1-2. Kweelana alugwalo lwa 1 Petro 4:7, 8, ncinzi ciyootugwasya kuliyumya mubukkale bukatazya?

MBOTUYAABUSWENA afwaafwi “kumazuba aamamanino,” tulakonzya kusikilwa mapenzi manji. (2Tim. 3:1) Mucikozyanyo, nobakamana kusala muleli, mucisi cimwi icili mu Africa nkoili kumbo kwakaba nkondo mpati. Kwamyezi iinda kucisambomwe, bakwesu alimwi abacizyi tiibakali kweenda cakulikwaya akaambo kankondo eeyo. Ino ncinzi cakabagwasya kuzunda buyumuyumu oobo? Bamwi bakatijila mumaanda aabakwesu ibakali kukkala mumasena mwatakalikwe nkondo. Mukwesu umwi wakaamba kuti: “Mubukkale buli boobu, ndakalumba kapati akaambo kakuba abalongwe. Twakali kukulwaizyanya umwi amweenzinyina.”

² Ciindi “mapenzi mapati” aakutalika, tuyoolumba kapati akaambo kakuba abalongwe ibali kabotu alimwi ibatuyanda. (Ciy. 7:14) Aboobo cilayandika kapati kuti tuyumye zilongwe zyesu abamwi lino. (Amubale 1 Petro 4:7, 8.) Tulakonzya kwiiya zinji kuli Jeremiya. Balongwe bakwe bakamugwasya kuliyumya kakusyeede buyo ciindi cisyoonto kuti Jerusalemu anyonyoonwe. * Mbuti mbotukonzya kumwiiya Jeremiya?

3. (a) Ino ncinzi cakali kukonzya kupa kuti Jeremiya alizandule? (b) Ncinzi Jeremiya ncaakamwaambila mulembi wakwe Baruki alimwi ino ncinzi cakacitika akaambo kakucita boobo?

³ Kwamyaka iinda ku 40, Jeremiya wakali kukkala akati kabantu batasyomeki, nkokuti basimukobonyina ambweni abanamukwasyi  bamwi mumunzi wa Anatoti. (Jer. 11:21; 12:6) Nokuba boobo, kunyina naakalizandula pe. Mane buya, wakaamba mbwaakali kulimvwa kumulembi wakwe uusyomeka Baruki alimwi akulindiswe. (Jer. 8:21; 9:1; 20:14-18; 45:1) Baruki a Jeremiya bakaiya kuyandana alimwi akulemekana kapati, eelyo Baruki wakazilemba zyoonse izyakamucitikila Jeremiya.—Jer. 20:1, 2; 26:7-11.

4. Ino ncinzi Jehova ncaakalomba Jeremiya kuti acite alimwi mbuti mulimo ooyu mbowakayumya cilongwe ncaakajisi Jeremiya a Baruki?

⁴ Kwamyaka minji, cabusicamba Jeremiya wakabacenjezya bana Israyeli kujatikizya icakali kuyoocitikila Jerusalemu. (Jer. 25:3) Jehova naakasola alimwi kukulwaizya bantu kuti beempwe, wakaambila Jeremiya kulemba milumbe yakwe yakucenjezya mubbuku lyakuvwunga. (Jer. 36:1-4) Ciindi Jeremiya a Baruki nobakali kubeleka antoomwe mumulimo ooyu ngobakapegwa a Leza uulangilwa kuti wakatola myezi minji, tacidoonekwi buya kuti bakajisi mibandi iyakayumya lusyomo lwabo.

5. Mbuti Baruki mbwaakatondezya kuti wakali mulongwe mubotu kuli Jeremiya?

⁵ Nocakasika ciindi cakuyubununa izyakalembedwe mubbuku lyakuvwunga, Jeremiya wakasyoma mweenzinyina Baruki kutegwa abaambile bantu kujatikizya mulumbe ooyo. (Jer. 36:5, 6) Cabusicamba Baruki wakauzuzikizya mulimo ooyu iwakali kubikka buumi bwakwe muntenda. Sena inga mweezyeezya mbwaakakkomana Jeremiya ciindi Baruki naakaunka mulubuwa lwatempele akucita ncaakaambilwa? (Jer. 36:8-10) Ciindi basilutwe ba Juda nobakamvwa ncaakacita Baruki, bakamwaambila kuti ababalile cakupozya izyakalembedwe mubbuku lyakuvwunga eelyo. (Jer. 36:14, 15) Mpoonya basilutwe aabo bakaambila Mwami Jehoyakimu kujatikizya ncaakaamba Jeremiya. Aboobo bakamufwida luzyalo Baruki akumwaambila kuti: “Koya, mukayube, yebo a Jeremiya, kutabi muntu naba omwe ulaazyibe nkomubede.” (Jer. 36:16-19) Eelo kaka oolu lwakali lulayo ilugwasya!

6. Ino Jeremiya alimwi Baruki bakacita buti ciindi nobakali kukazyigwa?

 ⁶ Mwami Jehoyakimu wakanyema kapati ciindi naakamvwa majwi ngaakalemba Jeremiya. Aboobo wakalyuumpa bbuku lyakuvwunga akulailila kuti Jeremiya a Baruki baangwe. Nokuba boobo, Jeremiya kunyina naakayoowa. Muciindi caboobo, wakabweza bbuku limbi lyakuvwunga akulipa Baruki, mpoonya ciindi naakali kwaamba mulumbe wa Jehova, Baruki wakaalemba “majwi oonse Jeremiya ngaakali kumwaambila amulomo mpande kuti alembe aayo aakali mubbuku eelyo Mwami Jehoyakimu wa Juda ndyaakaumpa mumulilo.”—Jer. 36:26-28, 32.

7. Ino ncinzi cilangilwa kuti ncecakacitika ciindi Jeremiya a Baruki nobakali kubeleka antoomwe?

⁷ Ikuti bantu baliyumya antoomwe musunko limwi, kanji-kanji cilongwe cabo cilayuma kapati. Ciindi nobakali kubeleka antoomwe kulembulula bbuku lyakuvwunga eelyo ndyaakanyonyoona Mwami mubyaabi Jehoyakimu, kweelede kuti Jeremiya a Baruki bakazyibana kabotu-kabotu alimwi cilongwe cabo cakayuma kapati. Ino tugwasyigwa buti kucikozyanyo cabaalumi aaba basyomeka?

8. Ncinzi cikonzya kutulesya kuba abalongwe beni-beni alimwi nkaambo nzi ncotuteelede kutyompwa?

⁸ Cilakonzya kutuyumina kwaambila bamwi mbotulimvwa ambweni akaambo kakuti kuli umwi iwakatulubizyila musyule. (Tus. 18:19, 24) Naa ambweni tulakonzya kuyeeya kuti tatujisi ciindi alimwi anguzu zyakubamba cilongwe abamwi. Nokuba boobo, tatweelede kutyompwa pe. Kuti katuyanda kuti bakwesu bakatugwasye ciindi camapenzi aaboola kumbele, tweelede kwiiya kubasyoma lino kwiinda mukubaambila nzyotuyeeya alimwi ambotulimvwa. Eeci cilayandika kapati kutegwa tube aabalongwe beni-beni.—1Pet. 1:22.

9. (a) Ino Jesu wakatondezya buti kuti wakali kubasyoma balongwe bakwe? (b) Ino kubandika kujatikizya nzyomuyeeya alimwi ambomulimvwa inga kwaciyumya buti cilongwe canu abamwi? Amupe cikozyanyo.

⁹ Jesu wakatondezya kuti wakali kubasyoma balongwe bakwe kwiinda mukubaambila zintu zyoonse. (Joh. 15:15) Tulakonzya kwiiya cikozyanyo cakwe kwiinda mukwaambila bamwi zintu zitukkomanisya, izitupa kulibilika alimwi azitutyompya. Aboobo amuswiililisye ciindi umwi naambaula andinywe. Ikuti mwacita oobo, ambweni muyoobona kuti nzyomuyeeya, mbomulimvwa alimwi amakanze aanu zilikozyenye. Amubone cikozyanyo camucizyi Cindy uujisi myaka iili kuma 20. Wakapanga cilongwe amucizyi mupainiya wazina lya Marie-Louise uujisi myaka iili kuma 60. Bacizyi aaba babeleka limwi mumulimo wakukambauka lyoonse muli bwane mafwumofwumo, alimwi cakwaanguluka balabandika makani ayiindene-indene. Cindy wakati: “Ndilakkomana kubandika twaambo tuyandika kapati abalongwe nkaambo eeci cilandigwasya kubazyiba kabotu  alimwi akubamvwisya.” Ikuti kobaambila balongwe bako nzyoyeeya alimwi ambolimvwa alimwi akubaswiilila ciindi nobaambaula, cilongwe canu ambabo cilayuma. Mbubwenya mbuli mucizyi Cindy, kuti mwabweza ntaamu akwaanguluka kwaambila bamwi nzyomuyeeya alimwi ambomulimvwa, cilongwe canu ambabo ciyooyuma.—Tus. 27:9.

10. Kweelana alugwalo lwa Tusimpi 27:17, ncinzi cikonzya kucitika ciindi notubeleka antoomwe abasyomima?

¹⁰ Mbubwenya mbocakabede kuli Jeremiya a Baruki, kuti twabeleka antoomwe abasyomima akulibonena bube bubotu mbobajisi, tulabaiya, aboobo cilongwe cesu ambabo cilayuma. (Amubale Tusimpi 27:17.) Mucikozyanyo, ino mulimvwa buti ciindi nomuli mumulimo wakukambauka, mpoonya mwamvwa mulongwe wanu kaamba cabusicamba kujatikizya lusyomo lwakwe, naa kaamba kuzwa ansi aamoyo nzyasyoma kujatikizya Jehova alimwi amakanze aakwe? Cakutadooneka, cilongwe canu amuntu ooyo cilayuma kapati.

11-12. Amupe cikozyano icitondezya kubelekela antoomwe mumulimo wamumuunda mbokukonzya kuyumya zilongwe.

¹¹ Amubone zyakuluula zyobilo izitondezya kubelekela antoomwe mumulimo wakukambauka mbokupa kuti bantu bamvwane. Adeline, mucizyi uujisi myaka iili 23, wakalomba mulongwe wakwe Candice kuti kabaunka kuyookambaukila mucilawo mutavwuli kukambaukilwa. Adeline wakati: “Twakali kuyanda kukambauka cabusungu alimwi akuyungizya lukkomano lwesu mumulimo wakukambauka. Toonse twakali kuyandika kukulwaizyigwa kutegwa tuzumanane kupa Jehova zintu ziinda kubota.” Mbuti mbobakagwasyigwa kwiinda mukubeleka antoomwe? Adeline wakaamba kuti: “Kumamanino aabuzuba bumwi abumwi, twakali kubandika mbotwakali kulimvwa, icakali kutukulwaizya kapati mumibandi njotwakali kuba anjiyo abantu alimwi ambotwakali kububona busolozi bwa Jehova mumulimo wesu. Toonse twakaikkomanina mibandi eeyi alimwi twakazyibana kabotu.”

¹² Ba Laïla aba Marianne, bacizyi batakwetwe ibakkala ku France, bakaunka kuyookambauka kwansondo zyosanwe ku Bangui, dolopo lipati  lyamu Central African Republic imujanika bantu banji kapati. Ba Laïla bakaamba kuti: “Twakali kujana buyumu-yumu, pele icakatugwasya nkubandika kabotu alimwi akutondezyanya luyando lwini-lwini, eeci cakapa kuti cilongwe cesu ciyume kapati. Nindakabona ba Marianne mbobakabuzyibila bukkale bwakubusena bupya, mbobakali kubayanda bantu bakubusena ooko alimwi ambobakali basungu mumulimo wakukambauka, luyando lwangu kulimbabo lwakakomena kapati.” Aboobo, eeci tacaambi kuti mweelede kuunka kucisi cimbi buya kutegwa mukalibonene bubotu oobu. Lyoonse mwabeleka amukwesu naa amucizyi mucilawo canu, mulijisi coolwe cakumuzyiba kabotu alimwi akuyumya cilongwe canu anguwe.

13. Ncinzi cikonzya kucitika ciindi notubeleka abalongwe besu?

¹³ Zimwi ziindi notubeleka abalongwe besu, tatuboni buyo bube bubotu mbobajisi, pele alimwi tulabona akulezya kwabo. Ncinzi cikonzya kutugwasya kuzumanana kubayanda balongwe besu nokuba kuti balalezya? Atucilange-lange alimwi cikozyanyo ca Jeremiya. Atubone icakamugwasya kubona bube bubotu mubalongwe bakwe alimwi akutabikkila maano kukulezya kwabo.

14. Ncinzi Jeremiya ncaakaiya kujatikizya Jehova alimwi ino mbuti eeci mbocakamugwasya?

¹⁴ Jeremiya ngowakalemba bbuku iliitwa azina lyakwe, alimwi kweelede kuti ngowakalemba bbuku lyamu Bbaibbele lya 1 Bami alimwi a 2 Bami. Tacidoonekwi buya kuti mulimo ooyu wakamugwasya Jeremiya kubona luse ndwajisi Jehova kubantu batalondokede. Mucikozyanyo, wakalizyi kuti ciindi Mwami Ahabu naakeempwa kumicito yakwe mibyaabi, Jehova wakapa kuti ataboni mukwasyi wakwe woonse kaunyonyoonwa muciindi ncaakali kupona. (1Bam. 21:27-29) Mbubwenya buyo, Jeremiya wakalizyi kuti Manase wakacita zibi zinji kwiinda nzyaakacita Ahabu. Nokuba boobo, Jehova wakamulekelela Manase akaambo kakuti wakeempwa. (2Bam. 21:16, 17; 2Mak. 33:10-13) Kulangilwa kuti zibalo eezyi zyakamugwasya kapati Jeremiya kwiiya kukkazika moyo kwa Leza alimwi aluse ndwatondezya ciindi nayendelezya balongwe bakwe.—Int. 103:8, 9.

15. Mbuti Jeremiya mbwaakaiya kukkazika moyo kwa Jehova ciindi Baruki naakaleka kubikkila maano kumulimo wakwe?

¹⁵ Amubone Jeremiya mbwaakamugwasya Baruki ciindi naakaleka kubikkila maano kumulimo wakwe. Muciindi cakufwambaana kumutantamuka mulongwe wakwe, Jeremiya wakamugwasya kwiinda mukumwaambila mulumbe uutondezya luse lwa Leza, cakutamwiinda mumbali. (Jer. 45:1-5) Ino ncinzi ncotukonzya kwiiya kumakani aaya?

16. Kweelana alugwalo lwa Tusimpi 17:9, ino ncinzi ncotweelede kucita kutegwa zilongwe zyesu zizumanane?

¹⁶ Mubwini, tatukonzyi kulangila kuti bakwesu alimwi abacizyi lyoonse banoocita zintu munzila iilondokede. Aboobo kuti twapanga zilongwe, tweelede kubeleka canguzu kutegwa zilongwe eezyo zizumanane. Ikuti balongwe besu balubizya, ambweni inga twayandika kubapa lulayo luzwa mu Jwi lya Leza cakutabainda mumbali, pele tweelede kucita oobo munzila yaluyando. (Int. 141:5) Kuti batunyemya, tweelede kubalekelela. Aboobo kuti twabalekelela kale, tatweelede kukaamba alimwi kaambo aako nkobakatulubizyila, ambweni kulimbabo naa kuli bamwi. (Amubale Tusimpi 17:9.) Eelo kaka cilayandika kapati kuti muziindi eezyi izikatazya katubikkila buyo maano kubube bubotu mbobajisi bakwesu alimwi abacizyi muciindi cakubikkila maano kukulezya kwabo! Ikuti twacita oobo, tuyumya zilongwe zyesu ambabo. Aboobo cilayandika kapati kuti tucite oobo lino nkaambo ciindi camapenzi mapati, tuyooyandika balongwe.

17. Mbuti Jeremiya mbwaakatondezya kuti wakali mulongwe mwini-mwini muziindi zyamapenzi?

¹⁷ Musinsimi Jeremiya wakatondezya kuti wakali  mulongwe mwini-mwini muziindi zyamapenzi. Mucikozyanyo, ciindi Ebedi-meleki imupati wababelesi bamwami naakafwutula Jeremiya kuzwa mumugoti iwakajisi ntimba, Ebedi-meleki wakayoowa kuti basilutwe balamujaya. Ciindi Jeremiya naakaamvwa makani aaya, tanaakaumuna buyo pe, kalangila kuti mweenzinyina ooyu ulalijanina nzila yakuti aliyumye. Nokuba kuti Jeremiya wakalaangidwe, wakacita ncaakali kukonzya kutegwa amukulwaizye mweenzinyina Ebedi-meleki kwiinda mukumwaambila cisyomezyo ca Jehova icuumbulizya.—Jer. 38:7-13; 39:15-18.

18. Kweelana alugwalo lwa Tusimpi 17:17, ino ncinzi ncotweelede kucita ciindi mulongwe nali mubukkale bukatazya?

¹⁸ Mazuba aano, bakwesu alimwi abacizyi balajana buyumu-yumu bunji. Mucikozyanyo, banji balacitikilwa ntenda zilicitikila buyo, alimwi azyeezyo zicitwa abantu. Ciindi ntenda zili boobu nozyicitika, ambweni tobamwi tulakonzya kubatambula balongwe aaba mumaanda eesu. Ambweni bamwi buya balakonzya kubagwasya kwiinda mukubapa mali. Pele toonse tulakonzya kumulomba Jehova kutegwa abagwasye. Ciindi notwabona mukwesu naa mucizyi uutyompedwe, tulakonzya kucibula cakwaamba naa cakucita. Nokuba boobo, toonse tulakonzya kugwasya. Mucikozyanyo, tulakonzya kujana ciindi cakuba antoomwe abalongwe besu aaba. Atuswiilile calweetelelo ciindi nobabandika. Kunze lyaboobo, inga twabaambila magwalo aayumya-yumya. (Is. 50:4) Iciyandika kapati ncakuti lyoonse katulibambilide kubagwasya.—Amubale Tusimpi 17:17.

19. Ino kupanga zilongwe ziyumu lino kuyootugwasya buti kumbele?

¹⁹ Tweelede kuba amakanze aakupanga alimwi akuyumya zilongwe nzyotujisi abakwesu alimwi abacizyi lino. Nkaambo nzi? Nkaambo kakuti basinkondoma bayoosoleka kutwaandaanya kwiinda mukubelesya makani aakubeja. Bayoosola kupa kuti tuleke kusyomana alimwi akugwasyanya. Pele makanze aabo taakazwidilili pe. Tabakacikonzyi kulunyonganya luyando iluli akati kesu. Kunyina ncobayoocita iciyookonzya kunyonganya zilongwe nzyotwakapanga. Alimwi buya, zilongwe eezyo ziyoozumanana mane kukabe kutamani!