1-2. a) Ka ki pé édé-nou kontinyé andiré jou apré jou ? Bay on ti èsplikasyon. b) Ka nou ké vwè adan awtik-lasa ?

« LÈ AN ka sonjé éprèv-la an pasé la, an sav kè an pa té’é jen pé kenbé tousèl an mwen. » Pétèt onlo adan nou ja palé konsa. Ès sa ja rivé-w dè di on biten konsa ? Pétèt kè sa rivé-w apré ou té fin goumé èvè on maladi grav oben apré ou rivé sipòté doulè-la ou té ni la padavwa ou pèd on moun ou té enmé. É lè ou rété kalkilé sa, ou ka rann-vou kont kè si a pa té lèspri sen a Jéova ki té ba-w « puisans-la ki ka dépasé sa ki nòwmal », ou pa té’é jen kapab kontinyé andiré jou apré jou (2 Kor. 4:7-9).

² Anplisdisa, nou bizwen lèspri sen a Jéova pou mond méchan lasa pa détenn asi nou (1 Jan 5:19). Grasa lèspri sen nou pé lité kont « sé lèspri méchan la ki an syèl-la » (Éféz. 6:12). Konnyéla, nou kay palé dè 2 mannyè lèspri sen ka édé-nou andiré tout sé difikilté-lasa. Aprésa, nou ké palé dè ka nou pé fè pou nou bénéfisyé anplen dè lèspri sen.

3. Ni on biten Jéova ka itilizé pou édé-nou andiré éprèv. Ki biten ésa ?

³ Lèspri sen a Jéova ka ban-nou puisans-la oben fòs-la nou bizwen la pou asimé rèsponsabilité nou ni magré nou ka travèsé éprèv. Lapòt Pòl té sav kè si i té ka rivé kontinyé sèvi Jéova magré éprèv i té ka travèsé sé pas i té ka konté asi « puisans a Kris » (2 Kor. 12:9). Pannan dézyèm vwayaj a-y antankè misyonè, Pòl pasé enpé tan ka préché. Men anplisdisa, i travay pou i té gangné vi a-y. I rété a Korent aka Akila é Priska ki té ka fè tant. Konm Pòl té ka fè tant osi, i té k’ay travay èvè yo dètanzantan (Akt 18:1-4). Lèspri sen ba Pòl fòs pou i té pé travay pou gangné vi a-y é pou i té préché an menm balan-la.

4. Dapré 2 Korentyen 12:7b-9, ki pwoblèm Pòl té ka jwenn ?

 ⁴ (Li 2 Korentyen 12:7b-9.) Adan sé vèwsé-lasa, Pòl di kè i té ni on « pikan an chè a-y ». Ka sa té vlé di ? Sèten si ou ni on pikan an kò a-w sa ké fè-w soufè toubònman. An réyalité, Pòl té ka di kè i té ka jwenn on éprèv an vi a-y ki té ka fè-y soufè toubònman. I di kè éprèv-lasa sé té konsi « on zanj a Satan » té ka « ba-y kou » akontinyé. Pétèt kè a pa Satan é démon a-y ki té dèyè do a éprèv-la Pòl té ka sibi la. Pétèt kè a pa yo ki simé pikan an chè a-y. Men pétèt kè lè yo vwè jan Pòl té ja ka soufè, onsèl biten ki té an tèt a yo sé fè pikan-la rantré pi fon pou fè-y soufè plis ankò. Ka Pòl fè ?

5. Kijan Jéova réponn a sé priyè-la Pòl fè la ?

⁵ Odépa, Pòl té vlé kè Jéova fè « pikan »-la disparèt. Mi sa i admèt : « Twa fwa, an sipliyé Ségnè-la [Jéova] pou i woté pikan-lasa ban mwen. » Men magré tout priyé Pòl priyé Jéova, pikan-la rété la. Ès sa vlé di kè Jéova pa réponn Pòl ? Awa ! Jéova réponn a sé priyè-la Pòl fè la. I pa rézoud pwoblèm-la, men i ba Pòl fòs pou i té pé andiré-y. Mi sa Jéova di : « Puisans an mwen ka vin pawfè lè ou fèb » (2 Kor. 12:8, 9). É grasa èd a Jéova, Pòl pa pèd jwa a-y é i rété kalm ! (Filip. 4:4-7).

6. a) Kijan Jéova pé réponn a priyè an nou ? b) Adan sé vèwsé-la ki an paragraf-la nou ka touvé déotwa lidé ki ka ban-nou fòs. Ki lidé ésa ?

⁶ Kon Pòl, ès sa ja rivé-w dè sipliyé Jéova pou i fè on éprèv disparèt ? Pétèt, ou ja priyé dè-tou-kè onpakèt fwa, é magrésa ou pa’a vwè pwoblèm-la ka disparèt. Men okontrè, sé vin i ka vin pi mové. Ès ou mandé-w si Jéova pa kòlè èvè-w ? Si sé ka a-w, sonjé ègzanp a Pòl. Menmjan Jéova réponn a priyè a-y, sèten i ké réponn a priyè a-w ! Jéova pa oblijé fè pwoblèm-la disparèt, men grasa lèspri sen a-y, i ké ba-w fòs-la ou bizwen la pou andiré éprèv-la (Sòm 61:3, 4). Pétèt yo ‘ké jété-w atè’, men Jéova pé’é jen abandoné-w (2 Kor. 4:8, 9 ; Filip. 4:13).

7-8. a) Poukwa nou pé konparé lèspri sen èvè van-la ? b) Ka Pyè di anrapò èvè jan lèspri sen ka aji ?

⁷ Kijan lèspri sen a Jéova pé édé-nou ankò ? Lèspri sen ka touvé-y kon van-la. Menmsi lanmè mové, on bato pé itilizé van-la ki ka souflé adan bon dirèksyon-la pou i rivé la i k’ay la. Menmjan-la, lèspri sen ka édé-nou kontinyé sèvi Jéova jiskatan nou rivé adan mond-nouvo la i pwomèt-nou la, menmsi nou ka jwenn éprèv.

⁸ Konm Pyè té péchè, i té ni onlo èkspéryans antankè matlo. Pétèt sé pousa i sèvi èvè on ègzanp ki anrapò èvè bato a vwal pou palé dè jan lèspri sen ka aji. Mi sa i maké : « A pa lòm ki fè si i ni pwofési, men sé lèspri sen ki gidé on séri nonm pou yo té anonsé pawòl a Bondyé. » Mo grèk la yo tradui la é ki bay lèmo « pousé » vlé di « pòté » (2 Pyè 1:21 ; nòt).

9. Ki imaj Pyè té vlé mèt an tèt an nou lè i di kè sé « lèspri sen ki pousé on séri nonm » ?

⁹ Ki imaj Pyè té vlé mèt an tèt an nou lè i di kè sé « lèspri sen ki pousé on séri nonm » ? Sé Lik ki maké liv a Akt, é i itilizé on mo ki menm fanmi ki mo grèk-lasa pou i té palé dè on bato ki pati aladériv akòz dè van-la (Akt 27:15). Ni on èspésyalis a Labib ki èspliké kè lèwvwè Pyè di kè sé lèspri sen ki « pousé » sé nonm-la ki maké sa ki adan Labib, i sèvi èvè on lidé  ki ka fè moun sonjé on bato a vwal. An réyalité, Pyè té ka di kè menmjan van-la ka pousé on bato adan bon dirèksyon-la, sé menmjan-la osi lèspri sen pousé sé pwofèt-la é sé nonm-la ki maké sa ki an Bib-la pannan yo té ka fè travay-lasa. Mi sa menm èspésyalis-lasa ka di : « Adan on sans, sé nonm-la ki maké sa ki an Bib-la fè vwal a yo monté. » Yo té paré a fè travay-la lèspri sen té ba-yo fè la. Jéova fè sa pou i té fè : i ba-yo « van-la » kivédi lèspri sen. É sé nonm-la ki maké Bib-la fè sa ki té fo osi : yo suiv dirèksyon a lèspri sen.

10-11. Ki 2 biten fò-nou fè pou nou sèten kè sé lèspri sen ki ka fè-nou avansé ? Bay on ègzanp.

¹⁰ Sèlman, jòdijou, Jéova pa ka itilizé lèspri sen a-y pou fè moun maké liv a Labib ankò. Pawkont, i ka kontinyé itilizé lèspri sen a-y pou gidé sèwvitè a-y. Jéova toujou ka fè pa a-y kon avan. Kijan nou pé bénéfisyé dè lèspri sen a Jéova ? Nou osi, fò-nou fè pa an nou. Kijan ?

¹¹ Réfléchi asi ègzanp-lasa. Ni 2 biten on maren dwèt fè si i vlé kè van-la édé-y. On prèmyé biten, sè kè fò i mèt bato a-y la van-la ka vanté la. Piskè, si i rété si pòw-la on koté ki pa ni van ka souflé, a pa pon koté bato-la ké ay. On dézyèm biten i pé fè, sé fè tout vwal a bato-la monté, é wouvè-yo tout grandè a yo. Paskè menmsi van-la ka souflé, sé yenki si van-la ka rantré an vwal-la bato-la ké avansé. Menmjan-la, nou ké pé kontinyé sèvi Jéova yenki si lèspri sen ka édé-nou. Pou nou pé rèsèvwa èd a-y, fò-nou fè 2 biten. Pou koumansé, fò-nou plasé-nou la lèspri sen a Jéova ka souflé, kivédi, fò-nou fè dé biten ki ké fè-y aji si nou. É anplisdisa, fò-nou « fè vwal an nou monté » é wouvè-yo tout grandè a yo, kivédi, lè nou ka fè sa lèspri sen ka pousé-nou fè, fò-nou fè-y èvè tout kapasité an nou (Sòm 119:32). Si nou fè sé 2 biten-lasa, nou pé sèten kè lèspri sen ké ban-nou fòs  pou nou kontinyé sèvi Jéova fidèlman jiskatan nou rivé adan mond nouvo la, menmsi nou ka jwenn éprèv.

12. Dè ki biten nou kay palé alèla ?

¹² Jis aprézan, nou palé dè 2 mannyè lèspri sen ka édé-nou. I ka ban-nou fòs, é i ka édé-nou rété fidèl lè nou ka jwenn éprèv. Anplis, i ka dirijé-nou, i ka édé-nou kontinyé fè travay-la Jéova vlé-nou fè la, é i ka édé-nou rété asi chimen a lavi étèwnèl. Alèla, an-nou palé dè 4 biten nou pé fè pou bénéfisyé anplen dè lèspri sen.

13. Dapré 2 Timoté 3:16, 17, ka Labib pé fè ban nou, men ka fò-nou fè pou i aji ?

¹³ Prèmyèwman, étidyé Pawòl a Bondyé (li 2 Timoté 3:16, 17). Mo grèk la yo tradui la é ki ba-y « sé Bondyé ki enspiré-y » vlé di « sé Bondyé ki souflé-y ». Bondyé itilizé lèspri sen a-y pou « souflé » (oben pou mèt) lidé a-y an lèspri a sé nonm-la ki maké Labib. Lè nou ka li Labib é lè nou ka pran tan réfléchi asi sa nou ka li, komandman a Jéova ka rantré an tchè an nou é an lèspri an nou. Sé lidé-lasa ka vin dè Bondyé é yo ka fè-nou chanjé pou nou viv on mannyè ki ka fè Jéova plézi (Ébr. 4:12). Men pou nou bénéfisyé anplen dè èd a lèspri sen, fò-nou òwganizé-nou pou nou étidyé Labib souvan. Fò-nou òwganizé-nou osi pou nou pran tan réfléchi pou ay an nannan a sa nou ka li. Konsa, Pawòl a Bondyé ké pé aji asi tousa nou ka di é asi tousa nou ka fè.

14. a) Poukwa nou pé di kè « van-la ka souflé » adan réinyon an nou ? b) Kijan nou pé asisté réinyon èvè « tout vwal an nou gran wouvè » ?

¹⁴ Dézyèmman, adoré Bondyé ansanm èvè frè é sè a-w (Sòm 22:22). Adan on sèwten sans, nou pé di kè « van-la ka souflé » lè nou réinyon paskè lèspri sen a Jéova ka la (Rév. 2:29). Poukwa nou pé di sa ? Paskè lè nou ka sanblé èvè frè é sè an nou pou adoré Jéova, nou ka mandé-y lèspri sen a-y é nou ka chanté kantik ki bazé asi Pawòl a-y. Anplisdisa, pannan réinyon, sé frè-la ka anségné-nou grasa Labib é sé lèspri sen ki chwazi-yo pou sa. É sé menm lèspri sen lasa ki ka édé sé sè-la préparé sijé a yo é sé li osi ki ka édé-yo fè-y. Men pou bénéfisyé anplen dè èd a lèspri sen la pannan réinyon, fò-nou préparé-nou pou pawtisipé. Konsa, lè nou ké réinyon, nou ké paré a rèsèvwa lèspri sen kon on bato tout vwal a-y gran wouvè.

15. Kijan lèspri sen ka édé-nou adan travay a prédikasyon-la ?

¹⁵ Twazyèmman, pawtisipé adan travay a prédikasyon-la. Lè nou ka sèvi èvè Labib pou préché é pou anségné, nou ka pèwmèt lèspri sen édé-nou adan sé aktivité-lasa (Wom. 15:18, 19). Pou-w bénéfisyé anplen dè èd a-y, fò-w pran labitid préché é fò-w sèvi èvè Labib chakfwa sa posib. Pou prézanté mésaj a Wayòm-la plibyen lè ou ka préché, ou pé itilizé « On lidé asi sa ou pé di » adan Kayé Vi é ministè la.

16. Ki méyè mwayen ki ni pou nou rèsèvwa lèspri sen a Jéova dirèktèman ?

¹⁶ Katriyèmman, priyé Jéova (Mat. 7:7-11 ; Lik 11:13). Méyè mwayen nou ni pou risivwè lèspri sen, sé dè mandé Jéova li dirèktèman. Pa ni ayen ki pé anpéché priyè an nou rivé owa Jéova, é pa ni ayen ki pé anpéché-nou rèsèvwa lèspri sen a-y nonplis. Ni lajòl, ni Satan pé pa anpéché-nou rèsèvwa « bèl kado »-lasa (Jak 1:17). Kijan fò-nou priyé pou bénéfisyé anplen  dè èd a lèspri sen ? Pou réponn a kèsyon-lasa, an-nou ègzaminé plis biten asi lapriyè grasa on ègzanp nou ka touvé yenki adan Évanjil a Lik *.

17. Ka ègzanp-la nou ka touvé an Lik 11:5-9, 13 ka aprann-nou asi lapriyè ?

¹⁷ (Li Lik 11:5-9, 13.) Ègzanp-la Jézi pran la ka montré kijan fò-nou priyé pou rèsèvwa lèspri sen. Adan ègzanp-lasa, on misyé rèsèvwa sa i bizwen « pas i pa pè kontinyé mandé ». I pa pè mandé zanmi a-y èd menmsi i ja byen ta. Kijan Jézi fè ègzanp-lasa korèsponn èvè lapriyè ? Mi sa i di : « Kontinyé mandé é yo ké ba-zòt. Kontinyé chèché, é zò ké touvé. Kontinyé kongné é yo ké wouvè ba zòt. » Ka sa ka aprann-nou ? Pou rèsèvwa lèspri sen, fò-nou kontinyé mandé.

18. Dapré ègzanp-la Jézi pran la, poukwa nou pé sèten kè Jéova ké ban-nou lèspri sen a-y ?

¹⁸ Ègzanp-la Jézi bay la ka édé-nou konprann osi poukwa Jéova ké ban-nou lèspri sen. Misyé-la ki adan ègzanp-la vlé pran swen a envité a-y. I ka konswa kè fò i ba sé moun-la ki vin vwè-y la on dèkwa pou yo manjé, men malérèzman, i pa ni ayen akaz a-y. Jézi ka di kè si vwazen-la ba misyé-la pen, sé pas i kontinyé mandé. Ka Jézi té vlé montré lè i di sa ? Si on moun enpawfè dakò pou édé on vwazen ki pa pè mandé plizyè fwa, jijé Pap’an nou ki an syèl-la. Sèten kè Pap’an nou ki an syèl-la ké édé séla ki pa’a las mandé-y lèspri sen a-y. Donk, nou pé sèten osi kè Jéova ké réponn-nou si nou pa pè priyé-y onlo fwa pou i ban-nou lèspri sen (Sòm 10:17 ; 66:19).

19. Poukwa nou pé sèten kè nou ké pé andiré ?

¹⁹ Nou pé sèten kè nou ké pé andiré menmsi Satan pa ka las ataké-nou. Poukwa ? Paskè lèspri sen ka édé-nou 2 mannyè diféran. Prèmyèwman, i ka ban-nou fòs pou andiré difikilté nou ka jwenn. Dézyèmman, lèspri sen ka « gonflé vwal an nou » é i ka pèwmèt-nou kontinyé sèvi Jéova fidèlman èvè lèspwa dè viv adan mond nouvo la. Fò-nou byen désidé a bénéfisyé anplen dè èd a lèspri sen !