1-2. (a) Txini enanikamihedhe ovilela makattamiho a siku-siku? Katapulela. (b) Txini enasunzehu mwari mwa mutoma obu?

 “DDIGOBUWELA mwaha wa makattamiho addipattile, ddinoziwa wi kaddigawodhile meka.” Wahiromaga wubuwela mazu oligana nabene? Enjene wa iyo ninobuwelaga. Txino ologile mmaleliwe wubuwela mukalelo owodhiliwe okana guru dhovilelana eredda yawopiha obe okwa wa munammudhi wokweleya. Ogobuwela makattamiho aba, onowona wi owodhile ovilela sabwa ya nikamihedho na muya wokoddela wa Yehova wuvahile “owodha oku onddimuwa.”—2 Kor. 4:7-9.

² Iyo ninofwanyela okuluvela muya wokoddela wila onikamihedhe orabela opupurutxiwa na muya dhabure. (1 Jo. 5:19) Txibarene, ninofwanyelela owana na “muya dhabure dhihinoneya.” (Ef. 6:12) Ninele wona mikalelo minli dhinanikamihedhe muya wokoddela ovilela makattamiho aba otene. Nigamala ninele osekeserha txini enakosihu wi nipurelemo nikamihedho na muya wokoddela.

3. Yehova onnikamihedha na mukalelo gani wi niwodhe ovilela makattamiho?

³ Muya wokoddela wa Yehova ononikamihedha modhela onivaha guru, obe ewodhelo, wi nakwanihedhe mithorho dhehu masiki na makattamiho. Murumiwi Paulo wanwodha omulabela Yehova masiki na makattamiho sabwani wakuluvela “guru dha Kristu.” (2 Kor. 12:9) Mwari mwa oleddo waye wanawili womisionario, Paulo wahilaba vaddiddi mmabasani a olaleya na ovisapela. Iyene wahikala o Korinto vatakulu va Ákila na Prisila. Mabasawa ali omaga misasa. Velani Paulo wanziwa mabasa akene, wahivitaganyiha nawene. (Mer. 18:1-4) Muya wokoddela wahinvaha Paulo guru dholaba kuluwi mabasa omaga misasa vina wakwaniha mabasa aye olaleya.

4. Mowiwanana na 2 Korinto 12:7b-9, makattamiho gani awanana Paulo?

 ⁴ Kengesa 2 Korinto 12:7b-9. Mwari mwa versu esi, txini entapulela mazu a Paulo valogiliye wi mmaningoni mwaye mwahivolowa “yososa, eli ninga mwinga”? Kavali waganyedha wi weyo agahisosiwa vaddiddi, kokana mwinga mmaningoni mwawo. Nona Paulo wahiloga wi wahipattiwa makattamiho amusosa ninga mwinga. Iyene wahiloga wi makattamiho aniyena ali ‘epano ya Satana’ yadhile ‘omutabutxa.’ Txino kahiyo Satana na adomonyo aye atotile masoso a Paulo, ali ninga mwinga mmaningoni mwaye. Mbwenye muya esi dhabure voonilani masoso a Paulo ali ninga “mwinga”, awene alopura gari yottabwihavi masosoya. Txini yakosile Paulo?

5. Yehova wakulile dhavi malobelo a Paulo?

⁵ Vamaromo, Paulo wanfuna wi akutxiwemo “mwinga” obule. Iyene ologa: “Ddimuloba Nabuya dila tharu wi addikutxemo.” Pumwenemo, masiki na malobelo a Paulo, mwingaya walivi mmaningoni mwaye. Eji entapulela wi Yehova kavuruwanile malobelo a Paulo? Kahiyo mwenemo. Iyene wahimwakula. Yehova kakutxilemo masoso abale, mbwenye iyene wahinvaha Paulo guru dhovilelana masosoya. Yehova wahiloga: “Owodha waga ononeyetxa vanobana muthu.” (2 Kor. 12:8, 9) Na nikamihedho na Mulugu, Paulo wahiwodha wagalala vina okaanavi murenddele!—Fil. 4:4-7.

6. (a) Yehova onakula dhavi malobelo ehu? (b) Malebo aromoliwe vaddimani eji anuvaha dhavi guru?

⁶ Dhahene ninga Paulo, weyo wahimunlelaga Yehova na malobelo wi agomihe makattamiho awo? Masiki akala weyo wahilobela na murima wotene mbwenye masosoya kavuguwile—obe alottabwavi—kubuwele wi Yehova kanutanala. Akala jijuwene, kobuwela yotagiha ya Paulo. Dhahene ninga mwakulile Yehova malobelo aye, Iyene onele wakula vina malobelo awo! Yehova txino kanagomihe makattamiho awo. Mbwenye modhela muya wokoddela, iyene onele wuvaha guru dhovilelana makattamihoya. (Masal. 61:4, 5) Txino weyo ‘onodhugudheya,’ mbwenye Yehova kanawuttiye.—2 Kor. 4:8, 9; Fil. 4:13.

7-8. (a) Na mukalelo gani oli muya wokoddela ninga pevo? (b) Pedro otapulelamo dhavi mukalelo onlaba muya wokoddela?

⁷ Mukalelo mwina onikamihedha muya wokoddela buvi? Dhahene ninga paporo oli munyaza ontukumiwa na pevo, muya wokoddela ononikamihedha odhowa vasogorho nigafanyiwa makattamiho wi nifiye elabo eswa epikirele Mulugu.

⁸ Vowi murumiwi Pedro wali namattadda, iyene wanziwa marhe okosa oleddo wa mbara. Atapulelagamo mukalelo onlaba muya wokoddela, iyene wahilabihedha mazu oligana na okosa oleddo wa mbara. Iyene ohileba: “Anamavuhulela txipo kàloga dha mmúruni mwawa; eddihiwaga na muya wokoddela, àloga na nzina na Mulugu.” Nzu ntti “eddihiwaga” na elogelo ya Egrego nintapulela ‘wedda vamodha.’—2 Ped. 1:21.

9. Pedro witile monelo gani mulabihedhiye mazu aba ‘wedda vamodha’?

⁹ Pedro witile monelo gani mulabihedhiye mazu aba ‘wedda vamodha’? Na mukalelo wakene woleba na Egrego, Luka olabihedha mazu oligana alebaga nivuru na Merelo, ologa wi pevo “emuthukulela” pangaya vari. (Mer. 27:15) Ninga mulogile namapepesa dhahi wa Bibilia, Pedro wahileba wi anamaleba Bibilia ‘eddihiwa,’ namapepesaya ologa wi Pedro olabihedhi “mazu a nladdaniho na mukalelo wotikiniha.” Pedro wahiloga wi, dhahene ninga muneeddihiwa paporo na pevo wila akwanihe oleddo, anamavuhulela na  anamaleba Bibilia eddihiwa na muya wokoddela wila akwanihe mabasa awa. Namapepesaya ohiloga: “Anamavuhulela akalile ninga, atapulile vela dha mapaporo awa.” Yehova wahikosa mpaddi waye. Iyene wahavaha “pevo,” obe muya wokoddela. Anamaleba Bibilia vina ahikosa mpaddi wawa. Awene ahilaba mowiwanana na nikamihedho na muya wokoddela.

10-11. Tharho gani bili dhinfwanyeelihu ofwara wila needdihiwe na muya wokoddela? Kaladdaniha.

¹⁰ Mwebaribari, mudhidhi wobuwelihiwa anamaleba Bibilia na muya wokoddela ovira. Mbwenye, Mulugu onolabihedha muya waye wokoddela wila eddihena nlogo naye. Yehova onokosavi epaddi yaye. Ninawodhe dhavi weddihiwa na muya wokoddela wa Mulugu? Akala ninofuna weddihiwa na muya wokoddela ninofwanyela okosa mpaddi wehu. Ninakose dhavi?

¹¹ Kobuwela nladdaniho ntti. Wila namatxerhenga apurelemo pevoya onofwanyela okosa dhilobo bili. Yoroma, iyene onofwanyela odhowana paporo waye ondowa pevoya. Sabwani akala namatxerhenga onowimetxa paporo waye va zambuwoni, paporoya kanathukumiwe na pevo. Yanawili, iyene onofwanyela otapula mowakwana-mwene vela dha paporo waye. Masiki akala pevoya enokukuma, paporo waye onela odhowavi osogorho akala veladha dhitapuwa-wene. Yakakene, ninawodhe ovilela mmabasani a Yehova nigakaana nikamihedho na muya wokoddela. Wila nipurelemo pama muya wokoddela, ninofwanyela ofwara tharho esi bili. Yoroma, ninofwanyela wang’ana nanyene onvapeyela muya wokoddela wa Mulugu modhela okosa mabasa aneddihiwa na muyaya. Yanawili, ninofwanyela “otapula vela dha paporo wehu” mowakwana-mwene modhela ovilibihedha pama mmabasani mwehu. (Masal. 119:32) Nigafwara tharho esi, muya wokoddela onele onivaha guru dha odhowavi vasogorho masiki na makattamiho  vina onele onikamihedha ovilela mwari mwa oleddo wehu mpaka ofiya elabo eswa.

12. Txini enasekeserhihu ovanene?

¹² Nihoona mikalelo minli dhinikamihedha muya wokoddela. Muya wokoddela ononivaha guru vina ononikamihedha okalavi ororomeleyene masiki na makattamiho. Vina muya wokoddela ononikamihedha odhowavi osogorho wila nikalevi mudila ennittukulela egumi yohimala. Ovanene ninele osekeserha dhilobo nayi dhinfwanyeelihu okosa wila nipurelemo nikamihedho na muya wokoddela.

13. Mowiwanana na 2 Timóteo 3:16, 17, Malebo ananikamihedhe dhavi, mbwenye txini enfanyeelelihu okosa?

¹³ Voroma, osunza Mazu a Mulugu. (Kengesa 2 Timóteo 3:16, 17.) Mazu aba “wobuweliha ddi Mulugu” na elogelo ya Egrego antapulela “ovudheleliwa na Mulugu.” Mulugu ohilabihedha muya waye wila “avudhelele” dhubuwelo dhaye muyubuweloni mwa anamaleba Bibilia. Nigamwengesa Bibilia vina nigatanaalelaga dhinengesihu, malago a Mulugu anovolowa muyubuweloni vina mmirimani mwehu. Dhubuwelo esi dhovudheleliwa dhinonittukulela okosa matxinjo mwigumini mwehu wi nimwagalalihe Mulugu. (Aheb. 4:12) Mbwenye wila nipurelemo nikamihedho na muya wokoddela, ninofwanyela otamela mudhidhi womusunza Bibilia vina otanalela matibelo a esile dhinengesihu. Dhawene Mazu a Mulugu anopatta merelo na dhubuwelo dhehu dhotene.

14. (a) Sabwaya jani enlogelihu wi “pevo enovudhelela” matugumano ehu? (b) Txini enanikamihedhe opurelamo muya wokoddela nigakala mmatugumanoni?

¹⁴ Yanawili, nimwebedhe Mulugu vamodha na abalihu. (Masal. 22:23) Na mazu mena, matugumano ehu mudhidhi “onvudhela pevo.” Vowi muya wa Yehova oli mmatugumanonimwa. (Ovuh. 2:29) Sabwaya jani enlogelihu dhahene? Sabwani nigatugumanaga na Akristu akwehu wi nimwebedhe Yehova, ninolobela nikumbiraga muya wokoddela, ninowiba jibo Dhomwene dhindela mBibiliani, vina ninovuruwana masunziho a mBibiliani anvahiwehu na abali attomiwe na muya wokoddela. Muya wokoddela wakene onowakamihedha arogora osasanyedha dhipaddi dhawa wila alagihe mmulogoni. Wila nipurelemo mowakwana nikamihedho na muya wokoddela, ninofwanyela ovisasanyedha wi nivahe dhowakula mmatugumanoni. Na mukalelo obu, nigakala mmatugumanoni “vela dhehu dhinotapuwa-wene.”

15. Muya wokoddela onawukamihedhe dhavi mmabasani a olaleya?

¹⁵ Yaneraru, odhowegevi mmabasani a olaleya. Nigamulabihedhaga Bibilia mmabasani olaleya vina osunziha, ninottiya wi muya wokoddela onikamihedhe mmabasani mwehu. (Rom. 15:18, 19) Wila opurelemo nikamihedho na muya wokoddela, onofwanyela odhowa mmabasani a olaleya vina omulabihedha Bibilia egawodheya. Mukalelo mmodha onawukamihedhe opurelamo mabasa olaleya bwa olabihedha makani ohirutxa ali munivuruni Mabasa na Yeddelo Yehu ya Okristu.

16. Na mukalelo gani onawodhihu ovahiwa muya wokoddela?

¹⁶ Yanonai, omulobelela Yehova. (Mt. 7:7-11; Lk. 11:13) Mukalelo mmodha wa ovahiwa muya wokoddela bwa omulobelela Yehova. Kavo elobo enatximihe malobelo ehu onfiyedha Yehova obe kawo elobo enatximihe wi muya wokoddela wa Mulugu ohinifiyedhe—nne dhirugu dha mukambura nne Satana. (Tia. 1:17) Ninfwanyelela nni olobela wi nipurelemo nikamihedho muya wokoddela? Wila nakule nivuzo ntti, ndoweni nisekeserhe  musibo onfwanyeya Mmuttakani mwa Luka, wi none enfunihu osunza mwaha wa malobelo. *

17. Txini ensunzavo iyo na musibo wa Yezu mwaha wa malobelo oli munivuruni na Luka 11:5-9, 13?

¹⁷ Kengesa Luka 11:5-9, 13. Musibo wa Yezu onotonyihedha mukalelo onfanyeelela iyo olobela nikumbiraga muya wokoddela. Mwari mwa musibo obu, mulobwanaya wahiwodha wakela dhafuniye sabwa ya “ntidi n’oloba.” Iyene koovile okumbirha nikamihedho na mukwaye masiki valani mattiyu. Ninavirihemo dhavi musibo obu wa Yezu mwaha wa malobelo? Iyene ologa: “Lobaní, munovahiwa; tamelaní, munofwanya; kopelaní, munowakeliwa.” Ninsunzavo eni? Wi nakele nikamihedho na muya wokoddela, ninofwanyela olobelaga na ntidi.

18. Mowiwanana na musibo wa Yezu, ninfanyeelelani okuluvela wi Yehova onele onivaha muya waye wokoddela?

¹⁸ Musibo wa Yezu ononikamihedha wona sabwaya enfunela onivaha Yehova muya wokoddela. Mulobwana ologiwe mmusiboni obu wafuna akale namakwela aleddo wapama. Iyene wahoona wi wanfanyeela onvaha oja muleddo waye wadhile vari va mattiyu, mbwenye kanna elobwene. Yezu wahiloga wi mulobwana oddule wavaheliwe sabwani wahididela okumbirha na ntidi. Txini yafuna okokomeza Yezu? Akala muttu wohakwana onomukamihedha mukwaye onloba na ntidi, Babihu wa wirimu oli womala nawale wi akamihedhe abale andidela omuloba na ntidi muya wokoddela! Nikaane ebaribari yawi, nigamuloba Yehova nimukumbiraga muya wokoddela iyene onele wakula momaguva malobelo ehu.—Masal. 10:17; 66:19

19. Ninfwanyelela eni okuluvela wi ninele opemberha?

¹⁹ Masiki na guru enkosa Satana wila anipupurutxe kananiwodhe, iyo ninele opemberha. Sabwaya? Sabwani muya wokoddela ononikamihedha mwa mikalelo minli. Woroma, ononivaha guru dhinfunihu wi nivilele masoso. Wanawili, muya wokoddela “onovudhelela vela dhehu,” modhela onikamihedha odhowavi vasogorho nimulabelaga Yehova mpaka elabo eswa. Nona, nikale womala nawale wi nipurelemo nikamihedho na muya wokoddela!