1-2. (a) Bika bitukwasa tukolese nga tuli mu bukalu? Lumbununeni. (b) Bika bitusimutwiya muno cilongesa?

“BUKALU bunjaliwanene nabwo bwapwile bwakama, ngwe mu nzili yange lika ngwe kunjakolesele.” Neni mwendekaho laja ngoco ndi? Bwingi bwetu twendekaho laja ngoco. Hamo mwendekele ngoco hanima ya kubinja mushongo wakama nambe mumwatsisile munu imwazema. Nga mwanuka buje bukalu, muliziba ngweni mwasele kukolesa, mwafwa Yehova wamyanene sipilitu yendi ya kujela ije itubakana nzili ya bunu.​—2 Koli 4:7-9.

² Sipilitu ya kujela itukwasa lalo kubyana byuma byabibi bya muno mu kaye. (1 Yowa 5:19) Kutundaho lalo, tunapande kulwisa “binzili byabibi bya minzinzime.” (Efeso 6:12) Tusimutwiya ha bingila bibali mangana tumone muyasa kutukwasela sipilitu ya kujela. Tusimutwiya lalo byuma bitunapande kulinga mangana sipilitu ya kujela itukwase.

3. Ngila muka imo yali na kutukwaselamo Yehova mangana tukolese mu bukalu?

³ Sipilitu ya kujela ya Yehova ili na kutukwasa ha kutwana nzili mangana tupange bipangi byetu nameme tuli mu bukalu. Kapositolo Paulu wakele mu bukalu, oloni walizibile ngwendi asa kutwalelelaho kupangela Yehova mwafwa ya kukulahela ‘nzili ya Kilistu.’ (2 Koli 12:9) Ha bungenzi bwendi bwa mu cibali bwa bumishinali, Paulu wambulwile na nzili, co lalo wapangele bipangi bya ku mubila mangana aliyoyese. Wakakele mu Kolinte ku njubo ya Akwila na Pilisila. Akwila na Pilisila bapwile baka-kupanga bitenti. Paulu nendi cikeco capwile cipangi cendi, ngeci ha bisimbu bimo wakele na kupanga nabo. (Vili 18:1-4) Sipilitu ya kujela yakwasele Paulu akale na nzili ya kupanga cipangi ca kwambulula neci ca ku mubila.

4. Kwesekesa na 2 Kolinte 12:7b-9, bukalu muka bwakele nabwo Paulu?

 ⁴ Tandeni 2 Kolinte 12:7b-9. Aha ha mavesi, bika byalumbunwine Paulu omwo wendekele bya mungonga uje wakele mu mubila wendi? Nga mungonga unamipokokela mu mubila, muziba manene kubabala. Mukemwo mwalizibilile Paulu mwakele mu bukalu. Walizibile ngwe kangelo ka Satana wakele na kumupupanga. Hamo Satana na bandemone bendi keti bakebo banenele bukalu bwa Paulu bwa kufwa ngwe mungonga. Oloni bandemone mubanangukile buje bukalu, babwezeleleko. Kwapwile lika ngwe basindakanene mungonga mangana Paulu azibe manene kubabala. Paulu walingile bati?

5. Yehova wakumbulwile bati malombelo a Paulu?

⁵ Ha kulibanga, Paulu watondele ngwendi Yehova atundise uje mungonga. Wendekele ngwendi: ‘Bisimbu bitatu njalombele kuli Mwene Yehova . . . mangana autundise.’ Paulu nameme wakele na kulomba, uje mungonga kuwatundile. Kuma oku kulumbununa ngwabo Yehova kakumbulwile malombelo a Paulu ndi? Embwe. Waakumbulwile. Yehova kamanesele bukalu bwa Paulu, oloni wamwanene nzili ya kukolesa. Yehova wendekele ngwendi: ‘Nzili yange isholoka omwo unazeye.’ (2 Koli 12:8, 9) Co mu nzili ya Yehova, Paulu wapwile wa kubwahelela.​—Fili 4:4-7.

6. (a) Yehova asa kukumbulula bati malombelo etu? (b) Majwi muka a mu bisoneka bili muno mu palagilafu aje anamitakamesa?

⁶ Neni mwalombaho laja Yehova ngweni amanese bukalu bweni ngwe mwalingile Paulu ndi? Hamo muli na kulomba oloni bukalu kubwahwile, indi hamo asina bupwe oni bwakama. Kuma oku kumwesa ngwabo Yehova kesi na kumikumbulula ndi? Nga mukemwo, co anukeni Paulu. Yehova wakumbulwile malombelo a Paulu, neni amikumbulula. Hamo Yehova kamanesa bukalu bweni. Oloni amyana sipilitu ya kujela mangana mukolese mu bukalu. (Myaso 61:3, 4) Basa kumiwisila hasi, oloni Yehova kamiseze.​—2 Koli 4:8, 9; Fili 4:13.

7-8. (a) Sipilitu ya kujela inalifu bati na lihunzi? (b) Petulu walumbunwine bati muikapangela sipilitu ya kujela?

⁷ Ngila muka ikwabo muili na kutukwasela sipilitu ya kujela? Sipilitu ya kujela twasa kuyesekesa ku lihunzi. Lihunzi lije lili na kuya kuje kubuli na kuya bwato likakwasa bwato bukete mwamubwa nameme kuli mankimba. Mu ngila imo lika, sipilitu ya kujela itukwasa tupangele Yehova kweta noho tukakobela mu kaye kakaha nameme tuliwana na bukalu.

⁸ Kapositolo Petulu wazibukile mwamubwa kujabula bwato, mwafwa wapwile muka-kutsiya bisi. Mukemwo wapangesele lijwi linalifu na cipangi ca kujabula, mwalumbunwine muikapangelamo sipilitu ya kujela. Wasonekele ngwendi: “Kukwesi lijwi lya buka-kwimanena [bupolofweto] lyezile kutunda ku cizango ca munu, oloni banu babatwamenenene kuli munzinzime wa kujela omwo bambulwile lijwi lije lyatundile kuli Njambi.” Lijwi lya Cingiliki libananungulula ngwabo, ‘kutwamenena’ lilumbununa kusindika cuma.​—2 Petu 1:21.

9. Byuma muka byalumbunwine Petulu omwo wendekele lijwi lya ‘kutwamenena’ nambe ngwetu kusindika?

⁹ Byuma muka byalumbunwine Petulu omwo wendekele lijwi lya ‘kutwamenena’ nambe ngwetu kusindika? Muka-kulilongesa Mbimbiliya umo wendekele ngwendi, Omwo Petulu wasonekele ngwendi sipilitu ya kujela yatwamenenene baka-kusoneka Mbimbiliya, washakele ngwendi banu banuke bwato. Luka uje wasonekele mukanda wa Vilinga, wapangesele lijwi lya Cingiliki libananungulula ngwabo kusindika, kutalesa ku bwato buje bubapekumwine ku lihunzi. (Vili 27:15) Petulu  wendekele ngwendi, ngeci lika mwa lihunzi mulikakwaselamo bwato bwete kubuya, sipilitu ya kujela nayo yatwamenenene tupolofweto na baka-kusoneka Mbimbiliya bapange cipangi cabo. Ou Muka-kulilongesa Mbimbiliya wendekele lalo ngwendi, tupolofweto bapwile ngwe bwato buje buli na nanga ibanajangumuna. Kulumbununa ngwabo balibwaheselele kupanga bipangi biyabalekele sipilitu ya kujela. Yehova wabanene lihunzi nambe ngwetu sipilitu ya kujela. Baka-kusoneka Mbimbiliya bapangele cipangi cibabanene. Bakabangeyeye byuma biyabalekele sipilitu ya kujela.

10-11. Byuma muka bibali bitunapande kulinga mangana sipilitu ya kujela itukwase? Endekeni cakumwenako.

¹⁰ Ano matangwa, Yehova kesi na kupangesa sipilitu ya kujela mu kukwasa banu basoneke Mbimbiliya. Oloni ali na kuipangesa mu kukwasa bangamba bendi bapange bipangi byanabana. Yehova hanga acili na kwana banu bendi sipilitu ya kujela. Bika bitunapande kulinga mangana sipilitu ya kujela itukwase? Tunapande kupanga bipangi byanatwana Njambi. Twasa kulinga bati ngoco?

¹¹ Tusimutwiyeni ha cakumwenako eci. Muka-kujabula napande kulinga byuma bibali mangana lihunzi limukwase. Ca kulibanga, napande kutalesa bwato kuje kuya lihunzi. Nga kalingi ngoco, buje bwato nokubene kubuya kwahi. Ca mu cibali, napande kujangumuna mwamubwa nanga ya bwato, asina lihunzi lisindika manene bwato. Mu ngila imo lika, twasa kutwalelelaho kupangela Yehova nameme tuli mu bukalu nga sipilitu ya kujela itukwasa. Oloni tunapande kulinga byuma bibali mangana sipilitu ya kujela itukwase. Ca kulibanga, tunapande kupanga bipangi bije bilingisa sipilitu ya Njambi itukwase. Ca mu cibali, tunapande kujangumuna nanga yetu nambe ngwetu kupanga bipangi bya ku sipilitu na nzili yetu yoshe. (Myaso 119:32) Nga tulinga ebi byuma bitunendeka, co sipilitu ya kujela itukwasa tukolese na kukakobela mu kaye kakaha  ka Njambi, nameme tuliwana na byeseko byakufwa ngwe mankimba.

12. Byuma muka bitusimutwiya?

¹² Tunasimutwiya byuma bibali, muili na kutukwasela sipilitu ya kujela. Eyi sipilitu itwana nzili na kutukwasa tupwe ba kulongwa ha simbu ituliwana na byeseko. Co lalo itukwasa tupangele Yehova na kutukwasa twende mu ngila iya ku mwonyo wa myaka yoshe. Co hano tusimutwiya byuma biwana bitunapande kulinga mangana sipilitu ya kujela itukwase.

13. Kwesekesa na 2 Timateo 3:16, 17, Bisoneka byasa kutukwasa bati, co bika bitunapande kulinga?

¹³ Ca kulibanga, tunapande kutanda Lijwi lya Njambi. (Tandeni 2 Timateo 3:16, 17.) Njambi wapangesele sipilitu ya kujela ha kwaka biyongola byendi mu bisinganyeka bya baje basonekele Mbimbiliya. Nga tutanda Mbimbiliya na kusinganyekesesaho, co mashiko a Njambi akala mu bisinganyeka byetu na mu bimbunge byetu. Awa mashiko a kuhwiminina atukwasa tutengulule buyoye bwetu na kulinga byuma bije bizibisa Njambi kubwaha. (Heve 4:12) Oloni nga tushaka ngwetu sipilitu ya kujela itukwase manene, co tukaleni na simbu ya kutanda Mbimbiliya kushwa kumo na kusinganyekesesa ha byuma bitunatanda. Co Lijwi lya Njambi litukwasa mu byuma byoshe bitwendeka nebi bitulinga.

14. (a) Bika twendekela ngwetu ku biwano byetu kukakala sipilitu ya kujela? (b) Bika bitunapande kulinga mangana sipilitu ya kujela itukwase manene ha simbu ya biwano?

¹⁴ Ca mu cibali, tunapande kukunguluka na bakwetu. (Myaso 22:22) Ku biwano byetu kukakala Sipilitu ya Yehova. (Kujo 2:29) Bika twendekela ngoco? Twendeka ngoco mwafwa mutukanguluka na bakwetu baka-Kilistu, tukalombo sipilitu ya kujela, tukembi myaso ya Bumwene ije inakundama ku Lijwi lya Njambi, co lalo tukatolilila ku binangulo bya mu Mbimbiliya bije bibakendeka bandolome babanangula na sipilitu ya kujela. Eyi sipilitu ya kujela ikeyo lalo ikakwasa bandokazi balibwahesele biñanda byabo na kukabyendeka ku biwano. Nga tushaka ngwetu sipilitu ya kujela itukwase manene, tunapande kwija ku biwano oku tunalibwahesela na kukumbulula ha simbu ya biwano. Nga tulinga ngoco, co sipilitu ya kujela itukwasa ngwe lihunzi mulikasindikila bwato buje buli na nanga ibanajangumuna.

15. Twasa kutabesa bati sipilitu ya kujela itukwase nga twambulula?

¹⁵ Ca mu citatu, tunapande kwambulula. Nga tupangesa Mbimbiliya omwo twambulula na kulongesa, co tutabesa sipilitu ya kujela itukwase. (Loma 15:18, 19) Oloni nga tutonda ngwetu sipilitu ya Njambi itukwase manene, co tunapande kwambulula kushwa kumo na kupangesa manene Mbimbiliya. Ngila imo itwasa kusimutwiya bwino na banu, inapu kupangesa bingila bya Kwendekelamo bije bili ha Mukanda wa Biwano wa Buyoye na Cipangi Cetu.

16. Ngila muka imo itwasa kutambula bwasi sipilitu ya kujela?

¹⁶ Ca mu ciwana, tunapande kulomba kuli Yehova. (Mateo 7:7-11; Luka 11:13) Ngila imo itunasa kutambula bwasi sipilitu ya kujela inapu kuilomba kuli Yehova. Kukwesi cuma casa kwonowesa malombelo etu kweta kuli Yehova nambe kuzikila sipilitu ya kujela kweta kuli yetu, ipwe Satana nambe tumenga. (Yako 1:17) Tunapande kulombela bati mangana sipilitu ya kujela itukwase manene? Tucisimutwiyeni ha lilombelo kupangesa cakumwenako cije cili lika ku mukanda wa Luka mangana tuwane cikumbululo. *

17. Bika bitulilongesa ku cakumwenako capangesele Yesu cije cili ku Luka 11:5-9, 13, ha lilombelo?

¹⁷ Tandeni Luka 11:5-9, 13. Cakumwenako capangesele Yesu cimwesa mutunapande kulombelamo sipilitu ya kujela. Uje munalume ibanendeka mu cakumwenako bamwanene byatondele mwafwa ya “kulomba kushwa kumo.” Katewele kulomba kabusamba kendi nameme yapwile mukati ka butsiki. Cakumwenako ca Yesu citulongesa bika ha lilombelo? Yesu wendekele ngwendi, ‘twaleleleniho kulomba, co mukatambula, twaleleleniho kusetela, co mukawana, twaleleleniho kutota, co bakamishokolwela.’ Bika bitulilongesako? Nga tutonda ngwetu tutambule sipilitu ya kujela, co tunapande kutwalelelaho kuilomba.

18. Kwesekesa na cakumwenako capangesele Yesu, mwafwa bika tukulahela ngwetu Yehova atwana sipilitu yendi ya kujela?

¹⁸ Cakumwenako capangesele Yesu citukwasa tuzibuke byuma bilingisa Yehova atwane sipilitu ya kujela. Munalume ibanendeka mu cakumwenako watondele kutambula mwamubwa mungenzi wendi. Walizibile ngwendi wapandele kujumbula mungenzi wendi uje wetele mukati ka butsiki, oloni kakele na byakulya. Yesu wendekele ngwendi uje munalume wanene kabusamba kendi byakulya mwafwa watwaleleleho kumulomba. Yesu walongesele cilongesa cakama. Walumbunwine ngwendi nga munu wa kujeneka kulumbunuka asa kwana byakulya kuli mundambo wendi uje atwalelelaho kumulomba, kuma Tate yetu wa mwilu wa cizemo kasa kutwana sipilitu ya kujela nga tutwalelelaho kuilomba ndi? Ngeci tunapande kulomba sipilitu ya kujela kuli Yehova oku tunakulahela ngwetu atwanayo.​—Myaso 10:17; 66:19.

19. Mwafwa bika twakulahela ngwetu tukolesa?

¹⁹ Twakulahela ngwetu tukolesa nameme Satana atwalelelaho kutulwisa. Mwafwa bika? Mwafwa sipilitu ya kujela itukwasa mu bingila bibali. Ya kulibanga, itwana nzili ya kukolesa nga tuli mu bukalu. Ya mu cibali, itwana nzili ya kupangela Yehova kweta na mu kaye kakaha ka Njambi. Ngeci, tutwaleleleniho kukulahela ngwetu sipilitu ya kujela itukwasa.