1-2. (a) Waut halpt ons, daut wie jieda Dach uthoolen kjennen? Laj daut ut. (b) Waut woa wie en disen Artikjel seenen?

MUST du mol met eenen Trubbel foadich woaren, wua du lota sätst: “Ekj wudd daut kjeenmol haben kunt auleen derchsaten”? Väle haft daut soo jegonen. Veleicht wieescht du schwoa krank ooda doa wia wäa jestorwen, waut du väl jeräakjent hast. Un wan du nu trigjdenkjst, dan späat sikj die daut soo, daut du daut bloos uthoolen kust, wiels Jehova sien heilja Jeist die jieda Dach “jeistliche Krauft” jeef (2. Kor. 4:7-9).

² Wie brucken dän heiljen Jeist uk, daut wie jäajen dise schlajchte Welt stonen kjennen (1. Joh. 5:19). Un wie motten jäajen “jewaultje, beese Jeista” kjamfen (Efs. 6:12). Nu woa wie tweeatlei seenen, woo de heilja Jeist ons met aul dise Schwierichkjeiten halpt. Un dan woa wie doavon räden, waut wie doonen kjennen, daut de heilja Jeist ons daut mieeschte nuzt.

3. Waut es eent, woo Jehova ons halpt, met onse Schwierichkjeiten foadich to woaren?

³ Jehova sien heilja Jeist jeft ons de Krauft, ooda stoakjt ons, daut wie daut nokomen kjennen, waut wie sellen, wan wie uk Schwierichkjeiten haben. Dän Apostel Paulus späad sikj daut soo, daut hee Jehova wieda deenen kunn, wan hee uk Trubbels haud, wiels hee sikj opp “Christus siene Krauft” veleet (2. Kor. 12:9). Opp siene tweede Missionsreis deed Paulus väl prädjen, oba hee schauft uk, om sien Läwen to moaken. Aus hee en Korint wia, bleef hee bie Aquilla un Priszilla. Dee deeden Zelten moaken un wäajen Paulus sikj uk met soont vestunt, schauft hee jewesse Doag met dee toop (Apj. 18:1-4). De heilja Jeist jeef Paulus de Krauft toom schaufen un uk sienen Deenst moaken.

4. Met waut haud Paulus no 2. Korinta 12:7-9 no to kjamfen?

 ⁴ Läs 2. Korinta 12:7-9. Waut meend Paulus, aus hee säd, daut hee met “een[en] Stachel en daut Fleesch” to kjamfen haud? Wan eena wua eenen Stachel, ooda Spekja, haft, dan deit daut sea wee. Daut jeft auntovestonen, daut Paulus irjenteenen Trubbel haud, waut am sea toosad. Hee säd, dis Trubbel wia “een Enjel von Soton”, waut am “schlonen” deed. De Soton ooda de beese Jeista haben disen Trubbel woomäajlich nich veuasoakt. Oba aus dee enworden, daut Paulus eenen Trubbel haud, proowden dee veleicht, daut noch schlemma to moaken un soo to sajen dän Stachel noch deepa nentodrekjen. Waut deed Paulus met sienen Trubbel?

5. Woo beauntwuad Jehova Paulus siene Jebäda?

⁵ Aum Aunfank wull Paulus, daut Jehova am disen “Stachel” wajchnämen sull. Hee säd: “Ekj hab dän Harn [Jehova] dree mol . . . aunjehoolen, daut mie dee veloten mucht.” Oba de Stachel bleef doawäajen doa. Bediet daut, daut Jehova nich no Paulus siene Jebäda jehorcht haud? Gaunz secha nich. Jehova deed dee beauntwuaten. Hee neem dän Trubbel nich wajch, oba hee jeef Paulus de Krauft, daut uttohoolen. Jehova säd: “Miene Krauft es en schwake Menschen stoakj” (2. Kor. 12:8-9). Un wiels Gott am holp, kunn Paulus siene Freid hoolen un ennalich Fräd haben (Filip. 4:4-7).

6. (a) Woo kaun Jehova onse Jebäda beauntwuaten? (b) Woo stoakjen de Bibelvarzh die, waut hia aunjejäft sent?

⁶ Hast du Jehova uk mol jeprachat, daut hee die eenen Trubbel wajchnämen sull? Veleicht deetst du foaken bäden, oba daut wort nich bäta ooda mau rajcht oaja. Dochst du dan, daut Jehova die woomäajlich nich mea jleicht? Dan kaun Paulus sien Biespel die halpen. Krakjt soo aus Jehova Paulus siene Jebäda beauntwuaten deed, woat hee diene uk! Veleicht nemt Jehova die dienen Trubbel nich wajch. Oba hee woat die derch sienen heiljen Jeist de Krauft jäwen, daut du uthoolen kaust (Psa. 61:4-5). Veleicht woascht du “unjadrekjt [woaren]”, oba Jehova woat die nich veloten (2. Kor. 4:8-9; Filip. 4:13, Friesenbibel).

7-8. (a) En waut fa Stekjen es de heilja Jeist soo aus een Wint? (b) Woo muak Petrus daut dietlich, woo de heilja Jeist schauft?

⁷ Woo halpt de heilja Jeist ons noch? Dee es soo aus een Wint, waut een Schepp opp daut orruje Mäa no de rajchte Rechtunk drift, un kaun ons bat de vesproakne niee Welt driewen, wan wie uk groote Trubbels haben.

⁸ Wäajen de Apostel Petrus een Fescha wia, kjand dee sikj ut met Säajelschäp. Veleicht brukt hee doawäajen Wieed, waut met soone Schäp to doonen hauden, aus hee doavon räd, woo de heilja Jeist schauft. Hee schreef: “Profeetie es nich waut, daut een Mensch sikj selfst utdenkjt; daut wia de Heilja Jeist en dise Menschen, dee an jeef, waut see von Gott räden sullen.” Daut griechische Wuat, waut hia met “jeef” äwasat es, jeft auntovestonen, daut de heilja Jeist dise Menschen dreef (2. Pet. 1:21).

9. Waut jeef Petrus auntovestonen, aus hee säd, daut de heilja Jeist de Menschen dreef?

⁹ Waut fa een Jlikjnis brukt Petrus, aus hee säd, daut de heilja Jeist de Menschen dreef? Aus Lukas de Aposteljeschicht oppschreef, brukt hee meist dautselwje griechische Wuat toom sajen, daut een Schepp sikj “vom Wint driewen [leet]” (Apj. 27:15). Doawäajen säd een Bibeljelieeda, daut Petrus “een feinet Jlikjnis von Schäp” brukt. Petrus jeef auntovestonen,  daut de heilja Jeist de Bibelschriewa un de Profeeten dreef, daut see äare Oppgow doonen kunnen, krakjt soo aus de Wint een Schepp no de rajchte Rechtunk drift. Deeselwja Jelieeda säd uk noch: “De Profeeten muaken soo to sajen äare Säajlen op.” Jehova deed sien Poat. Hee kjeem doafäa opp, daut doa “Wint”, ooda heilja Jeist, wia. Un de Bibelschriewa deeden uk äa Poat, wiels dee sikj von dän heiljen Jeist leiden leeten.

10-11. Waut fa twee Sachen mott wie doonen, daut de heilja Jeist ons leiden kaun? Met waut jeit daut to vejlikjen?

¹⁰ Vondoag dän Dach brukt Jehova dän heiljen Jeist nich mea toom Bibelbieekja oppschriewen loten. Oba hee brukt dän noch emma toom siene Deena leiden. Jehova deit noch emma sien Poat. Woo kaun sien Jeist ons togood komen? Wie motten doano seenen, daut wie ons Poat doonen. Woo kjenn wie daut?

¹¹ See wie mol een Biespel. De Scheppmana motten twee Sachen doonen, daut de Wint an togood kjemt. Ieeschtens motten dee doano seenen, daut äa Schepp doa es, wua de Wint weit. Daut Schepp woat je nich wiedakomen, wan daut aun eenen Howen blift, wua nich väl Wint es. Tweedens motten dee de Säajlen no Hecht trakjen un soo wiet aus mäajlich opmoaken, wiels de Wint kaun je daut Schepp bloos dan driewen, wan dee en de Säajlen nenpust. Wie kjennen Jehova bloos dan wiedadeenen, wan de heilja Jeist ons halpt. Un biejlikj soo aus de Scheppmana mott wie twee Sachen doonen, daut ons dee togood kjemt. Ieeschtens mott wie doano seenen, daut wie doa sent, wua de heilja Jeist es, un daut doonen, wua dee ons too aunleit. Un tweedens mott wie soo to sajen onse Säajlen soo wiet aus mäajlich opmoaken un daut, wua de heilja Jeist ons too aunleit, soo goot nokomen, aus wie kjennen (Psa. 119:32). Dan woat de heilja Jeist ons de Krauft jäwen, daut wie Jehova wieda tru  deenen kjennen bat de niee Welt kjemt, wan wie nu uk Trubbels un Jäajenstaunt haben.

12. Waut woa wie nu seenen?

¹² Bat nu hab wie tweeatlei jeseenen, woo de heilja Jeist ons halpt. Dee jeft ons Krauft un halpt ons, en schwoare Tieden tru to bliewen. De heilja Jeist drift ons uk un halpt ons, opp dän Wajch to bliewen, waut no daut eewje Läwen fieet. Nu woa wie veatlei seenen, waut wie doonen motten, daut de heilja Jeist ons daut mieeschte halpt.

13. (a) Waut kaun de Schreft no 2. Timotäus 3:16-17 no aun ons doonen? (b) Waut mott wie doonen?

¹³ Ieeschtens: Studia Gott sien Wuat (läs 2. Timotäus 3:16-17). Daut griechische Wuat, waut hia äwasat es met “von Gott jejäft” bediet “von Gott enjepust”. Gott brukt sienen Jeist, om de Bibelschriewa soo to sajen siene Jedanken entopusten. Wan wie de Schreft läsen un doaräwa nodenkjen, dan kjennen Gott siene Jedanken un Aunwiesungen waut aun ons denkjen un ons Hoat doonen. Dee brinjen ons bat doa, ons Läwen to endren, daut wie Gott jefaulen kjennen (Heb. 4:12). Oba daut de heilja Jeist ons daut mieeschte halpen kaun, mott wie ons Tiet nämen toom pinkjlich de Schreft studieren un doa goot äwa nodenkjen. Daut woat ons halpen, daut wie ons bie aules, waut wie sajen un doonen, no Gott sien Wuat rechten.

14. (a) Wuarom kjenn wie sajen, daut bie onse Toopkomes soo to sajen de Wint pust? (b) Waut mott wie doonen, daut onse Säajlen bie de Toopkomes gaunz op sent?

¹⁴ Tweedens: Bäd Gott met diene Gloowesbreeda toop aun (Psa. 22:23). Bie onse Toopkomes pust soo to sajen de Wint, wäajen doa Jehova sien Jeist es (Opb. 2:29). Wuarom kjenn wie daut sajen? Wan wie ons met onse Gloowesbreeda vesaumlen, dan bäd je wie om dän heiljen Jeist un sinjen Kjennichrikjsleeda, waut sikj opp Gott sien Wuat stetten, un kjrieen biblischen Rot von Breeda, waut derch dän heiljen Jeist aunjestalt worden. Un deeselwja heilja Jeist halpt uk de Sestren, daut dee äare Oppgowen reedmoaken un väabrinjen kjennen. Oba daut de heilja Jeist ons daut mieeschte halpen kaun, mott wie ons fa de Toopkomes reedmoaken un doa uk Auntwuaten jäwen. Wan wie daut doonen, dan moak wie soo to sajen onse Säajlen gaunz op.

15. Waut mott wie doonen, daut de heilja Jeist ons biem prädjen halpt?

¹⁵ Dreddens: Doo prädjen. Wan wie biem prädjen un lieren de Schreft brucken, dan lot wie ons en onsen Deenst von dän heiljen Jeist halpen (Reem. 15:18-19). Oba daut dee ons daut mieeschte halpen kaun, mott wie räajelmässich prädjen un soo foaken aus mäajlich de Schreft brucken. De Iedeeen toom prädjen en ons Schoolheft fa Läwen un Deenst sent eene Help, daut wie ons em Deenst vebätren kjennen.

16. Waut es de baste Wajch toom dän heiljen Jeist kjrieen?

¹⁶ Vieedens: Bäd to Jehova (Mat. 7:7-11; Luk. 11:13). De baste Wajch, woo wie dän heiljen Jeist kjrieen kjennen, es, wan wie Jehova doarom bäden. Nuscht kaun doa mankspälen, daut Jehova nich no onse Jebäda horcht un ons dän heiljen Jeist jeft, nich mol de Soton ooda Menschen, waut ons em Jefenkjnis stoppen (Jak. 1:17). Woo sell wie bäden, daut de heilja Jeist ons daut mieeschte halpt? Daut woa wie seenen, wan wie een Jlikjnis unjasieekjen, waut bloos en Lukas sien Evangelium to finjen es. *

17. Waut lia wie von Jesus sien Jlikjnis en Lukas 11:5-9, 13 äwa daut bäden?

¹⁷ Läs Lukas 11:5-9, 13. Jesus sien Jlikjnis wiest ons, woo wie sellen om dän heiljen Jeist bäden. De Maun en daut Jlikjnis kjrieech daut, waut am fäld, “wiels hee soo aunhoolent wia”. Hee hilt sikj nich trigj, sienen Frint no Help to froagen, wan daut uk medden en de Nacht wia. (See daut Schoolheft fa Läwen un Deenst von Juli 2018, Sied 4.) Waut lieet Jesus ons derch dit Jlikjnis äwa daut bäden? Hee sajcht: “Froacht, un junt woat jejäft woaren; sieekjt, un jie woaren finjen; klopt aun, un de Däa woat junt opjemoakt woaren.” Waut lia wie von daut? Daut de heilja Jeist ons halpt, mott wie doa aunhoolent om bäden.

18. Woo wiest Jesus sien Jlikjnis, daut Jehova ons gaunz secha dän heiljen Jeist jäwen woat?

¹⁸ Jesus sien Jlikjnis lieet ons uk, wuarom Jehova ons dän heiljen Jeist jäwen woat. De Maun en daut Jlikjnis haud nuscht reed, oba hee wull oppnäment sennen un sienen Frint waut to äten jäwen, waut medden en de Nacht aunkjeem. Jesus säd, daut de Noba am Broot jeef, wäajen hee soo aunhoolent wia. Waut wull Jesus doamet sajen? Wan een onvolkomna Mensch reed es, sienen aunhoolenden Noba to halpen, woo väl mea woat ons leeftolja himlischa Voda dan nich deejanje halpen, waut am aunhoolent no dän heiljen Jeist froagen? Wie kjennen ons doaropp veloten, daut Jehova ons dän heiljen Jeist jäwen woat, wan wie am doano prachren (Psa. 10:17; 66:19).

19. Wuarom kjenn wie ons secha sennen, daut wie tru bliewen kjennen?

¹⁹ Wie kjennen ons secha sennen, daut wie tru bliewen kjennen, wan de Soton uk emma wada jäajen ons kjamfen woat. Wuarom? Wäajen de heilja Jeist tweeatlei fa ons deit. Ieeschtens jeft hee ons de Krauft, waut ons fält toom met onse Trubbels foadich woaren. Un tweedens pust dee soo to sajen en onse Säajlen nenn un halpt ons, em Deenst fa Jehova verauntokomen, bat wie en de niee Welt nenkomen. Well wie ons gaunz eenich sennen, aules to doonen, daut de heilja Jeist ons soo väl aus mäajlich nuzt!