1-2. (a) Iillannonke qarra barru baala cince saˈˈate mayi kaaˈlannonke? Xawisi. (b) Konni birxichira maa ronseemmo?

“IILLINOE qarra qaageemmo woyite umiˈya wolqanni cince saˈˈa dandeemmokkita afoommo.” Ati hatto yite hedde egennootto? Ninke giddo duuchaho togoo hedo macciishshantannonke. Hatto yitine coyidhinoonnihu buutote dhibba woy shiiro cincitine saˈinihu gedensaanni ikkara dandaanno. Iillinoˈne qarra qaagginanni woyite barru baala cincitine saˈinoonnihu Yihowa qullaawu ayyaanisinni ‘jawa wolqasi’ uyinoˈne daafira ikkinota huwattinanni.—2 Qor. 4:7-9.

² Tini busha alame gawajjitannonketa gargadhateno qullaawu ayyaani kaaˈlo hasiissannonke. (1 Yoh. 5:19) Qoleno ‘busha ayyaanna’ ledo olammanni heeˈnoommo. (Efe. 6:12) Hanni kuni qarru baalu heeˈrirono qullaawu ayyaani kaaˈlannonketa lame doogga laˈno. Hakkiinni qullaawu ayyaaninni woˈmunni woˈma kaaˈlo afiˈrate maa assa hasiissannonkero ronseemmo.

3. Yihowa qarra cincine saˈneemmo gede kaaˈlannonketi mitte doogo maati?

³ Qarru heeˈrirono, Yihowa ayyaani uyinoonninke looso umo fushsha dandiineemmo gede wolqa woy jawaante aannonke. Soqqamaasinchu Phaawuloosira qarru iillinosiha ikkirono, “Kiristoosi wolqa” addaxxino daafira isi Yihowara ammaname soqqaminota coyiˈrino. (2 Qor. 12:9) Isi misiyoone ikke layinkimeeshsho haˈri yannara sabbakate looso diinaggaawe loosinoha calla ikkikkinni hasiisannosire afiˈrateno umisi loosono loosino. Isi Qorontoosi katami giddo Aqiilanna Phirisqila yinanniri mine heeˈrino. Insa dunkaana gowannoreeti. Phaawuloosino dunkaana gowa rosino daafira mito barra insa ledo dunkaana gowanno. (Soq. 18:1-4) Qullaawu ayyaani Phaawuloosi hasiisannosire afiˈrate umisi looso loosannonna sabbakanno gede wolqa uyinosi.

4. Layinki Qorontoosi 12:7-9 kultanno garinni Phaawuloosi waadino qarri maati?

 ⁴ Layinki Qorontoosi 12:7-9 nabbawi. Phaawuloosi konni qummeeshshira “mannimmaˈya utu gede qasanno qarri” waadinoe yiinohu mayyaara hedeeti? Utichu qase egenninoheha ikkiro, buuto xissinoheha ikkara dandaanno. Hakko daafira Phaawuloosi xissanni waadannosihu mitu qarri noosita kulanni no. Isi konne qarra “runkute” qarrisannoeho ‘Sheexaanu sokkaanchooti’ yiino. Sheexaanunna agaanintesi Phaawuloosira mannimmasi utu gede qasanni waadanno qarra xaaddote abbitinokkiha ikkara dandaanno. Ikkirono, busha ayyaanna Phaawuloosira qasanno ‘utichi’ noosita affe giddo qolte xiibbe xisso lexxitannosi gede assate woˈnaaltinoha ikkara dandaanno. Phaawuloosi maa assiyya?

5. Yihowa Phaawuloosi huuccattora dawaro qolinohu hiittoonniiti?

⁵ Phaawuloosi umo Yihowa ‘uticho’ hoolasira hasiˈrino. Isi togo yiino: “Kuni coyi . . . aaniˈyanni hoˈlanno gede Mooticha [Yihowa] sase hige huucciˈroommo.” Phaawuloosi huucciˈrinoha ikkirono mannimmasi qasanno utichi dihoˈlinosi. Hatto yaa kayinni Yihowa Phaawuloosi huuccattora dawaro diqolino yaateni? Hatto yaa diˈˈikkino. Isi huuccattosira dawaro qolinosi. Yihowa qarrasi hoolinokkiha ikkirono, cince saˈˈanno gede wolqa uyinosi. Yihowa iso “Ane wolqa guutte leeltannohu ate wolqiweelle” aanaati yiinosi. (2 Qor. 12:8, 9) Maganu kaaˈlonni Phaawuloosi hagiirrenna giddoyidi keere afiˈre heeˈrino.—Fil. 4:4-7.

6. (a) Yihowa huuccattonkera dawaro qolannohu hiittoonni ikkara dandaanno? (b) Tenne gufo giddo noo qummeeshshuwara Yihowa ate jawaachishate mayyee qaale eino?

⁶ Atino Phaawuloosi gede Yihowa qarrakki hoolahera huuccidhe egennootto? Giddokkinni huucciˈroottoha ikkirono qarrikki hoˈlinokkiha isinni baasanni haˈrinoha ikkara dandaanno; kuni iillanni nooehu Magano hagiirsiisa hoogoommo daafiraati yite yaaddoottoni? Hatto ikkiro Phaawuloosi lawishsha qaagi. Yihowa Phaawuloosi huuccattora dawaro qolinte gede ate huuccattorano dawaro qolannohe. Yihowa qarrakki hoolinokkiha ikkara dandaanno. Kayinni qullaawu ayyaanisi widoonni qarrakki cincite saˈˈatto wolqa aannohe. (Far. 61:3, 4) Xiiwamoottoha ikkirono Yihowa tuge diagurannohe.—2 Qor. 4:8, 9; Fil. 4:13.

7-8. (a) Qullaawu ayyaani bubbete gedeeti yineemmohu ma doogonniiti? (b) Pheexiroosi qullaawu ayyaani loosanno gara xawisinohu hiittoonniiti?

⁷ Qullaawu ayyaani kaaˈlannonketi wole doogo hiitteeti? Dambalu kae noo baari giddo heedhannote dancha bubbe gede, qullaawu ayyaani qarru dambali giddoonni hinge Maganu abbeemmo yee qaale einota haaro alame eate kaaˈlannonke.

⁸ Soqqamaasinchu Pheexiroosi qulxuˈme woshshaadannoha ikkino daafira, baaru aana markaawe hadhannohu hiittoonniitiro seekke afino. Pheexiroosi qullaawu ayyaani loosanno gara xawisate, baaru aana markaawe hadhanno gara xawisanno yine hendanni qaale horoonsiˈrinohu iseraati. Isi togo yee borreessino: “Aye himanino mannu fajjonni didayino; ikkollana himana qullaawu ayyaani massagino manni Maganuwiinni adhe coyiˈrino.”—2 Phe. 1:21.

9. Pheexiroosi ‘massaga’ yaanno qaale horoonsiˈrinohu maa hedeeti?

⁹ Pheexiroosi “massaga” yaanno qaale horoonsiˈrinohu maa hedeeti? Soqqamaasinete Loosi maxaafi borreessaanchi Luqaasino markaawe “bubbe xiibbanna” hadhinota xawisate hakkonne Giriikete Afii qaale horoonsiˈrino. (Soq. 27:15) Mittu Qullaawu Maxaafi fullahaanchi Pheexiroosi Qullaawa Maxaafa borreessiture qullaawu ayyaani ‘massaginonsata’ xawisate markaawe baaru aana hadhanno gara horoonsiˈrinota coyiˈrino. Pheexiroosi markaawe bubbe hadhe hadhannonte gede, Qullaawu Maxaafi masaalaanonna  borreessaano loosonsa umo fushshitanno gede qullaawu ayyaani massaginonsa yiinohu gedeeti. Kuni fullahaanchi lede, “markaawe laaqanno manchi markaawe hadhara tire agurannonte gede, Qullaawu Maxaafi borreessaanono qullaawu ayyaani kulannonsare loosate qixxaabbino” yino. Yihowa loosa hasiissannosire loosino. Isi “bubbe” woy ayyaanasi uyino. Qullaawu Maxaafi borreessaanono assa hasiissannonsare assitino. Insa qullaawu ayyaani biddishshi ledo sumuu yaanno garinni loossino.

10-11. Qullaawu ayyaani massaganni noonketa buuxiˈrate assa hasiissannonkehu lamu coyi maati? Lawishsha kuli.

¹⁰ Xaa yannara Yihowa qullaawa ayyaanasi horoonsiˈre Qullaawa Maxaafa diborreessiisanno. Ikkirono qullaawu ayyaani Maganu mannira xaa geeshsha wolqa aanni no. Yihowa xaano kaaˈlanni noonke. Qullaawu ayyaaninni woˈmunni woˈma kaaˈlo afiˈra dandiineemmohu hiittoonniiti? Ninke assa hasiissannonkere assinanni heeˈnoommoronna teˈee buuxiˈra hasiissannonke. Hatto assa dandiineemmohu hiittoonniiti?

¹¹ Hanni konne lawishsha hendo. Mittu markaawe laaqanno manchi bubbe markaawe haadhe hadhara hasiˈriro, lame coye assa hasiissannosi. Umihunni markaawe bubbe bubbissanni noo widira qola hasiissannosi. Bubbe bubbissanni nooha ikkirono, markaawe malkatenni kayisa hoogiro markaawe alba higge dihadhanno. Layinkihunni, laaqanno manchi shara gudise diriirsa hasiissannosi. Markaawe alba higge hadhannohu bubbe bubbissanno woyite bubbe sharu giddora eˈurooti. Hatteente gede ninkeno cincine Yihowara soqqammanni heeˈra dandiineemmohu qullaawu ayyaani kaaˈlinkero callaati. Qullaawu ayyaaninni kaaˈlo afiˈrate ninkeno lame coye assa hasiissannonke. Umihunni, Maganu ayyaani soqqamaanosi assitara kulannore assa hasiissannonke. Layinkihunni lawishshu yaattonni “sharanke kayisa” yaano dandiinummo deerrinni qullaawu ayyaani assinammora hasiˈrannore baala assa hasiissannonke. (Far. 119:32) Kuri coyibba assinummoro, qullaawu ayyaani dartu dambalinna  qarru giddoonni ammanamme Maganu abbannota haaro alame eˈneemmo gede kaaˈlannonke.

12. Kawiinni aanchine maa ronseemmo?

¹² Qullaawu ayyaani kaaˈlannonketa lame doogo ronsoommo. Qullaawu ayyaani wolqa aannonke hattono qarra dandiine ammanamme heeˈneemmo gede kaaˈlannonke. Qoleno qullaawu ayyaani massagannonke hattono Yihowa loonsammora hasiˈranno looso loonseemmo gedenna qarra cincine hegere heeshsho afiˈneemmo gede kaaˈlannonke. Kawiinni aanchine qullaawu ayyaaninni woˈmunni woˈma kaaˈlo afiˈrate assa hasiissannonkeha shoole coye laˈneemmo.

13. Layinki Ximootewoosi 3:16, 17 kultanno garinni Qullaawa Borro maa assate kaaˈlitannonke? Ninke kayinni maa assa hasiissannonke?

¹³ Umihunni, Maganu Qaale xiinxallino. (2 Ximootewoosi 3:16, 17 nabbawi.) “Qullaawu ayyaani kulanna” yaannohu Giriikete Afii qaali noo gedeenni tirriro “Maganu foolinoha” yitanno tiro afiˈrino. Maganu qullaawa ayyaanasi horoonsiˈre hedosi Qullaawa Maxaafa borreessitu manni surre giddo worino. Qullaawa Maxaafa nabbambeemmonna hiincineemmo woyite Maganu biddishshi surrenkenna wodaninke giddora eanno. Tini Maganu hedo fajjosi ledo sumuu yaanno garinni heeˈneemmo gede kaaˈlitannonke. (Ibi. 4:12) Qullaawu ayyaaninni woˈmunni woˈma kaaˈlo afiˈrate kayinni yanna gaaˈmine Qullaawa Maxaafa ganyine nabbawanna hiinca hasiissannonke. Hatto assinummoro, coyiˈneemmorinna assineemmori baalu Maganu fajjo ledo sumuu yaannoha ikkanno.

14. (a) Kiristaanu gambooshshinkewa qullaawu ayyaani no yineemmohu mayiraati? (b) Gambooshshunniwa qullaawu ayyaaninni kaaˈlo afiˈrate maa assa hasiissannonke?

¹⁴ Layinkihunni, Magano mitteenni magansiˈno. (Far. 22:22) Kiristaanu gambooshshinkewa Yihowa ayyaani no. (Aju. 2:29) Hatto yineemmohu mayiraati? Korkaatuno, ammanate roduuwinke ledo magansiˈnammora gamba yineemmo woyite, qullaawa ayyaana afiˈrate huucciˈneemmo, Maganu Qaali aana xintantinota Maganu Mangiste faarso faarsineemmo, hattono qullaawu ayyaaninni shoomantino roduuwi rosiissanna Qullaawu Maxaafi aana xintamino roso ronseemmo. Kuni ayyaani meya roduuwino qixxaawe kifilensa shiqishanno gede kaaˈlannonsa. Qullaawu ayyaaninni woˈmunni woˈma kaaˈlo afiˈrate kayinni, dancha gede qixxaambe haˈne gambooshshunniwa dawaro qola hasiissannonke. Gambooshshe qixxaambe haˈneemmoha ikkiro, “shara diriirsine agurroonni markaawe” bubbe afidhannonte gede ninkeno qullaawu ayyaaninni kaaˈlo afiˈneemmo.

15. Qullaawu ayyaani sabbakate loosiˈra kaaˈlannonkehu hiittoonniiti?

¹⁵ Sayikkihunni, sabbakate looso loonso. Qullaawa Maxaafa horoonsiˈne sabbankeemmonna rosiinseemmo woyite soqqanshonkera qullaawu ayyaani kaaˈlannonke gede assiˈnanni heeˈneemmo. (Rom. 15:18, 19) Hakko daafira qullaawu ayyaaninni woˈmunni woˈma kaaˈlo afiˈrate ganyine sabbakanna dandaamannoha ikkiro, woˈmanka woyite Qullaawa Maxaafa horoonsiˈra hasiissannonke. Soqqanshonkenni roore dancha guma afiˈrate kaaˈlitannonketi mitte doogo Kiristaanu Heeshshonna Soqqansho—Xiinxallote Maxaafichora fulannoha lawishsha ikkanno hasaawa horoonsiˈrate.

16. Qullaawa ayyaana afiˈneemmoti qara doogo hiitteeti?

¹⁶ Shoolkihunni, Yihowa huucciˈno. (Mat. 7:7-11; Luq. 11:13) Qullaawa ayyaana afiˈneemmoti qara doogo Yihowa huucciˈneeti. Aye coyino, lawishshaho usuru mini, wole agurina Sheexaanu nafa Yihowa huuccattonke macciishshannota woy qullaawa ayyaanasi aannonketa hoola didandaanno. (Yai. 1:17) Qullaawu ayyaaninni woˈmunni woˈma kaaˈlo afiˈrate hiittoonni huucciˈra hasiissannonke? Tenne xaˈmora dawaro afiˈrate hanni Luqaasi Wongeeli giddo calla  huuccattote daafira borreessinoonniha mitto lawishsha laˈno. *

17. Yesuusi huuccattote daafira Luqaasi 11:5-9, 13 kulino lawishshinni maa ronseemmo?

¹⁷ Luqaasi 11:5-9, 13 nabbawi. Yesuusi coyiˈrino lawishshi qullaawa ayyaana afiˈrate ma garinni huucciˈra hasiissannonkero leellishanno. Yesuusi lawishshunni kulino manchi hasiˈrinore afiˈrinohu huucciˈranni “qarrisino daafiraati.” Isi yanna hashshu taalo ikkiturono, jaalisi kaaˈlasira huucciˈra disaalfatino. (Maaja 2018 Xiinxallote Maxaafichora noota xiinxallote kaaˈlitanno borro qoola 6 lai.) Yesuusi konni lawishshinni rosiisara hasiˈrinori maati? Isi togo yiino: “Huuccidhe, uyinanniˈnena. Hasidhe, afidhinannina. Waalcho ganganne fannanniˈnena.” Ikkina, konni lawishshinni maa ronseemmo? Qullaawu ayyaani kaaˈlankera hasiˈnummoro jaante huucciˈra hasiissannonke.

18. Yesuusi coyiˈrino lawishshi garinni Yihowa qullaawa ayyaanasi aannonketa huluullammeemmokkihu mayiraati?

¹⁸ Yesuusi coyiˈrino lawishshi Yihowa qullaawa ayyaanasi aannonkehu mayiraatiro afateno kaaˈlannonke. Yesuusi lawishshunni kulino manchi minisira dayino wosincho danchu garinni wosinsira hasiˈrino. Kuni manchi hashshu taalo minisira dayino manchira itanno sagale aasira hasiˈrino; ikkollana mine sagale dinosi. Yesuusi manchu huucciˈranni waadinosi daafira olliichisi daabbo uyinosi yiino. Yesuusi rosiisara hasiˈrinori maati? Guuntete xeˈne noosi manchi olliichisi huucciˈranni waadinosi daafira aannosiha ikkiro, shaqqadu iimi Anninke qullaawa ayyaana afiˈrate jaatte huuccidhannorira hiitto roore diaanno! Hakko daafira Yihowa qullaawa ayyaanasi aannonke gede huucciˈneemmo huuccattora dawaro qolannota huluullammummokkinni huucciˈra dandiineemmo.—Far. 10:17; 66:19.

19. Kaajjine uurra dandiineemmota huluullammeemmokkihu mayiraati?

¹⁹ Sheexaanu woˈmanka woyite qeelankera sharramannoha ikkirono, iso qeelleemmota horo dihuluullammeemmo. Mayira? Korkaatuno qullaawu ayyaani lame doogonni kaaˈlannonke daafiraati. Umihunni, qarra dandiine saˈneemmota wolqa aannonke. Layinkihunni, Maganu abbannota haaro alame eˈnammo geeshsha Yihowara soqqammanni heeˈneemmo gede kaaˈlannonke. Qullaawu ayyaaninni woˈmunni woˈma kaaˈlo afiˈrate murciˈno!