1-2. Спрема 1. Петрово 4:7, 8, со ка поможинел аменге те икљова ко крајо е неволјенцар?

ЏИКОТЕ аваја са попаше ко крајо таро „последна диве“, шај ка овен амен са попхаре неволје (2. Тим. 3:1). На пример, откеда накхле о изборија ки јекх пхув ки западно Африка, почминѓе бут конфликтија. Повише таро шов масек, амаре пхраља хем пхења нашти сине слободно те пхирен соске о мануша сегде околу ленде марена пе сине. Со поможинѓа ленге те икљовен ко крајо акале пхарипаја? Несаве нашле ко е пхраленгере кхера кола со живинена сине ко побезбедна тхана. Јекх пхрал вакерѓа: „Ки адаја ситуација сиум сине бут бахтало со сиум сине машкар мле амала соске аѓаар шај сине те охрабрина амен јекх јекхеа“.

² Кеда ка почминел и „бари неволја“, бут ка ценина ако иси амен шукар амала кола со мангена амен (Отк. 7:14). Адалеске, бут тано важно панда акана те кера позорало амаро амалипе е пхраленцар. (Читин 1. Петрово 4:7, 8.) Шај бут те сикљова таро Еремија. Лескере паше амала поможинѓе леске те преживинел о периоди англедер те овел уништимо о Ерусалим. * Сар шај те џа пало лескоро пример?

3. а) Со шај сине те чхивел е Еремија те изолиринел пе? б) Башо кола буќа керела сине лафи о Еремија пле писареа е Варухеа, хем саво сине о резултати?

³ Најхари 40 берш, о Еремија живинѓа машкар о мануша кола со на сине верна е Јеховаске. Несаве лендар  сине лескере комшие хем веројатно некој тари лескири фамилија кола со живинена сине ко Анатот, и диз коте со бијандило (Ерем. 11:21; 12:6). Сепак, ов на изолиринѓа пе. О Еремија вакерѓа е верно писареске е Варухеске сар осетинѓа пе, а амен да џанаја башо адава тари Библија (Ерем. 8:21; 9:1; 20:14-18; 45:1). Џикоте о Варух пишинела сине са адава со случинела пе сине е Еремијаја, ола уле панда попаше хем повише ценинена пе сине јекх јекхеа (Ерем. 20:1, 2; 26:7-11).

4. Со родинѓа о Јехова таро Еремија, хем сар акаја задача поможинѓа е Еремијаске хем е Варухеске те овен панда попаше амала?

⁴ О Еремија бут берша храбро предупрединела сине е Израелцон башо адава со ка случинел пе е Ерусалимеа (Ерем. 25:3). Пало адава, те шај те поттикнинел е народо те каинел пе, о Јехова родинѓа таро Еремија те пишинел лескере предупредувања ко јекх свиток (Ерем. 36:1-4). Џикоте о Еремија хем о Варух паше соработинена сине ки акаја задача со сине ленге денди таро Девел, која со веројатно трајнѓа некобор масекија, сигурно керена сине лафи башо буќа кола со керѓе позорали ленгири вера.

5. Сар о Варух сикавѓа кај тано шукар амал е Еремијаске?

⁵ Кеда сине завршимо о свиток, е Еремија мора сине те овел ле доверба ко пло амал о Варух кај ка вакерел е народоске лескере лафија со добинѓа лен таро Девел (Ерем. 36:5, 6). Иако сине опасно, о Варух храбро керѓа акаја задача. Најверојатно о Еремија сине бут бахтало кеда о Варух гело ко дворо е храмескоро хем читинѓа о свиток англо народо (Ерем. 36:8-10). О кнезија тари Јуда шунѓе башо адава со керѓа о Варух хем адалеске викинѓе ле те читинел ленге о свиток (Ерем. 36:14, 15). Ола одлучинѓе те вакерен е цареске, е Јоакимеске, башо адава со вакерѓа о  Еремија. Ама, сикавѓе обѕир спрема о Варух аѓаар со вакерѓе леске: „Џа хем гарав тут, ту хем о Еремија, хем никој ма те џанел кај сиен“ (Ерем. 36:16-19). Адава чаче сине шукар совет!

6. Со керѓе о Еремија хем о Варух кеда сине лен противибе?

⁶ О цари о Јоаким добором бут хољанѓа кеда шунѓа о лафија со вакерѓа лен о Еремија со чак тхарѓа о свиток хем нарединѓа те пханден е Еремија хем е Варухе. Ама о Еремија на дарандило. Леља јавер свиток, денѓа ле е Варухеске хем вакерѓа леске палем те пишинел е Јеховаскоро хабери. О Варух пишинѓа „са адала лафија“ кола со сине ко прво свиток со тхарѓа ле о цари о Јоаким (Ерем. 36:26-28, 32).

7. Со веројатно случинѓа пе џикоте о Еремија хем о Варух соработинена сине заедно?

⁷ Окола со заедно накхена таро пхаре моментија бут пути овена паше амала. Веројатно адава случинѓа пе е Еремијаја хем е Варухеа. Ола ваљани сине те лен јавер свиток хем те пишинен о исто хабери со сине ко свиток со тхарѓа ле о лошно цари о Јоаким. Џикоте заедно соработинена сине, сигурно сине лен прилика панда пошукар те пенџарен пе хем те дикхен о шукар особине со сине секоле јекхе лендар. Со шај те сикљова таро акава извештај?

8. Со шај те чхинавел амен те ова паше амала некасаја, хем соске на ваљани сигате те откажина амен таро адава?

⁸ Шај аменге пхаро те вакера е јаверенге сар осетинаја амен адалеске со некој англедер поврединѓа амен (Изр. 18:19, 24). Или, шај мислинаја аменге кај нане амен ни време ни сила те ова некасаја паше амала. Ама, на ваљани сигате те откажина амен. Ако мангаја о пхраља те овен узи аменде кеда ка авен пхаре времија, мора панда акана те сикљова слободно те кера ленцар лафи башо амаре мисле хем чувствија. Адаја тани јекх бут важно бути те шај те овен амен чачутне амала (1. Пет. 1:22).

9. а) Сар сикавѓа о Исус кај иси ле доверба ко пле амала? б) Сар адава со ка кере лафи башо тле мисле хем чувствија ка поможинел туке те овен тут паше амала? Вакер пример.

⁹ О Исус сикавѓа кај иси ле доверба ко пле амала аѓаар со искрено керела сине ленцар лафи бизо ништо те гаравел (Јован 15:15). Шај те џа пало лескоро пример аѓаар со ка вакера амаре амаленге башо буќа со керена амен бахтале, секириме хем разочариме. Ако шукар шунеа кеда некој керела туја лафи, шај ка хаљове кај иси тумен бут заедничка буќа. Шај иси тумен слично размислибе, ставија, чувствија хем целија. Размислин баши Синди, јекх пхен со иси  ла 29 берш. Ој ули амалин јекхе пионеркаја со викинела пе Мари-Луиз, кола со иси ла 67 берш. Секова четврток сабајле, ола џана заедно ки служба хем слободно керена лафи башо разна буќа. И Синди вакерела: „Уживинава кеда керава лафи е пхраленцар хем е пхењенцар башо хор хем важна буќа. Адава поможинела манге пошукар те пенџарав лен хем повише те хаљовав лен“. Со шај те сикљове тари Синди? Ако искрено хем слободно кереа лафи те амаленцар башо адава со мислинеа хем сар осетинеа тут хем ако спремно шунеа лен, тло амалипе ка овел позорало (Изр. 27:9).

10. Спрема Изреки 27:17, сар поможинела аменге адава со соработинаја амаре пхраленцар хем пхењенцар ки служба?

¹⁰ О Еремија хем о Варух тане шукар пример баши соработка. Кеда амен да соработинаја амаре пхраленцар хем пхењенцар хем кеда дикхаја ленгере шуже особине, сикљоваја лендар хем оваја ленцар панда попаше. (Читин Изреки 27:17.) На пример, сар осетинеа тут џикоте сиан ки служба несаве пхралеа хем дикхеа сар храбро бранинела пли вера или сар искрено хем уверимо керела лафи башо Јехова хем лескере намере? Веројатно ка манге ле панда повише.

11-12. Сар и соработка ки служба шај те керел позорало амаро амалипе е јаверенцар? Вакер пример.

¹¹ Те дикха дуј примерија со сикавена сар и соработка ки служба шај те керел амен те ова попаше. И Аделин, јекх пхен со иси ла 23 берш, викинѓа пле амалинка со викинела пе Кендис те џан те проповединен ко подрачје коте со нане бут проповедимо. Ој вакерела: „Манглем те ова панда поревна ки служба те шај те уживина панда повише ки лате. Е солдујенге ваљанела сине охрабрување те шај понадари да те да амаро најшукар е Јеховаске“. Сар користинѓа ленге адава со соработинена сине заедно? И Аделин вакерела: „Ко крајо таро секова диве, кераја сине лафи башо адава сар накхлем аменге, сар о разговорија е манушенцар охрабринѓе амен хем сар дикхаја сине кај о Јехова водинела амен ки служба. О солдуј уживинаја сине  ко адала разговорија, хем аѓаар запознајнѓем амен са пошукар“.

¹² И Лејла хем и Мариен, дуј пхења тари Франција со нане ко брако, геле те проповединен панџ курке ко Банги, и главно диз ки Централноафриканско Република. И Лејла вакерела: „Понекогаш на сложинаја амен сине, ама адалеске со сине амен шукар комуникација хем искрено мангипе улем панда попаше. Дикхава сине кобор и Мариен прилагодинѓа пе ко неве околностија, кобор мангела е манушен каске со проповединела сине хем кобор сине ревно ки служба. Адава поможинѓа манге панда повише те ценинав ла“. На ваљани те селине тут ки јавер пхув те шај те ове попаше некасаја. Секова пути кеда сиан ки служба несаве пхралеа или пхењаја, иси тут прилика пошукар те пенџаре лен хем те кере позорало тло амалипе ленцар.

13. Со шај те случинел пе кеда паше соработинаја амаре пхраленцар хем пхењенцар?

¹³ Понекогаш кеда соработинаја паше амаре пхраленцар хем пхењенцар, дикхаја ленгере шукар стране, ама хем ленгере слабостија. Со ка поможинел аменге те ачхова ленцар паше иако некогаш шај те грешинен аменге? Те размислина палем башо пример е Еремијаскоро. Со поможинѓа леске те дикхел о шукар ко јавера хем те накхел преку ленгере грешке хем маане?

14. Со сиклило о Еремија башо Јехова, хем сар поможинѓа леске адава?

¹⁴ О Еремија пишинѓа о лил со пхиравела лескоро анав, а веројатно пишинѓа хем о библиска лила 1. хем 2. Царевите. Адаја задача поможинѓа леске те хаљовел кобор бари милост сикавела о Јехова спрема о несовршена мануша. На пример, џанља кај, кеда о цари Ахав каинѓа пе башо лошнипа со керѓа ле, о Јехова сикавѓа леске милост хем џикоте сине ов џивдо на дикхља сар лескири фамилија овела уништими (1. Цар. 21:27-29). Освен адава, о Еремија џанља кај о Манасија керѓа буќа коленцар со вреџинѓа е Јехова бут повише таро Ахав. Сепак, кеда о Манасија каинѓа пе, о Девел простинѓа леске (2. Цар. 21:16, 17; 2. Лет. 33:10-13). Адала извештаија сигурно поможинѓе е Еремијаске те џал пало е Јеховаскоро пример хем те овел стрпливо хем милостиво пле паше амаленцар (Пс. 103:8, 9).

15. Сар сикавѓа стрпливост о Еремија кеда е Варухеске ваљани сине помош?

¹⁵ Те дикха со керѓа о Еремија кеда о Варух дозволинѓа јекх кратко периоди јавера буќа те лен лескоро внимание тари задача со керела ла сине. Наместо сигате те откажинел пе таро пло амал, о Еремија поможинѓа леске аѓаар со вакерѓа леске о директно ама љубезно совет кова со о Јехова денѓа ле башо лескоро шукарипе (Ерем. 45:1-5). Со шај те сикљова таро акава извештај?

16. Спрема Изреки 17:9, со ваљани те кера те шај те аракха амаре амалипа?

¹⁶ Џанѓола пе кај нашти те аџикера совршенство таро амаре пхраља хем пхења. Адалеске, откеда ка ова амала некасаја, мора бут те трудина амен те аракха адава амалипе. Ако амаре амала керена несави грешка, шај ка ваљани те да лен љубезно, ама искрено совет кова со темелинела пе ко е Девлескоро Лафи (Пс. 141:5). Ако поврединена амен, ваљани те простина ленге. А откеда ка простина на ваљани те спомнина ленге и грешка, а ни те кера лафи е јаверенцар башо адава. (Читин Изреки 17:9.) Бут тано важно ко акала пхаре времија те размислина башо шукар особине амаре пхраленгере хем пхењенгере наместо башо ленгере слабостија. Ако кераја адава, ка ова ленцар панда попаше. А асавке паше амала ка ваљанен аменге ки бари неволја.

17. Сар сикавѓа о Еремија кај тано чачутно амал ко пхаро време?

¹⁷ О пророко о Еремија сикавѓа кај тано чачутно амал ко пхаро време. На пример, откеда спасинѓа е Еремија таро сигурно мерибе ки јекх хор дупка пхерди чикаја, о Авде-Мелех дарандило кај о кнезија ка мударен ле башо адава. Кеда шунѓа башо акава, о Еремија на ќутинѓа мислиндор кај лескоро амал коркори ка шај те икљол ленцар ко крајо. Иако сине пханло, о Еремија керѓа са со шај башо Авде-Мелех адалеа со вакерѓа леске о утешно ветување со денѓа ле о Јехова (Ерем. 38:7-13; 39:15-18).

18. Спрема Изреки 17:17, со ваљани те кера кеда несаво пхрал накхела таро пхаро време?

¹⁸ Авдиве амаре пхраља хем пхења накхена таро различна пхарипа. На пример, бут џене цидена муке адалеске со доживинѓе катастрофе или војне. Кеда ка случинел пе асавко нешто, несаве амендар шај ка овен ки можност те приминен асавке пхрален хем пхењен ко пумаре кхера. Јавера шај те поможинен ленге ко материјално поглед. Ама, сарине амен шај те молина е Јехова те поможинел амаре пхраленге хем пхењенге. Ако шунаја кај несаво пхрал тано обесхрабримо, шај нане те џана со те вакера леске или со те кера. Ама, секова јекх амендар шај те керел нешто. На пример, шај те одвојна аменге време те ова адале пхралеа. Шај љубезно те шуна ле, или шај те вакера леске несаво амаро омилено стихо со ка шај те утешинел ле (Иса. 50:4). Најважно таро са тано те ове узо тле пхраља хем пхења кеда ленге најпхаро. (Читин Изреки 17:17.)

19. Сар о зорале амалипа со кераја лен авдиве ка поможинен аменге ки иднина?

¹⁹ Мора те ова одлучна панда акана те ова хем те ачхова паше амала амаре пхраленцар хем пхењенцар. Соске? Адалеске со амаре душмања ка пробинен те одвојнен амен аѓаар со ка вакерен ховајба баши аменде. Ка пробинен те чхинавен амен те верујна амаре пхраленге хем те поддржина лен. Ама нане те успејнен. Ола ка нашти те чхинавен о мангипе со иси машкар аменде. Нашти те уништинен о амалипа кола со керѓем лен. Уствари, асавке амалипа ка трајнен на само џи ко крајо таро акава свето, него ки цело вечност!