1-2. (a) Unsay makatabang nato sa paglahutay sa matag adlaw? Ipatin-aw. (b) Unsay atong hisgotan niining artikuloha?

“DIHANG maghunahuna ko sa pagsulay nga akong nalahutay, makaingon ko nga dili gyod to nako mahimo kon ako ra.” Nakasulti ka na bag ingon niana? Daghan kanato ang nakaingon ug sama niana. Tingali imo nang nasulti human nimo palandonga kon sa unsang paagi nakalahutay ka sa grabeng sakit o sa kamatayon sa usa ka minahal. Gibati nimo nga nakalahutay ka sa matag adlaw tungod kay ang balaang espiritu ni Jehova naghatag nimog “gahom nga labaw sa kasarangan.”​—2 Cor. 4:7-9.

² Gikinahanglan sab nato ang balaang espiritu sa pagsukol sa impluwensiya niining daotang kalibotan. (1 Juan 5:19) Dugang pa, kinahanglan tang makigbisog batok sa “daotang espiritung mga puwersa.” (Efe. 6:12) Busa hisgotan nato ang duha ka paagi nga ang balaang espiritu makatabang sa pag-atubang niining mga problemaha. Dayon, hisgotan nato kon unsay atong mahimo aron bug-os nga makabenepisyo sa balaang espiritu.

3. Unsa ang usa ka paagi nga si Jehova nagtabang kanato sa paglahutay sa mga pagsulay?

³ Ang balaang espiritu ni Jehova motabang kanato pinaagi sa paghatag nato sa gahom, o kusog, sa pagtuman sa atong mga responsibilidad bisan pa sa mga kalisdanan. Gibati ni apostol Pablo nga nakapadayon siya sa pag-alagad bisan pa sa mga kalisdanan tungod kay misalig siya sa “gahom sa Kristo.” (2 Cor. 12:9) Panahon sa iyang ikaduhang misyonaryong panaw, si Pablo wala lang mogugol ug daghang panahon sa pagsangyaw kondili nagtrabaho pod siya aron masuportahan ang iyang kaugalingon. Samtang didto si Pablo sa Corinto, siya miestar sa balay ni Aquila ug Priscila, kinsa mga tighimog tolda. Kay parehas silag trabaho, siya  motrabahog pipila ka adlaw uban kanila. (Buh. 18:1-4) Ang balaang espiritu naghatag kang Pablo ug kusog sa pagtrabaho ug sa pagtuman sa iyang ministeryo.

4. Sumala sa 2 Corinto 12:7b-9, unsay kalisdanan ni Pablo?

⁴ Basaha ang 2 Corinto 12:7b-9. Niining tekstoha, unsay gipasabot ni Pablo dihang miingon siya nga duna siyay “tunok sa unod”? Kon matunok ka, mag-antos ka sa kasakit. Busa gipasabot ni Pablo nga nag-atubang siyag usa ka matang sa kasakit. Giisip niya kini nga “samag anghel ni Satanas” nga nagsigeg ‘sagpa’ (‘bunal,’ footnote) kaniya. Tingali, si Satanas o ang mga demonyo dili maoy direktang nagpahinabo sa kalisdanan ni Pablo, nga samag nagbutang sa tunok diha sa iyang unod. Pero, dihang nakita nianang daotang mga espiritu ang “tunok,” tingali ila ning giduot, ingnon ta, aron mosamot ang pag-antos ni Pablo. Unsay gibuhat ni Pablo?

5. Unsay tubag ni Jehova sa mga pag-ampo ni Pablo?

⁵ Sa sinugdan, gusto ni Pablo nga mawala ang maong “tunok.” Siya miingon: “Katulo ko mihangyo sa Ginoo [kang Jehova] . . . nga mawala na unta kini kanako.” Bisan pa sa mga pag-ampo ni Pablo, ang tunok sa unod nagpabilin. Pero wala kini magpasabot nga wala dungga ni Jehova ang mga pag-ampo ni Pablo. Gidungog niya kini. Wala kuhaa ni Jehova ang kalisdanan, pero gihatagan niya si Pablo ug kusog aron makalahutay niini. Si Jehova miingon: “Mas kusgan ang akong gahom dihang huyang ka.” (2 Cor. 12:8, 9) Sa tabang sa Diyos, si Pablo nakapabiling malipayon ug kalmado!​—Filip. 4:4-7.

6. (a) Sa unsang paagi kaha tubagon ni Jehova ang imong mga pag-ampo? (b) Unsa nga mga pasalig diha sa mga teksto nga gihisgotan sa parapo ang makahatag nimog kusog?

⁶ Sama kang Pablo, mihangyo ka na ba kang Jehova nga kuhaon ang usa ka kalisdanan? Kon ang kalisdanan nagpabilin gihapon​—o misamot pa gani—​bisag nagsige kag hangyo, naghunahuna ka ba nga basig wala malipay si Jehova kanimo? Kon mao, hinumdomi si Pablo. Sama nga gitubag ni Jehova ang mga pag-ampo ni Pablo, seguradong tubagon sab Niya ang imong mga pag-ampo! Tingali, dili kuhaon ni Jehova ang imong kalisdanan. Pero pinaagi sa balaang espiritu, hatagan ka niya sa kusog nga imong gikinahanglan sa paglahutay sa kalisdanan. (Sal. 61:3, 4) Tingali ‘matumba’ ka, pero dili ka niya biyaan.​—2 Cor. 4:8, 9; Filip. 4:13.

7-8. (a) Sa unsang paagi ang balaang espiritu nahisama sa hangin? (b) Unsay giingon ni Pedro bahin sa paglihok sa balaang espiritu?

⁷ Unsay laing paagi nga tabangan ta sa balaang espiritu? Sama sa paborableng hangin diha sa unoson nga kadagatan, ang balaang espiritu motabang nato nga makalabang sa samag bagyo nga mga kalisdanan aron luwas nga makaabot sa bag-ong kalibotan nga gisaad sa Diyos.

⁸ Kay mangingisda si apostol Pedro, anad siya sa paglawig. Busa makapainteres ang iyang giingon bahin sa paglihok sa balaang espiritu. Migamit siyag ekspresyon nga lagmit konektado sa paglawig. Siya misulat: “Walay tagna sukad nga midangat pinaagi sa kabubut-on sa tawo, apan ang mga tawo nagsulti sa mensahe sa Diyos samtang sila gigiyahan sa balaang espiritu.” Ang Gregong pulong nga gihubad ug “gigiyahan” sa literal nagkahulogan ug “giagak,” o gidala.​—2 Ped. 1:21; footnote.

9. Unsay gustong ihulagway ni Pedro dihang migamit siya sa ekspresyong “giagak,” o gidala?

⁹ Unsay gustong ihulagway ni Pedro dihang migamit siya sa ekspresyong “giagak,” o gidala? Si Lucas, ang magsusulat sa Buhat, migamit ug susamang Gregong pulong sa paghisgot bahin sa barko nga “gipadpad,” o giduso, sa hangin. (Buh. 27:15) Busa dihang miingon si Pedro nga ang mga magsusulat sa Bibliya “giagak,” o gidala, siya migamit ug ekspresyon nga makapahunahuna sa mga tawo bahin sa paglawig, matod pa  sa usa ka eksperto sa Bibliya. Buot ingnon ni Pedro nga samag barko nga giduso sa hangin aron makaabot sa destinasyon, ang mga propeta ug magsusulat sa Bibliya gigiyahan sa balaang espiritu aron molampos sa ilang asaynment. Ang maong eksperto miingon: “Sama rag gibukhad sa mga propeta ang ilang layag.” Gihimo ni Jehova ang kinahanglan niyang buhaton. Iyang gitagana “ang hangin,” o balaang espiritu. Ang mga magsusulat sa Bibliya mihimo sa kinahanglan nilang buhaton. Nagpagiya sila sa maong espiritu.

10-11. Unsang duha ka butang ang kinahanglan natong himoon aron maseguro nga giyahan ta sa balaang espiritu? Iilustrar.

¹⁰ Siyempre, natapos na ang pagsulat sa mga basahon sa Bibliya. Pero gigamit gihapon ni Jehova ang balaang espiritu sa paggiya sa iyang mga alagad. Gihimo gihapon ni Jehova ang kinahanglan niyang buhaton. Sa unsang paagi makabenepisyo ta sa balaang espiritu sa Diyos? Angay natong seguroon nga padayon natong himoon ang kinahanglan natong buhaton. Sa unsang paagi?

¹¹ Hunahunaa kini nga pananglitan. Aron makabenepisyo sa hangin, dunay duha ka butang nga kinahanglang himoon sa tiglawig. Una, iyang ipaapupa sa hangin ang barko. Dili moabante ang barko kon ang tiglawig magpabilin sa pantalan nga dili apupa sa hangin. Ikaduha, kinahanglan niyang bukharon pag-ayo ang layag. Siyempre, bisag naghuros ang hangin, moabante lang ang barko kon ang layag maigo sa hangin. Sa susama, makalahutay lang ta sa pag-alagad kang Jehova kon tabangan ta sa balaang espiritu. Aron makabenepisyo ta sa balaang espiritu, dunay duha ka butang nga kinahanglan natong himoon. Una, kinahanglan tang “magpaapupa” sa balaang espiritu pinaagi sa pagpakigbahin sa mga buluhaton nga gipahimo niana. Ikaduha, kinahanglan natong “bukharon ang atong mga layag” kutob sa mahimo pinaagi sa bug-os nga pagpakigbahin niana nga mga buluhaton kutob sa atong maarangan. (Sal. 119:32) Kon buhaton nato kana, iduso ta sa balaang espiritu aron atong malatas ang mga balod sa paglutos ug kalisdanan ug tabangan ta  nga magmatinumanon samtang naglawig paingon sa bag-ong kalibotan.

12. Unsay atong hisgotan karon?

¹² Ato nang nahisgotan ang duha ka paagi nga ang balaang espiritu nagtabang kanato. Ang balaang espiritu naghatag natog kusog ug nagtabang nato nga makapabiling matinumanon bisan pa sa mga kalisdanan. Ang balaang espiritu naggiya ug nagtabang sab kanato nga makapabilin sa dalan paingon sa kinabuhing walay kataposan. Karon atong hisgotan ang upat ka butang nga kinahanglan natong himoon aron bug-os nga makabenepisyo sa balaang espiritu.

13. Sumala sa 2 Timoteo 3:16, 17, unsay puwedeng himoon sa Kasulatan alang kanato, pero unsay kinahanglan natong buhaton?

¹³ Una, tun-i ang Pulong sa Diyos. (Basaha ang 2 Timoteo 3:16, 17.) Ang Gregong pulong nga gihubad ug “gisulat pinaagi sa paggiya sa Diyos” sa literal nagpasabot ug “gihuypan sa Diyos.” Gigamit sa Diyos ang iyang espiritu aron ibutang ang iyang hunahuna sa hunahuna sa mga magsusulat sa Bibliya. Dihang atong basahon ang Bibliya ug pamalandongon ang atong nabasa, ang mga instruksiyon sa Diyos mosulod sa atong hunahuna ug kasingkasing. Kini magpalihok kanato sa pagpahiuyon sa atong kinabuhi sa kabubut-on sa Diyos. (Heb. 4:12) Pero aron bug-os nga makabenepisyo sa balaang espiritu, kinahanglan tang maggahin ug panahon para sa regular nga pagtuon sa Bibliya ug pagpamalandong sa atong nabasa. Dayon, ang Pulong sa Diyos mag-impluwensiya sa tanan natong isulti ug buhaton.

14. (a) Nganong makaingon ta nga ang balaang espiritu naa sa atong mga tigom? (b) Sa unsang paagi makatambong ta sa mga tigom nga “bukhad ang mga layag”?

¹⁴ Ikaduha, makig-uban sa mga igsoon sa pagsimba sa Diyos. (Sal. 22:22) Ang espiritu ni Jehova anaa sa atong mga tigom. (Pin. 2:29) Nganong makaingon ta niana? Tungod kay dihang magtigom ta uban sa mga igsoon sa pagsimba sa Diyos, kita nag-ampo alang sa balaang espiritu, nagkantag mga awit sa Gingharian nga gibase sa Pulong sa Diyos, ug naminaw sa binase sa Bibliyang mga instruksiyon nga gipahayag sa mga brader nga gitudlo sa balaang espiritu. Ug ang mao gihapong balaang espiritu nagtabang sa mga sister sa pagpangandam ug paghatag sa ilang mga bahin. Pero aron bug-os makabenepisyo sa balaang espiritu, kinahanglan tang mangandam aron makakomento sa mga tigom. Nianang paagiha, mitambong ta sa mga tigom nga “bukhad ang mga layag.”

15. Sa unsang paagi ang balaang espiritu makatabang nato sa ministeryo?

¹⁵ Ikatulo, makigbahin sa pagsangyaw. Dihang gamiton nato ang Bibliya sa pagsangyaw ug pagpanudlo, atong gitugotan ang balaang espiritu nga motabang kanato sa ministeryo. (Roma 15:18, 19) Pero, aron bug-os nga makabenepisyo sa espiritu sa Diyos, kinahanglang regular kang mosangyaw ug gamiton ang Bibliya kon posible. Ang usa ka paagi nga mahimong mas malamposon ang imong ministeryo mao ang paggamit sa sampol nga mga pagpakig-estorya gikan sa Kinabuhi ug Ministeryo—Workbook sa Tigom.

16. Unsa ang labing direktang paagi nga mabatonan ang balaang espiritu?

¹⁶ Ikaupat, pag-ampo kang Jehova. (Mat. 7:7-11; Luc. 11:13) Ang labing direktang paagi nga mabatonan nato ang balaang espiritu mao ang pagpangayo niana kang Jehova diha sa pag-ampo. Seguradong makaabot kang Jehova ang atong mga pag-ampo ug makaabot sab kanato ang iyang espiritu. Walay makababag niana, bisan ang paril sa prisohan o bisan si Satanas. (Sant. 1:17) Unsaon nato pag-ampo aron bug-os nga makabenepisyo sa balaang espiritu? Aron matubag kana, susihon pa natog dugang ang bahin sa pag-ampo pinaagi sa pagkonsiderar sa  ilustrasyon nga mabasa lang diha sa Ebanghelyo ni Lucas. *

17. Unsay atong makat-onan bahin sa pag-ampo diha sa ilustrasyon ni Jesus sa Lucas 11:5-9, 13?

¹⁷ Basaha ang Lucas 11:5-9, 13. Gipakita sa ilustrasyon ni Jesus kon unsaon nato pag-ampo alang sa balaang espiritu. Sa ilustrasyon, nadawat sa tawo ang iyang gikinahanglan kay ‘nagsige siyag hangyo.’ Wala siya magpanuko sa pagpangayog tabang sa iyang amigo bisag gabii nang dako. * Sa unsang paagi gipadapat ni Jesus sa pag-ampo ang ilustrasyon? Siya miingon: “Padayon sa pagpangayo, ug kamo pagahatagan; padayon sa pagpangita, ug kamo makakaplag; padayon sa pagpanuktok, ug kamo pagaablihan.” Busa, unsay atong makat-onan niini? Aron madawat ang tabang sa balaang espiritu, kinahanglan tang magsigeg ampo bahin niini.

18. Sumala sa ilustrasyon ni Jesus, nganong makaseguro ta nga hatagan ta ni Jehova sa iyang balaang espiritu?

¹⁸ Ang ilustrasyon ni Jesus makatabang sab kanato nga masabtan kon nganong hatagan ta ni Jehova ug balaang espiritu. Ang tawo diha sa ilustrasyon gustong moatiman sa iyang bisita. Gibati niya nga kinahanglan niyang dalitan ug pagkaon ang iyang bisita nga gabii na kaayong miabot, pero wala siyay ikahatag. Si Jesus miingon nga ang silingan mihatag ug tinapay kay ang tawo nagsigeg hangyo. Unsay punto ni Jesus? Kon ang dili hingpit nga tawo andam motabang sa silingan nga nagsigeg hangyo, labaw na gyong motabang ang atong buotan nga Amahan sa langit niadtong magsigeg pangayo niya ug balaang espiritu! Busa, makaseguro ta nga tubagon ni Jehova ang atong pag-ampo alang sa balaang espiritu.​—Sal. 10:17; 66:19.

19. Nganong makaseguro ta nga modaog gyod ta?

¹⁹ Kita makaseguro nga modaog gyod ta bisan pa sa kanunayng paningkamot ni Satanas nga mapildi ta. Ngano? Tungod kay ang balaang espiritu motabang nato sa duha ka paagi. Una, maghatag ni natog kusog sa paglahutay sa mga kalisdanan. Ikaduha, kini ang puwersa nga “mopuno sa atong mga layag,” nga motabang kanato sa pagpadayon sa pag-alagad kang Jehova hangtod nga makaabot ta sa bag-ong kalibotan. Hinaot nga maningkamot ta aron bug-os nga makabenepisyo sa tabang sa balaang espiritu!