1-2. (a) Ncinzi cikonzya kutugwasya kuliyumya mumapenzi ngotujana abuzuba? Amupandulule. (b) Ino ncinzi ncotutiilange-lange mucibalo eeci?

“CIINDI nondiyeeya kujatikizya masunko aakandicitikila, ndilasyoma kuti kunyina nondakali kukonzya kwaazunda munguzu zyangu ndemwini.” Sena andinywe kuli ciindi nomwakaambide majwi aaya? Bunji bwesu twakalaambide kale. Ambweni mwakaamba oobo ciindi nomwakabona mbomwakaliyumya kubulwazi bumwi bukatazya kupona naa ciindi nomwakafwidwa muyandwa wanu. Mwayeeya kujatikizya sunko eelyo, mulimvwa kuti mwakacikonzya kuliyumya nkaambo muuya uusalala wa Jehova wakamupa “nguzu zigambya iziinda zyabantu.”—2Kor. 4:7-9.

² Kunze lyaboobo, tusyoma muuya uusalala kutegwa tuliyumye kubuyumu-yumu buletwa anyika eeyi mbyaabi. (1Joh. 5:19) Kuyungizya waawo, tujisi nkondo yakutingana “amyuuya mibi.” (Ef. 6:12) Lino tulabandika nzila zyobilo akubona muuya uusalala mboukonzya kutugwasya kuliyumya kubuyumu-yumu boonse oobu. Mpoonya tulabandika kujatikizya ncotukonzya kucita kutegwa tugwasyigwe kapati amuuya uusalala.

3. Muunzila nzi imwi Jehova mwatugwasya kuliyumya kwiinda mumuuya wakwe uusalala?

³ Muuya uusalala wa Jehova ulatugwasya kwiinda mukutupa nguzu zyakuzuzikizya mikuli yesu, tacikwe makani amasunko ngotukonzya kujana. Nokuba kuti mwaapostolo Paulo wakajisi masunko, wakalizyi kuti wakali kucikonzya kuzumanana kubelekela Jehova akaambo kakusyoma “nguzu zya Kristo.” (2Kor. 12:9) Mulweendo lwakwe lwabili lwabumisyinali, Paulo tanaakali buyo musungu mumulimo wakukambauka, pele alimwi wakali kubeleka mulimo wakumubili kutegwa ajane mali aakuligwasya. Wakali kukkala antoomwe aba Akula a Purisila muŋanda yabo ku Korinto. Mulimo wabo wakali wakupanga matente. Akaambo kakuti mulimo wabo awa Paulo wakalikozyenye,  mazuba amwi wakali kubeleka ambabo. (Mil. 18:1-4) Muuya uusalala wakapa Paulo nguzu zyakubeleka mulimo wakumubili alimwi akuzuzikizya mulimo wakwe wakukambauka.

4. Kweelana alugwalo lwa 2 Bakorinto 12:7b-9, ndipenzi nzi ndyaakajisi Paulo?

⁴ Amubale 2 Bakorinto 12:7b-9. Ncinzi Paulo ncaakali kupandulula mutupango ootu ciindi naakaamba kuti wakajisi “mumvwa mumubili”? Ikuti mwayaswa mumvwa mumubili, mulakonzya kumvwa kucisa kapati. Aboobo Paulo wakali kwaamba kuti wakapenga kapati musunko ndyaakajisi. Sunko eelyo wakalyaamba kuti “mungelo wa Saatani” iwakali ‘kumuuma’ lyoonse. Ambweni Saatani amadaimona aakwe tabali mbabo ibakamuletela penzi eelyo Paulo, ilyakali mbuli mumvwa uuyasa kapati mumubili wakwe. Pele ciindi myuuya mibyaabi eeyo noyakabona penzi ndyaakajisi Paulo, yeelede kuti yakasoleka kupa kuti penzi lyakwe liindile buya. Eeco cakali mbuli muntu uutonta bumvwa buyaside kale. Pele ino ncinzi ncaakacita Paulo?

5. Ino Jehova wakayiingula buti mipailo ya Paulo?

⁵ Kumatalikilo Paulo wakali kuyanda kuti “mumvwa” ooyo ugwisyigwe mulinguwe. Wakaamba kuti: “Ziindi zyotatwe ndakakombelezya Mwami [Jehova] akaambo kaceeci, kuti cindileke.” Pele nokuba kuti Paulo wakapaila, mumvwa ooyo kunyina nowakazwa pe. Sena eeci caamba kuti Jehova tanaakayiingula mipailo ya Paulo? Peepe. Wakayiingula. Jehova kunyina naakaligwisya penzi lya Paulo, pele wakamupa nguzu zyakukonzya kuliyumya kupenzi eelyo. Jehova wakaamba kuti: “Nguzu zyangu zilalondolwa mukubula nguzu kwako.” (2Kor. 12:8, 9) Kwiinda mukugwasyigwa a Jehova, Paulo wakazumanana kuba alukkomano alimwi aluumuno lwamumizeezo!—Flp. 4:4-7.

6. (a) Mbuti Jehova mbwakonzya kwiingula mipailo yesu? (b) Ino nzisyomezyo nzi izili mumagwalo aabikkidwe mumuncali izyamuyumya kapati?

⁶ Mbubwenya mbuli Paulo, sena kuli ciindi nomwakalombede Jehova kuti aligwisye sunko lyanu? Ambweni mwakapaila ziindi zinji kuzwa ansi aamoyo kujatikizya penzi eelyo, pele kunyina nolyakazwa naa ambweni lyakaindila buya. Sena eeco cakamupa kulibilika akuyeeya kuti ambweni Jehova tanaakali kumukkomanina? Ikuti naa mbocibede oobo, amuyeeye cikozyanyo ca Paulo. Mbubwenya Jehova mbwaakayiingula mipailo yakwe, andinywe mipailo yanu uyooyiingula! Ambweni Jehova takonzyi kuligwisya penzi lyanu. Pele kwiinda mukubelesya muuya uusalala, uyoomupa nguzu nzyomuyandika kuti muliyumye kusunko eelyo. (Int. 61:3, 4) Mulakonzya ‘kuumputwa ansi’ pele Jehova takamulekelezyi pe.—2Kor. 4:8, 9; Flp. 4:13.

7-8. (a) Ino muunzila nzi muuya uusalala mboubeleka mbuli muwo? (b) Mbuti Petro mbwaakapandulula mboubeleka muuya uusalala?

⁷ Ino ninzila nzi aimbi moutugwasya muuya uusalala? Tulakonzya kukozyanisya muuya uusalala kumuwo. Bwato bulakonzya kubelesya muwo uunga kabotu kutozya kubusena nkobuunka kusikila bukasike kabotu nokuba kuti kuli guwo pati mulwizi. Mbubwenya buyo, muuya uusalala ulatugwasya kuzumanana kubelekela Jehova kusikila tukanjile munyika mpya njaakatusyomezya Leza, nokuba kuti tulakonzya kujana masunko.

⁸ Mbwaanga wakali muzubi wanswi, mwaapostolo Petro wakalaazyi kapati makani aajatikizya kweenda mumaanzi. Ambweni aaka nkakaambo kakapa kuti abelesye bbala ililibonya kuti liliswaangene akweenda mumaanzi ciindi naakali kupandulula muuya uusalala mboubeleka. Petro wakalemba kuti: “Kunyina ciindi ibusinsimi nobwakaba akaambo kakuyanda kwamuntu, pele bantu bakaambaula zyakazwa kuli Leza kwiinda mukusololelwa amuuya uusalala.” Ibbala lya Chigiriki ilyakasandululwa kuti “kusololelwa” lyaamba “kutontwa.”—2Pet. 1:21.

9. Ino ncinzi ncaakali kupandulula Petro ciindi naakabelesya bbala lyakuti “kutontwa”?

⁹ Ino ncinzi ncaakali kupandulula Petro ciindi naakabelesya bbala lyakuti “kutontwa”? Ibbala likozyenye abbala eeli lya Chigiriki lyakabelesyegwa a Luka mulembi wabbuku lya Milimo,  kupandulula ‘kutonkwa’ kwabwato amuwo. (Mil. 27:15) Sikwiiya zyamu Bbaibbele umwi wakaamba kuti, ciindi Petro naakalemba kuti balembi ba Bbaibbele “bakasololelwa” amuuya uusalala wakabelesya bbala ilyakali kupa bantu kuyeeya makani aakweenda mumaanzi. Petro wakali kupandulula kuti mbubwenya muwo mboutonka bwato kuti busike nkobuunka, awalo muuya uusalala wakabagwasya balembi ba Bbaibbele kutegwa bacikonzye kulemba. Sikwiiya zyamu Bbaibbele ooyu wakaamba kuti balembi ba Bbaibbele bakali mbuli mato “akajalwidwe milembo.” Bakalilibambilide kuubeleka mulimo ngobakasololelwa amuuya uusalala. Jehova wakacita lubazu lwakwe. Wakabapa “muwo,” naa muuya uusalala. Balembi ba Bbaibbele abalo bakacita lubazu lwabo. Bakabeleka kweelana ambowakabasololela muuya.

10-11. Nzintu nzi zyobilo nzyotweelede kucita kutegwa tube masimpe kuti tuli mukusololelwa amuuya uusalala? Amupe cikozyanyo.

¹⁰ Nokuba boobo, mazuba aano Jehova tacuubelesyi muuya wakwe uusalala kugwasya bantu kuti balembe mabbuku aamu Bbaibbele. Pele ulaubelesya muuya ooyu kusololela babelesi bakwe. Aboobo Jehova ucicita lubazu lwakwe. Mbuti mbotukonzya kugwasyigwa kapati amuuya uusalala wa Leza? Tweelede kuba masimpe kuti tulazumanana kucita lubazu lwesu. Ino inga twacita buti oobo?

¹¹ Amuyeeye kujatikizya cikozyanyo eeci. Kutegwa agwasyigwe amuwo, sikweenzya bwato weelede kucita zintu eezyi zyobilo. Cakusaanguna, weelede kutola bwato bwakwe abusena aayinda muwo. Nkaambo kuti naa taacita oobo, bwato bwakwe tabukonzyi kweenda ikuti kabuli acito icili kulamfwu abusena aayinda muwo. Cabili, weelede kwiijalula kapati milembo yabwato bwakwe. Nkaambo nokuba kuti muwo ulaunga, bwato bwakwe inga bweenda lilikke buyo kuti muwo ooyo wanjila mumilembo. Mbubwenya buyo, inga twacikonzya kuzumanana kubelekela Jehova lilikke buyo ikuti twagwasyigwa amuuya uusalala. Kutegwa muuya ooyo utugwasye, tweelede kucita zintu eezyi zyobilo. Cakusaanguna, tweelede kucita zintu eezyo muuya wa Leza nzyousololela babelesi bakwe kuti bacite. Cabili, tweelede kuzicita zintu  eezyo kusikila mpotugolela. (Int. 119:32) Ikuti twacita oobo, muuya uusalala uyootupa nguzu zyakuliyumya mumasunko aali mbuli guwo pati kutegwa tuzumanane kubelekela Jehova cakusyomeka kusikila mane tukanjile munyika ya Leza mpya.

12. Ino ncinzi ncotutiilange-lange lino?

¹² Kusikila waawa, twabandika nzila zyobilo izitondezya mbotugwasyigwa amuuya uusalala. Yakusaanguna, muuya uusalala ulatupa nguzu alimwi akutugwasya kuti tuzumanane kusyomeka notuli mumasunko. Yabili, muuya uusalala ulatusololela alimwi akutugwasya kubeleka mulimo ooyo Jehova ngwayanda kuti tucite, eelyo eeci ciyootupa kuba abuumi butamani. Lino atulange-lange zintu zyone nzyotweelede kucita kutegwa tugwasyigwe kapati amuuya uusalala.

13. Kweelana alugwalo lwa 2 Timoteyo 3:16, 17, ino Magwalo inga atugwasya buti, pele ino ncinzi ncotweelede kucita?

¹³ Cakusaanguna, amwiiye Jwi lya Leza. (Amubale 2 Timoteyo 3:16, 17.) Ibbala lya Chigiriki lyakasandululwa kuti ‘kusololelwa a Leza’ lyaamba kuti ‘kuyoyelwa a Leza.’ Leza wakabelesya muuya wakwe uusalala ‘kuyoya’ mizeezo yakwe mubalembi ba Bbaibbele. Ciindi notubala Bbaibbele alimwi akuzinzibala kuyeeya nzyotubala, malailile aa Leza alanjila mumizeezo alimwi amumoyo wesu. Malailile aayo aakasololelwa amuuya atupa kucinca bukkale bwesu kutegwa kabweendelana akuyanda kwa Leza. (Heb. 4:12) Pele kutegwa tugwasyigwe kapati amuuya uusalala, tweelede kujana ciindi cakubala Bbaibbele abuzuba alimwi akuzinzibala kuyeeya nzyotubala. Ikuti twacita oobo, Ijwi lya Leza linootweendelezya muzintu zyoonse nzyotwaamba alimwi akucita.

14. (a) Nkaambo nzi ncotukonzya kwaamba kuti ‘muwo ulaunga’ kumiswaangano yesu ya Bunakristo? (b) Mbuti mbotukonzya kujanika kumiswaangano katuli mbuli bwato ibujisi “milembo iijulidwe”?

¹⁴ Cabili, amukombe Leza antoomwe. (Int. 22:22) Munzila imwi, kumiswaangano yesu ya Bunakristo nkonkuko “muwo nkounga.” Eeci caamba kuti muuya wa Jehova ulajanika kumiswaangano. (Ciy. 2:29) Nkaambo nzi ncotwaambila boobo? Akaambo kakuti ciindi notuswaangana a Banakristoma kutegwa tukombe Leza, tulapaila kulomba muuya uusalala, tulaimba nyimbo zya Bwami iziyeeme aa Jwi lya Leza alimwi tulaswiilila malailile aazwa mu Bbaibbele aapegwa abakwesu ibakasalwa amuuya uusalala. Kuyungizya waawo, muuya uusalala nguwenya ooyo ulabagwasya bacizyi kulibambila alimwi akupa zibeela zyabo. Nokuba boobo, kutegwa tugwasyigwe kapati amuuya uusalala, tweelede kulibambila kupa bwiinguzi kumiswaangano. Munzila eeyi, ciindi notuli kumiswaangano, tunoolibambilide kugwasyigwa amuuya uusalala mbubonya mbuli bwato ibujisi “milembo iijulidwe.”

15. Ino mbuti muuya uusalala mboutugwasya mumulimo wakukambauka?

¹⁵ Catatu, amutole lubazu mumulimo wakukambauka. Ciindi notubelesya Bbaibbele mumulimo wakukambauka alimwi akuyiisya, tuzumizya muuya uusalala kutugwasya mumulimo ooyu. (Rom. 15:18, 19) Kutegwa mugwasyigwe kapati amuuya uusalala, mweelede kunootola lubazu lyoonse mumulimo wakukambauka alimwi akulibelesya Bbaibbele ciindi nocikonzyeka kucita boobo. Nzila imwi mbomukonzya kuzwidilila mumulimo wakukambauka nkwiinda mukubelesya mibandi yacitondezyo iijanika mu Kabbuku Kamuswaangano.

16. Ninzila nzi iigaminide kapati motukonzya kutambula muuya uusalala?

¹⁶ Cane, amupaile kuli Jehova. (Mt. 7:7-11; Lk. 11:13) Nzila iigaminide kapati motukonzya kutambula muuya uusalala, nkwiinda mukupaila kuli Jehova. Kunyina cikonzya kusinkila mipailo yesu kusika kuli Jehova naa kutukasya kutambula muuya wa Leza. Muuya uusalala ulakonzya kutugwasya nokuba kuti tuli muntolongo, alimwi Saatani takonzyi kutulesya kuutambula. (Jak. 1:17) Pele ino mbuti mbotweelede kupaila kutegwa tugwasyigwe kapati amuuya uusalala? Kutegwa twiingule mubuzyo ooyu, atulange-lange  makani aajatikizya mupailo kuzwa kucikozyanyo icilembedwe buyo mu Makani Mabotu aa Luka. *

17. Nciiyo nzi cijatikizya mupailo ncotukonzya kwiiya kucikozyanyo ca Jesu icilembedwe kulugwalo lwa Luka 11:5-9, 13?

¹⁷ Amubale Luka 11:5-9, 13. Cikozyanyo ca Jesu cilatondezya mbotweelede kupaila kutegwa tulombe muuya uusalala. Mucikozyanyo eeci, mwaalumi ooyo wakapegwa ncaakali kuyanda ‘akaambo kakuti wakazumanana kukombelezya.’ Kunyina naakayoowa kulomba mweenzinyina kutegwa amugwasye nokuba kuti akali akati kamasiku. (Amubone Malifalensi Aamu Kabbuku Kamuswaangano Wabuumi Amulimo Wesu kamu July 2018 aalugwalo lwa Luka 11:8.) Ino Jesu wakaamba kuti cikozyanyo eeci cituyiisya nzi kujatikizya mupailo? Wakati: “Amuzumanane kulomba, eelyo muyoopegwa nzyomulomba; amuzumanane kuyandaula, eelyo muyoojana; amuzumanane kukonkomona, eelyo muyoojalwidwa.” Ino eeci cituyiisya nzi? Kutegwa tutambule lugwasyo lwamuuya uusalala, tweelede kuzumanana kuulomba cakukombelezya.

18. Kweelana acikozyanyo ca Jesu, nkaambo nzi ncotukonzya kuba masimpe kuti Jehova uyooyiingula mipailo yesu ciindi notulomba muuya uusalala?

¹⁸ Cikozyanyo ca Jesu alimwi citugwasya kubona kaambo Jehova ncatupeda muuya uusalala. Mwaalumi wamucikozyanyo ca Jesu wakali kuyanda kumutambula kabotu mweenzu wakwe. Wakalimvwa kuti wakeelede kumupa cakulya mweenzu wakwe iwakaboola akati kamasiku, pele wakanyina cakulya cili coonse cakumupa. Jesu wakaamba kuti simukobonyina wakamupa cinkwa mwaalumi ooyo akaambo kakuti wakazumanana kumukombelezya. Ino ncinzi ncaakali kuyiisya Jesu mucikozyanyo eeci? Ikuti muntu uutalondokede kakonzya kulyaaba kugwasya simukobonyina uukombelezya, nkokuti Taateesu uuli kujulu siluse uyakwiinda kubapa muuya uusalala aabo ibazumanana kumulomba. Aboobo tulakonzya kuba masimpe kuti Jehova uyooyiingula mipailo yesu ciindi notulomba muuya uusalala.—Int. 10:17; 66:19.

19. Nkaambo nzi ncotuli masimpe kuti tuyoozwidilila?

¹⁹ Tulakonzya kuba masimpe kuti, nokuba kuti Saatani ulazumanana kutulwana kutegwa atuzunde, tuyoozwidilila. Nkaambo nzi? Nkaambo kakuti muuya uusalala ulatugwasya munzila zyobilo. Yakusaanguna, ulatupa nguzu nzyotuyandika kutegwa tuliyumye mumapenzi. Yabili, muuya ooyu ninguzu izitugwasya kuzumanana kubelekela Jehova kusikila mane tukanjile munyika mpya. Atube amakanze aakuzumanana kugwasyigwa kapati amuuya uusalala!