1-2. (a) Khuyini esinikela amandla wokuqalana neentjhijilo? Hlathulula. (b) Khuyini esizokucoca ngayo esihlokwenesi?

“NANGICABANGA ngesitjhijilo ebengiqalene naso, ngiyabona ukuthi bengeze ngakghona ukuphumelela ngamandlami.” Khewawatjho amezwi afana nala? Inengi lethu khelawatjho. Mhlamunye wawatjho ngemva kokucabangisisa ngendlela owaphumelela ngayo lokha nawuqalene nokugulelwa namkha ufelwe mumuntu omthandako. Nawuqala emva, uyabona ukuthi wakghona ukuphumelela ngebanga lokusekelwa nguJehova ngommoyakhe ocwengileko ‘onamandla angaphezu kajayelekileko.’—2 Kor. 4:7-9.

² Siyawutlhoga ummoya ocwengileko bona usisize silwisane nemimoya emimbi yephaseli. (1 Jwa. 5:19) Ngaphezu kwalokho, sitlhoga amandla bona silwe ‘namabutho wemimoya emimbi.’ (Efe. 6:12) Njengombana sicabanga ngalokhu, akhesicoce ngeendlela ezimbili ummoya ocwengileko osisiza ngazo bona silwisane neentjhijilwezi. Sizokucoca godu nangokuthi khuyini esingayenza bona ummoya ocwengileko usizuzise ngokuzeleko.

3. Ngiyiphi indlela uJehova asisiza ngayo bona sikghodlhelele iintjhijilo?

³ Ummoya kaJehova ocwengileko usinikela amandla wokwenza koke esitlhoga ukukwenza naphezu kweentjhijilo. Ngebanga lokuthi bekathembele ‘emandleni kaKrestu,’ umpostoli uPowula wakghona ukulotjha uJehova naphezu kweentjhijilo. (2 Kor. 12:9) Hlangana nekhambo lakhe lesibili asithunywa sevangeli, uPowula akhenge asebenze budisi ekutjhumayeleni kwaphela, kodwana wasebenza budisi nokobana azisekele ngokweezemmali. Wahlala emzini ka-Akhwila noPeresila ebewuseKorinte. Bebababakhi bamatende. Njengombana  noPowula bekenza umsebenzi ofana newabo, wasebenza nabo iinkhathi ezithileko. (IzE. 18:1-4) Ummoya ocwengileko wanikela uPowula amandla wokwenza kokubili, ukutjhumayela nokusebenza bona azisekele.

4. Yesi-2 kwebeKorinte 12:7b-9 ithi ngisiphi isitjhijilo uPowula aqalana naso?

⁴ Funda yesi-2 kwebeKorinte 12:7b-9. Emavesini la, UPowula bekatjho ukuthini nakathi walwisana ‘neliva enyameni’? Nangabe bewuneliva emzimbenakho, bewuzokuzwa ubuhlungu obukhulu. Yeke uPowula bekathi ngendlela ethileko waqalana nobuhlungu obukhulu. Wabiza isitjhijilweso ngokuthi ‘yingilozi kaSathana’ ‘ebeyisolo imwahla ngepama.’ Kungenzeka akusinguSathana namkha iingilozi zakhe ezimadimoni ezabangela ubuhlungu uPowula aqalana nabo. Kodwana imimoya emimbi leyo nayitjheja bona uPowula ‘uneliva,’ kungenzeka beyifuna ukumzwisa ubuhlungu obukhulu. Khuyini uPowula ayenzako?

5. UJehova wayiphendula njani imithandazo kaPowula?

⁵ Ekuthomeni, uPowula bekafuna uJehova asuse “iliva” enyamenakhe. Uyavuma, uthi: “Ngarabhela iKosi [uJehova] amahlandla amathathu ngalokhu, bona lisuke kimi.” Naphezu kwemithandazo kaPowula iliva akhenge lisuke. Kghani lokho kutjho ukuthi uJehova akhenge ayiphendule imithandazo kaPowula? Awa akusinjalo. Wayiphendula. UJehova akhenge alisuse ilivelo, kodwana wamnikela amandla wokulikghodlhelela. Wathi: “Amandlami enziwa aphelele ekubogabogeni.” (2 Kor. 12:8, 9) Ngesizo lakaJehova, uPowula waba nethabo nokuthula.—Flp. 4:4-7.

6. (a) UJehova angayiphendula njani imithandazwethu? (b) Ngiziphi iinthembiso ezisemitlolweni esigabenesi ezikunikela amandla?

⁶ NjengoPowula, khewambawa na uJehova bona akusize nawuqalene neentjhijilo? Mhlamunye ngesikhathi urabhela uJehova bona asuse iintjhijilo zakho wabona ngasuthi azisuki namkha ziba zimbi khulu, kghani lokho kwakutshwenya mhlamunye wezwa ngasuthi kunokuthileko okwenzileko okungamthabisiko uJehova? Nakunjalo, khumbula isibonelo sakaPowula. Njengombana uJehova ayiphendula imithandazwakhe, uzoyiphendula neyakho. Kungenzeka angayisusi imiraro oqalene nayo. Kodwana ngesizo lommoya ocwengileko, uzokunikela amandla owatlhogako bona ukghodlhelele. (Rhu. 61:3, 4) ‘Ungaduleka phasi,’ kodwana uJehova angekhe akulahla.—2 Kor. 4:8, 9; Flp. 4:13.

7-8. (a) Ummoya ocwengileko ufana njani nommoya? (b) UPitrosi wakuhlathulula njani ukusebenza kommoya ocwengileko?

⁷ Ummoya ocwengileko usisiza ngaziphi ezinye iindlela? Singamadanisa ummoya ocwengileko nommoya welwandle onqophisa isikepe lapho siya khona, ummoya ocwengileko usisiza silotjhe uJehova ngaphezu kweenqabo esihlangabezana nazo njengombana sinqophe ephasini elitjha.

⁸ Umpostoli uPitrosi bekamthiyi weemfesi, yeke bekakujayele ukukhamba ngesikepe. Yeke kungebangelo athi nakahlathulula indlela ummoya ocwengileko osebenza ngayo, asebenzisa ihlathululo ekhambiselana nokukhamba ngesikepe. Watlola, wathi: “Isiphorofido akhenge khesalethwa ngentando yomuntu, kodwana abantu bakhuluma okuvela kuZimu basunduzwa mmoya ocwengileko.” Igama lesiGirigi elithi ‘sunduza,’ litjho ‘ukuphutjha.’—2 Pit. 1:21.

9. Bekavezani uPitrosi nakasebenzisa ibizo elithi ‘ukusunduza’?

⁹ UPitrosi bekaveza liphi iphuzu nakazakuthi ‘ukusunduza’? ULukasi, umtloli wencwadi yezEnzo naye wasebenzisa ibizo elifanako lesiGirigi nakahlathulula isikepe esilawulwa mmoya. (IzE. 27:15) Yeke uPitrosi  nakathi abatloli beBhayibheli ‘bebasunduzwa,’ mumoya ocwengileko, wasebenzisa “isifaniso esikarisako” njengombana kwatjho isazi seBhayibheli esithileko. UPitrosi wathi, njengombana isikepe siphetjhulwa mmoya bona sirage endlelenaso, iimphorofido zeBhayibheli kunye nabatloli bazo bebasunduzwa mmoya ocwengileko bona benze umsebenzi lo. Isazi esifanako sabuye sathi: “Abatloli beBhayibheli bebanjengesikepe esivumela bona ummoya usisunduze, bebakulungele ukusebenzisana nommoya ocwengileko ukuthi ubanqophise bona benzeni.” UJehova wadlala indimakhe. Wabanikela “ummoya,” namkha ummoya ocwengileko. Abatloli beBhayibheli nabo badlala yabo indima. Babambisana nesinqophiso sommoya ocwengileko.

10-11. Ngiwaphi amagadango amabili ekufuze siwathathe azosisiza sisunduzwe mumoya ocwengileko? Fanekisa.

¹⁰ Siyazi ukuthi namhlanjesi uJehova akasasebenzisi ummoya ocwengileko bona enze abantu batlole iBhayibheli. Kodwana nanamhlanjesi ummoya ocwengileko usabanikela abantu bakaZimu amandla. UJehova usayidlala indimakhe. Singazuza njani emmoyeni ocwengileko? Kufuze siqiniseke ukuthi sidlala indimethu. Singakwenza njani lokho?

¹¹ Akhesimadanise ngalendlela. Umuntu otjhayela isikepe nakazokuzuza emmoyeni, kufuze enze izinto ezimbili. Kokuthoma, kufuze abeke isikepe lapho ummoya uyakhona. Ngombana isikepe sakhe asizukuya ndawo nangabe siphambana nommoya. Kwesibili, kufuze aphakamise begodu avule itende lakhe litjhinge phezulu khulu ngendlela angakghona ngayo. Ngitjho nanyana ummoya uphembetha, isikepe sakhe sizokukhamba kwaphela nangabe itende lakhe likghona ukusunduzwa mmoya. Kuyafana nangathi, sizokukghona ukukghodlhelela kwaphela nangabe sisizwa mumoya ocwengileko. Bona sizuze emmoyeni lo, kufuze sithathe amagadango amabili. Kokuthoma, kufuze sibe lapho ummoya kaZimu ukhona  khona, senze izinto ezikhambisana nawo. Kwesibili, kufuze kube ngasuthi sikhuphukisa amatendethu ngokuthi senze izinto ezivumelana nentando kaZimu ngamandlethu woke. (Rhu. 119:32) Nasithatha amagadango la, ummoya ocwengileko uzosisiza usisunduzele phambili, usisize sikghone ukuqalana neenqabo begodu sibekezele ngokuthembeka njengombana siqale phambili ephasini lakaZimu elitjha.

12. Sizokucoca ngani nje?

¹² Bekube nje, sicoce ngeendlela ezimbili umoya ocwengileko osisiza ngazo. Ummoya ocwengileko usipha amandla asisiza sihlale sithembekile nasiqalene neenqabo. Ummoya ubuye usisunduzele phambili begodu usisize sihlale sisendleleni etjhinga ekuphileni okungapheliko. Njenganje, sizokucoca ngezinye izinto ezine ekufuze sizenze bona sizuze emmoyeni ocwengileko.

13. Ngokuya ngeyesi-2 kaThimothi 3:16, 17, khuyini imiTlolo engasenzela khona, kodwana thina kufuze senzeni?

¹³ Kokuthoma, funda iliZwi lakaZimu. (Funda yesi-2 kaThimothi 3:16, 17.) UZimu wasebenzisa ummoyakhe bona ‘aphefumulele’ umcabangwakhe emkhumbulweni wabatloli beBhayibheli. Nasifunda iBhayibheli begodu sizindla ngalokho esikufundako, iimfundiso zakaZimu zingena eenhliziyweni nemkhumbulwenethu. Iimfundiswezi zisenza bona siphile ngokuvumelana nentando kaZimu. (Heb. 4:12) Bona sizuze emmoyeni ocwengileko, kufuze sibekele isikhathi eqadi, sifunde iBhayibheli begodu sicabangisise ngesikufundako. Ngemva kwalokho, iliZwi lakaZimu lizokuba nomthelela kwesikutjhoko nesikwenzako.

14. (a) Kubayini sithi ummoya ukhona emabandleni? (b) Khuyini engasisiza bona sizuze ngokuzeleko emmoyeni ocwengileko?

¹⁴ Kwesibili, lotjhani uZimu ndawonye. (Rhu. 22:22) Imihlanganwethu yobuKrestu iyindawo lapho ‘ummoya’ uphembetha khona. Ummoya kaJehova ukhona emabandleni. (IsAm. 2:29) Kubayini sitjho njalo? Ngombana nasihlangana nabafowethu nabodadwethu sithandazela ummoya ocwengileko, sicula iingoma zombuso ezisekelwe eBhayibhelini begodu silalela iinqophiso ezivela eBhayibhelini esizinikelwa bafowethu ababadala bebandla abakhethwe mumoya ocwengileko. Ummoya loyo usiza nabodadwethu bona bafeze kuhle izabelo zabo. Nokho nasizakuzuza ngokuzeleko emmoyeni ocwengileko kufuze silungiselele kuhle besiphendule esifundweni. Nasenza njalo, sizokuzuza esifundweni njengesikepe esinamatende aphakanyiselwe phezulu.

15. Ummoya ocwengileko usisiza njani emsebenzinethu wokutjhumayela?

¹⁵ Kwesithathu, hlanganyela emsebenzini wokutjhumayela. Nasisebenzisa iBhayibheli, emsebenzinethu wokutjhumayela, sivumela ummoya ocwengileko bona usisize. (Rom. 15:18, 19) Nawuzakuzuza ngokuzeleko emmoyeni kaZimu ocwengileko, kufuze uhlanganyele qobe emsebenzini wokutjhumayela bewusebenzise iBhayibheli ngendlela ongakghona ngayo. Enye indlela ongatjhumayela ngayo ngokuphumelelako kusebenzisa iintjumayelo ezisibonelo ezifumaneka encwajaneni, iPilo Nomsebenzi WobuKrestu.

16. Ngiyiphi indlela enqophileko esingafumana ngayo ummoya ocwengileko?

¹⁶ Yesine, thandaza kuJehova. (Mat. 7:7-11; Luk. 11:13) Indlela esingafumana ngayo ummoya ocwengileko kukuthi siwubawe kuJehova ngomthandazo. Akunalitho elingasikhandela bona sifumane ummoya kaZimu. Ummoya ocwengileko ungasisiza ngitjho nanyana sisejele begodu uSathana angekhe enza litho bona singawufumani ummoya loyo. (Jak. 1:17) Kufuze sithandaze njani nasizakuzuza ngokuzeleko emmoyeni ocwengileko? Bona siphendule umbuzo  lo, akhesifunde ngomthandazo osibonelo ofumaneka eVangelini lakaLukasi. *

17. Ngisiphi isifundo sokuthandaza esingasifunda emfanekisweni kaJesu okuLukasi 11:5-9, 13?

¹⁷ Funda uLukasi 11:5-9, 13. Umfanekiso kaJesu usitjengisa ukuthi kufuze siwuthandazele njani ummoya ocwengileko. Emfanekisweni lo, indoda yafumana ebeyikutlhoga ‘ngebanga lokuphikelela kwayo.’ Akhenge ikusabe ukubawa umnganayo bona ayisize ngitjho nanyana bekusebusuku. (Qala incwajana ethi, Ipilo Nomsebenzi WobuKrestu yango Julayi 2018.) UJesu wawusebenzisa njani umfanekiso lo nakakhuluma ngokuthandaza? Wathi: “Phikelelani nibawa, nizakuphiwa; phikelelani nifuna, nizakufumana; phikelelani nikokoda, nizakuvulelwa.” Lokhu kusifundisani? Kusifundisa ukuthi nasizakufumana ummoya ocwengileko kufuze siphikelele nasiwuthandazeleko.

18. Ngokomfanekiso kaJesu, kubayini singaqiniseka ngokuthi uJehova uzosipha ummoyakhe ocwengileko?

¹⁸ Umfanekiso kaJesu lo usisiza sibone ukuthi kubayini uJehova azosinikela ummoya ocwengileko. Indoda esemfanekisweni beyifuna ukusitlhogomela kuhle isivakatjhi sayo. Yeke yazizwa ikatelelekile ukusenzela ukudla nanyana sifike ebusuku kodwana beyinganalitho engamnikela lona. UJesu wathi umakhelwana waphendula indoda le ngokuyipha uburotho ngebanga lokuthi beyisolo iphikelela ngokubawa. Bekanqopheni uJesu? Nangabe umuntu onesono uzimisele ukusiza umakhelwanakhe ophikelelako, singaqiniseka ngokuthi uBabethu wezulwini uzobasiza labo abaphikelela ngokumbawa ummoya ocwengileko. Nje-ke singathandaza sinethemba lokuthi uJehova uzosiphendula msinyana nasimbawa ummoya ocwengileko.—Rhu. 10:17; 66:19.

19. Kubayini siqiniseka ngokuthi sizokukghodlhelela?

¹⁹ Singaqiniseka ngokuthi sizokukghodlhelela ngitjho nanyana uSathana angekhe alise ukusisahlela. Kubayini? Ngombana ummoya ocwengileko usisiza ngeendlela ezimbili. Kokuthoma, usinikela amandla wokukghodlhelela iintjhijilo. Kwesibili, umamandla asisiza bona siragele phambili silotjha uJehova besifike ephasini elitjha. Yeke asizimiseleni ukuzuza ngokuzeleko emmoyeni ocwengileko!