1-2. (1) Tiheeni enanikhaviherya ovilela ni makacamiho nihiku ti nihiku? Mutharihe. (2) Tiheeni nnahaalaahu othokororya mmwaha yoola?

“KAAWUUPUWELAKA makacamiho kikumannaakano, kinnasuwela wi nki kiwerye ovootha ni ikuru saka.” Apwanne mohintoko oloca masu si yaala? Ancipale a hiyo nohintoko oloca. Akhweya nyuwaano mwaalonce yeela mmanle woona mukhalelo mwaavilenlaanyu ni ereca yawoopiha naari okhwa wa muchu yoowo mwaamusivelaanyu. Mwaawehaka muculi, munnoona wi pahiru mwaawenrye ovilela nthowa na munepa waweela wa Yehova yoowo woovanheeni “owerya wene woopwaha.”—2 Kor. 4:7-9.

² Ninnaroromela tho munepa waweela wi onikhaviherye okhoma ni ovolowela wa elapo yeela yoonanara. (1 Yoh. 5:19) Mwawaaceererya, ninnawaniha ni “minepa soonanara.” (Éfe. 6:12) Nuupuwelaka sookhinyererya seiya, nnahaala othokororya mikhalelo miili mummo munepa waweela onanikhaviheryaaya. Voocharela nnahaala othokororya yeeyo nnaphwanelaahu opaka wi niphure moopwaha munepa waweela.

3. Mukhalelo taani mmoha Yehova onanikhaviheryeiye ovilela saweeha?

³ Munepa waweela wa Yehova onnanikhaviherya moorweela wa onivaha owerya naari ikuru, wi nikhwaaniherye mirici sahu moohipwacha saweeha. Murummwa Paulo aahoona wi aanawerya otitelela omurumeela Yehova moohipwacha saweeha sawe nthowa nawi aanaroromela “ikuru sa Kristu.” (2 Kor. 12:9) Variyari va mukwaha awe wo misiyonaariyo, tahi wi pahiru Paulo aalampe mwakuru mmuteko woolaleerya, nyenyatho owo aanalapa wi iikhaviherye mwaneene. Owo aahikhala o Korinto vaate va Akila ni Priskila. Awo yaari anamateka a misakala. Woona wi Paulo aanapaka muteko mmohamoha, mahiku makina aanalapa vamoha ni yaawo. (Saw. 18:1-4) Munepa waweela waahimvaha Paulo ikuru mmakupa oomeeli, olapa miteko soomwiilini, ni waakhwaniherya orummwa awe.

4. Mwawiiwanana ni 2 Korinto 12:7b-9, nikacamiho taani Paulo aareiyeno?

 ⁴ Mwaalakhanye 2 Korinto 12:7b-9. Mu iciciri seiya, tiheeni Paulo aachuneiye oloca vaavaa aalonceiye wi aanawaniha ni “mwiiwa mmwiilini”? Waakhanle wi mohintoko okhalano mwiiwa mmwiilini mwanyu, mwaahoona wiicela otokotoko. Mwawiihiiha Paulo aachuna oloca wi aanahoolela nikacamiho nikina noohoosa vancipale. Owo olonce wi makacamiho awo yaari ntoko “murummwa a Satana” yoowo ‘aammana.’ Satana naari ankeelo awe yaawo ari masololo, tahi yaawo yaatannya makacamiho a Paulo mooluluwanya, yeerihaka mwiiwa ovolowa mmwiilini mwawe. Nyenya vaavaa minepa soonanara soonaaya “mwiiwa,” iho saanatepiha makacamiho, eyo tiwi, waaceererya wiicela yoowo Paulo ooneiye. Tiheeni Paulo eenreiye?

5. Yehova aakhunle hai mavekelo a Paulo?

⁵ Wuupaceryani Paulo aachuna wi Yehova aviihevo “mwiiwa.” Owo onneemererya: “Kaahaavekela Apwiya [Yehova] ikwaha chaaru wi ekiviiheryevo.” Mwawiihiiha, moohipwacha mavekelo a Paulo, “mwiiwa” mmwiilini mwa Paulo waahititelela. Apwanne ela enataphulela wi Yehova haakhunle mavekelo a Paulo? Hooye, tahi yeeyo. Owo aahaakhula mavekelo. Yehova haaviihalevo nikacamiho, nyenya owo aahimvaha ikuru wi avilele nnikacamiho nawe. Yehova aahiloca: “Ikuru saka sinnakhwaaniheryeya mwa oceecheya.” (2 Kor. 12:8, 9) Nave nnikhaviheryo na Muluku, Paulo aahiwerya okhapelela ohakalala ni murecele awe wampuwa!—Fil. 4:4-7.

6. (1) Yehova oni aakhule hai mavekelo ahu? (2) Soororomeliha taani sa soorempwa sinaphwanyeya mu eparakrafo sinoovahaani ikuru?

⁶ Moolikana ni Paulo, apwanne mohintoko omveka Yehova wi awoopoleeni mu nikacamiho vyakala? Waakhanle wi moovekela mwawiiseela nave nikacamiho nanyu ninnatitelela, ophiyerya wi ninnatepa, apwanne munnakhala awuukhuwa akhweya muupuwelaka wi Yehova hanasiveliwa ni nyuwaano? Yaari hiiha, muupuwele yootakiherya ya Paulo. Hiiha ntoko Yehova aakhunleiye mavekelo awe, onahaalatho waakhula mavekelo anyu! Yehova hani aviihevo nikacamiho nanyu. Nyenya moorweela mwa munepa waweela, owo onahaala woovahaani ikuru munachunaanyu wi mvilele ni yaweeha. (Sal. 61:3, 4) Akhweya ‘munamvoholeliwa vathi,’ nyenya Yehova harwa oohiyaani.—2 Kor. 4:8, 9; Fil. 4:13.

7-8. (1) Mmukhalelo taani munepa waweela onalikanaaya ni echeku? (2) Petro aatharinhe hai mukhalelo munepa waweela onalapaaya?

⁷ Tuuvi ori mukhalelo mukina munepa waweela onanikhaviheryaaya? Nnanwerya olikanyiha munepa waweela ni echeku. Mwaaceya onanwerya opharihela echeku wi emukerihe mu nipuro noophwanelela wi aphiye mookhapeleleya weiwo onayeiyewo naamwi ephareya esaren’ye ni macumuca. Moolikana, munepa waweela onnanikhaviherya otitelela omurumeela Yehova moohipwacha saweeha ophiyerya ovolowa mu elapo yahiihaano yeeyo Muluku olaihenryeiye.

⁸ Ntoko mulipa oototha ihopa, murummwa Petro aahikhovelela omweeciha mwaaceya. Mwawiihiiha, ti yoophwanelela osuwela wi owo aahithariha muteko wa munepa waweela moorweela wa opharihela nsu nenlo nniiwanana ni omweeciha mwaaceya. Owo oorepa: “Masu yaawo hiyaatonko orwa mwa okhwela wa muchu, nto achu ehooleliwaka ti munepa waweela ti yaaloca masu ookhumela wa Muluku.”—2 Ped. 1:21.

9. Tiheeni Petro aachuneiye wi achu yuupuwele vaavaa aarempeiye wi alopwana yaahooleliwe ti munepa waweela?

⁹ Tiheeni Petro aachuneiye wi achu yuupuwele vaavaa aarempeiye wi alopwana yaahooleliwe ti munepa waweela? Nsu na Ekriki niphariheliwe nnamulikana ni nsu na Ekriki Luka opharihenleiye mu Saweriwa T’arummwa wi amutharihe mwaaceya yoowo onahooleliwa ni echeku. (Saw. 27:15) Mwawiihiiha, mulipa oomutholathola Piipiliya olonce wi Petro opharihenle nsu nenlo nnahaala oweeriha  achu wuupuwela sa omweeciha mwaaceya. Petro olonce wi hiiha ntoko echeku enamuhoolelaaya mwaaceya ophiya nipuro onayeiyewo, munepa waweela waahaahoolela achu amurempe Piipiliya opaka muteko aya. Mulipa oomutholathola Piipiliya olonce tho wi achu amurempe Piipiliya yaari ntoko amwaaceya yaawo “ikuwo saya ihuliwe.” Awo yaari ooreheryeya opaka muteko yoowo munepa waweela waahoolelaaya opaka. Yehova aahipaka yeeyo achuneiye wi apake. Owo aahivahererya “echeku,” naari munepa waweela. Achu amurempe Piipiliya yaahipaka muteko yoowo yaavahiwaaya wi epake. Awo yaahichariha ohoolela wa munepa waweela.

10-11. Ichu taani piili nnaphwanelaahu opaka wi nroromele wi ninneecihiwa ni munepa waweela? Mvaha yootakiherya.

¹⁰ Mweeparipari, elukuluku Yehova aaveerenleiye achu omurepa Piipiliya yoovira. Naamwiihiiha, nlelo Yehova onnapharihela munepa awe wi aahooleleno alapeli awe. Nlelo Yehova onnapaka makupa awe. Nni niphure hai munepa waweela? Nnaphwanela ororomela wi ninnapaka makupa ahu. Nni neereno hai eyo?

¹¹ Muupuwelele yootakiherya ela. Wakhala wi mulipa oomweeciha mwaaceya onnachuna wi echeku emukhaviherye, owo onaphwanela opaka ichu piili. Yoopacerya, owo onamuhiya mwaaceya awe mmakupa yaawo onakhumawo echeku. Opwaha soothene, mwaaceya hani eece waakhala wi mulipa oomweeciha ori moona omweemesa oseresere wa eniya ocai wa nipuro onavirawo echeku. Yanaawiili, owo onaphwanela oweliha ni ohula ikuwo sa mwaaceya ophiyerya onaweryeleiyevo wi evolowemo echeku. Mweeparipari, naamwiihiiha, echeku erivo, mwaaceya onahaala weeca pahiru waakhala wi ikuwo soosareya echeku. Mmukhalelo woolikana, nnahaala ovilelaka mmuteko wa Yehova pahiru wakhala wi nookhalano nikhaviheryo na munepa waweela. Wi niphure orweela wa munepa yoowo, nnaphwanela opaka ichu piili. Yoopacerya, nnaphwanela opaka ichu seiho munepa wa Muluku onaahoolelaaya alapeli awe opaka. Yanawiili, nnaphwanela opaka miteko seiyo sinahooleliwa ni  munepa waweela ophiyerya nnaweryelaahuvo. (Sal. 119:32) Elukuluku nnapakaahu ichu seiya, munepa waweela onahaala onivaha ikuru wi ntitelele omurumeela Yehova moororomeleya ophiyerya ovolowa mu elapo evyaani ya Muluku.

12. Tiheeni nnahaalaahu othokororya hiihaano?

¹² Ophiyerya vaava noomala othokororya mikhalelo miili mummo munepa waweela onanikhaviheryaaya. Munepa waweela onnanivaha owerya nave onnanikhaviherya wiikhalelaru oororomeleya elukuluku nnahoolelaahu saweeha. Munepa waweela onnaneecihatho nave onnanikhaviherya opaka miteko seiyo Yehova onachuneiye wi nipake sinahaala okumiherya ekumi yoohimala. Vano nnahaala othokororya ichu sese nnaphwanelaahu opaka wi niphure moopwaha munepa waweela.

13. Mwawiiwanana ni 2 Timóteo 3:16, 17, tiheeni Soorempwa sinahaalaaya opaka mwa hiyo, nyenya tiheeni nnaphwanelaahu weera?

¹³ Yoopacerya, muhuserye Masu a Muluku. (Mwaalakhanye 2 Timóteo 3:16, 17.) Muluku aahipharihela munepa awe wi “aveerele” miyuupuwelo sawe mwa alipa oomurepa Piipiliya. Vaavaa nnamwaalakhanyaahu Piipiliya ni wuupuwelela yeeyo nnaalakhanyaahu, mahusiheryo a Muluku annavolowa mmuupuweloni ni mmurimani mwahu. Muupuwelo yoowo wooveereliwa onnaneeriha opaka matorokelo mookumini mwahu wi niwerye omuhakalaliha Yehova. (Ahe. 4:12) Nyenya wi niphure moopwahaxa munepa waweela, nnaphwanela wiivaha elukuluku wi nimuhuserye Piipiliya moohihiyererya ni wuupuwelela mwawiiseela vooloca sa yeeyo nnaalakhanyaahu. Voocharela masu a Muluku anahaala ovolowela soothene nnalocaahu ni nnapakaahu.

14. (1) Ntakhara heeni nnalocaahu wi munepa waweela onnakhala mmithukumano sahu Seekristu? (2) Nni niwerye hai ophwanyeya mmithukumano hiiha ntoko mwaaceya orino “ikuwo soohuleya”?

¹⁴ Yanaawiili, omulapela Muluku vamoha. (Sal. 22:22) Mweeparipari, mithukumano sahu Seekristu iri saweereya mummo munepa wa Yehova onakhalaayamo. (Wup. 2:29) Ntakhara heeni nnalocaahu yeela? Nthowa nawi vaavaa nnathukumanaahu ni Akristu akhwiihu, ninnaveka munepa waweela, ninniipa macipo a Omwene yaawo anathipeleya mmasu a Muluku, nave tho ninnawiriyana miyaha sinathipeleya Mpiipiliyani seiyo sinalociwa ni anna athanliwe ni munepa waweela. Nave munepa mmohamoha yoowo onnaakhaviherya arokora wiirehererya phaama wi eperekhe makupa aya. Wi niphure vancipale munepa waweela, nnaphwanela orwa niireherenrye wi nivahe maakhulo mmithukumano. Mmukhalelo yoola, vaavaa nnayaahu mmithukumano, nnakhala oorehererya waakhela munepa waweela hiiha ntoko mwaaceya yoowo ikuwo sawe sihuliwe.

15. Munepa waweela onanikhaviherya hai mmuteko woolaleerya?

¹⁵ Yaneeraru, mphwanyeye mmuteko woolaleerya. Elukuluku nnampharihelaahu Piipiliya mmuteko woolaleerya ni ohusiha, nneemererya munepa waweela wi ovolowele orummwa ahu. (Aro. 15:18, 19) Wi mphure mwawaakhwanela munepa waweela, nyuwo munaphwanela ophwanyeya moohihiyererya mmuteko woolaleerya ni ompharihela Piipiliya elukuluku eri yoothene wakhala wooweryeya. Mukhalelo mmoha wa okhumelela phaama mmuteko woolaleerya ori opharihela ochekula wa ntakiheryo onarweela mu Yoochariha ya Mithukumano Okumi ni Muteko Ahu Weekristu.

16. Tuuvi ori mukhalelo mmoha wooluluwanya wa waakhela munepa waweela?

¹⁶ Yaneexexe, mvekele wa Yehova. (Mat. 7:7-11; Luka 11:13) Mukhalelo mmoha wooluluwanya nnaphwanelaahu opaka wi naakhele munepa waweela ori omveka Yehova mu nivekelo. Hiyaavovo echu enahaala omaaliha mavekelo ahu, omphiyerya Yehova naari onihiiha waakhela munepa wa Muluku. Munepa waweela onamunikhaviherya naamwi nri mukariposo nave Satana hani awerye onihiiha waakhela munepa waweela. (Tiy. 1:17) Nnaphwanela ovekela mmukhalelo taani wi niphure mwawaakhwanela munepa waweela? Wi naakhule  nikoho nenla, hankooni nihuserye vooloca sa nivekelo orweela wa niphwanaphwaniho nnaphwanyeya pahiru mu Muchaka wa Luka. *

17. Tiheeni nnahuseryaahu vooloca sa nivekelo orweela mu niphwanaphwaniho na Yesu nnaphwanyeya mu Luka 11:5-9, 13?

¹⁷ Mwaalakhanye Luka 11:5-9, 13. Niphwanaphwaniho na Yesu ninnooniherya mukhalelo nnaphwanelaahu ovekela ntakhara munepa waweela. Mu niphwanaphwaniho, mulopwana aahaakhela yeeyo aachuneiye “vanthowa na otitelela.” Owo hoomve omveka nthamwene awe wi amukhaviherye naamwi waatempe okhala ohiyu. Yesu opharihenle hai niphwanaphwaniho nenla wa nivekelo? Owo ooloca: “Vekani, munamvahiwa; aavyakani, munamphwanya; manakani nsele, munamuhuleliwa.” Vano, tiheeni nnahuseryaahuvo? Wi naakhele nikhaviheryo na munepa waweela, nnaphwanela ovekaka moohihiyererya.

18. Mwawiiwanana ni niphwanaphwaniho na Yesu, ntakhara heeni nnanwerya ororomela wi Yehova onahaala onivaha munepa awe waweela?

¹⁸ Niphwanaphwaniho na Yesu ninnanikhaviherya tho woona ntakhara heeni Yehova oneereiye anivahe munepa waweela. Mulopwana onalociwa mu niphwanaphwaniho aanachuna omukhapelela phaama muleco awe. Owo aahisuwela wi aanaphwanela omvaha yoolya muleco awe yoowo aaruule ohiyu nyenya haarino echu wi amvahe. Yesu olonce wi mwaacamani awe aahimvaha epaau nthowa nawi aahititelela oveka. Tinivi naari nihusiheryo na Yesu? Waakhanle wi muchu oohiphaameya aahichuna omukhaviherya mwaacamani awe ole aatitelenle, Tiithiihu ooreera murima onahaala waakhaviherya yaale anaveka moohihiyererya munepa waweela! Mwawiihiiha, nnaphwanela ororomela wi Yehova onahaala waakhula mavekelo ahu elukuluku nnamvekaahu munepa waweela.—Sal. 10:17; 66:19.

19. Ntakhara heeni nnaphwanelaahu ororomela wi nnahaala ovilela ni saweeha?

¹⁹ Nnaphwanela ororomela wi moohipwacha wiilipixerya wa Satana wi anivoothe, nnamukhala oovilela. Ntakhara heeni? Nthowa nawi munepa waweela onnanikhaviherya mmikhalelo miili. Woopacerya, munepa waweela onnanivaha ikuru nnachunaahu wi nivilele ni makacamiho. Yanawiili, munepa ti owerya yoowo onanikhaviherya otitelela omurumeela Yehova ophiyerya ovolowa mu elapo evyaani. Hankooni nikhale oolakelela ophura mwawaakhwanela nikhaviheryo na munepa waweela!