1-2. a) Isiyani innikavihera uvilela masakha anniphwanya? Utaphulele. b) Isiyani inhaleehu wiitthuca nhina ula mwahoola?

“KOOPUWELAKA masakha yaakiphwanyale, kinawoona wiira akaahala ukhitiri uvilela veekha.” Uhopaca wuuluma commo? Enci nihopaca wuuluma itthu toko iyo. Atthunaka weeva woolumale commo ukati wowuupuwela mananna caaphwanyalyaa ikuru wiira ukhitiri uvilela ireetta yuulupale awula ukhweliya. Wawehaka uttuli, weeva unaacuwela wiira ukhitinri uvilela masakha yoophwanyale kontha nnepa wowaarya wa Yehova wahoovaha “ikuru cuulupale.”—2 Akor. 4:7-9.

² Hiiva ciicammo ninaapheela nnepa wowaarya wiira unikavihere ukhotta citthu coohinamaana co ntuninyani. (1 Joau 5:19) Uhiya commo, nihaana waanana “ikuru co malayikha oohinamaana.” (Efesu 6:12) Noopuwelaka marikariko otheene ayo, ninaahala wiitthuca nhina ula mwahoola mananna meeli nnepa wowaarya cinnikaviheraaya waanana ayo marikarikwaayo. Ciicammo, ninaahala wiitthuca isiyani inlamuliyeehu upanka wiira nnepa wowaarya unikavihere cinene.

3. Inannani nnepa wowaarya cinnikaviheraaya yanikhumelelaka masakha?

³ Inanna imoca nnepa wowaarya cinnikaviheraaya ukhanle univaha ikuru wiira nikhitiri uwacera mirintti cihu, hataa yanikhumelelaka masakha. Apostolu Paulu aanawoona wiira aakhitiri unswalela Yehova nlattu wookhuluvela “ikuru ca Kristu” wiira akhitiri uvilela masakha yaarinaawe. (2 Akor. 12:9) Ukati wonkwaha wonayeeli weemisiyonaariyu, Paulu ahovara nteko cinene, kahi paahi wuulalyeerani ihapari comaana, masi ciicammo wiira aphwanye ipooso. Uyo ahokhala uKorintu, uwanuwawe Akila ni Pirisila, yaavara nteko wo waapanka aheema. Ukhala wiira ayo ni Paulu yaarina nteko mmocaaru, Paulu aanaakhalaka ukati avaraka nteko naayo. (Mite. 18:1-4) Nnepa wowaarya  wahonvaha Paulu ikuru wiira uyo akhitiri uvara nteko wonvaha ipooso, ni wiira ciicammo akhitiri uvara nteko woolalyeera.

4. Itthuni Paulu yaananaawe ittonkalyaawe nhina 2 Akorintu 12:7b-9?

⁴ Usome 2 Akorintu 12:7b-9. Nhina nnya iveerusunnya, Paulu hantikha wiira aanawaanana ‘mwiiwa woohoma mwiirutthuni wawe.’ Isiyani uyo yaapheelaawe uhimya? Waari wiira weeva uhaana mwiiwa mwiirutthuni waa, khweeliini waanaahala wuuwerya cinene. Phimaana, Paulu aapheela uhimya wiira ihaavo itthu yooweryaa cinene yankhumelela yankhaliha ni masakha. Uyo aheera wiira itthu yaananaawe, naari “nlayikha na Sotwani” naaveleelihiye wiira nihihiye ‘unlatumari’ (‘umwaattakaca,’ niwehero). Atthunaka Sotwani ni maciinnyaawe kahi phaakumihacale masakha a Paulu. Masi pooti ukhala wiira ayo malayikha oohinamaanaayo ukati waamoonalyaaya Paulu wiira haana “mwiiwa,” ayo yahopheela cinene untepiherera Paulu, wiira atepe woona uwerya. Paulu aapankale isiyani?

5. Yehova aakhunle cani mavekelo a Paulu?

⁵ Paulu apheela wiira Yehova akumihe “mwiiwa” waarinaawe. Uyo naahimya: “Imaara tthaaru kahaalepela apwiiya [Yehova] wiira akumihe mwiirutthuni waka uyo mwiiwooyo.” Hataa Paulu alompaka cinene, mwiiwa wo mwiirutthuni wawe nanlelo wahaavo. Niireke iyo inthoonyera wiira Yehova khaakhunle mavekelo a Paulu? Mena vakaani! Yehova ahaakhula mavekelo a Paulu. Ninaacuwela wiira uyo khaakumihale masakha a Paulu, masi uyo ahonvaha Paulu ikuru wiira akhitiri uvilela. Yehova aheera: “Ikuru caka cinaakhalihiya coohipahuwa muulolovani.” (2 Akor. 12:8, 9) Ni akaviheriyaka ni Yehova, Paulu khaahiyale ukhala ootteeliya ni ukhalana nnema wanrimani wawe!—Afili 4:4-7.

6. a) Yehova naakhula cani mavekelweehu? b) Iveerusu co mbiiblyani cihimiye mparaagarafuni cinookavihera cani ukhalana ikuru?

⁶ Toko Paulu, weeva uhopaca unlepela Yehova wiira amalihe masakha yookhumelenle? Pooti ukhala wiira hataa ulompaka cinene, masakha yaarinaa khayaamanle—awula atthunaka yaanootepaca—mpaka wahoopuwela wiira Yehova nookasiriya ni weeva. Wakhala wiira iyo ikhanle itthu inookhumelela, wuupuwele ntakihero na Paulu. Toko Yehova caakhunlyaawe mavekelo a Paulu, uyo ciicammo naahala waakhula mavekelwaa! Atthunaka Yehova khanhala umaliha masakha arinaa, masi, avarelaka nteko nnepaawe wowaarya, uyo naahala wuuvaha ikuru wiira weeva ukhitiri uvilela. (Isaa. 61:3, 4) Weeva ciicammo pooti ‘uwuluseriya vathi,’ masi Yehova khanhala wuuhiya.—2 Akor. 4:8, 9; Afili. 4:13.

7-8. a) Manannani nnepa wowaarya cinlattanacaaya ni iphyoo? b) Peturu taphulenle cani mananna nnepa wowaarya cinvaraaya nteko?

⁷ Manannani makhwaawe nnepa wowaarya cinnikaviheraaya? Toko iphyoo cinsovaaya ikalawa mpahari, nnepa wowaarya pooti unikavihera urwaa uhoolo nakhalaka ni masankiho wiira unipiihe nipuro nonnema—ituninya yo naanaano ikhuluvelihalyaawe Nluku.

⁸ Ukhala wiira apostolu Peturu aari nakhavoko, awula namamenca, uyo aanaacuwela ratta nteko wo weettiha ikalawa. Ukati Peturu waahimyaawe mananna nnepa wowaarya cinvaraaya nteko, uyo ahoromola nuulumo nihinhiyana ni nteko wo weettiha ikalawa. Uyo hantikha: “Kontha inatiri thanku khiphattuwale naapinaatamu, masi apinaatamu yuulumale citthu ca Nluku, toko caasovenrihiyaaya ni nnepa wowaarya.” Nuulumo neekereku nitaphuleliye “caasovenrihiyaaya” maanaaya wiira “ceettiheriyaaya; caasoviyaaya.”—2 Pet. 1:21; niwehero.

9. Nlattaniheroni Peturu nipankalyaawe ukati waaromonlyaawe nuulumo ‘usoviya’?

⁹ Nlattaniheroni Peturu nipankalyaawe ukati waaromonlyaawe nuulumo “caasoviyaaya”? Luka, ule antikhale ilivuru yo Miteko, hantikha nuulumo noolattanaca, ukati waahimyaawe wiira paketi ‘aanaasoviya’ niiphyoo. (Mite. 27:15) Namasoma mmoca,  hooluma wiira Peturu ukati weeralyaawe wiira anamantikha Ibiiblya ‘yaasoviya’ ni nnepa wowaarya, uyo aaromonle nuulumo naahala uwiiriha atthu enci wuupuwela nteko wo weettiha ikalawa. Co, itthu Peturu yaapheelaawe uhimya phi ila: toko ikalawa cinsoviyaaya niiphyoo wiira ikhitiri uphiya nipuro ninrwaaya, maporofeeta ni anamantikha Ibiiblya yaanaasoviya ni nnepa wowaarya wiira akhitiri umaliha ntekwaaya. Uyo namasomooyo ciicammo heera: “Wo moolumelo makhwaawe, maporofeeta yahotaphula mitthanka cokalawa caya.” Yehova ahopanka itthu yaalamuliyaawe upanka—ahoveleeliha “iphyoo,” awula nnepa wowaarya. Ni anamantikha Ibiiblya ciicammo yahopanka nteko waavahiyaaya. Ayo yahovara nteko yattharaka nnepa wowaarya.

10-11. Citthuni piili cinlamuliyeehu upanka wiira nnepa wowaarya uneettihere? Utakihere.

¹⁰ Ilelo, Yehova khanvarela nteko nnepaawe wowaarya wiira aakavihere atthu wantikha Ibiiblya. Masi Yehova nanlelo naapanka mphanttyaawe: uyo naavarela nteko nnepa wowaarya wiira aweettihere atthu anonswalela. Ni napheelaka weettiheriya ni nnepa wowaarya, ciicammo nihaana niweheraka wakhala wiira ninaapanka mphantteehu. Manannani cinlamuliyeehu upanka iyo?

¹¹ Wuupuwele nna nlattaniheronna. Ntthu neettiha ikalawa haana apankaka citthu piili wiira iphyoo cinkavihere cinene. Yoopacera, uyo haana eesaka ikalawa mphantte unweelaaya iphyoo. Kontha uyo eemelaka nipuro nihirivo iphyoo, ikalawaawe kinhala urwaa nanka nipuro. Yonayeeli, uyo haana ataphulaka cinene mitthenka cokalawa. Hataa cikhalaka iphyoo cinci, ikalawa inhala ukhitiri urwaa uhoolo wakhalaka wiira mitthenka cokalawa cihotthukuliya cinene ni cinaaphwanya iphyoo yinci. Inanna imoca, hiiva ninhala ukhitiri uvilela nakaviheriyaka ni nnepa wowaarya wa Yehova. Wiira nnepa wowaarya unikavihere cinene, nihaana nipankaka citthu piili. Yoopacera, nihaana nikhalaka nipuro nnepa wowaarya “unvucelelaaya.” Iyo maanaaya wiira nihaana nivara miteko cineettehiyeriya ni nnepa wowaarya wa Nluku. Yonayeeli, nihaana “nitaphulaka mitthenka cihu” cinene, awula wiikurumica niikuru cihu cotheene uvara nnyo mitekonnyo.  (Isaa. 119:32) Napankaka nnya citthu piilinnya, nnepa wowaarya unaahala unikavihera urwaa uhoolo iriyari wo masankiho olikanaca ni mawimpi, toko ulupatthiya ni masakha makiina ankhalaneehu. Nnepa wowaarya unaahala unikavihera uvilela wiira nikhitiri uphiya unrweehu, ituninya yo naanaano ya Nluku.

12. Isiyani impheeleehu woopela mwaha nna va?

¹² Mpaka va, niheetthuca mananna meeli nnepa wowaarya cinnikaviheraaya. Yoopacera, uyo unaanivaha ikuru ni unaanikavihera uhihiya ukhala ookhuluvelya hataa yanikhumelelaka masakha. Yonayeeli, nnepa wowaarya unaanikavihera urwaa uhoolo ni uhihiya weettela iphiro inhala uniphwanyiha ukumi woohimala. Vano, nttwee noopole mwaha citthu cese cinlamuliyeehu upanka wiira nnepa wowaarya unikavihere cinene.

13. Toko cinthoonyeraaya 2 Timotiyu 3:16, 17, Cowantikhiya cinnisovenriha isiyani, masi hiivano isiyani inlamuliyeehu upanka?

¹³ Yoopacera, usome Nuulumo na Nluku. (Usome 2 Timotiyu 3:16, 17.) Nuulumo neekereeku nitaphuleliye “ciphattuwale wa Nluku” maanaaya wiira “civukheleliye ni Nluku.” Nluku ahovarela nteko nnepaawe wowaarya wiira “avukhelele,” awula uhela moopuwelelwaawe mmuruni waatthu yantikhale Ibiiblya. Nasomaka Ibiiblya ni noopuwelaka insomeehu, citthu cineetthucihaawe Nluku cinaahala ukela mmuru wihu ni wanrimani wihu. Nnyo citthunnyo cinaanisovenriha upanka marukunuso muukumini wihu wiira nincivelihe Yehova. (Mabere. 4:12) Masi nnepa wowaarya wiira unikavihere, nihaana nikumihaka ukati wiira nisome Ibiiblya khula nihuku ni wuupuwela cinene itthu insomeehu. Commo, Nuulumo na Nluku phinhalaaya weettihera khula itthu inoolumeehu ni impankeehu.

14. a) Nlattuni uneereehu wiira umikutthaanoni ninkhala nipuro “iphyoo cinwukaaya”? b) Isiyani ninlamuliyeehu upanka wiira nirwee umikutthaanoni ni “mitthenka cihu cootaphuliyeene”?

¹⁴ Yonayeeli, unswalele Nluku umikutthaanoni. (Isaa. 22:22) Pooti waneereehu wiira umikutthaanoni ninkhala nipuro “iphyoo cinwukaaya.” Umikutthaanoni unaakhala nnepa wowaarya. (Apoka. 2:29) Nlattuni uneereehu commo? Kontha nathukumanaka wiira niswali nkhayi ni mayamunneehu, hiiva ninaalompa nilepelaka nnepa wowaarya, ninawiipa icipo cinlipihiyeriya ni Nuulumo na Nluku ni ninaasoma citthu cineetthucihiyeehu mbiiblyani citthenkaciye ni mayamunna athanliye ni nnepa wowaarya. Ni uyo nnepooyo ciicammo unawaakavihera asirokorihu wiitthenkaca wiira apanke miphantte caya umikutthaanoni. Masi wiira nnepa wowaarya unikavihere, nihaana nirwaaka umikutthaanoni owiitthenkaceene wiira nakomentari. Napankaka iyo, ninkhala owiitthenkaceene wiira naakhele nnepa wowaarya, toko ikalawa irina mittheka caya cootaphuliyeene.

15. Manannani nnepa wowaarya cinnikaviheraaya wuulalyeerani?

¹⁵ Yoneeraru, urwee wuulalyeerani. Navarelaka nteko Ibiiblya wiira nilalyeere ni niitthucihe, ninaahiya wiira nnepa wowaarya unikavihere untekoni wihu. (Aroo. 15:18, 19) Masi wiira unikavihere cinene, nihaana nihilovaka wuulalyeerani ni uvarela nteko Ibiiblya khula ukati unhaleehu ukhitiri. Itthu imoca inhala unikavihera wiira nteko woolalyeera uneettele saana, ukhanle uvarela nteko mathoonyero ankumiheriya nhina Vida e Ministério Cristãos — Manual de Atividades.

16. Inannani imoca yowaakuva hiiva waakhela nnepa wowaarya?

¹⁶ Yoneecese, unlompe Yehova. (Mat. 7:7-11; Luka 11:13) Inanna imoca hiiva yowaakuva waakhela nnepa wowaarya ukhanle unlompa Yehova ninlepelaka uyo nnepooyo. Khiivo nanka itthu inhala uhiiha mavekelweehu uphiya wa Yehova. Ni khiivo itthu yoohala uttiyelela nnepa wowaarya wiira uhiniphiyeere—nanka ikhattya; nanka Sotwani. (Tiya. 1:17) Ninlamuliya ulompa cani wiira nnepa wowaarya univakihere cinene? Wiira naakhule, nttwee noone nlattanihero nimoca nimphwanyannya  mwiivangeeliyuni ya Luka. * Nno ninaahala unikavihera wiitthuca mananna cinlamuliyeehu ulompa.

17. Nlattanihero na Yesu nihimiye nlivuruni ya Luka 11:5-9, 13 ninniitthuciha isiyani?

¹⁷ Usome Luka 11:5-9, 13. Nlattanihero na Yesu ninaathoonyera mananna ninlamuliyeehu ulompa nilepelaka nnepa wowaarya. Nlopwana himiye nhina nlattanihero na Yesu ahokhitiri itthu yaapheelaawe “nlattu wookhanyerera ni upharelela wawe.” Hataa ukhalaka uhiyu, uyo khoovale urwaa unlepela mpatthannyaawe. (Uwehe mawehero oopheela usomiya o Luka 11:8 nhina Ireferencia co Vida e Ministério Cristãos — Manual de Atividades o Julho, 2018, ipaagina 5.) Nno nlattaniheronno ninniitthuciha isiyani nhina ulompa? Yesu heera: “Nhihiyerere ulepela, ni nnaahala uvahiya; nhihiyerere waavya, ni nnaahala uphwanya; nhihiyerere waatta, ni nnaahala utthukuleliya.” Vano isiyani hiiva ineetthuceehu? Wiira naakhele nnepa wowaarya, nihaana ulompa ni ulepela uyo nnepooyo woohihiyerera.

18. Toko cinthoonyeraaya nlattanihero na Yesu, nlattuni ninlamuliyeehu ukhuluvela wiira Yehova naahala univaha nnepaawe wowaarya?

¹⁸ Nlattanihero na Yesu ciicammo ninaanikavihera woona nlattuni Yehova unhalaawe univaha nnepa wowaarya. Nlopwana himiye munlattaniheroni aapheela umwaakhelela ratta nletto aalukamale uwanuwawe. Uyo khaarina itthu yoohala unvaha, kontha nlettooyo aawale uhiyu; masi uyo ahoona wiira ahaana aavyaka itthu yoohala unvaha nletto. Yesu eerale wiira ule nlopwanoole aakaviheriye nlattu wookhanyerera ni upharelela ulepela. Isiyani Yesu yaapheelaawe wiitthuciha? Wakhala wiira nlopwana oopahuwa naakupali unkavihera mpatthannyaawe ookhanyerera ulepela, Apaapeehu Yehova akhanle namavaha, anaatepa upheela waakavihera ale anlepela nnepa wowaarya woohihiyerera! Phimaana, hiiva pooti ulompa nikhuluvelaka. Yehova naahala unaakhula nanlepelaka nnepa wowaarya.—Isaa. 10:17; 66:19.

19. Nlattuni ninkupaliihu wiira ninaahala utthema?

¹⁹ Sotwani khanhiya unaanana. Masi hiiva pooti ukhuluvela wiira ninaahala utthema. Kontha isiyani? Kontha nnepa wowaarya unaanikavihera ni mananna meeli. Inanna yoopacera, uyo unaanivaha ikuru cimpheeleehu wiira nikhitiri uvilela masakha. Yonayeeli, uyo nnepooyo phi ikuru “cinvukhelela mitthenka cihu,” unikaviheraka urwaa uhoolo wiira nihihiye unswalela Yehova mpaka wanhaleehu uphiya upeephoni. Phimaana, wiikurumice wiira ukaviheriye cinene ni nnepa wowaarya!