1-2. a) Ntshinyi tshidi tshituambuluisha bua kutantamena ntatu dituku dionso? Umvuija. b) Ntshinyi tshituamona mu tshiena-bualu etshi?

UKADIKU mudiambile ne: “Pandi mvuluka mumvua mutantamene lutatu alu, ndi mmona ne: tshivua mua kuikala mulutue tshiadi ne makanda anyi nkayanyi” anyi? Bikalabi nanku, kuena nkayebe to. Pamuapa uvua muambe nanku panyima pa wewe mumane kuela meji a muuvua mutantamene disama kampanda dikole anyi pauvua mufuishe. Paudi uvuluka malu au, udi umona ne: uvua mufike ku diatantamena dituku dionso bualu nyuma wa Yehowa uvua mukupeshe “bukole budi bupite bua pa tshibidilu.”​—2 Kol. 4:7-9.

² Bualu bukuabu, tudi tueyemena nyuma muimpe bua kukandamena nyuma wa pa buloba. (1 Yone 5:19) Tudi kabidi tumueyemena bua tupete bukole bua kuluangana ne “bisumbu bia nyuma mibi.” (Ef. 6:12) Tukonkononayi mpindieu mishindu ibidi idi nyuma muimpe utuambuluisha. Netumone kabidi tshitudi mua kuenza bua nyuma eu kutuambuluishaye menemene.

3. Ngumue mushindu kayi udi Yehowa utuambuluisha bua kunanukila mu ntatu?

³ Nyuma muimpe wa Yehowa udi utuambuluisha padiye utupesha bukole anyi makanda bua kukumbaja bualu buonso butudi basue kuenza nansha tuetu mu ntatu. Mupostolo Paulo uvua mumone ne: uvua mupete mushindu wa kuenzela Nzambi mudimu nansha muvuaye mu ntatu bualu uvua weyemena “bukole bua Kristo.” (2 Kol. 12:9) Pavuaye mu luendu luende luibidi lua bumisionere, wakenza mudimu mukole mu mudimu wa kuyisha eku udikumbajila majinga ende a buatshia buila. Uvua musombele kua Akila ne Pisikila mu Kolinto. Bavua benji ba ntenta. Bu muvua Paulo mumanye pende mudimu eu, uvua uwenza nabu amue matuku. (Bien. 18:1-4) Nyuma muimpe wakapesha Paulo bukole bua  kuenza mudimu wa bianza ne kukumbaja mudimu wa kuyisha.

4. Bilondeshile 2 Kolinto 12:7b-9, ndutatu kayi luvua Paulo nalu?

⁴ Bala 2 Kolinto 12:7b-9. Bilondeshile mvese eyi, pavua Paulo muambe ne: uvua ne “dieba mu mubidi,” uvua usua kuamba tshinyi? Dieba diodi dikubuele mu mubidi, bidi mua kushala bikukelebuka bikole. Nunku Paulo uvua usua kuamba ne: uvua ne lutatu kampanda lukole. Wakalubikila ne: “muanjelu wa Satana” uvua anu ‘umutapa mapi’ (‘umukuma,’ dim.). Satana anyi banjelu bende babi kabavua pamuapa bakebele Paulo lutatu buludiludi, bienze bu bavua bamubueja dieba mu mubidi to. Kadi pavua nyuma mibi eyi mimone “dieba” adi, ivua mua kuikala izuka bua kukengesha kabidi Paulo bikole, bienze anu bu ne: ivua yenda anu imufunyikadi bikole. Ntshinyi tshivua Paulo muenze?

5. Mmunyi muvua Yehowa muandamune masambila a Paulo?

⁵ Paulo wakanji kujinga bua bamumbushe “dieba” adi. Udi wamba ne: “Ngakalomba Mukalenge [Yehowa] misangu isatu . . . bua ne: diumbuke kundi.” Kadi nansha muvua Paulo usambila anu kusambila, dieba diakashala anu mu mubidi. Tudi mua kuamba ne: Yehowa kavua muteleje masambila a Paulo anyi? Nansha kakese! Wakamuandamuna. Yehowa kavua mujikije lutatu alu to, kadi wakapesha Paulo bukole bua kunanukila. Yehowa wakamba ne: “Bukole buanyi budi buenda buvuijibua bupuangane mu butekete.” (2 Kol. 12:8, 9) Paulo wakafika ku dilama disanka diende ne ditalala dia munda ku diambuluisha dia Nzambi!​—Filip. 4:4-7.

6. a) Mmushindu kayi udi Yehowa mua kuandamuna masambila ebe? b) Mmalu kayi adibu batele mu mvese idi mu tshikoso adi akujadikila ne: neupete bukole?

⁶ Anu bu Paulo, ukadiku pebe mulombe Yehowa bua akujikijile lutatu kampanda anyi? Biwikala mumulombe ne muoyo mujima kadi lutatu luikale anu luela njoba, anyi mene lukola anu kukola, uvua mudikonke wamba ne: uvua mua kuikala muenzele Yehowa bibi anyi? Biobi nanku, vuluka tshilejilu tshia Paulo. Anu muvua Yehowa muandamune masambile ende, ke muandamunaye ebe pebe. Pamuapa kakujikija lutatu luebe to. Kadi ku diambuluisha dia nyuma wende, neakupeshe bukole buudi nabu dijinga bua kunanukila mu lutatu alu. (Mis. 61:3, 4) Badi mua kuikala benda ‘bakukuma panshi,’ kadi Yehowa kakukulekela to.​—2 Kol. 4:8, 9; Filip. 4:13.

7-8. a) Leja mudi nyuma muimpe muenze bu lupepele. b) Mmunyi muvua Petelo mumvuije tshitu nyuma muimpe wenza?

⁷ Mmushindu kayi mukuabu udi nyuma wa Yehowa utuambuluisha? Nyuma eu mmuenze bu lupepele ludi lututa pa mâyi. Mazuwa nansha owu mu mavuala, adi mua kufika kudiwu aya bimpe lupepe luolu lututa lutangile kudiwu aya aku. Bia muomumue, nyuma muimpe udi utuambuluisha bua kupitshila mu ntatu idi bu mavuala ne kufika ku bulongolodi bupiabupia bua Nzambi bua ditalala.

⁸ Bu muvua Petelo mulobi, uvua mumanye malu a diendesha matu anyi mazuwa. Ke bualu kayi tudi tumvua bua tshinyi uvua mutele muaku udi upetangana ne diendesha mazuwa pavuaye umvuija tshitu nyuma muimpe wenza. Wakafunda ne: “Dîyi dia buprofete kadivua dilue ku disua dia muntu musangu nansha umue to, kadi bantu bakakula malu a kudi Nzambi bu muvuabu benzeja kudi nyuma muimpe.” Muaku wa tshiena Greke udibu bakudimune ne: “benzeja” udi umvuija ku muaku ku muaku ne: “bambula; batuala” anyi basaka.​—2 Pet. 1:21; dim.

9. Pavua Petelo muambe ne: “batuala,” uvua utuma meji a bantu ku tshinyi?

⁹ Pavua Petelo muambe ne: “batuala,” uvua utuma meji a bantu ku tshinyi? Luka wakatela pende muaku wa tshiena Greke wa buena eu mu Bienzedi bua kuakula bua mazuwa adi tshipepele ‘tshipuekesha.’ (Bien. 27:15) Nunku, bilondeshile mumanyi kampanda wa malu a mu Bible, pavua Petelo mufunde ne: bafundi ba Bible bavua  “batuala,” wakatela “muaku uvua utuma meji a bantu ku tshitu tshienzekela mazuwa pa mâyi.” Nanku Petelo uvua wamba ne: anu mutu tshipepele tshiambula mazuwa anyi tshiasaka bua afike kudiwu aya, ke muvua kabidi nyuma muimpe pende mutuale baprofete ne bafundi ba Bible anyi mubasake bua kukumbaja mudimu wabu. Mumanyi au wakamba kabidi ne: “Bivua bienze anu bu ne: baprofete bavua babandishe bilamba bia ku mazuwa kuulu.” Yehowa wakenza wende mudimu, mmumue ne: wakatuma “tshipepele” anyi nyuma muimpe. Bafundi ba Bible pabu bakenza wabu mudimu, mmumue ne: bakalonda buludiki bua nyuma au.

10-11. Mmalu kayi abidi atudi ne bua kuenza bua kuikala batuishibue ne: nyuma muimpe udi utusaka bua kuya kumpala? Fila tshilejilu.

¹⁰ Bushuwa, tshikondo tshivuabu bafunda Bible tshikadi tshipite. Nansha nanku, nyuma muimpe utshidi anu upesha bantu ba Nzambi bukole. Yehowa utshidi anu wenza wende mudimu. Ntshinyi tshitudi mua kuenza bua nyuma wende kutuambuluisha? Bidi bikengela tuenze malu kampanda. Mmalu kayi au?

¹¹ Tuangate tshilejilu etshi: Bua tshipepele kuambuluisha muendeshi wa mazuwa, udi ne bua kuenza malu abidi. Bua kumpala, udi ne bua kutekela mazuwa ende muaba udi tshipepele tshitutshila. Bidi nanku bualu yeye mushale nawu mu dilobo, kule menemene ne muaba udi tshipepele tshitutshila, kaakuya kumpala to. Buibidi, udi ne bua kubandisha bilamba bia ku mazuwa ne kubibalula. Nanku bidi bimueneka bimpe ne: nansha tshipepele tshiotshi tshituta, bua mazuwa kuya kumpala, anu bilamba abi biobi biuwule ne lupepele. Bia muomumue, bua tuetu kunanukila mu mudimu wa Yehowa, anu nyuma muimpe yeye mutuambuluishe. Bua yeye kutuambuluisha, tudi petu ne bua kuenza malu abidi. Bua kumpala, tudi ne bua kuenza malu adi enza bua nyuma wa Nzambi atuambuluishe bienze bu ne: tudi bimanyine muaba udiye ututshila bu tshipepele. Buibidi, tudi ne bua kudifila bikole mu dienza malu au ne muetu muonso, bienze bu ne: tudi babandishe bilamba bia ku mazuwa ne babibalule. (Mis. 119:32) Patudi tuenza malu aa, nyuma muimpe neatusake bua tumone mua kupitshila mu buluishi ne ntatu bidi bienze bu mavuala ne  neatuambuluishe bua kunanukilamu ne lulamatu luonso too ne mutuafika mu bulongolodi bupiabupia bua Nzambi.

12. Ntshinyi tshitudi tumona mpindieu?

¹² Tudi bafume ku dimona mishindu ibidi idi nyuma muimpe utuambuluisha. Udi utupesha bukole ne utuambuluisha bua kushala ne lulamatu patudi mu ntatu. Udi kabidi utusaka bua kuya kumpala ne utuambuluisha bua kushala mu njila wa ku muoyo wa tshiendelele. Tumonayi mpindieu malu anayi atudi ne bua kuenza bua nyuma eu kutuambuluisha menemene.

13. Bilondeshile 2 Timote 3:16, 17, ntshinyi tshidi Dîyi dia Nzambi mua kutuenzela? Ntshinyi tshitudi ne bua kuenza?

¹³ Tshia kumpala, ikala ulonga Dîyi dia Nzambi. (Bala 2 Timote 3:16, 17.) Muaku wa tshiena Greke udibu bakudimune ne: “ndifundisha kudi Nzambi ku bukole bua nyuma wende” udi umvuija ku muaku ku muaku ne: “ndifundisha ku mupuya wa Nzambi.” Nzambi “wakapudija” anyi wakela ngenyi yende mu mitu ya bafundi ba Bible ku diambuluisha dia nyuma wende. Patudi tubala Bible ne tuelangana meji a bitudi tubala, mêyi a Nzambi adi abuela mu meji etu ne mu muoyo wetu. Ngenyi idi mifundisha ku bukole bua nyuma eyi idi itusaka bua kuenza malu adi apetangana ne disua dia Nzambi. (Eb. 4:12) Kadi bua nyuma muimpe kutuambuluisha menemene, tudi ne bua kukeba dîba dia kudilongela Bible pa tshibidilu ne kuelangana meji bikole bua bitudi tubala. Dîba adi Dîyi dia Nzambi nedituambuluishe bua tuikale tuakula ne tuenza malu mudi Nzambi musue.

14. a) Bua tshinyi tudi mua kuamba ne: bisangilu mmuaba utu nyuma muimpe ututa bu tshipepele? b) Mmushindu kayi utudi mua kubuela mu bisangilu benze bu badi ne bilamba bia ku mazuwa bibalula?

¹⁴ Tshibidi, ikala utendelela Nzambi ne bena Kristo nebe. (Mis. 22:22) Mu ngumvuilu kampanda, patudi tuenza bisangilu, tudi muaba udi nyuma muimpe ututa bu tshipepele. Nyuma wa Yehowa utu netu mu bisangilu. (Buak. 2:29) Bua tshinyi tudi tuamba nanku? Bualu patutu tutuilangana bua kutendelela Nzambi ne bena Kristo netu, tutu tumulomba nyuma muimpe, tuimba misambu ya Bukalenge miangatshila mu Dîyi dia Nzambi, ne tuteleja mibelu ya mu Bible idibu batupesha kudi bana betu ba balume badibu basungule kudi nyuma au. Nyuma au udi kabidi wambuluisha bana betu ba bakaji bua kulongolola midimu yabu ne kuyenza. Kadi bua yeye kutuambuluisha menemene, bidi bikengela tulue mu bisangilu badilongolole bua kuandamunamu. Tuetu benze nanku, tudi tubuela mu bisangilu benze bu badi ne bilamba bia ku mazuwa bibalula.

15. Mmudimu kayi udi nawu nyuma muimpe mu buambi?

¹⁵ Tshisatu, ikala uyisha. Paudi uyisha ne ulongesha ne Bible, udi witaba bua nyuma muimpe akuambuluishe mu mudimu wa buambi. (Lomo 15:18, 19) Kadi bua kukuambuluishaye bimpe menemene, udi ne bua kuyisha pa tshibidilu ne kubadila bantu Bible padiku mushindu. Bumue bua ku malu adi mua kukuambuluisha bua kuyisha bimpe menemene nkulonda ngenyi ya mua kuyukila ne bantu idi pa Mabeji a Tshisangilu tshia Nsombelu ne mudimu wetu.

16. Mmushindu kayi mutambe buimpe wa kupeta nyuma muimpe njila buludi?

¹⁶ Tshinayi, ikala usambila Yehowa. (Mat. 7:7-11; Luka 11:13) Mushindu mutambe buimpe wa kupeta nyuma muimpe njila buludi nkumulomba mu disambila. Kakuena tshidi mua kupangisha masambila etu bua kufika kudi Yehowa anyi kupangisha nyuma wa Nzambi eu bua kufika kutudi to; nansha buloko anyi Satana kabiena mua kubipangisha to. (Yak. 1:17) Mmushindu kayi utudi mua kusambila bua nyuma muimpe kutuambuluisha menemene? Bua kuandamuna, tuanji tukonkonone bimpe menemene bualu bua disambila ku diambuluisha dia tshilejilu tshidi anu mu Evanjeliyo wa Luka nkayamu. *

17. Tshilejilu tshidi Yezu mufile mu Luka 11:5-9, 13 tshidi mua kutulongesha tshinyi bua disambila?

¹⁷ Bala Luka 11:5-9, 13. Tshilejilu tshidi Yezu mufile etshi tshidi tshileja mushindu utudi ne bua kulomba nyuma muimpe. Mu tshilejilu etshi, muntu udibu batelamu wakapeta tshivuaye ukeba “bua disuminyina diende dia dikima.” Kavua utshina bua kulomba mulunda wende diambuluisha nansha mukavuabu mundankulu to. (Luka 11:8) * Bua tshinyi Yezu uvua mufile tshilejilu etshi bua tshilumbu tshia disambila? Wakamba ne: “Tungunukayi ne kulomba, nebanupeshe; tungunukayi ne kukeba, nenupete; tungunukayi ne kukokola, nebanunzuluile.” Bidi bitulongesha tshinyi? Bua kupeta nyuma muimpe, tudi ne bua kumulomba ne disuminyina.

18. Bilondeshile tshilejilu tshivua Yezu mufile, bua tshinyi mbimpe tuikale batuishibue ne: Yehowa neatupeshe nyuma wende muimpe?

¹⁸ Tshilejilu tshivua Yezu mufile tshidi tshituambuluisha kabidi bua kumanya bua tshinyi Yehowa neatupeshe nyuma muimpe. Muntu udiye mutele mu tshilejilu atshi uvua musue kuikala muakididi muimpe wa benyi. Wakadimona muenzejibue bua kupesha muenyi uvua mumuendele mundankulu tshiakudia; kadi kavua ne tshintu tshia kumupesha to. Yezu wakamba ne: muena mutumba nende wakamupesha mampa bualu wakamulomba ne disuminyina dia dikima. Tshivua Yezu musue kuamba ntshinyi? Bikala muntu mupange bupuangane witaba bua kuambuluisha udi umulomba tshintu ne disuminyina, Tatu wetu wa mu diulu muena malu mimpe udi mua kupanga mua kuambuluisha muntu udi umulomba nyuma muimpe ne disuminyina anyi? Nunku mbimpe tusambile batuishibue ne: patudi tulomba Yehowa nyuma muimpe ne disuminyina neatupeshaye.​—Mis. 10:17; 66:19.

19. Bua tshinyi mbimpe tuikale batuishibue ne: netutshimune?

¹⁹ Tuikale batuishibue ne: nansha mudi Satana utuluisha anu kutuluisha kayi utshioka, tuetu netumutshimune. Bua tshinyi? Bualu nyuma muimpe udi utuambuluisha mu mishindu ibidi. Wa kumpala, udi utupesha bukole butudi nabu dijinga bua kutantamena ntatu. Muibidi, nyumu eu mbukole budi buenze bu budi buwuja bilamba bietu bia ku mazuwa, bituambuluisha bua kuya batangile kumpala mu mudimu utudi tuenzela Yehowa bamanye ne: kumpala eku netupete muoyo wa tshiendelele. Tudisuikayi bua kuenza tshionso tshidi tshikengela bua nyuma muimpe atuambuluishe menemene!