1-2. (a) Dahaka ese ita ia durua dina ta ta ai ita haheauka totona? Herevalaia. (b) Inai atikol ai dahaka do ita herevalaia?

NEGA ta inai bamona oi hereva: “Lau davaria hahetoho lau laloa lou neganai, lau mamia lau sibona ese unai lau haheaukalaia diba lasi.” Reana ita momo be gorere badana ta eiava iseda lalokau tauna ta ena mase ita haheaukalaia karana ita laloa lou neganai, unai bamona ita hereva. Idia vara gaudia oi laloa lou neganai, oi mamia dina ta ta ai oi haheauka diba badina Iehova ena lauma helaga ese oi dekenai “taunimanima edia siahu ia hereaia gauna” ia henia.​—2 Kor. 4:7-9.

² Lauma helaga ena heduru ita abia be namo, inai tanobada dikana ena ura idauidau ita dadaraia totona. (1 Ioa. 5:19) Danu, ita gaukara goada noho “lauma dikadia” ita tuari henia totona. (Efe. 6:12) Unai lalohekwarahi gaudia ibounai amo, lauma helaga ese ita ia durua daladia rua do ita herevalaia. Bena lauma helaga amo heduru ita abia totona, ita karaia gaudia do ita herevalaia.

3. Iehova ese edena dala ai ita ia durua hahetoho ita haheaukalaia totona?

³ Iehova ena lauma helaga ena heduru amo siahu bona goada ita abia iseda asainmen ita hagugurua totona, herevana hekwakwanai idia vara. Aposetolo Paulo be Iehova ia hesiai henia noho herevana hahetoho idia vara, badina ia be “Keriso ena siahu” dekenai ia tabekau. (2 Kor. 12:9) Paulo be ena misinari loaloa iharuana ai, haroro gaukara sibona ia karaia lasi, to gaukara sisina ia karaia danu unai amo sibona ia naria totona. Ia be Korinto dekenai Akwila bona Prisikila edia ruma dekenai ia noho. Idia be palai ruma turia taudia. Paulo be palai ruma turia dalana ia diba dainai, idia ida ia gaukara hebou. (Kara 18: 1-4) Lauma helaga ese Paulo dekenai siahu ia henia dainai, sibona durua totona gaukara sisina ia karaia bona ena haroro gaukara ia hagugurua.

4. Korinto Iharuana 12:7b-9 ena hereva bamona, Paulo be dahaka hahetoho ia davaria?

⁴ Korinto Iharuana 12:7b-9 duahia. Inai siri ai Paulo ia gwau, “ginigini ta ese egu tauanina ia gwadaia,” unai hereva ena anina be dahaka? Bema ginigini ta ese emu tauanina ia gwadaia, hisihisi bada do oi mamia. Paulo ena hereva ena anina be ia be hahetoho ta ia haheaukalaia noho. Ia gwau unai hahetoho be “Satani ena gaukara tauna bamona,” Paulo ia “hahisia noho.” Reana Satani bona demoni ese Paulo ia davaria hahetoho​—ginigini ese tauanina ia gwadaia bamona hahetoho​—idia havaraia lasi. To, unai lauma dikadia ese Paulo ia mamia hahetoho idia dibaia neganai, idia ura iena hisihisi idia habadaia, unai be ginigini ese ta ena tauanina ia gwadaia bona lalona momokani dekenai ia vareai bamona. Paulo be dahaka ia karaia?

5. Edena dala ai Iehova ese Paulo ena guriguri ia haerelaia?

⁵ Matamanai, Paulo ia ura Iehova ese unai “ginigini” do ia kokia. Ia gwau: “Nega toi Lohiabada [Iehova] lau noia unai ginigini ia kokia totona.” Herevana Paulo ia guriguri, to unai hahetoho ia do mamia noho. Unai ena anina be Iehova ese Paulo ena guriguri ia haerelaia lasi, a? Lasi. Iena guriguri ia haerelaia. Iehova ese unai hahetoho ia kokia lasi, to Paulo dekenai goada ia henia ia haheaukalaia totona. Iehova ia gwau: “Oi manoka neganai, egu siahu be oi amo ia hedinarai goevagoeva.” (2 Kor. 12:8, 9) Bona Dirava ena heduru dainai Paulo be ia moale bona lalomaino ia abia!​—Fili. 4:4-7.

6. (a) Edena dala ai Iehova ese iseda guriguri do ia haerelaia? (b) Edena Baibel siridia ese oi dekenai goada ia henia?

⁶ Paulo bamona, nega ta Iehova oi noia oi davaria hahetoho ta ia kokia totona, a? Herevana oi guriguri goadagoada to unai hahetoho be ia do vara noho, oi laloa Iehova be oi ia laloa lasi, a? Bema oibe, Paulo ena haheitalai oi laloa. Iehova ese Paulo ena guriguri ia haerelaia hegeregerena, ia ese emu guriguri do ia haerelaia! Iehova ese unai hahetoho do ia kokia lasi. To, ia ese lauma helaga amo oi dekenai goada do ia henia unai hahetoho oi haheaukalaia totona. (Sal. 61:3, 4) Reana ‘hisihisi idauidau ese oi do idia hametaua’ to Iehova be oi do ia rakatania lasi.​—2 Kor. 4:8, 9; Fili. 4:13.

7-8. (a) Edena dala ai lauma helaga be lai bamona? (b) Petero ese lauma helaga ena gaukara dalana be edena bamona ia herevalaia?

⁷ Lauma helaga ese edena dala ma ta ai ita ia durua? Bouti ta be lai namona ese ia durua bona hurehure badadia ia hanaia hegeregerena, lauma helaga ese ita ia durua hahetoho badadia ita haheaukalaia totona, unai amo Dirava ena tanobada matamatana ai ita ginidae.

⁸ Aposetolo Paulo be haoda tauna dainai, davara dekenai bouti amo loaloa dalana ia diba. Unai dainai ia ese lauma helaga ena gaukara dalana ia herevalaia neganai, bouti be davara ai ia loaloa karana ida ia hahegeregerea. Ia gwau: “Peroveta herevadia be tau ta ese sibona ena ura dekenai ia gwauraia lasi, to lauma helaga ese taunimanima ia hasiahua hegeregerena, idia ese Dirava amo idia mai hereva idia gwauraia.”​—2 Pet. 1:21.

9. Petero ia gwau Baibel torea taudia be lauma helaga ese ia “hasiahua” neganai, ia ura taunimanima be dahaka idia laloa?

⁹ Petero ese edena laulau herevana ia gaukaralaia inai hereva “hasiahua” ena anina ia hahedinaraia totona? Kara bukana ia torea tauna Luka ese Grik herevana ma ta ia gaukaralaia danu, bouti be davara latanai lai ese ia “odaia lao” karana ia hahedinaraia totona.  (Kara 27:15) Baibel ia diba namonamo tauna ta ia gwau, Petero ese Baibel torea taudia be lauma helaga ese ia “hasiahua” karana ia herevalaia neganai, ia gaukaralaia herevana amo ia ura taunimanima be bouti ta mai ena palai be lai ese ia odaia lao idia laloa. Petero ia gwau, bouti ta be ia lao henia gabuna dekenai ia ginidae totona lai ese ia odaia lao hegeregerena, Baibel ena peroveta herevadia idia torea taudia be lauma helaga ese ia hasiahua dainai edia gaukara idia hagugurua. Baibel torea tauna ma ia gwau: “Peroveta taudia be idia noho hegaegae lauma helaga ena heduru amo edia gaukara idia karaia totona.” Iehova be idia durua totona gau haida ia karaia. Ia ese “lai” eiava lauma helaga ia henia. Baibel torea taudia danu be edia gaukara idia karaia. Idia be lauma helaga ena hakaua henunai idia gaukara.

10-11. Edena dala rua ita badinaia be namo unai amo ita hahedinaraia lauma helaga ese ita ia durua? Haheitalai gwauraia.

¹⁰ Iehova ese hari lauma helaga amo taunimanima ia hasiahua lasi Baibel idia torea totona. To, Iehova be ena lauma helaga amo ena hesiai taudia ia durua noho. Iehova be idia ia do durua noho. Edena dala ai Dirava ena lauma helaga amo heduru ita abia diba? Namona be iseda gaukara ita karaia noho. Edena dala ai unai do ita karaia?

¹¹ Mani inai haheitalai ita laloa. Bouti ia taria tauna be lai amo heduru ia abia totona, gau rua ia karaia be namo. Ginigunana be, ena bouti ena vairana be lai ia odaia lao gabunai do ia atoa. Bema bouti ia taria tauna be lai ia toa gabuna amo ia noho daudau bouti be gabu ma ta ai ia lao diba lasi. Iharuana be, bouti taria tauna ese ena palai ia kehoa be namo. Momokani, ena be lai ia toa to bouti be gabu ma ta ia lao diba bema lai ese palai ia odaia. Unai hegeregerena, Iehova ena hesiai gaukara lalonai ita haheauka diba bema lauma helaga ena heduru ita abia. Lauma helaga amo heduru ita abia totona gau rua ita karaia be namo. Ginigunana, Dirava ese ena lauma helaga amo iena hesiai taudia dekenai ia henia gaukara idauidau  ita karaia be namo. Iharuana, mai goada ibounai ida Iehova ena gaukara idauidau ita karaia be namo. (Sal. 119:32) Bema unai dala rua ita badinaia, lauma helaga ese ita do ia durua bena hurehure bamona hekwakwanai bona hahetoho idauidau do ita hanaia bona mai abidadama bona haheauka ida Dirava ena tanobada matamatana do ita naria.

12. Hari, dahaka do ita herevalaia?

¹² Lauma helaga ese ita ia durua daladia rua ita herevalaia vadaeni. Lauma helaga ese ita dekenai siahu ia henia bona ita ia durua, hahetoho negadiai ita haheauka noho totona. Danu lauma helaga ena heduru dainai mauri ia lao henia ena dala dekenai ita raka noho. Hari, lauma helaga ena heduru amo namo ita abia totona, do ita karaia gaudia foa mani ita herevalaia.

13. Timoteo Iharuana 3:16, 17 ena hereva bamona, edena dala ai Baibel ese ita ia durua diba, to dahaka ita karaia be namo?

¹³ Ginigunana, Dirava ena Hereva stadilaia. (2 Timoteo 3:16, 17 duahia.) Dirava ese ena lauma helaga ia gaukaralaia Baibel torea taudia dekenai iena lalohadai ia hadibaia totona. Baibel ita duahia bona laloa dobu neganai, Dirava ena hakaua herevadia be iseda lalona bona kudouna dekenai idia vareai. Unai hakaua herevadia ese ita idia durua iseda mauri lalonai Dirava ena ura ita badinaia totona. (Heb. 4:12) To, lauma helaga amo heduru ita abia totona, namona be nega ita atoa Baibel ita stadilaia hanaihanai bona ita duahia gaudia ita laloa dobu. Bena, Dirava ena Hereva ese iseda hereva bona kara do ia biagua.

14. (a) Dahaka dainai ita gwau diba iseda Keristani heboudia be “lai ia toa” gabuna bamona? (b) Hebou dekenai lauma helaga ena heduru ita abia totona dahaka ita karaia be namo?

¹⁴ Iharuana, Dirava tomadiho henia. (Sal. 22:22) Ita gwau diba, iseda Keristani heboudia be “lai ia toa” gabuna bamona. Badina Iehova ena lauma helaga be hebou gabudia dekenai ia noho. (Apok. 2:29) Dahaka dainai unai bamona ita gwau? Badina iseda tadikaka taihu ida tomadiho totona ita hebou neganai, lauma helaga totona ita guriguri, Basileia anedia ita abia, bona lauma helaga amo idia abia hidi tadikaka ese idia henia Baibel ena hakaua herevadia ita kamonai. Danu, lauma helaga ese taihu ia durudia edia kahana idia hegaegaelaia bona idia henia totona. To, lauma helaga ena heduru ita abia totona, namona be hebou gaudia ita hegaegaelaia namonamo bona haere ita henia. Unai amo hebou dekenai ita lao neganai, ita hegaegae vadaeni lauma helaga amo heduru ita abia totona.

15. Edena dala ai lauma helaga ese haroro gaukara ai ita ia durua?

¹⁵ Ihatoina, haroro gaukara karaia. Haroro bona hahediba gaukarana ai Baibel ita gaukaralaia neganai, lauma helaga ese iseda haroro gaukara ia durua. (Roma 15:18, 19) To, lauma helaga amo heduru ita abia totona, namona be haroro gaukara ita karaia hanaihanai bona dala idauidau ai Baibel ita gaukaralaia. Haroro gaukara ai taunimanima ida oi herevahereva namonamo totona, Haroro Bona Mauri Dalana​—Hebou Pepana ai idia noho haroro herevadia oi gaukaralaia diba.

16. Edena dala ai lauma helaga ena heduru oi abia diba?

¹⁶ Ihahanina, Iehova guriguri henia. (Mat. 7:7-11; Luka 11:13) Lauma helaga ena heduru oi abia totona, namona be guriguri amo Iehova oi noia. Gau ta ese guriguri amo Iehova ena lauma helaga ita noia karana ia koua diba lasi​—herevana dibura ruma dekenai ita noho eiava Satani ese ita ia koua toho. (Iam. 1:17) Edena bamona do ita guriguri, unai amo lauma helaga amo heduru ita abia? Haere ita diba  totona, mani Luka ena Evanelia bukana ese guriguri karana ia herevalaia dalana ita itaia. *

17. Luka 11:5-9, 13 ai, Iesu ese guriguri karana ia herevalaia ena haheitalai amo dahaka ita dibaia?

¹⁷ Luka 11:5-9, 13 duahia. Iesu ena haheitalai ese lauma helaga ena heduru ita noia dalana ia hahedinaraia. Unai haheitalai lalonai, unai tau be “ia noinoi loulou dainai” ia ura henia gauna ia abia. Unai tauna ia gari lasi ena turana ia noia totona, herevana unai be hanuaboi momokani. (Luka 11:8) * Edena dala ai Iesu ese unai haheitalai be guriguri karana ida ia hahegeregerea? Ia gwau: “Umui noinoi noho, bona umui dekenai do idia henia. Umui tahua noho, bona do umui davaria, bona iduara dekenai umui pidipidi noho, bena do idia kehoa.” So, dahaka ita dibaia? Lauma helaga ena heduru ita abia totona, namona be ita noinoi loulou.

18. Iesu ena haheitalai bamona, dahaka dainai ita abia dae Iehova ese ita dekenai lauma helaga do ia henia?

¹⁸ Iesu ena haheitalai ese ita ia durua Iehova ese ita dekenai lauma helaga ia henia ena badina ita lalopararalaia totona. Haheitalai ese ia herevalaia tauna be ia ura heabidae tauna namona ai ia lao. Ia ura bada hanuaboi momokani dekenai iena vadivadi tauna totona aniani haida ia henia, to ia dekenai be gau ta ia noho lasi. Iesu ia gwau unai tauna be ena turana amo ia noia paraoa ia abia, badina ia noinoi loulou. Iesu ena hereva anina be dahaka? Bema goevadae lasi tauna ta ese ena noinoi loulou turana ta ia durua, ita diba momokani iseda guba Tamana ese lauma helaga totona idia noinoi loulou taudia do ia durua! Unai dainai ita abia dae momokani lauma helaga totona ita noinoi neganai, Iehova ese iseda guriguri do ia haerelaia.​—Sal. 10:17; 66:19.

19. Dahaka dainai ita abia dae do ita kwalimu?

¹⁹ Ita diba herevana Satani be dala idauidau ai ita ia tohoa, to do ita kwalimu. Dahaka dainai? Badina lauma helaga be dala rua amo ita ia durua. Ginigunana, ita dekenai goada ia henia hahetoho idauidau ita haheaukalaia totona. Iharuana, ita dekenai siahu ia henia Iehova ita hesiai henia noho ela bona tanobada matamatana ia vara. Namona be iseda lalona ita hadaia lauma helaga ena heduru ita abia totona!