1-2. (a) Ang’o ma konyowaga nyagore gi pek ma waromogago? Ler ane. (b) Ang’o ma wadwaro nono e sulani?

“KA APARO apara tembe ma asekaloe, aneno maler ni onge kaka nanyalo nyagora e tembego kenda.” Be isegawacho gima kamano? Thothwa osegawacho kamano. Samoro niwacho kamano bang’ nyagori gi tuo moro kata tho mar watni. Kiparo kindego, ineno maler ni ninyagori mana nikech Jehova nomiyi rohone maler mondo ibed gi “teko mokalo mapile.”​—2 Kor. 4:7-9.

² Wadwaro roho maler mondo okonywa bende e kwedo piny marachni. (1 Joh. 5:19) Wadwaro bende teko mar kwedo “joloch mag piny mar mudhoni.” (Efe. 6:12) Koro, wadwaro nono yore ariyo ma roho maler nyalo konyowa nyagorego gi pek ma wasewachogo. Kae to wabiro nono gik ma wanyalo timo mondo roho maler okonywa e yo maber chuth.

3. Achiel kuom yore ma Jehova konyowago nano e tembe en mane?

³ Roho maler mar Jehova konyowa kuom miyowa teko kod nyalo mar timo migepe duto monego watim kata obedo ni wakalo e tembe. Jaote Paulo ne neno ni “teko mar Kristo” e ma ne konye dhi nyime tiyo ne Nyasaye kata obedo ni nokalo e tembe mang’eny. (2 Kor. 12:9) Ka ne en e wuodhe mar ariyo kaka jamisonari, ne otiyo matek e tij lendo ka e sechegogogo bende notiyo tich ma ne kelone yuto mondo osirgo ngimane. Ne odak Korintho e od Akwila gi Prisila. Ne gitiyo tij loso hembe. Nikech Paulo bende nong’eyo loso hembe, ne ojakawo thuolo mare matin mondo oti kodgi. (Tich 18:1-4) Roho maler nomiyo Paulo teko mar timo tij yuto kod tij lendo.

4. Ka luwore gi 2 Jo-Korintho 12:7b-9, ang’o ma Paulo ne nyagorego?

⁴ Som 2 Jo-Korintho 12:7b-9. E ndikogo, ang’o ma Paulo ne temo wacho ka nowacho ni ne en gi ‘kudho  moro ma ne chwowo ringrene’? Ka kudho ochwowo ringreni momokoe, inyalo winjo lit ahinya. Omiyo, gima Paulo ne wacho en ni nonyagore gi tem kata chandruok moro malit. Noluongo temno ni “malaika mar Satan” ma ‘nosiko ka sande.’ Nyalo bedo ni Satan kata jochiendene ok e ma nokelo ne Paulo tembego achiel kachiel ka gima gichwowo kudho e ringre Paulo. Kata kamano, ka jochiendego noneno kudhono e ringre Paulo, nyalo bedo ni ne gitiele mondo Paulo omed winjo lit. Paulo notimo nang’o?

5. Jehova nodwoko lamb Paulo e yo mane?

⁵ Mokwongo okwongo, Paulo ne dwaro ni ogolne kudhono. Nowacho niya: “Ne asayo Ruodhwa nyadidek . . . mondo gino oweya.” Kata kamano, kudhono ne osiko kode. Be mano nyiso ni Jehova ne ok odwoko lamb Paulo? Ooyo, nodwoke. Kata obedo ni Jehova ne ok ogolo ne Paulo chandruogno, ne omiye teko mar nano. Nonyiso Paulo kama: “Tekona nyisore e yo malong’o chuth e nyawo.” (2 Kor. 12:8, 9) Teko ma ne Jehova omiyeno nokonye mi osiko ka omor kendo ka en gi chuny mokue!​—Fil. 4:4-7.

6. (a) Jehova nyalo dwoko lambwa e yo mane? (b) Ndiko moket e paragrafni jiwi nade?

⁶ Mana kaka Paulo, be isegasayo Jehova mondo ogolni chandruok moro? Ka po ni chandruogno nodhi mana nyime kata omedo bedo marach moloyo, be dibed ni niparo ni mano nyiso ni Jehova ok mor kodi? Ka en kamano, to par ranyisi mar Paulo. Bed gadier ni Jehova biro dwoko lamoni mana kaka nodwoko lamb Paulo! Seche moko ok obi goloni chandruogno. Kata kamano, obiro tiyo gi rohone maler mondo omiyi teko mar nano e chandruogno. (Zab. 61:3, 4) Kata ka ‘igoyi piny,’ Jehova ok bi weyi.​—2 Kor. 4:8, 9; Fil. 4:13.

7-8. (a) Roho maler chalo gi yamo e yo mane? (b) Jaote Petro nolero nade kaka roho maler tiyo?

⁷ En yo mane machielo ma roho maler konyowago? Ka in e nam ma nigi apaka mager, to yamo kutho ka teri yo kuma ne idhiye, mano nyalo konyi ahinya. Roho maler chalo gi yamono nikech okonyowa kalo e tembe mager ma chalo gi apaka, mi oterwa kuma wadhiye, ma en piny manyien ma Jehova osingonwa.

⁸ Jaote Petro ne en jalupo, omiyo, nong’eyo kwang’o yie. Mano e momiyo sama ne olero kaka roho maler tiyo, ne otiyo gi wach moro ma nenore ni nitiyogago e weche mag kwang’o yie. Nondiko kama: “Onge kinde moro amora ma wach mokor ne obiro nikech dwaro mar dhano, to ji ne wacho weche moa kuom Nyasaye ka luwore gi kaka roho maler ne tayogi.” E dho Grik, wach molok e ndikoni ni “tayogi” tiende sie en “chwalo” kata “dhiro.”​—2 Pet. 1:21.

9. Petro ne nigi ranyisi mane e pache sama nowacho ni roho maler ‘notayo’ jondik Muma?

⁹ Petro ne nigi ranyisi mane e pache sama nowacho ni roho maler ‘notayo’ jondik Muma kata chwalogi? Ka ne Luka ndiko bug Tich Joote, notiyo gi wach mar Grik achiel achielno sama nowuoyo kuom meli ma yamo ‘tero.’ (Tich 27:15) Jasomo moro molony e nono weche motigo e Muma wacho ni sama Petro nowacho ni joma nondiko Muma ne ota kata ochwal gi roho maler, notiyo gi ranyisi ma jokwang’ yiedhi nong’eyo maber. Gima Petro ne wacho en ni mana kaka  yamo nyalo chwalo meli kata tere mi ochop kama odhiye, e kaka roho maler nochwalo jonabi kod jomamoko mondo ondik Muma. Jasomono nowacho bende kama: “Ne chalo ka gima jonabigo noyaro tanga.” Kae to Jehova notimo ma kore. Nochiwo “yamo,” tiende ni rohone maler, mondo ochwal jonabigo. Jondik Muma be notimo ma korgi. Ne gitimo gik moko ka luwore gi kaka roho maler ne chwalogi.

10-11. Mondo roho maler okonywa, gin okenge mage ariyo ma nyaka wakaw? Chiw ane ranyisi.

¹⁰ En adier ni sani ok wandik Muma. Kata kamano, roho maler pod miyo jotich Nyasaye teko mar timo gik mang’eny. Jehova pod timo ma kore. Ang’o ma wanyalo timo mondo roho maler okonywa? Wan be nyaka watim ma korwa. E yo mane?

¹¹ Par ane ranyisini. Mondo yamo okony jakwang’ yie, nitie okenge moko ariyo ma nyaka okaw. Mokwongo, nyaka oket yie ka wiye ochomo kuma yamo dhiye. Yie ok nyal sudo ka jakwang’e ok ogole e dho wath kama yamo ongee. Mar ariyo, onego ong’aw tanga malo kendo oyare nyaka tung’. Kata bed ni yamo kutho ma romo nade, yie ok nyal sudo nyime ka yamo ok odhiro tanga. E yo ma chalo kamano, wanyalo nano sama watiyo ne Jehova mana ka roho maler okonyowa. Mondo roho maler okonywa, nitie okenge ariyo ma nyaka wakaw. Mokwongo, nyaka wachom kuma roho maler dhiye, tiende ni, watim gik ma roho tayo jotich Nyasaye mondo otim. Mar ariyo, nyaka wang’aw tangawa malo kendo wayare nyaka tung’, tiende ni, watim gik ma roho tayogo gi chunywa duto. (Zab. 119:32) Ka wakawo okenge ariyogo, roho maler biro chwalowa mondo wamwom apaka mager, moriwo akwede kod tembe, kendo obiro konyowa mondo  wanan nyaka wadonj e piny manyien ma Nyasaye osingonwa.

12. Ang’o ma koro wadwaro nono?

¹² Kochopo kae, waseneno yore ariyo ma roho maler nyalo konyowago. Roho maler miyowa teko kendo okonyowa nano sama wakalo e tembe. Bende, okonyowa mondo wadhi nyime timo gik ma Jehova dwaro ni watim kendo wasik e yor ngima. Koro, wadwaro nono gik moko ang’wen ma nyaka watim ka wadwaro ni roho maler okonywa.

13. Ka luwore gi 2 Timotheo 3:16, 17, Muma nyalo konyowa nade, to ang’o ma nyaka watim?

¹³ Mokwongo, puonjri Wach Nyasaye. (Som 2 Timotheo 3:16, 17.) Nyasaye notiyo gi rohone mondo oket gik moparo e pach jondik Muma. Sama wasomo Muma kendo waparo matut kuom gik ma wasomo, weche Nyasaye donjo e pachwa kod chunywa. Wechego chwalowa mondo walok kit ngimawa mondo wamor Jehova. (Hib. 4:12) To mondo roho maler okonywa e yo maber chuth, nyaka wabed gi chenro moriere mar puonjruok Muma kendo paro matut kuom gik ma wapuonjore. Mano e ka Wach Nyasaye biro tayo gik ma wawacho kod ma watimo.

14. (a) Ang’o momiyo wanyalo wacho ni roho maler kuthoga ahinya e chokruogewa? (b) Ere kaka wanyalo dhi e chokruok ka wang’awo tangawa malo kendo wayare nyaka tung’?

¹⁴ Mar ariyo, dhi e chokruok. (Zab. 22:22) Roho maler kuthoga ahinya e chokruogewa. (Fwe. 2:29) Ang’o momiyo wawacho kamano? Mano en nikech sama wachokore kanyachiel gi Jokristo wetewa, walemoga mondo wayud roho maler, wawero wende Pinyruoth molos kowuok e Wach Nyasaye mokudh gi roho maler, kendo wawinjo twege migolo gi owete mopwodh gi roho maler. Bende, roho maler e ma konyo nyimine mondo giik migepegi kendo gigolgi e yo maber. Kata kamano, mondo roho maler okonywa e yo maber chuth, nyaka waikre maber ne chokruogewa kendo wachiw paro. Sama watimo kamano, wanyiso ni wadhi e chokruok ka wang’awo tangawa malo kendo wayare nyaka tung’.

15. Ere kaka roho maler konyowa e tij lendo?

¹⁵ Mar adek, lendi. Sama watiyo gi Muma e tijwa mar lendo kod puonjo, wamiyo roho maler thuolo mar konyowa e tijno. (Rumi 15:18, 19) Kata kamano, mondo roho maler okonywa e yo maber chuth, nyaka wabed gi chenro moriere mar dhi e lendo kendo watem somo ne ji Muma sama mano nyalore. Achiel kuom yore minyalo berogo tiji mar lendo en tiyo gi weche mwanyalo chako wuoyogo gi ji ma yudore e bug Ngimawa kod Tijwa Kaka Jokristo​—Chenro mar Chokruok.

16. Yo ma achiel kachiel ma wanyalo yudogo roho maler en mane?

¹⁶ Mar ang’wen, lem. (Mat. 7:7-11; Luka 11:13) Yo ma achiel kachiel ma wanyalo yudogo roho maler en kwayo Jehova mondo omiwago. Onge gimoro amora kata ng’ato ang’ata​—obed jela kata Satan​—ma nyalo geng’o lambwa kata mono roho maler choponwa! (Jak. 1:17) Kata kamano, mondo roho maler okonywa e yo maber chuth, ere kaka wanyalo lemo? Mondo wayud dwoko, we wapuonjre ane wach lamo e yo matut ka wanono ranyisi moro ma yudore e Injili mar Luka. *

17. Ranyisi ma Yesu notiyogo e Luka 11:5-9, 13 puonjowa ang’o e wach lamo?

¹⁷ Som Luka 11:5-9, 13. Ranyisi ma Yesu notiyogono konyowa ng’eyo kaka onego walem ka wakwayo roho maler. E ranyisino, ng’atno noyudo gima nodwaro nikech ‘nosiko kokwayo gi kinda.’ Ne ok oluor kwayo osiepne mondo okonye kata obedo ni ne en otieno. * Yesu notudo ranyisino nade gi lemo? Nowacho kama: “Sikuru ka ukwayo to ibiro miu; sikuru ka umanyo to unuyud; sikuru ka udwong’o to ibiro yawnu.” Mano puonjowa ang’o? Mondo roho maler okonywa, nyaka wasik ka wakwayo rohono gi kinda.

18. Ka luwore gi ranyisi ma ne Yesu otiyogo, ang’o momiyo wanyalo bedo gadier ni Jehova biro miyowa roho maler ka wakwaye?

¹⁸ Ranyisi ma Yesu notiyogono konyowa ng’eyo bende gimomiyo Jehova biro miyowa roho maler. Ng’at ma nodhi holo makate ne dwaro rito wendone maber. Noneno ni nyaka omi wendo ma nolime gotienono chiemo kata obedo ni noonge chiemo. Yesu nowacho ni jirandeno nomiye makate nikech nosiko kokwaye gi kinda. En puonj mane ma Yesu ne chiwo kanyo? Ka po ni dhano adhana nyalo konyo nyawadgi mana nikech nyawadgino kwaye gimoro gi kinda, donge Wuonwa ma ni e polo ma en Nyasaye mang’won be biro chiwo roho maler ne joma kwaye gi kinda! Omiyo, wanyalo lamo ka wan gadier ni Jehova biro miyowa roho maler ka wakwaye.​—Zab. 10:17; 66:19.

19. Ang’o momiyo wanyalo bedo gadier ni wabiro dhi nyime nano e chandruok?

¹⁹ Wanyalo bedo gadier ni wabiro dhi nyime nano e chandruok kata obedo ni Satan siko ka monjowa. Nikech ang’o? En nikech roho maler konyowa e yore ariyo. Mokwongo, omiyowa teko mar nano e tembe. Mar ariyo, ochwalowa komiyowa teko mar dhi nyime tiyo ne Jehova nyaka wadonj e piny manyien. Omiyo, wang’aduru ni wabiro timo duto ma wanyalo mondo roho maler okonywa e yo maber chuth!