1-2. (a) Kii i nhôla bés i hônba mandutu hiki kel? Toñol. (b) Kii di ga tehe munu yigil ini?

“NGÉDA me nhoñol mandutu me bi yémbél, me yé nkwoog nkaa le me bi yémbél bé mo ni ngui yem.” Baa yak we u ma pot hala? Ñ, inyu ngandak ikété yés. Bebek u bi pot hala i mbus u bi mbôôp béba kon, tole i mbus nyemb mut woñ lihaa. Ngéda u mbéñge mbus len, u nôgda le u bi la tégbaha i ngéda i yosôna ndik ni mahôla ma mbuu mpubi u Yéhôva, u u bé ti we “lipémba li li nloo li mut binam.”​—2 Korintô 4:7-9, NWT.

² Di gwé ki ngôñ ni mbuu mpubi inyu boñ le i béba nkoñ ‘isi ini i yoña bañ bés. (1 Yôhanes 5:19) U héya hala, di nlama ki jôs “mimbuu mimbe.” (Éfésô 6:12) Nano di béñge manjel ima i het mbuu mpubi u nla hôla bés. I mbus, di ga tehe kii di nla boñ inyu kôs mbuu mpubi i nya i yôni.

3. Njel yada Yéhôva a ngwélél inyu hôla bés i hônba i yé le kii?

³ Mbuu mpubi u Yéhôva u nhôla bés ngéda u nti bés ngui i gwel minson nwés to ikété mandutu. Ñôma Paul a bi nôgda le a bé pam i kena nson Djob ni bisu to ikété mandutu inyule a bé bôdôl “lipémba li Kristô” ñem. (2 Korintô 12:9) Mu maké mé ma nyônôs ima i nson wé likalô u tôbôtôbô, Paul a bé tégbaha ndik bé ngéda yé yosôna i añal ñañ nlam, ndi a bé lama yak sal inyu bana yom i je. A bi yén i tison i Korintô yak Akuila bo Priskila, ba ba bé bakôñôô mandap ma mabadô. Kiki Paul a bé sal nlélém bôlô, a bé sal ni bo inyu pes ngéda.  (Minson mi baôma 18:1-4) Mbuu mpubi u bi ti Paul ngui i yéñ koga i kel ni i añal ñañ nlam.

4. Inoñnaga ni kaat 2 Korintô 12:7b-9, imbe ndutu Paul a bééna?

⁴ Añ 2 Korintô 12:7b-9. Ngéda Paul a nkal mu minlôñ mi le a bééna “loo ikété minsôn,” a bé sômbôl kal le kii? Ibale loo i yé we nyuu, u ga nok njôghe bilim. Paul a bé sômbôl kal le a bé boma ngim ndutu i i bé tééñga nye ngandak. A bi sébél yo le “añgel i Satan” i i bé ‘ôm nye bikut.’ Bebek Satan bé nyen a bi ti nye ndutu i, to mimbuu mimbe. Ndi ngéda mimbuu mimbe mi bi yimbe i “loo” i, i bé ndik wee mi bé kônde hihe yo inyu nôgha Paul njôghe. Paul a boñ lelaa?

5. Lelaa Yéhôva a timbhe Paul?

⁵ Pog, Paul a bé sômbôl le i “loo” i i hebi nye i nyuu. Jon a kal le: “Me bi soohe Nwet [Yéhôva] ngélé aa . . . le ndi i nyodi me nyuu.” Ndi to hala kii Paul a bi soohe ngandak, i loo i i bi hebi bé nye i nyuu. Baa hala wee Yéhôva a bi timbhe bé masoohe ma Paul? Balôñe! A bi timbhe nye. I yé mbale le Yéhôva a bi mélés bé ndutu yé, ndi a bi ti Paul ngui i hônba yo. Yéhôva a kal nye le: “Lipémba jem li nyônôl ikété bomb.” (2 Korintô 12:8, 9, NWT.) Lôñni mahôla ma Djob, Paul a bi tééda ñem nwee ni maséé mé!​—Filipi 4:4-7.

6. (a) Lelaa Yéhôva a yé le a timbhe masoohe més? (b) Lelaa minlôñ mi Bibel ba nsima munu mi nlédés we?

⁶ Kiki Paul, baa yak we u ma yemhe Yéhôva le a mélés ngim ndutu i ntééñga we? Ibale u ma soohe inyu jam li ngandak ngélé, ndi mahéñha ma ba bé, baa u yé u kahal hoñol le Yéhôva a nkôm we mbus? Ibale hala, hoñol Paul. Kiki Yéhôva a bi timbhe masoohe mé, hala nyen A’ timbhe yak moñ! Bebek a ga mélés bé ndutu yoñ. Ndi ni njel mbuu wé mpubi, a ga ti we ngui i nsômbla inyu hônba yo. (Tjémbi 61:4, 5) I nla ba wee ba ‘mbeh we isi,’ ndi Yéhôva a ga tjôô bé we.​—2 Korintô 4:8, 9; Filipi 4:13.

7-8. (a) Inyuki di nla kal le mbuu mpubi u yé kiki mbebi? (b) Kii Pétrô a bi kal inyu minson mi mbuu mpubi?

⁷ Ni imbe njel ipe mbuu mpubi u nhôla bés? Kiki loñge mbebi i nhôla sitima i ke ni bisu tolakii mangudga ma mpôgôs yo, hala nyen mbuu mpubi u nhôla bés i ke ni bisu i gwélél Yéhôva tolakii mandutu ma mpôgôs bés, letee di jôp i mbok yondo.

⁸ Kiki a bé nlop tjobi, ñôma Pétrô a bé yi luk kuñga. Jon di nok inyuki ngéda a mpôdôl minson mi mbuu mpubi, a ngwélél bibuk bi bi gwé maada ni nluga u kuñga. A tila le: “Inyule mbañ i bi lôl bé kel to yada ni sômbôl i mut binam, ndi bôt ba bi pot mam ma nlôl yak Nyambe mu kiki mbuu mpubi u bé éga bo.” I buk i Grikia ini le “éga” i nkobla le “begee; paa.”​—2 Pétrô 1:21, NWT; ftn.

9. Kii Pétrô a bé sômbôl nôgha bôt ngéda a gwélél i buk ini le “begee”?

⁹ Imbe titii Pétrô a bi gwélél inyu toñol ini buk le “begee”? Lukas a bi gwélél buk i kaat Minson mi baôma i i bééna nlélém ndoñi inyu pôdôl sitima mbebi i ‘nkena.’ (Minson mi baôma 27:15) Jon ngéda Pétrô a tila le mbuu u bé “begee” batila Bibel, a bi gwélél buk  i i bé tinde bôt i hoñol “nluga u kuñga” inoñnaga ni i titii nyimam ma Bibel wada a bi gwélél. Pétrô a bé sômbôl kal le, kiki mbebi i ñéga sitima mu liké jé, hala nyen mbuu mpubi u bé éga bapôdôl ni batila Bibel mu nson wap. I nyimam ma Bibel nu a kônde le: “A bé wengoñle bapôdôl ba bi wandal mabadô ma sitima yap.” Yéhôva a bi boñ i jé, a bi ti bo “mbebi” tole mbuu mpubi. Yak batila Bibel ba bi boñ jap. Ba bi sal ni mahôla ma mbuu u.

10-11. Mambe mam ima di nlama boñ inyu boñ le mbuu mpubi u éga bés? Ti hihéga.

¹⁰ I yé maliga le Yéhôva a ngwélél ha bé mbuu mpubi inyu tila Bibel i len ini. Ndi a ngi gwéélak wo inyu éga bagwélél bé. Ñ, Yéhôva a ngi boñok i jé. Kii di nla boñ inyu kôs mbuu mpubi? Di nlama ba nkwoog nkaa le di mboñ kii yosôna di nla inyu kôs wo. Lelaa ni?

¹¹ Di yoñ le hihéga hini. Inyu boñ le mbebi i éga kuñga, nluk kuñga a nlama boñ mam ima. Pog, a nlama kena kuñga yé i het mbebi i ntagbe. Inyule, ibale nluk kuñga a ntéé bé kuñga yé i het mbebi i ntagbe, kuñga yé y’a yén homa wada. Iba, a nlama bédés libadô li kuñga yé, a tibil ki wandal jo. Ntiik, to ibale mbebi i nhôñ, kuñga yé i ga ke bé ni bisu ibale libadô jé li nkap bé mbebi. Nlélém ni bés, di ga téñbe i nson u Yéhôva ndik ni mahôla ma mbuu mpubi. Inyu kôs mbuu mpubi, di nlama boñ mam ima. Pog, di nlama yoñ ngaba i minson mi mbuu inyu boñ le mbuu mpubi u éga bés. Iba, di yoñ ngaba mu mam ma i nya i yôni, ibale di mboñ hala, wee di “bédés libadô li kuñga yés.” (Tjémbi 119:32) Ngeñ di mboñ i mam ma mo ima, mbuu mpubi u ga éga bés mu mangudga ma ngolba  ni ma bikuu, u hôla ki bés i téñbe ni hémle mu njel i nkena i mbok yondo.

12. Kii di nke tehe hanano?

¹² Ipam hana, di mpôdôl manjel ima het mbuu mpubi u nla hôla bés. Mbuu mpubi u nti bés ngui i i nhôla bés i téñbe ngéda di mboma mandutu. Mbuu mpubi u nhôla ki bés i ke ni bisu mu njel i nkena niñ boga. Nano di béñge mam ma-na di nla boñ inyu kôs mbuu mpubi i nya i yôni.

13. Inoñnaga ni 2 Timôtéô 3:16, 17, umbe nseñ di ñôt mu i yigil yés i Bibel, kii di nlama ndugi boñ?

¹³ Jam li bisu, di nigil Bañga i Djob. (Añ 2 Timôtéô 3:16, 17.) I buk i Grikia ba bi kobol le “i nlôl ni Nyambe” i nkobla le Yéhôva a bi ti bôt ba binam mbuu wé inyu tila Bibel. Djob a bi gwélél mbuu wé inyu “ha” mahoñol mé miño mi batila Bibel. Ngéda di ñañ Bibel di soñdaga ki yo, biniigana bi Djob bi njôp bés mahoñol ni miñem. Mahoñol ma Djob ma, ma ntinde bés i niñ inoñnaga ni sômbôl yé. (Lôk Héber 4:12) Inyu boñ le di kôs mbuu mpubi i nya i yôni, i mbéda le di yoñ ngéda i nigil Bibel hiki kel ni i soñda i mam di nigil bañga lisoñdaga. Ha nyen Bañga i Djob y’a éga bipôdôl gwés ni maboñok més.

14. (a) Inyuki di nla kal le ‘mbebi i yé ngandak’ i makoda més? (b) Lelaa di “nwandal libadô li kuñga” yés ngéda di nke makoda?

¹⁴ Mam ma nyônhe ima, di bégés Djob ntôñ ni lôk kéé yés. (Tjémbi 22:23) Di nla kal le “mbebi i yé ngandak” makoda més, i mbebi i, i ta bé yom ipe, i yé mbuu mpubi u Yéhôva. (Masoola 2:29) Inyuki di nkal hala? Inyule ngeñ di nkodba ni lôk kéé, di nsoohe inyu kôs mbuu mpubi, di ntôp tjémbi di Ane di di nlôl i Bañga i Djob, di nkôs ki biniigana bi Bibel mu minkwel mi lôk kéé yés i bôlôm i, mbuu mpubi u bi téé. Nlélém mbuu mpubi won u nhôla lôk kéé i bôda i kôôba ni i lôôs minkwel nwap. Ndi inyu kôs mbuu mpubi i nya i yôni, di nlama kôôba inyu boñ le di timbhe makoda. Ibale di mboñ hala, wee di “nwandal libadô li kuñga” yés.

15. Lelaa mbuu mpubi u nhôla bés likalô?

¹⁵ Mam ma nyônhe maa, di téé likalô. Ngéda di ngwélél Bibel i nson wés likalô, di nti mbuu mpubi pôla i hôla bés mu nson wés. (Rôma 15:18, 19) Inyu kôs mbuu u Djob i nya i yôni, u nlama lôôs ngandak ngéda i añal ñañ nlam, u gwéélak ki Bibel hiki ngéda pôla i nene. Njel yada u nla gwélél inyu lémés nson woñ likalô i yé dihéga di minkwel di mpam i Niñ yés ni nson wés​—Kaat likoda li ñem sonde.

16. Limbe jam li nloo mam momasôna di nlama boñ inyu kôs mbuu mpubi?

¹⁶ Mam ma nyônhe ma-na, di soohe Yéhôva. (Matéô 7:7-11; Lukas 11:13) Jam li nloo mam momasôna di nla boñ inyu kôs mbuu mpubi li yé le di bat wo Yéhôva ni njel masoohe. Yom yo ki yo, to mok, to Satan i nla bé sôña le Yéhôva a emble masoohe més, to sôña le di kôs mbuu wé. (Yakôbô 1:17) Lelaa di nlama soohe inyu kôs mbuu mpubi i nya i yôni? Inyu timbhe, di béñge hihéga Yésu a bi ti inyu masoohe hi hi nlébna ndigi i kaat Lukas. *

17. Bimbe biniigana inyu masoohe di nla ôt mu hihéga hi Yésu hi mpémél i kaat Lukas 11:5-9, 13?

¹⁷ Añ Lukas 11:5-9, 13, NWT. Hihéga hi Yésu hi, hi ñunda lelaa di nlama soohe inyu kôs mbuu mpubi. I mut ba mpôdôl mu hihéga hi, a bi kôs i yom a bééna ngôñ inyule ‘a bi téñbe i bat ibabé waa.’ Tolakii hala a bé bebee le kosi juu, a kon bé woñi i bat liwanda jé mahôla. (Béñge notes d’étude i kaat Lukas 11:8, i mwb18 nu sôñ Njéba.) Mambe maada ma yé ipôla hihéga hi Yésu hini ni masoohe? A kal le: “Ni bat ibabé waa, ndi n’a kôhna; ni yéñ ibabé waa, ndi n’a léba; ni koode ibabé waa, ndi b’a yible bé.” Hala a niiga kii bés? Inyu kôs mahôla ma mbuu mpubi, di nlama téñbe ni masoohe.

18. Kiki hihéga hi Yésu hi ñunda, inyuki di nla ba nkwoog nkaa le Yéhôva a’ ti bés mbuu mpubi?

¹⁸ Hihéga hi Yésu hi nhôla ki bés i nok inyuki Yéhôva a’ ti bés mbuu mpubi. Mut a bi pôdôl a bé sômbôl leege nkén wé loñge. A bi nôgda le a nlama ndigi ti nkén wé bijek to hala kiki ngeñ i bé nkenek, ndi a bééna bé yom yo ki yo i ndap. Yésu a kal le mut wé libôk a bi sôk ti nye koga inyule a bi téñbe i bat ibabé waa. Kii Yésu a bé sômbôl kal? Ibale kwéha mut i yé bebee i hôla mut wé libôk nu a nyemhe nye, bôô ni ngélé yañen ni Tata wés nu gwéha! A ga ti ndik bés mbuu mpubi ibale di ntéñbe i bat nye wo ibabé waa. Jon di nla ba nkwoog nkaa le ibale di mbat Yéhôva mbuu mpubi ibabé waa, a ga ti bés wo.​—Tjémbi 10:17; 66:19.

19. Kii i nkwés bés nkaa le di ga yémbél?

¹⁹ Di nyi ntiik le to hala kii Satan a mboñ biliya gwobisôna inyu kwés bés, di ga yémbél. Inyuki? Inyule mbuu mpubi u nhôla bés ikété manjel ima. Pog, u nti bés ngui i mbéda bés inyu yémbél ndutu. Iba, kiki mbebi i nkena “kuñga ngéda i nyon mu libadô jé,” hala nyen mbuu mpubi u nti bés ngui i ke ni bisu i gwélél Yéhôva letee ni i mbok yondo. Makidik més ma nlama ba le, di kôs ngui i mbuu mpubi i nya i yôni!