1-2. (a) Ki ka kitukwasha kuchinchika makatazho o tupitamo pa juba pa juba? Lumbululai. (b) Tusakwisamba pa ka mu uno mutwe?

“INGE nalanguluka pa meseko o napitamo, nshiinwa kuba’mba kechi nakonsheshe kwiachinchika na bulume bwami ne.” Nanchi mwakyambapo kala byambo bya uno mutundu nyi? Atweba bavula twakyambapo kala bino. Kampe mwibyambile kimye kyo mwakolelwe kikola kikatampe nangwa kimye kyo mwafwishishe mulongo wenu. Inge mwalanguluka pa luno lweseko, mulanguluka’mba mwachinchikile na mambo mupashi wazhila wa Yehoba wimupele “bulume bwakila bwa bantu.”—2 Ko. 4:7-9.

² Kabiji tuketekela mu mupashi wazhila kwitukwasha kuchinuzhuka byubilo biji mu ino ntanda yatama. (1 Yoa. 5:19) Kikwabo, tubena kulwa na “bapashi batama.” (Efi. 6:12) Onkao mambo, tusakwisamba mashinda abiji mupashi wazhila mo etukwashisha kushinda ano makatazho onse. Apa bino twisambe ne byo twafwainwa kuba pa kuba’mba mupashi wazhila etukwashenga.

3. Ñanyi jishinda jimo Yehoba jo etukwashishamo kuchinchika meseko?

³ Mupashi wazhila wa Yehoba witukwasha kupichila mu kwitupa bulume nangwa ngovu ya kwingila mingilo nangwa kya kuba tupita mu meseko. Mutumwa Paulo wamwene kuba’mba wakonsheshe kutwajijila kwingijila Lesa nangwa kya kuba wapichilenga mu meseko, mambo waketekejile mu “bulume bwa Kilishitu.” (2 Ko. 12:9) Pa lwendo lwanji lwa bubiji lwa bumishonale, Paulo waingijile na ngovu mwingilo wa kusapwila ne kumona mwa kwikwashisha aye mwine. Waikele mu Kolinda mu nzubo ya kwa Akwila ne Pilisila. Bano bantu baingilanga mwingilo wa kusona matente. Na mambo a kuba’mba Paulo naye wayukile uno mwingilo, waingijile nabo pa moba amo. (Byu. 18:1-4) Mupashi wazhila wapele Paulo bulume bwa kwingila mingilo ya kumwenamo bikebewa ne mwingilo wa kusapwila.

4. Kwesakana na byaamba 2 Kolinda 12:7b-9, ñanyi lukatazho lwapichilengamo Paulo?

 ⁴ Tangai 2 Kolinda 12:7b-9. Kwesekana na byaamba bino byepelo, Paulo watazhizhe mwepi byo aambile’mba wajinga na “mwiba mu mubiji”? Inge mwaikala na mwiba mu mubiji, mwakonsha kwikala na misongo ikatampe. Onkao mambo, Paulo waambilenga’mba wapichilenga mu lukatazho lukatampe lwajinga nobe mwiba mu mubiji. Watelele luno lweseko amba “malaika wa kwa Satana” ‘wamupuminenga.’ Satana nangwa bamalaika banji kampe kechi bo baletejilenga Paulo meseko uba nobe babena kumukula mwiba mu mubiji ne. Bino bano bamalaika batama byo bamwene uno “mwiba” bafwainwa baumvwine bingi bulongo kumutwezha mukachi ka mubiji pa kuba’mba misongo yajinga ne Paulo ikilemo. Paulo waubile byepi?

5. Yehoba wakumbwile byepi milombelo ya kwa Paulo?

⁵ Patanshi, Paulo wakebelenga’mba Lesa amufumye uno “mwiba.” Waambile’mba: “Namusashijile Nkambo [Yehoba] bimye bisatu pa mambo a kino kintu namba kimfume.” Nangwa kya kuba Paulo walombelepo bimye byavula, uno mwiba kechi bamufumishemo mu mubiji ne. Nanchi kino kilumbulula’mba Yehoba kechi wakumbwile milombelo ya kwa Paulo nenyi? Ine mwane. Wakumbwile. Yehoba kechi wafumishepo luno lukatazho ne, bino wamupele bulume bwa kuchinchika. Yehoba waambile’mba: “Bulume bwami bubena kulumbulukila mu kubula kukosa.” (2 Ko. 12:8, 9) Na bukwasho bwa Lesa, Paulo watwajijile kwikala na lusekelo ne mutende wa mu milanguluko.—Fili. 4:4-7.

6. (a) Yehoba wakonsha kukumbula byepi milombelo yetu? (b) Ñanyi milaye yatongolwa mu binembelo biji mu jifuka itukosesha?

⁶ Byonka byo kyajinga kwi Paulo, nanchi ne anweba mwakisashijilapo Yehoba kuba’mba emupokolole mu lweseko nyi? Kampe mwalombelepo bimye byavula, bino lukatazho kechi lwimwamukile ne, nangwa lwakijilemo ne kubaya. Nanchi mwaakaminwe’mba kampe Yehoba wimushikwa nyi? Inge byo byo kiji, vulukai lukatazho lwapichilemo Paulo. Byonkatu Yehoba byo akumbwile milombelo yanji, byo byo akakumbula ne milombelo yenu. Yehoba kechi wakonsha kufumyapo lukatazho lo mubena kupitamo ne. Pano bino, kwingijisha mupashi wazhila, Lesa ukemupa bulume bwa kwimukwasha kuchinchika. (Sala. 61:3, 4) Bakonsha ‘kwimunyakwila panshi,’ bino Yehoba kechi ukemusha bunke ne.—2 Ko. 4:8, 9; Fili. 4:13.

7-8. (a) Mu ñanyi jishinda mupashi wazhila mo aikela nobe mwela? (b) Petelo walumbulwile byepi bingila mupashi wazhila?

⁷ Ñanyi jishinda jikwabo mupashi wazhila jo etukwashishamo? Byonka byuba mwela wawama pa kalunga ka mema paji luvula mukatampe, mupashi wazhila witukwasha kutwajijila kuchinchika meseko aji nobe luvula kufika ne byo tukatwela mu ntanda ipya ya mutende yalaya Lesa.

⁸ Na mambo a kuba’mba mutumwa Petelo wakwatanga masabi, wayukile bya kwendesha maato pa mema. O ene mambo o alumbulwijile bingila mupashi wazhila kupichila mu kwingijisha ñambilo ipasha na byo bendesha bwato pa mema. Wanembele’mba: “Bungauzhi kechi bwaishileko na kyaswa muchima wa muntu ne, bino bantu baambilenga byafumine kwi Lesa byo bebatangijile ku mupashi wazhila.” Kyambo kya Kingiliki kyatuntululwa’mba “bebatangijile” kilumbulula’mba “bebasendele; bebatwajile.”—2 Pe. 1:21; tubyambo twa munshi.

9. Petelo wakebelenga bantu kulanguluka pa ka byo anembele’mba banabalume “bebatangijile” ku mupashi wazhila?

⁹ Ñanyi kintu kyaambilengapo Petelo byo aingijishe kyambo kya kuba’mba “bebatangijile”? Kino kyonka kyambo kya Kingiliki bekingijishepo ne kwi nnembi wanembele buku wa Byubilo bya Batumwa aye Luka pa kulumbulula bwato bo ‘bakumpula’ ku luvula. (Byu. 27:15) Shayuka umo wa Baibolo waambile kuba’mba, Petelo  byo anembele’mba bannembi ba Baibolo “bebatangijile,” waingijishe ñambilo ya kulengela bantu kulanguluka pa bendesha maato. Petelo waambile’mba, byonkatu bwato byo bebusenda na mwela pa kuba’mba bufike ko bubena kuya, bangauzhi ne bannembi ba Baibolo byo byo bebatangijile ku mupashi wazhila. Yenka uno Shayuka waambile’mba: “Kyajingatu nobe bangauzhi basuntwile kisapi kya ku bwato.” Yehoba waingijile lubaji lwanji. Wapaine “mwela” nangwa amba mupashi wazhila. Bannembi ba Baibolo baingijile mwingilo ye bebapele. Balondejilenga lutangijilo lwa uno mupashi.

10-11. Ñanyi bintu bibiji byo twafwainwa kuba pa kuba’mba mupashi wazhila etutangijilenga? Lumbululai.

¹⁰ Lelo jino, Yehoba kechi wingijisha Mupashi wanji wazhila kukwasha bantu kunemba mabuku a mu Baibolo ne. Nangwa byonkabyo, mupashi wazhila utangijila bantu ba Lesa. Ne luno, Yehoba ubena kwingila lubaji lwanji. Twakonsha kuba byepi pa kuba’mba mupashi wazhila wa Lesa etukwashe? Twafwainwa kwingilanga lubaji lwetu. Twakonsha kuba byepi bino?

¹¹ Akilangulukai pa kino. Wendesha bwato wafwainwa kuba bintu bibiji pa kuba’mba mwela emukwashe. Kitanshi, wafwainwa kutazha bwato kubena kuya mwela. Bwato kechi bwakonsha kwenda inge kisapi kikwata mwela kyashala ku kitulu kubena kubula kupita mwela ne. Kya bubiji, wafwainwa kusuntula kisapi kya ku bwato ne kwikivungulula kyonse. Inge mwela wakwata ku kisapi, bwato po po butendeka kwenda. Ne atweba tukatwajijila kwingijila Yehoba inge twatambula bukwasho bwa mupashi wazhila. Pa kuba’mba mupashi etukwashenga, twafwainwa kuba bintu bibiji. Kitanshi, twafwainwa kuba bintu mupashi wa Lesa byo atangijila bakalume banji kuba. Kya bubiji, twafwainwa “kusuntula bisapi bya ku bwato,” ko kuba’mba kwingila na mukoyo mingilo ya Lesa. (Sala. 119:32) Inge twauba bino bintu, mupashi wazhila uketukwasha kuchinchika makatazho ne kwitupa bulume pa kuba’mba tutwajijile kwingijila Yehoba mu bukishinka kufikatu ne byo tukatwela mu ntanda ipya ya Lesa.

12. Ñanyi bintu bikwabo byo tusakwisambapo?

 ¹² Twisamba pa mashinda abiji mupashi wazhila mo etukwashisha. Mupashi wazhila witupa bulume ne kwitukwasha kutwajijila kwikala ba kishinka kimye kya meseko. Kabiji mupashi wazhila witutangijila ne kwitukwasha kutwajijila kwenda mu jishinda jaya ku bumi bwa myaka ne myaka. Pano twayai twisambe pa bintu bina byo twafwainwa kuba pa kuba’mba mupashi wazhila etukwashenga.

13. Kwesakana na byaamba 2 Timoti 3:16, 17, Binembelo byakonsha kwitukwasha byepi, bino twafwainwa kuba ka?

¹³ Kitanshi, kufunda Mambo a Lesa. (Tangai 2 Timoti 3:16, 17.) Kyambo kya Kingiliki kyatuntululwa’mba “byanembelwe na lutangijilo lwa mupashi wa Lesa” kilumbulula’mba “Lesa wapuyilemo.” Lesa waingijishe mupashi “kupuya” milanguluko yanji mu michima ya bannembi ba Baibolo. Inge twatanga Baibolo ne kulanguluka-languluka pa byo tutanga, mikambizho ya Lesa itwela mu milanguluko ne mu muchima wetu. Ino milanguluko ya Lesa itulengela kupimpula bwikalo bwetu pa kuba’mba tubenga kyaswa muchima wa Lesa. (Hebe. 4:12) Pano bino, pa kuba’mba mupashi wazhila etukwashenga, twafwainwa kufundanga Baibolo kimye kyonse, ne kulangulukishapo pa byo tutanga. Inge twauba bino, tukalondelanga byaamba Mambo a Lesa mu byonse byo twamba ne byo tuba.

14. (a) Mambo ka o twakonsha kwambila’mba mupashi wazhila utanwa pa kupwila kwetu kwa bwina Kilishitu? (b) Twakonsha kutanwanga byepi ku kupwila nobe “twavungulula bisapi bya ku bwato”?

¹⁴ Kya bubiji, kupwila pamo na kupopwela Lesa. (Sala. 22:22) Pa kupwila kwetu po po tutambwila mupashi wazhila wa Yehoba. (Lum. 2:29) Mambo ka o twaambila bino? Mambo inge twapwila pamo na bena Kilishitu bakwetu na kupopwela Lesa, tulomba mupashi wazhila, twimba nyimbo ya Bufumu yaimena pa Mambo a Lesa, kabiji tuteleka ku mikambizho ya mu Baibolo yamba balongo batongolwa na mupashi wazhila. Kabiji uno yenka mupashi wazhila ukwasha banyenga kunengezha ne kwamba majashi abo. Nangwa byonkabyo, pa kuba’mba mupashi wazhila etukwashenga, twafwainwa kunengezhezhanga jimo kupwila ne kukumbulapo. Inge saka tuba bino, kikekalangatu nobe “twavungulula bisapi bya ku bwato.”

15. Mupashi wazhila witukwasha byepi mu mwingilo wa kusapwila?

¹⁵ Kya busatu, kwingila mwingilo wa kusapwila. Inge twaingijisha Baibolo mu mwingilo wa kusapwila ne kufunjisha bantu, tuswisha mupashi wazhila kwitukwasha mu mwingilo wetu. (Loma 15:18, 19) Pa kuba’mba mumwenemo mu bukwasho bwa mupashi wa Lesa, mwafwainwa kwingilanga mwingilo wa kusapwila kimye kyonse ne kwingijisha Baibolo. Mwakonsha kwiyowa mwingilo wa kusapwila inge saka mulondela mashinda a kwisambilamo na bantu atanwa mu Mutanchi wa Kupwila kwa Bwikalo ne Mwingilo.

16. Ñanyi jishinda jine jo tutambwilamo mupashi wazhila?

¹⁶ Kya buna, kulomba kwi Yehoba. (Mat. 7:7-11; Luka 11:13) Jishinda jine jo tutambwilamo mupashi wazhila ke kulomba Yehoba kwitupaye. Kafwako kyakonsha kulengela milombelo yetu kubula kufika kwi Yehoba nangwa kushinkila mupashi wa Lesa kufika kwi atweba ne. Nangwatu lubumbulu wa kaleya nangwa Satana kechi wakonsha kulengela mupashi wa Lesa kukankalwa kufika kwi atweba ne. (Yako. 1:17) Pano twafwainwa kulomba byepi pa kuba’mba mupashi wazhila etukwashenga? Pa kuba’mba tukumbule buno bwipuzho, twayai twisambe bishinka byavula pa lulombelo kupichila mu kwisamba pa kishimpi kitanwatu mu Mambo Awama anembele Luka. *

17. Kishimpi kya kwa Yesu kyanembwa pa Luka 11:5-9, 13 kitufunjishapo ka pa lulombelo?

¹⁷ Tangai Luka 11:5-9, 13. Kishimpi kya kwa Yesu kimwesha byo twafwainwa kulomba mupashi wazhila. Mu kishimpi, mwanamulume watambwile bintu byo akebelenga “mambo a lupata lwanji.” Kechi wachiine kulomba bukwasho ku mulunda nanji na mambo a kuba’mba pajinga pakachi ka bufuku ne. * Kino kishimpi kitufunjishapo ka pa lulombelo? Yesu waambile’mba: “Lombainga, bakemupa; kebainga, mukekitaana; konkonshainga, bakemushinkwilako.” Tubena kufunjilako ka? Pa kuba’mba tutambule bukwasho bwa mupashi wazhila, twafwainwa kulombanga na mukoyo.

18. Kwesakana na kishimpi kya kwa Yesu, mambo ka o twafwainwa kushiinwa’mba Yehoba uketupa mupashi wanji wazhila?

¹⁸ Kishimpi kya kwa Yesu kitukwasha kuyuka ene mambo Yehoba o etupela mupashi wazhila. Mwanamulume watongolwa mu kishimpi wakebelenga kumwesha muchima wawama ku mwenyi. Wamwene kuba’mba kyawamine kupa kajo mwenyi waishile pakachi ka bufuku, bino kechi wajinga na bya kumupa ne. Yesu waambile’mba uno muntu wakumbwile na mambo a lupata lwa yewa mwenyi waishile na kulomba kajo. Ñanyi kishinka kyaambilengapo Yesu? Inge kya kuba’mba muntu mbulwa kulumbuluka waswile kukwasha mulunda nanji na mambo a kulomba na mukoyo, ko kuba’mba Shetu wa mwiulu ukakilapo kupana mupashi wazhila ku boba bamulomba na mukoyo. Onkao mambo, twakonsha kulomba saka twashiinwa kuba’mba Yehoba ukakumbula milombelo yetu yo tulomba mupashi wazhila.—Sala. 10:17; 66:19.

19. Mambo ka o twakonsha kushiinwa’mba tukashinda Satana?

¹⁹ Twakonsha kushiinwa’mba nangwa kya kuba Satana engile na ngovu kwitulukuka, tukamushinda. Mambo ka? Mambo mupashi wazhila witukwasha mu mashinda abiji. Jishinda jitanshi, witupa bulume bwa kuchinchika makatazho. Ja bubiji, mupashi wazhila witukwasha kutwajijila kwingijila Yehoba kufika ne byo tukatwela mu ntanda ipya ya Lesa. Onkao mambo, twayai tutwajijile kutambula bukwasho bwa mupashi wazhila.