1-2. (a) Yisinke ayi tu vatere tu lididimikire maudigu nkenye ezuva? Faturura. (b) Yisinke natu ka zogera mosirongwa esi?

“APA ani gazadara ko komaudigu aga na pita, na yi diva asi ngano pwanyamwange ngano kapi ya tompokere nge.” Nove wa lizuvha rumwe ngoso ndi? Sinzi setu yimo atu lizuvhu. Nampo nove yimo wa lizuvhire konyima zokupita mouvera wounene ndi apa wa fisire. Ngesi apa o diworoka maudigu ogo, ove kulizuvha asi kwa ku tompokere kupita mo morwa mpepo zokupongoka kwa ku pere ‘nonkondo dononene’ ndi?—2 Kol. 4:7-9.

² Twa hepa hena mpepo zokupongoka yipo zi tu vatere tu dire kuhonena nkareso zovantu womouzuni ou. (1 Joh. 5:19) Ntani twa hepa hena mpepo zokupongoka yipo tu rwise ‘nompepo donondona.’ (Efe. 6:12) Yipo nye, ngesi tatu ka zogera nonkedi mbali omu mpepo zokupongoka azi tu vatere tu lididimikire maudigu ogo. Ntani natu ka zogera hena eyi natu rugana yipo tu gwanene mo mauwa mompepo zokupongoka.

3. Ngapi Jehova a tu vatere tu lididimikire maudigu?

³ Mpepo zokupongoka kutupa nonkondo yipo tu sikise mo yirugana yetu nampili ngomu tuna kuligwanekera nomaudigu. Mupositoli Paurusa nage kwa lizuvhire asi kwa mu tompokere kukarera Jehova nampili momaudigu morwa kwa mu vaterere “nonkondo daKristusa.” (2 Kol. 12:9) Apa Paurusa ga zire mosirugana soutumwa sikando sauvali, age kwa litulire mo unene mokuzuvhisa ntani nga rugana a lirere mwene. Age kwa ka kere moKolinte membo lyaAkura naPilisikira. Mokumona asi valikwali owo ngava rugana notenta ngwendi Paurusa, age kwa rugene kumwe nawo. (Yirug. 18:1-4) Mpepo zokupongoka kwa pere Paurusa nonkondo dokurugana yirugana yopanyama ntani a zuvhise nomupampi.

4. Kuliza no-2 Vakolinte 12:7b-9, udigu musinke ga kere nawo Paurusa?

 ⁴ Resa 2 Vakolinte 12:7b-9. Yisinke ga tembe Paurusa apa ga tente asi age kwa kere ‘nonsonga morutu’ rwendi? Nsene va ku twa nsonga morutu, ove ngo zuvha kukora unene. Yipo nye, Paurusa kwa tembe asi udigu ou ga ligwanekerere nawo kwa mu koresere sili unene. Age kwa tente asi udigu ou kwa kere ngwendi “muengeli gwaSatana” ana ‘kumutoona.’ Satana novaengeli vendi nampo kapisi yiwo va retesere po udigu waPaurusa. Nye apa nompepo odo donondona da mwene udigu waPaurusa, ado nampo kwa gwedererere koudigu owo, ngwendi moomu tupu muntu na sindika nsonga zi hwilire unene morutu. Yisinke ga rugene ko Paurusa?

5. Ngapi omu Jehova ga limbwilire makanderero gaPaurusa?

⁵ Pomuhowo Paurusa kwa hundilire Jehova a guse po udigu wendi. Age kwa tente asi: “Ame kwa kandererere Hompa [Jehova] rutatu asi a yi guse nge eyi.” Nampili ngomu Paurusa ga kandererere, Jehova kapi ga gusire po udigu wendi. Eyi kutanta nye asi Jehova kapi ga limbwilire makanderero gaPaurusa ndi? Hawe, age ga ga limbwilire. Jehova kapi ga gusire po udigu waPaurusa, nye age kwa mu pere nonkondo yipo a twikire kulididimikira. Jehova kwa tente asi: “Nonkondo dange kunenepa moupirankondo woge.” (2 Kol. 12:8, 9) Mokumona asi Jehova ga mu vaterere, Paurusa ga twikilire kukara noruhafo ntani nombili momutjima.—Fil. 4:4-7.

6. (a) Ngapi omu Jehova a limburura makanderero getu? (b) Etumbwidiro musinke ali tu nkondopeke eli atu gwana momatjangwa aga vana tura moparagarafu?

⁶ Nove wa likwambera rumwe kwaJehova a ku vatere moudigu ngwendi moomu ga yi rugene Paurusa ndi? Nsene asi apa wa likwamberere kwaJehova, udigu woge kapi wa tundire po ndi nampo kwa ligwederere, ya ku ninkisire o lipure asi nampo Jehova kapi ana kukuhafera hena ndi? Nsene yimo, diworoka sihonena saPaurusa. Ngwendi moomu tupu Jehova ga limbwilire makanderero gaPaurusa, age nga limburura hena makanderero goge. Jehova kuvhura a dire kugusa po udigu woge, nye nga ku pa nonkondo edi wa hepa kupitira mompepo zendi zokupongoka yipo o lididimikire udigu owo. (Epis. 61:3, 4) Kuvhura va ‘ku rugane momudona,’ nye Jehova kapi nga ku sigilira.—2 Kol. 4:8, 9; Fil. 4:13.

7-8. (a) Ngapi mpepo zokupongoka za fana ngwendi mpepo zemefuta? (b) Ngapi Peturusa ga fatwilire omu azi rugana mpepo zokupongoka?

⁷ Nkedi musinke hena zimwe omu azi tu vatere mpepo zokupongoka? Ngwendi moomu tupu mpepo zemefuta azi vatere sikepa si ka sike oku sina tamba nampili ku kare ekundungu, mpepo zokupongoka nazo kutuvatera tu twikire kukarera Jehova dogoro mouzuni woupe nampili kuna kupita momaudigu.

⁸ Mokumona asi Peturusa kwa kere mukwati gonomfi, age ga divire nawa omu ayi gendi yikepa. Eyi yiyo nampo ga ruganesere nkango zokuhamena omu ayi gendi yikepa apa ga uyungire kuhamena omu azi rugana mpepo zokupongoka. Age kwa tente asi: “Kutupu uporofete ou wa wiza po keharo lyomuntu. Nye vantu ava ngazi gendesa Mpepo zoKupongoka, yiwo ngava uyunga yokutunda kwaKarunga.” Nkango ‘kugendesa’ moRugereka kutanta asi “kupupa.”—2 Pet. 1:21.

9. Yisinke ga harere Peturusa vantu va gazare, apa ga tente asi vatjangi woBibeli kwava ‘gendesere mpepo zokupongoka’?

⁹ Yisinke ga harere Peturusa vantu va gazare, apa ga tente asi vatjangi woBibeli kwava ‘gendesere mpepo zokupongoka’? Rukasa mutjangi gobuke zoYirugana nage kwa ruganesere nkango ozo zoRugereka apa  ga fatwilire sikepa esi sina ‘kupupa’ kompepo. (Yirug. 27:15) Mulirongi gumwe goBibeli kwa uyungire asi apa Peturusa ga tente asi vatjangi woBibeli kwa va ‘gendesere’ mpepo zokupongoka, age kwa ruganesere nkango ezi za ninkisire vantu va gazare kuhamena omu asi gendi sikepa. Peturusa kwa tente asi ngwendi moomu tupu mpepo azi gendesa sikepa yipo si ka sike oku sina tamba, mpepo zokupongoka nazo kwa gendesere vatjangi woBibeli va sikise mo sirugana sawo. Mulirongi ogo kwa tente hena asi: “Vatjangi woBibeli kwa kere ngwendi musingi gosikepa ogu ana kuditura makehe gaso komeho si katuke nokundindira mpepo zi si gendese.” Jehova kwa rugene ko ruha rwendi pokugava mpepo zokupongoka, ano vatjangi woBibeli nawo kwa rugene sirugana esi va va pere. Awo kwa kweme moomu za va pitisilire mpepo zokupongoka.

10-11. Yininke musinke yivali twa hepa kurugana nsene tuna hara zi tu pitisire mpepo zokupongoka? Yifanekesa.

¹⁰ Naina, Jehova kapi hena a gava mpepo zokupongoka kovantu yipo va tjange nobuke domoBibeli. Nampili ngoso, age kuruganesa mpepo zendi zokupongoka yipo zi pitisire vakareli vendi. Jehova kuna kurugana ruha rwendi. Yisinke natu rugana yipo mpepo zokupongoka zi tu pitisire? Twa hepa nose kurugana ko ruha rwetu. Ngapi omu natu yi rugana?

¹¹ Gazadara kosifanekeso esi. Mokuninka asi mpepo zi vatere sikepa, musingi ga hepa kurugana yininke yivali. Sokuhova, age ga hepa kuhedesa sikepa sendi oku zina kupepera mpepo. Nsene a twikira kukara ure noku zina kugendera mpepo sikepa sendi kapi nasi genda. Sauvali, age ga hepa kudingununa makehe gosikepa yipo sikepa si gende nawa. Nampili zi kare ko mpepo, sikepa sendi kapi nasi genda nsene makehe gosikepa kapi vana ga dingununa. Mokulifana, nose ngatu twikira tupu kukarera Jehova nevatero lyompepo zokupongoka. Nsene tuna hara zi tu pitisire, twa hepa kurugana yininke yivali. Sokuhova, twa hepa kurugana yirugana eyi azi pitisire mpepo zokupongoka. Sauvali,  twa hepa kulitura mo moyirugana oyo paapa twa hulira. (Epis. 119:32) Nsene tu rugana yininke oyo yivali, mpepo zokupongoka ngazi tu pa nonkondo tu twikire kukarera Jehova noulimburukwi dogoro mouzuni woupe.

12. Yisinke natu ka zogera ngesi?

¹² Ngesi tuna zogere nonkedi mbali omu mpepo zokupongoka azi tu vatere. Azo kutupa nonkondo ntani kuvatera tu twikire kukarera Jehova noulimburukwi nampili kuna kuligwanekera nomaudigu. Mpepo zokupongoka kutupitisira hena nokutuvatera tu rugana yirugana eyi ana tu harere Jehova yipo ngatu ka gwane mwenyo gwanarunye. Ngesi tatu ka zogera yininke yine eyi twa hepa kurugana yipo tu gwanene mo mauwa mompepo zokupongoka.

13. Kuliza na-2 Timoteusa 3:16, 17, ngapi omu matjangwa aga tu vatere, nye yisinke twa hepa kurugana?

¹³ Sokuhova, lironga Nonkango daKarunga. (Resa 2 Timoteusa 3:16, 17.) Karunga kwa ruganesere mpepo zendi zokupongoka mokutura magano gendi movatjangi woBibeli. Apa atu resa Bibeli nokuteda ko kweyi tuna resa, Nonkango daKarunga kukundama magazaro getu nomalizuvho getu. Ano eyi kutuninkisa tu ture po marunduruko meparu lyetu yipo tu paruke monkedi ezi azi hafesa Jehova. (Heb. 4:12) Nye nsene tuna hara kugwanena mo uwa, twa hepa kulitulira po siruwo sokulironga Bibeli nkenye ezuva ntani nokuteda ko kweyi tuna lirongo. Nsene tu yi rugana, Nonkango daKarunga ngadi tu vatera tu rugane yoyiwa.

14. (a) Morwasinke tuna kuuyungira asi mpepo zokupongoka kwa kara komapongo? (b) Yisinke natu rugana nsene tuna hara tu gwanene mo uwa momapongo?

¹⁴ Sauvali, twa hepa kukarera Karunga kumwe. (Epis. 22:22) Mpepo zokupongoka kwa kara komapongo getu. (Ehor. 2:29) Morwasinke tuna kuuyungira ngoso? Morwa apa atu pongo kumwe novapuli vakwetu, ose kukanderera yipo tu gwane mpepo zokupongoka, nokudimba nonsumo doUhompa edi va gusa moNonkango daKarunga ntani kupurakena koyiuyungwa eyi ava gava vanavazinyetu ava za horowora mpepo zokupongoka. Ntani hena mpepo zokupongoka kuvatera vanavazinyetu wovakadi va liwapaikire nawa nokugava yiuyungwa yawo. Nye nsene tuna hara tu gwanene mo mauwa, twa hepa kuliwapaikira nawa komeho tu wize komapongo ntani twa hepa kulihameka mo. Nsene tu yi rugana, ose ngatu gwanena mo mauwa ngwendi sikepa esi vana ditura makehe.

15. Ngapi omu mpepo zokupongoka azi tu vatere mokuzuvhisa?

¹⁵ Sautatu, twa hepa kulihameka mokuzuvhisa. Apa atu ruganesa Bibeli mosirugana sokuzuvhisa nesi sokuronga, ose ngoso kuna kupulisira mpepo zokupongoka zi tu vatere. (Rom. 15:18, 19) Nsene tuna hara tu gwanene mo uwa, twa hepa kulihameka mo mokuzuvhisa ntani nokuruganesa Bibeli nkenye apa tuna gwana mpito. Kuvhura tu hafere yirugana yokuzuvhisa, nsene tu ruganesa magano omu no zogera novantu aga ga kara mombapira Eparu noyirugana yetu Mbapira zekepongo.

16. Nkedi musinke zimwe omu natu gwana mpepo zokupongoka?

¹⁶ Saune, kanderera kwaJehova. (Mat. 7:7-11; Ruk. 11:13) Nkedi zimwe omu natu gwana mpepo zokupongoka kuna kara pokukanderera kwaJehova a tu pe mpepo zendi. Kwato yokuvhura kukondera makanderero getu ga dire kukasika kwaJehova ndi eyi nayi vhura kutukondera mokugwana mpepo zokupongoka. Mpepo zokupongoka kuvhura kutuvatera nampili tu kare modorongo ntani Satana kwato eyi na rugana yipo a tu kondere tu dire kugwana mpepo zokupongoka. (Jak. 1:17) Ngapi omu natu kanderera yipo tu gwane mpepo zokupongoka? Mokugwana elimbururo, tu tareni eyi natu lirongera ko  kosifanekeso esi sa kara mEvangeli lyaRukasa kuhamena kukanderera. *

17. Yisinke natu lirongera ko kuhamena makanderero kosifanekeso saJesus esi sa kara mwaRukasa 11:5-9, 13?

¹⁷ Resa Rukasa 11:5-9, 13. Sifanekeso saJesus kutulikida omu natu hundira mpepo zokupongoka. Mugara gomosifanekeso oso kwa gwene eyi ga here morwa kwa twikilire ‘kuhundira.’ Age kapi ga tjilire kuhundira mukwawo a mu vatere nampili ngomu ga kere masiku. (Ruk. 11:8) * Yisinke ga tente Jesus natu lirongera ko kosifanekeso esi kuhamena kukanderera? Age kwa tente asi: “Omu hundire ngava mu pe, omu papare ngomu gwane, omu ngongore ngava mu zegurure.” Yisinke natu lirongera ko? Nsene tuna hara tu gwane mpepo zokupongoka, twa hepa kutwikira kuhundira.

18. Kuliza nosifanekeso saJesus, morwasinke natu karera nehuguvaro asi Jehova nga tu pa mpepo zokupongoka?

¹⁸ Sifanekeso saJesus kutuvatera hena tu dimburure eyi Jehova a tu pere mpepo zokupongoka. Mugara gomosifanekeso oso kwa here a pakere mbili mugenda gwendi. Age kwa here kuzumbura nondya mugenda gwendi ogu ga wizire masiku, nye kapi ga kere noyuma. Jesus kwa tente asi musinda gwendi kwa mu vaterere morwa kwa twikilire kumuhundira. Yisinke natu lirongera ko? Nsene asi muntu ogo gokudira kusikilira mo ga vaterere musinda ogu ga twikilire kumuhundira, eyi kulikida asi Guhyetu gemeguru gonkenda nga vatera vantu navenye ava vana kutwikira kumuhundira mpepo zokupongoka. Yipo nye, ose twa kara nehuguvaro asi Jehova nga limburura makanderero getu nsene tu twikira kumuhundira mpepo zokupongoka.—Epis. 10:17; 66:19.

19. Morwasinke twa karera nehuguvaro asi ngatu twikira kulididimikira maudigu?

¹⁹ Ose kuvhura tu twikire kulididimikira maudigu nampili Satana a twikire kutuhomokera. Morwasinke? Morwa mpepo zokupongoka kutuvatera mononkedi mbali. Zokuhova, mpepo zokupongoka kutupa nonkondo edi twa hepa yipo tu lididimikire maudigu. Zauvali, azo kutupa nonkondo edi twa hepa yipo tu twikire kukarera Jehova dogoro mouzuni woupe. Yipo nye, tu tokomeneni kurugana ko yuma yipo tu gwanene mo mauwa mompepo zokupongoka.