1-2. (a) How wi ku kantinyu fi bayr op anda chraiyalz eech day? Pleez eksplayn yu ansa. (b) Weh wi wahn diskos eena dis aatikl?

YOO eva fays wahn prablem eena di paas ahn tink tu yuself, “Ai noa dat Ah kuda neva get chroo dat pahn mi oan”? Wahn lata wi mi praabli feel da way. Maybi wi mi seh it afta wi mi tink bowt how wi mi aybl fi koap wid wahn reeli bad siknis er wen sombadi weh wi lov mi ded. Wi feel laik di onli reezn wai wi kuda mi bayr op eech day da bikaaz Jehoava hoali spirit mi gi wi di “reel grayt powa” fi get chroo it.—2 Kor. 4:7-9.

² Wi aalso pen pahn Jehoava hoali spirit fi help wi deel wid di tingz weh di afek wi eena dis wikid werl. (1 Jan 5:19) Pahn tap a dat, wi haftu fait gens “di eevl spirit dehn.” (Ifee. 6:12) Eena dis aatikl, wi wahn diskos too wayz how di hoali spirit help wi wid aala dehnya prablemz. Den wi wahn diskos weh wi ku du fi geh az moch help az pasabl fahn Gaad hoali spirit.

3. Wat da wan way how Jehoava help wi fi bayr op wen wi fays prablemz?

³ Wen Jehoava hoali spirit help wi, wi ga di powa, er schrent, fi du evriting weh wi need fi du, eevn wen wi di fays prablemz. Fi egzampl, eevn doa di apasl Paal mi fays chraiyalz, hihn mi kantinyu fi serv Jehoava. Hihn kuda mi du dis bikaaz hihn mi pen pahn “Krais powa.” (2 Kor. 12:9) Joorin fi hihn sekant mishineri jerni, Paal neva onli spen wahn lata taim di preech, bot hihn mi aalso werk soh dat  hihn kuda mi pay ih bilz. Hihn mi stay da Akwila ahn Prisila hows da Korint. Dehn doz mek tent fi sel. Sins Paal mi ga chraynin fi mek tent, hihn mi werk wid dehn paat-taim. (Aks 18:1-4) Gaad hoali spirit mi gi Paal di powa fi werk soh dat hihn kuda mi mek wahn livin ahn preech di gud nyooz.

4. Akaadn tu 2 Korintyanz 12:7b-9, weh prablem Paal mi-di schrogl wid?

⁴ Reed 2 Korintyanz 12:7b-9. Eena dehnya vers, weh Paal mi meen wen hihn mi seh dat hihn mi-di schrogl wid “wahn big prikl” eena ih badi? If yoo mi ga wahn big prikl eena yu badi, yu wuda mi deh eena lata payn. Soh Paal mi-di seh dat hihn mi-di fays wahn paynful prablem. Hihn mi seh dat da prablem da-mi laik if “wan a Saytan aynjel dehn” mi kantinyu fi “taament” (er, “beet,” ftn. NW) ahn. Maybi Saytan er ih deemonz da neva di wan dehn weh mi-di kaaz Paal prablemz, weh da-mi laik wahn big prikl eena ih badi. Bot wen dehndeh wikid spirit mi noatis Paal prablem, dehn mi praabli chrai fi mek it wers. Da mi laik if dehn mi-di push da prikl deepa eena Paal badi. Soh weh Paal mi du?

5. How Jehoava mi ansa Paal pryaa?

⁵ At fers, Paal mi waahn Jehoava get rid a di “big prikl.” Hihn mi seh: “Ah bayg di Laad [Jehoava] chree taim fi tek it weh fahn mi.” Aldoa Paal mi pray, di prikl mi stil deh eena ih badi. Soh Jehoava mi ansa Paal pryaa er nat? Yes, Jehoava mi did ansa Paal pryaa. Bot Jehoava neva get rid a di prablem, hihn mi gi Paal di schrent fi get chroo it. Jehoava mi seh: “Mai powa werk di bes wen yu week.” (2 Kor. 12:8, 9) Ahn wid Gaad help, Paal mi aybl fi kip ih jai ahn ga pees!—Fil. 4:4-7.

6. (a) How Jehoava mait ansa wi pryaaz? (b) How di pramis dehn fahn di skripchaz eena di paragraaf giv yoo schrent?

⁶ Laik Paal, yoo eva bayg Jehoava fi get rid a wahn prablem weh yu mi-di fays? Maybi yu mi pray bowt di prablem wahn lata taim bot ih neva gaahn weh er maybi ih mi geh eevn wers. Praabli ih mi mek yu feel laik Jehoava noh hapi wid yu. If dat da di way yoo feel, rimemba Paal egzampl. Jos laik how Jehoava mi ansa Paal pryaaz, fi shoar Hihn wahn ansa fi yoo pryaaz tu! Jehoava mait noh get rid a di prablem. Bot wid fi hihn hoali spirit, hihn wahn giv yu di schrent weh yu need fi bayr op wen yu di fays prablemz. (Ps. 61:3, 4) Dehn mait ‘nak yu dong,ʼ bot Jehoava aalwayz deh wid yu.—2 Kor. 4:8, 9; Fil. 4:13.

7-8. (a) Eena weh way hoali spirit da laik di breez? (b) How Peeta mi diskraib di way hoali spirit werk?

⁷ Wat da wahn nada way how di hoali spirit ku help wi? Eena aynshent taimz, wahn sayla doz yooz di breez fi dairek ih ship tu wehpaat ih mi waahn goh, eevn if di see mi rof. Sayhn way soh, di hoali spirit ku help wi fi kantinyu serv Jehoava eevn wen wi fays prablemz, til wi sayf eena di nyoo werl weh Gaad pramis wi.

⁸ Bikaaz di apasl Peeta da-mi wahn fishaman, hihn mi noa wahn lat bowt how fi sayl wahn ship. Soh dis ku bee wan a di reezn wai wen Peeta mi-di taak bowt di hoali spirit, hihn mi yooz wahn ekspreshan weh moa dahn laikli ga fi du wid how wahn ship sayl. Hihn mi rait: ‘Di prafit dehn neva tink op dehn ting pahn dehn oan. Dehn mi anda di kanchroal a di hoali spirit wen dehn tel di mesij weh kohn  fahn Gaad.ʼ Di Greek werd weh chranslayt az “anda di kanchroal” meenz “kehr lang.”—2 Peet. 1:21; ftn., NW.

9. Weh Peeta mi waahn peepl tink bowt wen hihn mi rait dat ‘dehn mi anda di kanchroal a di hoali spiritʼ?

⁹ Weh Peeta mi waahn peepl tink bowt wen hihn mi rait dat ‘dehn mi anda di kanchroal a di hoali spiritʼ? Look mi yooz wahn simila Greek werd eena wahn nada way eena di buk a Aks. Hihn mi yooz it fi diskraib wahn ship weh geh ‘kehr langʼ bai di breez. (Aks 27:15) Wahn Baibl teecha mi seh dat wen Peeta mi rait dat di Baibl raita dehn mi deh “anda di kanchroal” a di hoali spirit, hihn mi yooz da ekspreshan fi mek peepl tink bowt wahn ship weh di sayl. Peeta mi-di seh dat jos laik how di breez kehr wahn ship tu wehpaat di sayla waahn goh, da rait soh Gaad hoali spirit mi dairek di Baibl raita dehn fi du dehn werk. Di sayhn Baibl teecha weh wi mi menshan erliya mi seh: “Di Baibl raita dehn da-mi laik wahn ship weh ga dehn sayl oapm.” Dehn mi redi fi du di werk weh di hoali spirit mi dairek dehn fi du. Jehoava mi du weh hihn mi need fi du; hihn giv dehn di “breez” er hoali spirit. Ahn di Baibl raita dehn mi fala di dairekshan a di hoali spirit.

10-11. Weh too tingz wi need fi du fi mek shoar dat di hoali spirit ku dairek wi? Pleez eksplayn yu ansa.

¹⁰ Af koars, tudeh, Jehoava noh yooz ih hoali spirit fi mek man rait buks a di Baibl agen. Bot Jehoava stil yooz ih hoali spirit fi dairek ih servant dehn. Hihn stil di du ih paat. How wi ku mek shoar dat di hoali spirit di dairek wi? Wi need fi du wi paat. How wi ku du dat?

¹¹ Tink bowt dis egzampl. If wahn sayla waahn help fahn di breez, ih haftu du too tingz. Fos, ih haftu styaa di ship eena di dairekshan weh di breez di bloa. Bikaaz di ship neva mi wahn moov if ih mi stay da  di dak wehpaat di breez noh di bloa. Sekant, ih need fi oapm ih sayl az moch az ih kud. Af koars, eevn if di breez di bloa, di ship wahn onli moov faawod if di breez kech eena di sayl. Soh, onli wid di help a Jehoava hoali spirit wi ku kantinyu serv hihn. Wi haftu du too tingz fi mek wi ku benifit fahn di hoali spirit. Fos, wi haftu du tingz weh Gaad spirit dairek ih servant dehn fi du. Sekant, wi need fi “oapm wi sayl” ahn du di bes wi kud fi serv Jehoava. (Ps. 119:32) If wi du dis wail wi wayt fi Jehoava nyoo werl, fi hihn hoali spirit wahn gi wi di schrent fi stay faytful ahn fi kantinyu serv ahn.

12. Weh wi wahn diskos now?

¹² Soh faar wi don diskos too wayz how di hoali spirit help wi. (1) Hoali spirit gi wi powa, an ih help wi fi stay faytful wen wi di deel wid chraiyalz. An (2) ih dairek ahn help wi fi du di werk weh Jehoava waahn wi du, an if wi du dat wi ku liv fareva. Now wi wahn diskos foa tingz weh wi need fi du fi get az moch help az pasabl fahn Gaad hoali spirit.

13. Akaadn tu 2 Timoti 3:16, 17, weh di Skripchaz ku du fi help wi, bot weh wee haftu du?

¹³ Fos, stodi Gaad Werd. (Reed 2 Timoti 3:16, 17.) Gaad mi yooz fi hihn hoali spirit fi mek di Baibl raita dehn “rait dong aal weh dehn don rait eena ih Skripcha.” Wen wi reed di Baibl ahn meditayt pahn weh wi reed, wi di alow Gaad inschrokshanz fi afek di way wi tink ahn di way how wi feel. Ih wahn help wi fi mek chaynjiz eena wi laif soh dat wi ku pleez Jehoava. (Heeb. 4:12) Bot fi mek Jehoava hoali spirit gaid wi, wi haftu tek taim fi stodi di Baibl regyula ahn meditayt pahn weh wi reed. Den Gaad Werd wahn afek evriting weh wi seh ahn du.

14. (a) Wai wi ku seh dat Jehoava hoali spirit deh da di meetin dehn? (b) Weh wi need fi du da wi meetin dehn fi get az moch help az pasabl fahn Gaad hoali spirit?

¹⁴ Sekant, wership Gaad tugeda. (Ps. 22:22) Jehoava hoali spirit deh da di meetin dehn. (Rev. 2:29) Wai wi ku seh dat? Bikaaz wen wi meet fi wership wid wi bradaz ahn sistaz, wi pray fi hoali spirit, wi sing sohn Kingdom sang weh bays pahn Gaad Werd, ahn wi lisn tu inschrokshanz fahn di bradaz weh di hoali spirit mi apoint. Ahn da sayhn hoali spirit help di sistaz pripyaa ahn diliva dehn paats fi di meetin. Fi mek Jehoava hoali spirit dairek wi, wi need fi pripyaa wahn koment fi di meetin. Da way, wen wi deh da meetin, wi wahn redi fi geh dairekshan fahn di hoali spirit jos laik wahn ship wid ih sayl oapm.

15. How di hoali spirit help wi eena di minischri?

¹⁵ Terd, wi need fi preech. Wen wi yooz di Baibl fi preech ahn teech wi di alow Gaad hoali spirit fi help wi eena di minischri. (Roam. 15:18, 19) Fi mek Gaad hoali spirit ku dairek wi, wi haftu preech regyula ahn yooz di Baibl weneva wi kud. Wen wi yooz di sampl prezentayshan fahn di Laif ahn Minischri Meetin Werkbuk wi ku ga beta kanvasayshanz wid peepl wen wi preech.

16. Weh da di moas dairek way wi ku geh hoali spirit?

¹⁶ Foat, pray tu Jehoava. (Mach. 7:7-11; Look 11:13) Di moas dairek way wi ku geh hoali spirit da wen wi aks Jehoava fi it eena pryaa. Notn ku stap wi pryaa fahn reech Jehoava er stap wi fahn geh Gaad hoali spirit. Hoali spirit ku help wi eevn wen wi deh eena prizn, ahn Saytan kyaahn du notn fi stap wi fahn geh hoali  spirit. (Jay. 1:17) How wi need fi pray soh dat Gaad hoali spirit ku help wi? Fi ansa da kweschan, mek wi laan bowt pryaa fahn di iloschrayshan weh deh eena di buk a Look. *

17. Weh Jeezas iloschrayshan da Look 11:5-9, 13 teech wi bowt pryaa?

¹⁷ Reed Look 11:5-9, 13. Jeezas iloschrayshan shoa wi how wi fi pray fi hoali spirit. Eena di iloschrayshan, di man mi geh weh ih mi need bikaaz ih mi ‘stay di nak ahn nak, an ih neva giv op.ʼ Hihn neva frayd fi aks ih fren fi help eevn doa da mi layt eena di nait. (Si di stodi noat pahn Look 11:8, NW) Weh Jeezas iloschrayshan teech wi bowt pryaa? Hihn seh: “Stay di aks ahn unu wahn geh; stay di luk ahn unu wahn fain; stay di nak pahn di doa ahn ih wahn oapm fi unu.” Soh, wat da di lesn fi wi? Fi geh help fahn di hoali spirit, wi shuda neva stap pray far it.

18. Akaadn tu Jeezas iloschrayshan, wai wi ku bee shoar dat Jehoava wahn gi wi hoali spirit?

¹⁸ Jeezas iloschrayshan aalso help wi fi si wai Jehoava wahn gi wi hoali spirit. Di man eena di iloschrayshan mi waahn tek gud kyaa a ih ges. Hihn mi feel laik ih mi haftu giv food tu ih vizitaz weh mi kohn vizit ahn layt da nait, bot hihn neva ga notn fi aafa. Jeezas mi seh dat di man nayba mi giv di man di bred bikaaz hihn mi kip aan di aks far it. Wat da-mi Jeezas point? If wahn imperfek hyooman mi wilin fi help wahn nayba weh kip di aks, wi ku bee shoar dat Jehoava, wi hevnli Faada, wahn help dehn wan weh kip aan di aks fi di hoali spirit! Soh, wee ku bee shoar dat Jehoava wahn ansa wi pryaa wen wi aks ahn fi ih hoali spirit.—Ps. 10:17; 66:19.

19. Wai wi ku bee shoar dat wee wahn ku bayr op tu di en?

¹⁹ Wi ku bee shoar dat wee wahn ku bayr op eevn doa Saytan wahn neva stap atak wi. Wai? Bikaaz hoali spirit help wi eena too wayz. Fos, ih gi wi di powa weh wi need fi bayr op wen wi fays prablemz. Sekant, wail wi wayt fi di nyoo werl, ih gi wi di powa weh wi need fi kantinyu serv Jehoava. Soh mek wi mek op wi main fi du az moch az pasabl fi geh Gaad hoali spirit!