1-2. (a) Me yọ ha userhumu rẹn ọwan din ebẹnbẹn kẹdẹkẹdẹ? Dje yi fiotọre. (b) Me ye ne yono kpahen uvuẹn urhomu-ẹmro ọnana?

“MI RHE roro kpahen ebẹnbẹn mi fikparobọ ne, mi rheri taghene Jehova yọ ha userhumu mẹ fi aye kparobọ.” Wu ta omaran dẹ ne? Buebun ọwan i ta omaran dẹ ne. Ọkezẹko, wu tariẹ ọke we roro kpahen oborẹ wu ru sabu fi ebẹnbẹn emiamo, yanghene omiamiamo ohworho wu vwo ẹguọlọ kpahen ro hwuru kparobọ. Ọke we roro kpahen ebẹnbẹn na, wu rheri taghene wu sabu nyerẹn ghelie kẹdẹkẹdẹ, fọkime ẹhẹn ọfuanfon i Jehova ọ yẹruọ “omẹgbanhon rọ vrẹn ovwan.”—2 Cor. 4:7-9.

² Ọwan a ji hẹroso ẹhẹn ọfuanfon na nọ ha userhumu rẹn ọwan tiẹn ọhiẹn akpọ ọkon ọnana. (1 John 5:19) Habaye, a guọlọ omẹgbanhon ra na wọnrọn hasuẹ “ikpodje” na. (Eph. 6:12) Omarana, ene yono kpahen izede eva rẹ ẹhẹn ọfuanfon na ono ru ha userhumu rẹn ọwan nyerẹn ghele aruẹ ebẹnbẹn enana. Orho ru, ene yono kpahen oborẹ ene ruo na sabu mẹrẹn erere vuọnvuọn nyoma ẹhẹn ọfuanfon na.

3. Me yẹ izede owu ri Jehova o ru ha userhumu rẹn ọwan din ebẹnbẹn?

³ Ẹhẹn ọfuanfon i Jehova ọ ha userhumu rẹn ọwan, nyoma rọ yẹ ọwan omẹgbanhon ra na wian ewian ọwan gba udabọ ebẹnbẹn. Ọnyikọ Paul ọ mẹrẹnvwrurhe taghene ọye ọ sabu ga i Jehova rhọ udabọ ebẹnbẹn yen, fọkime ọ hẹroso “omẹgbanhon ọrẹ i Kristi na.” (2 Cor. 12:9) Uvuẹn owian imishọnari Paul ọreva, ọ dabu fiomarhọ owian aghwoghwo na jeghwai ruiruo omobọ rọ hẹrote omayen. Ọye o rhirhiẹ oghwa Aquila ọrhẹ Priscilla rọ ha uvuẹn i Corinth. Aye a bọn eghwọgbọ. Paul o ji rhe kpahen owian ọrana, no lelirẹ aye wian ibiọke. (Acts 18:1-4) Ẹhẹn ọfuanfon yọ yẹ i Paul  omẹgbanhon rọ ha ruiruo omobọ ye, jeghwai ghwoghwo iyẹnrẹn esiri na.

4. Lele oborẹ ọ ha uvuẹn 2 Corinthians 12:7b-9, obẹnbẹn ọgo yi Paul o vwori?

⁴ Se 2 Corinthians 12:7b-9. Me yi Paul ọ haye ta ọke rọ ta taghene ọye o vwo “uvwẹn” uvuẹn ugboma yen? Uvwẹn orho dumuo dẹ ne, nọ daji uvuẹn ugboma na, ọ miama omamọ. Omarana, Paul nọ ta taghene ọye ọ dẹrughwaroghwu obẹnbẹn omobọ. Ọye o se obẹnbẹn ọnana “ọmakashe Echu” rọ “ghwiẹ” ye (yanghene “kpe ye,” ekete ra djokarhọ). Ọkezẹko, rhẹ Echu yanghene ikpodje na yi suẹ ebẹnbẹn i Paul ri họhọ uvwẹn na-a. Ọrẹn, ọke ikpodje na a djokarhọ “uvwẹn” yen, ọkezẹko aye ni dabu dumie rhọye neneyo ọ miamo i Paul rhọ. Me yi Paul o ruru?

5. Marhẹ i Jehova ọ kpahenrhọ ẹrhomo i Paul lele?

⁵ Ọke ukaro, Paul ọ guọlọre ni Jehova o ti “uvwẹn” na nie. Nọ tare: “Ọgbesa yi mi rẹ Ọrovwori na [Jehova] . . . neneyo uvwẹn na ọ sabu nẹ omamẹ.” Ọrẹn, udabọ ẹrhomo i Paul, uvwẹn na o nẹ omaye-en. Ọnana no mevirhọ taghene Jehova ọ kpahenrhọ ẹrhomo i Pau-ul? Ẹjo. Ọ kpahenrhọ ẹrhomie. Jehova o tiẹ ebẹnbẹn i Paul nie-e, ọrẹn ọ yẹriẹ omẹgbanhon neneyo ọ sabu vwo edirin. Jehova nọ tare: “Mie ruẹ omẹgbanhon mẹ gba uvuẹn erhirhiẹ ovwiẹlẹme.” (2 Cor. 12:8, 9) Nyoma userhumu Osolobrugwẹ, Paul ọ sabu sẹrorẹ aghọghọ ọrhẹ ẹhẹn ro totọre!—Phil. 4:4-7.

6. (a) Marhẹ i Jehova ono ru kpahenrhọ ẹrhomo ọwan? (b) Imwẹro ego ri ha uvuẹn ekete i Baibol enana yọ yẹruọ omẹgbanhon?

⁶ Jerẹ Paul wu rẹ i Jehova dẹ ne, no simuo nẹ aruẹ obẹnbẹn owu? Orhianẹ udabọ ẹrhomo wu nẹren, obẹnbẹn na ọ ji havwiẹ yanghene tobọ biomu ghwẹ oborẹ ọ havwọ bi, we roro taghene oma ọ vwọ merhen i Jehova kpahuọ-ọn? Orho rhiomaran, karorhọ udje i Paul. Jerẹ oborẹ i Jehova ọ kpahenrhọ ẹrhomo i Paul, ọnọ ji kpahenrhọ ẹrhomo ọnọ! Ọkezẹko, Jehova o ti obẹnbẹn na nie-e. Ọrẹn nyoma ẹhẹn ọfuanfon na, ọnọ yọ omẹgbanhon wu na sabu vwo edirin. (Ps. 61:3, 4) Wu na sabu “se,” ọrẹn Jehova ọ sẹrerhumu jovwo-o.—2 Cor. 4:8, 9; Phil. 4:13.

7-8. (a) Izede ọgo yẹ ẹhẹn ọfuanfon na o ru họhọ aphẹrẹ? (b) Marhẹ i Peter o dje oborẹ ẹhẹn ọfuanfon na ọ wian lele?

⁷ Me yẹ izede ọrọrọ ẹhẹn ọfuanfon na o ru ha userhumu rẹn ọwan? Jerẹ oborẹ aphẹrẹ ro zuẹ uvuẹn urhie o ru lẹrhẹ urhie rọ wọnrọn zien, ẹhẹn ọfuanfon na ọnọ ha userhumu rẹn ọwan ga i Jehova rhọ udabọ ebẹnbẹn ra dẹrughwaroghwẹ ọke ọnana, ye te akpọ ọkpokpọ rẹ Osolobrugwẹ o vive kpahen rẹn ọwan.

⁸ Fọkime ọnyikọ Peter okpirherin, ọye nọ dabu tẹn ona owọ ẹghwa. Ọnana yọ soriẹ ọke ro dje kpahen owian ẹhẹn ọfuanfon na, ọ ha ẹmro ro surhobọmwu owọ ẹghwa ruiruo. Nọ tare: “Ovwo ọke owuorowu aruẹmẹrẹn o nẹ ọhọre onyakpọ rhe-e, ọrẹn ituakpọ i tẹmro ro nẹ obẹ Osolobrugwẹ rhe ọke rẹ ẹhẹn ọfuanfon na ọ ha aye ruiruo.” Ẹmro i Greek ra rhian rhẹ “ruiruo,” o mevirhọ “kpare lele oma.”—2 Pet. 1:21; ekete ra djokarhọ.

9. Me yi Peter ọ guọlọre nẹ ihworho i roro kpahen ọke rọ ta taghene ẹhẹn ọfuanfon na ọ ‘kpare ọwan lele oma’?

⁹ Me yi Peter ọ guọlọre nẹ ihworho i roro kpahen ọke rọ ta taghene ẹhẹn ọfuanfon na ọ ‘kpare ọwan lele oma’? Luke rọ ya ọbe i Acts, ọ ji ha aruẹ ẹmro i Greek owu ruiruo ọke ro dje kpahen ọkuna rẹ aphẹrẹ ọ kpara. (Acts 27:15) Ọgba irherhe owu nọ tare taghene ọke i Peter ọ ta taghene ẹhẹn ọfuanfon na ọ kpare ituakpọ lele oma, nọ ha “ẹmro ro sekpahen ihworho ra ghwa  ọkuna ruiruo.” Peter nọ haye ta taghene jerẹ oborẹ aphẹrẹ ọ kpare ọkuna dabu te ekete rọ nya, omaran ẹhẹn ọfuanfon na ọ kparẹ emẹraro ọrhẹ ihworho ri ya i Baibol na, nẹ aye i sabu wian owian aye gba. Ogba irherhe na nọ ji ta: “Emẹraro na i nyalele ọkpọvi ẹhẹn ọfuanfon na.” Jehova nọ wian owian ro terie. Ọ yẹrẹ aye “aphẹrẹ na,” yanghene ẹhẹn ọfuanfon na. Ihworho ri ya i Baibol na ni wian owian ro terẹ aye. Aye i wian lele ọkpọvi ẹhẹn ọfuanfon na.

10-11. Idjaghwẹ eva ego yo fori na kpare neneyo ẹhẹn ọfuanfon na ọ sabu ha ọwan ruiruo? Dje udje yi.

¹⁰ Itiọrurhomẹmro, Jehova ọ vwọ rhọ ha ẹhẹn ọfuanfon yi mwu ihworho ya i Baibo-ol. Ọrẹn, ọ ha ẹhẹn ọfuanfon na yẹ ihworho yi ọkpọvi. Jehova ọ ji ha ẹhẹn ọfuanfon na ruiruo. Marhẹ ono ru mwu ọwan ẹro taghene ẹhẹn ọfuanfon na o sun ọwan? O fori na rha wian owian ro terẹ ọwan. Marhẹ ene ruẹ ọnana lele?

¹¹ Roro kpahen udje ọnana. Neneyo ohworho rọ ghwa owọ ọ sabu mẹrẹn erere nẹ aphẹrẹ ro zuẹ uvuẹn urhie na, ono vi ruẹ ekwakwa eva. Ọrukaro, ọnọ ghwa owọ na lele ekete aphẹrẹ na o zuẹ nya. Orhianẹ ọrọ ghwa owọ na ọ daji ekete ewọ egbo rhọ ro seri nẹ ekete aphẹrẹ na orho zuẹ, ọ sabu ghwa riaro-o. Ọreva, ọnọ dabu rhie ewun ọduado rọ gba mwu owọ na firhọ. Itiọrurhomẹmro, owọ na ọnọ ghwa phẹrẹ, orhianẹ aphẹrẹ ọ dabu zuẹ ewun na. Omaran ọ ji havwọ, ana sabu rha ga i Jehova riarorhọ orhianẹ e rhiabọ dede userhumu ẹhẹn ọfuanfon na. Nẹ ẹhẹn ọfuanfon na ọ sabu ha userhumu rẹn ọwan, ana vi kpare idjaghwẹ eva. Ọrukaro, ene vi ru ekwakwa ẹhẹn ọfuanfon Osolobrugwẹ ọ guọlọre nẹ idibo yi ru. Ọreva, jerẹ owọ ro vwo ewun ọduado ra dabu rhie firhọ, o fori ne fiomarhọ irueruo enana lele oborẹ omẹgbanhon ọwan o teri. (Ps. 119:32) Arha kpare idjaghwẹ enana, ẹhẹn ọfuanfon na ọnọ yẹ ọwan omẹgbanhon re ne din ẹkparehaso ọrhẹ ebẹnbẹn, jeghwai ha userhumu  rẹn ọwan ga i Jehova bọmọke ana ruẹ akpọ ọkpokpọ na.

12. Me yẹ ọwan ine yono kpahen?

¹² E yono kpahen izede eva ne rẹ ẹhẹn ọfuanfon na o ru ha userhumu rẹn ọwan. Ẹhẹn ọfuanfon na ọ yẹ ọwan omẹgbanhon ọrhẹ userhumu ra guọlọre, na sabu vwo atamwu ọke ra ha erhirhiẹ ebẹnbẹn. Ẹhẹn ọfuanfon na ọ ji ha userhumu rẹn ọwan ga i Jehova rhọ, jeghwai wian owian rọ yẹrẹ ọwan rọ nọ lẹrhe ọwan vwo arhọ i bẹmẹdẹ. Vwana, ene yono kpahen ekwakwa ẹne ri na lẹrhẹ ọwan mẹrẹn erere nẹ userhumu ẹhẹn ọfuanfon na.

13. Lele oborẹ ọ ha uvuẹn 2 Timothy 3:16, 17, me yi Baibol na ọnọ sabu ru rẹn ọwan, me yẹ ọwan ine vi ru?

¹³ Ọrukaro, yono Ẹmro Osolobrugwẹ. (Se 2 Timothy 3:16, 17.) Ẹmro i Greek ra rhian rhẹ “ẹhẹn ọfuanfon Osolobrugwẹ yẹ a ha ya ye,” o mevirhọ taghene Osolobrugwẹ ọ ha ẹhẹn ọfuanfon na ruiruo. Osolobrugwẹ ọ ha ẹhẹn ọfuanfon na fiẹ iroro yi rhẹ ọmudu ihworho ri ya i Baibol na. Ọke erhe se i Baibol na ji roro kodo kpahen oborẹ e seri, ọkpọvi Jehova nọ ruẹ ẹhẹn ọrhẹ ọmudu ọwan. Ẹmro erana a lẹrhẹ ọwan nyerẹn akpọ ọwan no serhọ rhẹ ọhọre i Jehova. (Heb. 4:12) Ọrẹn na mẹrẹn erere vuọnvuọn nẹ ẹhẹn ọfuanfon na, ene fiẹ ọke rhotọre yono i Baibol na kẹdẹkẹdẹ ji roro kodo kpahen oborẹ e seri na. Omarana, Baibol na nọ nọ hobọte ọsoso oborẹ a ta jeghwai ruẹ.

14. (a) Mesoriẹ ana sabu ta taghene ẹhẹn ọfuanfon na ọ ha uvuẹn iyono ukoko ọwan? (b) Marhẹ ene ru mẹrẹn erere nẹ userhumu ẹhẹn ọfuanfon na uvuẹn iyono ukoko?

¹⁴ Ọreva, ga Osolobrugwẹ kugbe. (Ps. 22:22) Ana sabu ta taghene ẹhẹn ọfuanfon i Jehova ọ ha uvuẹn uyono ukoko ọwan. (Rev. 2:29) Mesoriẹ? Fọkime ọwan ọrhẹ Ilele Kristi erọrọ i rha vwoma kugbe ọrẹ ogame, na nẹrhomo na yẹ ọwan ẹhẹn ọfuanfon na, a so ijoro ukoko ra bọn kpahen i Baibol na, a jeghwai kerhọ ẹmro ra bọn kpahen i Baibol rẹ ehworhare ra ha mwu nyoma ẹhẹn ọfuanfon na a ha phia. Ẹhẹn ọfuanfon na yọ ji ha userhumu rẹn imizu emẹse mwuegbe ji ha ẹmro aye phia izede ro mwidjẹn. Ọrẹn, na sabu mẹrẹn erere nẹ ẹhẹn ọfuanfon na, o fori na dabu mwuegbe na sabu vwobọrhọ uyono na. Izede ọrana, na ha uphẹn rẹn ẹhẹn ọfuanfon na no suẹn ọwan.

15. Marhẹ ẹhẹn ọfuanfon na o ru ha userhumu rẹn ọwan uvuẹn owian aghwoghwo na?

¹⁵ Ọresa, vwobọrhọ owian aghwoghwo na. Arha ha i Baibol na ruiruo ọke re ghwoghwo jeghwai yono ihworho, ọwan a ha uphẹn rẹn ẹhẹn ọfuanfon na nọ ha userhumu rẹn ọwan uvuẹn owian aghwoghwo na. (Rom. 15:18, 19) Ne wu sabu mẹrẹn erere nẹ ẹhẹn ọfuanfon Osolobrugwẹ, wu ne vi vwobọrhọ owian aghwoghwo na ọke ephian jeghwai ha i Baibol na ruiruo ọke ro serhọ. Izede owu wu ne ru sabu ghwoghwo izede ro mwidjẹn, yẹ ọrẹ wu na ha udje ẹhaphia ri ha uvuẹn Ọbe-Owian Uyono Akpenyerẹn Ọrhẹ Iruo Uvie Na ruiruo.

16. Me yẹ izede kirighwo ene ru vwo ẹhẹn ọfuanfon na?

¹⁶ Ọrẹ ẹne, nẹrhomo vwe i Jehova. (Matt. 7:7-11; Luke 11:13) Izede kirighwo ene ru vwo ẹhẹn ọfuanfon na, yẹ ọrẹ ana nekpẹn yen mie Jehova ọrẹ ẹrhomo. O vwo oborẹ ọnọ sabu lẹrhẹ ẹrhomo ọwan je te obẹ i Jehova-a, habaye o vwo emru owuorowu tobọ te erhirhiẹ ekanron yanghene Echu, rọ nọ sabu lẹrhẹ ẹghẹlẹ orhorhomu ọrẹ ẹhẹn ọfuanfon na ri Jehova ọ tiobọnu no jo te ọwan obọ-ọ. (Jas. 1:17) Marhẹ ana nẹrhomo lele nẹ ẹhẹn ọfuanfon na ọ sabu ha userhumu rẹn ọwan? Na  kpahenrhọ ye, jene yono riarorhọ kpahen ẹrhomo, nyoma re ne roro kpahen udje owu rọ ha uvuẹn ọbe i Luke ọvo. *

17. Lele udje i Jesu rọ ha uvuẹn Luke 11:5-9, 13, me ya na sabu yono sekpahen ẹrhomo ẹnẹ?

¹⁷ Se Luke 11:5-9, 13. Udje i Jesu o dje oborẹ ana nekpẹn ẹhẹn ọfuanfon na lele uvuẹn ẹrhomo. Uvuẹn udje na, ọhworhare na ọ mẹrẹn oborẹ ọ guọlọ “fọkime o fiudugbere vwo erhionrin.” Dedevwo ọke o se ne omamọ, ofẹn o mwuie rọ nọ nekpẹn userhumu mie ugbehian ye-en. (Se ọbe uyono ro sekpahen Luke 11:8, rọ ha uvuẹn mwb18 July.) Marhẹ i Jesu o ru surhẹ udje ọnana mwu ẹrhomo ẹnẹ? Nọ tare: “Are i rha nọ, nẹ ana yẹ are; are i rha guọlọ, are ni na mẹrẹn; are i rhe fomu ighwe, nẹ ene je yi rẹn are.” Omarana, me yẹ ọnana o yonirin ọwan? Na sabu vwo ẹhẹn ọfuanfon na, ene vi fiudugbere nekpẹn yen rhẹ erhionrin.

18. Lele oborẹ udje i Jesu o djephia, mesoriẹ o mwu ọwan ẹro taghene Jehova ọnọ yẹ ọwan ẹhẹn ọfuanfon ọnẹyen?

¹⁸ Udje na ọ ji ha userhumu rẹn ọwan mẹrẹn oborẹ ọsoriẹ i Jehova ọnọ yẹ ọwan ẹhẹn ọfuanfon na. Ọhworhare uvuẹn udje i Jesu na, ọ guọlọ hẹrote ọpha ro brurie rhe. O rheri taghene o fori nọ yẹ ọpha na emaren, ọrẹn o vwo oborẹ ọnọ yẹ ye-e. Udje na o djephia taghene ugbehian yen, ọ yẹriẹ emaren fọkime o fiudugbere hobọ fomu ighwe na ọke jijiri. Me yi Jesu ọ guọlọre ne yono? Orhianẹ onyakpọ rọ vwọ gba o mwuegbe rọ nọ ha userhumu rẹn ọreva ye ro fiudugbere rẹ ye, o fori ne vwo imwẹro taghene Jehova ọnọ ha ẹhẹn ọfuanfon rẹn ihworho ri fiudugbere nekpẹn yen rhẹ erhionrin! Omarana, o fori na nẹrhomo jeghwai vwo imwẹro taghene Jehova ọnọ yẹ ọwan ẹhẹn ọfuanfon ọnẹyen.—Ps. 10:17; 66:19.

19. Mesoriẹ ono mwu ọwan ẹro taghene ana sabu fikparobọ?

¹⁹ E vwo imwẹro taghene ana sabu fi Echu kparobọ. Mesoriẹ? Fọkime ẹhẹn ọfuanfon na ọnọ ha userhumu rẹn ọwan nyoma izede eva. Ọrukaro, ọnọ yẹ ọwan omẹgbanhon ra guọlọre na sabu fi ebẹnbẹn kparobọ. Ọreva, ọnọ yẹ ọwan omẹgbanhon re ne ru riarorhọ uvuẹn ogame i Jehova ne ki te akpọ ọkpokpọ na. Jene brorhiẹn ra na mẹrẹn erere vuọnvuon nẹ userhumu ẹhẹn ọfuanfon na!