1-2. (a) Kiki ekitukonyera kugumiisiriza ebizibu ebiturabamu butoosa? Soborra. (b) Nitwija kubazaaho ki omu kicweka kinu?

“OBUNYIJUKA ekizibu ekinarabiremu, ninkigumya ngu nkaba ntasobora kukisingura habwange nyenka.” Naiwe wakabazaaga ekintu nka kinu? Abarukukira obwingi tukibaza. Nosobora kuba wakibalize hanyuma y’okwijuka omulingo wasoboire kugumiisiriza oburwaire bw’amaani rundi kufeerwa omuntu wawe. Obwotekerezaaho ekizibu eki, okirora ngu ekintu kyonka ekyakukonyire kugumiisiriza nugwo omwoyo gurukwera Yahwe oguyakuhaire kandi gwakuha “amani agali amaingi muno.”​—2 Kol. 4:7-9.

² Ekintu ekindi, nitwetaaga omwoyo ogurukwera nukwo tutahabisibwa ensi enu embi. (1 Yoh. 5:19) Kandi nitwetaaga amaani maingi kusobora kurwanisa ‘emyoyo [emibi].’ (Bef. 6:12) Nitwija kubazaaho emiringo ebiri nk’oku omwoyo ogurukwera gutukonyera kugumira ebizibu binu byona. Hanyuma nitwija kurora ebintu ebitusemeriire kukora kusobora kutunga obukonyezi bw’omwoyo ogurukwera omu bwijwire.

3. Gumu ha miringo Yahwe atukonyeramu kugumiisiriza ebizibu byaitu niguha?

³ Omwoyo gwa Yahwe gutukonyera obugutuha amaani turukwetaaga kusobora kuhikiriza obujunaanizibwa bwaitu n’obuturukuba nituraba omu bizibu. Nobukiraaba ngu omukwenda Paulo akaraba omu bizibu bingi, akasobora kwikara naheereza Yahwe habwokuba akesiga “amani ga Kristo.” (2 Kol. 12:9) Omu rugendo rwe orwakabiri nk’omumisani, Paulo akekamba muno omu buheereza kandi akakora kusobora kutunga sente z’okwerolerra. Obwakaba ali omu Kolinso akaba naikara omu ka ya Akura na Pirisikira. Omulimo gwabo gwali gw’okukora eheema. Habwokuba Paulo nauwe akaba ali mukozi w’eheema, ebiro ebimu yakoraga nabo.  (Eng. 18:1-4) Omwoyo ogurukwera gukasobozesa omukwenda Paulo kukora omulimo ogw’okwehikyaho ebyetaago bye hamu n’okukora omulimo gw’okutebeza.

4. Kusigikirra ha 2 Abakolinso 12:7b-9, Paulo akaba aine ekizibu ki?

⁴ Soma 2 Abakolinso 12:7b-9. Omu kyahandiikirwe kinu, Paulo akaba namanyisa ki obuyagambire ngu akaba aine “ekicumita omu mubiri”? Kakuba oba oine ekicumita rundi ihwa omu mubiri, ohurra obusaasi bwingi. Nahabweki Paulo akaba namanyisa ngu akaba aine ekizibu ekyamuleteraga obusaasi bwingi. Ekizibu kinu akakyeta “omukwenda wa Setani” ayaikaraga ‘namuteera’. Nikisoboka kuba ngu Sitaani rundi ba malaika be badaimoni tibali nubo baletiire Paulo ihwa elyakaba aine omu mubiri gwe. Baitu emyoyo enu emibi obuyakyetegeriize ngu Paulo aine ihwa, nesobora kuba yakozere kyona ekirukusoboka kulisindikira kimu omu mubiri gwe, nukwo ayeyongere kusaasa rundi ekalengaho kwongera ha kizibu kye. Paulo akakora ki?

5. Yahwe akagarukamu ata esaara za Paulo?

⁵ Ha kubanza, Paulo akaba nagonza Yahwe amwihemu ihwa linu. Akagamba ati: “Nkesengereza [Yahwe] emirundi esatu [lindugeho].” Baitu Paulo n’obwaraaaba yasabire muno, ihwa linu litamurugemu. Kinu nikimanyisa ngu Yahwe atagarukemu esaara za Paulo? Nangwa. Akazigarukamu. Yahwe ataiheho ekizibu kya Paulo baitu akamuha amaani ag’okukigumira. Yahwe akamugambira ati: “Amani gange nigahikirra omu bugara.” (2 Kol. 12:8, 9) Kandi habw’obukonyezi bwa Ruhanga, Paulo akasobora kwikara aine okusemererwa hamu n’obusinge omu mutima.​—Baf. 4:4-7.

6. (a) Yahwe nasobora ata kugarukamu esaara zaitu? (b) Ebyahandiikirwe ebibazibweho omu kacweka kanu birumu mirago ki erukukugarramu amaani?

⁶ Kusisanaho na Paulo, naiwe oine ekizibu eky’osabire Yahwe akumarreho? Nosobora kuba osabire muno Yahwe kumaraho ekizibu eki baitu kandi kiremere kuhwaho oihireho nikyeyongera bweyongera. Kinu kisemeriire kukuletera kutekereza ngu Yahwe tarukukugonza? Nangwa, ijuka ekyokurorraho kya Paulo. Nk’oku Yahwe yagarukiremu esaara za Paulo, naiwe naija kukugarukamu. Yahwe asobora kutaihaho ekizibu kyawe. Baitu naija kukozesa omwoyo gwe ogurukwera kukuha amaani ag’orukwetaaga kusobora kugumira ekizibu eki. (Zab. 61:3, 4) Nosobora ‘kunagwa hansi’ baitu Yahwe tarukwija kukuleka.​—2 Kol. 4:8, 9; Baf. 4:13.

7-8. (a) Omwoyo ogurukwera nigusisana guta n’omuyaga? (b) Petero akasoborra ata omulingo omwoyo ogurukwera gukoramu?

⁷ Omwoyo ogurukwera gutukonyera omu mulingo ki ogundi? Nk’oku omuyaga gusobora kukonyera eryato kuraba omu nyanja etatekere, omwoyo ogurukwera nigusobora kutukonyera kugumizaamu nituheereza Yahwe kuhikira kimu omu nsi empyaka nobuturaaba twine ebizibu.

⁸ Omukwenda Petero nk’oku akaba ali musohi, akaba amanyire bingi ebirukukwata ha kugendera ha maizi. Obundi enu niyo ensonga habwaki obwakaba nabazaaho omulingo omwoyo ogurukweta gukoramu akakozesa ekigambo ekiine akakwate n’omulingo amaato gagendera ha maizi. Akahandiika nagamba ati: “Baitu busaho kigambo kyabanabi ekyaletwaga okugonza kwomuntu: baitu abantu abagambaga ebyarugire hali Ruhanga baterekereziibwe omwoyo ogurukwera.” Ekigambo ky’Oruyonaani ekihindurwa “baterekereziibwe” nikimanyisa “kutwarwa.”​—2 Pet. 1:21.

9. Petero obuyakozeseze ekigambo kuterekerezebwa akaba nalengaho kumanyisa ki?

⁹ Petero obuyakozeseze ekigambo kuterekerezebwa akaba nalengaho kumanyisa ki? Luka ayahandiikire ekitabu eky’Engeso Ezabakwenda nawe akakozesa ekigambo ky’Oruyonani nikyo kimu obwakaba n’abazaaho eryato erikaba ‘niritwarwa’ omuyaga. (Eng. 27:15)  Omusaija omukugu omu kuseruliriza ha bya Baibuli akagamba ngu Petero obuyahandiikire ngu abahandiiki ba Baibuli ‘bakaterekerezebwa’ omwoyo ogurukwera akakozesa ekigambo eky’akuletiire abantu kutekerezaaho eryato erirukugendera ha maizi. Nahabweki Petero akaba namanyisa ngu nk’oku omuyaga gukonyera eryato kuhika nambere rirukugenda nukwo n’omwoyo ogurukwera gwakonyire banabbi n’abahandiiki ba Baibuli kuhikiriza omulimo gwabo. Omusaija nuwe omu akagamba ati: “Banabbi bakasisana nkabahanikire ebberu.” Nukwo Yahwe yakora omulimo gwe. Akabaha “omuyaga” rundi omwoyo gwe ogurukwera. Kandi abahandiiki ba Baibuli nabo bakora omulimo yabahaire. Bakakora omulimo gunu nibaterekerezeba omwoyo ogurukwera.

10-11. Bintu ki bibiri ebitusemeriire kukora kusobora kutunga obukonyezi bw’omyoyo ogurukwera? Bazaaho ekyokurorraho.

¹⁰ Ky’amananu ngu kasumi kanu Yahwe takyakozesa omwoyo gwe kukonyera abantu kuhandiika ebitabu bya Baibuli. Baitu nahati omwoyo ogurukwera niguha abantu be amaani. Nahati Yahwe nakyakora omulimo gwe. Kiki ekitusobora kukora kurora omwoyo gwe gwatuterekereza? Naitwe tusemeriire kukora omulimo gwaitu. Kinu nitukikora tuta?

¹¹ Tekerezaaho ekyokurorraho kinu. Omuvugi w’eryato obwaba nagonza omuyaga gumukonyere, asemeriire kukora ebintu binu bibiri. Eky’okubanza asemeriire kuta eryato lye omu muhanda gw’omuyaga. Habwokuba eryato lye tirirukwija kugenda kakuba alikaza ha mwaro nambere hatali omuyaga. Ekyakabiri, asemeriire kwanjurra ebberu ze ekirukumara. N’obuhaba haroho omuyaga ogurukumara, kurora eryato ly’agenda ebberu zisemeriire kutahwamu omuyaga. Omu mulingo nugwo gumu, ekintu kyonka ekisobora kutukonyera kugumiisiriza omu kuheereza Yahwe nugwo omwoyo ogurukwera. Omwoyo ogurukwera kusobora kutukonyera tusemeriire kukora ebintu bibiri. Eky’okubanza, tusemeriire kukora ebintu omwoyo gwa Ruhanga ebiguragira abaheereza be kukora. Ekyakabiri,  tusemeriire kuhanika haiguru muno “ebberu zaitu,” kandi kinu tukikora obututamu amaani gaitu goona kukora ebintu binu. (Zab. 119:32) Obuturakora ebintu binu bibiri, omwoyo ogurukwera nigwija kutuha amaani ag’okugumiisiriza n’okwikara nituheereza Yahwe n’amaani gaitu goona, kuhikya obuturahika omu nsi empyaka.

12. Hati nitwija kubazaaho ki?

¹² Tubalizeeho emiringo ebiri nk’oku omwoyo ogurukwera gutukonyera. Omwoyo ogurukwera gutuha amaani kandi gutukonyera kwikara tuli besigwa obututunga ebizibu. Gutuhabura kandi gutusobozesa kwikara nitukora ebintu ebiratuletera kutunga obwomeezi obutahwaho. Hati leka tubazeeho ebintu bbina ebitusemeriire kukora kusobora kutunga obukonyezi bw’omwoyo ogurukwera.

13. Kusigikirra ha 2 Timoseo 3:16, 17, Ebyahandiikirwe nibisobora kutukonyera kukora ki, kandi itwe tusemeriire kukora ki?

¹³ Eky’okubanza, wesomese Ekigambo kya Ruhanga. (Soma 2 Timoseo 3:16, 17.) Ekigambo ky’Oruyonaani ekihindurwa “ebiterekerezebwa Ruhanga” nikimanyisa “Ruhanga akateeka.” Ruhanga akakozesa omwoyo gwe kuteeka ebitekerezo bye omu bitekerezo by’abantu abahandiikire Baibuli. Obutusoma Baibuli kandi tukecumitiriza ha bitusomere, obuhabuzi kuruga hali Ruhanga butaaha omu bitekerezo byaitu n’omu mutima gwaitu. Obuhabuzi obu obwaterekereziibwe omyoyo ogurukwera butukonyera kukora empindahinduka omu bwomeezi bwaitu n’okukora Yahwe eby’agonza. (Baheb. 4:12) Baitu omwoyo gwa Yahwe kusobora kutukonyera, tusemeriire kutunga obwire oburukumara kwesomesa Baibuli buli kiro n’okwecumitirizaaho ebitusomere. Obu nubwo Ekigambo kya Ruhanga kirahindura embaza n’ebikorwa byaitu.

14. (a) Habwaki nitusobora kugamba ngu ensorrokano zaitu ez’Ekikristaayo zibamu omwoyo ogurukwera? (b) Kiki ekitusemeriire kukora kutunga obukonyezi bw’omwoyo ogurukwera obuturukuba tuli omu nsorrokano?

¹⁴ Ekyakabiri, turamize hamu Ruhanga. (Zab. 22:22) Ensorrokano zibamu omwoyo gwa Yahwe ogurukwera. (Kus. 2:29) Habwaki nitugamba tuti? Habwokuba obutwesorooza hamu n’Abakristaayo bagenzi baitu kuramya Yahwe, tusaba atuhe omwoyo gwe, tuzina ebizina by’Obukama ebirukusigikirra ha Kigambo kya Ruhanga, kandi tutunga obuhabuzi kuruga omu b’oruganda abaakomerwe omwoyo ogurukwera. Kandi omwoyo nugwo gumu gukonyera banyaanya itwe kutekaniza n’okuha ebicweka byabo. Baitu omwoyo ogurukweka kusobora kutukonyera tusemeriire kwija omu nsorrokano twetekaniize kuzejumbiramu. Omu mulingo ogu tuba twetekaniize kutunga omwoyo ogurukwera, nk’amaato againe ebberu ezanjurwire kutahwamu omuyaga.

15. Nitusobora tuta kwikiriza omwoyo ogurukwera kutukonyera omu kutebeza?

¹⁵ Ekyakasatu, tebeza. Obutukozesa Baibuli omu kutebeza hamu n’omu kwegesa tuba nitwikiriza omwoyo ogurukwera kutukonyera omu buheereza bwaitu. (Bar. 15:18, 19) Baitu kusobora kutunga obukonyezi bw’omwoyo ogurukwera, osemeriire kwejumbira omu mulimo gw’okutebeza butoosa kandi okozese Baibuli nambere kirukusoboka. Omulingo gumu ogusobora kukukonyera kutunga abantu abarukugonza kwega Baibuli nukwo kukozesa enyanjura eziri omu Akatubu k’Ensorrokano.

16. Mulingo ki ogukyakizireyo kwanguha ogw’okutunga omwoyo ogurukwera?

¹⁶ Ekyakana, saba Yahwe. (Mat. 7:7-11; Luk. 11:13) Omulingo ogukyakizireyo kwanguha kutunga omwoyo ogurukwera nugwo ogw’okusaba Yahwe agutuhe. Busaho ekintu kyona ekisobora kutanga esaara zaitu kuhika hali Yahwe, kandi ebisiika by’enkomo rundi Sitaani wenyini tasobora kutanga ekisembo kuruga hali Yahwe eky’omwoyo ogurukwera kutuhikaho. (Yak. 1:17)  Tusemeriire kusaba omu mulingo ki kusobora kutunga obukonyezi obw’omwoyo ogurukwera? Kugarukamu ekikaguzo kinu, leka tubazeeho ekyokurorraho ekirukukwata ha kusaba ekirukusangwa omu Njiri ya Luka yonka. *

17. Ekyokurorraho kya Yesu ekiri omu Luka 11:5-9, 13 nikitwegesa ki ha kusaba?

¹⁷ Soma Luka 11:5-9, 13. Ekyokurorraho kya Yesu nikyoleka omulingo tusemeriire kusabamu obuturaaba nitugonza kutunga omwoyo ogurukwera. Omu kyokurorraho kinu, omusaija akatunga eky’akaba nagonza habwokuba ‘akagadya’ rundi atajwahe kusaba munywani we. Yesu akagamba ngu ekyokurorraho kinu nikitwegesa ki? Akagamba ati: “Musabe mulihebwa; muserre mulizora; mwerange mulikingu’rwaho.” Hati, kinu nikitwegesa ki? Obuturaaba nitugonza kutunga obukonyezi bw’omwoyo ogurukwera, tusemeriire kusaba Yahwe agutuhe tutarukujwaha.

18. Kusigikirra ha kyokurorraho kya Yesu habwaki nitukigumya ngu Yahwe naija kutuha omwoyo gwe ogurukwera?

¹⁸ Ekintu ekindi, ekyokurorraho kya Yesu nikitukonyera kumanya ensonga habwaki Yahwe ayetegekere kutuha omwoyo ogurukwera. Omusaija anyakubaziibweho omu kyokurorraho kinu akaba nagonza kukunira omugenyi we. Akaba nagonza kuha omugenyi we owaizire omu bwire bw’ekiro eby’okulya baitu kandi akaba atabiine. Yesu akagamba ngu omutaahi akaha omusaija onu emigaati habwokuba atajwahe kusaba. Yesu akaba nalengaho kwegesa ki? Omuntu atahikiriire obwaraaba nasobora kukonyera mutaahi we owatajwaha kusaba, nitukigumiza kimu ngu Isiitwe ow’omu iguru kandi ow’embabazi naija kuha omwoyo ogurukwera abo boona abagumusaba batarukujwaha. Busaho kugurukyagurukya, Yahwe naija kugarukamu esaara zaitu obuturamusaba omwoyo ogurukwera.​—Zab. 10:17; 66:19.

19. Habwaki nitukigumya ngu nitwija kuba basinguzi?

¹⁹ Nitukigumya ngu Sitaani n’obwaraaba natamu amaani maingi kuturwanisa, nitwija kusingura. Habwaki? Habwokuba omwoyo ogurukwera gutukonyera omu miringo ebiri. Ogw’okubanza, gutuha amaani kusobora kugumiisiriza ebizibu. Ogwakabiri, gutuha amaani agatukonyera kwikara nituheereza Yahwe kuhikya obuturahika omu nsi empyaka. Nahabweki leka tukole kyona ekiturukusobora kurora omwoyo ogurukwera gwagumizaamu nigutukonyera!