1-2. (a) Ania ti makatulong kadatayo nga agibtur iti inaldaw? Ilawlawag. (b) Ania ti usigentayo iti daytoy nga artikulo?

“NO PAMPANUNOTEK ti suot a napadasak, ammok a diak napagballigian dayta no siak laeng.” Naibagam kadin dayta? Adu kadatayo ti nakaibagan iti dayta. Nalabit naibagam dayta bayat a pampanunotem no kasano a naibturam ti maysa a nakaro a sakit wenno ipapatay ti maysa nga ipatpateg. No lagipem dayta, mariknam a nakapagibturka iti inaldaw ta impaayannaka ni Jehova iti “bileg a nalablabes ngem iti gagangay.”​—2 Cor. 4:7-9.

² Agpampannuraytayo met iti nasantuan nga espiritu tapno malabanantayo ti impluensia daytoy dakes a lubong. (1 Juan 5:19) Kasapulantayo pay a labanan dagiti “dakes nga espiritu.” (Efe. 6:12) Usigentayo ti dua a pamay-an no kasano a tultulongannatayo ti nasantuan nga espiritu. Kalpasanna, pagsasaritaantayo ti aramidentayo tapno naan-anay a mabenepisiarantayo iti dayta.

3. Ania ti maysa a pamay-an a tultulongannatayo ni Jehova a mangibtur kadagiti pakasuotan?

³ Tultulongannatayo ti nasantuan nga espiritu ni Jehova babaen ti ipapaayna a bileg wenno pannakabalin tapno maitungpaltayo dagiti responsabilidadtayo uray adda dagiti pakasuotan. Ammo ni apostol Pablo a nakapagtultuloy nga agserbi ken Jehova uray adda dagiti pakasuotan gapu ta nagpannuray iti “pannakabalin ti Kristo.” (2 Cor. 12:9) Bayat ti maikadua a panagmisionero ni Pablo, saanna laeng nga inkagumaan ti mangasaba no di ket nagtrabaho pay para iti pinansial a kasapulanna. Nagyan idiay Corinto iti pagtaengan da Aquila ken Priscila, nga agar-aramid iti tolda. Gapu ta kasta met ti pagsapulan ni Pablo,  adda dagiti aldaw a nakipagtrabaho kadakuada. (Ara. 18:1-4) Ti nasantuan nga espiritu ti nangipaay ken Pablo iti bileg tapno makapagtrabaho ken maitungpalna ti ministeriona.

4. Sigun iti 2 Corinto 12:7b-9, ania ti problema ni Pablo?

⁴ Basaen ti 2 Corinto 12:7b-9. Kadagitoy a bersikulo, ania ti kayat a sawen ni Pablo idi imbagana nga adda ib-ibturanna a “siit ti lasag”? No nasiitanka, sigurado a nakaut-ut-ot dayta. Isu nga ibagbaga ni Pablo nga adda ib-ibturanna a maysa a kita ti problema. Inawaganna dayta kas “anghel ni Satanas” nga agtultuloy a “mangtungpa” (“mangkabil,” ftn.) kenkuana. Mabalin a saan a ni Satanas wenno dagiti demonio ti direkta a makagapu kadagiti problema ni Pablo, a kasla ketdin nangitudokda iti siit iti lasagna. Ngem idi nakita dagiti dakes nga espiritu dayta a “siit,” mabalin a magagaranda a mangilumlom iti dayta tapno kumaro ti ut-ot a marikrikna ni Pablo. Ania ti inaramid ni Pablo?

5. Kasano a sinungbatan ni Jehova dagiti kararag ni Pablo?

⁵ Idi damo, kayat ni Pablo a maikkat koma ti “siit.” Inaminna: “Namitlo a nagpakaasiak iti Apo [ni Jehova] a maikkat koma dayta kaniak.” Ngem uray nagkarkararag ni Pablo, saan a naikkat ti siit iti lasagna. Kaipapananna kadi a di inkankano ni Jehova dagiti kararag ni Pablo? Saan. Sinungbatanna dagita. Saan nga inikkat ni Jehova ti problema, ngem inikkanna ni Pablo iti bileg nga agibtur. Kinuna ni Jehova: “Naan-anay ti pannakabalinko kenka no nakapuyka.” (2 Cor. 12:8, 9) Iti tulong ti Dios, nagtalinaed a narag-o ken natalna ti panunot ni Pablo!—Fil. 4:4-7.

6. (a) Kasano ti mabalin a panangsungbat ni Jehova kadagiti kararagtayo? (b) Kadagiti naisitar a teksto, aniada a kari ti mangpabpabileg kenka?

⁶ Kas ken Pablo, napadasmo kadin nga ipakaasi ken Jehova nga ikkatenna ti maysa a pakasuotam? Baka namin-adun nga impakaasim dayta, ngem saan a napukaw ti problema, kimmaro pay ketdi. Napanunotmo kadi amangan no saanen a maragsakan kenka ni Jehova? No kasta, laglagipem ti ulidan ni Pablo. Sinungbatan ni Jehova dagiti kararag ni Pablo, isu a sigurado a sungbatanna met dagiti kararagmo! Nalabit saan nga ikkaten ni Jehova ti problemam. Ngem babaen ti nasantuan nga espirituna, ipaayna ti bileg a kasapulam tapno maibturam ti pakasuotam. (Sal. 61:3, 4) Mabalin a ‘matuangka,’ ngem saannaka a baybay-an ni Jehova.—2 Cor. 4:8, 9; Fil. 4:13.

7-8. (a) Kasano a mayarig iti angin ti nasantuan nga espiritu? (b) Kasano a dineskribir ni Pedro ti panagtignay ti nasantuan nga espiritu?

⁷ Ania pay ti sabali a pamay-an a tultulongannatayo ti nasantuan nga espiritu? Kas iti makatulong nga angin iti nadawel a baybay, mayabantenatayo ti nasantuan nga espiritu tapno malasatantayo dagiti arig bagyo a pakasuotan ket makadanontayo iti baro a lubong nga inkari ti Dios.

⁸ Kas mangngalap, pamiliar ni apostol Pedro iti panaglayag. Mabalin a dayta ti rason nga idi dineskribirna ti panagtignay ti nasantuan nga espiritu, nagusar iti sasao nga agparang a konektado iti panaglayag. Insuratna: “Saan a naited ti padto babaen ti pagayatan ti tao, no di ket naggapu iti Dios ti imbaga dagiti tattao bayat a tigtignayen ida ti nasantuan nga espiritu.” Ti Griego a sao a naipatarus a “tigtignayen” ket literal a kaipapananna ti “idaldalan.”​—2 Ped. 1:21; ftn.

9. Ania ti kayat ni Pedro a mapanunottayo idi inusarna ti sasao nga “idaldalan”?

⁹ Ania ti kayat ni Pedro a mapanunottayo idi inusarna ti sasao nga “idaldalan”? Ti umasping a porma dayta a Griego a sao ket inusar ni Lucas, ti nangisurat iti Aramid, kas pangiladawan iti barko a ‘mayang-angin.’ (Ara. 27:15) Isu nga idi insurat ni Pedro a ‘maidaldalan’ dagiti mannurat ti Biblia, nagusar iti termino dagiti marinero, sigun iti maysa nga eskolar ti Biblia. Arigna imbaga ni Pedro a no kasano nga iduron  ti angin ti maysa a barko tapno makadanon iti destinasionna, dagiti propeta ken mannurat ti Biblia ket indalan met ti nasantuan nga espiritu tapno maitungpalda ti annongenda. Kinuna pay dayta nga eskolar: “Arigna inngato dagiti propeta dagiti layagda.” Inaramid ni Jehova ti pasetna. Impaayna ti “angin,” wenno nasantuan nga espiritu. Inaramid met dagiti mannurat ti Biblia ti pasetda. Nagpaiwanwanda iti dayta nga espiritu.

10-11. Ania a dua nga addang ti masapul nga aramidentayo tapno sigurado a mayabantenatayo ti nasantuan nga espiritu? Mangted iti pagarigan.

¹⁰ Siempre, nalpasen nga inwanwan ti nasantuan nga espiritu dagiti nagsurat kadagiti libro ti Biblia. Ngem agtigtignay pay laeng ti nasantuan nga espiritu kadagiti adipen ti Dios. Ar-aramiden latta ni Jehova ti pasetna. Kasanotayo a mabenepisiaran iti nasantuan nga espiritu ti Dios? Siguraduentayo nga ar-aramidentayo ti pasettayo. Kasano?

¹¹ Panunotem daytoy a pagarigan. Tapno mabenepisiaran iti angin ti maysa nga aglaylayag, adda dua a banag a masapul nga aramidenna. Umuna, masapul nga ipuestona ti bangkana iti dalan ti angin, ta saan nga umabante dayta no adda laeng iti pier nga adayo iti angin. Maikadua, masapul nga ingatona dagiti layag ken iyukradna a naimbag dagita. Siempre, uray no adda angin, sa laeng umabante ti bangka no iduron ti angin dagiti layag. Umasping iti dayta, makapagibturtayo laeng nga agserbi ken Jehova no tulongannatayo ti nasantuan nga espiritu. Tapno mabenepisiarantayo iti dayta nga espiritu, adda dua nga addang a masapul nga aramidentayo. Umuna, masapul a mapantayo iti dalan ti espiritu ti Dios babaen ti pannakiramantayo kadagiti naespirituan nga aktibidad. Maikadua, masapul a naan-anay nga “ingatotayo dagiti layagtayo” babaen ti panangikagumaantayo a makiraman kadagita nga aktibidad. (Sal. 119:32) No aramidentayo dagitoy, iduronnatayo ti nasantuan nga espiritu tapno malasatantayo dagiti arig dalluyon nga ibubusor ken pakasuotan ket tulongannatayo a simamatalek nga agibtur agingga iti baro a lubong ti Dios.

12. Ania ti usigentayo?

 ¹² Nadakamattayon ti dua a pamay-an a tultulongannatayo ti nasantuan nga espiritu. Ipapaayannatayo iti bileg ken tultulongannatayo nga agtalinaed a matalek bayat a sangsanguentayo dagiti pakasuotan. Iyab-abantenatayo met ken tultulongannatayo nga agtalinaed iti dalan nga agturong iti biag nga agnanayon. Ita, usigentayo ti uppat a banag a masapul nga aramidentayo tapno naan-anay a mabenepisiarantayo iti nasantuan nga espiritu.

13. Sigun iti 2 Timoteo 3:16, 17, ania ti maaramidan kadatayo ti Kasuratan, ngem ania ti masapul nga aramidentayo?

¹³ Umuna, adalen ti Sao ti Dios. (Basaen ti 2 Timoteo 3:16, 17.) Ti Griego a sao a naipatarus nga “inwanwan ti Dios” ket literal a kaipapananna ti “impuyot ti Dios.” Inusar ti Dios ti nasantuan nga espirituna tapno “ipuyotna” ti pampanunotna iti isip dagiti mannurat ti Biblia. No basaentayo ti Biblia ken utobentayo ti mabasbasatayo, sumrek iti isip ken pusotayo dagiti bilin ti Dios. Dagita a pampanunot ti Dios ti pakatignayantayo a mangitunos iti biagtayo iti pagayatanna. (Heb. 4:12) Ngem tapno naan-anay a mabenepisiarantayo iti nasantuan nga espiritu, masapul a regular nga adalentayo ti Biblia ken utobentayo dayta. Iti kasta, maimpluensiaan ti Sao ti Dios ti amin nga ibaga ken aramidentayo.

14. (a) Apay a maibagatayo a “maipuypuyot ti angin” kadagiti gimongtayo? (b) Kasanotayo nga umatender a “nakaukrad dagiti layagtayo”?

¹⁴ Maikadua, agkakadua a mangidaydayaw iti Dios. (Sal. 22:22) Arigna “maipuypuyot ti angin” kadagiti gimongtayo. Adda ti espiritu ni Jehova bayat dagiti gimong. (Apoc. 2:29) Apay a maibagatayo a kasta? Gapu ta no agtataripnongtayo a kadua dagiti padatayo a Kristiano tapno agdaydayaw, ikararagtayo ti nasantuan nga espiritu, kantaentayo dagiti kanta ti Pagarian a naibatay iti Sao ti Dios, ken denggentayo ti naibatay-Biblia a panangisuro dagiti kakabsat a lallaki nga inapointaran ti nasantuan nga espiritu. Ken dayta met laeng a nasantuan nga espiritu ti tumultulong kadagiti kakabsat a babbai a mangisagana ken mangiparang iti pasetda. Ngem tapno naan-anay a mabenepisiarantayo iti nasantuan nga espiritu, masapul a nakasaganatayo a makipaset kadagiti gimong. Iti kasta, umatendertayo iti gimong a “nakaukrad dagiti layagtayo.”

15. Kasanonatayo a matulongan ti nasantuan nga espiritu iti trabaho a panangasaba?

¹⁵ Maikatlo, mangasaba. No usarentayo ti Biblia a mangasaba ken mangisuro, ipalpalubostayo a tulongannatayo ti nasantuan nga espiritu. (Roma 15:18, 19) Ngem tapno naan-anay a mabenepisiarantayo iti espiritu ti Dios, masapul a regular a mangasabatayo ken usarentayo ti Biblia agingga a posible. Ti maysa a pamay-an tapno nasaysayaat ti pannakisaritatayo iti ministerio ket ti panangusartayo kadagiti pagtuladan iti pannakisarita iti Workbook iti Gimong a Panagbiag ken Ministerio.

16. Ania ti direkta a pamay-an a maawattayo ti nasantuan nga espiritu?

¹⁶ Maikapat, agkararag ken Jehova. (Mat. 7:7-11; Luc. 11:13) Ti direkta a pamay-an a maawattayo ti nasantuan nga espiritu ket ti panangikararag iti dayta ken Jehova. Awan ti makapasardeng iti idadanon dagiti kararagtayo ken Jehova ken awan ti makalapped iti idadanon kadatayo ti nasayaat a sagutna nga isu ti espirituna​—uray ti pagbaludan ken uray ni Satanas. (Sant. 1:17) Kasano ti panagkararagtayo tapno naan-anay a mabenepisiarantayo iti nasantuan nga espiritu? Tapno masungbatan dayta, pagsasaritaantayo ti maysa nga ilustrasion maipapan iti kararag a masarakan laeng iti Ebanghelio ni Lucas. *

17. Ania ti masursurotayo maipapan iti panagkararag iti ilustrasion ni Jesus iti Lucas 11:5-9, 13?

¹⁷ Basaen ti Lucas 11:5-9, 13. Ipakita ti ilustrasion ni Jesus no kasanotayo nga ikararag ti nasantuan nga espiritu. Iti dayta nga ilustrasion, naawat ti lalaki ti kasapulanna “gapu iti natured a panangipilit[na].” Saan a nagamak nga agpatulong iti gayyemna uray no tengngan ti rabii. * Kasano nga inyaplikar ni Jesus daytoy nga ilustrasion no iti panagkararag? Imbagana: “Itultuloyyo ti agdawat, ket maikkankayto; itultuloyyo ti agsapul, ket makasarakkayto; itultuloyyo ti agtuktok, ket mailukatankayto.” Ania ti masursurotayo? Tapno maawattayo ti nasantuan nga espiritu, masapul a sipapasnek nga ikararagtayo dayta.

18. Sigun iti ilustrasion ni Jesus, apay a makapagtalektayo nga ipaay kadatayo ni Jehova ti nasantuan nga espirituna?

¹⁸ Ipakita met ti ilustrasion ni Jesus no apay nga ipaay kadatayo ni Jehova ti nasantuan nga espiritu. Kayat ti lalaki iti ilustrasion ti agbalin a nasayaat a manangsangaili. Nariknana nga obligado a mangpakan iti bisitana a simmangpet iti tengnga ti rabii ngem awan ti maidasarna. Imbaga ni Jesus a nangted ti kaarrubana iti makan gapu ta napinget ti lalaki wenno impilitna ti agkiddaw iti tinapay. Ania ti punto ni Jesus? No situtulok a tumulong ti imperpekto a tao iti kaarrubana a sipapasnek nga agdawdawat, anian nga ad-adda pay a tumulong ti naasi nga Amatayo idiay langit kadagidiay sipapasnek nga agkidkiddaw kenkuana iti nasantuan nga espiritu! Gapuna, makapagtalektayo a sungbatan ni Jehova ti panagkiddawtayo iti nasantuan nga espiritu.​—Sal. 10:17; 66:19.

19. Apay a masiguradotayo nga agballigitayo?

¹⁹ Masiguradotayo nga agballigitayo uray di agpatpatingga ti ibubusor ni Satanas. Apay? Gapu ta tultulongannatayo ti nasantuan nga espiritu iti dua a pamay-an. Umuna, ipaayna ti bileg a kasapulantayo tapno maibturantayo dagiti pakasuotan. Maikadua, dayta ti puersa a “mangiduron kadagiti layagtayo,” tapno agtultuloytayo nga umabante iti panagserbi ken Jehova agingga iti baro a lubong ti Dios. Determinadotayo koma a naan-anay a mabenepisiaran iti nasantuan nga espiritu!