1-2. (a) Hadia zanolo yaʼita enaʼö anau gölöda ero maʼökhö? Tutunö. (b) Hadia nitutunöda ba wamahaʼö daʼa?

NA ITÖRÖ tödömö gabula dödö si no irai ötaögö, tola manö ömane tödömo, ”Tatu tebai utaögö gabula dödö daʼö na uʼodaligö waʼabölögu samösa.” Ato ba gotaluada zi no irai mangokhögö fangera-ngera simane daʼö. Te no irai ötaögö wökhö sabölö-bölö mazui mate niha niʼomasiʼömö. Na ifuli itörö tödömö, aboto ba dödömö wa tola anau gölömö ero maʼökhö börö wanolo geheha niʼamoniʼö moroi khö Yehowa sameʼe khömö ’faʼabölö sahöli-höli dödö’.​—2 Kor. 4:7-9.

² Moguna göi khöda geheha niʼamoniʼö ba wolawa fondrönisi dödö moroi ba gulidanö safönu faʼalösökhi. (1 Yoh. 5:19) Aefa daʼö, moguna göi khöda waʼabölö ba wolawa ”malaʼika si lö sökhi”. (Ef. 6:12) Iadaʼa, datatutunö dombua lala niʼogunaʼö geheha niʼamoniʼö ba wanolo yaʼita. Aefa daʼö, tatutunö hewisa enaʼö sindruhu-ndruhu tatema mbua niʼasogö geheha niʼamoniʼö.

3. Hadia sambua lala niʼogunaʼö Yehowa ba wanolo yaʼita faoma ehehania?

³ Sambua lala niʼogunaʼö geheha niʼamoniʼö moroi khö Yehowa ba wanolo yaʼita, yaʼia daʼö ibeʼe khöda waʼabölö. Andrö wa tola tafalua noro dödö nibeʼe khöda hewaʼae tataögö gabula dödö. Daʼö zalua khö zinenge sotöi Faulo. Hewaʼae itaögö gabula dödö, lö tebulö mohiʼa dödönia ba wangai halöwö khö Yehowa. Hadia mbörö? Börö me iʼodaligö ’waʼabölö Keriso’. (2 Kor. 12:9) Me ifalua halöwö famasui si mendrua tobali utusan injil, tenga ha halöwö fanuriaigö manö nifalua Waulo, hizaʼi mohalöwö göi ia ba wombönökhi soguna khönia. Toroi ia ba Gorindro ba nomo Akila hegöi Firisikila. Yaʼira si darua andre samazökhi tendra. Börö me samözökhi tendra göi Waulo, itaria fao ia khöra ba wohalöwö. (Hal. 18:1-4) Eheha niʼamoniʼö zameʼe faʼabölö  khö Waulo ba wangalui soguna khönia hegöi ba wamalua fanuriaigö.

4. Moloʼö 2 Korindro 2:7b-9, hadia gabula dödö nitaögö Waulo?

⁴ Baso 2 Korindro 12:7b-9. Ba ayati daʼa, iwaʼö Faulo wa iforege ba wanaögö ’ndroi bakha ba mbotonia’. Hadia geluahania? Na so ndroi si no tetaru ba mbotoda, tatu manö tarasoi waʼafökhö. Börö zimanö, eluaha ndroi nitutunö Waulo yaʼia daʼö faʼafökhö nirasoinia. Iwaʼö wa abula dödö nitaögönia andrö, hulö simane ”malaʼika Zatana sanafari” yaʼia (”samözi” yaʼia, nis.). Tola manö tenga Satana hegöi ira malaʼika si lö sökhi tanö böʼö zanaruʼö ndroi ba mboto Waulo irege irasoi gabula dödö. Hizaʼi, me no laʼila ira malaʼika si lö sökhi ”ndroi” nitaögö Waulo, tola manö laforege nasa ba wanaruʼö ndroi daʼö enaʼö itugu irasoi Waulo waʼafökhö. Hadia nifalua Waulo?

5. Hewisa wangoromaʼö Yehowa wa ifondrondrongo wangandrö Waulo?

⁵ Ba wamobörö, omasi Waulo na aheta khönia ”ndroi” daʼö. Imane, ”No tölu kali uʼandrö khö Lowalangi [Yehowa] enaʼö aheta khögu ndroi daʼö.” Hewaʼae na lö tebulö mangandrö Waulo, lö aheta ndroi daʼö ba mbotonia. Hadia daʼö geluahania wa lö ifondrondrongo Yehowa wangandrö Waulo? Tenga. Ifondrondrongo wangandrö Waulo. Lö iheta Yehowa gabula dödö nitaögö Waulo, hizaʼi ibeʼe khönia waʼabölö ba wanaögö daʼö. Imane Yehowa, ”Börö me moʼahonoa waʼabölögu khöu me ambö faʼabölömö.” (2 Kor. 12:8, 9) Börö wanolo Lowalangi, lö tebulö iʼokhögö waʼohahau dödö hegöi faʼomuso dödö!​—Fil. 4:4-7.

6. (a) Hewisa wangoromaʼö Yehowa wa ifondrondrongo wangandröda? (b) Moroi ba ayati si so ba ngenoli daʼa, hadia manö mbuʼusa li si möi fangabölöʼömö?

⁶ Simane Faulo, hadia no irai öʼandrö khö Yehowa enaʼö iheta gabula dödö nitaögömö? Tola manö lö aetu-aetu öʼandrö khö Yehowa enaʼö iheta gabula dödömö, hizaʼi lö aheta gabula dödö daʼö mazui itugu monönö. Hadia daʼö zangoromaʼö wa lö iʼameʼegö tödö ndraʼugö Yehowa? Na simane daʼö nirasoimö, törö tödömö duma-duma Waulo. Ifondrondrongo wangandrönia Yehowa, ba hasambalö göi ifondrondrongo wangandrömö! Tola manö lö iheta Yehowa gabula dödömö. Hizaʼi, ibeʼe khömö geheha niʼamoniʼö enaʼö öʼokhögö waʼabölö ba wanaögö abula dödö daʼö. (Zin. 61:4, 5) Tola manö örasoi hulö ’niböbözi ndraʼugö irege tegaölö tou ba danö’, hizaʼi lö iröi ndraʼugö Yehowa.​—2 Kor. 4:8, 9; Fil. 4:13.

7-8. (a) Hana wa tola muʼamaedolagö geheha niʼamoniʼö simane angi? (b) Hewisa wanutunö Wetero lala wohalöwö geheha niʼamoniʼö?

⁷ Hadia lala tanö böʼö niʼogunaʼö geheha niʼamoniʼö ba wanolo yaita? Tola muʼamaedolagö geheha niʼamoniʼö simane angi. Na ilau ia angi ba gamaudu si tefaudu, tola möi fanolo ba göfa enaʼö irugi nahia si möi yaʼia, hewaʼae na alua mbade ba dalu nasi. Simane daʼö göi geheha niʼamoniʼö, tola itolo ita enaʼö lö tebulö tafosumange Yehowa, hewaʼae na oya gabula dödö nitaögöda simane bade. Daʼö mbörö wa tola takhamö gohitö dödöda yaʼia daʼö ulidanö si bohou si no ifabuʼu Lowalangi.

⁸ Börö me si fagai iʼa me föna Wetero, daʼö mbörö wa asese moloyo ia. Te daʼö mbörö wa iʼogunaʼö gamaedola soʼamakhaita ba woloyo, ba wanutunö hewisa lala wohalöwö geheha niʼamoniʼö. Imane, ”Lö irai mufaʼema wamaʼeleʼö moloʼö somasi dödö niha. Hizaʼi, hadia zi otarai khö Lowalangi daʼö nifaʼema niha börö me eheha niʼamoniʼö zameʼe ba dödöra.”​—2 Fet. 1:21.

9. Me itutunö Fetero hewisa geheha niʼamoniʼö ba wamarou tödö ndra sanura Sura Niʼamoniʼö, hadia duma-duma niʼogunaʼönia?

⁹ Hadia zindruhunia geluaha gamaedola niʼogunaʼö Wetero? Ngawua wehede Yunani niʼogunaʼö Wetero, iʼogunaʼö göi daʼö  Luka sanura mbuku Halöwö Zinenge ba woʼamaedolagö köfa ’niʼoloiʼö nangi’. (Hal. 27:15) Moloʼö samösa pakar Zura Niʼamoniʼö, me isura Fetero wa eheha niʼamoniʼö ”zameʼe” ba dödö ndra sanura Zura Niʼamoniʼö, iʼogunaʼö Fetero gamaedola soʼamakhaita ba woloyo. Eluaha niwaʼö Wetero yaʼia daʼö simane köfa niʼoloiʼö nangi enaʼö irugi zi sambua nahia, simane daʼö göi ndra sanura Sura Niʼamoniʼö. Eheha niʼamoniʼö zamarou tödöra ba wamalua halöwöra. Imane nasa, ”Sanura Sura Niʼamoniʼö hulö simane köfa si no mamologö loyora.” Ifalua halöwönia Yehowa ba wameʼe ’angi’ soguna khöra, yaʼia daʼö eheha niʼamoniʼö. Lafalua halöwöra ba laʼoʼö wanuturu lala geheha niʼamoniʼö.

10-11. Hadia zi dombua ngawalö zinangea tafalua enaʼö sindruhu-ndruhu tatema mbua niʼasogö geheha niʼamoniʼö? Beʼe duma-duma.

¹⁰ Iadaʼa, lö saʼae iʼogunaʼö gehehania Yehowa ba wamarou tödö niha ba wanura Sura Niʼamoniʼö. Hizaʼi, iʼogunaʼö nasa gehehania andrö ba wameʼe fanuturu lala ba nono mbanuania. Lö si tebulö Yehowa ba wamalua halöwönia. Hewisa enaʼö tatema mbua niʼasogö geheha Lowalangi? Moguna lö tebulö tafalua halöwöda. Hewisa wamaluada daʼö?

¹¹ Angeragö duma-duma daʼa. Enaʼö tola iʼogunaʼö nangi niha soloyo, so dombua zinangea ifalua. Si oföna, moguna itatugöi wa köfania andrö so ba nahia si so nangi. Lö manö mofanö göfania na lö iheta moroi ba pelabuhan. Si dua, moguna ibologö loyonia ba iʼeboloʼö wamokai. Tatu manö, hewaʼae na so nangi, awena tola mofanö göfania andrö na ilulugö angi loyonia. Simane daʼö göi, tola anau gölöda ba wangai halöwö khö Yehowa na tatema wanolo geheha niʼamoniʼö. Hizaʼi, enaʼö sindruhu-ndruhu tatema mbua niʼasogö geheha niʼamoniʼö, so dombua zinangea tafalua. Si oföna, moguna tafalua halöwö si tola mangaʼasogö eheha niʼamoniʼö. Si dua, moguna tabologö loyoda ba taʼeboloʼö wamokai yaʼia. Eluahania, moguna taforege wamalua fefu halöwö andrö. (Zin. 119:32) Na tafalua zi dombua ngawalö andre, tola ifarou dödöda  eheha niʼamoniʼö ba wanaögö fefu wanandraigö hegöi abula dödö. Eheha niʼamoniʼö göi zameʼe khöda faʼanau gölö enaʼö lö faröi ba wogamö ulidanö si bohou khö Lowalangi.

12. Hadia nitutunöda iadaʼa?

¹² No tatutunö dombua lala niʼogunaʼö geheha niʼamoniʼö ba wanolo yaʼita. Eheha niʼamoniʼö zameʼe khöda faʼabölö ba itolo ita enaʼö lö faröi hewaʼae tataögö gabula dödö. Eheha niʼamoniʼö göi zanolo yaʼita ba wangokhögö faʼanau gölö ba wangai halöwö khö Lowalangi irege tasöndra waʼauri si lö aetu. Iadaʼa, datatutunö öfa ngawalö zinangea tafalua enaʼö sindruhu-ndruhu tatema mbua niʼasogö geheha niʼamoniʼö.

13. Moloʼö 2 Timoteo 3:16, 17, hadia mbuania na tabaso Zura Niʼamoniʼö, hizaʼi hadia zinangea tafalua?

¹³ Si oföna, fahaʼö ndraʼugö ba Daromali Lowalangi. (Baso 2 Timoteo 3:16, 17.) Ngawua wehede Yunani nifoʼeluaha tobali ”eheha Lowalangi zameʼe” tola mufoʼeluaha ia ”niwuwusi Lowalangi”. Iʼogunaʼö Lowalangi gehehania niʼamoniʼö ba ”wowuwusi” mazui ibeʼe mbua gera-erania ba wangera-ngera niha sanura Zura Niʼamoniʼö. Na tabaso ba taʼangerönusi Zura Niʼamoniʼö, fehede Lowalangi zi möi ba wangera-ngerada hegöi ba dödöda. Daʼö zamarou tödöda ba wamaudugö faʼaurida ba zomasi Lowalangi. (Heb. 4:12) Hizaʼi, enaʼö sindruhu-ndruhu tatema mbua niʼasogö geheha niʼamoniʼö, böi tabato ba wamahaʼö yaʼita ba Zura Niʼamoniʼö. Buania, molua-lua Daromali Lowalangi ba niwaʼöda hegöi ba nifaluada.

14. (a) Hana wa tola tawaʼö wa so geheha niʼamoniʼö ba gangowuloa? (b) Hadia zinangea tafalua enaʼö sindruhu-ndruhu tatema mbua niʼasogö geheha niʼamoniʼö?

¹⁴ Si dua, fao ita khö ndra talifusöda ba wamosumange Lowalangi. (Zin. 22:23) Na möi ita ba gangowuloa, hulö möi ita ba nahia si so ”nangi”. So geheha Yehowa ba gangowuloa. (Fam. 2:29) Hana wa tola tawaʼö zimane daʼö? Na fao ita khö ndra talifusöda ba wamosumange Yehowa ba gangowuloa, mangandrö ita enaʼö ibeʼe khöda geheha niʼamoniʼö ba taʼanunöisi zinunö si teʼodane-dane ba Daromali Lowalangi. Tafondrondrongo göi mene-mene Zura Niʼamoniʼö, nifaʼema ndra talifusöda si no ituyu eheha niʼamoniʼö. Eheha niʼamoniʼö göi zanolo ndra talifusöda ba wamaʼanö hegöi ba wamaʼema halöwöra. Hizaʼi, enaʼö sindruhu-ndruhu tatema mbua niʼasogö geheha niʼamoniʼö, moguna tafaʼanö ita ba wameʼe bua gera-era ba gangowuloa. Börö zimanö, na möi ita ba gangowuloa no tobali ita simane köfa si no muhaogö wamokai loyonia.

15. Hewisa lala enaʼö fao khöda geheha niʼamoniʼö ba halöwö fanuriaigö nifaluada, ba hadia zinangea tafalua?

¹⁵ Si tölu, böi böhöli wanuriaigö. Na taʼogunaʼö Zura Niʼamoniʼö ba wamalua halöwö fanuriaigö hegöi famahaʼö, no tatehegö enaʼö fao khöda geheha niʼamoniʼö ba halöwö fanuriaigö nifaluada. (Rom. 15:18, 19) Hizaʼi, enaʼö sindruhu-ndruhu ötema mbua niʼasogö geheha Lowalangi, moguna lö öböhöli weʼamöi manuriaigö ba asese ogunaʼö Zura Niʼamoniʼö. Na öʼogunaʼö duma-duma wahuhosa ba Waö-Waö Halöwö ba Gangowuloa Faʼauri ba Fanuriaigö tola itugu aoha khömö ba wamörögö fahuhuosa ba niha nifalukhaisimö.

16. Hadia lala si tohude enaʼö iʼanemaiʼö tatema geheha niʼamoniʼö?

¹⁶ Si öfa, angandrö khö Yehowa. (Mat. 7:7-11; Luk. 11:13) Lala sabölö alio ba wanöndra eheha niʼamoniʼö yaʼia daʼö, taʼandrö khö Yehowa ba wangandrö. Lö hadöi si tola mombaʼagö fangandröda khö Yehowa, ba lö hadöi göi si tola mombaʼagö Yehowa ba wameʼe khöda ehehania niʼamoniʼö. Lö tebulö geheha niʼamoniʼö ba wameʼe khöda fanolo hewaʼae lakuru ita mazui iforege Satana ba wombaʼagö yaʼia. (Yak. 1:17) Enaʼö sindruhu-ndruhu tatema mbua niʼasogö geheha niʼamoniʼö, hewisa zinangeania  ita ba wangandrö? Enaʼö taʼila wanema linia, datafahaʼö ita ba gamaedola sanandrösa ba wangandrö, ba amaedola andre tesöndra ia ha ba Injil Luka. *

17. Ba gamaedola Yesu si so ba Luka 11:5-9, 13, hadia wamahaʼö nihalöda sanandrösa ba wangandrö?

¹⁷ Baso Luka 11:5-9, 13. Ba gamaedola Yesu, tola taʼila hewisa zinangeania ita ba wangandrö eheha niʼamoniʼö. Tola isöndra zoguna khönia ira matua andrö, ’börö me so khönia wamorege’. Lö alawö ia ba wangandrö tolo khö nawönia hewaʼae no talu mbongi. (Luk. 11:8) Ba gamaedola daʼa, hadia wamahaʼö nifaʼema Yesu sanandrösa ba wangandrö? Imane, ”Böi miböhöli wangandrö ba tebeʼe khömi; böi mibato wangalui ba misöndra; mibökö-bökö mbawandruhö ba tebokai khömi.” Hadia wamahaʼönia khöda? Enaʼö tasöndra wanolo geheha niʼamoniʼö moguna böi taböhöli wangandrö.

18. Moroi ba gamaedola Yesu, hana wa faduhu dödöda wa hasambalö ibeʼe khöda geheha niʼamoniʼö Yehowa?

¹⁸ Amaedola Yesu göi zanolo yaʼita enaʼö so khöda waʼafaduhu dödö wa hasambalö ibeʼe gehehania Yehowa. Ira matua ba gamaedola daʼö, omasi itemaʼö domenia si fao faʼasökhi. Iʼila wa moguna ihenaigö gö domenia si tohare ba zi talu mbongi, hizaʼi lö hadöi ö sinangea ihenaigö. Iwaʼö Yesu wa ibeʼe khö ndra matua daʼö roti ba gafuriatania, börö me lö iböhöli wangandrö. Hadia wamahaʼö somasi ifaʼema Yesu? Na niha si lö moʼahonoa manö omasi itolo nawönia niha börö me lö iböhöli awönia andrö ba wangandrö, mendrua manö saʼae Namada sebua faʼomasi si so ba zorugo. Faduhu dödöda wa hasambalö ibeʼe khöda gehehania niʼamoniʼö, na lö taböhöli wangandrö yaʼia.​—Zin. 10:17; 66:19.

19. Hana wa faduhu dödöda wa hasambalö taʼokhögö waʼanaugölö?

¹⁹ Hewaʼae na isuwö ita Satana, lö tebulö taʼokhögö waʼanau gölö. Hadia mbörö? Börö me so dombua lala niʼogunaʼö geheha niʼamoniʼö ba wanolo yaʼita. Si oföna, ibeʼe khöda waʼabölö geheha niʼamoniʼö enaʼö tola tataögö gabula dödö. Si dua, ibeʼe khöda waʼabölö geheha niʼamoniʼö enaʼö lö tebulö tahalö halöwö khö Yehowa irugi tohare gulidanö si bohou. Andrö, datahalö gangetula enaʼö sindruhu-ndruhu tatema mbua niʼasogö geheha niʼamoniʼö!