1-2. (a) Rosai ḇefnoḇek ko fa komkuepen ro samswen kosmai ro ras ḇe ras? Fasnaiḇair pan. (b) Rosai na kawos ro farkarkor inena?

ḆEBOR ro ko na korower ono sikofen radine, ”Fyor yakara samswen yabur kwarna ido, yafawi nanema snar samambraḇ mankun yena ḇa.” Fafisu wasmai dafduf ḇemarḇak ḇaido snonkaku waswar ya imarbur Au mboi wamkuepen pdef, imbude wakkofen radirya kako. Waswarepen samswen anna ido, na ḇaḇir swambraḇ fa wamkuepen ro ras ḇe ras snar Yahwe ḇyuk rur Ḇyedi isoine papoik ḇeba syadi ro kwara na.

² Kokyar kaku faro papoik rur ḇesren ine fa kopampum awyae ro dunya ḇeḇarḇor ine. (1 Yoh. 5:19) Osower ido, kofandun samambraḇ fa kofaḇri kuker ”rur ḇeḇarḇor”. (Ef. 6:12) Kirine, na kawos nyan risuru rur ḇesren ifnoḇek ko ro samswen anna kam. Mura na kawos rosai fandun fa kofrur insama Allah rur ḇesren Ḇyedi ifnoḇek kaku ko.

3. Rosai nyan oser Yahwe ifnoḇek ko roro rur ḇesren Ḇyedi?

³ Yahwe rur ḇesren Ḇyedi ifnoḇek ko kuker ḇyuk samambraḇ fa kofrur roi fandun fa kofrur ya fyor kosmai samswen. Manwawan Paulus ismai samswen, mboi ḇyaḇir syambraḇ fa fyarmyan pdef ḇe Yahwe snar ikyar kaku faro ”Kristus samambraḇ ḇyedi”. (2 Kor. 12:9) Ro fafisu marandan ḇesuru ḇe misionaris, Paulus fyararur marḇak ro ḇararyas monda ḇa mboi syewar pipi kako fa fyamfon fandun ḇyena. Ḇyarek ro Korintus ro Akwila ma Priskila rum suḇedi. Suma sufararur fa sufrur rum kruḇen. Snar fararur skoḇena namnis, ras ono Paulus fyararur kayam kuker su. (Farfyar 18:1-4) Allah rur Ḇyedi ḇyuk samambraḇ ḇe Paulus fa fyararur ma ḇyaryas.

4. Imnis 2 Korintus 12:7b-9, samswen rosai Paulus ismai ya?

 ⁴ Wasya 2 Korintus 12:7b-9. Ro mnuk nane, Paulus ikofen ismai samswen ḇekur ’ḇorek ḇekuk baken ḇyedi’. Rosai kyur kaku ya? Ḇorek oso ikuk ḇaken koḇedi ido, na kosyur ra. Inja, ḇorek Paulus ikofen anya kyur ḇe samswen na ḇefrur fa iduf fafayaḇa. Doḇe imnis ra ’malaikat Ibiris ya ḇyaserpum i’. Samswen ḇekur Paulus ndramuma kaku ro Setan ma rur ḇeḇarḇor sya ḇa, imnis ra skuk ḇorek ro ḇaken ḇyedi. Ḇape, fafisu rur ḇaḇarḇor ansi smam ’ḇorek’ Paulus ismai kwar, rya skuk ḇorek anya fa syun kaku insama Paulus iduf syadi wer. Rosai Paulus ifrur ya?

5. Moḇsa Yahwe kyarem Paulus nadi ḇyena rai?

⁵ Randakya, Paulus imarisen insama ’ḇorek’ anya ḇyeḇekanowburi. Ikofen, ”Yaḇenadi ḇerarwan rikior faro Manseren [Yahwe] . . . imarisen ido ikanow dafduf anibur aya.” Paulus ḇyenadi rarya kwar, mboi ḇorek ḇero ḇaken ḇyedi isya kaker. Inja, Yahwe kyarem Paulus nadi ḇyena ḇa ke? Aroḇaberi. Kyarem nadi ḇyena kwar. Yahwe ikanow samswen ḇekur Paulus i ḇa, ḇape ḇyuk samambraḇ ḇe i fa kyamar na. Yahwe doḇe, ”Papoik ayena nsambraḇ syadi rofyor awsya rwoi samambraḇ ḇaya.” (2 Kor. 12:8, 9) Ma snar Allah fafnoḇek Ḇyedi, Paulus ismai aski ma kananon!​—Flp. 4:4-7.

6. (a) Moḇsa Yahwe na kyarem nadi koḇena rai? (b) Asas rosai ro mnuk-mnuk ḇero syos ine ḇeḇuk samarabraḇ ḇe Au?

⁶ Raris Paulus, wakḇenadi wor Yahwe fa ipyos samswen bena bur Au ke? Imbude ḇenadi ker ḇe Yahwe I kwar, mboi samswen anna naisya kaker ḇaido naḇyeḇa syadi wer. Inja na kwara Yahwe imarisen Au wer ḇa ke? Rarirya ido, waswarepen Paulus farfyar ḇyeja. Yahwe kyarem nadi ḇyena, inja kaku beri nari Dakkarem nadi bena kako! Yahwe na ipyos samswen bena ḇa. Ḇape kuker rur ḇesren, ḇyuk samambraḇ wafandun na fa kamar samswen anna. (Mz. 61:3, 4) Ḇaḇir rya ’siprer au rao wasapi’, mboi Yahwe ipok ibur Au ḇa.​—2 Kor. 4:8, 9; Flp. 4:13.

7-8. (a) Rosai ḇefnai fa Allah rur Ḇyedi imnis ra wame? (b) Rariso Petrus fyasnaiḇair Allah rur Ḇyedi moḇ fyararur raya?

⁷ Rosai nyan ḇese Allah rur Ḇyedi ifnoḇek ko wer? Allah rur Ḇyedi imnis ra wame. Fafisu wamdoḇer myun sorenya ido, wai oso na iso wam ḇeso ḇera ḇe moḇ imbe rya yoḇ ya. Rarirya kako, samswen imnis wam doḇer nkur ko rariryano, papoik ro Allah rur Ḇyedi ifnoḇek ko fa kofarmyan pdef ḇe Yahwe. Rirya koro nyan ḇeyun ko ḇe dunya babo Allah ḇyeasas kwarna.

⁸ Manwawan Petrus randak iwara ima mandaswan diri ma rya ker fa iraswan. Iso ḇefnai fa ḇyukimnis rur ḇesren moḇ fyararur raya kuker wos sap ro ayayun. Fyas ḇo doḇe, ”Snar ḇardadi anna neḇeḇaryas ro marisen snonkaku ḇa, ḇape kuker dafdif ro Rur Ḇesren snonkaku sawos kuker snonsnon Allah.” Wos Yunani sfadwerna ḇe ”dafdif” sfararwena kako ḇe ”ḇyeḇeyun” ḇaido ”ḇyeḇewuf”.​—2 Ptr. 1:21.

9. Rosai wos sarḇer Petrus ikofen ya fyor doḇe manfasfas Refo sya sismai ”dafdif” ro rur ḇesren ya?

⁹ Wos sarḇer rosai Petrus ikofen kaku rodineni? Lukas, ḇefas syap Farfyar, ḇyuk wos Yunani ḇemnis rofyor  fyasnaiḇair wai oso ’ikren ikḇar’ snar wamya iwuf i. (Farfyar 27:15) Manḇefawinanem ro fasfas Refo doḇe, rofyor Petrus fyas ḇo ikofen manfasfas Refo sya sismai ”dafdif” ro rur ḇesren, Petrus ḇyuk wos peper ḇekur ayayun ya. Inja, Petrus doḇe imnis ra wai oso iso wamya dun i fa ifyafer ro moḇ oso, manfasfas Refo sya siso dafdif ro rur ḇesren fa sifrur fararur sena. Manḇefawinanem anya doḇe, ”Manfasfas Refo sya simnis ra wai ḇena ayun sḇe na fa nek kwar.” Yahwe ifrur fararur Ḇyedi kuker ḇyuk wam sfandun na, isoine papoik rur Ḇyedi. Manfasfas Refo sya kako simbran fararur sena ma siso farkankin ro Allah rur Ḇyedi.

10-11. Roi risuru rosai fandun fa kofrur ya insama papoik Allah rur Ḇyedi ifnoḇek kaku ko? Buk sararḇer.

¹⁰ Kakuḇae, kirinema Yahwe ḇye rur Ḇyedi fa idif snonkaku sya fa sfas Refo wer ḇa. Ḇape, Yahwe fyarkin kawasa Ḇyesi kaker kuker papoik rur Ḇyedi. Yahwe ifrur fararur Ḇyedi pdef. Inja, insama Allah rur ḇesren Ḇyedi ifnoḇek ko ido, fandun fa kofrur fararur koḇena kako. Nyan ya rariso?

¹¹ Koḇukikara roi naine. Insama wamya ifnoḇek mandaswan ro ayayun ḇyeja, fandun fa ifrur roi risuru. Ḇeoserya, myam mnis wai ḇyeja fa isya ro moḇ wamya iso roya. Ipyar waiya ro abor monda ido, na kyain pdef ro moḇya. Ḇesuru ya, fandun fa pyaw ayun ya fa deke ma fyosi. Imboḇae, wamya iso ayun anya insape wai ani na imbrane. Rarirya kako, na kofarmyan pdef ḇe Yahwe fafisu kosmai fafnoḇek ro Allah rur Ḇyedi. Mboi fandun fa kofrur roi risuru. Ḇerandak ya, fandun fa ko ro moḇ Allah rur Ḇyedi isya roya kuker kofrur fararur ro ḇaḇ farkankin rur ḇesren. Ḇesuru ya, fandun fa kopaw ayun ya fa deke ma kofosi. Ine kyurfasnai kosewar fa kofrur  fararur anna kuker nyan ḇepyum. (Mz. 119:32) Kofrur roi risuru ansuya ido, rur ḇesren na idif ko fa kombran pdef fafisu roi ḇedwarek ma samswen imnis bak ndrama nkur ko. Rur ḇesren ya kako ifnoḇek ko fa kosoasuser pdef isof ro dunya babo Allah ḇyeasas kwar.

12. Knikine rosai na kawos ya?

¹² Kawos kwar roi risuru rariso rur ḇesren ya ifnoḇek ko. Rur ḇesren syambraḇser ko fa kosoasuser pdef ro fafisu ḇesamswen na. Rur ḇesren kako ifnoḇek ko fa kofarmyan pdef ḇe Yahwe insama koro nyan ḇeyun ko ḇe kankenem fyoro. Knikine, kawos roi rifyak fandun fa kofrur insama Allah rur Ḇyedi ifnoḇek kaku ko.

13. Imnis wos ḇero 2 Timotius 3:16, 17, rosai bon kosmai ya fyor kowasya Refo, ḇape rosai fandun fa kofrur ya?

¹³ Randakya, kofarkor Refo ya. (Wasya 2 Timotius 3:16, 17.) Allah ḇyuk rur Ḇyedi fa ryir swaruser Ḇyena fa nsun ro manfasfas Refo kakara sena. Rofyor kowasya Refo ma kokarauser na, Allah wos Ḇyena na nsun ro kakara ma kosnesna. Nane nadif ko fa kokenem imnis Allah marisen Ḇyena. (Ibr. 4:12) Ḇape, insama rur ḇesren ifnoḇek kaku ko, fandun fa kofarkor Refo ras ḇe ras ma kokara mnis kaku rosai kofarkor kwar na. Bon ya, rosai kawos ma kofrur namnis kuker Allah wos Ḇyena.

14. (a) Rosai ḇefnai fa na koḇo Allah rur Ḇyedi isya ro fananjur ya? (b) Insama rur ḇesren ifnoḇek kaku ko, rosai fandun fa kofrur ya?

¹⁴ Ḇesuruya, kosyom Yahwe warpu naek srar sya. (Mz. 22:22) Fyor koso fananjur ya, imnis ra koro moḇ wamya iso roya. Snar Allah rur Ḇyedi isya ro fananjur na. (Why. 2:29) Rosai ḇefnai fa kokofen radine? Snar fafisu kofanjur kayam kuker naek srar sya, koḇenadi kor rur ḇesren ma kodisen dow ḇeknam ro Refo ya. Korower kako farkarkor ḇeknam ro Refo ḇeyun ya siso naek ḇeḇekanow kuker rur ḇesren sya. Allah rur Ḇyedi kako ifnoḇek imbesrar sya fa sifrur fasasos ma sfasnai ro ḇarpon fasasnai sena. Ḇape, insama rur ḇesren ifnoḇek kaku ko, fandun fa kofrur fasasos fa koḇuk kankarem ro fananjur ya. Rarirya, ro fananjur ya kakmnis ra wai ḇena ayun ḇefos naba.

15. Rariso rur ḇesren ifnoḇek ko ro ḇaḇeḇaryas ya?

¹⁵ Ḇekyorya, koḇaryas pdef. Fafisu koḇuk Refo fa koḇukiḇaryas ma koḇukfarkor, rur ḇesren na ifnoḇek ko ro ḇaḇeḇaryas koḇena. (Rm. 15:18, 19) Ḇape, infa Allah rur Ḇyedi ifnoḇek kaku Au, fandun fa swewar pdef fa waḇaryas ma buk Refo ro ḇaḇeḇaryas. Nyan oser ḇefnoḇek fa Au wawos pyum kuker snonkaku wasrow ro ḇaḇeḇaryas sya iso buk awawos koḇukiḇaryas ḇero Syapram Farkarkor Kankenem ma Fararmyan Kristen Koḇena.

16. Rosai nyan fa kosmai ḇeri rur ḇesren ya?

¹⁶ Ḇefyakya, koḇenadi ḇe Yahwe. (Mat. 7:7-11; Luk. 11:13) Nyan fa kosmai beri rur ḇesren ya iso kor ḇe Yahwe ro nadi. Roi osoḇaḇeri na idwarek Yahwe fa ryower nadi koḇena ma ḇyuk rur papoik Ḇyedi faro ko. Koro bui ke ḇaido Setan syewar fa idwarek na ke, Allah rur Ḇyedi na ifnoḇek ko pdef. (Yak.1:17) Insama rur ḇesren ifnoḇek kaku ko, moḇsa fandun fa koḇenadi rai? Infa kofawi kankarem ḇyena, mkorama kofarkor kuker  nadi ro sararḇer oso ḇefas monda ro syap Injil Lukas. *

17. Ro Yesus sararḇer ḇyedi ḇefas ro Lukas 11:5-9, 13, rosai kofarkor ḇekur nadi ya?

¹⁷ Wasya Lukas 11:5-9, 13. Yesus sararḇer ḇyedi fyasnaiḇair moḇsa fandun fa koḇenadi kor Allah rur Ḇyedi rai. Ro sararḇer anya, snon ani snar ”ifawi imaiḇa ḇo dor yayayu ḇesya kwar”, ismai roi fyandun na. Imai ḇa fa dor fafnoḇek ro bati ḇyedi ro romfawru. (Luk. 11:8.) * Ro sararḇer ine, rosai imbe Yesus fyarkor ḇe kona? Yesus doḇe, ”Mkore, nari neḇeḇuk faro mko; mko sewar, snar nari mkosma; mkonuk snar nari kedwaya syeḇen fabe mko.” Inja, rosai farkarkor ya? Infa kaksmai fafnoḇek ro rur ḇesren ido, fandun fa koḇenadi korna ḇesya kwar.

18. Imnis Yesus sararḇer ḇyedi, rosai ḇefnai fa kokyar Yahwe nari ḇyuk rur ḇesren Ḇyedi?

¹⁸ Yesus sararḇer ḇyedi kako ifnoḇek ko fa kofawi rosai ḇefnai fa kokyar Yahwe nari ḇyuk rur ḇesren Ḇyedi. Snon ḇero sararḇer anya imarisen fyasnai frur pyum ḇyena faro ḇedakam i ya. Kyara fandun fa fyasos roḇean ḇe i ro romfawru, mboi nya roḇean oḇa. Yesus ikofen mura ido snon ani bati ḇyedi ḇyuk mamami ḇe i snar dor ker. Rosai Yesus imbe fyarkor ḇe kona? Snonkaku ḇesasar monda imarisen ifnoḇek bati ḇyedi snar dor ḇe i ker, iba syadi Kma ḇesaswar koḇedi ro nanki. Inja, na kokyar kaku rofyor koḇenadi sambraḇ ḇesya kwar ido nari Ḇyuk papoik rur Ḇyedi ḇe ko.​—Mz. 10:17; 66:19.

19. Rosai ḇefnai fa kokyar na kosambraḇ fa komkuepen pdef?

¹⁹ Setan na syewar fa myun ko, mboi kokyar na kosambraḇ fa komkuepen pdef. Rosai ḇefnai ya? Snar Allah rur ḇesren Ḇyedi ifnoḇek ko ro nyan risuru. Randakya, ḇyuk samambraḇ fa koḇar samswen koḇena. Ḇesuruya, papoik rur ḇesren ifnoḇek ko fa kofarmyan pdef faro Yahwe isof ro dunya babo. Rirya kada, kosewar insama Allah rur ḇesren Ḇyedi ifnoḇek kaku ko!