1-2. (a) Dahme kin sewese kitail en dadaur ehuehu rahn? Menlau kawehwehda. (b) Dahme kitail pahn koasoiapene nan iren onop wet?

“NI EI kin medewehla kahpwalo me lelohng ie, I ese me pein ngehi sohte kak powehdi.” Mie pak me ke nda met? Me tohto rehtail kin. Mwein ke nda met mwurin omw medemedewe duwen omw kak powehdi soumwahu laud ehu de mehlahn emen me ke poakohng. Ni omw medewehla kahpwalo, ke pehm me ke kak dadaur ehuehu rahn ihte pwehki sapwellimen Siohwa manaman me kihong uhk “kehl me laudsang dahme aramas ahneki.”​—2 Kor. 4:7-9.

² Kitail pil kin koapworopworki sapwellimen Koht manaman en sewese kitail en pelian madamadau en sampah suwed wet. (1 Sohn 5:19) Patehng met, kitail kin anahne pelian “ngehn suwed kan.” (Ep. 6:12) Met kitail pahn koasoiapene ahl riau me sapwellimen Koht manaman kin sewese kitail en powehdi kahpwal pwukat koaros. Mwuhr kitail pahn koasoiapene dahme kitail kak wia pwehn uhdahn paiekihda sapwellimen Koht manaman.

3. Ia ehu ahl me Siohwa kin ketin sewese kitail en dadaur pahn kahpwal kan?

³ Sapwellimen Siohwa manaman kin sewese kitail sang ni eh kihong kitail kehl pwehn kapwaiada atail pwukoa mendahki kahpwal kan. Wahnpoaron Pohl pehm me e kak pousehlahte doadoahk mendahki eh kahpwal kan pwehki e kin koapworopworki “manaman en Krais.” (2 Kor. 12:9) Erein keriaun eh seiloak en misineri, Pohl sohte ihte doadoahk laud nan kalohk ahpw e pil wia doadoahk en mwohni pwehn pwainda dahme e anahne. E mihmi nan Korint nan imwen Akwila oh Persila. Ira soun wiahda ihmw likou kei. Pwehki Pohl kin wia soangen doadoahko, ekei rahn e kin iang ira doadoahk. (Wiewia 18:1-4) Sapwellimen Koht manaman kihong Pohl kehl pwe  en kak wia doadoahk en mwohni oh pil kapwaiada eh doadoahk en kalohk.

4. Nin duwen me 2 Korint 12:7b-9 mahsanih, kahpwal dahieu me Pohl ahneki?

⁴ Wadek 2 Korint 12:7b-9. Nan iretikitik wet, ia wehwehn en Pohl nda me ‘kisin tek kis kohieng ni paliwere’? Ma mie kisin tek kis ni paliweromw, e pahn kahrehiong uhk lokolok laud. Eri Pohl ndinda me mie pein eh kahpwal ehu me e kin wie lokolongki. E kahdaneki kahpwal wet “tohnleng en Sehdan” me kin “wie popohr” (“poakipoakih,” ntp.) ih. Sehdan de nah tohnleng suwed kan ele sohte uhdahn kahrehda ahn Pohl kahpwalo, me duwehte en doakoahlong kisin tek kis ni paliwereo. Ahpw ni ngehn suwed kan ar esehda me “kisin tek kis” mi ni paliwereo, ele re men itonehng kisin teko pwehn kalaudehla ahn Pohl lokoloko. Dahme Pohl wia?

5. Ia duwen Siohwa eh ketin mwekidki ahn Pohl kapakap kan?

⁵ Nin tapio, Pohl men ‘kisin teko’ en kohsang ih. E nda: “Pak siluh I peki rehn Kauno [Siohwa] . . . pwe kisin tek kiset en kohsang ie.” Ahpw, mendahki en Pohl kapakap kan, kisin teko mihmihte ni paliwereo. Ia duwe, met wehwehki me Siohwa sohte ketin karonge ahn Pohl kapakap kan? Uhdahn soh. E uhdahn ketin sapengala. Siohwa sohte ketikihsang kahpwalo, ahpw e ketikihong Pohl kehl pwehn dadaurete. Siohwa ketin mahsanih: “Ei manaman kin unsekla ni omw kin luwet.” (2 Kor. 12:8, 9) Oh pwehki sapwellimen Koht sawas, Pohl kak kolokolete eh peren oh meleilei!​—Pil. 4:4-7.

6. (a) Ia duwen Siohwa eh kin ketin sapengala atail kapakap kan? (b) Inou dah kan sang iren Paipel kan nan parakrapo me kin kakehlakaiuk?

⁶ Duwehte Pohl, mie pak me ke peki rehn Siohwa en ketikihsang kahpwal ehu rehmw? Ma kahpwalo mihmihte, de laudla, mendahki omw kapakap ni ngidingid, ke kin pwunodki me mwein Siohwa sohte ketin kupwurperenkin uhk? Ma ei, tamanda mehn kahlemeng en Pohl. Duwehte Siohwa eh ketin sapengala eh kapakap kan, E pil pahn ketin sapengala omw kapakap kan! Ele Siohwa sohte pahn ketikihsang kahpwalo. Ahpw sang ni eh ketin doadoahngki sapwellime manaman, e pahn ketikihong uhk kehl me ke anahne pwehn dadaur pahn kahpwalo. (Mel. 61:3, 4) Ele ‘aramas kin keseiukidi nanpwel,’ ahpw Siohwa sohte pahn ketin likidmelieiukala.​—2 Kor. 4:8, 9; Pil. 4:13.

7-8. (a) Ia duwen sapwellimen Koht manaman eh rasehng kisinieng? (b) Ia duwen Piter eh kawehwehda mwomwen sapwellimen Koht manaman eh kin doadoahk?

⁷ Ia pil ehu ahl me sapwellimen Koht manaman kin sewese kitail? Duwehte kisinieng mwahu ehu me kamwakid sohp ehu en lella wasa me e pahn lel ie mendahki nansedo suwed, sapwellimen Koht manaman kin kamwakid kitail en wonowei mendahki kahpwal kan lao kitail lel sampah kapwo me Koht ketin inoukihda.

⁸ Nin duwen emen soused, wahnpoaron Piter kin ahnla seiloak nansed. Ihme kahrehda ni eh koasoia duwen mwomwen sapwellimen Koht manaman eh kin doadoahk, e doadoahngki lepin lokaia ehu me mwomwen pidada seiloak doadoahngki serek. E ntingihedi: “Saikinte pak ehu me aramas emen koasoiahda kokohp ehu sang ni pein nsene, ahpw sapwellimen Koht manaman me kin kaweid aramas akan pwe ren koasoia mahsen en Koht.” Lepin lokaiahn Krihs me kawehwehdi ong “kaweid” uhdahn wehwehki en “iangala.”​—2 Pit. 1:21.

9. Dahme Piter men aramas akan en medewe ni eh ntingihedi me sapwellimen Koht manaman kin “kaweid” aramas akan?

⁹ Dahme Piter ele medemedewe ni eh doadoahngki lepin lokaia wet “kaweid”? Luk, me ntingihada pwuhken Wiewia, doadoahngki lepin lokaia ehu me mwomwen duwehte dahme Piter doadoahngki pwehn kawehwehda mwomwen sohp ehu eh kin “iangala” kisinieng. (Wiewia 27:15) Emen ohl me samanih Paipel nda me ni Piter eh ntingihedi me sapwellimen Koht manaman kin  “kaweid” sounnting en Paipel kan, e doadoahngki lepin lokaia ehu me kahrehiong aramas en medewe duwen seiloak doadoahngki serek. Piter nda me duwehte kisinieng eh kin siken sohp ehu pwehn lella wasa me e pahn lel ie, sapwellimen Koht manaman kin kaweid soukohp kan oh sounnting en Paipel kan ren wia arail doadoahk. Ohl samano pil nda: “Ni karasaras, soukohp ko kin apihada arail serek kan.” Siohwa ketin wia dahme anahn. E ketikihda “kisiniengo,” de sapwellime manaman. Sounnting en Paipel kan pil wia dahme anahn. Re doadoahk ni ahl me pahrekiong kaweid en manamano.

10-11. Soahng riau dah me kitail anahne wia pwe sapwellimen Koht manaman en kaweid kitail? Menlau kihda ehu karasaras.

¹⁰ Ei mehlel, rahnwet Siohwa sohla ketin doadoahngki sapwellime manaman pwehn kamwakid aramas en ntingihada pwuhken Paipel kan. Ahpw, Siohwa ketin doadoahngkihte sapwellime manaman en kaweid sapwellime ladu kan. Siohwa kin ketin wiewiahte dahme anahn. Ia duwen atail kak paiekihda sapwellimen Koht manaman? Kitail anahne tehk mwahu me kitail kin wiewia dahme anahn. Ia duwen atail kak wia met?

¹¹ Medewehla karasaras wet. Pwehn paiekihda kisiniengo, sehla men anahne wia soahng riau. Keieu, e anahne tangahkihla were pwohto wasa me kisinieng kin mi ie. Were pwohto sohte pahn mwekid ma sehlao mihmihte ni wasahn peidi sohp me dohsang wasa me kisiniengo kin wie ipihp. Keriau, e anahne epihda oh kihpeseng douluhl eh serek ko. Mehnda ma kisiniengo wie ipihp, were pwohto pahn tangala mwowe ihte ma serek ko koledi kisiniengo. Pil duwehte, kitail pahn dadaurete nan atail papah Siohwa ihte ma kitail ale sawas sang sapwellime manaman. Pwehn paiekihda manamano, kitail anahne wia soahng riau. Keieu, kitail anahne wia soahng kan me sapwellimen Koht manaman kin kaweidki sapwellime ladu kan en wia. Keriau, kitail anahne uhdahn “apihada atail serek kan” ni atail iang wia doadoahk pwukat ni uwen atail kak. (Mel. 119:32) Ni atail wia soahng pwukat, sapwellimen Koht manaman pahn kamwakid kitail en wonla mwowe mendahki uhwong oh kahpwal kan oh  pahn sewese kitail en dadaurete ni lelepek lao kitail lel nan sapwellimen Koht sampah kapwo.

12. Dahme kitail pahn koasoiapene met?

¹² Kitail koasoiapenehr ahl riau me sapwellimen Koht manaman kin sewese kitail. Sapwellimen Koht manaman kin kihong kitail kehl oh kin sewese kitail en kolokolete atail lelepek ni atail lelohng kahpwal kan. Sapwellimen Koht manaman pil kin kamwakid kitail en wonla mwowe oh sewese kitail en mihmihte nan elen mour soutuk. Met kitail pahn koasoiapene soahng pahieu me kitail anahne wia pwehn uhdahn paiekihda laud sapwellimen Koht manaman.

13. Nin duwen me 2 Timoty 3:16, 17 mahsanih, dahme Paipel kak wia ong kitail, ahpw dahme kitail anahne wia?

¹³ Keieu, onopki Mahsen en Koht. (Wadek 2 Timoty 3:16, 17.) Lepin lokaiahn Krihs me kawehwehdi ong “kaweid” uhdahn wehwehki “Koht ketin peuk ong.” Koht ketin doadoahngki sapwellime manaman pwehn “peuk” ong nan madamadau en sounnting en Paipel kan sapwellime madamadau. Ni atail kin wadek Paipel oh doudouloale, sapwellimen Koht kaweid kan kin audehda atail madamadau oh mohngiongitail. Kaweid pwukat kin kamwakid kitail en mour pahrekiong kupwuren Koht. (Ipru 4:12) Ahpw pwe kitail en paiekihda laud sapwellimen Koht manaman, kitail anahne koasoanehdi ahnsou pwehn kaukaule onopki Paipel oh medewe laud dahme kitail wadek. Eri Mahsen en Koht pahn kamwakid soahng koaros me kitail kin nda oh wia.

14. (a) Dahme kahrehda kitail kak nda me “kisinieng kin wie ipihp” ni atail mihting en Kristian kan? (b) Ia duwen atail kak “kihpeseng douluhl atail serek ko” ni atail towehda mihting kan?

¹⁴ Keriau, ehupene kaudokiong Koht. (Mel. 22:22) Mihting en Kristian iei wasa me “kisinieng kin wie ipihp.” Sapwellimen Siohwa manaman kin mi ni mihting kan. (Kaud. 2:29) Dahme kahrehda kitail kak ndahki met? Pwehki ni ahnsou me kitail kin kohpene iang riatail Kristian kan kaudok, kitail kin kapakapki sapwellimen Koht manaman, koulki koul en kaping ong Siohwa me kin poahsoankihda Mahsen en Koht, oh kitail kin rong kaweid me poahsoankihda Paipel me brother kan me sapwellimen Koht manaman idihada kin kihda. Oh manamanohte kin sewese sister kan kaunopada oh wia arail pwukoa. Ahpw, pwe kitail en paiekihda laud sapwellimen Koht manaman, kitail anahne onopadahng iang pasapeng nan mihting kan. Ni ahl wet, e duwehte me kitail “kihpeseng douluhl atail serek ko” ni atail towehda mihting kan.

15. Ia duwen sapwellimen Koht manaman eh kin sewese kitail nan doadoahk en kalohk?

¹⁵ Kesiluh, iang doadoahk en kalohk. Ni atail kin doadoahngki Paipel nan kalohk oh padahk, kitail kin mweidohng sapwellimen Koht manaman en sewese kitail nan kalohk. (Rom 15:18, 19) Ahpw, pwe ken paiekihda laud sapwellimen Koht manaman, ke anahne kaukaule iang doadoahk en kalohk oh doadoahngki Paipel ni ahnsou koaros me ke kak. Ehu ahl me omw doadoahk en kalohk en kak mie katepe iei sang ni omw doadoahngki iren sawas kan ong koasoakoasoipene me kohsang Doaropwehn Kasukuhl ong Mihting en Mour oh Kalohk.

16. Ia ahl me kitail keieu kak alehdi sapwellimen Koht manaman?

¹⁶ Kapahieu, kapakap ong Siohwa. (Mad. 7:7-11; Luk 11:13) Ahl me kitail kak keieu alehdi sapwellimen Koht manaman iei sang ni atail kapakap peki rehn Siohwa en ketikihong kitail. Sohte mehkot kak kauhdi atail kapakap kan en lel Siohwa de kerempwa kitail sang atail en alehdi sapwellimen Koht manaman​—kaidehn pil imweteng de pil Sehdan. (Seims 1:17) Ia duwen atail en kapakap pwe kitail en kak paiekihda laud sapwellimen Koht manaman? Pwehn sapengala met, kitail en sukuhlki duwen kapakap sang karasaras me kileldi ihte nan Rongamwahu en Luk. *

17. Dahme kitail kak sukuhlki duwen kapakap sang sapwellimen Sises karasaraso me kileldi nan Luk 11:5-9, 13?

¹⁷ Wadek Luk 11:5-9, 13. Sapwellimen Sises karasaras kasalehda ia duwen atail pahn kapakapki sapwellimen Koht manaman. Nan karasaraso, ohlo alehdi dahme e anahne “pwehki eh pekipek ngidingid.” E sohte masak en peki sawas sang kompoakepaho mendahki ahnsowo lukepen pwong. * Ia duwen Sises eh ketin doadoahngki karasaras wet ong kapakap? E mahsanih: “Pousehlahte peki, kumwail ahpw pahn ale; kumwail pousehlahte rapahki, kumwail ahpw pahn diar; kumwail pousehlahte letelet, e ahpw pahn ritidahng kumwail.” Eri ia mehn kasukuhl ong kitail? Pwehn ale sawas sang sapwellimen Koht manaman, kitail anahne kapakapki ni ngidingid.

18. Nin duwen me karasaras en Siseso kasalehda, dahme kahrehda kitail kak kamehlele me Siohwa pahn ketikihong kitail sapwellime manaman?

¹⁸ Karasaras en Siseso pil sewese kitail en kilang dahme kahrehda Siohwa pahn ketikihong kitail sapwellime manaman. Ohlo nan karasaraso men apwalih mwahu aramas me mwemweitdo reh. E pehm me e anahne kamwenge me mwemweitdo reho ni lukepen pwohngo ahpw sohte mehkot me e kak kihong. Sises mahsanih me pwehki ohlo ngidingidki peki pilawa rehn mehn mpeo, mehn mpeo mwekidki. Dahme Sises ketin padahngki? Ma aramas soh unsek men men sewese mehn mpe men me kin ngidingidki eh pekipek, ia uwen laud Samatailo nanleng me ketin kadek pahn ketin sewese irail kan me kin peki ni ngidingid sapwellime manaman! Eri, kitail kak kapakap oh koapworopworki me Siohwa pahn ketin sapeng atail kapakapki sapwellime manaman.​—Mel. 10:17; 66:19.

19. Dahme kahrehda kitail kak kamehlele me kitail pahn kana?

¹⁹ Kitail kak kamehlele me mendahki Sehdan nantihong en poweikitaildi, kitail pahn uhdahn kana. Dahme kahrehda? Pwehki sapwellimen Koht manaman kin sewese kitail ni ahl riau. Keieu, e kin kihong kitail kehl me kitail anahne pwehn powehdi kahpwal kan. Keriau, e wia ahng me “audehda atail serek kan,” sewesewese kitail en wonlahte mwowe nan atail papah Siohwa lao kitail lel nan sampah kapwo. Kitail en koasoanehdi teng en paiekihda laud sawas en sapwellimen Koht manaman!