambelele sekretere wenji Baluke? Yazolele mbuto itshi?

³ Ivo 40 nga gubalega, Yelemiya wajingile mukatshi dia athu akhalelego mutumagela Yehowa. Yajiya gukhala egi, nu aphangi’enji a mu dimbo dia Anatota akhalelego nji mutumagela Yehowa. (Yel. 11:21; 12:6) Uvi, Yelemiya gayilego gudikhalela hakhenji. Wawambelele sekretere wenji Baluke luholo gakhalele gudivua. Esue nji tudi mujiya luholo gadivuile handaga ndaga  jiene jiasonegewe. (Yel. 8:21; 9:1; 20:14-18; 45:1) Tangua Baluke akhalele musonega ndaga jia Yelemiya, guzumba nu gunemesa guawo muyadi guakolele.—Yel. 20:1, 2; 26:7-11.

4. (a) Mudimo utshi Yehowa atogele Yelemiya ha gutshita? (b) Luholo lutshi mudimo wene wakolesele ufuta wa Yelemiya nu Baluke?

⁴ Mu sungi ya ivo yavula, Yelemiya wawambelele enya Isalele nu gikhesa giagasue ndaga jiakhalele mutshigina gubuila dimbo dia Yelusalema. (Yel. 25:3) Ha gukuatesa enya gu Yelusalema ha gubalumuna mitshima yawo, Yehowa walezele Yelemiya ha gusonega ndaga akhalele guaawambela. (Yel. 36:1-4) Yelemiya nu Baluke atshitshile mudimo hamoshi mbeji jiavula ha gutagenesa ginemo giaahanele Nzambi. Idi naye gukhala egi, akhalele muta maga abonga. Maga ene a akuatesele ha gukolesa gutshigina guawo.

5. Luholo lutshi tudi mujiya egi Baluke wakhalele futa diabonga dia Yelemiya?

⁵ Hamanesele ene gusonega rulo, Yelemiya walezele Baluke ha guyitangela athu. Wamushidile mutshima egi mbawuyitanga muabonga. (Yel. 36:5, 6) Baluke watagenesele ginemo gienji nu ngolo jiagasue ngatshima yakambele gumubatela gufua. Tangiza gale gusuanguluga guakhalele nago Yelemiya tangua Baluke ayile mu tempelo ha gutangela athu rulo. (Yel. 36:8-10) Tuphungu tua enya Yuda tuavuile ndaga jiatshitshile Baluke. Amutamegele ha guaatangela rulo yene mu mbimbi yakola! (Yel. 36:14, 15) Tuphungu tuadivuile ha guwambela Fumu Yehoyakime ndaga jiazuelele Yelemiya. Uvi, akhalele munemesa Baluke. Hene, amuwambelele egi: ‘Aye nu Yelemiya, ndjienu mudisuege. Muwambelago nga muthu fundo mudi.’ (Yel. 36:16-19) Amuhanele lubelo luawaha lume!

6. Itshi yakalegele Yelemiya nu Baluke tangua ataganele nu umbalagaji?

⁶ Fumu Yohoyakime wavuile khabu jiakola tangua gavuile mbimbi jiasonegele Yelemiya.  Wambile rulo yene ha tshiuya. Watumine athu ha gukuata Yelemiya nu Baluke. Uvi Yelemiya gavuilego woma. Wazudile rulo iko, wayihanele Baluke ha gusonega mbimbi jiamuwambelele Yehowa. Hene, Baluke wasonegele “ndaga jiagasue jiakhalele mu mukanda wakondele fumu Yohoyakime ha tshiuya.”—Yel. 36:26-28, 32.

7. Itshi yabuidile Yelemiya nu Baluke tangua akhalele mutshita mudimo hamoshi?

⁷ Athu ana gukolesela hamoshi mu malamba, ana gubua mafuta akola sha. Hene, tuajiya gutangiza egi, tangua Yelemiya nu Baluke atshitshile mudimo hamoshi ha gusonega luko rulo yakondewe gudi Fumu Yohoyakime, abuile mafuta akola lume. Luholo lutshi gifezegeselo gia Yelemiya nu Baluke giajiya gutukuatesa?

8. (a) Itshi yajiya gutukanga njila ha gukuata ufuta nu athu? (b) Uvi mukunda natshi tudi naye gutshita ngolo ha gukuata ufuta nu aphapngi’etu?

⁸ Yajiya gukhala lamba ha guwambela athu ako luholo tudi gudivua, gula muthu muko watutshitshile gale gubola nga ndo watuhanele khabu. (Ish. 18:19, 24) Tuajiya gumona luko egi, tushigo nu tangua nu ngolo jia gukuata ufuta wakola nu athu ako. Gula idi ngenyi, ulebigo muila. Uvi, gila tuatshigina egi aphangi’etu atukuatese mu tangua dia lamba, tudi naye gukhala nawo nu ufuta wakola sendese mangino. Luholo luabonga lua guyitshita ludi, guaawambela ndaga tudi mutangiza nu luholo tudi gudivua.—1 Phet. 1:22.

9. (a) Luholo lutshi Yesu amonesele egi wakhalele mushila mafut’enji mutshima? (b) Mukunda natshi guzuela ndaga udi mutangiza nu luholo udi gudivua, guajiya gugukuatesa ha gukudisa ufuta wakola? Hana gifezegeselo.

⁹ Yesu wakhalele mushila mafut’enji mutshima. Luholo lutshi? Wakhalele guaawambela giamatshidia, gakhalelego guaasuegela nga gima. (Yone 15:15) Tuajiya gulandula khadilo dienji gula tudi muwambela mafut’etu ndaga jiana gutusuanguluisa, jiana gutusagesa, nu jiana gutuhana khabu. Tangua futa diaye adi guguwambela ndaga, mutegelele muabonga. Wajiya gumona egi aye nu muene, muakhala matangi amoshi, nu muana gudivua luholo lumoshi. Tutadilenu gifezegeselo gia phangi Cindy, wakhalele nu ivo 29. Phangi Cindy wakuatele ufuta nu phangi Marie-Louise, muvundji wa muhola wakhalele nu ivo 67. Akhalele mulongesa hamoshi mu gimenegena gia lusugu luagasue lua nguana. Akhalele muta maga a maluholo agasue. Phangi Cindy udi muzuela egi: “Ngana suanguluga guzuelela ndaga jia ndando nu mafuta handaga yana gungukuatesa ha guaajiya nu guaakotelesa muabonga.” Luholo lumoshi nu phangi Cindy, gula udi muwambela mafut’aye ndaga udi mutangiza nu lulolo udi gudivua, nu gula udi guaategelela muabonga tangua adi muzuela, ufuta wenu mbawukola lume.—Ish. 27:9.

10. Ha gutadila Ishima 27:17, gubonga gutshi tuajiya guheta gula tudi mutshita mudimo hamoshi nu aphangi’etu Aklisto?

¹⁰ Luholo lumoshi nu Yelemiya nu Baluke, gula tudi mutshita mudimo hamoshi nu aphangi’etu Aklisto, nu tuamona makalegelo awo abonga, mbayitukuatesa ha gulandula gifezegeselo giawo nu gusuena hehi nawo. (Tanga Ishima 27:17.) Tangua wana longesa nu phangi mumoshi, luholo lutshi wana gudivua gula wavua phangi muene udi mulongesa nu gikhesa giagasue, nga ndo udi muwambela athu ndaga jia Yehowa nu mafelela enji nu gutshigina guagasue? Idi yadiago egi, wana guzumba luko phangi muene muavula sha.

11-12. Hana gifezegeselo gidi mumonesa egi gulongesa hamoshi nu aphangi’etu guajiya gutukuatesa ha gukolesa ufuta wetu.

¹¹ Tutadilenu ifezegeselo mbadi idi mumonesa egi, gulongesa hamoshi nu aphangi’etu Aklisto guana gutukuatesa ha gudizumba muavula lume. Phangi Adeline wa ivo 23, watogele futa dienji Candice ha guya mulongesa mu terituare yanalongesewago muavula. Udi muzuela egi: “Tuatshiginyile egi tudihane luko muavula mu mudimo wa gulongesa nu tuwuzumbe. Muyadi’etu tuakhalele nu funu ya gudikolesa mu nyuma hagula tutshitshile Yehowa muavula.” Gubonga gutshi ahetele? Phangi Adeline udi muzuela egi: “Lusugu luagasue mu ngueze, tuakhalele muzuelela maga abonga tuatele nu athu, nu luholo Yehowa atukuatesele mu mudimo wa gulongesa. Tuasuangulugile nu maga awa abonga tuakhalele muta. Yatukuatesele ha gudijiya luko kiawaha.”

¹² Phangi Laïla nu phangi Marianne, akhalele undumbu. Akatugile gu France, ayile mulongesa gu Bangui (Centrafrique) phoso jitano. Dimbo diene diakhala nu athu avula sha. Phangi Laïla udi muzuela egi: “Tuataganele nu malamba avula. Uvi gima giatukuatesele ha gukolesa ufuta wetu gidi egi, tuakhalele nu guzumba guakola nu tuakhalele muta maga muabonga. Tangua ngamonele khadilo dia Marianne dia gujidila ha fundo dihe-dihe, nu guzumba guenji mukunda nu aphangi, nu  gudihana guenji mu mudimo wa gulongesa, ngamunemesele luko mangololo.” Ishigo mutoga egi udi naye guya mu gifutshi giko ha guheta gubonga gifua muahetele aphangi’etu awa. Tangua diagasue wana longesa nu phangi wa yala nga wa mukhetu wa mu hungu dienu, wana heta luendu lua gumujiya muabonga, nu gukolesa ufuta waye nu muene.

13. Itshi tuana mona tangua tuana kalagala mudimo hamoshi nu mafut’etu?

¹³ Tangua tuana kalagala mudimo hamoshi nu mafut’etu, tuana mona makalegelo awo abonga, nu ndaga jiko jiabola ana tshita. Itshi yajiya gutukuatesa ha gulandula guzumba mafut’etu nga tuamona ndaga jiawo jiko jiabola? Tutadilenu luko gifezegeselo gia Yelemiya. Itshi yakuatesele Yelemiya ha gumona makalegelo abonga a mafut’enji nu guaatotesela gubola guawo?

14. Khadilo ditshi dia Yehowa dialanduile Yelemiya? Luholo lutshi diamukuatesele?

¹⁴ Yelemiya wasonegele mukanda wa Yelemiya. Yajiya gukhala egi muene nji wasonegele mukanda wa 1 nu 2 Mafumu. Mudimo wa gusonega mikanda eyi wamukuatesele ha gumona luholo Yehowa anavuila athu ashigo atagana khenda. Tufezegese gale. Yelemiya wajiyile egi Fumu Ahaba wabalumuine mutshima gu ndaga jiabola atshitshile. Hene, Yehowa gatshiginyilego egi Ahaba amone gufua gua enya fami yenji. (1 Maf. 21:27-29) Luko, Yelemiya wajiyile egi Manase watshitshile ndaga jiavula jiabola gubalega Ahaba. Uvi, Yehowa wamutotesele gubola guenji handaga wabalumuine mutshima. (2 Maf. 21:16, 17; 2 Gudi. 33:10-13) Idi naye gukhala egi, mene eji jiakuatesele Yelemiya ha gulandula khadilo dia Nzambi dia guhuiminyina nu dia khenda. Hene, Yelemiya wamonesele khenda nu guhuiminyina gudi mafut’enji.—Ngi. 103:8, 9.

15. Luholo lutshi Yelemiya alanduile khadilo dia Yehowa dia guhuiminyina tangua Baluke gawunganesele matangi gu mudimo wenji?

¹⁵ Tutalenu luholo Yelemiya gakuatesele futa dienji Baluke tangua gawunganesele matangi gu mudimo wenji. Yelemiya gazuelelego muphushi egi Baluke gashigo musombegesa matangi enji. Uvi, Wakuatesele futa dienji, wamuwambelele mbimbi jia Nzambi jia gisemo ha phelo. (Yel. 45:1-5) Ndaga eyi idi gutulongesa itshi?

16. Ha gutadila Ishima 17:9, itshi tudi naye gukalagala ha gubamba ufuta wetu nu aphangi’etu?

¹⁶ Tushigo naye gukamba egi aphangi’etu akhale athu atagana. Hene, gula tuakuata ufuta nu phangi mumoshi, tudi naye gukalagala ngolo ha gubamba ufuta wetu. Gula futa dietu watukalegela gubola, tuajiya gumuhana lubelo haphelo nu gisemo giagasue mu gudivua nu Mbimbi ya Nzambi. (Ngi. 141:5) Luko, gula wakalagala mulonga watuhana khabu gu mutshima, tudi naye gumutotesela. Uvi gula tuamutotesela, tudi naye gubemba guzuelela mulonga wene. Tushigo naye guwambela athu ako mulonga wene. (Tanga Ishima 17:9.) Luholo masugu awa tudi mujinga adi a lamba, idi nu ndando yavula egi tuhage meso etu phamba mu ndaga jiabonga jidi mutshita aphangi’etu, uvi ndo gu guleba guawo! Gula tuatshita ngenyi, mbatukolesa ufuta wetu nu ene. Idi nu ndando egi tukolese ufuta wene sendese mangino handaga mu tangua dia lamba diakola, mbatukhala nu funu ya mafut’etu.

17. Luholo lutshi Yelemiya amonesele egi wakhalele futa diabonga mu tangua dia lamba?

¹⁷ Yelemiya wamonesele egi wakhalele futa diabonga mu tangua dia lamba. Luholo lutshi? Yelemiya wakuatesele Ebede-Meleke,  wago wakhalele mutshita mudimo mu gisendu gia fumu. Ebede-Meleke wahuluishile Yelemiya, wamuzolele mu wima dia meya diakhalele nu ithotho. Uvi hangima, Ebede-Meleke wavuile woma egi tuphungu tua fumu mbatumutshita gubola. Havuile Yelemiya ndaga yene, gahenelego tedie. Gabembelego egi futa dienji alue nu lamba hakhenji. Yelemiya wakhalele mu bologo, uvi watshitshile yagasue ha gukolesa futa dienji Ebede-Meleke. Wamuwambelele mbimbi jiabonga jiazuelele Yehowa mukunda nu muene.—Yel. 38:7-13; 39:15-18.

18. Ha gutadila Ishima 17:17, itshi tudi naye gukalagala gula futa dietu udi mutagana nu lamba?

¹⁸ Mangino, aphangi’etu adi mutagana nu malamba a luholo nu luholo. Avula adi mutagana nu malamba gifua: gudigita gua mavu, ikudi yakola, ita, nu malamba ako. Gula aphangi’etu abuila malamba, tuajiya guaatamega ha gukhala nawo gumbo dietu. Aphangi ako ajiya guhana falanga ha guaakuatesa. Uvi mukut’etu agasue tuajiya gutoga Yehowa ha gukuatesa aphangi’etu a mala nu a akhetu. Luko, gula tuavua egi phangi’etu mumoshi udi nu lamba, tuajiya gumona egi tushigo mujiya gima gia guzuela nga gia gutshita. Uvi jiya egi, mukut’etu agasue tuajiya gukuatesa aphangi’etu. Luholo lutshi? Tuajiya gubalegesa nenji tangua hamoshi. Tuajiya gumutegelela nu gisemo giagasue tangua didi muene muzuela. Tuajiya gutanga nenji verse imoshi tuana zumba muavula. (Yesh. 50:4) Ndaga yabalega ndando idi: gukhala hehi ha gukuatesa aphangi’etu tangua adi nu funu ya ukuateshi.—Tanga Ishima 17:17.

19. Luholo lutshi ufuta tudi mukuata mangino mbawutukuatesa mu masugu adi muza?

¹⁹ Sendese mangino, tudi naye guzula desizio dia gukolesa nu gubamba ufuta nu aphangi’etu a mala nu a akhetu. Mukunda natshi? Handaga mbalagaji jietu mbajikamba luholo lua gutukhaphumuna, mbajitumbila mambo. Mbajitutuma ha gutuna gushila aphangi’etu mutshima nu ha guaakuatesa. Uvi, mbaashigo mubinga nga hazonda. Mbaabingigo gutukanga njila ha guzumba aphangi’etu. Gushigo nga gima gimoshi mbaatshita ha gushiya ufuta wetu. Yadiago, mbatukhala mafuta uu nu gu gisugishilo gia mavu awa, enji ivo nu ivo!