1, 2. (1) ¿Kasa katchinka atuma waaʼin soʼunnaa tü alatakat wamüin? (2) ¿Kasa wekirajaainjatka anain sünain ekirajaayakat tüü?

«ISASÜJEʼE tachiki talatüin süchikumüin tü kasa mojusü alatakat tamüin nnojoire nükaalinjain taya Jeʼwaa nükajee chi naaʼinkai», eesüjaʼa müirüle wanüiki wajachajüle sutuma ayuulii jee nünaajaale wanee wapüshi. Katsüinsü waaʼin soʼunnaa tü alatakat wamüin sutuma nükaalinjain waya Jeʼwaa nükajee chi naaʼinkai (2 Cor. 4:7-9, TNM).

² Choʼujaasü wamüin nükaalinjain waya Jeʼwaa nükajee chi naaʼinkai süpüla wayoutuin tü kasa mojusü naaʼinrakat na manoujainsaliikana (1 Juan 5:19). Choʼujaasü wachecherüin waaʼin suulia waaʼinrüin tü kasa mojusü aainjinnakat sutuma tü yolujaakalüirua (Éf. 6:12). Süpüla wachecherüin waaʼin suulia tia, wekirajaa sünain piamasü kasa naaʼinraka Jeʼwaa nükajee chi naaʼinkai. Süchikijee tia, wekirajaajeerü anain tü waaʼinrüinjatkat süpüla nuʼuniraleeinya wakuwaʼipa chi naaʼinkai Maleiwa.

3. ¿Jarat tü palajatkat sukuwaʼipa süpüla nükaalinjain waya Jeʼwaa nükajee chi naaʼinkai?

³ Tü palajatkat sukuwaʼipa süpüla nükaalinjain waya Jeʼwaa nükajee chi naaʼinkai, shia nükatchinrüin waaʼin süpüla wekeraajüin tü waʼyataainkat nümüin jaʼitaina eʼrüin waya müliaa. Jamüshijaʼa chi aluwataaushikai Pablo, ayatüshi nia aʼyataain nümüin Jeʼwaa mayaainjeʼe niʼrüin müliaa. Nuuntuin tia sükajee katchin naaʼin sutuma nüpülain Kürisüto (2 Cor. 12:9). Soʼu misioneeroin nia, naaʼinmaasü maʼin tü aküjaakat pütchi otta aʼyataashi maʼin nia süpüleerua tü nipijaainjatkalü aaʼu. Oʼonoopünaashi nia nipialuʼu Áquila sümaa Priscila chaa Corinto, shia naʼyataaka anain tü aainjülüükat loona ojotonnokat süpüla miichin. Shiasaʼa süka nütüjain Pablo süpüleerua tü naʼyataakalü anain, aʼyataajiraashi nia namaa maʼaka jeʼra kaʼi süpüla semaanakat (Aluw. 18:1-4). Katchinsü naaʼin Pablo nutuma chi naaʼinkai Maleiwa süpüla nikeraajüinjatüin tia niʼyataainkat jee tü aküjaakat pütchi.

4. ¿Kasa alataka nümüin Pablo saashin 2 Corinto 12:72-9?

 ⁴ (Paashajeʼera 2 Corinto 12:72-9, TNM). Naashin chi aluwataaushikai Pablo, eesü wanee kasa müliaka atuma naaʼin, müsü aka saaʼin keipüse salaʼataka nümüin. Jamüsüjaʼa salaʼatüle wamüin wanee keipüse, müliasü waaʼin sutuma. Naashin Pablo, müliashi nia nutuma «wanee aapiee nümaʼanajeejachi Satanaa». Eeshijaʼa nnojoire niain Satanaa sümaa tü yolujaakalüirua kasirüin tü müliakalü atuma naaʼin Pablo. Najayatapejeʼe nia natüjaapa saaʼu eein wanee kasa müliaka atuma naaʼin, müsü nemerojeʼerakai saaʼin nünain tü keipüsekat. ¿Kasakaʼa naaʼinrüin Pablo?

5. ¿Kasa naaʼinraka Jeʼwaa süpüla nükaalinjain Pablo?

⁵ Nüchajaain Pablo sukuwaʼipa süpüla sülatüin nuulia tü müliakalü atuma naaʼin, tü makalü aka saaʼin «keipüse». Müshijeseʼe nuchuntuin apünüintua nümüin Jeʼwaa süpüla sülatüinjatüin nuulia tia. ¿Nnojoishiche asoutuin Jeʼwaa shiʼipajee nünüiki Pablo? Nnojotsiaajeʼe shiain tia. Mayaainjeʼe nnojoluin nüsünneʼerüin Jeʼwaa tia nuulia Pablo, nükatsüinreʼerüin naaʼin soʼunnaa tia. Anuujeseʼe nünüiki Jeʼwaa nümüin: «Tachechereerü paaʼin suʼutpünaa tü müliaa piʼrakat [...], alanaʼaleejeechia maʼi pia sünain katsüin paaʼin tatüma» (2 Cor. 12:8, 9). Sutuma nükaalinjünüin Pablo nutuma Jeʼwaa, talatüitpa naaʼin jee jutatüitpa naaʼin suulia shapawaa aaʼin (Filip. 4:4-7).

6. (1) ¿Kasa naaʼinraka Jeʼwaa süpüla nusoutuin shiʼipajee wanüiki? (2) ¿Jarat tü wetsiikulo akatsüinrakat waaʼin?

⁶ ¿Achuntuinnache waya kaalinwaa nümüin Jeʼwaa süpüla sülatüin woulia wanee müliaa? Nnojorüle sülatüin woulia jee sükooʼomüinraale, eesüjaʼa jülüjale waaʼin nnojoluin anain wakuwaʼipa noʼuluʼu Jeʼwaa. Jülüjale waaʼin tia, soteesü waaʼin nükatsüinrüin Jeʼwaa naaʼin Pablo. Mayaainjeʼe nnojoleerüin nüsünneʼerüin Jeʼwaa woulia tü müliakalü atuma waaʼin, nükatsüinreerü waaʼin soʼunnaa tü alatakat wamüin (Sal. 61:3, 4). Jaʼitaina eʼrüin waya müliaa, nnojoleena waya niyüülajüin Jeʼwaa (2 Cor. 4:8, 9; Filip. 4:13, TNM).

7, 8. (1) ¿Jamüsü makaʼa nukuwaʼipa chi naaʼinkai Maleiwa maʼaka saaʼin sukuwaʼipa joutai? (2) Püküja tü nümakat Pedro nüchiki chi naaʼinkai Maleiwa.

⁷ ¿Jarat tü piamakat sukuwaʼipa süpüla nükaalinjain waya Jeʼwaa nükajee chi naaʼinkai? Tü nukuwaʼipakat chi naaʼinkai Maleiwa, müsü aka saaʼin sukuwaʼipa joutai. Jamüsüjaʼa anale sukua joutai, sülüʼüjain tü anuwakat eemüinjatüle soʼotuin, jaʼitairü yapürülain tü palaakat. Akaataajaʼa wayakana nutuma chi naaʼinkai Jeʼwaa, nuʼunirüin wakuwaʼipa süpüla ayatüinjanain waʼyataain nümüin Jeʼwaa jee wachecherüin waaʼin soʼunnaa tü müliaa weʼrakat suluʼuleepa waya tü mma jeketkat.

⁸ Süka nulojulin jime Pedro, nütüjaa aaʼu tü sünainpünaakat niʼyataain wanee anuwapüʼü. Müsüjeseʼe nüshajüin wanee pütchi sünainpünaaka niʼyataain wanee anuwapüʼü wanaa sümaa naashajaain süchiki tü naaʼinrakat chi naaʼinkai Maleiwa. Anuujeseʼe nünüiki: «Soto jaaʼin sünain nnojolüin naleʼeruʼujeejatüin neʼe na nünüikimaajanakana Maleiwa tü namapüʼükat, je nnojotsü nachekalain neʼe namüiwa tü ashajaakat. Watüjaa aaʼulu sünain shiain tü nünüikikat Maleiwa, süka nashajüin tü nüchekalakat chi Naaʼinkai Maleiwa süpüleerua nashajüin». Tü pütchikat griego ashajünaka anainjee tü pütchikat «tü nüchekalakat chi Naaʼinkai Maleiwa», shia tü pütchikat «sülüʼüjain» (2 Ped. 1:20, 21).

9. ¿Kasa nüküjeeka achiki Pedro sükajee tü pütchikat «sülüʼüjain»?

⁹ ¿Kasa nüküjeeka achiki Pedro sükajee tü pütchikat «sülüʼüjain»? Tia meematsü aka saaʼin tü nüshajakat Lucas, chi ashajakai tü karaloʼutakat Aluwataaushikana. Tia, shia wanee pütchi griego otta shia süküjeeka achiki wanee anuwa «sülüʼüjaka» joutai jee soʼotiraka eemüinjatüle shia (Aluw. 27:15). Naashin wanee ekirajaai süchiirua sukuwaʼipa tü Wiwüliakat, nuʼwanaajireʼerüin Pedro nakuwaʼipa na wayuu ashajakana tü Wiwüliakat sümaa sukuwaʼipa wanee anuwa sülüʼüjaka joutai. Tü nüküjeekalü achiki Pedro shia nuʼunirüin chi naaʼinkai Maleiwa nakuwaʼipa na  nünüikimaajanakana jee na ashajakana tü Wiwüliakat süpüla naaʼinrüinjatüin tü nümakat Maleiwa namüin. Anuu sooʼomüin nünüiki chi ekirajaaikai süchiirua sukuwaʼipa tü Wiwüliakat: «Müsü nawatatkai saaʼin na nünüikimaajanakana Maleiwa tü uniakat». Suwawatka nutuma Jeʼwaa wanee joutai, tia nia chi naaʼinkai. Nooʼulaa namüsia na ashajakana tü Wiwüliakat noʼuninnüin akuwaʼipa nutuma chi naaʼinkai Maleiwa.

10, 11. ¿Jarat tü piamasü kasa waaʼinrajatkat süpüla nuʼunirüin wakuwaʼipa chi naaʼinkai Maleiwa? Püküja wanee sukuwaʼipa.

¹⁰ Maaʼulu yaa, nnojotsü nuʼunirüin Jeʼwaa sukuwaʼipa wayuu süpüla nüshajirüin tü Wiwüliakat. Nuʼunirapejeʼe maaʼulu nakuwaʼipa na aʼyataaliikana nümüin. ¿Kasa waaʼinrüinjatka süpüla nuʼunirüin wakuwaʼipa chi naaʼinkai Maleiwa?

¹¹ Jamüshijaʼa wanee anuwapüʼü süpüla nütüjaainjatüin saaʼu anale sukua joutai, naaʼinrajatü piamasü kasa. Palajana, nuʼunirüinjatü tü anuwakat eemüinre suwawalüin tü joutaikat. Süchikijee, nüwatalüinjatü tü uniakat süpüla suʼunuinjatüin tü anuwakat sutuma tü joutaikat. Akaataajaʼa wayakana, süpüla nuʼunirüin wakuwaʼipa Jeʼwaa nükajee chi naaʼinkai, waaʼinrajatü piamasü kasa. Palajana, waaʼinrüinjatü süpüshuaʼa tü sünainpünaakat aʼwaajaa Jeʼwaa, tia müsü aka saaʼin oʼuniraa tü anuwakat eemüinre suwawalüin tü joutaikat. Tü wane kasa waaʼinrajatkat shia kooʼomüin watuma tü waaʼinrakat süpüla waʼwaajüin Jeʼwaa, tia müsü aka saaʼin awatalaa suʼunia wanee anuwa (Sal. 119:32). Waaʼinrüle tia piamasükat kasa, nükaalinjeena waya Jeʼwaa nükajee chi naaʼinkai süpüla waʼyataain waneepia nümüin jaʼitairü süpülajünüin woulia jee weʼrüin müliaa suluʼuleepa waya tü mma jeketkat.

12. ¿Kasa wekirajaainjatka anain?

¹² Wekirajaaitpa anain süchiki piamasü kasa naaʼinraka Jeʼwaa süpüla nükaalinjain waya nükajee chi naaʼinkai. Katchinsü waaʼin nutuma Jeʼwaa jee nükaalinjain waya süpüla waneepiain waya nümaa soʼunnaa weʼrüin müliaa. Jee müsia, nükaalinjain waya süpüla waʼyataain waneepia nümüin jee süpüla weʼrüin kataa oʼuu waneepia. Wekirajaa süchiki pienchisü kasa waaʼinrajatka süpüla anaʼleeinjatüin wakuwaʼipa nutuma Jeʼwaa nükajee chi naaʼinkai.

13. (1) Saashin 2 Timoteo 3:16, 17, ¿kasa suʼunireetka anain wakuwaʼipa tü sümakat tü Wiwüliakat? (2) ¿Kasa waaʼinrüinjatka süpüla suʼunirüin wakuwaʼipa tü sümakat tü Wiwüliakat?

¹³ Tü waaʼinrajatkat palajana shia wekirajaainjanain sünain tü Wiwüliakat (paashajeʼera 2 Timoteo 3:16, 17). «Nujuʼulüin Maleiwa», maluʼulu tü pütchikat griego ashajünaka anainjee tü pütchikat «nütüma chi Naaʼinkai Maleiwa». Nikiiruʼujeejatü Jeʼwaa tü pütchi nashajakat na wayuu ashajakana tü Wiwüliakat, nüküjain namüin tü nashajüinjatkat. Waashajeʼerapa tü Wiwüliakat jee wasakireʼerapa suluʼu waaʼin sünain tü sümakat, antüsü wekiiruʼumüin jee suluʼumüin waaʼin tü nikiiruʼujeejatkat Maleiwa. Waaʼinrüin tü kasa nüchekakat Maleiwa sutuma tü pütchi suluʼukat tü Wiwüliakat (Heb. 4:12, TNM). Süpüla anaʼleeinjatüin wakuwaʼipa nutuma Jeʼwaa nükajee chi naaʼinkai, akatalüinjana waya kaʼi süpüla wekirajaain waneepia sünain tü Wiwüliakat jee wasakireʼerüinjatü suluʼu waaʼin süchiki tü sümakat. Müle shia watuma, pansaajeerü tü wamakat jee tü waaʼinrakat sümaa tü sümakat tü Wiwüliakat.

14. (1) ¿Jamüsü watüjaaka saaʼu eein chi naaʼinkai Maleiwa sünain tü outkajawaakat? (2) ¿Kasa waaʼinrüinjatka süpüla anaʼleeinjatüin wakuwaʼipa nutuma Maleiwa nükajee chi naaʼinkai?

¹⁴ Tü piamakat shia woutkajaainjanain namaa na wawalayuukana (Sal. 22:22). Eeshi chi naaʼinkai Jeʼwaa sünain tü outkajawaakat (Alat. Map. 2:29). Suluʼu jamüin, wanaa sümaa woutkajaain namaa na wawalayuukana, wachuntuin chi naaʼinkai Maleiwa süpüla eeinjachin nia waaʼu, eeʼirajüshii waya jayeechi suluʼujeejatü tü Nünüikikat Maleiwa jee waapajüin tü nekirajakalü anain na wawalayuu aneekuushikana nükajee chi naaʼinkai Maleiwa. Jee müsia, eeshi chi naaʼinkai Maleiwa naaʼu na wawalayuu jieyuu eeʼiyatakana tü sukuwaʼipainjatkat tü aküjaakat pütchi. Süpüla anaʼleeinjatüin wakuwaʼipa nutuma Maleiwa nükajee chi naaʼinkai, antajana waya sünain tü outkajawaakat sümaa kettaajüin waya süpüla wasoutuin shiʼipajee tü asakinnakalü anain. Müle shia watuma, meerü wakuwaʼipa maa aka saaʼin wanee anuwa «awatannaka oʼuniase».

15. ¿Kasa waaʼinrüinjatka süpüla nükaalinjain waya Maleiwa nükajee chi naaʼinkai waküjapa pütchi?

¹⁵ Tü apünüinkat shia wojuʼitüinjanain sünain aküjaa pütchi. Wanaa sümaa waashajeʼerüin tü Wiwüliakat namüin na wayuu waküjakana amüin pütchi jee na wekirajakana, müshii wooʼulaakai saaʼin nuʼunirüin wakuwaʼipa chi naaʼinkai Maleiwa (Roma 15:18, 19). Ojuʼitüinjanapejeʼe waya waneepia sünain aküjaa pütchi jee wachajaainjatü sukuwaʼipa süpüla waashajeʼerüin tü Wiwüliakat namüin na wayuu waküjakana amüin pütchi. Süpüla kamalainjatüin namüin na wayuukana tü waküjakat namüin, washata tü wanüikinjatkat sünainjee tü ojuʼitawaikat suluʼu Wekirajaayainjatü sünain tü outkajawaakat Wakuwaʼipa otta Waʼyataain nümüin Maleiwa, suluʼu süpana waneesia.

16. ¿Kasa waaʼinrüinjatka süpüla eeinjachin waaʼu chi naaʼinkai Maleiwa?

¹⁶ Tü pienchikat shia wachuntajanain kaalinwaa nümüin Jeʼwaa (Mat. 7:7-11; Luc. 11:13). Süpüla eeinjachin chi naaʼinkai Jeʼwaa waaʼu, wachuntuinjachi nia nümüin. Jaʼitaina püreesain waya jee nüpüleeruain waaʼin Satanaa, naapeeria Jeʼwaa wanüiki jee naapeechi chi naaʼinkai wamüin (Sant. 1:17). Süpüla nuʼunirüin wakuwaʼipa chi naaʼinkai Maleiwa, ¿kasa waaʼinrüinjatka wachuntapa kaalinwaa nümüin Maleiwa? Süpüla watüjaain saaʼu tia, wekirajaa sünain tü aküjünakat nüchiki wanee wayuu suluʼu tü karaloʼutakat Lucas. *

17. ¿Kasa watüjaka sünainjee tü naaʼinrakat chi wayuu naashajaakai achiki Jesuu suluʼu Lucas 11:5-10, 13?

¹⁷ (Paashajeʼera Lucas 11:5-10, 13). Nüküjain wamüin Jesuu tü waaʼinrajatkat süpüla wachuntuinjachin chi naaʼinkai Maleiwa. Naashin Jesuu, eeshi wanee wayuu achuntakai kaalinwaa nümüin wanee naʼaleewain jee saaʼujee nikeʼejüin  maʼin naaʼin naapüin tü choʼujaakat nümüin. Nnojoishi mmoluwaain nia sünain achuntaa kaalinwaa nümüin chi naʼaleewainkai mayaainjeʼe kaʼlein aikat (paashajeʼera tü nootakat «pikeʼejüin maʼi naaʼin süchiirua», ojuʼitaka juulioʼu 2018 suluʼu Wekirajaayainjatü sünain tü outkajawaakat Wakuwaʼipa otta Waʼyataain nümüin Maleiwa). ¿Jamüsü sünainpünaaka achuntaa nümüin Maleiwa naashin Jesuu tü nümakat nüchiki chi wayuu achuntakai kaalinwaa nümüin naʼaleewain? Anuu nünüiki Jesuu: «Anakaja müleka jüchuntüle nümüin Maleiwa waneepia süka süpüshua jaaʼin. Maa aka wane wayuu nüchuntüle, aapüna amüinchi. Maa aka wane wayuu mekeerüle, nünta anainrü tü nüchajaakat achiki. Maa aka wane wayuu nütaletüle miichoʼu, ajutanna apüleechi». Tü watüjakat sünainjee tü nümakat Jesuu shia masütaajüinjanain waya sünain achuntaa nümüin Jeʼwaa süpüla nükaalinjain waya nükajee chi naaʼinkai.

18. ¿Jamüsü watüjaaka saaʼu naapeechin wamüin Jeʼwaa chi naaʼinkai?

¹⁸ Sünainjee nukuwaʼipa chi wayuu naashajaakai achiki Jesuu, wayaawata aaʼu jamüin naapeechika wamüin Jeʼwaa chi naaʼinkai. Naashin Jesuu, nnojotsü kasain nüsalijaainjatüin chia wayuukai niyaaluʼu chi nüpüshi antakai kaʼlepa aikat. Naapüin chi naʼaleewainkai nümüin tü choʼujaakat nümüin süka masütaajüin nia sünain achuntaa. ¿Kasa nikirajeeka anain Jesuu sükajee tia? Nükaalinjalejeʼe wayuu wanee naʼaleewain, nayeematataaka nnojoliin nükaalinjeematüin Jeʼwaa na masütaajuukana sünain achuntaa chi naaʼinkai nümüin. Watüjaa aaʼu naapeechin wamüin Jeʼwaa chi naaʼinkai wachuntule nia nümüin (Sal. 10:17; 66:19).

19. ¿Jamüsü watüjaaka saaʼu wachechereerüin waaʼin soʼunnaa müliaa?

¹⁹ Jaʼitairü nüchajaain Satanaa sukuwaʼipa süpüla niyamülüin waya, watüjaa aaʼu wachechereerüin waaʼin soʼunnaa tia. ¿Jamüsü wachechereetka waaʼin? Süka nükaalinjeenain waya Maleiwa nükajee chi naaʼinkai sünain piamasü kasa. Palajana, nükatsüinreerü waaʼin soʼunnaa weʼrüin müliaa. Otta tü piamakat shia ayateenain waya sünain aʼyatawaa nümüin Jeʼwaa suluʼuleepa waya tü mma jeketkat; «meerü wakuwaʼipa maʼaka saaʼin sukuwaʼipa wanee anuwa awatannaka oʼuniase». Makalaka wachajaainjatüin maʼin sukuwaʼipa süpüla nuʼunirüin wakuwaʼipa Maleiwa nükajee chi naaʼinkai.