1, 2. 1) ¿Tlake techpaleuis mojmostla ma tikijiyouikaj tlen techpano? Xikixtoma. 2) ¿Tlake tikitasej ipan ni tlamachtili?

KEMA tikixnamijkej se tlaouijkayotl, uelis timoiljuijkej toselti amo ueltoskia tikijiyouisej. Uelis kiampa tikijtojkej kema timoiljuijkej kenijkatsa uelki tikijiyouijkej se kokolistli o kema mijki se akajya katli tlauel tikikneliyayaj. Maske mojmostla monejki tikijiyouisej, tijmatkej uelki tikijiyouijkej pampa toTeotsij itonal techmakak “nopa ueyi chikaualistli” (2 Cor. 4:7-9).

² Nojkia, toTeotsij itonal techpaleuia amo tijchiuasej tlen maseualmej momajtokej kichiuaj (1 Juan 5:19). Uan nojkia pampa nochipa kejuak timoteuijtokej ininuaya amo kuali ajakamej katli “kinnotsaj tlakamej ma kichiuakaj tlen axkuali” (Efes. 6:12). Kej tikitstokej, nochi ni tlamantli tikixnamikij, yeka tikitasej kenijkatsa toTeotsij itonal techpaleuia ipan ome tlamantli. Uan nojkia tikitasej tlake moneki tijchiuasej tlaj tijnekij toTeotsij itonal ma techpaleui.

3. ¿Kenijkatsa toTeotsij itonal techpaleuia tikijiyouisej kuesoli?

³ ToTeotsij itonal techpaleuia pampa techmaka chikaualistli uan kiampa uelis tijchiuasej se tlenijki maske tijpiasej miak kuesoli. Ika “ichikaualis Cristo” apóstol Pablo kiijtok kena ueliskia kitekipanos Jehová, maske kipiaskia miak tlaouijkayotl (2 Cor. 12:9). Kema ika ompa yajki tlajtolmoyaua, amo san kichijki kampeka tlauel tlajtolmoyauas, nojkia monejki tekitis uan kiampa ueliskia mopanoltis. Ipan Corinto mokajki ichaj Áquila uan Priscila, katli kichijchiuayayaj yoyonkali. Pampa Pablo nojkia kichiuayaya nopa tekitl, kinpaleuiyaya  se keski tonali (Hech. 18:1-4). ToTeotsij itonal kimakak chikaualistli uan kiampa uelki tekitik uan tlajtolmoyajki.

4. Kej kiijtoua 2 Corintios 12:7-9, ¿tlake tlaouijkayotl kipiayaya Pablo?

⁴ (Xijpoua 2 Corintios 12:7-9). ¿Tlake kiijtosnejki Pablo kema kiijtok kipixtoya “se uitstli” ipan itlakayo? Tlaj tijpiaskiaj se uitstli ipan totlakayo, tlauel techkokoskia. Yeka, Pablo kiijtok kipiayaya ipan inemilis se tlaouijkayotl tlen san ya kimajtoya, uan kichiuayaya ma tlaijiyoui. Kitokaxtik “itlatitlanil Axkualtlakatl” katli kejuak kimakiliyaya. Uelis, Satanás uan amo kuali ajakamej amo kichijkej ma kipia nopa tlaouijkayotl tlen eliyaya kejuak uitstli ipan itlakayo. Inijuantij kiitakej kipiayaya nopa tlaouijkayotl katli eliyaya kejuak uitstli, yeka nojua kichijkej tlauel ma tlaijiyoui, kejuak kitokilijkej uejkatla nopa uitstli. ¿Tlake kichijki Pablo?

5. ¿Kenijkatsa Jehová kinankilik kema Pablo momaijtok?

⁵ Achtoui Pablo kinejki ma kikixtilikaj tlen eliyaya kejuak “uitstli”. Kiijtok: “Expa nijtlajtlanijtok toueyiTeko [Jehová] para ma nechkixtili”. Maske kitlajtlanik, amo polijki tlen eliyaya kejuak uitstli tlen kipixtoya ipan itlakayo. ¿Kiijtosneki Jehová amo kitlakakilik kema momaijtok? Amo. Jehová kena kitlakakilik. Maske amo kikixtilik nopa tlaouijkayotl tlen kipixtoya, ya kimakak chikaualistli uan kiampa uelki kiijiyouik. Uan kiiljuik: “Nochikaualis achi más mopannextia kema se tlakatl axkipia fuerza” (2 Cor. 12:8, 9). Pablo kipixki tlaseuilistli uan yolpajki pampa Jehová kipaleuik (Filip. 4:4-7).

6. 1) ¿Kenijkatsa Jehová technankilia kema timomaijtouaj? 2) ¿Kenijkatsa techyolchikaua nopa textos tlen uala ipan ni párrafo?

⁶ Uelis se tonali nojkia tijchijkej kej Pablo uan tikiljuijkej Jehová ma techkixtili se tlaouijkayotl. Uelis amo tlanki nopa tlaouijkayotl, uan yeka timoiljuijkej Jehová ayokmo kuali techitayaya. Tlaj kiampa timoiljuijkej, ma tikilnamikikaj tlen kipanok Pablo. Jehová kitlakakilik kema momaijtok uan tojuantij nojkia techtlakakilis kema timomaijtosej. Maske amo techkixtilis tokuesoljuaj, ya techpaleuis ika itonal ma tikijiyouikaj (Sal. 61:3, 4). Maske “techtojtokaj, [...] toTeko Dios axkema techkaua toselti” (2 Cor. 4:8, 9; Filip. 4:13).

7, 8. 1) ¿Kenke toTeotsij itonal eli kejuak ajakatl? 2) Xikijto kenijkatsa tekiti toTeotsij itonal.

⁷ ¿Kenijkatsa nojkia techpaleuia toTeotsij itonal? Nojkia kej nopa ajakatl kipaleuia se barco amo ma elto kampa tlauel mokoxonia miak atl uan kiuika kampa kineki asiti nopa barco, toTeotsij itonal nojkia techpaleuia ma tikixnamikikaj tlaouijkayotl, kiampa uelis tikijiyouisej uan tiitstosej ipan se yankuik Tlaltipaktli.

⁸ Pampa apóstol Pedro michtlajtlamayaya, kuali kimatiyaya kenijkatsa kinemiltiyayaj se barco. Uelis yeka kitekiuik nopa tlajtoli kema kiijtok kenijkatsa tekiti toTeotsij itonal. Kiijtok: “Niyon ualajki pampa nopa teokamanalouanij kinekiyayaj kiijtosej tlen panos teipa. ¡Axtle! Elki itonal toTeko tlen kiniljuijtiajki nopa tlatsejtseloltikej tlakamej tlen toTeko kinekiyaya ma kiijkuilokaj” (2 Ped. 1:21).

9. ¿Tlake kinejki Pedro ma moiljuikaj kema kiijtok toTeotsij itonal “kiniljuijtiajki”?

⁹ Kema Pedro kiijtok nopa tlajtoli “kiniljuijtiajki”, ¿tlake kinejki ma moiljuikaj? Lucas, katli kiijkuilok amochtli Hechos, nojkia kitekiuik se tlajtoli ika griego, sanse kej nopa  tlajtoli “kiniljuijtiajki”, kiampa kiixnextik kej se barco katli kipaleuia ma moyakana ika ajakatl (Hech. 27:15). Se ixtlamatketl tlen Biblia kiijtok kema Pedro kiijtok ni tlajtoli kinejki ma moiljuikaj ipan se akajya katli kinemiltia se barco. Kinekiyaya kiijtos kej ajakatl kipaleuia se barco ma asiti kampa moneki asis, toTeotsij itonal kinpaleuik katli kiijkuilojkej Biblia, kiampa kichijkej tlen Jehová kiniljuik. Nopa ixtlamatketl nojkia kiijtok katli kiijkuilojkej Biblia eliyayaj kejuak barcos, pampa se barco kipaleuia ajakatl ma yaui kampa kineki asiti. Uajka, katli kiijkuilojkej Biblia Jehová kinmakak nopa “ajakatl” o itonal uan kiampa uelkej kichiuaj tlen kiniljuik. Inijuantij kikajkej toTeotsij itonal ma kinyakana.

10, 11. ¿Tlake ome tlamantli moneki tijchiuasej uan kiampa tijpiasej toTeotsij itonal? Xikijto se neskayotl.

¹⁰ Maske ipan ni tonali Jehová ayokmo kitekiuia itonal uan kiampa nojua kiijkuilosej sekinok amochtli tlen Biblia, ya nojua kitekiuia itonal uan kiampa kinyakana itekipanojkauaj. Jehová nojua techpaleuia, yeka tlaj tijnekij ma techyakana ika itonal, moneki tijchiuasej se keski tlamantli. ¿Tlake uelis tijchiuasej?

¹¹ Ma timoiljuikaj ipan ni neskayotl. Se akajya katli tekiti ipan barco, tlaj kineki ma kiyakana ajakatl, moneki kichiuas ome tlamantli. Se, kiuikas kampa tlaajaka, tlaj san eltos kampa moketstos amo kipaleuis nopa ajakatl. Ome, nojkia moneki kitekiuis nochi tlen kichiua ma mojmolini se barco, kiampa kipaleuis nopa ajakatl. Tojuantij nojkia uelis tijtekipanosej Jehová tlaj tijpiaj toTeotsij itonal, yeka moneki tijchiuasej ome tlamantli. Se, moneki tiitstosej kampa chikauak tlaajaka, kiijtosneki tijchiuasej se keski tekitl kampa techpaleuis toTeotsij itonal. Ome, nojkia kej se barco kitekiuia nochi nopa tlamantli tlen kipaleuia, tojuantij nojkia moneki  tijchiuasej kampeka tlauel titlapaleuisej ipan se keski tlamantli (Sal. 119:32). Tlaj kiampa tijchiuasej, toTeotsij itonal techpaleuis nojua kuali ma tijtekipanokaj Jehová maske tikixnamikisej miak tlaouijkayotl, uan techpaleuis ma tiitstokaj ipan Xochimili.

12. ¿Tlake nojua tikitasej?

¹² Tikitstokej kenijkatsa toTeotsij itonal techpaleuia ipan ome tlamantli. Techmaka chikaualistli uan techpaleuia amo tijtlauelkauasej Jehová kema tijpiaj tlaouijkayotl. Nojkia techpaleuia nojua tlauel ma tijtekipanojtokaj uan ma timosentlalikaj ipan nopa nemilistli tlen yankuik. Nama ma tikitakaj naui tlamantli tlaj tijnekij toTeotsij itonal ma techpaleui.

13. Kej kiijtoua 2 Timoteo 3:16, 17, ¿kenijkatsa techpaleuia Biblia, uan tlake moneki tijchiuasej?

¹³ Se, ximomachti Biblia (xijpoua 2 Timoteo 3:16, 17). Biblia “toTeko temakak”. Jehová kinyakanki ika itonal katli kiijkuilojkej Biblia, kiampa inijuantij kiijkuilojkej tlen itlalnamikilis. Kema tijpouaj Biblia uan timoyoliljuiaj ipan tlen timomachtiaj, asi ipan totlalnamikilis uan ipan toyolo. Uan tlen tijyekouaj techpaleuia ma timonejnemiltikaj kej toTeotsij kipaktia (Heb. 4:12). Tlaj tijnekij toTeotsij itonal ma techpaleui, moneki tijkauasej tonali uan kiampa uelis timomachtisej uan timoyoliljuisej tlen kiijtoua Biblia. Kiampa tlen timomachtisej, techpaleuis ma tijnextikaj ipan tlen tijchiuaj uan ipan tlen tikijtouaj.

14. 1) ¿Kenke uelis tikijtosej ipan tlanechikoli eltok toTeotsij itonal? 2) ¿Tlake moneki tijchiuasej tlaj tijnekij toTeotsij itonal ma techpaleui kema tiauij tlanechikoli?

¹⁴ Ome, tijueyichiuas toTeotsij ininuaya sekinok itekipanojkauaj (Sal. 22:22). Uelis tikijtosej ipan tlanechikoli eltok “itonal toTeko” (Apoc. 2:29). ¿Kenke tikijtouaj nopa? Pampa kema timosentiliaj, tikiljuiaj Jehová ma techmaka itonal, tiuikaj uikatl tlen mokixtijtok ipan Biblia uan tijtlakakiliaj tlamachtili tlen kipanoltiaj toikniuaj katli toTeotsij itonal kintekimakatok. Nojkia toTeotsij itonal kinpaleuia kema tosiuaikniuaj kipanoltiaj inintlamachtil kema panoj tlaixpa. Uajka, tlaj tijnekij ma techpaleui toTeotsij itonal, moneki kuali timokualchijchiuasej kema tiasej tlanechikoli. Tlaj kiampa tijchiuasej, kema tiasej tlanechikoli nojkia techpaleuis kej nopa barco kipaleuia nochi nopa tlamantli tlen kipia.

15. ¿Tlake moneki tijchiuasej tlaj tijnekij toTeotsij itonal ma techpaleui ipan tlajtolmoyaualistli?

¹⁵ Eyi, xitlajtolmoyaua. Kema titlajtolmoyauaj uan tikiniljuiaj maseualmej tlen Biblia tlamachtia, tijkauaj toTeotsij itonal ma techpaleui (Rom. 15:18, 19). Tlaj tijnekij toTeotsij itonal ma techpaleui, moneki nochipa titlajtolmoyauasej uan tijtekiuisej Biblia. Se tlamantli tlen techpaleuis kuali timonojnotsasej ininuaya maseualmej, eli tlaj tijtekiuiaj tlen uala ipan Kej Timonejnemiltiaj uan Titlajtolmoyauaj.

16. ¿Tlake techpaleuis tlaj tijnekij toTeotsij itonal?

¹⁶ Naui, ximomaijto (Mat. 7:7-11; Luc. 11:13). Tlauel techpaleuis tlamaijtoli pampa kema timomaijtouaj uelis tikiljuisej Jehová ma techmaka itonal. Maske Satanás kitekiuis miak tlamantli o techtsakuasej, Jehová techtlakakilis kema timomaijtosej uan techmakas itonal (Sant. 1:17). ¿Kenijkatsa moneki timomaijtosej tlaj tijnekij ma techpaleui toTeotsij itonal? Ma tikitakaj tlake kiijtoua pilamochtsi Lucas. *

17. ¿Tlake techmachtia tlen tlamaijtoli tlen Jesús kiijtok ipan Lucas 11:5-9, 13?

¹⁷ (Xijpoua Lucas 11:5-9, 13). Jesús kiijtok kenijkatsa moneki tlajtlanisej toTeotsij itonal kema kiijtok nopa tlapoualistli. Nopa tlakatl kimakakej tlen kinekiyaya pampa miakpa tlajtlanki. Maske eliyaya tlajkoyoual, amo majmajki tlajtlanis (xikita nopa nota “axtijkaua tijtlajtlania” tlen uala ipan julio, 2018, Kej Timonejnemiltiaj uan Titlajtolmoyauaj). ¿Kenijkatsa kiixnextik Jesús ika tlamaijtoli? Kiijtok: “Xijtlajtlanikaj toTeko para tlen inmechpoloua uan yajaya inmechmakas. Xijtemokaj tlen inmechpoloua uan inkipantisej. Xijnotsakaj toTeko uan yajaya inmechkaltlapos”. Techmachtia tlaj tijnekij toTeotsij itonal moneki miakpa tijtlajtlanisej.

18. ¿Kenke uelis timotemachisej Jehová techmakas itonal?

¹⁸ Ni tlapoualistli nojkia techpaleuia ma tijkuamachilikaj kenke Jehová techmakas itonal. Nopa tlakatl katli kiijtok Jesús, kinekiyaya kuali kiselis katli kipaxalouayaya maske asitoya tlajkoyoual. Yeka, maske amo tleno kipixtoya, ya kimatiyaya monekiyaya kitlamakas. Jesús kiijtok pampa miakpa tlajtlanki uan amo pinajki, ikalnechka kimakak tlen kinekiyaya. ¿Tlake techmachtia? Maske nopa tlakatl eliyaya tlajtlakole, kipaleuik uan kimakak tlen kinekiyaya iuampo. Nojkia toTeotsij katli tlauel teiknelia kinmakas itonal katli kitlajtlaniaj. Uajka kema tikiljuisej Jehová ma techmaka itonal, uelis timotemachisej ya nelia techmakas (Sal. 10:17; 66:19).

19. ¿Kenke uelis timotemachisej Satanás amo uelis techtlanis?

¹⁹ Maske Satanás kitekiuis miak tlamantli, uelis timotemachisej amo techtlanis. ¿Kenke? Pampa toTeotsij itonal techpaleuia ipan ome tlamantli. Se, techpaleuia tikijiyouisej tlaouijkayotl. Ome, techmaka chikaualistli uan techpaleuis nochipa tijtekipanojtosej Jehová. Yeka, nochipa ma tijkauakaj toTeotsij itonal ma techpaleui.