1-2. (a) Oshike hashi tu kwafele opo tu dule okuungaunga nomaupyakadi efiku nefiku? Shi yelifa. (b) Oshike hatu ka kundafana moshitukulwa eshi?

MBELA owe lipulile nande onale to ti: “Okutala konghalo oyo nda pita muyo, ondi wete kutya inandi i dula keenghono dange mwene.” Vahapu otashi dulika osho hatu ti ngaho. Otashi dulika twa popya eendjovo da yukila oko konima eshi twa ungaunga noudu wa kwata moiti ile nefyo laumwe oo tu hole. Otashi dulika u diladile kutya owa dula ashike okuungaunga nonghalo oyo omolwomhepo iyapuki yaJehova oyo ye ku pa “ouyadi weenghono” ile tu tye eenghono di dule dopaushitwe. — 2 Kor. 4:7-9.

² Otwa pumbwa yo omhepo iyapuki opo tu dule okuungaunga nenwefemo lounyuni ou wa kolokosha. (1 Joh. 5:19) Shikwao vali, otwa pumbwa eenghono opo tu dule okukondjifa ‘eemhepo dowii.’ (Ef. 6:12) Moshitukulwa eshi, ohatu ka kundafana eenghedi dopavali omo omhepo iyapuki hai tu kwafele opo tu dule okuungaunga nomaupyakadi aeshe oo. Opo nee ohatu ka kundafana osho tu na okuninga po opo tu mone ouwa pauyadi momhepo iyapuki.

3. Omonghedi imwe ilipi Jehova he tu kwafele tu lididimikile omashongo?

³ Omhepo iyapuki yaJehova ohai tu pe eenghono opo tu dule okuwanifa po oinakuwanifwa yetu nonande otwa taalela omashongo. Omuyapostoli Paulus okwa li a dula okutwikila okulongela Jehova nonande okwa li a taalela omashongo molwaashi okwa li e lineekela ‘meenghono daKristus.’ (2 Kor. 12:9) Eshi a li molweendo laye olutivali loutumwa, ka li ashike ha longo noudiinini moilonga yokuudifa, ndele okwa li yo ha longo oilonga yonhumba opo e liyambidide pashimaliwa. Okwa li ha kala muKorinto, meumbo laAkuila naPriskilla. Ova li ovatungi veefaila. Molwaashi Paulus naye okwa li ha longo oilonga oyo, okwa li he va waimine omafiku amwe. (Oil. 18:1-4) Omhepo iyapuki oya li ya kwafela  Paulus a dule okulonga oilonga yokulikongela omboloto noku wanife po oilonga yokuudifa.

4. Metwokumwe 2 Ovakorinto 12:7b-9, Paulus okwa li ta kondjo noupyakadi ulipi?

⁴ Lesha 2 Ovakorinto 12:7b-9. Okutala komushangwa oo, Paulus okwa li a hala okutya shike eshi a ti ota kondjo ‘nekiya mombelela’? Ngeenge owa li u na ekiya mombelela, oli na okukala la li le ku ehameka neenghono. Eshi Paulus a popya eendjovo odo, okwa li ta ulike kutya oku na oupyakadi wonhumba oo hau mu ehameke. Okwa popya kutya oupyakadi oo owa fa “omweengeli waSatana,” oo a kala noku mu ‘hepeka’ ile noku mu denga. Otashi dulika Satana neendemoni daye havo va etela Paulus oupyakadi oo wa li wa fa ekiya li li mombelela. Ndele eshi eemhepo dowii da didilika “ekiya” olo, otashi dulika da kala tadi li findile mo opo li lulumike neenghono Paulus. Paulus okwa li a ninga po shike?

5. Jehova okwa li a nyamukula ngahelipi omailikano aPaulus?

⁵ Tete, Paulus okwa li a hala “ekiya” olo e li kufwe. Okwa ti: ‘Onda ilikana Omwene Jehova lwoikando itatu a kufe nge ekiya olo.’ Nonande Paulus okwa li a ilikana, ekiya olo ine li kufwa. Mbela osho osha hala kutya Jehova ka li a nyamukula omailikano aye? Hasho nande. Okwe a nyamukula. Jehova ka li a kufa po oupyakadi waye, ndele okwa li e mu pa eenghono a dule okulididimika. Jehova okwa ti: “Eenghono dange otadi wanenene pombada omoungone.” (2 Kor. 12:8, 9) Kekwafo laKalunga, Paulus okwa li a dula okukala a hafa noku na ombili yopamadiladilo. — Fil. 4:4-7.

6. (a) Jehova otashi dulika a nyamukule ngahelipi omailikano etu? (b) Eshilipaleko lilipi tali tu pameke olo tali hangwa omishangwa odo da etwa mokatendo oko?

⁶ Ngaashi Paulus, mbela naave oho ilikana Jehova a kufe po oupyakadi woye? Mbela oho kala u udite Jehova e ku ekelashi ngeenge owa ilikana kombinga youpyakadi oo lwoikando ndele ina ninga po sha nou wete tau ende nokunaipala? Ngeenge osho, diladila koshihopaenenwa shaPaulus. Jehova ota ka nyamukula omailikano oye ngaashi ashike a li a nyamukula aPaulus. Otashi dulika Jehova ita ka kufa po oupyakadi oo. Ndele ote ke ku kwafela okupitila momhepo iyapuki oyo tai ke ku pa eenghono u dule okulididimika. (Eps. 61:3, 4) Otashi dulika u kale wa “natwa poshi,” ashike Jehova oku li pamwe naave. — 2 Kor. 4:8, 9; Fil. 4:13.

7-8. (a) Omonghedi ilipi omhepo iyapuki ya yelekanifwa nomhepo? (b) Petrus okwa yelifa ngahelipi nghee omhepo iyapuki hai longo?

⁷ Omonghedi imwe vali ilipi omhepo iyapuki hai tu kwafele? Ohatu dulu okuyelekanifa omhepo iyapuki nomhepo. Oshikepa ohai kwafelwa komhepo opo i ka fike oku ya finda nonande mefuta omwa tukuluka oshikungulu. Sha faafana, omhepo iyapuki ohai tu kwafele tu twikile okulongela Jehova nonande otwa taalela omashongo fiyo osheshi twa fika mounyuni mupe oo wa udanekwa kuKalunga.

⁸ Molwaashi omuyapostoli Petrus okwa li omuyuli weeshi, okwa li e shii shihapu kombinga yovaendifuta. Nomolwaasho eshi a li ta yelifa nghee omhepo iyapuki hai longo a li a longifa outumbulilo wa yukila kovaendifuta. Okwa shanga a ti: ‘Osheshi inapa etwa nande ouxunganeki kehalo lomunhu, ndelenee ovanhu ovayapuki ova popya odo ve di pewa kuKalunga nokuwilikwa komhepo iyapuki.’ Oshitya shOshigreka osho sha tolokwa ‘okuwilikwa’ otashi ti lelalela “okutwaalelwa.” — 2 Pet. 1:21.

9. Petrus okwa li e na efano lashike momadiladilo eshi a longifa outumbulilo “okutwaalelwa”?

⁹ Petrus okwa li e na efano lashike momadiladilo eshi a longifa outumbulilo “okutwaalelwa”? Lukas, omushangi wembo lOilonga, okwa longifa oshitya sha faafana shOshigreka  eshi a li ta yelifa nghee oshikepa hai “telaanifwa” komhepo. (Oil. 27:15) Omuhongwanhu umwe wOmbiibeli okwa ti kutya eshi Petrus a popya kutya ovashangi vOmbiibeli ova wilikwa komhepo iyapuki, okwa longifa outumbulilo oo tau ningifa ovanhu va diladile kovaendifuta. Petrus okwa ti, ngaashi ashike omhepo hai twala oshikepa oku ya finda, omhepo iyapuki nayo oya li ya wilika ovashangi vOmbiibeli va dule okuwanifa po oshinakuwanifwa shavo. Omuhongwanhu oye tuu oo okwa ti: “Ovashangi vOmbiibeli ova li ve lilongekida okulonga osho omhepo iyapuki tai va wilike va longe.” Jehova okwa longa ko ombinga yaye. Jehova okwa li e va pa omhepo iyapuki. Ovashangi vOmbiibeli ova longa ko ombinga yavo. Ovashangi vOmbiibeli navo ova li va shikula ewiliko lomhepo iyapuki.

10-11. Oinima ivali ilipi twa pumbwa okuninga opo tu mone ouwa momhepo iyapuki? Shi faneka.

¹⁰ Kunena, Jehova iha longifa vali omhepo iyapuki i wilike ovanhu va shange Ombiibeli. Ashike oha longifa natango omhepo iyapuki i wilike ovapiya vaye. Jehova okwe lilongekida okulonga ombinga yaye. Ongahelipi hatu dulu okumona ouwa momhepo iyapuki yaKalunga? Otwa pumbwa okushilipaleka kutya ohatu wanifa po oshinakuwanifwa shetu. Ongahelipi hatu dulu okuninga ngaho?

¹¹ Diladila koshihopaenenwa tashi landula. Omushingi woshikepa okwa pumbwa okuninga oinima ivali ngeenge okwa hala okukwafelwa komhepo. Shotete, okwa pumbwa oku taalelifa oshikepa oko kwa finda omhepo. Ashike oshikepa itai ka enda ngeenge ine i taalelifa oko kwa finda omhepo. Oshitivali, oku na okunanena pombada eefaila dokushingifa oshikepa noku di xwatununa mo. Nonande okukale ku na omhepo, opo oshikepa i ende, eefaila odi na okukwata omhepo. Sha faafana, ohatu ka dula ashike okulongela Jehova kekwafo lomhepo iyapuki. Opo tu kwafelwe komhepo iyapuki, otwa pumbwa okuninga oinima ivali. Shotete, otwa pumbwa okuninga oinima oyo omhepo yaKalunga  hai wilike ovapiya vaye va ninge. Oshitivali, otwa pumbwa okuninga oinima oyo ngaashi hatu dulu. (Eps. 119:32) Ngeenge otwa tula moilonga eenghatu odo, omhepo iyapuki otai ke tu pa eenghono tu twikile okulongela Jehova fiyo osheshi twa fika mounyuni mupe.

12. Oshike hatu ka konakona paife?

¹² Fiyo opapa otwa kundafana eenghedi dopavali omo omhepo iyapuki hai tu kwafele. Ohai tu pe eenghono nohai tu kwafele tu twikile okukala ovadiinini kuJehova ngeenge twa taalela omayeleko. Omhepo iyapuki ohai tu kwafele tu pule komesho notu kale mondjila oyo tai twala komwenyo waalushe. Paife natu ka konakoneni oinima ine oyo tu na okuninga opo tu mone ouwa pauyadi momhepo iyapuki.

13. Metwokumwe 2 Timoteus 3:16, 17, Ombiibeli otai ke tu kwafela ngahelipi, noshike tu na okuninga po?

¹³ Shotete, kala ho konakona Eendjovo daKalunga. (Lesha 2 Timoteus 3:16, 17.) Kalunga okwa longifa omhepo iyapuki opo i tule omadiladilo aye momadiladilo ovashangi vOmbiibeli. Ngeenge hatu lesha Ombiibeli nokudilonga kwaasho twa lesha, kungaho ohatu findile momadiladilo nomomitima detu omalombwelo aKalunga. Ombiibeli ohai tu kwafele tu lundulule onghedi yetu yokukalamwenyo opo tu hafife Jehova. (Heb. 4:12) Opo tu mone ouwa pauyadi momhepo iyapuki, otwa pumbwa okulitulila po efimbo lokukonakona Ombiibeli pandjikilile nokudiladila moule kwaasho twa lesha. Opo nee Eendjovo daKalunga otadi ka nwefa mo osho hatu popi naasho hatu ningi.

14. (a) Omolwashike hatu tile kutya pokwoongala kwopaKriste ohapa kala pe na omhepo iyapuki? (b) Ongahelipi hatu dulu okumona ouwa pauyadi momhepo iyapuki ngeenge tu li pokwoongala?

¹⁴ Oshitivali, kaleni hamu longele Kalunga pamwe. (Eps. 22:22) Omhepo yaJehova ohai kala pokwoongala kwopaKriste. (Eh. 2:29) Omolwashike hatu tile ngaho? Omolwaashi ngeenge twa ongala pamwe novamwatate novamwameme ohatu ilikana tu pewe omhepo iyapuki, hatu imbi omaimbilo Ouhamba a kanghamena kEendjovo daKalunga nohatu pwilikine komalombwelo a kanghamena kOmbiibeli oo hatu pewa kovamwatate ovo va nangekwa po komhepo iyapuki. Omhepo iyapuki ohai kwafele yo ovamwameme ve lilongekide nova yandje oitukulwa yavo. Opo tu mone ouwa pauyadi momhepo iyapuki, otwa pumbwa okulilongekida komesho yefimbo opo tu ka dule okuyandja omatyekosha pokwoongala. Ngeenge tu li pokwoongala, omhepo iyapuki ohai tu kwafele ngaashi ashike eeshikepa odo di na eefaila da xwatununwa mo.

15. Omhepo iyapuki ohai tu kwafele ngahelipi moilonga yokuudifa?

¹⁵ Oshititatu, kala ho kufa ombinga moilonga yokuudifa. Ngeenge hatu longifa Ombiibeli moilonga yokuudifa nokuhonga, kungaho ohatu efa omhepo iyapuki i tu kwafele moukalele. (Rom. 15:18, 19) Opo u mone ouwa pauyadi momhepo yaKalunga, owa pumbwa okukala ho kufa ombinga pandjikilile moilonga yokuudifa nokulongifa Ombiibeli ngeenge tashi shiiva. Onghedi imwe omo to dulu okuhafela oukalele omokulongifa omaetepo oo haa kala mokafo Onghalamwenyo yopaKriste noilonga yokuudifa.

16. Onghedi ya denga mbada ilipi hatu dulu okumona omhepo iyapuki?

¹⁶ Oshitine, kala ho ilikana kuJehova. (Mat. 7:7-11; Luk. 11:13) Onghedi ya denga mbada omo to dulu okumona omhepo iyapuki omo ku i pula kuJehova okupitila meilikano. Kape na osho tashi imbi omailikano etu a ye kuJehova ile shi tu imbe tu mone omhepo iyapuki. Omhepo iyapuki otai dulu oku tu kwafela nokuli ngeenge tu li modolongo, na Satana ita dulu oku tu imba tu i mone. (Jak. 1:17) Otu na okwiilikana ngahelipi opo tu mone ouwa pauyadi momhepo iyapuki? Opo tu mone enyamukulo, natu ka konakoneni  moule kombinga yeilikano olo li li ashike mEvangeli laLukas. *

17. Oshike hatu lihongo kombinga yeilikano mefaneko laJesus olo li li muLukas 11:5-9, 13?

¹⁷ Lesha Lukas 11:5-9, 13. Efaneko laJesus ola ulika nghee tu na okwiilikana tu mone omhepo iyapuki. Mefaneko olo, omulumenhu okwa li a mona osho a li a pumbwa molwaashi okwa li ta pula ‘nekenyeneko’ ile tu tye nopehe na olufuwo. Ka li a tila okupula ekwafo kukaume kaye nokuli nonande okwa li kwa toka. (Tala ouyelele u na sha naLuk. 11:8 mo-mwb18 Juli) Efaneko olo laJesus otali tu hongo shike shi na sha nokwiilikana? Okwa ti: “Indileni, ndele tamu pewa, kongeni, ndele tamu mono, kongholeni, ndele tamu yeululwa.” Osho otashi tu hongo shike? Opo omhepo iyapuki i tu kwafele, otwa pumbwa okukala hatu i ilikana nopehe na olufuwo.

18. She likolelela kefaneko laJesus, omolwashike hatu dulu okukala noushili kutya Jehova ote ke tu pa omhepo yaye iyapuki?

¹⁸ Efaneko laJesus otali tu kwafele yo tu mone kutya omolwashike Jehova he tu pe omhepo iyapuki. Omulumenhu womefaneko olo okwa li a hala okufila oshisho omweenda waye. Okwa li e wete kutya okwa pumbwa okupa omweenda waye oikulya, ashike ka li e na sha. Jesus okwa ti kutya omushiinda okwa li e mu pa omungome molwaashi okwa li ta pula nopehe na olufuwo. Jesus okwa li ta divilike shike? Ngeenge omunhu omulunde okwa halelela okukwafela omushiinda shaye, osha yela kutya Tate yetu womeulu ota ka pa ovo tave mu pula nopehe na olufuwo omhepo iyapuki. Jehova ota ka nyamukula omailikano etu ngeenge hatu mu pula omhepo iyapuki. — Eps. 10:17; 66:19.

19. Omolwashike hatu dulu okukala noushili kutya ohatu dulu okulididimika?

¹⁹ Ohatu dulu okulididimika nokuli nonande Satana ota twikile oku tu ponokela. Omolwashike? Omolwaashi omhepo iyapuki ohai tu kwafele meenghedi mbali. Yotete, ohai tu pe eenghono odo twa pumbwa opo tu dule okufinda omayeleko. Onhivali, otai ke tu kwafela tu twikile okulongela Jehova fiyo twa fika mounyuni mupe. Onghee hano, natu kale twa tokola toko okumona ouwa pauyadi kekwafo olo hatu pewa komhepo iyapuki.