1-2. (a) Ngo ma konyowa me medde ki ciro can nino ki nino? Tit kong. (b) Gin ango ma wabinyamo i pwony man?

“KA ATAMO i kom peko ma akato ki iye, angeyo ni onongo pe abitwero cirone pira kena.” Tika nino mo dong iwaco lok macal ki meno? Pol pa wan dong wawaco. Twero bedo ni iwaco lok meno i nge tamo i kom kit ma ikanyo kwede two mo malit nyo to pa danoni me amara. Ka itamo i kom peko meno, ci iwinyo ni ibedo ki kero me kanyone nino ki nino pien cwiny maleng pa Jehovah omini ‘teko madwong.’​—2 Kor. 4:7-9.

² Wajenge i kom cwiny maleng wek okonywa me cung matek i kom tam maraco me lobo-ni. (1 Jon 5:19) Medo i kom meno, walwenyo bene ki “dul mony mogo maraco me cwiny.” (Ep. 6:12) Pi meno, wabinyamo yo aryo ma cwiny maleng twero konyowa kwede me kanyo pekki magi ducu. I ngeye, wabinyamo gin ma watwero timone me nongo kony ducu ma wamito ki bot cwiny maleng.

3. Yo acel mene ma Jehovah konyowa kwede me ciro atematema?

³ Cwiny maleng pa Jehovah konyowa ki miniwa teko, nyo kero me cobo ticwa kadi bed watye ka kato ki i atematema. Lakwena Paulo owinyo ni onongo etwero medde ki tic pi Jehovah kadi bed ni onongo etye ka kato ki i ariya mapol pien ejenge i kom ‘teko pa Kricito.’ (2 Kor. 12:9) I wotte me aryo macalo lamiconari, Paulo pe otiyo tic me tito kwena keken ento bene obedo ki dog tic ma konye me nongo cente. En obedo i Korint i gang pa Akwila ki Pricikila. Gin onongo gubedo luyub kema. Kit macalo Paulo bene onongo ngeyo tic meno, en otiyo kacel kwedgi nino mogo. (Tic 18: 1-4) Cwiny maleng omiyo ki Paulo teko me cobo tic meno kacel ki ticce me pwony.

4. Ma lubbe ki 2 Jo Korint 12:7b-9, peko ango ma Paulo obedo ka yelle kwede?

⁴ Kwan 2 Jo Korint 12:7b-9. I tyeng magi, Paulo onongo tye ka lok i kom ngo i kare ma en owaco ni etye ka lweny ki ‘okuto ma kirwako i kome’? Ka onongo itye ki okuto ma kirwako i komi, onongo ibibedo ki arem madwong. Pi meno, Paulo onongo tye ka waco ni etye ki atematema mo malit ma etye ka lweny kwede. En olwongo peko man ni “lakwena pa Catan” ma bedo ka ‘keto can i kome.’ Oromo bedo ni pe Catan nyo jogine aye gukelo peko pa Paulo, nyo gurwako okuto man i kome. Ento i kare ma cwiny maraco magi guneno “okuto” meno, nen calo gubedo ki miti madwong me diyo medo ameda wek arem pa Paulo bene omedde. Ngo ma Paulo otimo?

5. Jehovah ogamo lega pa Paulo nining?

⁵ I acakkine, Paulo onongo mito ni Jehovah okwany “okuto” man woko. En oye ni: “Yam alego Rwot [Jehovah] . . . tyen adek ni jami macalo meno oa woko ki i koma.” Ento, kadi bed Paulo olego matek, pe kikwanyo okuto man ki i kome. Tika man tyen lokke ni Jehovah pe ogamo lega pa Paulo? Pe tye kit meno. En gire ogamogi. Jehovah pe okwanyo peko-ni, ento en omiyo ki Paulo teko me kanyone. Jehovah owaco ni: “Tekona bedo tek twatwal ka ma goro tye iye.” (2 Kor. 12:8, 9) Dok ki kony pa Lubanga, Paulo omedde ki bedo ma cwinye yom kun bene wiye opye mot!​—Pil. 4:4-7.

6. (a) Jehovah twero gamo legawa nining? (b) Gen ango ma ginacoya ma kiketogi i paragraf man mini?

⁶ Calo Paulo, tika in bene dong ibako dogi bot Jehovah tyen mapol pi peko mo ma imito ni en okwany woko? Ento kadi bed ilego matek, peko man ogak nyo bene omedde ameda. Tika meno oweko itamo ni Jehovah cwinye pe yom i komi? Ka tye kit meno, ci wi opo i kom lanen pa Paulo. Kit ma Jehovah ogamo kwede legane, En bigamo legani bene! Jehovah pe oromo kwanyo peko-ni woko. Ento en bitic ki cwiny maleng me mini teko ma imito me ciro peko meno. (Jab. 61:3, 4) Kitwero ‘bolowa piny i ngom ligwek,’ ento Jehovah pe biwekowa ata.​—2 Kor. 4:8, 9; Pil. 4:13.

7-8. (a) I yo ma nining ma cwiny maleng tye calo yamo? (b) Petero otito kit ma cwiny maleng tiyo kwede nining?

⁷ I yo mukene ango ma cwiny maleng konyowa kwede? Waromo poro cwiny maleng ki yamo. Kadi bed pii tye ka twagge, yamo twero konyo meli me wot ka ma en mito cito iye. I yo acel-lu, cwiny maleng konyowa me medde ki tic pi Jehovah kadi bed watye ka kato ki i atematema, wang ma wao i lobo manyen.

⁸ Macalo lamak rec, lakwena Petero onongo ngeyo kwango yeya maber. Twero bedo ni meno aye tyen lok mumiyo en otiyo ki labol ma kubbe ki kwango yeya me tito kit ma cwiny maleng tiyo kwede. En ocoyo ni: “Pe tye lok pa lanebi mo ma yam obino pi mit pa dano, ento cwiny maleng aye mumiyo dano guloko lok ma oa ki bot Lubanga.” Nyig lok me leb Grik ma kigonyo ni “aye mumiyo” gonye atir atir ni “tingo nyo tero gin mo.”​—2 Pet. 1:21.

9. Gin ango ma onongo Petero mito ni dano gutam iye i kare ma en ocoyo ni cwiny maleng “aye mumiyo” luco Baibul guloko?

⁹ Lok pa Petero ni “tingo nyo tero gin  mo” weko igoyo cal ngo i wi? Luka, ngat ma ocoyo buk me Tic pa Lukwena, bene otiyo ki nyig lok me leb Grik ma kit man i kare ma en owaco ni, “waweko mel dong woto ka ma yamo oterowa.” (Tic 27:15) Lakwan mo ma okwano Baibul i yo matut owaco ni i kare ma Petero ocoyo ni cwiny maleng “aye mumiyo” luco Baibul guloko, en otiyo ki labol ma weko dano tamo i kom kwango yeya. Obedo calo Petero owaco ni kit ma yamo tero meli wa i wang kwang ma mitte, cwiny maleng bene otiro luco Baibul me cobo ticgi kit ma mitte kwede. Lakwan acel-li owaco ni: “Lunebi gubedo calo meli ma kiyaro bongone malo i wi yat.” Jehovah otimo me ka mege. En ocwalo botgi “yamo” nyo cwiny maleng. Luco Baibul bene gutimo ma ka megi. Gulubo tira pa cwiny meno.

10-11. Yo aryo mene ma myero walubi wek cwiny maleng ocorwa anyim? Mi labol.

¹⁰ Ngene kene ni, i kare-ni Jehovah pe tye ka tic ki cwiny mere maleng me tiro dano wek guco Baibul. Ento, Jehovah pud tye ka tic ki cwiny maleng me miyo teko bot jone. Jehovah pud medde ki timo me ka mege. Watwero nongo kony pa cwiny maleng pa Lubanga nining? Omyero wanen ni watye ka timo tic me ka megwa. Watimo meno nining?

¹¹ Tam kong i kom lapor man. Me nongo yamo ma twero konye, lakwang yeya myero otim jami aryo. Mukwongo, en myero olok wi yeyane tung ka ma yamo tye ka kodo iye. Man ngene kene pien yeyane pe bidire ka lakwang yeya odong cen i wang kwang ka mabor ki yamo ma tye ka kodo. Me aryo, en myero oyar bongo malo i wi yat me yeya. Ngene kene ni kadi bed yamo tye ka kodo, yeyane bidire anyim keken ka yamo ocako kuto bongo ma tye malo i wi yeya-ni. I yo acel-lu, wamedde ki tic pi Jehovah keken ka watye ki kony pa cwiny maleng. Me nongo kony pa cwiny meno,  myero watim jami aryo. Mukwongo, myero wabed ka ma cwiny maleng pa Lubanga tye iye kun wanywako i jami ma weko wanongo cwiny man. Me aryo, mitte ni “wayar bongo malo i wi yat me yeya” kun watimo jami magi ki mit kom. (Jab. 119:32) Ka walubo yo aryo magi, ci cwiny maleng bicorowa anyim ki i twagge pa pii ma en aye aunauna kacel ki pekki kun konyowa me ciro can wang ma wao i lobo manyen.

12. Ngo ma wabinyamo kombeddi?

¹² Dong watyeko nyamo yo aryo kit ma cwiny maleng konyowa kwede. Cwiny maleng miniwa teko dok konyowa me bedo lugen ka watye i atematema. Cwiny maleng bene corowa anyim dok konyowa me medde ki wot i yo ma terowa i kwo. Kombeddi dong wabinyamo jami angwen ma myero watim wek wanong kony ducu ma wamito ki bot cwiny maleng.

13. Ma lubbe ki 2 Temceo 3:16, 17, ngo ma ginacoya twero timo piwa, ento ngo ma myero wan kong watim?

¹³ Mukwongo, kwan Lok pa Lubanga i yo matut. (Kwan 2 Temceo 3:16, 17.) Nyig lok me leb Grik ma kigonyo ni “gicoyo pi teko pa cwiny pa Lubanga” twero gonye atir atir ni “yweyo pa Lubanga.” Lubanga otiyo ki cwiny mere maleng me “yweyo” tamme i wi jo mucoyo Baibul. Ka wakwanyo kare me kwano Baibul ki lwodo gin ma wakwano, tam pa Lubanga donyo i tamwa ki cwinywa. Tam meno ma kicoyo-ni tugo cwinywa me timo alokaloka i kwowa wek wayom cwiny Jehovah. (Ibru 4:12) Ento me nongo kony ducu ma wamito ki bot cwiny maleng, myero wakwany cawa me kwano Baibul nino ducu kun watamo matut i kom gin ma wakwano. Ka watimo meno ci lok pa Lubanga bigudo jami ducu ma wawaco dok watimo.

14. (a) Pingo watwero wacone ni “yamo tye ka kodo” i cokkewa? (b) Watwero bino i cokke ma “wayaro bongo malo i wi yat me yeyawa” nining?

¹⁴ Me aryo, wor Lubanga kacel ki luye luwoti. (Jab. 22:22) I cokkewa, watwero waco ni nongo “yamo tye ka kodo.” Cwiny maleng pa Lubanga bedo tye i cokke. (Yabo 2:29) Pingo wawaco kit meno? Pien ka wacokke kacel me woro Lubanga ki Lukricitayo luwotwa, walego pi cwiny maleng, wawero wer me Ker ma jenge i kom Lok pa Lubanga, dok wawinyo pwony ma jenge i kom Baibul ma omege ma cwiny maleng aye ocimogi gimiyo. Dok cwiny maleng acel meno aye bene konyo lumege me yubo ki miyo pwonygi. Ento me nongo kony ducu ma wamito ki bot cwiny maleng, myero wabin ma wayubbe me miyo lagam i cokke. Ka watimo meno, wanongo cwiny maleng kit macalo yeya ma kiyaro bongone malo i wi yat nongo kwede yamo.

15. Cwiny maleng konyowa nining i tic me tito kwena?

¹⁵ Me adek, nywak i tic me tito kwena. Ka watiyo ki Baibul i tic me pwony ki tito kwena, waweko cwiny maleng konyowa i ticwa. (Rom. 15:18, 19) Ento me nongo kony pa cwiny pa Lubanga, myero inywak i tic me pwony kare ki kare dok iti ki Baibul ka twere. Yo acel ma watwero weko ticwa me pwony nyako nyige aye ki tic ki kit me cako lok ma tye i Kwowa ki Ticwa Macalo Lukricitayo.

16. Yo mayot loyo me nongo cwiny maleng obedo ngo?

¹⁶ Me angwen, leg bot Jehovah. (Mat. 7:7-11; Luka 11:13) Yo mayot loyo me nongo cwiny maleng aye ki penyo Jehovah pire i lega. Pe tye gin mo ma twero gengo legawa me o bot Jehovah nyo gengo mic me  cwiny maleng ki o botwa​—kadi wa cel me ot buc nyo Catan. (Yak. 1:17) Myero waleg nining wek wanong kony ducu ma wamito ki bot cwiny maleng? Me gamo lapeny meno, kong wanyamu lok i kom lega i yo matut kun waneno lapor mo ma nonge i Jiri pa Luka keken. *

17. Pwony ango ma wanongo madok i kom lega ki i lapor pa Yecu ma kicoyo i Luka 11:5-9, 13?

¹⁷ Kwan Luka 11:5-9, 13. Lapor pa Yecu-ni nyuto kit ma myero waleg kwede pi cwiny maleng. I lapor man, laco-ni onongo gin ma en mito ki bot lareme “pi dide.” En pe obedo ki lewic me penyo lareme wek okonye kadi bed onongo dong tye i cwiny dyewor. (Nen mwb18 Julai.) Yecu otiyo ki lapor man nining me pwonyowa lok i kom lega? En owaco ni: “Wulegi, ci gibimiyo botwu; wuyeny, ci wubinongo, wudwong doggola, gibiyabo botwu.” Dong, pwony ango ma wanongo? Me nongo kony pa cwiny maleng, myero wadi cwinywa i lega pire.

18. Ma lubbe ki lapor pa Yecu, pingo watwero bedo ki gen ni Jehovah biminiwa cwiny mere maleng?

¹⁸ Lapor pa Yecu-ni bene konyowa me neno pingo Jehovah biminiwa cwiny maleng. Laco ma i lapor-ri onongo mito gwoko welone maber. En owinyo ni myero emi cam mo bot welone ma obino i cwiny dyewor-ri ento onongo pe ki cam mo i ot. Yecu owaco ni jiranine omine mugati pien en pe obedo ki lewic me dide. Ngo ma onongo Yecu tye ka pwonyone? Ka dano ma tye ki roc twero ye konyo lawote pien obedo ka dide, ci dong Wonwa me polo ma lakica-ni bitimo makato bot jo ma gidiyo cwinygi ka lege pi cwiny maleng! Pi meno, watwero lega ki gen ni Jehovah bigamo legawa pi cwiny maleng.​—Jab. 10:17; 66:19.

19. Pingo watwero bedo ki gen ni wabiloyo lweny man?

¹⁹ Watwero bedo ki gen ni kadi bed Catan tute matek me loyowa, ento pud wabiloyo lweny man. Pingo? Pien cwiny maleng konyowa i yo aryo. Mukwongo, miniwa teko me ciro pekki ma watye kwede. Me aryo, tye calo yamo ma konyowa me wot anyim i ticwa pi Jehovah wang ma wao i lobo manyen. Dong wamoku tamwa me nongo kony ducu ma wamito ki bot cwiny maleng!