1-2. (a) Met a álisikich le likiitú rán me rán? Áweweei. (b) Met sipwe pwóróus wóón lón ei lesen?

“LUPWEN ua chemeni usun eú sóssót ua fen kúna, ua silei pwe use tongeni likiitú fan ren pwisin ai péchékkúl.” Ka fen piin eáni ena esin memmeef? Chómmóng kich sia pwal eáni ena memmeef. Neman ka likiitú fán eú semmwen mi chou are málóón attongeom. Lupwen ka ekieki ena sóssót, ka meefi pwe ka chék tongeni likiitú rán me rán ren álillisin án Jiowa we ngún mi fel mi awora ngonuk ewe “tufich mi somwola.”​—2 Kor. 4:7-9.

² Sia pwal lúkúlúk wóón álillisin ewe ngún mi fel lón ach ú ngeni etipetipaen ei fénúfan mi ngaw. (1 Joh. 5:19) Pwal och, sia maun ngeni ekkewe “ngun ingau” are chónláng mi ngaw. (Ef. 6:12, TF) Ren meinisin ekkeei sókkun sóssót, sipwe pwóróus wóón ruu alen án ewe ngún mi fel álisikich. Mwirin, sipwe pwóróus wóón met sia tongeni féri pwe sipwe tongeni unusen kúna álillis seni án Kot we ngún mi fel.

3. Ifa eú alen án Jiowa álisikich le likiitú?

³ Án Jiowa we ngún mi fel a álisikich ren an apéchékkúlakich pwe sipwe tongeni apwénúetá wisach kewe inaamwo ika sia nóm fán sóssót. Aposel Paulus a meefi pwe a tongeni sópweló lón an angang ngeni Jiowa fán sókkopaten sóssót pokiten a lúkúlúk wóón “ewe manamanen Kraist.” (2 Kor. 12:9) Lón án Paulus we oruuen sái lón an angangen misineri, i ese chék angang weires lón ewe angangen afalafal, nge a pwal pwisin atufichi manawan lón pekin aion. A nónnóm lón Korint lón imwen Akwila me Prisila. Iir chón ffér tento. Iwe, pokiten Paulus a pwal eáni ena sókkun angang, a angang part-time ren chókkana. (Föf. 18:1-4) Ewe ngún mi fel a ngeni Paulus ewe péchékkúl pwe epwe tongeni apwénúetá wisan lón an angangen afalafal me lón an eáni angangen moni pwe epwe atufichi manawan.

4. Ifa án Paulus we osukosuk me ren 2 Korint 12:7b-9?

 ⁴ Álleani 2 Korint 12:7b seni ewe footnote, * 8-9. Lón ei wokisin, met weween alon Paulus we lupwen a apasa pwe a weires ren ‘efoch fölun ira lon fitukan’? Ika efóch félún irá a sapolong lón inisum, kopwe fókkun metek. Ina minne Paulus a apasa pwe a kúna och osukosuk mi ámmetek. A erá pwe an na osukosuk a usun chék án “emon chon kuno seni Satan” ‘ninni’ i. Neman Satan me néún kewe chónláng mi ngaw rese wisen purelong ewe félún irá lón futukan are rese efisi án Paulus osukosuk. Nge lupwen ekkewe chónláng mi ngaw ra kúna pwe a wor án Paulus osukosuk are “fölun ira,” iwe neman ra achocho le alapaaló an riáfféú ren an we osukosuk. Met Paulus a féri?

5. Ifa usun Jiowa a pélúweni án Paulus kewe iótek?

⁵ Akkomwan, Paulus a mochen epwe úttawu ewe “fölun ira.” A erá: “Fän ülüngat üa iotek ngeni ach Samol [Jiowa] . . . pwe epwe angei seniei.” Nge inaamwo ika Paulus a iótek, nge mi chúen nóm ren ewe félún irá lón futukan. A itá wewe ngeni pwe Jiowa ese pélúweni án Paulus kewe iótek? Esap ina weween. Jiowa a fen pélúweniir. Jiowa ese amóeló ewe osukosuk, nge a ngeni Paulus ewe péchékkúl pwe epwe tongeni likiitú. Jiowa a erá: “Ai manaman a fokun unusöchüla lon om apwangapwang.” (2 Kor. 12:8, 9) Me ren án Kot álillis, Paulus a tongeni amwéchú an pwapwa me kinamween letipan!​—Fil. 4:4-7.

6. (a) Ifa usun Jiowa a pélúweni ach kewe iótek? (b) Menni kapasen alúkúlúk lón ekkeei wokisin mi mak lón ei parakraf a apéchékkúlok?

⁶ Ka fen tingormaú ngeni Jiowa an epwe angasok seni och sóssót usun chék Paulus? Neman ka fen tittingor án Kot álillis nge ese pwák óm we osukosuk are a fen mwo nge lapóló. Iwe, ka fen lólilen pwe neman Kot ese pwapwa reom? Ika ina, chechchemeni pwóróusen Paulus. Jiowa a pélúweni an kewe iótek, iwe epwe pwal fókkun pélúweni óm kewe iótek! Neman Jiowa esap amóeló óm kewe osukosuk. Nge ren an we ngún mi fel, epwe ngonuk ewe péchékkúl mi lamot pwe kopwe tongeni likiitú fán ewe sóssót. (Kölf. 61:3, 4) Neman kopwe “kufula,” nge Jiowa esap likitukoló.​—2 Kor. 4:8, 9; Fil. 4:13, TF.

7-8. (a) Ifa usun ewe ngún mi fel a usun chék enienin ásepwál? (b) Ifa usun Petrus a áweweei angangen ewe ngún mi fel?

⁷ Ifa pwal eú alen án ewe ngún mi fel álisikich? Ewe ngún mi fel a usun chék enienin ewe ásepwál. Enienin ewe ásepwál a tongeni amwékútú ewe waseres pwe epwe tongeni tori ewe leeni epwe ló ie fán núkúnúkéch inaamwo ika a lóngaw. Pwal ina chék usun, ewe ngún mi fel a tongeni álisikich ach sipwe akkangang ngeni Jiowa fán sókkopaten sóssót tori ewe ótót sefé a fen pwonei.

⁸ Aposel Petrus a eéreni le sái wóón waseres pokiten i emén chón attau. Neman ina ewe popun a néúnéú ewe itiitin kapas mi weneiti án aramas sái wóón waseres lupwen a áweweei angangen ewe ngún mi fel. A makkeei: “Pun esap wor och kapasen osuni a feito seni letipen aramas, nge ekewe aramas ra nom fän nemenien ewe Ngünmifel ra apasatä ewe kapas a feito seni Kot.” Ewe kapasen Krik mi afféú ngeni “nom fän nemenien” a wesewesen wewe ngeni “och mettóch a amwékútú.”​—2 Pet. 1:21; ftn, NW.

9. Met sia tongeni kachitoni seni án Petrus néúnéú ewe itiitin kapas “och mettóch a amwékútú”?

⁹ Met sia tongeni kachitoni seni án Petrus néúnéú ewe itiitin kapas “och mettóch a amwékútú”? Lukas, ewe mi makkeei ewe puken Föför, a néúnéú pwal eú kapasen Krik mi léllé ngeni ena itiitin kapas lupwen a fós usun efóch siip mi “maanula ren” ewe ásepwál. (Föf. 27:15) Ina minne, lupwen Petrus a makkeei pwe  “och mettóch a amwékútú” ekkewe soumakken Paipel, emén soukáé usun Paipel a erá pwe Petrus a néúnéú eú kapas áwewe mi amwarar mi weneiti ekkewe siip lemataw. Ren och itiitin, Petrus a áweweei pwe ewe ngún mi fel a amwékútú ekkewe soufós me soumakken Paipel pwe repwe tongeni apwénúetá wiser, usun chék án enienin ewe ásepwál amwékútú ewe siip ngeni ewe leeni epwe ló ie. Iei pwal alon ena soukáé: “Lón kapas áwewe, ekkewe soufós ra éúraatá ar kewe amara.” Mwirin Jiowa a féri wisan. A awora ewe “ásepwál” are an we ngún mi fel. Iwe, ekkewe soumakken Paipel ra féri wiser ren ar fiti emmwenien ena ngún mi fel.

10-11. Ikkefa ekkewe ruu mettóch mi lamot sipwe féri pwe ewe ngún mi fel epwe tongeni emmwenikich? Eáni eú kapas áwewe.

¹⁰ Pwúngún pwe lón ei fansoun, Jiowa ese chúen áeá an we ngún mi fel le atufichi aramas le makkeei ekkewe puken Paipel. Nge Jiowa a chúen áeá an we ngún mi fel le emmweni néún kewe chón angang. Jiowa a chúen féri wisan. Ifa usun sipwe tongeni kúna álillis seni án Kot we ngún mi fel? Mi lamot sipwe féri wisach. Ifa usun sipwe féri ena?

¹¹ Ekieki usun ei kapas áwewe. Ren án enienin ewe ásepwál epwe amwékútú ewe waseres, mi lamot pwe ewe pélú epwe féri ruu mettóch. Áeúin, mi lamot epwe ámisini waan we ikewe mi enien ásepwál ie. Pwúngún pwe waan we waseres esap tongeni mwékút ika a chék nóm ren ewe oroor towau seni ikewe a enien ewe ásepwál ie. Oruuan, mi lamot án ewe pélú epwe éúraatá me unusen ámeresaaló amaran waan we. Ikaamwo a eniló ewe ásepwál, nge waan we epwe chék tongeni mwékút ika amaran kewe ra meefi pépéén ewe ásepwál. Pwal ina chék usun, sipwe tongeni chék sópweló le akkangang ngeni Jiowa ika sia angei álillisin an we ngún mi fel. Ren ach sipwe kúna álillis seni, mi lamot sipwe féri ekkeei ruu mettóch. Áeúin, mi lamot sipwe féri met án Kot we ngún mi fel a emmweni néún kewe chón angang ar repwe féri. Oruuan, mi lamot sipwe éúraatá ekkewe amara me unusen  ámeresaaló ren ach unusen fiti ekkena angang ren úkúkún ach tufich. (Kölf. 119:32) Lupwen sia féri ekkena mettóch, ewe ngún mi fel a tongeni ngenikich ewe péchékkúl pwe sipwe tongeni akkangang ngeni Jiowa fán tuppwél tori ewe ótót sefé.

12. Met sipwele káé iei?

¹² Sia fen pwóróus usun ruu alen án ewe ngún mi fel tongeni álisikich. Ewe ngún mi fel a ngenikich péchékkúl me álisikich le akkamwéchú ach tuppwél fán sóssót. Ewe ngún mi fel a pwal emmwenikich me álisikich le féri ewe angang Jiowa a mochen ach sipwe féri, epwe atoto manaw esemuch. Iei, sipwele káé rúáánú mettóch mi lamot sipwe féri ren ach sipwe unusen kúna álillis seni án Kot we ngún mi fel.

13. Me ren 2 Timoty 3:16, 17, met ewe Paipel a tongeni féri fán itach, nge met a lamot sipwe féri?

¹³ Áeúin, káé án Kot we Kapas. (Álleani 2 Timoty 3:16, 17.) Ewe kapasen Krik mi afféú ngeni “pop seni Ngünun Kot” a wesewesen wewe ngeni “Kot a usalong are ngaseraalong.” Kot a áeá an we ngún me fel pwe epwe ngaseraalong an ekiek lón ekiekin ekkewe soumakken Paipel. Lupwen sia álleani ewe Paipel me ekilonei minne sia álleani, sia etiwaalong án Kot kewe kapasen éúréúr lón ekiekich me letipach. Ekkena ekiek seni Kot ra amwékútúkich le etipeeúfengeni manawach ngeni letipan. (Ipru 4:12) Nge ren ach sipwe unusen kúna álillisin án Kot we ngún mi fel, mi lamot sipwe awora fansoun le káé Paipel iteitan me ekilonei minne sia álleani. Iwe, án Kot we Kapas epwe tongeni emmweni meinisin ach féffér me kapas.

14. (a) Pwata án Kot we ngún mi fel a nónnóm lón án Chón Kraist kewe mwich? (b) Met epwe álisikich le unusen kúna álillisin án Kot we ngún mi fel atun ach kewe mwich?

¹⁴ Oruuan, mwichfengen le fel ngeni Kot. (Kölf. 22:22) Lón án Chón Kraist kewe mwich, me ikena ie a enien ásepwál ie lón kapas áwewe, are án Jiowa we ngún mi fel a nónnóm ie. (Pwär. 2:29) Pwata sia tongeni apasa ena? Pokiten lupwen sia mwichfengen me chienach kewe Chón Kraist, sia tingorei Kot an we ngún mi fel, sia eáni ekkewe kélún mwich mi lóngólóng wóón án Kot we Kapas, me sia aúseling ngeni ekkewe kapasen emmwen seni Paipel mi katowu seni pwiich kewe mi fen kefilitá ren ewe ngún mi fel. Pwal eú, ena ngún mi fel a álisi chienach kewe fefin le ammólnatá me eáni ar kewe kinikin lón mwich. Iwe nge, ren ach sipwe unusen kúna álillis seni án Kot we ngún mi fel, mi lamot sipwe ammólnatá fán iten ach kewe mwich pwe sipwe tongeni uwawu meefiach. Ika sia féri ena, iwe lupwen sia nóm lón mwich, sia pwal mmólnetá le kúna álillisin án Kot we ngún mi fel usun chék án amaran ekkewe waseres unusen meresiló.

15. Ifa usun án Kot we ngún mi fel a álisikich lón ach angangen afalafal?

¹⁵ Aúlúngátin, fiffiti ewe angangen afalafal. Lupwen sia néúnéú ewe Paipel lón ach angangen afalafal me asukula aramas, sia mut ngeni án Kot we ngún mi fel epwe álisikich lón ach angang. (Rom 15:18, 19) Iwe nge, ren ach sipwe unusen kúna álillisin ewe ngún mi fel, mi lamot sipwe fiti ena angang iteitan me néúnéú ewe Paipel iteitan a suuk ngenikich. Sia tongeni ámúrinnééló ach pwóróusfengen me aramas ren ach áeá ekkewe álillis seni ewe Alen Pwóróusfengen lón ach Manawach me Ach Angangen Afalafal Minen Káé fán Iten Mwich.

16. Ifa ákkáeúin alen ach sipwe tongeni angei án Kot we ngún mi fel?

¹⁶ Arúáánún, iótek ngeni Jiowa. (Mat. 7:7-11; Luk. 11:13) Ewe ákkáeúin alen ach sipwe tongeni angei ewe ngún mi fel, ina ren ach sipwe tingorei Jiowa lón iótek. Ese wor och mettóch a tongeni eppeti touren ach kewe iótek ngeni Jiowa, are eppetikich le angei an we ngún mi fel. Ewe ngún mi fel a tongeni álisikich pwal  mwo nge atun sia nóm lón kalapus, me Satan esap pwal tongeni eppeti ach sipwe angei ewe ngún mi fel. (Jas. 1:17) Ifa usun sipwe iótek pwe sipwe unusen kúna álillisin ewe ngún mi fel? Sipwe káé usun ei mettóch iótek seni eú kapas áwewe mi chék mak lón Lukas ewe puken Kapas Allim. *

17. Ifa ewe lesen usun iótek sia tongeni káé seni án Jesus kapas áwewe mi mak lón Lukas 11:5-9, 13?

¹⁷ Álleani Lukas 11:5-9, 13. Án Jesus kapas áwewe a áiti ngenikich ifa usun sipwe iótek fán iten án Kot we ngún mi fel. Lón ena kapas áwewe, ewe mwán a angei met a osupwang ren ‘pun ese säw le tütüngormau.’ Ese pireir le tingor án chiechian we álillis inaamwo ika a fen pwinimaw. * Ifa usun Jesus a eriri ena kapas áwewe ngeni iótek? A erá: “Oupwe tütüngor, iwe, oupwe angei, oupwe küküt, iwe, oupwe künakün, oupwe fichifich, iwe, epwe wor asam mi suk ngenikemi.” Iwe, ifa ewe lesen fán itach? Ren ach sipwe angei ewe ngún mi fel, mi lamot ach sipwe tittingor ngeni Kot fán itan.

18. Pwata sia tongeni lúkúlúk pwe Jiowa epwe fang ngenikich an we ngún mi fel, usun met án Jesus we kapas áwewe a áiti ngenikich?

¹⁸ Án Jesus we kapas áwewe a pwal álisikich le kúna pwata Jiowa epwe fang ngenikich an we ngún mi fel. Ewe mwán lón ewe kapas áwewe a mochen awasélaéchú néún we waséla mi wareiti inaamwo ika a fókkun pwinimaw. A fókkun mochen amwéngééni nge ese wor anan. Jesus a erá pwe chón órun ena mwán we a álisi pokiten ese fangetá le tingorei pilawa. Met Jesus a mochen áiti ngenikich? Ika emén aramas ese unuséch a tipemecheres le álisi emén chón órun ese fangetá le tingor álillis, iwe epwele fen ifan me tipemecheresin Semach we lón láng mi kirekiréch le álisi chókkewe mi tittingormaú ngeni an we ngún mi fel! Iwe sia tongeni lúkúlúk pwe Jiowa epwe pélúweni ach kewe iótek atun sia tingor an we ngún mi fel.​—Kölf. 10:17; 66:19.

19. Pwata sia tongeni lúkúlúk pwe sipwe tongeni likiitú?

¹⁹ Sia tongeni lúkúlúk pwe sia tongeni likiitú fán án Satan mammaunekich. Pwata? Pún án Kot we ngún mi fel a álisikich lón ruu mettóch. Áeúin, a ngenikich ewe péchékkúl mi lamot pwe sipwe tongeni likiitú fán ach kewe osukosuk. Oruuan, ena péchékkúl a fang ngenikich epwe álisikich le sópweló ach akkangang ngeni Jiowa tori ewe ótót sefé. Sipwe tipeppós le unusen kúna álillisin án Kot we ngún mi fel!