1-2. (a) Ka nyi ka i wase se u nôngon a mbamzeyol asev use use? Ta iwanger. (b) Ka nyi se lu timen sha mi ken ngeren nee?

I LU nahan u kaa wer, “Ka mea hen sha akaa a karen jighjigh wam a m tagher a mi ken uma yô, m mase kaven mer mo tseegh yô, yange ma m kôrcio u tilen dông ga” vee? Se kpishi se ôr imbakwagh ne. Adooga u ôr kwagh nahan sha ci u u hide u gbidye kwar u nenge er yange u kôrcio u wan ishima a kwaghnyoon shin ku u or wou yô. Ka wea hide a hen sha kwagh shon yô, u nenge wer ka icighan jijingi u Yehova yange wase u u wan ishima a zayol la use use ye; gadia yange a na u “agee a a gande a orumace” yô.—2 Kor. 4:7-9.

² Shi ka i gba u saa icighan jijingi una wase se keng ve se kôrcio u hendan a ieren i botar ne ye. (1 Yoh. 5:19) Heela tseegh ga, gba u se zua a agee sha er se hendan a “ujijingi mbaaferev” yô. (Ef. 6:12) Se lu timen sha igbenda ihiar i icighan jijingi ka a wase se u nôngon a mbamzeyol mban cii yô. Se been yô, se time sha kwagh u se fatyô u eren sha er icighan jijingi una wase se sha hanma kwagh cii yô.

3. Ka gbenda môm u nyi Yehova a wasen se u wan ishima a atsana?

³ Icighan jijingi u Yehova ngu a wase se sha u nan se agee shin tahav mbu se kôrcio u eren nyityôkwagh i i gbe u se er cii, shin er se lu tagher a atsan nahan kpaa. Apostoli Paulu yange nenge ér ka er un lu suur sha “tahav mbu Kristu” ve, un kercio u wan ishima a atsan civir Yehova her ye. (2 Kor. 12:9) Shie u Paulu za zende na u mishen u sha uhar la, lu eren tom u pasen kwagh kpoghuloo shi lu eren tom u zuan a kwagh u nengen sha iyol na kpaa. Shie u lu ken Korinte la, lu hen ya u Akwila man Prisila. Ve lu mba eren tenti. Paulu kpa eren tomaveegh ne, nahan ayange agen a eren tom ne a ve imôngo. (Aer. 18:1-4) Icighan jijingi yange na Paulu agee a eren tom u nengen sha iyol na shi pasen ivangeli kpaa.

4. Er i pase ken 2 Mbakorinte 12:7b-9 nahan, ka zayol u nyi Paulu lu a mi?

 ⁴ Ôr 2 Mbakorinte 12:7b-9. Inja i kwagh u Paulu a ôr ken avur ne ér un ngu a “asaa ken iyol” la ér nyi? Shie u asaa a kom u yô, ka i nyoon we kpishi. Nahan Paulu lu kaan ér mbamzeyol shin akaa agen er un a a nyoon un tsung yô. A yila mbamzeyol mba shon ér ka “ortyom u Satan” u a zer tan un “sambe” (“gbidyen,” ngeren u shin kpe) yô. Alaghga lu Satan shin azôv a na jighilii va Paulu a mbamzeyol mba lu tagher a mi mba ve lu er ka asaa ken iyol na la ga. Kpa ujijingi mbaaferev mbara yange mba fe kwagh u “asaa” shin zayol u Paulu la yô, alaghga ve lu nôngon ér vea seer Paulu ican; lu inja er mba tuur asaa la sha u a seer nyoon Paulu nahan. Paulu di yange er nena?

5. Yehova yange ungwa mbamsen mba Paulu nena?

⁵ Sha hiihii la, Paulu soo ér i dugh un “asaa” la ken iyol kera. A kaa ér: “M zamber a Ter [Yehova] kwa tar . . . mer asaa ne ma a due ken a mo kera.” Er Paulu er mbamsen nahan kpa, asaa la lu un ken iyol her. Nahan kwagh ne tese ér Yehova ungwa mbamsen mba Paulu mbara ga shinii? Ka nahan ga cii. Yange ungwa ve. Yehova yange bee a zayol la kera ga, kpa gema na Paulu agee a wan ishima a zayol shon. Yehova kaa ér: “Ka ken or u agee a yen nan la je ka m hemba tesen tahav av ye.” (2 Kor. 12:8, 9) Shi sha iwasen i Aôndo yô, Paulu za hemen u lun saan saan shi zuan a bem ken ishima kpaa!—Fil. 4:4-7.

6. (a) Alaghga Yehova una ungwa mbamsen asev nena? (b) Ka uityendezwa mba nyi ken avur a Bibilo a ken ikyumhiange ne ve ne u agee?

⁶ I lu nahan u zamber a Yehova wer a bee a zayol wou kera er Paulu yange zamber ér i dugh un asaa nahan vee? Aluer u zamber kwa kimbir kimbir a uwer gban shio kpa zayol shon bee ga, shin ngu hemban vihin gban a gba kera nahan, kwagh shon una na u hen wer alaghga Yehova gema ijime a we shinii? Aluer ka nahan yô, umbur ikyav i Paulu la. Er Yehova ungwa mbamsen nav nahan, we kpa una ungwa mba ou keng je, shi una er kwagh sha mi kpaa! Alaghga Yehova una kar a zayol shon kera jighilii ga. Kpa una gema a na u agee sha ikyev i icighan jijingi na sha er u nôngo a mi yô. (Ps. 61:3, 4) Alaghga a “ta se inya,” kpa mayange je Yehova una kende se ga.—2 Kor. 4:8, 9; Fil. 4:13.

7-8. (a) Ka sha nyi gbenda nahan icighan jijingi a lu inja er ka ahumbe? (b) Peteru yange pase gbenda u icighan jijingi a eren tom la nena?

⁷ Ka gbenda ugen u nyi icighan jijingi shi ngu a wase se? Se fatyô u tôôn icighan jijingi karen sha ahumbe. Ahumbe nga a wase tso u yemen ape a soo u zan la zum u zegemnger a lu kpianger kpishi je kpaa. Kape icighan jijingi kpa una fatyô u wasen se u nôngon a mbamzeyol mba vihin tsung mba se lu tagher a mi la, zan zan se va kar nyôron ken tar u he u Aôndo a tende zwa u van a mi je la.

⁸ Er apostoli Peteru lu orkôronishu yô, yange fa kwagh u zende u tsoo kuma un. Ka nahan ve alaghga shie u lu pasen gbenda u icighan jijingi a eren tom la, yange er tom a ishember i a shi nan kpa i zough sha kwagh u zende u tsoo ne ye. Peteru nger wener: “Ma shighe môm kpa orumace gba karen a ishima i nan tsô ôron kwaghôron u profeti ga, kpa ka icighan jijingi yange a mgbegha ior ve ôr loho u Aôndo ye.” Ishember i ken zwa Grika i i gem er “mgbegha” la inja na yô, ka u “tuur.”—2 Pet. 1:21; ngeren u shin kpe.

9. Shie u Peteru er tom a ishember i “tuur” la, lu nyi soo ér ior ve nenge a mi ken ishima?

⁹ Shie u Peteru er tom a ishember i “tuur” la, lu nyi soo ér ior ve nenge a mi ken ishima? Luka u nger takerada u Aerenakaa la kpa yange er tom a imba ishember i ken zwa Grika ne shie u lu ôron kwagh u tso u ahumbe a lu “mgbeghan” un yô. (Aer. 27:15) Nahan orgen u timen sha akaa a ken Bibilo maa kure ikyaa ér, shie u Peteru nger ér  icighan jijingi yange “tuur” mbangeren Bibilo la, Peteru er tom a ishember i ia na ior vea hen sha kwagh u tso u a lu yemen ken mnger yô. Peteru lu kaan ér, er ahumbe nga a mgbeghan shin a tuur tso a yemen a mi sha er tso shon una za nyôr ape a lu zan la nahan, kape icighan jijingi kpa yange tuur uprofeti kua mbangeren Bibilo u eren tom ve je la. Ortimen sha akaa a ken Bibilo ne shi kaa ér “uprofeti mban yange ve lu er tso u i samber ikyondo i tsoo i i te sha mi la nahan,” inja na yô, mbangeren Bibilo mban yange ve kegh a kegh iyol u eren tom u icighan jijingi lu tesen ve ér ve er la. Yehova yange er kwagh u gba u una er yô. Yange na “ahumbe” shin icighan jijingi. Mbangeren Bibilo mban di kpaa er tom u i wa ve u eren ne. Ve er kwagh u jijingi tese ve ér ve er la.

10-11. Ka akaa ahar a nyi i gbe u se er keng sha er icighan jijingi una hemen se? Tese ikyav.

¹⁰ Nyian ne Yehova kera ngu nan jijingi na ér a tuur ior ve nger ityakerada i Bibilo ga, shie u ngeren Bibilo la kar. Nahan kpa, Yehova ngu eren tom a icighan jijingi na u hemen ior nav. Yehova ngu eren tom na her. Nahan ka nyi i gbe u se er keng ve icighan jijingi una hemen se? Gba u se kpa se za hemen u eren ci wase. Se er kwagh ne nena?

¹¹ Nenge ase ikyav ne. Cii ve or u nahan tso nana zua a iwasen ken ahumbe a a lu karen la yô, a gba u nana er akaa ahar. Hiihii yô, a gba u nana ver ishigh ki tso u nan vegher u ahumbe a lu yemen la. Shi aluer ornahan tso de tso la ngu hen ihyongo, a kera yem a mi ken atô ape ahumbe a lu karen la sha er aa tuur un ga yô, tso la una za mape môm ga. Sha uhar yô, a gba u nana samber ikyondo i tsoo la cica cii. Shi aluer ahumbe nga karen je kpa, saa ikyondo i tsoo la ia var ahumbe ve tso shon una hii u yemen ye. Kape kwagh wase vea icighan jijingi kpa a lu je la. Saa icighan jijingi una wase se keng ve se za hemen u wan ishima civir Yehova ye. Kpa cii man se zua a iwasen la yô, saa se er akaa ahar ne. Hiihii yô, saa se eren akaa a icighan jijingi a tuur shin a mgbeghan mbacivir Aôndo u eren la. Sha uhar yô, gba u se “samber akondo a tsoo ase” cica cii sha u eren akaa shon sha afatyô wase cii. (Ps. 119:32)  Se eren akaa a ahar ne cii yô, icighan jijingi una wase se u wan ishima a ahendan kua akaa a karen jighjigh wase shi una na se agee se za hemen u civir Yehova sha mimi zan zan se kar nyôron ken tar u he u Aôndo la.

12. Ka nyi se lu timen sha mi hegene?

¹² Se hila time sha igbenda ihiar i icighan jijingi a wasen se yô. Icighan jijingi ngu a na se agee shi a wase se u tilen sha mimi zum u se tagher a akaa a karen jighjigh wase yô. Shi icighan jijingi ngu a mgbegha se shi a wasen se u eren tom u Yehova a soo ér se er la, man kwagh ne una na se va zua a uma u tsôron. Hegen se lu timen sha akaa anyiin a i gbe hange hange u se er cii ve icighan jijingi una wase se yô.

13. Er i pase ken 2 Timoteu 3:16, 17 nahan, ka nyi Mkaanem ma Aôndo ma a fatyô u eren sha ci wase, kpa ka nyi i gbe keng u se ere?

¹³ Hiihii yô, henen Mkaanem ma Aôndo. (Ôr 2 Timoteu 3:16, 17.) Ishember i ken zwa Grika i i gem ér ka “Aôndo a ne i nger” la, inja na ér “iôôn i Aôndo.” Aôndo yange a er tom a jijingi na u wan mbamhen nav ken asema a ior mba yange ve nger Bibilo la. Ka sea ôr Bibilo shi sea gbidye kwar sha mi yô, akaawan a Aôndo a tema ken mhen wase shi a nyôr se ken ishima kpaa. Mbamhen mba Aôndo a ne i nger ne maa ve mgbegha se u eren akaa ken uma wase sha gbenda u a doo un yô. (Heb. 4:12) Kpa cii man icighan jijingi a wase se tsembelee yô, saa se ver ian i henen Bibilo hanma shie shi gbidyen kwar sha kwagh u se henen la zulee. Se er nahan yô, Mkaanem ma Aôndo ma a lu mgbeghan se sha hanma kwagh u se ôron shi se eren cii.

14. (a) Se fatyô u kaan ser icighan jijingi ngu a lu ken mbamkombo asev mba Mbakristu sha ci u nyi? (b) Se er nan ve icighan jijingi una fatyô u wasen se zum u se ze mbamkombo aseva?

¹⁴ Sha uhar yô, civir Aôndo a mbagen imôngo. (Ps. 22:22) Se fatyô u kaan ser mbamkombo asev mba Mbakristu mbara ka ajiir a “ahumbe la a karen” yô. Jijingi u Yehova ngu a lu ken mbamkombo. (Mpa. 2:29) Se ôr nahan sha ci u nyi? Ka sha ci u ka sea zua imôngo u civir Yehova vea anmgbianev asev mba nomso man mba kasev yô, se er msen se sôn icighan jijingi shi se wa atsam a Tartor a i dugh asember a a ken Mkaanem ma Aôndo yô, shi se ungwa akaawan a ken Bibilo sha ijô i anmgbianev mba nomso mba i lu icighan jijingi a tsough ve yô. Shi ka icighan jijingi la môm ngu a wase anmgbianev mba kasev u wan agoyol sha mbaasaimenti vev shi va eren ve kpaa ye. Nahan aluer se soo ser icighan jijingi a wase se yô, gba u se waan agoyol sha mbamkombo shi sea za yô, se wa zwa sha kwagh u i lu henen la. Aluer se er nahan yô, se mba inja er tso u i samber ikyondo na nahan.

15. Icighan jijingi wasen se ken tom u pasen kwagh la nena?

¹⁵ Sha utar yô, eren tom u pasen kwagh. Ka sea eren tom a Bibilo u pasen kwagh shi tesen ior yô, se mba den ser icighan jijingi a wase se ken tom la. (Rom. 15:18, 19) Nahan kpa, cii man jijingi u Aôndo la a wase u yô, gba u u eren tom u pasen kwagh la hanma shie shi u eren tom a Bibilo hanma ijiir i i gbe shami cii. Kwagh môm u una wase u, u hemba fan u lamen a ior zum u u lu pasen kwagh yô, ka u dondon igbenda i hiin iliam a ior i taver ga i ken Antakerada u Mkombo u Uma Wase man Tom Wase la.

16. Ka sha nyi gbenda jighilii se fatyô u zuan a icighan jijingi?

¹⁶ Sha unyiin yô, er msen hen Yehova. (Mat. 7:7-11; Luka 11:13) Gbenda u se fatyô u zuan a icighan jijingi jighilii yô, ka u eren msen sônon Yehova ser a na se. Kwagh môm una fatyô u yangen mbamsen asev u nyôron hen Yehova shin yangen iyua i jijingi u Aôndo la u aren a vese ga, aluer se mba ken purusu je kpaa. Satan je kpa una fatyô u yangen jijingi u Yehova u aren a vese ga. (Yak. 1:17) Kpa se er msen nena ve, se zua a  iwasen i icighan jijingi? De se time sha kwagh u msen i wa zan shimi sha er se zua a mlumun sha mpin la yô. Se lu timen sha injakwagh igen i i lu ken takerada u Luka tseegh yô. *

17. Ka nyi se fatyô u henen sha kwagh u msen ken injakwagh i Yesu ôr ken Luka 11:5-9, 13 laa?

¹⁷ Ôr Luka 11:5-9, 13. Injakwagh i Yesu la tese se er se er msen se sôn icighan jijingi yô. Or u ken injakwagh ne la yange zua a kwagh u kwagh gba un a mi la ‘er a gba uwer ga yô.’ Yange cia u pinen ijende na iwasen ga, shin er tugh ile gba ken atô nahan kpaa. * Yesu yange kaa ér injakwagh ne tese se nyi sha kwagh u msene? A kaa ér: “Sônon nen her, nahan a na ne. Keren nen her, nahan ne zua a mi. Manden nen uwegh her, nahan a bugh ne.” Nahan kwagh ne tese se nyi? Tese ér cii man se zua a iwasen i icighan jijingi yô, saa se er msen se sôn icighan jijingi a uwer gban shio.

18. Er injakwagh i Yesu la i tese nahan, se fatyô u lun a vangertiôr ser Yehova una na se icighan jijingi na sha ci u nyi?

¹⁸ Injakwagh i Yesu la shi wase se u fan er i hii ve i lu u Yehova una na se icighan jijingi yô. Or u ken injakwagh la yange soo u lun or u eren a orvannya dedoo. A nenge ér gba u una na orvannya na u a va nyer tugh ne kwaghyan, kpa lu a kwagh u una na un ga. Yesu kaa ér ijende i or u ken injakwagh la yange na or shon bredi sha ci u or la gba uwer u sônon ga. Nahan Yesu lu tesen ér nyi? Aluer orumace u nan yen ne je kpa, nan kôrcio u wasen orwanndor a nan u nan gbe uwer u sônon nan kwagh ga yô, hide Ter wase u sha la ve una kera wase mba ve sônon un icighan jijingi a uwer gban shio la ga yee? Sha nahan yô, se fatyô u eren msen, lun a vangertiôr ser Yehova una ungwa mbamsen mba se sônon un icighan jijingi la kpee je.—Ps. 10:17; 66:19.

19. Se mba a vangertiôr ser se fatyô u wan ishima sha ci u nyi?

¹⁹ Er satan a gbe uwer u hendan a vese ga nahan kpa, se na jighjigh ser una hemba se ga. Sha nena yô? Sha ci u icighan jijingi wasen se sha igbenda i ihiar ne. Hiihii yô, ngu a na se agee a kwagh a gbe se a mi la sha er se nôngo a mbamzeyol yô. Sha uhar yô, icighan jijingi ka tahav mbu mbu wasen se u wan ishima zan hemen u civir Yehova, veren ashe u va lun ken tar u he la yô. Yô, se kange nen ishima u ngohol iwasen i icighan jijingi a ne se la cii!