1-2. (a) Ang’o ma copo konyowa niciro peko ma wanwang’ara ko kubang’ ceng’? Kekor. (b) Wabiponjo lembang’o i thiwiwec maeni?

SAA moko nyo kinde m’ipoi i kum peko moko m’igam iciro, iwacu yor i ii kumae: “Ka nwang’u ku tego para gira, nwang’u acopo ciro lembuca ngo.” Umego ku nyimego mwa ma dupa gitie ku paru ma kumeno. Nyo idaru paru kumeno kinde m’ibepoi i kum kite m’igam iciro ko remokum moko, kunoke kite m’igam inyutho ko cirocir kinde ma wedi peri moko m’imaru utho. Saa m’ibeparu pi pekone, inwang’u nia icire ndhu pilembe tipo maleng’ pa Yehova umio iri ‘tego m’usagu ceke.’​—2 Kor. 4:7-9.

² Watie ku yeny mi tipo maleng’ pi nikonyowa kara wacerara i kum atelatela mi ng’om ma rac maeni. (1 Yoh. 5:19) M’umedo maeno, watie bende ku yeny mi tipo maleng’ pi ninyego i kum “udul tipo mi dubo.” (Ef. 6:12) I thiwiwec maeni, wabineno ayi ario ma tipo maleng’ konyo kowa ninyego ku peko maeno. I ng’eye, wabineno gin ma waromo timo kara tipo maleng’ ukonywa lee.

3. Kenyuth yo acel ma Yehova betio ko pi nikonyowa kara wacir peko.

³ Tipo maleng’ pa Yehova mio iwa tego kara watim tic ma tung’ tung’ ma Yehova umio iwa kadok wabenwang’ara kud amulaic de. Jakwenda Paulo unwang’u nia “tego pa Kristu” m’ejengere i wie re m’ukonye nimedere asu nitimo ni Yehova kadok kud i kind peko. (2 Kor. 12:9) Tipo maleng’ ukonyo Paulo nenedi? Kinde m’ebino i woth pare mir ario mi misioner,  ebed erweyo lembanyong’a kende kende ngo, ento etimo bende tic pi nipong’o yeny pare mi kum. Ebed ebedo i adhura mi Korinto yo p’Akula giku Priskila ma gibed giyiko hema. Calu Paulo de ung’eyo tic maeno, gicaku timo kugi wang’ acel acel. (Tic. 18:1-4) Tipo maleng’ umio tego ni Paulo uketho etuc nirweyo lembanyong’a man nitimo tic mange de pi nipong’o yeny pare mi kum.

4. Nimakere ku 2 Jukorinto 12:7b-9, jakwenda Paulo unwang’ere ku peko ma kani?

⁴ Som 2 Jukorinto 12:7b-9. “Ukudho ma i ring’kum” ma Paulo uweco i wie i giragora maeni utie ang’o? Kan ukudho ucobi, eremi mi tuko ngo. Pieno, Paulo umito yero nia ekadhu kud i peko moko m’ubino remo kume ve ukudho. Ewacu nia pekone ubedo ve “jakwenda pa Jok” m’ubino ‘pade.’ Copere nia Sitani ku pajogi pare gimio ngo gin peko m’ubino calu ukudho i kum Paulo. Ento kinde ma tipo ma reco maeno gineno nia Paulo utie kud “ukudho” i kume, gitimo kero nimedo lak litho pare. Edong’ ebedo ve gibino diyo wi ukudho m’ucobe kara emond lee i kume. Paulo utimo ang’o i saa maeno?

5. Yehova udwoko wang’ rwo pa Paulo nenedi?

⁵ Ku kwong’a, Paulo umito nia Yehova ukab “ukudho” maeno kud i kume. Ewacu kumae: ‘Akwayu Rwoth [Yehova] wang’ adek, kara eai i kuma.’ Re kadok Paulo urwo wang’ dupa de, ukudhone udong’ asu i kume. Nyo eno ubenyutho nia Yehova udwoko ngo wang’ rwo pa Paulo? Kumeno ngo. Yehova dwoko wang’ rwo pare. Ekabu ngo peko pa Paulo, ento emio ire kero kara ecir pekone. Eyero ni Paulo kumae: “Tegona doko ndhu cu i ng’ic.” (2 Kor. 12:8, 9) Ku kony pa Mungu, Paulo umedere asu nibedo ku kwiocwiny man anyong’a i adundene!​—Flp. 4:4-7.

6. (a) Yehova copo dwoko wang’ rwo mwa nenedi? (b) I udukuwec maeni, giragora ma kani m’utielo cwinyi lee?

⁶ Calu jakwenda Paulo, nyo in de ikwayu Yehova ukab peko moko m’ibenweng’iri ko? Saa moko nyo irwo pi pekone ku cwinyi ceke wang’ dupa, ento kakare nithum ebemedere ameda. Nyo eno uketho ibeparu nia Yehova udaru kuni? Kan itie ku paru ma kumeno, poi i kum lapor pa Paulo. Calu ma Yehova udwoko wang’ rwo pare, m’umbe jiji ebidwoko wang’ rwo peri bende! Copere nia Yehova bikabu ngo peko peri. Ento ebitio ku tipo maleng’ pare pi nimio iri kero kara imediri niciro pekone. (Zab. 61:3, 4) Saa moko peko copo ‘redhowa piny’, re Yehova bikunowa ki ngo.​—2 Kor. 4:8, 9; Flp. 4:13.

7-8. (a) Pirang’o jucopo poro tipo maleng’ ku yamu? (b) Jakwenda Petro ukoro nia tipo maleng’ betio nenedi?

⁷ Tipo maleng’ konyowa i yo mange ma kani? Wacopo poro tipo maleng’ ku yamu. Yamu m’ubekoto i ayi ma ber romo cwalu yei nitundo kaka m’ebecidho i ie kadok mujanga utie lee. Rom rom kumeno, tipo maleng’ romo konyowa kara wamedara nitimo ni Yehova nitundo i ng’om ma nyen kadok wabekadhu kud i peko ma lee.

⁸ Jakwenda Petro ubino jadwarnam, pieno egam eng’eyo pi wotho ma wi pii. Eno re ma copo bedo thelembe m’uketho kinde m’ebino weco iwi tic ma tipo maleng’ timo, etio ku wec ma jubed jutio ko pi wotho ma wi pii. Egoro kumae: “Kum lembila moko mbe ma fodubino ku yeny ma dhanu yenyo: ento dhanu yero lembe m’uai ba Mungu, ma tipo maleng’ ucung’o kogi en.” Wec mi dhu Jugiriki ma juloko nia “ucung’o” thelembene tie “ucwalu.”​—2 Pet. 1:21.

9. Petro umito dhanu upar pi lembang’o kinde m’ekiewo nia tipo maleng’ “ucung’o” ju m’ukiewo Biblia?

 ⁹ Wec ma nia “ucung’o” kunoke “ucwalu” ma jakwenda Petro utio ko romo ketho ng’atini paru pi lembang’o? Luka m’ukiewo buku mi Tic mi Jukwenda bende utio ku kit wec mi Jugiriki ma rom eno pi nikoro pi yei ma yamu ubino ‘leko.’ (Tic. 27:15) Jararieko moko m’uponjo lembe iwi Biblia uwacu nia kinde ma Petro ukiewo nia tipo maleng’ “ucung’o” dhanu ma gikiewo Biblia, etio ku wec ma romo ketho dhanu gipar pi woth ma wi pii. Petro umito wacu nia calu ma yamu cwalu yei kara ecidhi nitundo kaka m’ebinyiko i ie, tipo maleng’ bende ucwalu dhanu ma gikiewo Biblia kara gitim tic ma Mungu umio igi. Jararieko ma rom eno umedo kumae: “I ayi mi lapor, ebino ve jubila gibed gitwio bongu iwi yei.” Yehova ubed utimo thenge pare, niwacu ebed eoro tipo maleng’ pare. Jugor Biblia ke gibino ayika nilubo telowic pa tipo maleng’ calu ma Mungu ukwayu i bang’gi.

10-11. Wacikara nitimo lembe ario ma kani kara tipo maleng’ utel wiwa? Kemii lapor.

¹⁰ I andha, tin Yehova ubetio ngo ku tipo pare maleng’ pi nicwalu dhanu kara gikiew Biblia. Ento ebemedere asu nitio ku tipo pare maleng’ pi nitelo wi jurutic pare. Eno benyutho nia Yehova ubemedere nitimo thenge pare. Dong’ wan wacikara nitimo ang’o kara tipo maleng’ utel wiwa? Ubekwayu wan de wamedara nitimo thenge mwa. Nenedi?

¹¹ Kenyam i lapor m’ulubo e. Ka cofer mi yei ubemito nia yamu ucwal yei pare, ukwayu etim lembe ario. Mi kwong’o, ukwayu ecik wi yei pare kaka ma yamu ubedok i ie. Yei pare copo coro ngo nyanok de kan ebedo i dhu wat bor ku kaka ma yamu ubekoto i ie. Mir ario, ukwayu ecik bongu ma wi yei man eyab ie ma lac mandha. I andha, kadok nwang’u yamu  ubekoto de, yei pare bicidho kende kende ka yamu uciko i bongu m’etwio iwi yeine. Rom rom kumeno, wabimedara nitimo ni Yehova kende kende ka tipo maleng’ ubekonyowa. Re kara tipo maleng’ ukonywa, wacikara nitimo lembe ario. Mi kwong’o, wacikara nidikara i lembe ma tipo maleng’ ubetelo wi jurutic pa Mungu nitimo. Mir ario, wacikara nimiyara zoo i lembe mi tipo. (Zab. 119:32) Tek watimo lembe ario maeno, tipo maleng’ bicwaluwa kara wakadh kud i amulaic man peko ma ve mujanga pi nimondo i ng’om ma nyen pa Mungu.

12. Wabineno lembang’o kawoni?

¹² Waai waneno ayi ario ma tipo maleng’ konyo kowa. Tipo maleng’ mio iwa tego man ekonyowa kara wagwok bedoleng’ mwa kinde ma wabenwang’ara ku peko. Bende, tipo maleng’ telo wiwa man ekonyowa nitimo tic ma Yehova ubekwayu watim, ma biketho wabinwang’u kwo ma rondo ku rondo. Ento kawoni, wakenen lembe ang’wen m’ukwayu watim kara tipo maleng’ ukonywa lee.

13. Nimakere ku 2 Timoteo 3:16, 17, Biblia romo konyowa nenedi, ento wacikara nitimo ang’o?

¹³ Mi kwong’o, ponj Lembe pa Mungu. (Som 2 Timoteo 3:16, 17.) Mungu utio ku tipo pare maleng’ pi niroyo paru pare iwi dhanu m’ukiewo Biblia. Kinde ma wabesomo Biblia man wabenyamu ie, paru ma nwang’ere i Biblia mondo i rieko mwa man i adundewa. Parune cwaluwa nitimo alokaloka i kwo mwa kara watuc ninyayu mutoro i Mungu. (Ebr. 4:12) Ento kara tipo maleng’ ukonywa lee, wacikara nikoyo saa mi ponjo Biblia wang’ ma pol man ninyamu i lembe ma wabeponjo cuu mandha. Kumeno re ma tipo maleng’ bitelo wiwa i lembe ceke ma wabetimo man ma wabeyero.

14. (a) Pirang’o wacopo yero nia tipo maleng’ betelo wi coko mwa? (b) Ukwayu watim ang’o kara tipo maleng’ ukonywa lee saa ma wani coko?

¹⁴ Mir ario, tim thier ni Mungu karacelo ku Jukristu wedwu. (Zab. 22:22) Tipo maleng’ pa Yehova betelo wi coko ma watimo. (Nyu. 2:29) Pirang’o wayero kumeno? Pilembe kinde ma wacokara kud umego ku nyimego mwa, wakwayu Yehova umii iwa tipo pare maleng’, wawero wer mi Ker m’ucungo iwi Lembe pa Mungu, man wawinjo ponji m’uai i Biblia, m’umego ma tipo maleng’ ung’io re ma gimio. Tipo maleng’ maeno konyo nyimego bende niyiko theng ponji migi man nitime i wang’ dhanu. Ento kara tipo maleng’ ukonywa lee, ukwayu i wang’ cidho i coko, wabed wayikara pi nidwoko wang’ penji. Ka wayikara kumeno, saa ma wani coko, tipo maleng’ bikonyowa tap calu ma yamu cwalu ko yei ma bongu ma jutwio i wie tie ayaba.

15. Tipo maleng’ konyowa nenedi i tic mwa mi rweyo lembanyong’a, man ukwayu watim ang’o kara ekonywa lee?

¹⁵ Mir adek, dikiri i tic mi rweyo lembanyong’a. Ka wabetio ku Biblia i tic mi rweyo lembanyong’a man mi ponjo dhanu, nwang’u wabeweko tipo maleng’ utel wiwa i tic maeno. (Rum. 15:18, 19) Ento kara tipo maleng’ pa Mungu ukonywa lee, ukwayu wabed warwei wang’ ma pol man watii ku Biblia saa moko ci kan ecopere. Ayi acel m’icopo caku ko wec yot yot ku dhanu i lembanyong’a utie nitio ku kite ma waromo weco ko ku dhanu ma bewok i Buku mi coko mi Kwo man tic mwa mi Jukristu.

16. Ukwayu watim ang’o kara wanwang’ tipo maleng’ wang’ acel?

¹⁶ Mir ang’wen, rwo i bang’ Yehova. (Mat. 7:7-11; Lk. 11:13) Ayi ma waromo nwang’u ko tipo maleng’ wang’ acel utie nikwaye i bang’ Yehova nikadhu kud i rwo. Gin moko acel de mbe ma copo cero rwo mwa ku tundo i bang’ Yehova, kadi ma romo cero tipo pa Mungu ku  tundo i bang’wa, nikebed otkol, kunoke Sitani. (Yak. 1:17) Dong’ wacikara nirwo nenedi kara tipo maleng’ ukonywa lee? Pi nidwoko wang’ penji maeno, wakenen ponji moko ma waromo nwang’u iwi rwo niai kud i lapor moko ma nwang’ere i Injili pa Luka kende. *

17. Lapor pa Yesu ma nwang’ere i Luka 11:5-9, 13, ubemio iwa ponji ma kani iwi rwo?

¹⁷ Som Luka 11:5-9, 13. Lapor ma Yesu umio i giragora maeni unyutho kite ma wacikara nikwayu ko tipo maleng’. Jalwo ma juweco pire i lapor maeni unwang’u gin ma cande bino nege pilembe “ekwayu asu [asu].” Lworo unege ngo nikwayu jarimbe ukonye kadok nwang’u ebino diewor ma ling’ de. Yesu uwodho ponji ma kani iwi rwo niai kud i lapor maeni? Eyero kumae: ‘Wumeduru nikwayu, e ebimire iwu; wumeduru niyenyo, e wubinwang’u; wumeduru nidwong’o, e ebiyabre iwu.’ Eno ubemio iwa ponji ma kani? Kara tipo maleng’ ukonywa, wacikara nikwaye areri i bang’ Mungu.

18. Nimakere ku lapor pa Yesu, pirang’o kwayu cwinywa bed tek nia Yehova bimio iwa tipo maleng’?

¹⁸ Lapor pa Yesu ubekonyowa ning’eyo bende thelembe m’uketho Yehova mio iwa tipo maleng’. Jalwo ma juweco pire i lapor maeno ubino maru nia ejol welo pare cuu. Eneno nia kwayu emii cam ni welo maeno m’utuc i bang’e ku diewor, re camne bino mbe. Yesu uyero nia jadhugola pa jalwone umio ire cam pilembe emedere asu nikwaye. Yesu umito wodho ponji ma kani? Ka dhanu ma leng’ ungo de tie ayika nikonyo jadhugola pare m’umedere asu nikwaye, m’umbe jiji, wang’ei nia Wegwa mi polo ma Jamer bikonyo dhanu ceke m’ubemediri nikwayu tipo maleng’ i bang’e! Pieno, wabed ma cwinywa tek nia ka wabekwayu tipo maleng’ areri i bang’ Yehova, ebimie iwa.​—Zab. 10:17; 66:19.

19. Pirang’o wang’eyo nia wabimedara niciro?

¹⁹ M’umbe jiji, wang’ei nia kadok Sitani utim ang’o de, wabimedara asu niciro. Pirang’o? Pilembe tipo maleng’ konyowa i ayi ario. Mi kwong’o, emio iwa tego kara wacir peko ceke ma wanwang’ara ko. Mir ario, etie tego ma konyowa kara wamedara nitimo ni Yehova nitundo ma wabimondo i ng’om ma nyen. Dong’ wan ceke wawek tipo maleng’ ukonywa lee!