1-2. (a) Nifatin kan tonmi harnak hna kha inkhawh peng awkah zeinihdah a kan bawmh? Fianter. (b) Hi capar ah zei kong dah kan i ruah hna lai?

“KA TONMI harnak kong kha ka ruah tikah keimah thazaang in cun ka tei kho lai lo ti kha ka hngalh” tiah na chim bal maw? Kan lak i tam deuh nih cun cutin kan chim tawn. A zual tukmi zawtnak asiloah dawtmi pakhat nih thihtaknak na ton hnuah cutin na chim ve men lai. Mah kong kha na ruah ṭhan tikah nifatin inkhawhnak na rak ngeihmi cu Jehovah thiang thlarau nih “thilti khawhnak ṭhawnnak” an pek caah a si ti kha na hngalh.—2 Kor. 4:7-9.

² Hi vawlei ṭhalo huham kan doh khawh nakhnga ca zongah thiang thlarau bawmhnak kan herh. (1 Johan 5:19) “Thlarau sual ṭhawnnak hna” zong kan doh hna a hau. (Efe. 6:12) Cucaah thiang thlarau nih a kan bawmh khawh ning lam pahnih kong le thiang thlarau in ṭhatnak tling hmuh khawh ning kong kha kan i ruah hna lai.

3. Jehovah nih harnak inkhawh awkah a kan bawmh ning lamkhat cu zeidah a si?

³ Jehovah thiang thlarau nih harnak kan ton hmanhah kan rian kha liim khawh awkah ṭhawnnak asiloah thazaang a kan pek. Lamkaltu Paul nih harnak a tong ko nain Jehovah rian a ṭuan khawh pengmi cu “Khrih ṭhawnnak” thawngin a si ti kha a hngalh. (2 Kor. 12:9) A voihnihnak missionary in khual a tlawn lioah Paul cu Phungchim rian lengah pawcawmnak ca zongah rian a ṭuan. Korin khua i Akuila le Prisilla te inn ah a um. Annih cu saphaw thlam ser in a paw aa cawmmi an si. Paul zong saphaw thlam a sermi a si ve caah an sinah caan cheu in rian a ṭuan. (Lam. 18:1-4) Thiang thlarau nih Paul kha pawcawmnak rian ṭuan buin phungchim rian liim awkah ṭhawnnak a pek.

4. Paul nih 2 Korin 12:7-9 ningin zeibantuk hneksaknak dah a ton?

 ⁴ Kuathnih Korin 12:7-9 rel. Mah Baibal caang ah Paul nih “ka pum ah hin fahnak pakhat” ka ngei tiah a ti tikah zeidah a chim duhmi a si? Na pum ah fahnak na ngeih ahcun mah cu in awkah a har tuk ko lai. Cucaah Paul nih in awkah a harmi pumpak hneksaknak a tonmi kha a chim duhmi a si. Mah hneksaknak cu a pum ah “fahnak” a pe lengmangmi “Satan thil” a si tiah a ti. Satan asiloah a khuachia hna nih Paul kha a pum ah direct in cun fahnak an pekmi a si lo nain a pum i “fahnak” kha an hmuh tikah a fah chin nakhnga an tuah khawh. Paul nih zeidah a tuah?

5. Jehovah nih Paul thlacamnak kha zeitindah a leh?

⁵ A hmasa ahcun Paul nih Jehovah nih “fahnak” kha ka hlohpiak seh ti a duh. Hitin a ti: “Voithum thliahmah Bawipa [Jehovah] sinah thla ka cam i ka lakpiak ko tiah ka nawl.” Paul cu thla a cam ko nain a pum i fahnak cu a dam hlei lo. Mah cu Jehovah nih Paul thlacamnak kha a let lo tinak a si maw? A si lo. A thlacamnak kha a leh. Jehovah nih a tonmi harnak kha a hlohpiak lo nain inkhawh awkah thazaang a pek. Jehovah hitin a ti: “Ka ṭhawnnak cu derthawmnak ah hin a lang.” (2 Kor. 12:8, 9) Pathian bawmhnak thawngin Paul cu lunglawm tein le lungdai tein a um kho peng.—Fil. 4:4-7.

6. (a) Jehovah nih kan thlacamnak kha zeitindah a kan leh khawh men? (b) Cherhchanmi zei Baibal caang nih dah thazaang aan ngeihter?

⁶ Paul bantukin Jehovah kha na harnak hlohpiak awkah na nawl bal maw? Thla na cam peng ko nain harnak na tong peng rih asiloah na harnak cu a zual chin ahcun Jehovah lung ka lawmhter lo caah a si tiah na thin a phang maw? Cutin na si ahcun Paul kong kha i cinken. Jehovah nih Paul thlacamnak a leh bantukin na thlacamnak zong aan leh ve hrimhrim lai. Jehovah nih na tonmi harnak cu aan hlohpiak men lai lo. Asinain thiang thlarau thawngin na tonmi harnak kha inkhawh awkah thazaang aan pek lai. (Salm 61:3, 4) ‘Ceite in an in ṭhuat’ ve men lai nain Jehovah nih aan kaltak lai lo.—2 Kor. 4:8, 9; Fil. 4:13.

7-8. (a) Thiang thlarau cu thli he zeitindah aa lawh? (b) Peter nih thiang thlarau rianṭuannak kha zeitindah a langhter?

⁷ Thiang thlarau nih a kan bawmh ning a dang lamkhat cu zeidah a si? Thiang thlarau cu thli he tahchunh khawh a si. Tilet a thomi rili hmanhah a kal duhnaklei ah a hrangmi thli nih tilawng kha aa tinhnak hmun ah him tein a phanhter khawh. Cu bantukin harnak kan ton hmanhah Pathian kamhmi vawlei thar ah kan phanh khawh nakhnga Jehovah thiang thlarau nih a kan bawmh khawh.

⁸ Lamkaltu Peter cu ngatlai a rak si caah tilawng puanzar kong kha ṭha tein a hngalh. Cucaah thiang thlarau rianṭuannak kong kha langhter awkah tilawng puanzar he aa pehtlaimi biafang kha a hman. Hitin a ti: “Profet bia cu minung duhnak chung menmen in a chuakmi a si lo, sihmanhsehlaw Pathian sinin a rami bia kha mi nih an chim tikah, thiang thlarau nih a fial hna caah a si.” “Fial” tiah lehmi Greek biafang cu “kalpi” timi sullam a ngei.—2 Pet. 1:21.

9. Peter nih a chimmi “kalpi” timi biafang nih zeidah a langhter duhmi a si?

⁹ Peter nih a chimmi “kalpi” timi biafang nih zeidah a langhter duhmi a si? Lamkaltu Baibal a ṭialtu Luka zong nih thlitu nih a duhnak paoh ah “a kalpi” thluahmahmi tilawng kong a langhter lioah mah Greek biafang kha a rak hman ve. (Lam. 27:15) Cucaah Peter nih tilawng in khualtlawnnak kong kha mi pawl ruahter a duh hna caah mah biafang kha a hmanmi a si tiah Baibal lei mifim pakhat nih a  ti. Peter nih an i tinhmi phanh awkah thli nih tilawng cu a kalter bantukin Baibal ṭialtu hna nih an rian an liim khawh nakhnga thiang thlarau nih a bawmh hna tiah a ti duhnak a si. “Profet hna nih an tilawng puanzar kha an zaam bantuk a si” tiah a ti chap. Jehovah nih “thli” a simi a thiang thlarau kha a pek hnanak thawngin a tuah dingmi thil kha a tuah. Baibal ṭialtu hna zong nih thiang thlarau lamhruainak an zulhnak thawngin anmahlei in an tuah dingmi thil kha an tuah.

10-11. Thiang thlarau hmuh awkah zei thil pahnih dah kan tuah awk a si? Tahchunhnak pe.

¹⁰ Tuchan ah Jehovah nih Baibal ṭialter awkah a thiang thlarau kha a hmang ti lo. Asinain a miphun pawl lamhruainak ahcun a hman rih. Jehovah nih amahlei in a tuah dingmi thil kha a tuah. Pathian thiang thlarau in zeitindah ṭhatnak kan hmuh khawh? Kanmahlei in kan tuah dingmi thil kha kan tuah peng a hau. Cutin zeitindah kan tuah khawh?

¹¹ Mah tahchunhnak hi ruathmanh. Tilawng mawngtu pakhat nih thli in ṭhatnak hmuh awkah thil pahnih a tuah a hau. Pakhatnak ah, thli a hrannak hmun ah a lawng kha a umter a hau. Thli a hrannak hmun he aa hlatnak rili kam ah a dirter peng ahcun a lawng cu a kal kho lai lo. Pahnihnak ah, tilawng puanzar kha a samh dih a hau. Thli nih tilawng puanzar a hranh lawngah a lawng cu a kal kho lai. Cu bantukin thiang thlarau bawmhnak kan hmuh lawngah Jehovah rianṭuannak ah inkhawhnak kan ngei lai. Thiang thlarau in ṭhatnak hmuh awkah thil pahnih kan tuah a hau. Pakhatnak ah, thiang thlarau a kan hmuhter khomi rian ṭuannak ah kan i telnak thawngin thiang thlarau kha lam kan i hruaiter peng a hau. Pahnihnak ah, mah rian ṭuannak ah lungthin dihlak in kan i telnak thawngin “kan puanzar kha kan samh dih” a hau. (Salm 119:32) Mah thil hna kha kan tuah ahcun thiang thlarau nih tilet bantuk a simi ralchanhnak le harnak hna kha inkhawh awkah a kan bawmh lai. Cun vawlei thar kan  phanh hlan tiang zumhfek tein um awkah a kan bawmh lai.

12. Atu ah zei kong dah kan i ruah hna lai?

¹² Thiang thlarau nih a kan bawmh khawh ning lam pahnih kong kan i ruah cang hna. Thiang thlarau nih harnak kan ton tikah zumhfek tein um khawh awkah thazaang a kan pek. Cun thiang thlarau nih Jehovah rian ṭuan khawh peng awk le zungzal nunnak lam cungah kal khawh peng awkah a kan bawmh. Atu thiang thlarau in ṭhatnak tling hmuh khawh awkah kan tuah a herhmi thil pali kong kan i ruah hna lai.

13. Baibal nih 2 Timote 3:16, 17 ningin kan caah zeidah a tuah khawh, zeidah kan tuah awk a si?

¹³ Pakhatnak, Baibal kha hlathlai. (2 Timote 3:16, 17 rel.) Pathian nih a thlarau hmangin Baibal ṭialtu hna kha ‘thaw a chuahhnawh’ hna i a ruahnak kha a ṭialter hna. Cucaah Baibal kan rel i kan relmi kong kha kan ruah ahcun Pathian lamhruainak cu kan lungthin chungah a lut lai. Mah nih Pathian duhnak ningin nun awkah a kan forh lai. (Heb. 4:12) Asinain thiang thlarau in ṭhatnak tling hmuh awkah hmaan tein Baibal hlathlai awk le thukpi in ruah awkah a caan kan pek a hau. Cutin kan tuah ahcun Baibal cu kan chimmi le kan tuahmi dihlak cungah huham a ngei lai.

14. (a) Khrihfabu pumhnak cu “thli a hrannak” hmun he aa lo tiah zeicah kan chim khawh? (b) Pumhnak ah thiang thlarau in ṭhatnak tling kan hmuh khawh nakhnga zeinihdah a kan bawmh lai?

¹⁴ Pahnihnak, Pathian kha hmunkhat ah biaṭi. (Salm 22:22) Khrihfabu pumhnak cu “thli a hrannak” hmun bantuk a si. Mah ah Jehovah thiang thlarau a um. (Biat. 2:29) Zeicah cutin kan chim khawh? Khrihfa hawi pawl he Jehovah biak dingin kan i pumh tikah thiang thlarau hmuh awkah thla kan cam. Baibal cungah hram aa bunhmi Pennak hla hna kan sa i thiang thlarau in rian pekmi unaupa hna sinin Baibal hrambunhmi lamhruainak hna kan theih. Cun thiang thlarau nih unaunu pawl kha rianthiahmi ṭha tein i timhtuah awk le ṭha tein chim khawh awk zongah a bawmh hna. Asinain thiang thlarau in ṭhatnak tling kan hmuh khawh nakhnga pumhnak caah ṭha tein i timhtuah le kanmah theng i tel a hau. Mah cu tilawng puanzar samh dih bantuk a si.

15. Thiang thlarau nih phungchim rian ah zeitindah a kan bawmh?

¹⁵ Pathumnak, phungchim rian ah i tel. Phungchimnak le cawnpiaknak rian ah Baibal kan hman tikah thiang thlarau bawmhnak kan cohlanmi a si. (Rom 15:18, 19) Asinain Pathian thiang thlarau in ṭhatnak tling kan hmuh khawh nakhnga phungchim rian ah hmaan tein kan i tel a hau i a si khawh tik paohah Baibal kha kan hman a hau. Cun phungchim rian hmual a ngeihter khomi lamkhat cu Nunning le Rianṭuannak Tuahchunhnak Cauk chung i biaruah ning kan hmannak thawngin a si.

16. Direct in thiang thlarau hmuh khawh ning lamkhat cu zeidah a si?

¹⁶ Palinak, Jehovah sinah thlacam. (Matt. 7:7-11; Luka 11:13) Direct in thiang thlarau hmuh khawh ning lamkhat cu Jehovah sinah thlacamnak a si. Kan thlacamnak Jehovah sinah a phanh nakhnga lo asiloah Pathian thiang thlarau laksawng kan hmuh nakhnga lo thonginn vanpang siseh, Satan siseh zeihmanh nih a kan dawn kho lo. (Jeim 1:17) Thiang thlarau in ṭhatnak tling hmuh awkah zeitindah thla ka cam awk a si? Luka Thawngṭha cauk ah aa telmi tahchunhnak in thlacamnak kong kha cawng hna u sih. *

17. Luka 11:5-9, 13 i Jesuh hmanmi tahchunhnak in thlacamnak kong he aa tlaiin zeidah kan cawn khawh?

¹⁷ Luka 11:5-9, 13 rel. Jesuh hmanmi tahchunhnak nih thiang thlarau hmuh awkah zeitindah thla kan cam awk a si ti kha a langhter. Mah tahchunhnak ah, pa pakhat nih lungdong loin a hal peng caah a herhmi kha a rak hmuh. Zan tlaipi a si cang ko nain a hawipa sinah bawmhnak hal dingin aa cungcang lo. (mwb18, July, cahmai 4 ah zoh.) Jesuh nih mah tahchunhnak kha thlacamnak he zeitindah a pehtlaihter? Hitin a ti: “Hal u law pek nan si lai; kawl u law nan hmuh lai; king u law innka cu hunpiak nan si lai.” Mah in zeidah kan i cawn khawh? Thiang thlarau bawmhnak hmuh awkah teima tein thla kan cam peng a hau.

18. Jesuh hmanmi tahchunhnak ningin Jehovah nih thiang thlarau a kan pek lai tiah zeicah ka zumh khawh?

¹⁸ Jesuh hmanmi tahchunhnak nih Jehovah nih zeicah thiang thlarau a kan pek ti kha hngalhthiam awkah a kan bawmh. Mah tahchunhnak chung i mipa nih khual a dawmi si kha a duh. Zan tlai hnuah a rak phanmi a khual kha rawl dangh a duh ko nain dangh ding zeihmanh a ngei lo. Asinain lungdong loin a hal peng caah a innpa nih changreu kha a pek tiah Jesuh nih a ti. Zeidah a chim duhmi a si? A tling lomi minung hmanh nih lungdong loin a hal pengmi a innpa kha a bawmh ahcun zaangfahnak a ngeimi vancung kan Pa nih thiang thlarau hmuh awkah lungdong loin a halmi cu a pek chinchin hna lai. Cucaah Jehovah nih thiang thlarau a kan pek lai timi zumhnak he thla kan cam khawh.—Salm 10:17; 66:19.

19. Satan nih a kan tei lai lo ti kha zeicah kan zumh khawh?

¹⁹ Kanmah doh awkah Satan cu zeitluk in aa zuam hmanhah a kan tei lai lo. Zeicah? Zeicahtiah thiang thlarau nih lamhnih in a kan bawmh caah a si. Pakhatnak ah, thiang thlarau nih harnak tei khawh awkah kan herhmi ṭhawnnak a kan pek. Pahnihnak ah, thiang thlarau nih vawlei thar ah zungzal nunnak kan hmu lai timi ruahchannak he Jehovah rian ṭuan peng awkah a kan forh. Cucaah thiang thlarau bawmhnak in ṭhatnak tling hmuh awkah bia khiak hna u sih.