1-2. (a) Ino nciinshi citupa nkusu shakutolelela kuliyumya mumapensho bushiku abushiku? Amusansulule. (b) Ino tutokwiiya nshi mumutwi uyu?

SA mwakayeyawo kale mapensho ngomwakacikonsha kuliyumya lyalo akwaamba ayi: “Naakwiinga nshikwe kucikonsha kukoma mapensho alya palwangu neenka.” Buunji bwa ndiswe twakaambawo kale maswi aya. Mpaashi cakalinga ciindi ndyemwakacikonsha kuliyumya mubulwashi bunene na kufwitwa. Aboobo lyoonse na mweebaluka, mulabona ayi cakapa kwaamba ayi mucikoonshe kuliyumya bushiku abushiku, ni “nkusu shiindaawo” isho Yehova nshaakamupa.​—2 Koli. 4:7-9.

² Tulayandika mushimu usalashi kwaamba ayi tutayungwi acishi cibiibi ici. (1 Joni 5:19) Kwiilikaawo, tulyeelete kulwana “nkusu sha mishimu ibiibi.” (Efe. 6:12) Aboobo tutokwiiya nshila shobilo mushimu usalashi mbootucafwa kulwana mapensho oonse aya. Lyalo tutobandika ansheenga twaciita kwaamba ayi mushimu usalashi unootucafwa abuumbi.

3. Ino nciinshi comwi Yehova ncaasebensesha kwaamba ayi atucaafwe kuliyumya ndyetuli mumapensho?

³ Mushimu usalashi wakwe Yehova ulatucafwa kwiinda mukutupa nkusu, na kutuyumya kwaamba ayi tucikoonshe kukumanisha mikuli yesu nabi ndyetuli mumapensho. Mutumwi Paulo alakwe wakalinga kucishi ayi “nkusu shakwe Klistu” nsheshakamucafwa kutolelela kusebensela Yehova nabi ndyaakalinga kwiinda mumapensho. (2 Koli. 12:9) Ndyaakalinga palweendo lwabili lwabumishonali, Paulo wakasebensa cankusu muncito yakushimikila akulilangweta shakumubili. Wakalinga kukala ku Kolinto muŋanda yakwe Pulisila alimwi a Akula abo bakalinga kusebensa ncito yakupanga matente. Mukwiinga Paulo alakwe wakalinga kucishi ncito iyo, cimwi ciindi wakalinga kusebensaabo. (Milimo 18:1-4) Mushimu usalashi wakacafwa Paulo kusebensa ncito yakumubili akukumanisha ncito yakushimikila.

4. Kweelana a 2 Bene Kolinto 12:7b-9, ino Paulo wakalinga kucite lipenshi nshi?

 ⁴ Amubelenge 2 Bene Kolinto 12:7b-9. Kweelana amavesi aya, ino Paulo wakalinga kusansulula nshi ndyaakaamba ayi “ndakabikwa muumfwa mumubili”? Inga mwapenga abuumbi na kamucite muumfwa mumubili. Aboobo Paulo wakalinga kwaamba palipenshi ndyaakalinga kwiindaamo ilyo lyakamupensha abuumbi. Lipenshi ilyo wakaliita ayi ‘munjelo wakwe Satana uyo wakalinga kumuuma lyoonse.’ Inga caba ayi teshi Satana abashikaswa bakwe bakapa kwaamba ayi Paulo anokwiinda mulipenshi ilyo lyakalinga anga ngumuumfwa mumubili. Nacibi boobo, mishimu ibiibi ndyeyakabona ayi Paulo atokwiinda mulipenshi, ilyeelete yakalinga kulikomeneshelaako, bweenka mbuli kushindika muumfwa mumubili wakwe. Ino Paulo wakacita buyani?

5. Ino Yehova wakaikumbula buyani mipailo yakwe Paulo?

⁵ Pakutaaguna, Paulo wakalinga kusuni ayi Yehova amukushe “muumfwa.” Wakaamba ayi: ‘Ndakakombelela mankanda otatwe ku Mwaami [Yehova] . . . kwaamba ayi ankushe muumfwa uyu.’ Ano nabi kwaamba ayi Paulo wakapaila, muumfwa ulya wakatolelela mumubili wakwe. Ano sa ici cilaamba ayi Yehova taakwe kukumbula mipailo yakwe? Sobwe napaceyi. Wakakumbula. Nabi kwaamba ayi Yehova taakwe kukusha lipenshi lyakwe Paulo, wakamupa nkusu shakumucafwa kuliyumya. Aboobo Yehova wakaamba ayi: “Nkusu shangu shilabonekela bunene na koolefukite.” (2 Koli. 12:8, 9) Ncakwiila kwiinda mulucafwo lwakwe Yehova, Paulo wakatolelela kuba alusangalalo akukalikana mumoyo!​—Fili. 4:4-7.

6. (a) Ino Yehova inga waikumbula buyani mipailo yesu? (b) Ino nshishomesho nshi shimuyuminisha nshetucana mumalembo atondeshekwa mupalagilafu?

⁶ Sa amwebo mwakapailawo kale kwaamba ayi Yehova akushe lipenshi limwi mubuumi bwanu, bweenka mbuli Paulo? Mpashi mwakapaila mankanda aanji, ano sombi lipenshi ilyo lyakatolelela​—na mpashi akukomenenaako. Sa ici cakamupa kubona anga Yehova taakondetwe andimwe? Na mboboobo, amwiibaluke cakubonenaako cakwe Paulo. Bweenka Yehova mbwaakakumbula mipailo yakwe Paulo, amwebo alaakumukumbula! Cimwi ciindi Yehova inga taalikushiiwo lipenshi ndyemucite. Nacibi boobo, inga wamupa nkusu kwiinda mumushimu wakwe kwaamba ayi mucikoonshe kuliyumya. (Kulu. 61:3, 4) Nabi ‘bamupwaye panshi,’ Yehova teshi akamushiyewo nweenka.​—2 Koli. 4:8, 9; Fili. 4:13.

7-8. (a) Ino mushimu wakwe Lesa ulikoshenye buyani amuuwo? (b) Ino Pita wakausansulula buyani mushimu usalashi mboosebensa?

⁷ Ino ni nshila nshi aimwi mushimu usalashi mbootucafwa? Mushimu usalashi inga twaukoshanisha kumuuwo. Na bwaato butokweenda palweenge pali muuwo wacipuupu, inga bwashika kabotu nkobutooya na bwalanga kutooya muuwo. Amushimu usalashi mboobete, ulatucafwa kutolelela kusebensela Yehova nabi tube amapensho kushikila tukenjile mucishi cipya Lesa ncaakatushomesha.

⁸ Mukwiinga mutumwi Pita wakalinga shikucaya nswi, wakalinga kucishi shiinji pamakani amaato mbwaeenda. Mpashi ici ncecakapa kwaamba ayi asebenseshe cikoshanyo ca bwaato mbobweenda palweenge ndyaakalinga kwaamba sha mushimu usalashi mboosebensa. Wakalemba ayi: “Mukwiinga balaluki bakulukulu tebakalinga kwaamba shakaswa mukuyanda kwabo beene, sombi bakaamba shakaswa kuli Lesa kwiinda mukutanjililwa amushimu usalashi.” Muci Giliki paliswi lyakwaamba ayi kutanjililwa palacanika liswi lya; “kutolwa” na “kusena.”​—2 Pita 1:21.

9. Ino nciinshi Pita ncaakalinga kusuni ayi bantu bayeeye ndyaakalemba ayi “kwiinda mukutanjililwa amushimu usalashi”?

⁹ Ino nciinshi Pita ncaakalinga kusuni ayi bantu bayeeye ndyaakalemba ayi “kwiinda mukutanjililwa” amushimu usalashi? Luka alakwe uyo wakalemba libuku lya Milimo wakasebensesha liswi lyaci Giliki likoshenye alyeeli, ndyaakalinga kusansulula bwaato ‘bwakaya’ amuuwo. (Milimo 27:15) Muntu wakeeya abuumbi shamu Baibo wakaamba  ayi, Pita ndyaakaamba ayi “kwiinda mukutanjililwa amushimu usalashi,” wakasebensesha liswi lyakalinga kweelete kupa bantu kuyeeya bwaato mbobweenda palweenge. Ncaakalinga kwaambawo ncakwaamba ayi bweenka mbuli muuwo mboopa kwaamba ayi bwaato bweende akuya mukushika nkobutooya, amushimu usalashi mbowakatanjilila balaluki abamwi bakalemba Baibo kukumanisha ncito Lesa njaakabapa. Muntu ulya wakeeya abuumbi shamu Baibo wakaamba ayi bakalemba Baibo bakalinga anga ngamaato alibambite kale kunyamuka, bakalinga kulibambite kusebensa ncito yakatanjililwa amushimu usalashi. Yehova wakacita nshaakalinga kweelete kucita. Wakatuma “muuwo,” na mushimu usalashi. Abalo bakalemba Baibo bakacita lubasu lwabo ndobakapekwa. Bakakonkela nshobakatanjililwa amushimu usalashi.

10-11. Ino nshintu nshi shobilo nshotweelete kucita kwaamba ayi tutanjililwe amushimu usalashi? Amwaambe cikoshanyo.

¹⁰ Nabi kwaamba ayi Yehova pacecino ciindi taasebenseshiwo mushimu usalashi kupa bantu ayi balembe mabuku amu Baibo, watolelela kutanjilila bantu bakwe kwiinda mukusebensesha mushimu usalashi. Yehova watolelela kucita lubasu lwakwe. Ino inga twacita buyani kwaamba ayi tunootanjililwa amushimu usalashi? Tulyeelete kushinisha ayi twacita lubasu lwesu. Ino nshiinshi nshotweelete kucita?

¹¹ Atuyeeye pacakubonenaako ici. Utokweensha bwaato na alisuni ayi muuwo umucaafwe ndyaatokweensha bwaato, alyeelete kucita shintu shobilo. Cakutaanguna, bwaato bulyeelete kulanga kutooya muuwo. Alimwi kwaamba ayi bwaato bweende, alyeelete kunyamuka akutalika kuya kutooya muuwo. Cabili alyeelete kwiimika mwiculu akupetulula shisani shakweenshesha bwaato kushika mpeenga wacikonsha. Nacibi boobo, kwaamba ayi bwaato bweende, muuwo ulyeelete kupupila shisani shakweenshesha bwaato. Aswebo kwaamba ayi tutolelele kusebensela Yehova tulayandika lucafwo lwa mushimu usalashi. Kuli shintu shobilo nshotuyandika kucita kwaamba ayi tutanjililwe amushimu usalashi. Citaanshi, tulyeelete kucita mushimu usalashi nshotanjilila basebenshi bakwe Lesa kucita. Cabili, tulyeelete kunoocita shintu  amoyo woonse. (Kulu. 119:32) Kucita sheeshi kulaakupa kwaamba ayi mushimu usalashi utupe nkusu, shakutolelela kusebensela Yehova cakushomeka kushikila tukenjile mucishi cipya cakwe Lesa.

12. Ino nshiinshi nsheshi tubandikeewo?

¹² Twabandika nshila shobilo mushimu usalashi mbootucafwa. Cakutaanguna, ulatupa nkusu shakutolelela kushomeka nabi ndyetutokwiinda mumapensho. Cabili, ulatutanjilila akutucafwa kutolelela kusebensa ncito Yehova njaasuni ayi tusebense, iyo yeshi ikape kwaamba ayi tukacane buumi butamaani. Ano tutobandika pashintu shone nshotweelete kucita kwaamba ayi mushimu usalashi unootucafwa abuumbi.

13. Kweelana a 2 Timoti 3:16, 17, ino Malembo inga atucafwa buyani, alimwi ino nshiinshi nshotweelete kucita?

¹³ Cakutaanguna, tulyeelete kwiiya Maswi akwe Lesa. (Amubelenge 2 Timoti 3:16, 17.) Muci Giliki liswi lyakwaamba ayi “kutanjililwa a Lesa” lilasansululwa ayi “Lesa wakayoyela.” Lesa wakabika miyeeyo yakwe mubaabo bakalinga kulemba Baibo kwiinda ‘mukubayoyela’ mushimu wakwe. Na katubelenga Baibo akukutumana kuyeeyawo, tulaakunoyeeya Yehova nshaasuni ayi tunoocita alimwi isho nshetubelenga shinanooba mumyoyo yesu. Maswi akwe Lesa aya alaakutucafwa kwaalula buumi bwesu kwaamba ayi tukondeleshe Yehova. (Ebu 4:12) Ano kwaamba ayi mushimu usalashi utucaafwe abuumbi, tulyeelete kubamba ciindi cakwiiya Baibo lyoonse akukutumana kuyeeyawo abuumbi pasheesho nshetwabelenga. Lyalo ndyeenga Maswi akwe Lesa atutanjilila mushintu shoonse nshetwaamba akucita.

14. (a) Ino nciinshi nceenga twaambila ayi kuli koonse nkotubunganina kulaba mushimu usalashi? (b) Ino nshiinshi nshotweelete kunoocita kwaamba ayi mushimu usalashi utucaafwe ndyetuli kumabungano?

¹⁴ Cabili, tulyeelete kunoopaila Lesa pomwi. (Kulu. 22:22) Kuba kukubungana kwesu kwa Bwineklistu kulibo anga nkuba pamusena “muuwo mpootopupila.” Kuli koonse nkotubunganina mushimu wakwe Yehova ulabaako. (Ciyu. 2:29) Ino nciinshi ncetwaambila boobo? Mukwiinga lyoonse ndyetwabungana abamakwesu abenankashi tulasenga mushimu usalashi kwiinda mumupailo, tuleemba nyimbo sha Bwaami shakaswa mu Maswi akwe Lesa, alimwi tulakutika kubamakwesu bakasalwa amushimu usalashi ndyebatokwaamba makani kuswa mu Baibo. Alimwi mushimu usalashi ulacafwa abenankashi kulibambila akukumanisha mbasu nshobapekwa. Nacibi boobo, kwaamba ayi mushimu usalashi utucaafwe abuumbi, tulyeelete kulibambila kwaabanamo lubasu katutana kusa kumabungano. Kucita boobo kulaakupa kwaamba ayi mushimu usalashi unootucafwa abuumbi, bweenka mbuli muuwo mboocafwa bwaato bucite shisani shakweenshesha bwaato shifungulukite.

15. Ino mushimu usalashi inga watucafwa buyani muncito yakushimikila?

¹⁵ Catatu, tulyeelete kwaabanamo lubasu muncito yakushimikila. Kusebensesha Baibo ndyetutooshimikila akwiisha bantu kulapa kwaamba ayi mushimu usalashi ututanjilile. (Loma. 15:18, 19) Ano kwaamba ayi mushimu usalashi utucaafwe abuumbi ndyetutooshimikila, tulyeelete kunokwaabanamo lubasu lyoonse akusebensesha Baibo ndyetutokwiisha. Nshila yomwi mbweenga twabandika kabotu abantu ndyetutooshimikila, nkwiinda mukusebensesha shilembetwe palubasu lwa nsheenga mwaamba, kuswa mu Kabuku Kamabungano Abuumi Anciito.

16. Ino ni nshila nshi yakululama njeenga twasebensesha kwaamba ayi tusenge mushimu usalashi?

¹⁶ Cane, tulyeelete kunopaila kuli Yehova. (Mate. 7:7-11; Luka 11:13) Nshila yakululama mbweenga twasenga mushimu usalashi nkwiinda mukupaila kuli Yehova. Taakuwo ceenga capa kwaamba ayi mipailo yaalilwe kushika kuli Yehova na kwaamba ayi mushimu waalilwe kushika kuli ndiswe. Mushimu usalashi inga watucafwa nabi ndyetuli mujeele, taakuwo cintu nabi comwi Satana nceenga wacita kwaamba ayi mushimu usalashi waalilwe kushika nkotubete. (Jemu. 1:17) Ano ino tulyeelete kunopaila buyani kwaamba ayi mushimu usalashi unootucafwa abuumbi? Amuleke tubandike pamakani amupailo kwaamba ayi tucane cikumbulo  kumwiipusho uyu. Tutobandika pacikoshanyo cicanikabo mulibuku lya Makani Abotu lyakwe Luka. *

17. Ino nciinshi ncetutokwiiya pamakani akupaila kuswa kucikoshanyo cakaamba Yesu pa Luka 11:5-9, 13?

¹⁷ Amubelenge Luka 11:5-9, 13. Yesu wakatupa cikoshanyo ca mbotweelete kusenga mushimu usalashi. Mucikoshanyo ici, musankwa ulya wakapekwa nshaakalinga kuyanda “ceebo cakukakatila kusenga.” Taakwe kuloonda kuya mukusenga lucafwo kumubye nabi kwaamba ayi lyakalinga pakati ka mashiku. Ino Yesu wakaamba ayi nciinshi ncotutokwiiya kuswa kucikoshanyo ici ca makani amupailo? Wakaamba ayi: “Amutolelele kusenga, lyalo mulaakupekwa; amutolelele kulangoola, lyalo mulaakucana; amutolelele kukonkonsha, lyalo mulaakucalwitwa.” Ino tutokwiiyawo nshi? Tulyeelete kutolelela kupaila kwaamba ayi mushimu usalashi utucaafwe.

18. Kweelana acikoshanyo cakaamba Yesu, ino nciinshi nceenga twashomena ayi Yehova alaakutupa mushimu wakwe usalashi?

¹⁸ Cikoshanyo cakaamba Yesu cilatucafwa akushiba Yehova ncaatupeta mushimu usalashi. Musankwa waambwa mucikoshanyo wakalinga kusuni kutambula kabotu beensu. Wakalinga kucishi ayi wakalinga kweelete kubambila cakulya mweensu wakwe uyo wakashika pakati ka mashiku, nacibi boobo taakuwo ncaakalinga kucite. Yesu wakaamba ayi mubye wakamupa nshaakalinga kusuni ceebo cakwaamba ayi wakakakatila kusenga. Ino nshiinshi Yesu nshaakalinga kutwiisha apa? Na muntu utasalalite inga wacafwa mubye ceebo cakwaamba ayi wakakatila kusenga, sa Ishiwesu wakwiculu inga waalilwa kutupa mushimu usalashi na twatolelela kumusenga? Aboobo, inga twashoma cakutatoonsha ayi Yehova alaakutupa mushimu usalashi na twamusenga.​—Kulu. 10:17; 66:19.

19. Ino nciinshi nceenga twashomena ayi tulaakucikonsha kuliyumya?

¹⁹ Nabi Satana atolelele buyani kutulwana, inga twashoma cakutatoonsha ayi tulaakucikonsha kuliyumya. Ino nceebonshi? Mukwiinga mushimu usalashi ulatucafwa munshila shobilo. Cakutaanguna, ulatupa nkusu nshetuyandika kwaamba ayi tukome mapensho. Cabili, ulatupa nkusu shitucafwa kutolelela kusebensela Yehova kushikila tukenjile mucishi cipya cakwe Lesa. Aboobo atutolelele kucita sheenga shapa kwaamba ayi mushimu usalashi unootucafwa abuumbi!