1, 2. a) Llaquicunata aguantashpa catichunga ¿imata ayudan? Intindichipai. b) Cai temapica ¿imatata yachajupashun?

¿IMAPASH llaquita charipashcanguichu? Tal vez shuj ungüita, familiamanda pipash huañujpimi ninanda llaquiripashcanchi. Shinapash chai llaquicunahuan ñana yapata sufrinajushpaca tal vez cashnachari pensaripanchi, chai llaquitaca ñucallaca na aguantaita ushaimanllu carcani nishpa. Shinapash ‘na ñucanchimandallaca ushaita charinchichu, Taita Diosmandami ninan ushaitaca charinchi’. Jehová Diosmi paipa espirituta utilizashpa llaquicunata aguantashpa catichun ñucanchicunataca ayudan (2 Cor. 4:7-9).

² Cai mundopa cosascunapi ama chapuringapapashmi Jehovapa espiritutaca minishtipanchi (1 Juan 5:19). Ñucanchicunaca ‘ninan ushaita charij ayacunahuanbashmi macanajunshna’ catina capanchi (Efes. 6:12). Chaimandami cai temapica Jehovapa espirituca fuerzata cushpa, Jehovata sirvishpa catichun ayudajtapash yachajupashun. Jipaca Jehovapa espiritu santo ayudashpa catichun imata rurana cashcatapashmi yachajupashun.

3. ¿Imashinata llaquicunata charijpipash Jehovapa espirituca ayudan?

³ Jehovapa espiritumi llaquicunata charijpipash aguantashpa ñaupaman catichun fuerzata cushpa ayudan. Apóstol Pabloca llaquicunata charishpapash Jehovata sirvichunga ‘Cristopa ninan ushai’ ayudajtami seguro carca (2 Cor. 12:9). Pabloca ishcai viajetami misionero shina Corintios llactapi villachingapaj rishca carca. Chaipimi Jehovamanda villachishpapash, paipa minishtirishcagucunata randigapaca trabajana tucurca. Corinto llactapi cashpaca, Áquila, Priscila cusahuarmipa huasipimi quedarca. Chaipica paicunandimi carpacunata rurashpa trabajan carca. Semanapica huaquin punllacunatami shina trabajan carca (Hech. 18:1-4). Jehovapa  espiritu santomi pai trabajachun, Jehovamanda villachishpa catichunbash ayudarca.

4. ¿Imata 2 Corintios 12:7b-9​pi nishca shinaca apóstol Pablotaca llaquichijurca?

⁴ (2 Corintios 12:7b *, 8, 9 liingui). Cai textopi ‘cashahuan tujsinshna llaquita charini’ nishpaca ¿imamandata apóstol Pabloca parlajurca? Ñucanchi cuerpopi shuj casha yaicujpica ninandami nanachinchi. Caihuan chimbapurashpami apóstol Pabloca pai charishca llaquicunahuan na ushajushcata intindichirca. Chai llaquimanda parlashpaca apóstol Pabloca nircami: ‘Satanaspa angelmi ñavipi huactashpa llaquichijuhuanlla’ nishpa. Satanaspash, paipa ayacunapash chai llaquihuanga na apóstol Pablotaca llaquichinajushcangachu. Shinapash apóstol Pablo chai ‘cashashna’ llaquita ama aguantai ushachunmi, ashtahuan nanachichun imacunatapash ruranajushcanga. Shinapash ¿imatata apóstol Pabloca rurarca?

5. Jehová Diosca ¿imashinata apóstol Pablotaca ayudarca?

⁵ Apóstol Pabloca “ñuca nanaita anchuchipai nishpa, [Jehová Diostaca] quimsa viajeta mañarcani” ninmi. Shinapash chai llaquitaca na anchuchircachu. ¿Jehová Dios apóstol Pablopa mañaicunata na uyashcatachu chaica ricuchijurca? Na, na shina carcachu. Paipa mañaicunata uyaimandami Jehová Diosca chai llaquita aguantai ushachun fuerzata curca. Chaimi Jehová Diosca ‘ñuca ninan ushaita’ cushpami candaca ayudajuni nirca (2 Cor. 12:8, 9, NM). Jehová Dios ayudajpimi apóstol Pabloca cushilla, tranquilo sirvishpa cati usharca (Filip. 4:4-7, NM).

6. a) Jehová Diosca ¿imata rurashpata ñucanchi mañaicunata uyashcata ricuchin? b) Parrafopi ricuchishca textocunamandaca ¿maijanda quiquindaca ashtahuan ayudan?

⁶ ¿Apóstol Pabloshnachu cai llaquita anchuchihuai nishpa Jehová Diostaca mañapashcanchi? Jehovata shina mañajpipash chai llaquita na anchuchijpica talvez Jehová Diosca ñana juyahuanllu yashpami pensashcanchi. Shina pasajpica apóstol Pabloshnami rurana capanchi. Imashinami apóstol Pablopa mañaicunata uyashpa ayudarca, shinallatami ñucanchitapash ayudanga. Chai llaquita na anchuchishpapash, chai llaquita aguantachunmi paipa espiritu santota utilizashpa ayudanga (Sal. 61:3, 4). Imapash llaquichijujpipash Jehová Diosca ñucanchitallaca na saquingachu (2 Cor. 4:7- 9).

7, 8. a) Huairataca ¿imahuanda chimbapuran? b) Jehovapa espiritu santomanda parlashpaca ¿imatata apóstol Pedroca nirca?

⁷ Jehovapa espirituca ¿imapipashta ayudan? Marpi barcocunataca paicuna munashca pushtuman chayachunmi huairaca ayudan. Huaira cuendami Jehovapa espirituca imapash llaquicunata aguantashpa catichun, Jehová Dios cusha nishca paraíso Alpaguman chayachunbash ayudanga.

⁸ Apóstol Pedroca marpi pescadocunata japishpa trabajaimandami, marpi barcocunata huaira cuyuchijtaca ali yacharca. Chaimandami apóstol Pedroca Jehovapa espíritu santotaca huairahuan chimbapurarca. Chaimi nirca: “Dios villashcataca, ima horallapash na gentepaj munailla villashcachu. Ashtahuangarin Taita Diospajlla causanajuj runacuna cashpami, Diospaj jucha illaj Espíritu yarichijpi villanajushca” nishpa. Griego shimipi “yarichina” nishca shimica imatapash “apaj” cashcatami ricuchin (2 Ped. 1:21).

9. “Apaj” nishpaca ¿imatata apóstol Pedroca ningapaj munarca?

⁹ “Yarichina” o “apaj” shimitaca apóstol Pedromi utilizarca. Hechos librota escribij Lucaspashmi griego shimipi “apaj” nishca shimitallata barcota huaira cuyuchijta intindichingapaj utilizarca (Hech. 27:15). Apóstol Pedro nishcamanda  parlashpaca shuj Bibliata investigaj jarica nircami: “Bibliata escribijcunaca marpi huaira barcocunata apanshna, Taita Diospash paipa espiritu santota utilizashpa profetacunata, Bibliata escribijcunata paipa yuyaicunata escribichun ‘yarichishpa’ ayudashcatami ningapaj munajushca” nishpa. Paillata nircapashmi: “Barcocunaca huaira apachun listomi carca. Shina cuendami Bibliata escribijcunaca Bibliata escribingapaj Taita Dios paipa espirituhuan ayudachunga ña listo carca” nishpa. Jehová Diosca huairata cachaj cuendami paipa espiritu santohuan Bibliata escribijcunataca ayudarca. Paicunaca Jehovapa espiritu santo imata yarichijpimi imata escribina cashcatapash escribirca.

10, 11. Jehovapa espiritu santo ayudachunga ¿imatata rurana capanchi? Shuj ejemplota churapai.

¹⁰ Jehová Diosca cunanbica ñana Bibliataca escribichijunllu. Shinapash paipa sirvijcunata ayudangapami paipa espiritutaca utilizan. Jehová Diosca ñucanchita ayudangapaj listomi can. Shinapash Jehovapa espiritu santo ayudashpa catichunga ñucanchirami imatapash rurana capanchi. Chaipaca ¿imatata rurana capanchi?

¹¹ Chaipaca cai cati ejemplopi yuyapashun. Shuj barcota manejajca paipa barco cuyurichun munashpaca ishcai cosascunatami rurana can. Callaripica, uchilla barcotaca barcocuna shayajuj pushtumandami shinllita huairajuj pushtucaman tangana can. Jipaca, huaira apachunmi barcotaca richun saquina can. Shina cuendami ñucanchicunapash Jehovata sirvishpa cati ushangapaca Jehovapa espiritu santo ayudachun saquina capanchi. Chaipaca cai ishcai cosascunatami rurana capanchi: Primero, Jehovapa espiritu ayudachunga Jehovapa munaitami rurana capanchi. Shinallami Jehovapa espirituca ñucanchita ayudaita ushanga. Segundo, “barcota shinllita huairajuj pushtucaman” tanganshnami Jehová Dios imata rurachun munashcata rurangapaj esforzarina capanchi (Sal. 119:32). Caicunata rurashpami Jehovapa espirituca paraíso Alpagu chayamungacaman aguantashpa catichun, Jehovata ali sirvishpa catichunbash ayudanga.

12. ¿Imatata yachajugripanchi?

 ¹² Cunangamanga Jehovapa espiritu santo ima ishcai cosascunapi ayudajtami yachajupashcanchi. Jehovapa espiritu santoca fuerzata cushpa, llaquicunata o problemacunata charishpapash Jehovamanda ama caruyachunmi ayudan. Shinallata Jehová Diosta sirvishpa catichun, para siempre causaiguta chasquinata yaria causashpa catichunbashmi ayudan. Cunanga Jehovapa espiritu santo ayudachun imata rurana cashcatami yachajupashun.

13. a) ¿Imashinata 2 Timoteo 3:16, 17​pi nishca shinaca ñucanchitaca ayudaita ushan? b) Jehovapa espíritu santo ayudachun munashpaca ¿imatata rurana capanchi?

¹³ Primero, Bibliatami yachajuna capanchi (2 Timoteo 3:16, 17, liingui). Griego shimipi ‘tucui Shimicuna, paillata yarichishpa escribishca’ nishpaca Jehová Dios paipa espíritu santohuan Bibliata escribijcunata ayudashcatami ningapaj munan. Shinaca Bibliata liishpa, liishcapi pensarishpaca ñucanchi yuyaiman, ñucanchi shunguman chayachunmi ayudan. Shina yachajunami Jehová Dios munashcashna causachun ayudan (Heb. 4:12). Shinapash Jehová Diospa espíritu santo ayudachun munashpaca, Bibliata yachajungapaj, liishcapi pensaringapami tiempoguta llujchina capanchi. Shina rurajpica Jehovapa espíritu santomi ñucanchi causaipi, imata ruranacunapipash ayudanga.

14. a) Tandanajuicunapica ¿imashinata Jehovapa espirituca ayudan? b) Tandanajuicunaman nara rishpallataca ¿imatata rurana capanchi?

¹⁴ Segundo, Jehovata sirvijcunahuanmi tandanajuna capanchi (Sal. 22:22). Ñucanchi tandanajuicunapica Jehovapa espíritu santo ayudajushcatami ricupanchi (Apoc. 2:29). ¿Imamandata shina nipanchi? Huauquipanicunahuan tandanajushca cashpaca Jehovapa espíritu santotami mañapanchi. Shinallata canticocunata candashpa, shuj huauqui Bibliamanda discursocunata cujtapash uyangapami tandanajupanchi. Jehovapa espíritu santollatami panigucuna paicunapa asignacionda ali pactachichunbash ayudan. Shinaca Jehovapa espíritu santo ayudachun munashpaca tandanajuiman nara rishpallatami comentangapaj ali prepararina capanchi. Tandanajuiman rishpaca “barcota huaira apachun” saquijuj cuenda cashcatami ricuchi ushashun.

15. Villachinapi Jehovapa espíritu santo ayudachun munashpaca ¿imatata rurai ushapanchi?

¹⁵ Tercero, villachingapaj llujshinami capanchi. Bibliata liishpaca gentecunaman ali villachichun, yachachichunmi Jehovapa espíritu santoca ayudan (Rom. 15:18, 19). Shinaca Jehovapa espíritu santo ayudachun munashpaca villachingapami llujshina capanchi. Shinallata Bibliata utilizangapami esforzarina capanchi. Shina rurashpallami Jehovapa espíritu santo ayudajushcataca ali yachaita ushapashun. Chaipaca ¿imata ayudaita ushan? Jesuspa Chaquita Catishpa Causashunchi Yachachishunchi Tandanajuipi Yachajungapaj hojapi “parlai callaringapaj yuyaicuna” nishcamandami yachajui ushapanchi.

16. Jehovapa espíritu santo ayudachun munashpaca ¿imatata rurana capanchi?

¹⁶ Cuarto, Jehovatami mañana capanchi (Mat. 7:7-11; Luc. 11:13). Jehovapa espíritu santo ayudachun munashpaca Jehovatami mañana capanchi. Jehovata mañachunga ni cárcel, ni Diablopash na jarcaita ushangachu. Jehová Diosca siempremi ñucanchi mañashcacunataca uyanga (Sant. 1:17). Shinaca Jehovata mañajushpaca ¿imashinata mañana capanchi? Cai tapuimanda ali yachangapaca Jesús imata rurashcata Lucas libropi yachajupashunchi. *

17. Lucas 11:5-9, 13​pi nishca shinaca ¿imatata Jesuspa chimbapuraimandaca yachajupanchi?

¹⁷ (Lucas 11:5-9, 13, liingui). Jesuspa chimbapuraipica  Jehovapa espíritu santota imashina mañana cashcatami ricuchin. Shuj punllaca shuj jarica paipa amigotami na manllashpa imata minishtishcata mañangapaj chaupi tuta rin. Chai amigoca ¿imatata ruran? ‘Ama yapata fiñachijuchunmi, imata mañashcata cungapaj jatarin’ (Julio de 2018 Jesuspa Chaquita Catishpa Causashunchi Yachachishunchi Tandanajuipi Yachajungapaj hojapi, ‘Ama yapata fiñachijuchun, imata mañashcata cungapaj jatarin’ nishca notatapash ricupangui). Jesusca Jehovata mañanamandaca cashnami nirca: “Diosta mañaichi, paica carangallami. Mascaichi, taringuichimi. Punguta huactachishpa cayaichi, paica pascangallami” nishpa. Shinaca Jehovapa espíritu santo ayudachun munashcata ricuchingapaca Jehovata cutin cutin mañanami capanchi.

18. Jehová paipa espíritu santota cunataca ¿imashpata seguro cana capanchi?

¹⁸ Cai chimbapuraica Jehová Dios imamanda paipa espirituhuan ayudaj cashcata intindichunbashmi ayudan. Jesuspa chimbapuraipica ¿imatata intindichingapaj munarca? Chai jaripa amigo chaupi tuta chayamujpi imagutallapash paipa amigoman carana obligacionda charishcatami Jesusca intindichirca. Shinapash chai jarica paipa amigoman carangapaca nimata na charircachu. Chaimi paipa vecinota imagutapash mañangapaj rirca. Shinallata Jesusca nircami: Vecinota cutin cutin mañajujpimi ‘ama yapata fiñachijuchun, imata mañashcata cungapaj jatarirca’ nishpa. Jesusca ¿imatata yachachingapaj munarca? Chai vecino juchayu cashpapash chai jari cutin cutin mañajujpi ima minishtishcata carashcatami yachachirca. Shinallatami juyaj Jehová Diosca paipa espíritu santota cutin cutin mañajpica ñucanchicunaman cunga. Jehová paipa espíritu santota cunataca seguromi cana capanchi (Sal. 10:17; 66:19).

19. Jehovapa espíritu santoca ¿imashinata llaquicunata mishachun ayudan?

¹⁹ Diabloca imapash llaquicunahuan o problemacunahuanmi cutin cutin llaquichingapaj munan. Shinapash chai llaquicuna o problemacuna mishachunga na saquinachu capanchi. ¿Imamandata shina nipanchi? Jehovapa espíritu santo imashina ayudajta ricupashun. Chaipaca ishcai yuyaicunata yachajupashun. Primero, imapash jarcaicuna ama mishachunmi Jehovapa espíritu santo ayudan. Segundo, “barcota huaira” apaj cuendami Jehovapa espíritu santo ayudan. Jehovapa espíritu santomi paita sirvishpa catichun, paraíso Alpagupi causana munaita charishpa catichunbash ayudan. Shinaca Jehovapa espíritu santo ñucanchita ayudachun saquipashunchi.