1, 2. a) ¿Llaquicunata ahuantachunca Jehová Diosca ima shinataj ayudan? b) ¿Cai yachaipica imallatataj yachashun?

TAL VEZ ñucanchijchari ungurcanchij, mana cashpaca shuj familiachari huañurca. Chai llaquicunata yuyarishpaca: “Yaya Dios paipaj espíritu santota cushpa ayudajpimi cada punlla ahuantai tucurcani. Ñucallaca mana ahuantai tucuimanchu carcani” ninchijmi (2 Corintios 4:7-9).

² Diablopaj ruraicunapipish ama chagruringapajmi espíritu santota minishtinchij (1 Juan 5:19). Shinallataj supaicunahuan macanacungapajmi espíritu santota minishtinchij (Efesios 6:12). Caicunata chꞌimbapurangapajca Diospaj espíritu santo ima shina ayudajtami yachashun. Qꞌuipaca espíritu santo ayudachun imata rurana cashcatami ricushun.

3. ¿Problemacuna ricurijpipish Jehová Diosca ima shinataj paipaj espíritu santohuan ayudan?

³ Jehová Diosca paipaj espíritu santota cushpami llaquicuna ricurijpipish pai mingashcata pajtachichun fuerzata cun. Apóstol Pabloca ima llaquicuna ricurijpipish Cristopaj poderhuanmi Diosta sirvishpa catirca (2 Corintios 12:9). Pabloca misionero cashpaca mana predicashpallachu purirca. Micunapajpish churanapajpishmi trabajarca. Por ejemplo, Corinto llajtapi cashpaca Pabloca Aquilapaj, Priscilapaj huasipimi saquirirca. Áquila, Priscilaca carpa huasicunatami rurajcuna carca. Pablopish carpa huasicunata ruranata yachashcamantami paicunahuan huaquin punllacunata trabajaj carca (Hechos 18:1-4). Jehová Diosca paipaj  espíritu santohuanmi chai trabajota pajtachichun, huillanamanpish llujshichun fuerzata cushpa Pablota ayudarca.

4. 2 Corintios 12:7b al 9-pi nishca shinaca ¿Pabloca imamantataj sufricurca?

⁴ (2 Corintios 12:7b-9-ta liyipai). Apóstol Pabloca Diablomi garrochahuan o jatun cashahuan tujsij shina ñuca aichapi nanaita curca nishpaca ¿imatashi nisha nicurca? Jatun cashahuan pi ñucanchij cuerpopi tujsijpica achcatami nananman. Chashnallatajmi Pablopish shuj llaquita apacushcamanta achcata sufricurca. Pero chai llaquitaca mana Diablochu cushcanga. Shinapish Pablo llaquita apacujta ricushpami Diabloca tal vez ashtahuan llaquichinata munashcanga. ¿Pabloca imatashi rurashcanga?

5. ¿Jehová Diosca Pablo mañashcacunataca ima shinataj cutichirca?

⁵ Apóstol Pabloca quimsa cutinmi Jehová Diostaca: “Ñucamanta cai jatun nanaitaca anchuchipai” nishpa rogarca. Chashna rogarijpipish chai llaquitaca Jehová Diosca mana anchuchircachu. Pero Pablo mañashcacunataca cutichircami. Llaquita mana anchuchishpapish ahuantachunmi fuerzata curca. Diosca: “Irquilla cajcunapimi ñuca poderca ashtahuan alli jundanga” nircami (2 Corintios 12:8, 9, NM ). Jehová Dios ayudajpimi Pabloca tranquilo, cushilla sintirirca (Filipenses 4:4-7, NM ).

6. a) ¿Jehová Diosca ima shinataj ñucanchij mañashcacunata cutichin? b) ¿Parrafopi tiyaj versocunaca ima shinataj ñucanchijta sinchiyachin?

⁶ Llaquicunata charishpaca Pablo shinachari cai llaquicunata anchuchihuai nishpa Diosta mañarcanchij. Chashna mañajpipish chai llaquicunaca ashtahuanchari mirarirca. Chashna tucujpica: “Paipaj ñaupajpi mana alli ricurishcamantami Yaya Diosca ñuca mañashcataca mana uyan” nishpachari yuyanchij. Ama chashna yuyangapajca Pablota yuyarishun. Jehová Diosca paiman fuerzata cushpami paipaj mañashcataca cutichirca. Chashnallatajmi ñucanchij mañashcacunata cutichinga. Llaquicunata mana anchuchishpapish paipaj espíritu santota cushpami ahuantachun fuerzata cunga (Salmo 61:3, 4). Ima llaquicunata charijpipish Jehová Diosca ñucanchijtaca manataj saquingachu (2 Corintios 4:8, 9; Filipenses 4:13, NM ).

7, 8. a) ¿Espíritu santoca imamantataj huaira shina can? b) ¿Pedroca Diospaj espíritu santo ayudaj cashcataca ima shinataj intindichirca?

⁷ Espíritu santoca huaira shinami can. Shuj ejemplopi yuyashun. Shuj barcoca yacucuna caiman chaiman cuyuchijpipish huaira pꞌucujpimi chayana pushtuman chayan. Chai shinallatajmi Diospaj espíritu santoca Diosta sirvijcuna llaquicunata apacujpipish paraíso Allpaman chayachun ayudanga.

⁸ Apóstol Pedroca pescadota japijmi carca. Chaimantami barcota ima shina manejanata yacharca. Chaita yachashcamantami Pedroca espíritu santo ñucanchijta ima shina ayudanataca barcota huaira ima shina pushashcahuan chꞌimbapurarca. Paica: ‘Profetacunaca paicunapaj yuyaillamantaca manataj huillashcacunachu. Ashtahuanpish Diospajlla caj runacunami, Diospaj jucha illaj Espíritu pushajpi huillashcacuna’ nircami. Griego rimaipi “pushana” nishpaca huaquinpica “apanamantapishmi” parlacun (2 Pedro 1:21).

9. Apóstol Pedroca Diospaj espíritu santomi pushan nishpaca ¿imatataj yachachisha nirca?

 ⁹ Hechos librota quillcaj Lucas runapish barcota huaira “apaj cashcamantami” parlarca (Hechos 27:15). Shinashpaca ¿Apóstol Pedroca Diospaj espíritu santo “pushan” nishpaca imatataj yachachisha nirca? Bibliamanta yachaj shuj runaca: “Apóstol Pedro Bibliata quillcajcunata espíritu santomi pusharca nijpica gentecunaca barcota huaira apaj cashcapimi yuyashcangacuna” ninmi. Pedroca ima shinami huairaca barcota pꞌucushpa chayana pushtuman apan. Chashnallatajmi espíritu santoca profetacunatapish Bibliata quillcajcunatapish Dios mingashcata pajtachichun ayudan nicurcami. Bibliamanta yachaj chai runallatajmi: “Bibliata quillcajcunaca barco purichun barcopaj telacunata alzashpa pascaj shinami Dios mingashcata pajtachingapaj listos carcacuna” nircami. Jehová Diosca Bibliata quillcajcunamanca espíritu santotami curca. Chaimantami pai mingashcata pajtachircacuna.

10, 11. ¿Espíritu santota chasquingapajca imallatataj rurana canchij? Shuj ejemplomanta parlai.

¹⁰ Jehová Diosca Bibliata quillcachunca ña mana espíritu santota cunchu. Pero paita alli sirvichunmi ñucanchijman espíritu santota cun. ¿Jehová Diospaj espíritu santota chasquingapajca imatataj rurana canchij?

¹¹ Shuj ejemplopi yuyashun. ¿Barcota manejajca huaira ayudachunca imatataj rurana can? Puntapica, barcotaca maipi huaira tiyanmanmi pushana can. Ishquipica, barcopi tiyaj telacunatami alzashpa pascana can. Chaita rurajpica huairaca telacunata pꞌucushpami barcotaca pushanga. Shinallatajmi ñucanchijpish espíritu santota chasquingapajca ishqui yuyaicunata pajtachina  canchij. Puntapica, huaira tiyashcaman rij shinami Diospaj ruraicunata pajtachishpa callarina canchij. Ishquipica, barcopaj telacunata alzacuj shinami Diospaj avanzashcata rurana canchij (Salmo 119:32). Caicunata rurajpica Jehová Diosca paipaj espíritu santotami cunga. Chashnami llaquicunahuan cashpapish Diosta sirvishpa catishun. Paraíso Allpamanpish chayashun.

12. ¿Cunanca imatataj yachashun?

¹² Caicamaca Diospaj espíritu santo ima shina ayudashcatami yachashcanchij. Por ejemplo, espíritu santota chasquishpami llaquicunata ahuantangapaj fuerzata charishun. Shinallataj espíritu santomi Diosta sirvishpa catichun, paraíso Allpaman chayachunpish ayudanga. Cunanca espíritu santo ayudachunca chuscu yuyaicunata ricushun.

13. a) ¿Imatataj cada punlla rurana canchij? b) ¿Imamantataj Bibliata estudiana canchij?

¹³ (2 Timoteo 3:16, 17-ta liyipai). Puntapica, Bibliatami estudiana canchij. ¿Dios quillcachishca nishpaca griego shimipica imatataj nisha nin? Quillcajcuna Diospaj yuyaicunata escribichun Yaya Dios paipaj espíritu santota pꞌucuj shina cushcatami nisha nin. Ñucanchijca espíritu santota chasquingapajca cada punllami Bibliata estudiana canchij. Liyishcapi cutin cutin yuyajpica Diospaj yachachishcacunaca ñucanchij yuyaiman, shungumanmi chayanga. Chashnami Dios munashca shina causashun (Hebreos 4:12).

14. a) ¿Imamantataj Diospaj espíritu santoca tandanacuicunapica huaira pꞌucucuj shina can ninchij? b) ¿Espíritu santo tandanacuipi ayudachunca imatataj rurana canchij?

¹⁴ Ishquipica, huauqui panicunahuanmi Diosta adorana canchij (Salmo 22:22). Ñucanchij tandanacuicunapica Diospaj espíritu santoca huaira pꞌucucuj shinami can (Apocalipsis 2:29). ¿Imamantataj chashna ninchij? Ñucanchij huauqui panicunahuan tandanacushpaca Yaya Diostami espíritu santota cuchun mañanchij. Bibliamanta japishca cantocunatapishmi cantanchij. Shinallataj Diospaj espíritu santohuan agllashca huauquicunapaj yachachishcacunatapishmi uyanchij. Diospaj espíritu santomi panicunatapish presentacioncunata rurachun ayudan. Shinapish Diospaj espíritu santo tandanacuicunapi ayudachunca alli prepararishcami rina canchij. Shinallataj tandanacuicunapi tapuicunata rurajpica comentanami canchij. Chashnami Barcopaj telacunata alzashpa pascacuj shina cashun.

15. ¿Espíritu santo predicacionpi ayudachunca imatataj rurana canchij?

¹⁵ Quimsapica, predicanamanmi llujshina canchij. Gentecunaman Bibliamanta yachachicushpaca espíritu santo ayudachunmi saquicunchij (Romanos 15:18, 19). Chaimantami predicacionman siempre llujshina canchij. Shinallataj Bibliahuanmi yachachina canchij. Gentecunaman ima shina huillanata yachangapajca Tandanacuipi imalla ruranata ricuchij pꞌangapi tiyaj yuyaicunatami ricuna canchij.

16. ¿Espíritu santota chasquingapajca imatataj rurana canchij?

¹⁶ Chuscupica, Diostami mañana canchij (Mateo 7:7-11; Lucas 11:13). Espíritu santota chasquingapajca Jehová Diostami mañana canchij. Espíritu santota chasquichunca Diabloca mana jarcai tucungachu. Ñucanchij carcelpi cajpipish Diospaj espíritu santoca ayudangami (Santiago 1:17). ¿Espíritu santota chasquingapajca ima shinataj  mañana canchij? Chaipajca Lucas libropi tiyaj chꞌimbapuraimanta yachashun. *

17. Lucas 11:5 al 9, 13-pica ¿Jesusca mañanamantaca imatataj yachachirca?

¹⁷ (Lucas 11:5-9, 13-ta liyipai). * Cai chꞌimbapuraipica shuj runaca paipaj vecinotaca imata minishtishcata mana shaicushpami mañacurcalla. Chaupi tuta cajpipish mañanataca mana mancharcachu ninmi. Cai chꞌimbapuraihuanmi Jesusca espíritu santota ima shina mañanata yachachirca. Paica: “Diostaca mañacuichijlla, paica cungami. Mashcacuichijlla, japinguichijmi. Huasiyuj nicuichijlla paica pascangami” nircami. Ñucanchijpish Diospaj espíritu santota chasquingapajca Diostami cutin cutin mañana canchij.

18. ¿Jehová Dios paipaj espíritu santota cunataca imamantataj crinchij?

¹⁸ Cai chꞌimbapuraipi cutin yuyashun. Chai runaca paipaj amigo carumanta visitanaman shamushcamantami carasha nirca. Pero carangapajca mana imata charircachu. Chaimantami paipaj vecinoman micunitata mañanaman rirca. Jesusca chai runa mañacujllapimi vecinoca micunata curca nircami. ¿Jesusca chashna nishpaca imatataj yachachisha nirca? Vecinoca juchayuj runa cashpapish cutin cutin mañajpica ayudarcami. Ñucanchijta cꞌuyaj Jehová Dioscarin espíritu santota cuhuai nishpa cutin cutin mañajpica cungallami. Chaimantami espíritu santota cuhuai nishpa Diosta mañanalla canchij (Salmo 10:17; 66:19).

19. ¿Diablo ñucanchijta llaquichijpipish imamantataj ahuantashpa catishun?

¹⁹ Diablo ñucanchijta llaquichishpa catijpipish Diospaj espíritu santota chasquishpami llaquicunata ahuantashun. Shinallataj Diospaj espíritu santopaj ayudahuanmi paraíso Allpaman chayangacama Diosta sirvishpa catishun. Chaimanta, espíritu santota chasquingapajca Diospaj avanzashcata rurashunchij.