KUKWE JA TÖTIKARA 45
¿Üai deme tä ni dimike ño?
“Ni kätä ja di bien tie ye köböire ti die tärä jondron jökrä kräke” (FILIP. 4:13, TNM).
KANTIKO 104 Jehovata üai deme bien nie
KUKWE NEBÄTÄ JA TÖTIKAI *
1, 2. a) ¿Dreta ni dimike köbö kwatire kwatire näin ja käne? Mä raba mike gare. b) ¿Dre kädriebike kukwe ja tötikara nekänti?
BREN tare o ni mräkä krütani nikän yebe nikwe ja tuani ngwane, “¿se ñokänti ja di kwani tie?” nita nemen ngwentari jai. Nita töbike kore ñan ñobätä aune gare nie, ñan ja di jeñebiti nikwe kä ngwani nüke jai. Ñakare aune köbö kwatire kwatire te nikwe ja tuani kukwe tare ben ngwane, Jehová “di kri” ye ara köböire ni die namani nänkäre ja käne nüke gare nie (2 Cor. 4:7-9).
2 Nita üai deme ribere jai ne kwe ni töi ñaka rabadre nitre ñaka Ngöbö mikaka täte erere (1 Juan 5:19). Aune nita üai deme ye ribere jai rükäre “üai kämekäme [...] di kri” ye rüere arato (Efes. 6:12). Kukwe keta kabre ben nita ja tuin, yebätä üai deme tä ni dimike ño ye nibike mike gare ketebu jai. Ye bitikäre, üai deme käkwe ni dimikadre yekäre nikwe dre nuaindre ye nibike mike gare jai arato.
ÜAI DEME TÄ NI DIMIKE
3. Üai deme tä ni dimike ja tuin kukwe tare ben, ¿ye kukwe meden tä bämike?
3 Kukwe tare yete ta üai deme Jehovakwe ye tä ni mike dite kukweta nuaindre nie ye jökrä nuainkäre. Kukwe tare yete ta apóstol Pablo raba sribire jankunu Jehová kräke nämäne ruin ie, ñan ñobätä aune “Kristo di kri” nämäne niara dimike (2 Cor. 12:9). Pablokwe sribi misionero nuainbare bobukäre ngwane, ja di ngwani krubäte kwe kukwe driekäre aune sribibare kwe ja kräke ja ngübakäre arato. Juta Corinto yete niara namani Áquila bätä Priscila ye gwirete. Áquila bätä Priscila ye nämäne jondron kwata sribere jure. Sribi ye nuain nämäne gare Pablo ie aisete niara nämäne sribire köbö ruäre te niaratre yebe (Hech. 18:1-4). Üai deme käkwe mikani dite sribi ye nuainkäre aune kukwe driekäre.
4. Kukwe nieta 2 Corintios 12:7b-9 erere, ¿kukwe meden ben Pablo nämäne ja tuin?
4 (Ñäkädre 2 Corintios 12:7b-9 yebätä). “Kri tukwä” nämäne ngritekä Pablo ngrabare niebare kwe ngwane, ¿dre gäräbare kwe? Kri tukwä tä niken ni ngätäte ye tare krubäte ¿ñan ererea? Aisete Pablo kri tukwä niebare ye ngwane niara nämäne ja tuin kukwe keteiti ben, köböite nämäne ja tare nike meden gäräbare kwe. Kukwe ben niara nämäne ja tuin ye ketani kwe “Satana” o ángel Satanakwe nämäne niara mike bren o mete ngwärebätä ye kwrere. Satana o chokalitre ye ara köböite kri tukwä ye nikani Pablo ngätäte nie ñaka raba. Ye abokän niaratre ye ñan ai köböite Pablo nämäne ja tare nike. Akwa “kri tukwä” nämäne Pablo ngätäte ye gani üai kämekäme yekwe ngwane, ja töi mikani kwetre krien bäri Pablo ngätäte ngwankäre ja tare nike bäri nie raba. ¿Pablokwe dre nuainbare?
5. Pablokwe kukwe ribebare orasionte, ¿ye Jehovakwe mikani nemen bare ño kräke?
5 Kenanbe Pablo tö namani “kri tukwä” ye diankamana jai. Yebätä niebare kwe: “Tita ja tare nike kore, ye abko ti Dänkien [Jehová] käkwe diandrekä tibtä abko tikwe ribebarera bämä jire ie”. Akwa yebiti ta ja tare nikani jankunu kwe. ¿Jehovakwe ñaka dimikani ai gärätä ya? Ñakare, ye ñan ai gärätä. Kukwe tare ye Jehovakwe ñaka dianinkä niarabätä akwa ja di biani kwe ie ja tuakäre kukwe yebe. Yebätä Ngöbökwe niebare ie: “Ni bobre di ñakare, yebtä abko ti di kri tuata” (2 Cor. 12:8, 9). Ngöbökwe Pablo dimikani yebätä käre kä nämäne jutobätä aune töi nämäne jäme (Filip. 4:4-7).
6. a) ¿Nita orasion nuainne ye köböire Jehová raba ni dimike ño? b) ¿Texto tä mikani párrafo nebätä ye meden tä mä mike bäri dite?
6 Pablo erere, kukwe tare ben nita ja tuin ngwane, ¿Jehovakwe kukwe tare ye diandrekä nibätä ye ni tärä ribere ie? Nita ja di kärere Jehovai akwa yebiti ta kukwe ye tä jankunu o kukwe bäri tare tä nemen bare, aisete Jehová ñan niena ni kain ngäbiti tä nemen ruin nie. Akwa nikwe Pablo ngwandre törö jai. Jehovakwe Pablo dimikani ye erere ni dimikai kwe arato. Kukweta ni kisete ye ñaka diainkä kwe akwa üai deme kwe yebiti ni dimikai kwe ja tuakäre kukwe yebe (Sal. 61:3, 4) Ni nitai tibien akwa Jehovakwe ñaka ni tuainmetre kaibe (2 Cor. 4:8, 9; Filip. 4:13, TNM).
ÜAI DEME TÄ NI TÖI MIKE SRIBIRE JANKUNU JEHOVÁ KRÄKE
7, 8. a) ¿Ñobätä üai deme ye bämika raba murie yebätä? b) ¿Üai deme tä sribire ño ye Pedrokwe ketani drebätä?
7 ¿Üai deme tä ni dimike ño arato? Üai deme ye bämika raba murie yebätä. Ñodre, ru tädre näin mren rubun te akwa ru ye näin medenkwäre yekri murie tädre mate ye raba niken ru ye ngwena nemen kä yekänti. Ye erere arato, kukwe tare ben nita ja tuin ngwane, üai deme Ngöbökwe tä ni dimike ja tuakäre kukwe yebe nememe kä bä nuäre käbämikata Ngöbökwe nie yete.
8 Apóstol Pedro ye ni gwakitaka, aisete blitadre kwe ru mrente yebätä ye nämäne nuäre kräke. Ye medenbätä, blitabare kwe üai deme Ngöbökwe tä sribire ño yebätä ngwane, ketani kwe ru mrente jie ngwanta ño yebätä. Tikani kwe: “Nitre Ngöbö kukwei niekä era metre ye käkwe ñan Ngöbö kukwei niebare jire chi ja töi jenbti au, akwa Ngöbö Üai Deme ara jire käkwe niaratre jie ngwiani”. Kukwe griegore kwitata “jie ngwiani” ye kwitadre jene ngwane niedre kore: “Nikani ngwena” o “jänikani” (2 Ped. 1:21).
9. ¿“Jie ngwiani” niebare Pedrokwe ngwane tö namani nitre tuai töbike drebätä?
9 ¿“Jie ngwiani” niebare Pedrokwe ngwane tö namani nitre tuai töbike drebätä? Pedro kukwe niebare ye erere bäsi Lucas ni tärä Hechos tikaka käkwe tikani blitakäre ru mrente tuanmetreta ngwandre muriei yebätä (Hech. 27:15). Ni ja tötikaka kri käkwe niebare, nitre Biblia tikaka ye “jie ngwiani” niebare Pedrokwe ngwane, tö namani nitre tuai töbike ru mrente yebätä. Ru mrente tä näin kä keteiti kokwäre ye murieta gitekä rabakäre kä yekänti, ye erere üai deme Ngöbökwe käkwe nitre Biblia tikaka jie ngwani Jehová kukwei tikakäre täräbätä. Ni ja tötikaka kri ye arabe käkwe niebare: “Nitre Biblia tikaka ye käkwe vela metaninte ye kwrere nie raba”. Jehovakwe murie mikani mate ye abokän ja üai deme ye biani kwe ietre. Aune nitre Biblia tikaka ye käkwe ja tuanimetre jie ngwandre üai deme yei.
KENA: Käre kukwe ja üaire ye nuaindre
KETEBUKÄRE: Ja di ngwandre kukwe ye nuainne ja di ngöibiti (Párrafo 11 mikadre ñärärä) *
10, 11. ¿Kukwe meden ketebu nikwe nuaindre ne kwe üai deme käkwe ni dimikadre? Mä raba bämike keteiti.
10 Kä nengwane Jehová ñaka niena üai deme yebiti tärä Bibliabätä ye tikamana. Akwa niara täbe ni niara mikaka täte ye jie ngwen üai deme kwe yebiti, aisete Jehová ñan ni tuenmetre kaibe. Ye medenbätä, nikwe ja di ngwandre kukwe ruäre nuainne ne kwe üai deme tä ni jie ngwen ye käkwe kukwe kwin mikadre nemen bare ni kräke. ¿Nikwe dre nuaindre?
11 Töbike kukwe bämikabike nebätä. Ni ru mrente ngwanka ye törbadre murie mate mrenbiti yei ja dimikamana ngwane rabadre kukwe ketebu nuainne. Kena, ni ye rikadre ru ye ngwena nemen murie mate yekänti, ñobätä ñan aune ru ye ñan rabai ja töbiti kä yekänti. Ketebukäre, rabadre vela (dänkwä) mäkäni rubätä ye metete jökrä ne kwe murie ye matadre vela yete käkwe ru ye gitadrekä ja käne. Ye erere arato, üai deme Jehovakwe ye aibe köböire ni raba sribire jankunu kräke. Akwa ni dimikadre kwe yekäre nikwe kukwe ketebu nuaindre. Kena, murieta mate medente ye erere känti nikwe ja mikadre, ye abokän nikwe sribidre Ngöbö kräke ne kwe niarakwe üai deme ye biandre nie. Ketebukäre, nikwe “vela ye metadrete jökrä”, ye abokän ja di ngöibiti nikwe sribi ye nuaindre (Sal. 119:32). Nikwe kukwe ketebu ne erere nuaindi ngwane, üai deme Ngöbökwe ye käkwe ni dimikai jankunu ja käne sribikäre niara kräke aune ja tuakäre nitre tä ja mike ni rüere yebe aune kukwe tare yebe rabakäre kä bä nuäre yete.
12. ¿Drebätä nibike ja tötike?
12 Kukwe ketebu känti üai deme tä ni dimike ye nibira gare nie. Tä ni mike dite aune nita ja tuin kukwe tare ben ngwane tä ni dimike ja ngwen metre. Arato tä ni töi mike sribire jankunu Jehová kräke aune tä ni dimike ne kwe nikwe ñaka kämikadrekä ji niken ni ngwena ja nire kärekäre yebätä. Üai deme käkwe ni dimikadre yekäre nikwe kukwe ketabokä nuaindre yebätä ani ja tötike.
ÜAI DEME NI DIMIKADRE YEKÄRE NE NUAINDRE
13. a) Kukwe nieta 2 Timoteo 3:16, 17 erere, ¿Kukwe Ngöbökwe raba ni dimike ño? b) ¿Nikwe dre nuaindre?
13 Kena, ja tötikadre Ngöbö kukweibätä (ñäkädre 2 Timoteo 3:16, 17 yebätä). * Kukwe griegore kwitata “Ngöbökwe ja töi mikani” ye kwitadre jene ngwane niedre kore: “Ngöbökwe ja murie mikani” o “Ngöbökwe burie täkäni”. Jehovakwe üai deme yebiti ja töi ye “mikani” nitre Biblia tikaka ye töibätä, ne kwe tikadre kwetre täräbätä. Nita ñäke Ngöbö kukweibätä aune nita töbiketaribätä ngwane kukwe ye tä nemen ni töite biti tä nemen ni brukwäte. Kukweta tikani Bibliabätä ye tä ni töi mike nüne Ngöbö tö ie ye ererebätä (Heb. 4:12). Akwa üai deme käkwe ni dimikadre yekäre mantre jetebe nikwe kä diandrekä jai ja tötikakäre Bibliabätä aune kukwebätä nita ja tötike yebätä kä diandrekä jai töbikatarikäre. Ye köböire, nita dre niere aune nita dre nuainne ye nikwe nuaindi kukwe Ngöbökwe ye ererebätä.
14. a) ¿Ñobätä “murieta mate” gätäte nieta nikwe? b) ¿“Vela tädre metaninte jökrä” gätäbätä ye bämikakäre nikwe dre nuaindre?
14 Ketebukäre, Ngöbö mikadre täte gwairebe ja mräkätre ben (Sal. 22:22). Nita gätäte ye ngwane “murieta mate” nie raba, ñobätä ñan aune yete üai deme Jehovakwe tä (Apoc. 2:29). ¿Ñobätä nita ye niere? Ñobätä ñan aune nita ja ükökrö gätäte ngwane, nita üai deme Ngöbökwe kärere orasionte, kantiko kantata ye tä dianinkä Ngöbö Kukwei yebätä aune ja mräkätre kädekani üai deme yebiti tä kukwe kädriere ye kukwe nuata nikwe. Üai deme ye ara tä ja mräkätre merire dimike ja ükatekäre kukwe kädriei kwetre ye kräke aune bämikakäre plataforma yete. Akwa üai deme ye käkwe ni dimikadre ie ti tö ngwane, nikwe ja ükadrete kwin ne kwe nikwe blitadre siba gätäte. Yebiti nikwe bämikai “vela tä metaninte jökrä” ne kwe üai deme käkwe ni dimikadre.
15. Nita kukwe driere ngwane, ¿üai deme ni dimikadre yekäre nikwe dre nuaindre?
15 Ketamäkäre, kukwe driedre. Nita ñäke Bibliabätä, nita kukwe driere aune nitre tötike ngwane nita üai deme yei ja dimikamana (Rom. 15:18, 19). Akwa käre nikwe ja di ngwandre kukwe driere aune Biblia yebiti blitadre nitre ben ne kwe üai deme ye käkwe kukwe kwin mikadre nemen bare ni kräke. Kukwe ja jie ngwankäre gätäte Nita Dirire aune Ja Ngwen Ño yete nikwe blitadre ño nitre ben ye mikata gare, ye erere nikwe nuaindi ngwane ye käkwe ni dimikai blitakäre bäri kwin nitre ben.
16. ¿Dre bäri kwin üai deme ye käräkäre?
16 Ketabokäkäre, oradre Jehovai (Mat. 7:7-11; Luc. 11:13). Orasion ye bäri kwin üai deme ye käräkäre Jehovai. Jondron ñaka raba üai deme ye ketebätä ne kwe rabadre nikwe. Ni tädre kitani ngite akwa üai deme raba ni dimike. Satana ñaka raba kukwe nuainne jire üai deme ye ketabätäkäre (Sant. 1:17). ¿Üai deme ni dimikadre yekäre nikwe orasion nuaindre ño? Kukwe ngwantarita ne mikakäre gare, kukwe bämikani tä tikani tärä Lucas ye aibebätä, yebätä ani ja tötike. *
ORADRE JANKUNU
17. Kukwe bämikani Jesukwe tä Lucas 11:5-9, 13, ¿ye tä dre driere nie orasion yebätä?
17 (Ñäkädre Lucas 11:5-9, 13 yebätä). Jesukwe kukwe bämikani yebiti driebare kwe nie ño nikwe üai deme kärädre. Kukwe bämikani kwe yekänti ni iti ñan namani jakaire aune jondron käräbare bati bobu kwe yebätä jondron ribe nämäne kwe jai ye biani ie. Kä namanina ruäre deu akwa ñaka kä jürä ngwani kwe jabätä ja di käräkäre ja ketamuko kwe yei (nota ja tötikakäre “persistencia atrevida” tä Kukwe ja jie ngwankäre gätäte Nita Dirire aune Ja Ngwen Ño julio 2018 yebätä ye mikadre ñärärä). ¿Kukwe bämikani ye Jesukwe ketani ño orasion yebätä? Kukwe ne niebare kwe: “Käre munkwe jändrän kärä Ngöböye amne Ngöbökwe biandi munye. Erere arato, munkwe jändrän känäntari Ngöbö känti amne kwandi munye. Erere arato, [...] käre munkwe jändrän kärä jukwebtä Ngöböye angwane, Ngöbökwe jukwe tikadi, käkwe biandi munye”. Kukwe ne tä driere nie, üai deme ni dimikadre yekäre nikwe kärädre jankunu orasionte.
18. ¿Jehovakwe üai deme ye biain nie ye ñobätä gare metre nie?
18 Ñobätä Jehovakwe üai deme biain nie ye kukwe bämikani ne tä ni dimike mike nüke gare jai arato. Ni itibätä Jesukwe blitabare ye tö namani ni basaka nükani kä rairebiti deu ye kain ngäbiti kwin. Mrö ñan namani basaka bukara ie yebätä ja namani ruin ngite ie. Jesukwe niebare, ni nünanka ni ye ken käkwe ban biani ie basaka bukara, ñobätä ñan aune ñaka namani jakaire aune bati bobu ban käräbare kwe. ¿Jesús tö namani dre driei nie? Ni iti töi ngite akwa nämäne juto ni mada dimikakäre, aisete ni Rün kä kwinbiti ye bärira jire tä juto biare üai deme ye biankäre nie nikwe käräi bati bobu ie ye ngwane. Ye medenbätä nikwe üai deme ye kärädre Jehovai aune niarakwe biain nie ye tädre gare metre nie (Sal. 10:17; 66:19).
19. ¿Nikwe satana ganaindi ye ñobätä gare metre nie?
19 Satana ñaka ja di ngwain nekä ne kwe nikwe kämikadrekä Jehovabätä akwa yebiti ta nikwe Satana ganaindi ye gare metre nie. ¿Ñobätä ye gare nie? Ñobätä ñan aune üai deme ye tä ni dimike kukwe ketebu känti. Kena, tä ja di bien nie ja tuakäre kukwe tare yebe. Ketebukäre murieta mate “velabätä” ye kwrere tä ni dimike sribire jankunu Jehová kräke nememe kä bä nuäre yete. Ye medenbätä ani ja töi mike kwatibe ne kwe üai deme ye käkwe ni dimikadre aune kukwe kwin mikadre nemen bare kwe ni kräke.
KANTIKO 41 Ti kukwe nuin Jehová
^ párr. 5 Üai deme Ngöbökwe ye köböire ño nita kä ngwen nüke jai ye mikata gare kukwe ja tötikara nekänti. Ne madakäre üai deme käkwe ni dimikadre yekäre dre nuaindre ye kädriebike nete arato.
^ párr. 13 2 Timoteo 3:16, 17, (TNM): “Kukwe jökrä Tikani yebätä Ngöbökwe ja töi mikani aune kwin krubäte ni tötikakäre, ni töi ükatekäre, kukwe ükatekäre metre, mäträkäre kukwe metrebiti, ne kwe ni Ngöbö mikaka täte rabadre töbätä aune tädre juto biare kukwe kwin jökrä nuainkäre”.
^ párr. 16 Orasion ye nämäne ütiäte krubäte Jesús kräke ye Lucas ni tärä tikaka Jesubätä kätä mike gare bäri merebe nie (Luc. 3:21; 5:16; 6:12; 9:18, 28, 29; 18:1; 22:41, 44).
^ párr. 60 KUKWE MIKATA GARE ÜAIBÄTÄ. KENA: Ja mräkä nü muko kwe ben Ju Ja Ükarakrö yete. Tä gätäbätä ja mräkätre ben aune yete üai deme Jehovakwe tä. KETEBUKÄRE: Tätre juto biare blitakäre gätäte. Nita ja tötike Ngöbö kukweibätä, nita niken kukwe driere aune nita orare Jehovai ngwane, üai deme tä yekänti nikwe ja mikadre aune sribi nuaindre ja di ngöibiti.
