1-2. (1) ?Wanem i save givhan long yumi blong stanap strong evri dei? Eksplenem. (2) ?Bambae yumi tokbaot wanem long stadi ya?

“TAEM mi tingbaot trabol we mi kasem, mi save se mi no naf blong gotru long trabol ya long prapa paoa blong mi.” ?Samtaem yu gat tingting olsem? Plante long yumi i bin talem olsem. Maet yu stap tingbaot taem ya we yu kasem wan bigfala sik, o wan we yu lavem hem tumas i ded. Taem yu tingting bak, yu harem se yu naf blong stanap strong evri dei, from Jehova i givim tabu spirit blong givim “paoa ya we i bigwan bitim mak.”—2 Kor. 4:7-9.

² Yumi nidim tabu spirit tu blong blokem ol rabis fasin blong wol. (1 Jon 5:19) Mo yumi nidim tu blong faet agensem “ol rabis spirit.” (Efes. 6:12) Taswe, bambae yumi tokbaot olsem wanem tabu spirit i save halpem yumi long tu rod. Afta, bambae yumi tokbaot ol samting we yumi save mekem blong letem tabu spirit i lidim yumi fulwan.

3. Talem wan rod we Jehova i yusum blong givhan long yumi taem yumi kasem trabol.

³ Tabu spirit blong Jehova i givim paoa long yumi blong mekem ol wok blong yumi nating se yumi fesem hadtaem. Aposol Pol i harem se hem i save gohed long wok blong Jehova from “paoa blong Kraes” nomo, nating se hem i kasem plante trabol. (2 Kor. 12:9) Long seken misinari trip blong Pol, hem i wok had long wok blong prij, mo tu hem i wok blong winim mane blong pem ol samting we hem i nidim. Hem i stap wetem Akwila mo Prisila long taon blong Korin. Tufala i stap wokem ol haos tapolen, mo from we Pol tu i mekem  sem wok ya, hem i wok haftaem wetem tufala. (Wok 18:1-4) Tabu spirit i givim paoa long Pol blong i save wok blong winim mane mo blong mekem wok blong prij tu.

4. Folem 2 Korin 12:7b-9, ?wanem problem we Pol i fesem?

⁴ Ridim 2 Korin 12:7b-9. Long ol vas ya, ?Pol i minim wanem taem hem i talem se i gat wan “nil blong aranis” we i stap stikim hem? Sipos wan nil aranis i stap stikim yu, bambae yu harem se i soa. Taswe Pol i minim se i gat wan samting we i stap traem hem we i mekem hem i harem nogud. Hem i talem se trabol ya i olsem “wan enjel blong Setan” we i stap “slavem” (“kilim,” futnot) hem. Maet trabol ya i no kamaot stret long Setan mo ol enjel blong hem. Be taem oli luk we “nil blong aranis” i stap stikim Pol, oli wantem blong mekem Pol i harem nogud moa. ?Pol i mekem wanem?

5. ?Olsem wanem Jehova i ansarem prea blong Pol?

⁵ Fastaem, Pol i wantem se Jehova i tekemaot “nil blong aranis” ya. Hem i talem se: “Tri taem mi askem strong long Masta [Jehova] blong i tekemaot samting ya long mi.” Nating se Pol i prea from, be nil aranis ya i stap nomo. ?Hemia i min se Jehova i no ansarem prea blong Pol? Si, hem i ansarem. Hem i no tekemaot problem ya, be hem i givim paoa long Pol blong i stanap strong. Jehova i talem se: “Taem yu no gat paoa, long taem ya nao paoa blong mi i kam strong moa long yu.” (2 Kor. 12:8, 9) !God i givhan long Pol blong i stap glad mo i gat pis long tingting blong hem!—Fil. 4:4-7.

6. (1) ?Maet Jehova i mekem wanem blong ansarem prea blong yu? (2) ?Wanem promes long ol vas long paragraf ya we i givim paoa long yu?

⁶ ?Yu tu yu bin prea long Jehova olsem Pol, blong i tekemaot wan samting we i stap traem yu? Sipos yu prea be problem ya i stap yet o i kam mowas, ?yu yu wari se Jehova i no moa glad long yu? Sipos i olsem, tingbaot samting we i hapen long Pol. !Jehova i ansarem prea blong Pol mo bambae hem i mekem sem mak long yu! Ating bambae hem i no tekemaot problem ya, be bambae hem i save yusum tabu spirit blong givim paoa blong yu stanap strong. (Sam 61:3, 4) Maet i olsem se trabol ya i ‘sakem yu i godaon long graon,’ be Jehova i no save lego yu.—2 Kor. 4:8, 9; Fil. 4:13.

7-8. (1) ?Olsem wanem tabu spirit i olsem win? (2) ?Olsem wanem Pita i tokbaot wok blong tabu spirit?

⁷ ?Tabu spirit i save givhan long yumi long wanem narafala rod? Olsem wan gudfala win we i pusum bot i gotru long raf solwota, tabu spirit i pusum yumi i gotru long ol trabol go kasem sefples ya, niufala wol we God i promes long hem.

⁸ Aposol Pita we i wan man blong fising, mo i save gud ol seling bot. Taswe taem hem i tokbaot olsem wanem tabu spirit i wok, hem i yusum sam tok we i joen wetem ol seling bot. Hem i raetem se: “I no gat wan taem we profet tok i kamaot from we man nomo i wantem. Taem tok blong profet i kamaot, ol profet oli talem, be tabu spirit i putum tok ya long tingting blong olgeta, nao oli talemaot tok we i kamaot long God.” Grik tok we oli tanem i kam ‘putum long tingting’ i minim “muvum” o “pusum.”—2 Pita 1:21.

9. ?Tok ya “pusum” we Pita i yusum i mekem yumi tingbaot wanem?

⁹ ?Tok ya “pusum” we Pita i yusum i givim wanem tingting? Luk we i raetem buk blong Ol Wok, i yusum wan Grik tok we i klosap i sem mak, blong tokbaot wan sip we win i “tekem hem i go.” (Wok 27:15) Taswe wan man we i stadi dip long ol tok blong Baebol, i  talem se taem Pita i tokbaot tabu spirit we i “pusum” ol man blong raetem Baebol, hem i stap yusum “wan pijatok we i mekem ol man oli tingbaot seling bot.” Pita i wantem soemaot se tabu spirit i pusum ol man blong raetem Baebol, olsem we win i pusum wan sip i go long rod blong hem. Man ya i gohed i se: “Taem ol profet oli letem tabu spirit i lidim olgeta, i olsem we oli pulum sel i go antap blong letem win i pusum bot.” Jehova i mekem wok blong hem taem i givim tabu spirit we i olsem “win.” Ol man blong raetem Baebol oli mekem wok blong olgeta taem oli letem tabu spirit i lidim olgeta.

10-11. ?Wanem tufala samting we yumi mas mekem blong tabu spirit i pusum yumi? Talem wan pijatok.

¹⁰ Tede, Jehova i no moa yusum tabu spirit blong pusum ol man blong raetem Baebol. Be tabu spirit i stap gohed blong lidim ol man blong hem. Jehova i stap mekem wok blong hem yet. ?Olsem wanem yumi save kasem tabu spirit? Yumi mas mekem wok blong yumi. ?Wanem wok?

¹¹ Tingbaot pijatok ya bakegen. Wan man blong solwota i mas mekem tu samting blong win i pusum seling bot blong hem. Faswan, hem i mas tekem bot i go long wan ples we i gat win. Bot i no save muv sipos i stap nomo long wan haba we i no gat win. Seken samting, hem i mas pulum sel i go antap mo meksua se i open fulwan. Nating se i gat win, be win ya i mas kasem sel, blong bot i save muv. Long sem fasin, yumi mas kasem tabu spirit, blong yumi save gohed long wok blong Jehova. I gat tu samting we yumi mas mekem blong kasem tabu spirit. Faswan, yumi mas go long wan ples we tabu spirit i stap, i min se yumi joen long ol wok we tabu spirit i lidim. Seken samting, yumi mas “pulum sel i go antap” mo openem fulwan, i min se yumi mas mekem bes blong yumi blong joen fulwan long ol wok ya. (Sam 119:32) Taem yumi mekem tufala samting ya, tabu spirit bambae i pusum yumi i  gotru long ol trabol mo hadtaem, mo i mekem yumi stanap strong go kasem niufala wol.

12. ?Bambae yumi tokbaot wanem naoia?

¹² Yumi tokbaot finis tu samting we tabu spirit i mekem blong givhan long yumi. Hem i givim paoa long yumi blong stanap strong taem yumi fesem trabol. Mo hem i pusum yumi blong gohed long rod blong kasem laef we i no save finis. Naoia bambae yumi tokbaot fo samting we yumi mas mekem blong letem tabu spirit i lidim yumi fulwan.

13. Folem 2 Timoti 3:16, 17, ?Baebol i save mekem wanem long yumi, be yumi mas mekem wanem?

¹³ Fas samting, yu mas stadi long Tok blong God. (Ridim 2 Timoti 3:16, 17.) Yumi save se Baebol i “kamaot long God.” Hem i yusum tabu spirit blong putum tingting blong hem long tingting blong ol man we oli raetem Baebol. Taem yumi ridim Baebol mo tingting dip long hem, ol tok blong God oli kasem tingting mo hat blong yumi. Nao oli pusum yumi blong jenisim laef blong yumi blong mekem Jehova i glad. (Hib. 4:12) Be blong letem tabu spirit i lidim yumi fulwan, yumi mas makemaot taem blong stadi mo tingting dip long Baebol. Nao Tok blong God bambae i lidim yumi long ol samting we yumi talem mo yumi mekem.

14. (1) ?From wanem yumi talem se tabu spirit i stap long ol miting? (2) Long ol miting, ?olsem wanem yumi save pulum sel i go antap mo openem fulwan?

¹⁴ Seken samting, yumi mas joen wanples blong wosipim God. (Sam 22:22) Tabu spirit blong Jehova i stap long ol miting olsem win we i stap blu. (Rev. 2:29) ?From wanem yumi talem olsem? From we taem yumi joen wanples wetem ol brata mo sista blong mekem wosip, yumi prea from tabu spirit, yumi singsing long ol singsing we oli stanap long Baebol, mo yumi lesin long ol save blong Baebol we oli kamaot long ol brata we tabu spirit i putumap olgeta. Tabu spirit i givhan tu long ol sista, blong oli rerem mo mekem ol pleplei. Be blong kasem tabu spirit fulwan, yumi mas rere gud fastaem mo givim ansa long ol miting. Long fasin ya, i olsem we yumi pulum sel i go antap mo openem fulwan.

15. ?Olsem wanem tabu spirit i givhan long yumi long wok blong prij?

¹⁵ Namba tri samting, yumi mas prij. Taem yumi yusum Baebol long wok blong prij mo blong tijim ol man, tabu spirit i stap givhan long yumi. (Rom 15:18, 19) Be sipos yumi wantem se tabu spirit i givhan fulwan long yumi, yumi mas go prij oltaem mo tekem evri janis blong yusum Baebol. Blong storian gud moa wetem ol man, yumi save yusum ol fastok long Kristin Wok Mo Laef—Buk Blong Miting.

16. ?Wanem narafala rod blong kasem tabu spirit?

¹⁶ Namba fo samting, prea long Jehova. (Mat. 7:7-11; Luk 11:13) Wan narafala rod blong kasem tabu spirit, i blong askem stret long Jehova. I no gat wan samting i save blokem ol prea blong yumi we i go long Jehova, o blokem tabu spirit blong i no kasem yumi. Ol stonwol blong prisen, mo Setan tu i no save blokem samting ya. (Jem. 1:17) Blong kasem tabu spirit fulwan, ?yumi mas prea olsem wanem? Blong ansa long kwestin ya, bambae yumi tokbaot wan pijatok long Gospel blong Luk. *

17. ?Yumi lanem wanem long pijatok blong Jisas long Luk 11:5-9, 13?

¹⁷ Ridim Luk 11:5-9, 13. Pijatok blong Jisas  i soemaot olsem wanem blong prea from tabu spirit. Long pijatok ya, man ya i kasem samting we hem i nidim from we hem i “no sem blong askem samting ya plante taem.” Hem i no fraet blong askem help long fren blong hem, nating se i medel naet finis. (Yu luk refrens long Luk 11:8 long Kristin Wok Mo Laef—Buk Blong Miting, Julae 2018.) ?Olsem wanem Jisas i joenem pijatok ya wetem prea? Hem i talem se: “Yufala i mas gohed blong askem, nao bambae yufala i kasem, mo yufala i mas gohed blong lukaotem, nao bambae yufala i faenem, mo yufala i mas gohed blong noknok, nao doa bambae i open.” Taswe, ?yumi lanem wanem? Yumi lanem se, blong kasem help blong tabu spirit, yumi mas blong gohed blong askem.

18. Folem pijatok blong Jisas, ?from wanem yumi sua se Jehova bambae i givim tabu spirit long yumi?

¹⁸ Pijatok blong Jisas i soemaot tu from wanem Jehova i givim tabu spirit. Man ya i wantem mekem i gud long fren blong hem. Hem i harem se hem i mas givim kakae long man we i kam askem long medel naet, be i no gat wan gudfala kakae blong givim. Ale hem i givim bred from we man ya i gohed blong askem. ?Jisas i wantem soemaot wanem? !Sipos wan man i rere blong givim kakae long fren blong hem we i gohed blong askem, yumi save se Papa blong yumi long heven we i kaen moa, bambae i givim tabu spirit long olgeta we oli gohed blong askem! Taswe, taem yumi prea, yumi sua se Jehova bambae i givim tabu spirit we yumi askem.—Sam 10:17; 66:19.

19. ?From wanem yumi sua se yumi save stanap strong?

¹⁹ Nating se Setan i stap gohed nomo blong agensem yumi, be yumi sua se yumi save stanap strong. ?From wanem? From we tabu spirit i givhan long yumi long tu rod. Faswan: Hem i givim paoa we yumi nidim blong winim ol problem. Sekenwan: Hem i olsem win we i “kasem sel blong bot,” nao i pusum yumi blong gohed blong mekem wok blong Jehova go kasem niufala wol. !Yumi mas gat strong tingting blong letem tabu spirit i lidim yumi fulwan!