1-2. (a) Ngera sebechel ngosukid loutekangel a ringel er a bek el sils? Mosaod. (b) Ngera kede mo mesaod er tia el suobel?

NGMLA ta el molatk er chouaitia el tekoi el kmo, “Sel kulatk aike el ringel el kchilarm er ngii, e ak mera el kongei el kmo ngdimlak el sebechel di klisichek e uluutekangel.” A rebetok er kid a mla chormii tia el tekoi. Ke locha dulii tiang er a uriul er a omolatk el kirel a secher me a lechub e ngkodellel a betik er a rengum el mlo sebechem loutekangel er ngii. Me sel molatk aikang, e ke mo medengei el kmo ngmle sebechem loutekangel er a bek el sils e le ngsel ‘klou el klisichel’ a chedaol reng er a Jehovah a uchul.​—2 Ko. 4:7-9.

² Kede dirrek lousbech er a chedaol reng el ngosukid el mo oltngakl a omengesuseu er tia el mekngit el beluulechad. (1 Jn. 5:19) Me a lmuut el tang, kede ousbech a klisiich el mo omtok “a ikel mekngit el chelid.” (Efe. 6:12) Me chelechang e kede mo mesaod a eru el rolel e a chedaol reng a ngosukid el mo outekangel aika el rokui el mondai. E a uriul e kede mo mesaod a tekoi el sebeched el meruul me bo dengai a klungioled er a chedaol reng er a Dios.

3. Ngera ta el rolel e a Jehovah ngosukid loutekangel a ringeled?

³ A chedaol reng er a Jehovah a ngosukid lokiu sel lebeskid a klisiich, me ngmo sebeched el remuul a rokui el tekoi el kired el meruul alta e kede chelebangel a ringel. A apostol Paulus a melatk el kmo ngmlo sebechel melemolem el mesiou er a Jehovah lokiu a “klisichel a Kristus” alta e ngchilarm er a betok el ringel. (2 Ko. 12:9) Ngar sel ongeru el omerollel er a klemissionari, e ngmle blak a rengul el meruul er a omesiungel e dirrek el uluureor me bo lsebechel di ngii el mesiou er ngii. Ngkiliei lobengkel a Akuila me a Prisila er a beluu er a Korinth. Tirkang a mle chad er a omeruul tento. E ngii el Paulus a dirrek el mirruul a tento me nguluureor lobengterir a lebebil er a sils. (Rel. 18:1-4) Me a chedaol reng a milsa klisichel a Paulus me ngmlo  sebechel el mengereker e osisiu el taem e ngchurrengelii a omesiungel.

4. A doltirakl er a 2 Korinth 12:7b-9, e ngera el mondai a lechilarm er ngii a Paulus?

⁴ Monguiu er a 2 Korinth 12:7b-9. A doltirakl aika el bades, e ngera mle belkul a tekingel a Paulus er a ledu el kmo ngmla er ngii a “toched” er a bedengel? Kid a medengei el kmo ngkmal meringel a bedenged a lsekum ngar ngii a toched er ngii. Me a belkul a tekingel a Paulus a kmo, ngmla er ngii a tekoi el lechilarm er ngii. Ngmilsaod er ngii el toched el kmo ngtekoi el “luleba Satan el oldechelakl” er ngii. Me alta e a Satan me a lechub a remekngit el anghel er ngii a locha dimlak luchul a mondai er a Paulus el ua loldubech er a toched lolsiseb er ngii er a bedengel. Engdi sera bo lodengelii a mondai er a Paulus, e te mlo melasem el lousbech er ngii el lmuut lomekringel er ngii. Me ngmilekera Paulus?

5. Ngoeak a ngera el rolel e a Jehovah a ulenger a nglunguchel a Paulus?

⁵ A kot luchul, e a Paulus a mle soal a Jehovah a lenguu a “toched” er a bedengel el choridii. Ngdilu el kmo: “Ng edel kulengit er a Rubak [Jehovah] me le nguu tial choridii er ngak.” Me nguaisei el mlo betok el loluluuch a Paulus, engdi a toched er a bedengel a di millemolem el ngar ngii. Me tiang, ngbelkul a kmo a Jehovah a dimlak longer a nglunguchel? Ngdiak leuaisei, ngulenger a nglunguchel. A Jehovah a dimlak lecheridii tia el mondai, ngbai milsa klisichel a Paulus me ngmlo sebechel loutekangel er ngii. A Jehovah dilu el kmo: “Ele klisichek a mengal mo chemolt er a chelitechetul a chad.” (2 Ko. 12:8, 9) Me nguleak a klisichel a Dios, e a Paulus a mle sebechel melemolem loba deurreng e budech a rengul!​—Fil. 4:4-7.

6. (a) Nglocha mo uangera longer a nglunguched a Jehovah? (b) Ngera el telbiil el ngar aika el bades a smisichau?

⁶ Me kau, ngmla ta el molengit er a Jehovah me lenguu a ringelem el oridii el ua Paulus? Alta e ngmla mo betok el taem el moluluuch lolengit engdi a mondai er kau a dirk melemolem me a lechub e ngbai mengal mo meringel. Tiang rullau el mo omdasu el kmo a Jehovah a locha diak el deu a rengul er kau? A leuaisei, e bo molatk er a kerebil a Paulus. A Jehovah a ulenger a nglunguchel a Paulus, me Ngulterekokl el mo onger a nglunguchem! A Jehovah a locha diak bo lenguu a mondai er kau el oridii. Engdi ngokiu a chedaol reng er ngii e ngmo meskau a klisiich el mousbech er ngii el outekangel er ngii. (Psa. 61:3, 4) Ke locha “mo meringel el metemall,” engdi a Jehovah a kmal diak bo lechitau.​—2 Ko. 4:8, 9; Fil. 4:13.

7-8. (a) Ngokiu a ngera el rolel e a chedaol reng a di ua eolt? (b) A Petrus, ngmilekera er a losaod er a rolel a loureor a chedaol reng?

⁷ Ngera lmuut el ta er a rolel e ngolengeseu er kid a chedaol reng? Ngsebeched lomekesiu er a chedaol reng el mora eolt. A diall a sebechel lousbech er a eolt el oldubech er ngii me ngmerael bedul sel kirel mo er ngii alta e ngmeringel a daob. Me ngdi osisiu, a chedaol reng a ngosukid me kede melemolem el mesiou er a Jehovah el mo lmuut er a bo desiseb er sel telbiil el beches el beluulechad er ngii, alta e kede chuarm a ringel er chelechang.

⁸ A apostol Petrus a mle chad er a omenged me ngmle medengei a betok el tekoi el kirel a domekall er a daob. Tiaikid a locha mle uchul me sel losaod er a rolel a loureor a chedaol reng, e nguluusbech a okesiu el kirel a bekall er a daob. Ngmilluches el kmo: “Ng dimlak a tal ulaoch el mei el di uleak sel soal a chad. Tirkel chad el uluuchais a klumech el mlar a Dios el mei a meltuchel er a Chedaol Reng er a lolekoi.” Me a tekoi er a Grik el “meltuchel” a belkul a kmo “obengkel el merael.”​—2 Pe. 1:21.

9. Ngera lokesiu a luluusbech er ngii a Petrus er a losaod er a tekoi el “obengkel el merael”?

⁹ Ngera el okesiu a luluusbech er ngii a Petrus el mesaod er a tekoi el “obengkel el merael”? A osisiu el tekoi er a Grik a luluusbech er ngii a Lukas el ngike el milluches er a babier er a Rellir, el mesaod er a diall el “ulebengkel a eolt” el merael. (Rel. 27:15) Me sel taem el Petrus a milsaod el kmo a remilluches er a Biblia a ‘ulebengkel el merael,’ e  nguluusbech a “kmal ungil okesiu” el kirel a tekoi er a daob, el ua lolekoi a ta el chellimosk er a Biblia. Me a belkul a tekingel a Petrus a mesaod el kmo ngdi ua diall el loloko er ngii a eolt me ngmerael er a omerollel, me tirke el profet me a remilluches er a Biblia a ua lurrael el obengkel a chedaol reng e mlo sebechir el churrengelii a urerir. Me ngike el osisiu el chellimosk er a Biblia a omekesiu er ngii el kmo, a remilluches er a Biblia a di ua ears el mla mengerd a resel. Me te mla mo kltmokl el mo meruul er a ureor el chedaol reng a omekrael er tir el mo meruul er ngii. Me a Jehovah a riruul aike el mle kirel el meruul el milsterir a “eolt” me a lechub e ngchedaol reng. E a remilluches er a Biblia a riruul a ngerachel el mloterekokl er tir. Te uluureor el oltirakl a ulekrael el mlo er tir lokiu a chedaol reng.

10-11. Ngera eru el tekoi el kired el remuul me bo lsebechel a chedaol reng lomekrael er kid? Mosaod.

¹⁰ Ngmera el tekoi, chelecha el taem e a Jehovah a mla mo diak lousbech er a chedaol reng er ngii lomekrael er a rechad el mo meluches a Biblia. Me nguaisei, engdi a Jehovah a dirk ousbech er a chedaol reng er ngii lomekrael er a remesiungel. Ngdirk meruul er a urerel. Me ngmekera e mo ulterekokl a rengud el kmo a chedaol reng a omekrael er kid? Ngkired el melemolem el meruul aike el tekoi el moterekokl er kid. Me ngmekera doruul er tiang?

¹¹ Me domekesiu er tiang. A chad el ouears a kirel remuul a eru el tekoi a lsekum ngsoal nguu a klungiolel er a eolt. A kot, e ngkirel nguu a mlil el mora basio el ngar ngii a eolt. E le mlil a diak lsebechel merael a lsekum ngdi ngar a kerodel el cheroid er sel basio el loloko er ngii a eolt. E a ongerung, e ngkirel mo ungil ngmerd a resel. Kede medengei el kmo a lsekum a eolt a meloko, e a mlil a di mo sebechel merael a lsekum a resel a medoko er a eolt. Me ngdi osisiu, ngmo sebeched el melemolem el mesiou er a Jehovah a lsekum a chedaol reng a olengeseu er kid. Me a lsoad el nguu a klungioled er a chedaol reng, e ngkmal kired el meruul a eru el tekoi. A kot, e ngkmal kired el meruul a tekoi el chedaol reng er a Dios a omekrael er kid el mesiungel el mo meruul. E a ongerung, e ngkired el “ngmerd a resel a mlid” el belkul a kmo kede  mora tkurrebab el sebeched el meruul aika el tekoi. (Psa. 119:32) A bo deuaisei, e a chedaol reng er a Dios a mo olengeseu er kid er a chelsel a ultok me a omelsemai e dirrek el ngosukid el mo blak a rengud el outekangel e merael er tia el rael el mo soiseb er a beches el beluulechad er a Dios.

12. Kede mo mesaod a ngerang er chelechang?

¹² Me chelechang e kede mla smaod a eru el rolel e ngolengeseu er kid a chedaol reng. Tiang a meskid a klisiich e dirrek el ngosukid me kede melemolem loba blakerreng sel bo dechelebangel a ringel. Tia el chedaol reng a dirrek el omekrael e olengeseu er kid el meruul er a ureor el Jehovah a soal a doruul er ngii e dirrek el mo uchul a diak a ulebengelel el klengar. Me chelechang e bo dosaod a eua el tekoi el kmal kired el meruul me bo dengai a klungioled er tia el chedaol reng er a Dios.

13. A doltirakl er a 2 Timothy 3:16, 17, e ngera ngrullii er kid a Bades? Engdi ngera kired el meruul?

¹³ A kot, mosuub er a Tekingel a Dios. (Monguiu er a 2 Timothy 3:16, 17.) A Dios a uluusbech er a chedaol reng er ngii el ‘dmokou’ a tekingel el osiseb er a uldesuir a remilluches er a Biblia. Me sel donguiu er a Biblia e dolebedebek a tekoi el donguiu, e ngme soiseb er a uldesued me a rengud a ulekrael er a Dios. E aika el mlukrael el uldesuel a rullid me ngmo soad el melodech a blekerdelel a klengar er kid el mo oldeu er a rengul a Jehovah. (Heb. 4:12) Engdi a lsekum ngsoad el mo ngmai a klungioled er a chedaol reng er a Dios, e ngkmal kired el blechoel el mengoit a temed el mesuub er a Biblia e dirrek el mo dmolech el melebedebek a tekoi el donguiu. Seikid e a Tekingel a Dios a mo mocholt lokiu a tekinged me a dirrek el omerelled.

14. (a) Ngera uchul me ngsebeched el melekoi el kmo a chedaol reng a ngar aike el miting er a ongdibel? (b) Ngera ngosukid el mo ungil ngmai a klungioled er a chedaol reng sel debo er aike el miting er kid?

¹⁴ A ongerung, mdak el mengull er a Dios. (Psa. 22:22) A chedaol reng er a Jehovah a ngar aike el miting er a ongdibel er kid. (Och. 2:29) Ngera uchul me ngsebeched el melekoi el uaisei? E le sel bo dedak kid me a rekldemed el Kristiano e dongull er a Dios, e kede meluluuch lolengit er a chedaol reng er ngii, e mengitakl a chelitakl er a Renged el mengai a uchetemel er a Tekingel a Dios, e dirrek el orrenges a cheldecheduch el mengai a uchetemel er a Biblia el loltobed a rudam el tir a mla mengilt lokiu a chedaol reng er a Dios. E tia el osisiu el chedaol reng a ngosuterir a rudos el mo ungil kltmokl e oltobed a cheldechedecherir. Me nguaisei, engdi a lsekum ngsoad el mo ungil ngmai a klungioled er a chedaol reng, e ngkired el mei er a miting el kltmokl el mo teloi er ngii. Ngokiu tiaikid el rolel e kede ngar a miting el ua mlai el mla mengerd a resel me ngmeloko er ngii a eolt.

15. Ngoeak a ngera el rolel e a chedaol reng a olengeseu er kid er a ureor er a berkel a klumech?

¹⁵ A ongedei, bom teloi er a ureor er a berkel a klumech. Sel dousbech er a Biblia el omerk e olisechakl er a rechad, e kede mecherei a chedaol reng me ngomekrael er a omesiunged. (Rom 15:18, 19) Me a lsoad el mo ngmai a klungioled er a chedaol reng er a Dios, e ngkmal kired el mo blechoel el teloi er a ureor er a berkel a klumech e dirrek lousbech er a Biblia er a bek el techall. A ta er a rolel e ngsebeched el rullii a omesiunged el mo er ngii a belkul, a okiu sel dousbech a rolel a domuchel a cheldechedechad el ngar a Subeled er a Miting er a Klengar er Kid me a Omesiunged.

16. Ngera kot el ngarbab el rolel e kede nguu a ngeso er a chedaol reng?

¹⁶ A ongeuang, moluluuch el mora Jehovah. (Mt. 7:7-11; Lk. 11:13) A kot el ngarbab el rolel e kede nguu a ngeso er a chedaol reng, a sel dolengit er ngii er a Jehovah lokiu a nglunguuch. Ngdiak a ngii di el tekoi el sebechel torebengii a nglunguched me lak lerengesii a Jehovah me a lechub e ngtorob a ungil sengk lokiu a chedaol reng er a Dios me lak dengai, ngmo lmuut er a kbekbel a kelebus me a dirrek el Satan. (Jak. 1:17) Ngoeak a ngera el rolel a doluluuch e ngmo sebeched el ngmai a klungioled er a chedaol reng er a Dios? Kede mo onger er tiang lokiu sel bo dosaod er a  okesiu el kirel a nglunguuch el di medung er a Ebangkelio er a Lukas. *

17. Ngera klubeled el denguu er a nglunguuch el ngar a okesiu er a Jesus el medung er a Lukas 11:5-9, 13?

¹⁷ Monguiu er a Lukas 11:5-9, 13. A okesiu er a Jesus a ochotii a rolel e kede meluluuch lolengit er a chedaol reng er a Dios. Ngar tia el okesiu, e a chad a ngilai aike el lousbech ‘ele ngii el dimlak le mekimd el di olengit.’ Ngdimlak lemedakt lolengit a ngeso er a sechelil alta e ngkmal mla mo osoi. (Momes er a reference el ngar a mwb er a July 2018 el kirel a Lukas 11:8.) Me a Jesus ngdilu el kmo ngerang el kirel tia el okesiu? Ngdilu el kmo: “Molengit me mngai; e mosiik me bo betik, e molngod er a chesimer me le mengai el kiriu.” Me ngera kede suubii er tiang? A lsoad el nguu a ngelsuil a chedaol reng, e ngkmal kirel el diak demekimd el meluluuch.

18. A doltirakl er a okesiu er a Jesus, e ngera uchul me ngulterekokl a rengud el kmo a Jehovah a mo meskid a chedaol reng er ngii?

¹⁸ A okesiu er a Jesus a dirrek el ngosukid el mo medengelii sel uchul me a Jehovah a mo meskid a chedaol reng er ngii. Ngike el chad el ngar a okesiu a kmal mle soal mo ungil lomekerreu er a okiak er ngii. Ngmillatk el kmo ngkirel msang a kelel er sel taem er a lemei er a blil er a osoi engdi ngdimlak a ngerang er a blil. A Jesus a milsaod el kmo ngike el sechelil a milsang a blauang e le ngii el dimlak lemekimd el olengit. Me ngera ngolisechakl er ngii a Jesus? A lsekum a diak el cherrungel el chad a kongei el ngosuir a chad el diak lemekimd lolengit, e ngulterekokl a rengud el kmo ngika el betik a rengul el Demad el ngar a eanged a ngosuterir tirke el diak lemekimd lolengit er a chedaol reng er ngii! Me a leuaisei, e ngsebeched el meluluuch el mora Jehovah e ulterekokl a rengud el kmo ngmo onger a nglunguched sel dolengit er a chedaol reng er ngii.​—Psa. 10:17; 66:19.

19. Ngera me ngulterekokl a rengud el kmo ngsebeched el outekangel?

¹⁹ Me ngulterekokl a rengud el kmo ngsebeched loutekangel alta e a Satan a diak lemeterob lomekcharm er kid. E ngera uchul? E le chedaol reng er a Dios a ngosukid lokiu a eru el rolel. A kot, e ngmeskid a klisiched el mo sebeched el outekangel a mondai er kid. E a ongerung, tiang a klisiich el sebechel ngosukid me kede melemolem el mesiou er a Jehovah el mo lmuut er a bo desiseb er a beches el beluulechad. Mada detib a rengud el mo ungil ngmai a klungioled er a ngelsuil a chedaol reng er a Dios!