1-2. (a) Otjikeṋa tji tji tu vatera okutuurunga omauzeu eyuva arihe? Kahurura. (b) Morupa ndwi matu ke rihonga tjike?

“INDU tji me ripura ohunga nouzeu mbu mba tuurunga, mbi tjiwa kutja he tje tuurunga nomasa wandje omuini.” Hapo ove wa rora okutja nao? Otjingi tjetu twa rora. Ngahino ove wa rora okutja nao indu tji wa za nokutuurunga ouvere ouzeu, poo onḓiro yomusuverwa woye. Indu tji mo ripura ohunga nouzeu mbo, ove u muna kutja Jehova we kupa “omasa nge kapita avihe” okutuurunga ouzeu mbo.—2 Kor. 4:7-9.

² Eṱe wina tu hepa ombatero yombepo ondjapuke okunakaura ovitjitwa vyouye ourunde mbwi. (1 Joh. 5:19) Nu wina tu hepa omasa okurwisa ‘ozombepo ozonamasa zouye ourunde mbwi.’ (Ef. 6:12) Matu ke rihonga omiano vivari ombepo ondjapuke mu i yenena okutuvatera momauzeu ayehe ngo. Nokutja ovikwaye mbi matu yenene okutjita kutja tu mune ouwa okuza kombepo ondjapuke.

3. Omuano uṋe warwe Jehova me tu vatera okutuurunga omauzeu?

³ Ombepo ya Jehova ondjapuke i tupa omasa okuyenenisa oviṋa mbi matu sokuungura nandarire indu tji tu ri kehi yomauzeu. Omuapostele Paulus wa kayenda komurungu okukarera Jehova nandarire kehi yomauzeu, mena rokutja eye ee riyameke ‘komasa wa Kristus.’ (2 Kor. 12:9) Mouyenda we outjavari otjomuhindwa, Paulus kaa ungura oukukutu uriri motjiungura tjokuzuvarisa, nungwari wina aa ungura oviungura okuritumba omuini. Eye aa kara moKorinte poya Akuila na Priskila. Owo aave ungura ozonguyu. Mena rokutja Paulus wa ri omuungure wozonguyu, eye aa ungura puna wo omayuva tjiva. (Oviung. 18:1-4) Ombepo ondjapuke ya vatera Paulus okuungura oviungura  mbyo, nokuyenenisa otjiungura tje tjokuzuvarisa.

4. Otja 2 Ovakorinte 12:7-9, Paulus wa ri nouzeu wa ye?

⁴ Lesa 2 Ovakorinte 12:7-9. Momazeva nga, hapo Paulus aa hee tjike indu tja tja u ‘nokuiya monyama’? Indu ove tji wa tekerwa i yokuiya mombaze mo kara momihihamo omingi. Kunao Paulus aa hee kutja wa hihamisiwa i yomauzeu omengi pekepeke. Eye wa tja omauzeu we ngo ya ri “otja omuhindwa wa Satan” ngwee ‘mutono ozongomi.’ Ngahino Satan nozondemone ze ka mba tjita kutja Paulus ma kare nomauzeu nga ri tjimuna okuiya monyama. Posi yokutja Satan nozondemone ze tji va muna ouzeu Paulus mbwa ri nawo, owo mape ya va kondja okutjita kutja ouzeu mbo uririre ko ounene. Iho tja ri tjimuna omundu ngu ma ṋiṋikizire okuiya mombaze. Hapo Paulus wa tjita vi?

5. Jehova wa zira vi ozongumbiro za Paulus?

⁵ Rutenga, Paulus aa vanga kutja Jehova ma isapo “okuiya.” Eye wa tja: “Tutatu mba kumba ku Muhona kutja a ise po otjiṋa hi ku ami.” Nandarire kutja Paulus wa kumba, Jehova ka isapere okuiya monyama. Hapo ihi matji hee kutja Jehova kazirire ozongumbiro za Paulus? Kako katjiperi, eye wa zira. Jehova kaisapere ouzeu mbo, posi yokutja eye we mu pa omasa wokutuurunga. Jehova wa tja: “omasa wandje maye yenenisiwa indu tji wa ngundipara.” (2 Kor. 12:8, 9) Nombatero ya Mukuru, Paulus wa yenena okutjinda ouzeu we mbo nondjoroka nohange momuinyo.—Fil. 4:4-7.

6. (a) Jehova u zira vi ozongumbiro zetu? (b) Omakwizikiro yeṋe nge ri momatjangwa moparagrafa ndji nge kupa omasa?

⁶ Tjimuna Paulus, hapo ove wa rora okuriheka ku Jehova okuisapo ouzeu wo ye? Hapo oo ripura kutja Jehova ke nonyuṋe move mena rokutja ouzeu wo ye mbo aau kurireko? Tjiperi nao, zemburuka otjihorera tja Paulus. Tjimuna Jehova tja zira ozongumbiro ze, eye wina ma ziri ozongumbiro zo ye. Jehova mape ya aha isapo ouzeu wo ye. Posi yokutja eye me kupe omasa okupitira mombepo ye ondjapuke kutja u tuurunge ouzeu wo ye. (Eps. 61:3, 4) Nandarire kutja “tu vandwa pehi” i yomauzeu ngu tu muna, Jehova ketu imbirahi.—2 Kor. 4:8, 9; Fil. 4:13.

7-8. (a) Omomuano uṋe ombepo ondjapuke mu i ri tjimuna ombepo? (b) Petrus wa kahurura vi omuano ombepo ondjapuke mu i ungura?

⁷ Omuano uṋe warwe ombepo ondjapuke mu i yenena okutuvatera? Ombepo ondjapuke mai yenene okusasanekwa nombepo. Oskepi i yenena okuhingwa i yombepo momuhunga omusemba kutja i kavaze nawa, nandarire kutja ozongazona zokuvare ozonḓeu. Momuano otjingewo, ombepo ondjapuke i tu vatera kutja tu kayende komurungu okukarera Jehova nandarire kehi yomauzeu, nga mouye oupe Mukuru mbwe tu kwizikira.

⁸ Omuapostele Petrus wa ri omupate womahundju, mena ra nao eye wa ri nondjiviro onyingi yokuhinga ozoskepi. Eye wa sasaneka omuano ombepo mu i hinga ozoskepi ku nomuano ombepo ondjapuke mu i ungura. Eye wa tja: “Orondu kape nomaprofetero nge hi na indu ya zire mombango yomundu. Nungwari imba ovandu iyave hingwa i Ombepo Ondjapuke, tjiyave hungire ombuze ndja zire ku Ndjambi.” Embo ndi “hingwa” mOtjigrike ri heya okuhinga otjiṋa.—2 Petr. 1:21.

9. Petrus aa hee tjike indu tja ungurisa omambo nga “iyave hingwa”?

⁹ Hapo Petrus aa hee tjike indu tja ungurisa omambo nga “iyave hingwa”? Lukas, omutjange wembo rOviungura wina wa ungurisa embo rOtjingrike tjimuna ndo okukahurura oskepi ndji mai ‘twarewa’ poo okuhingwa i yombepo. (Oviung 27:15) Omukonḓonone umwe wa tja, indu Petrus tja tjanga kutja ovatjange vOmbeibela “i yave hingwa,” i yombepo ondjapuke, eye  wa ungurisa omambo ngaa ye tjiti kutja ovandu ve ripure ohunga nokuhinga oskepi. Petrus aa tja, tjimuna oskepi tji i hingwa i yombepo okuvaza koṋa ku mai i, momuano otjingewo ovaprofete novatjange vOmbeibela i yave hingwa i yombepo ondjapuke okuyenenisa oviungura vyawo. Omukonḓonone ngo wina wa tja ovatjange vOmbeibela va ri tjimuna ozoskepi nḓaaze “hingwa i yombepo.” Owo va ri ava rongere okuungura otjiungura ngamwa atjihe ombepo tji mai ve hingi okuungura. Jehova wa yandja “ombepo” poo ombepo ye ondjapuke. Ovatjange vOmbeibela aave ungura oviungura mbi va perwe okuungura, nu aave kongorere omuhunga wombepo ondjapuke.

10-11. Ovikeṋa vivari mbi matu hepa okutjita kutja tu hongorerwe po i yombepo ondjapuke? Yandja otjihorera.

¹⁰ Otjiperi kutja Jehova ndino kaungurisa ombepo ye ondjapuke okuvatera ovandu okutjanga omambo wOmbeibela. Posi yokutja, eye ngamba u ungurisa ombepo ye ondjapuke okuhongorera po ovakarere ve. Hapo matu munu vi ouwa mombepo ye ondjapuke? Eṱe matu hepa okukayenda komurungu okutjita ombango ya Jehova. Hapo omomuano uṋe mu matu yenene okutjita nao?

¹¹ Ripura notjihorera hi. Indu omuhinge woskepi tji ma vanga kutja ombepo i mu vatere, eye ma sokutjita oviṋa vivari mbi. Rutenga, ma sokuhinga oskepi komunda ombepo ku mai i. Posi yokutja oskepi kamaai kayenda komurungu indu tji iri potjikuturiro tjozoskepi, kokure nombepo ku mai hingi. Otjitjavari, eye ma sokupaturura ozosaira zoskepi kutja oskepi i hingwe i yombepo. Nandarire kutja ombepo mai hingi, oskepi kamaai i komurungu pendje na indu tji wa paturura ozosaira. Momuano otjingewo, nombatero yombepo ondjapuke eṱe matu yenene okukayenda komurungu okukarera Jehova. Kutja tu mune ouwa okuza kombepo ye ondjapuke eṱe matu sokutjita oviṋa vivari mbi. Rutenga, matu sokuungura oviṋa mbi tjita kutja tu hongorerwe i yombepo ondjapuke. Otjitjavari, matu hepa okuungura oviṋa mbyo  otja pu matu yenene. (Eps. 119:32) Indu tji twa tjiti oviṋa mbyo, ombepo ondjapuke mai tupe omasa okupanḓera pokukarera Jehova nouṱakame nga tji twa hiti mouye oupe wa Mukuru.

12. Matu ka hungirira ku ye?

¹² Twa hungire omiano vivari ombepo ondjapuke mu mai yenene okutuvatera. Ombepo ondjapuke i tupa omasa nu i tu vatera okupanḓera pouṱakame indu tji tu ri momarorero. Ombepo ondjapuke wina i tu hongorera po nokutuvatera okutjita oviṋa avihe Jehova mbye vanga kutja tu tjite, kutja tu kamune omuinyo wa aruhe. Nai matu ka hungirira koviṋa vine mbi matu sokutjita kutja tu mune ouwa mombepo ondjapuke.

13. Otja 2 Timoteus 3:16, 17, Omatjangwa maye tu vatere vi, nu eṱe matu sokutjita vi?

¹³ Otjitenga, konḓonona Embo ra Mukuru. (Lesa 2 Timoteus 3:16, 17.) Omambo nga “nombatero yOmbepo ya Ndjambi” mOtjingrike ye heya kutja “Mukuru wa suvana.” Mukuru wa ungurisa ombepo ye “okusuvana” poo okusuvira ouripura we mourizemburuka wovatjange wOmbeibela. Indu tji matu lese Ombeibela nokuripurira ko oukoto ku imbi mbi matu lese, omarakiza wa Mukuru ye kara mourizemburuka na momutima wetu. Omarakiza ngo ye tjita kutja tu tjite omarundurukiro mehupo retu okuyorokisa Jehova. (Hebr. 4:12) Tji matu vanga okumuna ouwa okuza kombepo ondjapuke, matu sokutwapo oruveze okukonḓonona Ombeibela eyuva arihe nokuripurira ku imbi mbi twa lese. Kunao Embo ra Mukuru ma ri ṱunu ku imbi avihe mbi matu hungire nokutjita.

14. (a) Ongwaye tji matu tja ombepo ya Mukuru i kara pozombongarero zOvakriste? (b) Matu munu vi ouwa okuza kombepo ondjapuke pozombongarero zombongo?

¹⁴ Otjitjavari, rikotameneye pamwe. (Eps. 22:22) Pozombongarero zOvakriste pe kara ombepo ya Jehova. (Omavan. 2:29) Ongwaye tji matu tja nao? Mena rokutja, pozombongarero zombongo tu ningira ombepo ondjapuke mongumbiro, nu tu imbura omaimburiro wOuhona nga zikamena kEmbo ra Mukuru, nokupuratena kehungi rOmbeibela ndi yandjwa i yovarumendu ovakambure mba zikwa i yombepo ondjapuke. Nu wina ombepo ondjapuke i vatera ovakazendu ovakambure okurirongerisa nokuyandja otupa twawo. Kutja tu mune ouwa okuza kombepo ondjapuke matu hepa okurirongerisa nawa kutja tu kazire mombongo. Kunao, eṱe tji tu ri pozombongarero zombongo tu muna ouwa mbu za kombepo ondjapuke tjimuna oskepi tji i muna omasa kosaira ndja paturuka.

15. Ombepo ondjapuke i tu vatera vi motjiungura tjokuzuvarisa?

¹⁵ Otjitjatatu, kara norupa motjiungura tjokuzuvarisa. Indu tji matu ungurisa Ombeibela motjiungura tjokuzuvarisa, tu yandjera ombepo ondjapuke okukara norupa motjiungura ho. (Rom. 15:18, 19) Kutja u mune ouwa okuza kombepo ondjapuke, ove mo sokukara norupa motjiungura tjokuzuvarisa aruhe nokuungurisa Ombeibela yoye. Omuano umwe mu mo yenene okukara nomahungi omawa ku novandu motjiungura tjokuzuvarisa omokuungurisa ovihorera vyokuzuvarisa mbi ri mokambo nga, Ehupo retu rOukriste notjiungura tjetu tjokuzuvarisa.

16. Omuano uṋe warwe mu matu yenene okumuna ombepo ondjapuke?

¹⁶ Otjitjaine, kumba ku Jehova. (Mat. 7:7-11; Luk 11:13) Omuano warwe mu matu yenene okumuna ombepo ondjapuke okuningira ku Jehova mongumbiro. Kape notjiṋa tji matji yenene okutjaera ozongumbiro zetu ku Jehova poo okutjaera otjiyandjewa tjombepo ondjapuke. Ombepo ondjapuke mai yenene okutuvatera nandarire tji tu ri motjovakamburwa nu Satan kamaa yenene okuitjaera. (Jak. 1:17) Hapo matu sokukumba vi kutja tu mune ouwa okuza kombepo ondjapuke? Okuzira epuriro ndo,  ngatu konḓonone ongumbiro okuza kotjihorera tji tja tjangwa mEvangeli ra Lukas uriri. *

17. Matu rihongo tjike kotjihorera tja Jesus ohunga nongumbiro ndja tjangwa mu Lukas 11:5-9, 13?

¹⁷ Lesa Lukas 11:5-9, 13. Otjihorera tja Jesus matji raisa kutja eṱe matu sokukumba vi kutja tu mune ombepo ondjapuke. Motjihorera ho, omurumendu wa muna imbi mbyaa hepa mena rokutja eye aa “ningire ingwi okuningira.” Eye kaa tira okuningira ombatero kepanga re nandarire kutja ya ri ouṱuku. * Jesus wa sasaneka vi otjihorera hi ku nongumbiro? Eye wa tja: “Ningireye nu mamu pewa; paheye nu mamu munu; kongoreye nu mamu patururirwa.” Matu rihongere ko tjike? Kutja tu mune ombatero yombepo ondjapuke, matu sokupanḓera pokukumba.

18. Otja kotjihorera tja Jesus, ongwaye tji tu nongamburiro kutja Jehova me tupe ombepo ye ondjapuke?

¹⁸ Otjihorera tja Jesus tji tu vatera okumuna kutja ongwaye Jehova tji me tupe ombepo ondjapuke. Omurumendu motjihorera aa vanga okurira omusekirise omuwa. Eye aa munu kutja ma sokuyandja ovikurya komuyenda we ngwe ya mouṱuku, posi yokutja kaari notjiṋa. Jesus wa tja omuraranganda wa yandja omboroto komurumendu ngo mena rokutja eye wa panḓera pokuningira. Hapo Jesus aa hongo tjike? Tjinangara omundu ngu he ri ohomonena wa yenena okuvatera omuraranganda ngwa panḓera pokuningira, eṱe tjiri tu nongamburiro kutja Tate wetu worusuvero womeyuru ma yandja ombepo ye ondjapuke ku imba mbu mave panḓere pokuningira. Kunao, matu yenene okukara nongamburiro kutja Jehova ma yenene okuzira ozongumbiro zetu indu tji twa ningire ombepo ondjapuke.—Eps. 10:17; 66:19.

19. Ongwaye tji tu nongamburiro kutja matu yenene okupanḓerapo?

¹⁹ Eṱe matu yenene okupanḓerapo nandarire kutja Satan u tu rora. Omena ra tjike? Mena rokutja ombepo ondjapuke i tu vatera momiano vivari. Otjitenga, i tupa omasa ngu matu hepa okutjinda omauzeu. Otjitjavari, oyo omasa nge tu vatera kutja tu kayende komurungu okukarera Jehova nga mouye oupe. Eṱe ngatu kayende komurungu okumuna ouwa okuza kombepo ondjapuke.