1-2. (a) Chumanyi chatukwashaña kuumika kukala ifuku nifuku? Lumbululenu. (b) Tukuhanjekadi muchinu chibaaba?

KANDA mutoñojokeñahu dehi hakukala kumwahitilimu nawa muhosha nenu: “Neyi muñovu jami hinadi kutwesha kuumikaku?” Etu amavulu twahoshahu dehi. Hadaha mwahosheli hanyima yakwanuka chimwomikili nayikatu hela hampinji yafwili ntaña yenu. Neyi mwanuka iyi yihuñu, mwatoñojokaña nenu mwomikili muloña wakwila spiritu yajila yaYehova yayinkeli “ñovu yabadika hañovu jawantu.”—2 Kor. 4:7-9.

² Ninetu twakeñaña spiritu yajila hakwila nawu abuli kutuluwañesha mukanu kaayi katama. (1 Yow. 5:19) Kubombelahu, twakeñaña ñovu hakwila nawu tudikañi “namazaza awandemoni.” (Efwe. 6:12) Chineli tunakuhita mukukala kwamuchidiwu, tuhanjekenu hajinjila jiyedi spiritu yajila muyinateli kutukwashila. Kuhiñahu tukudiza yuma yitwatela kwila hakwila nawu spiritu yajila yitukwashi.

3. Njilanyi yimu mwatukwashilañayi Yehova kuumika kukala?

³ Spiritu yajila yaYehova yatwinkaña ñovu hela wuswa wakwila yuma yejima hela chakwila tunakuhita mukukala. Kapostolu Pawulu watwalekelihu kumukalakela Yehova hela chakwila wamweneña kukala. Chuma chamukwashili hikushindamena ‘hañovu jaKristu.’ (2 Kor. 12:9) Pawulu hadiñayi halwendu lwindi lwamuchiyedi lwawumishonali, wadiña nakushimwina nankashi nikuchima matenti kulonda yadikwasheña nachu. Washakamineña muKorinda kwitala daAkwila naPrisila. Niwena adiña akwakuchima matenti. Pawulu niyena wachimineña nawu mafuku amakwawu chineli niyena wadiña weluka. (Yil. 18:1-4) Spiritu yajila yamwinkeleña Pawulu ñovu yakushimwina nikuzata mudimu wakumujimba.

4. Kwesekeja na 2 Akorinda 12:7b-9, kukalanyi kwamweneñayi Pawulu?

 ⁴ Tañenu 2 Akorinda 12:7b-9. Pawulu watalishili mudihi munawa mavasi chahosheliyi nindi wadiña nakulwisha “[namwiña] mumujimba”? Neyi mwiña wutwiñila mumujimba, wakataña nankashi. Dichi Pawulu watalishili mukwila nindi wamweni kukala kwaniwu muchidi. Wahosheli nindi iku kukala kwadiña neyi “kañelu kaSatana” kadiña ‘nakumweta jimbañala.’ Hadaha Satana niañelu jindi hidiwu aleteleña kukala kwejima kwaPawulu, kwadiña neyi mwiña mumujimbaku. Ilaña chelili awa aspiritu atama amoni “mwiña,” hadaha afwilileña kuwiñija nankashi mumujimba kulonda Pawulu yatiyeña kuyeña. Pawulu welili ñahi?

5. Yehova wakwili ñahi kulomba kwaPawulu?

⁵ Hakusambila, Pawulu wakeñeleña nindi Yehova yamufumishi iwu “mwiña.” Wahosheli nindi: “Namulembeleleli Mwanta [Yehova] mapampa kasatu nami, iwu mwiña wunfumi.” Hela chakwila Pawulu walombeleña, iwu mwiña wamufumini wanyi. Komana chinayi mukwila nawu Yehova wakwileña wanyi kulomba kwaPawulu? Inehi. Wakwileña. Yehova hafumishilihu kukalaku, ilaña wamwinkeleña Pawulu ñovu yakuumika. Yehova wahosheli nindi: “Mukuzeyazeya kweyi dimunakulumbulukila ñovu jami.” (2 Kor. 12:8, 9) Muloña wawukwashu waNzambi, Pawulu watwalekelihu kwikala namuzañalu nikuwunda.—Fwi. 4:4-7.

6. (a) Yehova nateli kwakula ñahi kulomba kwetu? (b) Yikaninwinyi yinayikoleshi munsona jidi muparagilafu?

⁶ Mwamulembelelahu dehi Yehova nenu yafumishihu kukala kumunakumona neyi chalombeliyi Pawulu? Hela chakwila mwalombeli kakavulu, kukala hikwamaniniku, hadaha kwaswejeleliku. Komana mwadakameneni nenu Yehova wayihela? Neyi dimu, anukenuña chuma cheliliyi Pawulu. Yehova wakwili kulomba kwaPawulu nawa Wukwakula kulomba kwenu ninenu. Yehova hanateli kufumishahu kukalaku. Ilaña wukuyinka ñovu yakuumika nachu kukala kumunakumona kuhitila mudi spiritu yindi yajila. (Mas. 61: 3, 4) Anateli ‘kuyidimbwisha hamaseki,’ ilaña Yehova hakuyishiyaku.—2 Kor. 4:8, 9; Fwi. 4:13.

7-8. (a) Munjilanyi mwekalila spiritu yajila neyi mpepela? (b) Petulu walumbulwili ñahi chazataña spiritu yajila?

⁷ Munjilanyi yikwawu mwatukwashilaña spiritu yajila? Tunateli kwesekeja spiritu yajila nampepela yahakaluñalwiji. Mbopolu yinateli kushika chiwahi kwiluña kuyinakuya hela chakwila hakaluñalwiji hadi mankanda. Munjila yoyimu, spiritu yajila yatukwashaña kutwalekahu kumukalakela Yehova hela chakwila tunakumona kukala kwasweja nichitukashika mwituña dadiha.

⁸ Chineli kapostolu Petulu wadiña chibinda wanshi, welukili chendaña mbopolu. Hadaha dichaletesheli yalumbululi chazatikaña spiritu yajila, hakuzatisha mazu kutalisha kuchendaña mbopolu. Wasonekeli nindi: “Kwosi wuprofwetu wenjili kwesekeja nankeñelu yamuntuku, ilaña antu ahosheleña jafumineña kudi Nzambi kwesekeja nachayilombweliwu naspiritu yajila.” Izu dachiGiriki dabalumunawu nawu ‘chayilombweliwu’ datalisha mukwila nawu “chayisendeliwu; chayihoshesheliwu.”—2 Pet. 1:21; tth.

9. Petulu wakeñeleña antu kutoñojokadi chazatishiliyi izu dakwila nawu “chayihoshesheliwu” kudi spiritu yajila?

⁹ Petulu wakeñeleña antu kutoñojokadi chahosheliyi nindi “chayihoshesheliwu”? Nsoneki wamukanda waYilwilu Luka niyena wazatishili nhoshelu yoyimu yezu dachiGiriki  hakulumbulula mbopolu ‘yalelwiliwu’ kudi mpepela. (Yil. 27:15) Muntu wumu wadiza Bayibolu walumbulwili nindi Petulu chasonekeliyi nindi ansoneki aBayibolu ‘ayilombweli’ naspiritu yajila, wazatishili mazu adi kuletesha antu kutoñojoka chendaña mbopolu. Petulu wahosheleña nindi, neyi chendeshañawu mbopolu kudi mpepela kulonda yishiki kuyinakuya, atuprofwetu niansoneki aBayibolu niwena ayilombweli kudi spiritu yajila hakwila nawu azati mudimu wawu. Muntu yowumu wahosheli nindi: “Ansoneki aBayibolu adiña neyi mbopolu yinakandamishiwu itenti kwiwulu. Yehova wazatili mudimu windi. Wayinkeli “mpepela,” hela spiritu yajila. Ansoneki aBayibolu niwena azatili mudimu wayinkeliwu. Awuzatili kwesekeja nachayilombweliwu kudi spiritu yajila.

10-11. Yumanyi yiyedi yitwatela kwila hakwila nawu spiritu yajila yitulomboli? Lumbululenu.

¹⁰ Makonu, Yehova henkaña antu spiritu yajila kulonda asonekeña nyikanda yamuBayiboluku. Hela chochu, spiritu yajila yichidi kuzatika hadi antu jaNzambi. Yehova wuchidi kuzata mudimu windi. Tunateli kwiteja ñahi spiritu yajila kutulombola? Twatela kutwalekahu kuzata mudimu wetu. Tunateli kwila ñahi mwenimu?

¹¹ Talenu ichi chakutalilahu. Hakwila nawu mpepela yimukwashi mukwakwendesha mbopolu watela kwila yuma yiyedi. Chatachi, watela kuteñulwila mbopolu yindi kunakuya mpepela. Mbopolu yindi yinateli kwenda wanyi neyi yayimika kuchikumu kwakulehi nakunakuya mpepela. Chamuchiyedi, watela kutandumuna itenti swayi-swayi. Hela chakwila mpepela yinakukunka, mbopolu yindi yinateli kwenda hohu neyi mpepela yikwata mwitenti. Munjila yoyimu tunateli kutwalekahu kumukalakela Yehova chiña hohu naspiritu yindi yajila. Hakwila nawu spiritu yajila yitukwashi, twatela kwila iyi yuma yiyedi. Chatachi, twatela kwila munakutulombola spiritu  yaNzambi yajila. Chamuchiyedi, twatela ‘kutandumuna matenti etu’ kuhitila mukuzataku iyi nyidimu kwesekeja nahanakumini ñovu jetu. (Mas. 119:32) Neyi twila iyi yuma, spiritu yajila yikutwinka ñovu yakuumika kukala kwasweja nikutwalekahu kumukalakela Yehova sampu tuneñili mwituña daNzambi dadiha.

12. Yumanyi yitukuhanjekahu?

¹² Tunahanjeki dehi njila jiyedi mwatukwashilaña spiritu yajila. Spiritu yajila yatwinkaña ñovu nawa yatukwashaña kwikala ashinshika iku tunakumona kukala. Cheñi, spiritu yajila yatulombolaña nikutukwasha kuzata nyidimu yaYehova nawa dichuma chikatukwasha kwikala nawumi wahaya nyaaka. Ichi dinu tuhanjekenu hayuma yiwana yitwatela kwila hakwila nawu spiritu yajila yitukwashi.

13. Kwesekeja na 2 Timotewu 3:16, 17, Nsona yinateli kutukwasha ñahi, nawa chumanyi chitwatela kwila?

¹³ Chatachi, dizenuña Izu daNzambi. (Tañenu 2 Timotewu 3:16, 17.) Nzambi wazatishili spiritu yindi nakusha yitoñojoka yindi mudi ansoneki aBayibolu. Neyi tutañaña Bayibolu nikutoñojokahu chikupu hayuma yitunakutaña, nshimbi jaNzambi jikushakama muyitoñojoka nimunyichima yetu. Awa mazu onenawu akutukwasha kuhimpa yilwilu yetu kulonda tumuzañalesheña Yehova. (Heb. 4:12) Ilaña hakwila nawu spiritu yajila yitukwashi, twatela kwikalaña nampinji yakudiza Bayibolu mpinji yejima nikutoñojoka chikupu hayuma yitunakudiza. Kuhiñahu dinu, Izu daNzambi dikutulombolaña muyuma yejima yitunakwila.

14. (a) Tukuhosheladi netu hakupompa kwetu hekalaña spiritu yajila? (b) Chumanyi chinateli kutukwasha hakwila nawu tudiluñisheña hakupompa?

¹⁴ Chamuchiyedi, difuukulenuña hamu kudi Nzambi. (Mas. 22:22) Spiritu yaYehova yekalaña hakupompa. (Chim. 2:29) Tunahoshelidi mwenimu? Muloña neyi tunakupompa hamu nawamanakwetu niahela, twalombaña spiritu yajila, twembaña tumina twaWanta twashindamena Hezu daNzambi nawa twatiyililaña kukufumba kwashindamena haBayibolu, kwahanañawu amanakwetu atondawu naspiritu yajila. Nawa spiritu yajila yoyimu yayikwashaña ahela kuloñesha nikuhana jimpanji jawu chiwahi. Hakwila nawu spiritu yitukwashi twatela kuloñeshaña nikwakulahu hakupompa. Dikwila nawu, neyi tunakupompa spiritu yajila yinateli kutukwasha neyi chochakwashañawu jimbopolu jinenzununiwu matenti kudi mpepela.

15. Spiritu yajila yatukwashaña ñahi mumudimu wakushimwina?

¹⁵ Chamuchisatu, shimwinenuña. Neyi tuzatishaña Bayibolu mumudimu wakushimwina nikutañisha, dikwila nawu tunakwiteja spiritu yajila kutukwasha mumudimu wetu. (Rom. 15:18, 19) Hakwila nawu spiritu yajila yiyikwashi mwatela kudikitaña chikupu mumudimu wakushimwina nikuzatishaña Bayibolu neyi chinatwesheki. Njila yimu yimunateli kukulukila kuhanjeka nawantu mumudimu wakushimwina hikuzatisha njila yidi hachakuhanjeka nawantu yekala muChihandilu niMudimu Mukanda Wakupompa.

16. Njilanyi yitwatela kutambwilamu spiritu yajila?

¹⁶ Chamuchiwana, lombenuña kudi Yehova. (Mat. 7:7-11; Luka 11:13) Njila yimu yakutambwilamu spiritu yajila hikumulomba Yehova. Kwosi chuma chidi chejima chinateli kukañesha kulomba kwetu kushika kudi Yehova hela kutukañesha kutambwila spiritu yajila, chili kaleya hela Satana hiyakutweshaku. (Yak. 1:17) Tunateli kulomba ñahi hakwila nawu spiritu yajila yitukwashi? Hakwila nawu twakuli ilu lwihu, tusambilenu ntahi kudiza  hakulomba kwashimunawu muchakutalilahu chekala muNsañu Yayiwahi yaLuka. *

17. Chumanyi chitunakudizila kukulomba kwamu chakutalilahu chaYesu chekala haLuka 11:5-9, 13?

¹⁷ Tañenu Luka 11:5-9, 13. Chakutalilahu chaYesu chamwekeshaña chitwatela kulomba spiritu yajila. Munichi chakutalilahu iwu muntu watambwilili yuma yakeñeleñayi “muloña wanyikoyu yindi.” Watiyili woma wanyi kuya nakuhindwisha ibwambu dindi hela chakwila mwadiña mukachi kawufuku. (Talenu nsañu yakudiza yidi haLuka 11:8, mumwb18 July.) Chikumanyi chakeñeleñayi kuhosha Yesu munichi chakutalilahu chakulomba? Wahosheli nindi: “Twalekenuhu kulomba, akayinkachu; twalekenuhu kukeñakeña, mwakawana; twalekenuhu kudondomwena, akayenzunwinaku.” Hanu dinu, chumanyi chitunakudizilaku? Hakwila nawu tutambwili spiritu yajila, twatela kulombaña nanyikoyu.

18. Kwesekeja nachakutalilahu chaYesu, muloñadi chitwatela kukuhwelela netu Yehova nateli kutwinka spiritu yajila?

¹⁸ Chakutalilahu chaYesu chatukwashaña kwiluka cheñi Yehova chinateli kutwinkayi spiritu yajila. Muntu wamuchakutalilahu wakeñeleña kwakamena chiwahi ñenji yindi. Chakwila wafwilileña nindi yamuloñesheli ñenji yindi wenjili nawufuku yakuda. Yesu wahosheli nindi iwu ntuñi nindi wamwinkeli dinkendi dakeñeleñayi muloña wanyikoyu yindi. Chikumanyi chadizishileñayi Yesu? Neyi muntu wabula kuwanina yakwasha ntuñi nindi wanyikoyu, dikwila nawu Tata yetu wamwiwulu wukweti luwi wukutukwasha nikubadikahu neyi tumulomba spiritu yajila nanyikoyu! Dichi twatela kukuhwelela chikupu netu Yehova wukwakula kulomba kwetu neyi tumulomba spiritu yajila.—Mas. 10:17; 66:19.

19. Muloñadi chitwatela kukuhwelela chikupu netu tunateli kushinda?

¹⁹ Dichi twatela kukuhwelela netu tunateli kuumika hela chakwila Satana nakutuzuñisha. Muloñadi? Muloña spiritu yajila yatukwashaña munjila jiyedi. Njila yatachi, yatwinkaña ñovu yakushinda kukala kutwamonaña. Yamuchiyedi, hiñovu yatukwashaña kutwalekahu kumukalakela Yehova sampu nichitwakashika mwituña dadiha. Dichi tutwalekihu kukuhwelela netu spiritu yajila yinateli kutukwasha!