1, 2. a) ¿Tlenon techpaleuiya matikxikokan tlauejli tlen tikpiyaj mojmostla? Xkijto tleka ijkon titlanankilia. b) ¿Tlenon tikitaskej ipan yejuin tlamachtijli?

IJKUAK tiuelij tikxikouaj se tlauejli, timiyekej yotikijtokej ika xtitlaxikoskiaj tla san tejuamej tikixnamikiskiaj. Kanaj ijkon otikijtokej ijkuak otikxikojkej se kokolistli noso ijkuak otomijkatijkej. Tikmachiliaj ika san ouel otikixnamijkej yejon pampa iespíritu santo Jehová otechmakak “on ueyi poder” (2 Cor. 4:7-9).

² Melak tiknekij ika espíritu santo matechpaleui. ¿Tleka? Pampa tiknekij tikxikoskej nochi tlen xkuajli nochiua ipan yejuin tlaltikpaktli (1 Juan 5:19). Noijki, kipiya ika tikimixnamikiskej “on xkuajkualtin espíritus” (Efes. 6:12). Kema, melak miyek tlemach tikixnamikij, yejua ika, tikitaskej kenon techpaleuiya espíritu santo. Sakin, tikitaskej tlenon uelis tikchiuaskej niman ijkon melak kuajli ika topaleuiskej.

3. ¿Kenon espíritu santo techpaleuiya matikixnamikikan tlauejli?

³ Iespíritu santo Jehová techkojtilia niman ijkon matikchiuakan tlen noneki maski tikpiyaskej miyek tlauejli. Apostol Pablo kinemiliaya ika “ipoder Cristo” kipaleuijtoya makitekichiuili Jehová maski kipiaya miyek tlauejli (2 Cor. 12:9). Ijkuak ika okpa otenojnotsato ipan okseki países, xsan onokojtili melak tenojnotsas, noijki otekit niman ijkon kipiyas tlen ika nopanoltis. Ijkuak oyaj Corinto, onokauj ichan Áquila niman Priscila, yejuamej kinchijchiuayaj kajkaltin. Pablo noijki ipan yejon tekitiya, kuakon, seki tonaltin tekitiya imiuan yejon tokniuan (Hech. 18:1-4). Espíritu santo okimakak kojtilistli niman ijkon ueliskia kichiuas itekiyo niman noijki tenojnotsas.

4. Itech tlen kijtoua 2 Corintios 12:7b-9, ¿tlenon kixnamiktoya Pablo?

 ⁴ (Xpoua 2 Corintios 12:7b-9). ¿Tlenon kijtosnekiya Pablo ijkuak okijto ipan yejuin tlaxeloltin ika tlajyouiaya ipampa se “uitstli” tlen kipiaya ipan itlalnakayo? Tla kalakiskia se uitstli ipan totlalnakayo, melak techkokoskia. Kuakon, Pablo okijtosnek ika melak tlajyouijtoya pampa kajmanaya tlen kixnamiktoya. Okijto ika katka kentla “sen tlajyouilistli” tlen Satanás kitekitiltiaya niman ika kitlajyouiltiaya. Kanaj Satanás niman idemonios xokikalaktilijkaj yejon uitstli, kema, kanaj xyejuamej akin kimakatoyaj yejon tlajyouilistli. San ika, ijkuak yejon xkuajkualtin espíritus okitakej ika Pablo kipiaya yejon “uitstli”, uelis tikijtoskej ika kanaj más kikalaktiliayaj niman ijkon más matlajyoui. ¿Tlenon okichiuj Pablo?

5. ¿Kenon Jehová okinnankili iteoyouan Pablo?

⁵ Kachtopa, Pablo kinekiya ika Jehová makikixtili yejon “uitstli”. Okijto: “Yexpa yoniktlajtlanilij toTEKO para ma nechkixtili on tlajyouilistli”. Maski melak okitlajtlan yejon, xokis yejon uitstli. ¿Kijtosneki ika Jehová xokinnankili iteoyouan? Ka, xyejon tlen kijtosneki. Jehová kema okinankili. Maski xokikixtili yejon tlauejli, okimakak kojtilistli niman ijkon matlaxiko. Niman Jehová okijli: “Nopoder más kuajli noteititia ijkuak sen tlakatl xkojtik” (2 Cor. 12:8, 9). Pampa toTajtsin okipaleui, Pablo ouel onen ika iyojlo (Filip. 4:4-7).

6. a) ¿Kenon uelis technankilis Jehová? b) ¿Kenon techyolchikauaj tlaxeloltin tlen nesij ipan yejuin párrafo?

⁶ ¿Kemantika yotiktlajtlanilijkaj Jehová matechkixtili se ajmantli, ijkon ken okichiuj Pablo? Kanaj kema, san ika, kanaj otikitakej ika xotechkixtili yejon ajmantli tlen tikpiayaj noso kanaj más oueyiyak, kuakon, kanaj otiknemilijkej ika Jehová xok techtlasojtla. Tla ijkon otiknemilijkej, matikilnamikikan tlen ipan onochiuj Pablo. Ijkon ken Jehová okinnankili iteoyouan, noijki ijkon kinnankilis toteoyouan. Maski kanaj xtechkixtilis ajmantli, kema techmakas kojtilistli ipampa iespíritu santo niman ijkon matitlaxikokan (Sal. 61:3, 4). Kanaj melak tajmanaskej, san ika, Jehová xkeman techkauas (2 Cor. 4:8, 9; Filip. 4:13, TNM).

7, 8. a) ¿Tleka tikijtouaj ika ajakatl noijki ijkon ken espíritu santo? b) ¿Tlenon okijto Pedro niman ijkon teasikamachiltis kenon techpaleuiya espíritu santo?

⁷ ¿Kenon noijki techpaleuiya espíritu santo? Ijkon ken ijkuak kualtsin ajakatok kichiua ika barco tlen onka itlajkotian mar maajsi ne itenpan mar, espíritu santo techpaleuiya matikxikokan tlauejli niman ijkon uelis tajsiskej ipan yenkuik tlaltikpaktli tlen toTajtsin yotechijli techmakas.

⁸ Pampa apóstol Pedro michajsiya, kuajli kimatstoya tlenon panouaya iuan barcos. Kanaj yejua ika okikuik se tlajtojli tlen miyekej kitekitiltiaj ijkuak kinteneuaj barcos niman ijkon teasikamachiltis kenon techpaleuiya espíritu santo. Okijkuilo: “Xkeman noijtoua se teotlajtojli pampa tlakamej ijkon kinekij, tlakamej otlajtokej itechkopa toTajtsin pampa espíritu santo okinmapeuj ijkon makichiuakan”. Tlajtojli ika griego tlen notlajtolkuepa ken “okinmapeuj” kijtosneki “okinuikak” (2 Ped. 1:21, TNM).

9. ¿Tlenon okinek teasikamachiltis Pedro ijkuak okitekitilti tlajtojli “okinuikak”?

⁹ ¿Tlenon okinek teasikamachiltis Pedro ijkuak okitekitilti tlajtojli “okinuikak”? Lucas, akin okijkuilo amoxtli Hechos, okitekitilti se tlajtojli ika griego tlen san noijki kijtosneki niman ijkon kiteneuas se barco tlen kinokauilia makuika ajakatl (Hech. 27:15). Kuakon, ijkuak Pedro okijto ika espíritu santo “okinuikak” akin okijkuilojkej Biblia, kentla okonteneuj tlen panoua iuan barcos, ijkon okijto  se ixtlamatki itech Biblia. Pedro okijtosnek ika ijkon ken ajakatl kuika barco niman ijkon maajsi kampa noneki, espíritu santo okinyekan teotlajtokej niman akin okijkuilojkej Biblia niman ijkon kuajli makichiuakan intekiyo. Sa no yejua ixtlamatki akin otikteneujkaj okijto: “Teotlajtokej kentla okinpatlaujkej invelas”. Jehová okinpaleui ijkuak okinmakak “ajakatl”, kijtosneki, espíritu santo. Niman akin okijkuilokej Biblia onokauilijkej makinyekana espíritu santo.

10, 11. ¿Tlenon ome tlemach noneki tikchiuaskej niman ijkon tikmatiskej ika yemelak techyekana espíritu santo? Xkijto se neskayotl.

¹⁰ Maski aman Jehová xok kitekitiltia iespíritu santo niman ijkon manoijkuilokan okseki amoxtin itech Biblia, kema ok kitekitiltia iespíritu santo niman ijkon kinyekanas itekipanojkauan. Kuakon, Jehová ok techpaleuiya. Tla tiknekij matechyekana espíritu santo, noneki tikitaskej tla tokauilijtokej matechyekana. ¿Kenon uelis tikchiuaskej yejuin?

¹¹ Matitlanemilikan itech yejuin. Tla yakaj akin kiyekana se barco kineki kuajli nopaleuis ika ajakatl, noneki kichiuas ome tlemach. Kachtopa, noneki kuikas barco hasta kampa ajakatika. Tla xkejkuania barco itech itempan mar, barco xkanaj uelis yas. Ika ome, noneki kuajli kinpatlauas velas, pampa san ijkon ajakatl uelis kuikas barco. Noijki ijkon, san uelis tiktekichiuilijtoskej Jehová tla techpaleuijtika espíritu santo. Ika yejon, noneki tikchiuaskej ome tlemach. Kachtopa, noneki tiaskej kampa ajakatika, kijtosneki, tikchiuaskej nochi yejon tlen techpaleuis matikselikan iespíritu toTajtsin. Ika ome, noneki “kuajli tikinpatlauaskej velas”, kijtosneki, tokojtiliskej nochipa tikchiuaskej yejon tlen techpaleuis matikselikan iespíritu toTajtsin (Sal. 119:32). Tla ijkon tikchiuaj, espíritu santo techpaleuis niman ijkon matiktekichiuilijtokan Jehová maski tikixnamikiskej tlen ouijtika, niman noijki techpaleuis matajsikan ipan yenkuik tlaltikpaktli tlen toTajtsin kineki techmakas.

12. ¿Tlenon tikitaskej aman?

 ¹² Hasta aman, yotikitakej kenon techpaleuiya espíritu santo. Techmaka kojtilistli niman techpaleuiya matimelajkanemikan ijkuak tikixnamikij tlauejli. Noijki techpaleuiya matiktekichiuilijtokan Jehová niman matinejnentiakan ipan ojtli tlen teuika kampa onka nemilistli tlen xkeman tlamis. Aman, tikitaskej naui tlemach tlen noneki tikchiuaskej niman ijkon kuajli techpaleuis espíritu santo.

13. a) Ken kijtoua 2 Timoteo 3:16, 17, ¿kenon iTlajtol toTajtsin uelis techpaleuis? b) ¿Tlenon noneki tikchiuaskej tejuamej?

¹³ Kachtopa, matomachtikan iTlajtol toTajtsin (xpoua 2 Timoteo 3:16, 17). Jehová okitekitilti iespíritu santo niman ijkon kintlalis itlanemililuan ipan intlamachilis itekipanojkauan akin okijkuilojkej Biblia. Ijkuak tikpouaj iTlajtol toTajtsin niman itech titlanemiliaj, kuakon, itlamachtiluan toTajtsin kalakij ipan totlamachilis niman toyojlo. Yejuin itlanemililuan toTajtsin techpaleuiyaj matinemikan ijkon ken toTajtsin kineki (Heb. 4:12). San ika, tla tiknekij kuajli matechpaleui espíritu santo, noneki nochipa tomachtiskej Biblia niman titlanemiliskej itech tlen tikpouaj. Tla ijkon tikchiuaj, iTlajtol toTajtsin techpaleuis matiknemilikan niman matikchiuakan tlen kuajli.

14. a) ¿Tleka tikijtouaj ika ipan totlanechikoluan kentla “ajakatika”? b) ¿Tlenon uelis tikchiuaskej niman ijkon ijkuak tiaskej tlanechikoltin “patlaujtiaskej tovelas”?

¹⁴ Ika ome, matikueyichiuakan toTajtsin imiuan itekipanojkauan (Sal. 22:22). Uelis tikijtoskej ika ipan totlanechikoluan kentla “ajakatika”, pampa ompa onka iespíritu Jehová (Apoc. 2:29). ¿Tleka uelis ijkon tikijtoskej? Pampa, ipan tlanechikoltin tikchiuaj teoyotl niman tiktlajtlaniliaj toTajtsin matechmaka iespíritu, tokuikatiaj tlakuikaltin tlen nokixtiaj itech iTlajtol toTajtsin niman tikinkakij tlamachtiltin tlen kitemakaj tokniuan akin yokintekitlalijkej ipampa espíritu santo. Niman yejon espíritu kinpaleuiya tokniuan siuamej makiyektlalikan tlen kijtoskej ijkuak panoskej tlayekapan niman kinpaleuiya ijkuak ompa inemij. Aman tej, tla tiknekij kuajli ika topaleuiskej yejon espíritu, noneki tiaskej tlanechikoltin niman titlanankiliskej, ijkon “patlaujtiaskej tovelas”.

15. ¿Tlenon noneki tikchiuaskej tla tiknekij ika espíritu santo matechpaleui ijkuak titenojnotsaskej?

¹⁵ Ika yeyi, matitenojnotsakan. Tla tikpouaj Biblia ijkuak titenojnotsaj niman ijkuak titemachtiaj, kuakon, tijkauilijtokej ika espíritu santo matechpaleui (Rom. 15:18, 19). San ika, noneki nochipa titenojnotsaskej niman tijkuiskej Biblia nochipa ijkuak tiueliskej, ijkon espíritu melak kuajli techpaleuis. Uelis tikitaskej amatlajkuilojli Tlen tomachtiskej niman tlen notekitiltis tlen tijkuij ipan tlanechikojli Nemilistli niman Tekitl ken Cristo, yejuin techpaleuis melak kuajli matitenojnotsakan.

16. ¿Kenon uelis melajki tiktlajtlaniskej espíritu santo?

¹⁶ Ika naui, matikchiuilikan teoyotl Jehová (Mat. 7:7-11; Luc. 11:13). Ijkuak tikchiuaj teoyotl, melajki tiktlajtlanilijtokej Jehová matechmaka iespíritu santo. Nion Satanás niman nion tepantin tlen oniaskej kampa titsauktoskej xuelis kichiuaskej ika toteoyouan maka maajsikan itech Jehová noso ika maka matikselikan espíritu santo (Sant. 1:17). ¿Kenon noneki tikchiuaskej teoyotl tla tiknekij matechpaleui espíritu santo? Uelis tiknankiliskej yejuin tla kuajli tikitaj se neskayotl tlen onka ipan Evangelio de Lucas, ompa kuajli techmachtia kenon tikchiuaskej teoyotl. *

17. ¿Tlenon tiuelij itech tlen Jesús okiteneuj ipan Lucas 11:5-9, 13?

¹⁷ (Xpoua Lucas 11:5-9, 13). Yejuin neskayotl tlen okiteneuj Jesús kiteititia kenon noneki tiktlajtlaniskej espíritu santo. Ipan yejuin neskayotl, on tlakatl okiseli tlen kinekiya pampa miyekpa okitetlajtlanili. Xonomojti kitlajtlanilis iamigo makipaleui maski melak itlayoua katka. * ¿Tlenon kijtosnekiya Jesús ijkuak okiteneuj yejuin neskayotl? Jesús okijto: “Xtlajtlanilikan Dios on tlen mechpoloua, niman yejua mechmakas. Xtejtemokan on tlen mechpoloua, niman nenkinextiskej. Xtetepinikan on tsakuijlotl, niman Dios mechtlatlapouilis”. Kuakon, nikan tiuelij ika, tla tiknekij tikseliskej espíritu santo, noneki miyekpa tiktlajtlaniskej ipan teoyotl.

18. ¿Tleka uelis kuajli tikmatstoskej ika Jehová techmakas espíritu santo?

¹⁸ Yejuin neskayotl noijki techpaleuiya matikasikamatikan tleka Jehová techmakas espíritu santo. Tlakatl akin Jesús okiteneuj kinekiya kuajli kiselis akin okitlajpaloto maski melak itlayoua katka. Kimachiliaya ika nonekiya kitlakualtis, san ika, xitlaj kipiaya. Jesús okijto ika ivecino yejon tlakatl okimakak pan pampa miyekpa okitlajtlanili. ¿Tlenon kinekiya techmachtis? Ika, tla se tlakatl akin tlajtlakole kinektika kipaleuis ivecino akin miyekpa kitlajtlanilia, kuakon, toTajtsin akin melak tetlasojtla más kinekis kinmakas iespíritu santo akin miyekpa kitlajtlaniliaj. Kuakon, uelis tiktlajtlaniliskej Jehová iespíritu santo pampa tikmatstokej ika technankilis (Sal. 10:17; 66:19).

19. ¿Tleka kuajli tikmatstokej ika uelis titlaxikoskej?

¹⁹ Tikmatstokej ika uelis titlaxikoskej maski Satanás nochipa techixnamiktos. ¿Tleka? Pampa espíritu santo techpaleuiya. ¿Kenon techpaleuiya? Kachtopa, techmaka kojtilistli niman ijkon uelis tikinxikoskej tlaueltin. Ika ome, kichiua “kuajli mapatlauikan tovelas” niman techpaleuiya matiktekichiuilijtokan Jehová hasta ijkuak yejkos yenkuik tlaltikpaktli. Kuakon, melak kuajli tla tokauiliaj matechpaleui espíritu santo.